Bôt ba pei Ntida Malép

BÉBA bi yon i nkoñ isi ngéda bôt ba bi kahal bôl. Mut wada ba bé sébél le Énok nyetama nyen a bé a mbéhe bôt le kel yada, Djob a ga tjé baboñbéba. Ndi tohala, béba i bi nai. Biañgel bihogi bi bi ndogbene Yéhôva, bi yôy liyééne jap i ngii. Kiki ba nyoñ manyu ma bôt ba binam, ba bôdôl yôñôl bomede baa. Mana mabii mabe ma bi gwal mimpémba mi bon ba bé sébél le Néfilim. Ba bi yônôs hisi ni njôô ni manola. Ni hala a siidaha Djob ñem ngéda a tehe le béba i ñôbôs hisi a bi heg.

Mbus nyemb i Énok, mut wada a bi telep, jôl jé le Nôa; a ba mahéñha ni baa bôt bape bobasô. Nye ni lihaa jé ba bé boñ gwom Djob a ngwés. Ngéda Djob a kit le a ntjé bibéba bi bôt, a bi gwés le a tohol Nôa, binuga ni dinuni. Ni nye a kal Nôa le a mbañ nkuu, soso sitima. Mu ikété nkuu nyen Nôa, lihaa jé ni mintén mi binuga nwomisô, ba ga péyéy Ntida Malép. Ni Nôa a nôgôl Djob. Ngéda a ba bañ nkuu u u yoñ 40 tole 50 ma ñwii, a ba ki “ñañal telepsép.” (2 Pétrô 2:5) A ba béhe bôt le Ntida Malép u nlo, ndi ba bi emble bé nye. Ngéda i bi kola bañ, Nôa, lihaa jé ni binuga ba jôp ikété nkuu. Mbus hala, Djob a yip kôga, nop a bôdôl no.

Mbimba nop i bi no 40 ma mus ni 40 mau letee hisi hiosô hi yin i malép, bibéba bi bôt gwobisôna bi wo. Mbus ha, bebe le sôñ tan i bi tagbe ilole malép ma mbôdôl sa. Nkuu u sôk bañ kahap i ngii hikôa hada, ha nyen Nôa, lihaa jé ni binuga gwobisô ba bi pam. Ba bi nom ngim ñwii ikété nkuu. Kii ba pam, Nôa a ti Yéhôva binuga kiki sesema i ti nye mayéga. Ni Djob a ntimbhe, a bôn nye le a ga gwélél ha bé Ntida Malép i tjé bôt ba binam. Yéhôva a téé nyum i ont kiki yimbne i malômbla i nhôñlaha mbônga wé.

Mbus Ntida Malép, Djob a ti bôt ba binam mambén ma mondo ma. A ti bo kunde i je binuga, ndi a sôña bo i je matjél. A ti ki mbôda i Nôa mbén le ba yônôs hisi, ndi ngandak yap i bi ndogbene Djob. Nimrôd a bé i ño u bôt ba bi kodba le ba oñ nkum ndap i nkoñ u Babel tole Babilôn. Ngôñ yap i bé le ba tjél nôgôl mbén i Djob i i bé kal bo le ba yônôs hisi. Ndi Djob a sôña bo i yônôs sômbôl yap, ni nye a yubda hilémb hiap le ba pot ngandak dilémb. Ba tehe bañ le ba nôgla ha bé hop, ba tjôô maoñ map, ni bo ba tjama ni nkoñ isi wonsô.

​—Biniigana bini bi nyoñna i bikaat bi Bibôdle pes 6 i pam 11.