Baa Djob a neebe bibase gwobisôna?

1. Inoñnaga ni Bañga i Djob, bibase bi yé ndik biba, bimbe?

“BÉ JUBLANA nwemel ntitigi,” Yésu nyen a kal hala, “inyule njel i yé keñi, i néhi ki, i nkena tjiba, ngandak yon i nkil mu; ndi nwemel ntitigi ni hipagda hi njel hi nkena niñ, ndék yon i nléba yo.” (Matéô 7:13, 14) Inoñnaga ni Bañga i Djob, mintén mi bibase mi yé ndik ma: yada i maliga, ni yada i bitembee; yada i téé, yada i kôdi; yada i nkena niñ, yada i nkena tjiba.

2. Lelaa Bitilna bi ñéba le bibase gwobisôna bé gwon bi nlémél Djob?

² Ngim bôt i nhoñol le bibase gwobisôna bi nkônha Djob maséé. Bipes bi bikaat bini bi ñéba le hala a ta bé maliga:

• “Bon ba Israél ba kônde boñ mam mabe i mis ma Yéhôva, ni bo ba gwélél bi-Baal, ni [biôñgba bi] Astarôt, yak ni banyambe ba Siria, ni banyambe ba Sidôn, ni banyambe ba Môab, ni banyambe ba bon ba Amôn, ni banyambe ba bôt ba Filistia, ndi ba yék Yéhôva, ba gwélél ha bé nye. Ni hiun hi Yéhôva hi kalna Israél.” (Bakéés 10:6, 7) Ibale di mbégés bisat tole djob lipe handugi Djob li maliga, Yéhôva a’ kônôl bé bés maséé.

• “Bôt bana ba mbégés me [Djob] ni bibép gwap, ndi miñem nwap mi mal ke nonok ni me. Yañga nyen ba nkônde ke ni bisu i bégés me, inyule bi niigana gwap bi yé mambén ma bôt.” (Markô 7:6, 7) Ibale bôt ba nkatba le ba mbégés Djob, ndi ba niigaga mahoñol map handugi yom Bibel i niiga, wee libéghene jap li yé yañga. Djob a neebe bé jo.

• “Nyambe a yé mbuu, yak bôt ba [mbégés nye] ba nlama bégés nye ni mbuu ni maliga.” (Yôhanes 4:24) Libéghene jés li nlama kiha ni Bañga Djob.

Matam ma kwéha base

3. Imbe njel yada i ñéba mbagla i pôla base maliga ni kwéha base?

³ Lelaa di nla kal le ngim base i nkônha Djob maséé tole heni? Yésu a kal le: “Hiki e lam i num matam malam, ndi hiki e be i num matam mabe . . . Ni maliga n’a yil bôt ba i matam map.” Hala wee, ibale ngim base i nlôl ni Djob i ga ti matam malam, ndi ibale i nlôl ni Satan i ga ti matam mabe.​—Matéô 7:15-20.

4. Imbe lem lam bagwélél ba Yéhôva ba ñéba?

⁴ Base i maliga i num ndôñ bôt i i gwé gwéha i pôla yap, ba ébga ki yo bôt bape. I yé hala inyule Yéhôva nyemede a yé Djob li gwéha. Yésu a kal le: ‘Haana nyen bôt bobasôna b’a yi le ni yé banigil bem, ibale ni gwé gwéha i pôla nan.’ Lelaa bibase bi nyônôs hini héga hi bañga libéghene?​—Yôhanes 13:35; Lukas 10:27; 1 Yôhanes 4:8.

5. Lelaa bôbôm kaat yada i ntoñol nyunga minkol mi bon ba Afrika?

⁵ Di yoñ héga hi nyunga minkol mi bon ba Afrika. Bôbôm kaat i lôk ngisi le The New Encyclopœdia Britannica i nkal le: “Bebee le 18 000 000 di bon ba Afrika ba bi nuñlana kii minkol i pôla nwii 650 ni 1905 mu manjel ma bahusa ba ñoñ Sahara ni ma tuye India. I tjai di nyônôs jôm ni ditan, yak bon ba Europa ba bi bôdôl nyuñga i ngwañ tuye kéndimbok Afrika. Bebee ni nwii 1867 ipôla 7 000 000 ni 10 000 000 di bon ba Afrika ba bi ke minkôm ikété bisitima letee ni Nkoñ mondo le Amérika.”

6. Lelaa base i bi yoñ ngaba i nyuñga minkol?

⁶ Letee ni himbe hikala base i bi yoñ ngaba munu ndutu Afrika ngéda ba bé kadal bôlôm, bôda, ni boñge i mambai ni mahaa map, ba kañag bo ni minsañ mi bikei, ba tuige bo ni biéña bi nlék, ba ken-ga bo ni nuñul bo kii mabémba ma nyaga? Bethwell Ogot a ntila i Daily Nation, kégikel nu Nairôbi, Kenya, le: “Ndôk bikristen kiki base bahusa ba nkal ikété biniigana gwap le mut binam a yé ndik wada, ndi bon ba bi oñ hikuu hi nyuñga minkol ni lona mbagla matén . . . Di nlama neebe le ni bahusa ni ndôk bikristen, ni kéndimbok ni ñemmbok, ba nkabna hihôha hini, ni maboñog ma ndim ma ma bi boñ le bôt ba Afrika ba son njonok i nlôôha héga mbôgôl ndi mbôgôl nwii.”

Base ni gwét

7. Lelaa baéga ba bibase ba bi yoñ ngaba i gwét?

⁷ Kwéha base i bi éba matam mé mabe ni manjel mape. Kii héga: to hala kii Bibel i nkal le “gwés mut woñ libôk,” baéga ba bibase ikété nkoñ isi wonsôna ba bi nit ni hôlôs gwét ni makénd momasôna.​—Matéô 22:39.

8. (a) Lelaa baéga ba bibase ba bé hôñôs manola i ngéda gwét bi Afrika? (b) Kinje jam pastô yada i bi pot ikolba baéga ba bibase ngéda gwét bi Nigéria?

⁸ Bôt bobasôna ba nyi le nwii 1994, ngim bi “ser” ni bipada ba bi yoñ ngaba i manola ma bôt i Rwanda. Base i bi yoñ ngaba keñi i gwét i biloñ bi Afrika bipe. Kii héga: ngéda matjél ma bé kuba i loñ Nigéria, bibase bi bipes gwo biba bi bi nyuge bôt le ba jo gwét. Kiki gwét bi, bi bé ke ni bisu, pastô yada i kal le baéga ba bibase ba “nwas nson Djob a bi ti bo.” A kal ki le: “Bés ba di nsébla le bagwélél ba Djob, di nyila bagwélél ba Satan.”

9. Kii Bibel i nkal inyu bagwélél ba Satan?

⁹ Bibel i nkal yaga nlélém jam: “Satan nyemede a nhéñba le a yé añgel mapubi. Jon hala a ta bé mañ jam ibale bagwélél bé ba nhéñba le ba yé bagwélél ba telepsép.” (2 Korintô 11:14, 15) Nlélém kii ngandak bibéba bi bôt bi nkatba le bi yé bi loñge, hala ki nyen Satan a bi lôk bôt ni bagwélél ba ba nene kii bôt ba téé sép ndi ki maboñok map, ni matam map ma yé mabe.

10. Ni imbe njel baéga babibase ba bi tañba Djob?

¹⁰ Ikété nkoñ isi wonsôna baéga ba bibase ba bi añle bôt gwéha, nsañ, ni loñge, ndi ba bi bôñôl ôa, gwét, ni liyan Djob. Bibel i ntibil yaga pot inyu yap. I nkal le: ‘I bisu bi bôt ba nkal le ba nyi Nyambe, ndi ba ntañba nye ni maboñok map.’​—Titô 1:16.

Pama mu “Babilôn nunkeñi”

11. Ni njee Bibel i nhégha kwéha base?

¹¹ Di nla tehe yom Yéhôva a nhoñle kwéha base ngéda di ñañ kaat i Bibel le Masoola. Mu i kaat i, ba nhégha kwéha base ni muda le “Babilôn nunkeñi”. (Masoola 17:5) Yimbe kii Djob a ntoñol lelaa a yé:

• “Muda libambe nu nkeñi . . . ni nye nyen baane ba nkoñ isi ba bi ke ndéñg.” (Masoola 17:1, 2) I loo le i yéñ i adbe Djob, kwéha base i bi jubus yomede i mbô’; ngandak ngélé, yon i kalak baénél yom ba boñ.

• “I nyeni nyen ba bi léba matjél ma bapôdôl ni ma bapubi ni ba bobasôna ba bi nôla i nkoñ isi.” (Masoola 18:24) Kwéha base i bi tééñga ni nol bagwélél ba Djob ba maliga, yon i bééga ki mbegee i nyemb didun di bôt ngéda gwét.

• “A bi bégés nyemede, a yogop i nya i nsuñgaha ñem.” (Masoola 18:7) Kwéha base i gwé lingwañ likeñi, mu nyen baéga bé ba yôgne.

• “Ni bibôñôl [gwé] bi makañ, a bi yumus biloñ gwobisôna.” (Masoola 18:23) Ni njel biniigana bi bitembee le mbuu u nwo bé, kwéha base i bi néhne ndôñ makañ yosô njel, i hôlôs ki woñi u bawoga ni libéghene li basôgôlsôgôl.

12. Mambe mabéhna Bibel i nti i kolba kwéha base?

¹² Bibel i nti bôt mabéhna ma ngui le ba pam i kwéha base i ngéda i nkal le: “Pama mu nyeni, a litén jem, ibale ni ngwés bé le ni yoñ ngaba ni bibéba gwé, ni ibale ni ngwés bé le yak bé ni kôs dimala tjé.”​—Masoola 18:4, 5.

13. Kii i ga pémél kwéha base ni bet ba mbôñol yo?

¹³ Ndék ngéda, Babilôn nunkeñi, kwéha base i nkoñ isi wonsôna, y’a tjiba hies. Bibel i nkal le: “Mpom kel wada dimala tjé d’a kwél nye: nyemb, ni malep, ni njal. Ndi a’ siihana nyensôna ni hié, inyule [Yéhôva Nyambe] nu a mal pémhene nye mbagi, a yé ngui.” (Masoola 18:8) Inyu boñ le di kôs bañ dimala tjé, di nlama kit maada momasôna ni kwéha base. Di nlama bé yoñ ngaba yo kii yo ni maboñok, to ni mangand, to ni biniigana bi bi mbébél Djob. Di pala boñ hala. Niñ yés i tiñne mu!​—2 Korintô 6:14-18.