Kii yé ñañ nlam inyu jam li base?

1. Baa bibase gwobisôna bi yé loñge?

Bibase gwobisô bi gwé bôt ba ngwés maliga. Ñañ nlam u yé le Djob a ntehe bôt ba, a ntôñ ki bo. Ndi bôt ba ngwélél bibase inyu boñ mam mabe. Hala a yé ngoo ngandak. (2 Korintô 4:3, 4; 11:13-15) Mañwin ma nkal bés le bibase bipe bi nit mintôñ mi bôt mi ngwélél manola inyu kwés ngomén. Bibase bi nyoñ ngaba i gwét ipôla matén ni ipôla biloñ, bi nhô yak bôt ba ba ñôbôs boñge. Mam mana ma nsiida miñem mi bôt ba nhémle Djob ni maliga!​—Añ Matéô 24:3-5, 11, 12.

Bañga base i nti Djob lipém, ndi kwéha base i mbébél nye. Base i bitembee i niiga mahoñôl ma nlôl bé ikété Bibel. Kii héga, ba niiga bé maliga inyu Djob ni inyu bawoga. Ndi Yéhôva a gwé ngôñ le bôt ba binam ba yi maliga inyu yé.​—Añ Ézékiel 18:4; 1 Timôtéô 2:3-5.

2. Umbe ñañ nlam u yé inyu jam li base?

Bibase bi bitembee bi nla bé lôg Djob le bi gwés nye, ndi bi boñog kii bi ngwés i nkoñ isi u Satan. (Yakôbô 4:4) Bañga i Djob i nsébél bibase bi bitembee gwobisôna le “Babilôn nunkeñi.” Kwéha base i bi bôdôl i nlômbi tison u Babilôn, mbus Ntida Malép i dilo di Nôa. Ndég ngéda, Djob a ga sas bibéba bi bibase bi bi nlôg bôt, bi boñog le bôt ba son njonok.​—Añ Masoola 17:1, 2, 5, 16, 17; 18:8.

Ndi ñañ nlam u nsôk bé ha. Yéhôva a nhôya bé bôt ba nhémle nye, to ibale ba yé ntjamak ikété ngandak bibase bi bitembee. A yé kot bo ni njel yigil i maliga, ma ma yé ikété Bibel.​—Añ Mika 4:2, 5.

3. Kii bôt ba ngwés maliga ba nlama boñ?

Yéhôva a ntôñ bôt ba ngwés maliga. A mbat le ba hoo pam ikété bibase bi bitembee. Bôt ba ngwés Djob ba neebe i boñ mahéñha inyu noñ yom Bibel i nkal.​—Añ Masoola 18:4.

Ngéda banigil ba Yésu ba bisu, bôt ba bi emble miñañ minlam ni njel baôma, ba bi neebe mo ni masé. Ba bi nigil njel yondo i lémél Yéhôva. Njel i, i bé loñge inyule i bi lona bo masé, i ti ki bo botñem. Ba nti bés loñge ndémbél i len ini, inyule ba bi tibil leege miñañ minlam, ba boñ ki le Yéhôva nyen a ba nu bisu i niñ yap.​—Añ 1 Tésalônika 1:8, 9; 2:13.

Ba bobasô ba pam ikété bibase bi bitembee, Yéhôva a nkal bo le: ‘Malo malam!’ Ibale u neebe nsébla u Yéhôva, u ga yila liwanda jé. U ga jôp ikété lihaa li yondo li bagwélél Yéhôva. Mbus, u ga kôhna ñiñ boga.​—Añ Markô 10:29, 30; 2 Korintô 6:17, 18.

4. Lelaa Djob a ga lona masé i nkoñ isi?

Mbagi tjiba i bikwéha bi base i yé ñañ nlam. I ga lona hogbe inyu ba bobasô ba yé ikété njôghe. Kekikel, kwéha base y’a ga yumus ha bé bôt, to bagal bo. Ba bobasôna ba mbégés bañga Djob ba ga ba ndigi ikété base yada.​—Añ Masoola 18:20, 21; 21:3, 4.