Kii i nla hôla bés i ti maéba malam?

1. Bonjee ba nlama ti bôt bape maéba? Toñol.

BAA U ngwés u nti bôt maéba? Bôt bahogi ba ngwés hala. Ndi bôt bape ba ngwés bé ba nti maéba tole ba nkon woñi i ti mo. To i ba lelaa, ngim mangéda hiki wada wés a nlama ti mut numpe maéba. Inyuki? Inyule Yésu a bi kal le gwéha i yé yimbne i banigil bé. (Yôhanes 13:35) Di ñunda lôk kéé i bôlôm ni i bôda gwéha i ngéda di nti bo maéba. Bibel i nkal le: “Maéba malam ma mboñ le mut a kôhna bañga liwanda.”​—Bingéngén 27:9.

2. Kii mimañ mi nlama boñ, inyuki? (Béñge yak minkéñék mi matila mini le “Maéba ba nti bés i likoda li ñem sonde.”)

² Mimañ mi nlama ba bôt ba bisu i ti bôt bape maéba malam. Yéhôva bo Yésu ba bi ti bo nson le ba tat lôk kéé. (1 Pétrô 5:​2, 3) Ba mboñ hala i ngéda ba nti lôk kéé maéba mu minkwel nwap. Ba nlama ti hiki mankéé maéba, yak i bet ba bi ke haa ni Yéhôva. Kii i nla hôla mimañ ni ini lôk kéé ipe i ti maéba malam?

3. (a) Kii i nla hôla bés i ti lôk kéé maéba malam? (Yésaya 9:6; béñge yak minkéñék mi matila mini le “Di nigle Yésu i ngéda di nti maéba.”) (b) Kii d’a tehe munu yigil ini?

³ Ndémbél i bôt bahogi Bibel i mpôdôl i nla hôla bés i ti bôt maéba malam, téntén ndémbél i Yésu. Bibel i nsébél nye le: “Loñge Nti maéba.” (Añ Yésaya 9:6.) Munu yigil ini, di ga tehe kii di nlama boñ ibale mut a mbat bés maéba ni kii di nlama boñ ibale i mbéda le di ti mut maéba ki le a mbat bé bés mo. Di ga tehe ki kii i nla hôla bés i ti mut maéba malam i loñge ngéda.

I NGÉDA MUT A MBAT BÉS MAÉBA

4-5. I ngéda mut a mbat bés maéba, imbe mbadga di nlama ndugi badba? Ti hihéga.

⁴ I ngéda mut a mbat bés maéba, kii di nlama ndugi boñ? Di yé le di bana ngôñ i hoo pot. Ndi di nlama badba le: ‘Baa me kôli ti nye maéba munu jam lini?’ Ngim mangéda, d’a tehe le di kôli bé ti i mut nu maéba, ndi di nla unda nye mut nu a nla ti nye maéba malam.

⁵ Di yoñ le hihéga. Hégda le liwanda joñ li nkon ngandak, ndi a kal we le a mbôdôl yéñ matibla, a bat we le u kal nye mambe matibla ma nla ba loñge inyu yé. Bebek u nyi ngim matibla i i nlémél we, ndi u ta bé dokta. Inyu boñ le u hôla liwanda joñ, i mbéda le u unda nye mut nu a nla toi tibil nye.

6. Ngim mangéda, inyuki di nlama bem ilole di nti mut maéba?

⁶ To ibale di nhoñol le di kôli ti mut maéba, di nla ndugi bem ndék ilole di ntimbhe i mut a mbat bés maéba. Inyuki? Bingéngén 15:28 a nkal le: “Mut a téé sép a nhek pék ilole a ntimbhe.” Ndi ibale di nhoñol le di nyi lelaa di nla timbhe, kii di nlama boñ? Di nla yoñ ngéda i nigil, i soohe, ni i ôt pék. Hala a ga boñ le maéba més ma kiha ni sômbôl i Yéhôva. Di béñge i jam li bi pémél mpôdôl Natan.

7. I jam li bi pémél mpôdôl Natan li niiga kii bés?

⁷ Kiñe David a bi kal mpôdôl Natan le a nsômbôl oñ témpel Yéhôva. Natan a hoo timbhe nye, a kal nye le a oñok. Ndi i bé béda le Natan a bat ndugi Yéhôva mahoñol mé ilole a ntimbhe David. Inyuki? Inyule sômbôl i Yéhôva i bé bé le David nyen a oñ témpel. (1 Miñañ 17:​1-4) I jam li bi pémél Natan, li niiga bés le i ngéda ba mbat bés maéba, di nlama ‘tiñha pot.’​—Yakôbô 1:19.

8. Kii ipe i nlama tinde bés i ôt pék ilole di nti mut maéba?

⁸ Di béñge jam lipe li li nlama tinde bés i yoñ yihe i ngéda di nsômbôl ti mut maéba: Ibale di nti mut maéba, ndi jam libe li pémél nye, kiññem i ga kéés bés. Inyu hala nyen di nlama yoñ ngéda i ôt pék ilole di nti mut maéba.

I NGÉDA DI NTI MUT MAÉBA KI LE A MBAT BÉ BÉS MO

9. Ilole mimañ mi nti maéba, kii mi nlama ndugi wan? (Galatia 6:1)

⁹ Ngim mangéda, mimañ mi nlama ti lôk kéé i bôlôm ni bôda i i “nyoñ béba njel” maéba. (Añ Galatia 6:1.) Note d’étude mu nlôñ u, i nkal le mut “a yé le a boñ mam ma ma nla tinde nye i boñ béba ikeñi.” Mimañ mi nlama hôla i nya mut i, i yén i njel i nkena i niñ boga. (Yakôbô 5:​19, 20) Ndi inyu pam i ti maéba malam, ba nlama ndugi wan inyu yi ibale i mankéé nu a nyoñ toi béba njel. Yéhôva a bi ti bés kiññem inyu boñ le hiki wada wés a yoñ mé mé makidik. (Rôma 14:​1-4) Ndi ibale i mankéé nu a nyoñ toi béba njel ndi mimañ mi lo i ti nye maéba, kii mi nlama boñ?

10-12. Kii mimañ mi nlama boñ i ngéda mi nlama ti maéba ki le ba mbat bé bo mo? Ti hihéga. (Béñge yak bititii.)

¹⁰ I ngéda mañ u nlama ti mankéé maéba ki le a mbat bé nye mo, hala a ta bé jam li ntomb. Inyuki? Ñôma Paul a bi kal le mut a nla yoñ béba njel ilole a nyimbe hala. Jon mañ u nlama ndugi boñ ngim mam inyu boñ le mankéé a emble maéba mé.

¹¹ Ibale di nlama ti mut maéba ki le a mbat bé bés mo, a yé ndik wee di mbel mbôô i hisi hi nlet. Ilole u mbel mbôô i hisi hi nlet, u nlama ndugi tém ’isi. Hala a mboñ le hisi hi tomb, ndi u bel mbôô. I mbus, u nkôp malép inyu boñ le mbôô i nañ. Hala nyen yak mañ u mboñ, ilole a nti maéba, a mboñ ndugi ngim mam inyu boñ le mankéé a emble maéba mé. Kiki hihéga, mañ u nla kwel ni mankéé i loñge ngéda inyu yis nye le a ntôñ nye. Ibale mañ u ngwés lôk kéé, u ban-ga loñgeñem, lôk kéé i ga pala emble maéba mé.

¹² Inyu boñ le mankéé a ba bebee i emble maéba, mañ u nlama kal nye le bésbobasôna di nhôs. Jon, bésbobasôna di gwé ngôñ ni maéba ngim mangéda. (Rôma 3:23) Ibabé i nyéyéi nye, ni lipém jolisôna, mañ u ngwélél Bibel inyu éba nye le a nyoñ béba njel. Ibale mankéé a neebe toi le a nyoñ béba njel, mañ u nkal nye kii a nlama boñ inyu héñha. I mbus, mañ u mbégés nye inyu mam malam a mboñ, a soohe ki ni nye.​—Yakôbô 5:15.

13. Kii mimañ mi nla boñ inyu boñ le mankéé a tibil nok i jam ba yé kal nye?

¹³ Ngim mangéda, i mut di yé i ti maéba a ntibil bé nok i yom di yé i kal nye. Kii mimañ mi nlama boñ inyu hôla mankéé i tibil nok i yom ba yé i pot? Ba nla bat nye mambadga ni bibuk bilam inyu hôla nye i tibil nok i jam ba nsômbôl kal nye. (Ñañal 12:11) I mandimbhe mankéé a ga ti ma ga hôla mimañ i yi too a nok toi i jam ba yé i kal nye.

DI TI MAÉBA MALAM I LOÑGE NGÉDA

14. Baa di nlama ti mut maéba i ngéda di yé ñunbak? Toñol.

¹⁴ Bésbobasôna di yé bikwéha bi bôt, jon di nla pot jam tole di nla boñ jam li li ñunbaha bôt bape. (Kôlôsé 3:13) Bibel i ñéba le ngim mangéda, di nla pot jam li li ñunbaha mankéé. (Éfésô 4:26) Jon i ngéda di yé ñunbak, di nlama bé ti mut maéba. Inyuki? “Inyule hiun hi mut binam hi nlona bé telepsép i Nyambe.” (Yakôbô 1:20) I ngéda di nti mut maéba di bak ñunbak, d’a boñ nye béba iloole di boñ nye loñge. Hala a nkobla bé le ibale mut a ñunbaha bés, di nlama bé kal nye hala. Ndi di nlama bem i ngéda d’a ba ha bé ñunbak inyu boñ le di kal nye i jam li. Béñge i loñge ndémbél Élihu a bi yigle bés.

15. Ndémbél i Élihu i niiga kii bés? (Béñge yak titii.)

¹⁵ Élihu a bi yén ha ngandak dilo, a emblege Hiôb a nkal le mawanda mé ma ñôm nye nsohi yañga. A bi kônôl Hiôb ngoo. Ndi Élihu a bi unbene yak Hiôb inyule a bi héléé i unda le a téé sép, a podok mam ma téé bé inyu Yéhôva. To hala, Élihu a bi bem letee ngéda i kola le yak nye a yoñ hop. A bi ti Hiôb maéba ni nwee nyensôna, a tinak nye lipém. (Hiôb 32:2; 33:​1-7) Ndémbél i Élihu i ñunda bés le di nlama bé ti mut maéba i ngéda di yé ñunbak. Yak i ngéda di nti mut maéba, di nlama ti nye lipém, di undga le di ngwés nye.​—Ñañal 3:​1, 7.

DI KEE NI BISU I TI MAÉBA NI I EMBLE MO

16. Kaat Tjémbi 32:8 i niiga kii bés?

¹⁶ Yéhôva a nkal le: “M’a ti we maéba, me tadak we.” (Añ Tjémbi 32:8.) Hala a ñunda le a yé ni bés hiki ngéda inyu hôla bés. A nti ndik bé bés maéba, ndi a nhôla ki bés i noñ mo. Hala a yéne bés ndémbél ilam kiyaga! I ngéda di nti bôt bape maéba, di nlama nigle Yéhôva. Hala a nkobla le di kee ni bisu i ti i mut di nti maéba makénd, di hôla ki nye i yoñ makidik malam.

17. I ngéda mimañ mi nti maéba malam, lelaa lôk kéé i ntehe bo? Toñol. (Yésaya 32:​1, 2)

¹⁷ Munu ngéda ini, i mbéda toi le di ti lôk kéé maéba malam, ni le ba ti yak bés maéba malam. (2 Timôtéô 3:1) Mimañ mi mi ngwélél Bañga i Djob inyu ti lôk kéé maéba mi yé “kiki diléléba i nnumuk nkoñ.” (Añ Yésaya 32:​1, 2.) Di yé maséé i ngéda mawanda més ma nkon bé woñi i ti bés maéba. Maéba map ma yé “kiki matam ma gôl ikété biséya bi silba.” (Bingéngén 25:11) Di kee ni bisu i nigil inyu boñ le di laa ti lôk kéé maéba malam, ni le yak bés di emble maéba malam.