Nwin mi Ane No. 37

Nwin inyu nkoñ isi wonsôna

Lisuk li base i bitembee li yé bebee!

▪ Ki i yé base i bitembee?

▪ Lelaa i ga mal?

▪ Lelaa hala a ga tihba niñ yoñ?

Ki i yé base i bitembee?

Baa hala a ntéñga we ngéda mam mabe ma ngwéla inyu jôl li base? Baa gwét, litonbana bôt i nyégsa bo ni njel woñi i boñ jam ba nsômbôl bé, to mam ma nyega, ma i bet ba nkadba le ba ngwélél Djob ba mboñ, ma ntéñga mahoñol ma té sép u gwé? Inyuki i nene wee ngoñle base yon i yé tén i ngandak mam mabe ini?

Ha bibase gwobisôna bé gwon bi gwé njom i mam mabe mana, ndi base i bitembee. Yésu Kristô, ntôô mut u base nkoñ isi wonsô u nyi, a kal le base i bitembee i mboñ le bôt ba bana bilem bibe, nlélém kii “e be i num matam mabe” (Matéô 7:15-17) Mambe matam base i bitembee i num?

Base i Bitembee . . .

◼ BASE I BITEMBEE I NJÔB I GWÉT NI I MBÔ’: Kégikel le Asiaweek a nkal le “I Asia nlélém ni i biloñ bipe, baéga ba mbô’ ba ba nhép ni ane ba ngwélél mahoñol ma base bôt ba gwé i kena bo ni makeñge ni diyana i yônôs ngôñ yap.” Inyu hala nyen kégikel nunu a nti mabéhna le: “Nkoñ isi u nla yin ikété yubda.” Soso ñéga base wada i Amérka a kal le: “Inyu boñ le manola ma mal, nola mintonba.” Ni imbe njel? “Saha bobasôna inyu jôl li Djob.” Ndi Bibel yo i nkal le: “Ibale mut a ñañal le: ‘Me ngwés Djob,’ ndi a oog maansañ, a yé mut bitembee.” (1 Yôhanes 4:20) Yésu nyemede a pot le: “Ni kee ni bisu i gwés baoo banan.” (Matéô 5:44) Bibase gwañen u nla songol le bi gwé bôt ba nyoñ ngaba i gwét?

◼ BASE I BITEMBEE I NLÔG BÔT: Ngandak bibase i niiga le mbuu u yé yom i i ntéa bé ikété mut, u nkônde niñ mbus nyemb nyuu. Ni njel biniigana bini, libim li bibase li njélba bôt bap, ngéda ba mbat bo moni inyu sohene bawoga bap. Ndi Bibel i niiga nyape. “Mbuu u mboñ béba—won u nwo.” (Ézékiel 18:4) “Bayômi ba nyi le b’a wo; ndi bawoga ba nyi bé to jam.” (Ñañal 9:5) Yésu a niiga le bawoga b’a tuglana—jam li li lamnga bé ba nseñ ibale bôt ba bag ba gwé mbuu u nwo bé. (Yôhanes 11:11-25) Baa base yoñ i niiga le mbuu u nwo bé?

◼ BASE I BITEMBEE I NWAS LE BÔT BA BANA MALAL MA MA NTIBA BÉ KUNDE: I ngim biloñ, bibase bi nlômbôl bôlôm ba ba nlal ni bôlôm, ni bôda ba ba nlal ni bôda bipada ni bipastô, bi ntinde ki baane le ba neebe mabii ma bôlôm ni bôlôm ni ma bôda ni bôda. Yak bibase bi bi neebe bé ndéñg, bi ntjél luhul baéga bap ba ba nlal ni bon batitigi. Ndi Bibel, yo, i niiga lelaa i kolba ni jam li? I ntibil yaga kal le: “Ni yôm bañ. To bôt ba bambe, to babégés bisat, to bet ba bôt bape ba ngwélél nya i yé mahéñha ni matéak ma Djob, to bôlôm ba nlal ni bôlôm . . . b’a kôdôl bé Ane Djob.” (1 Korintô 6:9, 10) Ba u nyi bibase bi bi nsudne malal ma ngi kunde mis?

Ki i yé bilôl bi bibase bi bi num matam mabe? Yésu a béhe le: “E ni e i i num bé matam malam i nlama kida, i léña hié.” (Matéô 7:19) Ntiik, base i bitembee y’a séña dikét, dikét, ndi i tjiba! Ndi lelaa ni ngéda i mbe hala a’ bôña? Yiinda mbañ yada i yé ntilbaga i kaat Bibel le Masoola, bipes 17 ni 18, i nti ndimbhe.

Lelaa base i bitembee i ga mal?

Hégda ki jam lini: Muda libambe a yii i ngii nuga i nkônha woñi. Nuga i gwé miño minsambok ni jôm li matoñ. (Masoola 17:1-4) Muda libambe a yé yimbne ki? A mbémbe “bikiñe bi nkoñ isi.” A héba mbot i nkôyôp le tjôôm, a ngwélél binjinjiñ, a bak ki ngwañ nya i nloo héga. I ngi momasôna, a ‘nlugha biloñ gwobisôna ni njel makañ mé.’ (Masoola 17:18; 18:12, 13, 23) Bibel i nhôla bés i nok le i muda libambe nu a yé likoda li bibase bi nkoñ isi. A ta ndik bé yimbne i base yada, ndi i bibase gwobisôna bi bi nti matam mabe.

Nuga muda libambe a yiine i ngii i yé yimbne i ngui mbô’ i nkoñ isi.a (Masoola 17:10-13) Base i bitembee i yiine nuga i mbô’ i ngii, inyu noode bémbe makidik mé ni tat énél yé.

Ndi ndék ngéda, jam li hélha li nke bôña. “Jôm li matoñ u ntehe, ni nuga bikai, bana b’a oo muda libambe, b’a bôm nye, ba yég nye nso, b’a je ki minsôn nwé, ba siiha nye ni hié.” (Masoola 17:16) Kunda yada, biane bi nkoñ isi, bi ga hielba, bi pude base i bitembee, bi tjé yo tjagda! Ki i ga nyuge baane i boñ hala? Kaat Masoola i nti ndimbhe: “Djob a bi kôôba miñem nwap le ba boñ hoñol yé.” (Masoola 17:17) Ñ, Djob a ga boñ le base i bitembee i kôs nsaa inyu bibéba bimam i bi bôñôl i jôl jé. Ikété telepsép yé, a ga gwélél ba ke muda libambe ndéñg inyu tjé nye.

Ki u nlama boñ ibale u ngwés bé bana ngaba ni yom i mbem base i bitembee? Nlegel nwin nu Djob a nti maéba le, “A bôt bem, pama mu nyeni.” (Masoola 18:4) Ni maliga, ngéda ini le u pam ngwé ikété base i bitembee! Ndi u mpam inyu ke ngwé he? Ha yak bet ba nkal le Djob a ta bé bé, inyule to bo bilôl gwap bi ta bé bilam. (2 Tésalônika 1:6-9)Lisolbene li yé ndik jada, base i maliga. Lelaa u nla léba base i maliga?

Lelaa u nla yimbe base maliga

Mambe matam malam i num?—Matéô 7:17.

Base maliga . . .

◼ BASE MALIGA I MBAMBAL GWÉHA: Bañga babégés Djob “i gwé bé ngaba ni nkoñ isi,” i gwé bé mbagla matén, to mbagla inyu mahéñha ma bilem bi niñ, ba mbambal ki ‘gwéha i pôla yap.’ (Yôhanes 13:35; 17:16; Minson mi Baôma 10:34, 35) Iloole ba nolna bo ni bo, ba yé bebee i neebe le ba nôla wada inyu nu.—1 Yôhanes 3:16.

◼ BASE MALIGA I NHÉMLE LE BAÑGA I DJOB I YÉ MBALE: Base maliga i niiga bé “lem loñ” to “mambén ma bôt,” ndi biniigana bi base maliga bi umne ngii bañga Djob le Bibel. (Matéô 15:6-9) Inyuki? Inyule “Tilna yosô i nlôl ni Djob, i mbahal inyu niiga, inyu kodol, inyu téé mam sép” —2 Timôtéô 3:16.

◼ BASE MALIGA I ÑUMUS MAHAA NI HÔLA BÔT I BANA BILEM BILAM: Base maliga i niiga bôlôm le ba ‘gwés baa bap kikii bomede,’ i nhôla bôda le ba hôlôs ‘lipém li li nlôl ñem inyu balôm bap,’ i niiga yak boñge le ‘ba nôgôl bagwal bap.’ (Efésô 5:28, 33; 6:1) I ngii momasôna, base i maliga i mbat i bet ba bééga mbege i likoda le ba ba ndémbél i bilem bilam.—1 Timôtéô 3:1-10.

Baa ngim base i gwé maboñog ma nkiha ni bilem bilam bini? Kaat le La Politique de l’ Holocauste (angl.), i i bi tilba i nwii 2001, i nkal le: “Ibale ngandak bôt i bé gwélél mam Mbôgi Yéhôva i ñañal ni boñ, ki mamut ma bôt ma litén li Lôk Yuda ma bi nôla bé i gwét bi ntôla bi nyônôs biba, ki to mbuma matén wo ki wo w’a lo ha bé i ti nkoñ isi wonsô njôghe i ñem.”

Ni maliga, ikété 235 biloñ, Mbôgi Yéhôva ba añal ndik bé bilem bilam bi Bibel—ndi ba ngwélél gwo i biniñ gwap. Di nti we makénd le u bat bo le ba hôla we i nigil i yi ki Djob a mbat we le u boñ le ndi u la bégés nye nya a nsômbôl. Ngéda ini le u boñ hala. U bem bañ. Lisuk li base i bitembee li yé bebee!—Sôfônia 2:2, 3.

Ibale u gwé ngôñ i kônde bana ndoñol nwin u umne i Bibel Mbôgi Yéhôva ba añal, u kon bañ woñi i tilna bo i nomba nkuu bikaat ini hana i si.

□ I ba bé nsaa, me mbat man kaat nunu le Yéna péé!

□ Me nsoohe, me gwé ngôñ ni yigil i Bibel yañga.

[Buk i si lipep]

[Ipôla nkwel, lipep 3]

“A bôt bem, pama mu nyeni”

[Ipôla nkwel, lipep 3]

Base i bitembee i mbémbe “bikiñe bi nkoñ isi”