Neebe le Yéhôva a ngwés we

1. Inyuki u bi ti Yéhôva niñ yoñ? (Béñge yak titii.)

BAA u ngi bigdaga i ngéda u bi ti Yéhôva niñ yoñ? U bi yoñ makidik ma inyule u bi yi nye, u gwés ki nye. U bi bôn nye le sômbôl yé yon i ga ba jam li bisu i niñ yoñ, ni le u ga gwés nye ni ñem woñ wonsôna, ni niñ yoñ yosôna, ni mahoñol moñ momasôna, yak ni ngui yoñ yosôna. (Markô 12:30) Ibôdôl ha ngéda i, u nkônde gwés nye kiki ngéda i ntagbe. Jon ibale mut a mbat we le: “U ngwés Yéhôva?” U ga timbhe laa nye? Kunda yada, u ga timbhe nye le: “Me ngwés nye iloo mam momasôna, iloo bôt bobasôna!”

2-3. Kii Yéhôva a nsômbôl le di neebe, kii d’a tehe munu yigil ini? (Yérémia 31:3)

² Ndi ibale mut a mbat we le, “Baa Yéhôva a ngwés we?” U ga timbhe lelaa? Baa u ga kon woñi i timbhe, bebek inyule u nhoñol le u kôli bé le Yéhôva a gwés we? Mankéé nu muda wada, nu a bi boma mandutu i ngéda a bé nañ, a nkal le: “Me nyi le me ngwés Yéhôva, pééna yo ki yo i ta bé ha. Ndi libim li ngéda, me mbadba too Yéhôva a ngwés me.” Ndi baa Yéhôva a ngwés toi we?

³ Yéhôva a nsômbôl le u yi le a ngwés we. (Añ Yérémia 31:3.) Yéhôva nyemede nyen a bi ôt we. I ngéda u bi ti nye niñ yoñ, u sôblana, Yéhôva a bi kônde gwés we. A ngwés we kiyaga, a yé mbén i tjôô we. A ntehe bagwélél bé bobasôna yak ni we mu lôñ i, kiki ‘tik yé yom.’ (Malaki 3:​17, buk isi lipep.) Kiki ñôma Paul a bé yi le Yéhôva a ngwés nye, hala yak nyen Yéhôva a ngwés le u yi le a ngwés we. Paul a bi kal le: “Me yé nkwoog nkaa le to nyemb to niñ, to biañgel to bangomin, to mam ma yé hanano to mam m’a ke i lo, to ngui, to ngii to ndip, to hégél ipe yo ki yo i ga la bé bagal bés ni gwéha Nyambe.” (Rôma 8:​38, 39) Munu yigil ini, d’a tehe inyuki i mbéda le di yi le Yéhôva a ngwés bés, ni kii i nla hôla bés i boñ hala.

INYUKI DI NLAMA NEEBE LE YÉHÔVA A NGWÉS BÉS

4. Lelaa di yé le di kolba dipa di Nsohop?

⁴ I ngéda di neebe le Yéhôva a ngwés bés, di nkolba “dipa” di Satan. (Éfésô 6:11) Satan a yé bebee i boñ to kii inyu sôña bés i sélél Yéhôva. Hipa hié hiada hi yé le a nsômbôl teembene bés le Yéhôva a ngwés bé bés. U hôya bañ le Satan a gwééne bés minsoñgi mimbe. A mbéna lo i noode bés i ngéda nduña i nyuu bés inyu mam ma bi tagbe behee i niñ yés, inyu mandutu di mboma nano, tole i ngéda di mbadba mambadga inyu dilo di nlo. (Bingéngén 24:10) Satan a yé kiki mbondo njéé i i nsômbôl je nuga i i gwééba bé. I ngéda nduña i yé bés nnayak, ha nyen a nyéñ manjel i tômbôs bés. Ndi ibale di mpééna bé kekikel le Yéhôva a ngwés bés, ha nyen d’a la ‘kolba’ Satan ni dipa tjé. ​—1 Pétrô 5:​8, 9; Yakôbô 4:7.

5. Inyuki di gwé ngôñ le Yéhôva a gwés bés?

⁵ Ibale di neebe le Yéhôva a ngwés bés, ha nyen d’a kôôge nye bebee. Inyuki di nkal hala? Yéhôva a bi hek bés le di gwés bôt, yak bo ba gwés bés. I ngéda bôt ba ngwés bés, yak bés di ngwés bo. Jon kiki di ntehe Yéhôva a ngwés bés, hala nyen yak bés di ngwés nye. (1 Yôhanes 4:19) Kiki di nkônde gwés nye, hala nyen yak nye a nkônde gwés bés. Bibel i nkal le: “Kôôgana bebee ni Nyambe, ndi yak nye a’ kôôge bé bebee.” (Yakôbô 4:8) Ndi kii i nla hôla bés i yi le Yéhôva a ngwés toi bés?

KII I NLA HÔLA BÉS I NEEBE LE YÉHÔVA A NGWÉS BÉS?

6. Kii i nla hôla bés i neebe le Yéhôva a ngwés bés?

⁶ Kal Yéhôva i jam li ntééñga we, u waa bañ soohe nye. (Lukas 18:1; Rôma 12:12) Soohe Yéhôva hiki ngéda le a hôla we i tehe wemede kiki a ntehe we. Ngim mangéda, mandutu ma nla tinde we i hoñol le Yéhôva a nla bé gwés we. Ndi u hôya bañ le Yéhôva a nloo ñem woñ. (1 Yôhanes 3:​19, 20) A nyi we loñge loñge iloo wemede; a ntehe yak i mam we u nla bé tehe. (1 Samuel 16:7; 2 Miñañ 6:30) Jon u kon bañ woñi i ‘yible’ nye ñem, bat Yéhôva le a hôla we i neebe le a ngwés we. (Tjémbi 62:8) I ngéda u mal soohe, u nla boñ i mam di nke tehe hanano.

7-8. Lelaa kaat Tjémbi i ñéba bés le Yéhôva a ngwés bés?

⁷ Neebe i jam Yéhôva a nkal we mu Bañga yé. A bi gwélél mbuu mpubi wé inyu tinde bôt i toñle bés lelaa a yé toi. Di béñge bibuk David a ngwélél inyu pôdôl Yéhôva. A nkal le: “Yéhôva a yé bebee ni ba ba nok njôghe i ñem; a ntohol ki ba ba nimis makénd.” (Tjémbi 34:18) I ngéda nduña i nai, u nla hoñol le u yé wetama. Ndi Yéhôva a nkal we le a yé we bebee inyule a nyi le ha ngéda i, u gwé toi ngôñ ni nye. David a nkal ki homa numpe i kaat Tjémbi le: “Tééda gwiiha gwem ikété hibôi hioñ hi bikôp.” (Tjémbi 56:8) Yéhôva a ntehe mandutu moñ. A ntôñ we ngandak, a ntehe i mam momasôna ma ntééñga we. A ntehe gwiiha gwoñ, a yé ndik wengoñle a ntééda gwo kiki man Lôk Israel a bé tééda malép mé i hibôi, i ngéda a bé ke liké. Di ñañ i kaat Tjémbi 139:3 le: “U [Yéhôva] nyi yaga mam momasôna me mboñ.” Yéhôva a mbéñge mam momasôna u mboñ ndi mam malam mon a nlôôha béñge. (Lôk Héber 6:10) Inyuki? Inyule i ngéda u mboñ biliya i lémél nye, hala a nkônha nye maséé.a

⁸ A yé ndik wengoñle Yéhôva a yé kal we munu minlôñ mini le: “Me gwé ngôñ le u yi le me ngwés we ngandak, me ntôñ ki we ngandak.” Ndi kiki di mbôk di tehe, Satan a ntembee le Yéhôva a nla bé gwés we. Jon ibale u nkahal pééna le Yéhôva a ngwés bé we, mômôs nyuu, u badba le, ‘Njee me nhémle, “isañ bitembee” tole “Nyambe nu maliga”?’​—Yôhanes 8:44; Tjémbi 31:5.

9. Kii Yéhôva a mbôn i bôt ba ngwés nye? (Manyodi 20:​5, 6)

⁹ Hoñol lelaa Yéhôva a ngwés i bet ba ngwés nye. Di béñge i yom Yéhôva a bi kal Môsi ni bon ba Israel. (Añ Manyodi 20:​5, 6.) Yéhôva a mbôn le i bôt ba ngwés nye, a nwaa bé gwés bo. I bibañga bi, bi ñéba le di ta bé le di gwés Yéhôva, ndi nye a gwés bé bés. (Néhémia 1:5) Jon ibale u nkahal badba le, ‘Baa Yéhôva a ngwés me? Yoñ ngéda, u badba le, ‘Baa me, me ngwés Yéhôva?’ Bigda le ibale u ngwés Yéhôva, u boñok biliya i lémél nye, yak nye a ngwés we ngandak. (Daniel 9:4; 1 Korintô 8:3) Hala a nkobla le ibale u nyi le u ngwés Yéhôva, u nlama bé pééna le a ngwés we. Pééna yo ki yo i ta bé le a ngwés we ngandak, a ga tjôô bé to we kekikel.

10-11. Lelaa Yéhôva a nsômbôl le u tehe binoñ? (Galatia 2:20)

¹⁰ Hoñol binoñ. Likébla li Yéhôva li li nloo makébla momasôna li yé sesema i Man wé Yésu. (Yôhanes 3:16) Ndi baa wen Yéhôva a bi ti likébla li? Ñ! Di béñge le ndémbél i ñôma Paul. Di bigda le ilole a nyila kristen, a bi boñ bibéba bikeñi. Yak i ngéda a bi yila kristen, a bi ke ni bisu i jo sañ inyu lémél Yéhôva. (Rôma 7:​24, 25; 1 Timôtéô 1:​12-14) Ndi to hala, a bi kal le Yésu a bi wo inyu yé. (Añ Galatia 2:20.) U hôya bañ le Yéhôva nyemede nyen a bi kal Paul le a tila bibañga bi. Jam lipe li yé le i mam momasôna ma yé ikété Bibel ma yé ha inyu niiga bés. (Rôma 15:4) Bibañga bi Paul bi ñunda le Yéhôva a nsômbôl le u bigda le Yésu a bi wo inyu yoñ. Ibale hala nyen u ntehe likébla li, w’a pééna ha bé le Yéhôva a ngwés we.

¹¹ Di nti Yéhôva mayéga hala kii a bi ep Yésu hana ’isi le a wo inyu yés. Ndi i jam lipe li bi lona Yésu hana ’isi li bé le a añle bôt maliga inyu Nyambe. (Yôhanes 18:37) Mu maliga ma, jam jada li yé le Yéhôva a ngwés bon bé.

LELAA YÉSU A NHÔLA BÉS I NEEBE LE YÉHÔVA A NGWÉS BÉS?

12. Inyuki di kôli hémle i jam Yésu a nkal inyu Yéhôva?

¹² I ngéda Yésu a bé hana ’isi, a bi sôô bé bés lelaa Isañ a yé. (Lukas 10:22) Di kôli hémle mam momasôna Yésu a nkal bés inyu Isañ. Yésu a bi nom ngandak i ngii ni Yéhôva ilole a nlo hana ’isi. (Kôlôsé 1:15) Yésu a bi tehe yaga ni mis mé lelaa Yéhôva a ngwés bon bé. Lelaa Yésu a nhôla bôt i neebe le Yéhôva a ngwés bo?

13. Lelaa Yésu a nsômbôl le di tehe Yéhôva?

¹³ Yésu a nsômbôl le di tehe Yéhôva kiki nyemede a ntehe nye. Ibôdôl i kaat Matéô ikepam i kaat Yôhanes, Yésu a ngwélél i buk ini le “Tata” iloo 160 ngélé. I ngéda a bé pôdôs banigil bé, a bé gwélél bibuk bini le “Isoñ nan” tole “Isoñ nan nu a yé i ngii.” (Matéô 5:16; 6:26) Note d’étude i kaat Matéô 5:16 i nkal le: “Inyu ti Yéhôva lipém, bagwélél ba Yéhôva ba kôba ba bé gwélél bibuk bini le ‘Nu ngui yosôna,’ ‘Nungingii,’ tole ‘Nhek mam momasôna,’ ndi Yésu a bé béna gwélél i buk ini le ‘Tata’ tole ‘Ison nan’ inyu unda le Yéhôva a yé toi bebee ni bagwélél bé.” Yésu a nsômbôl le di tehe Yéhôva kiki nyemede a ntehe nye, hala wee, kiki Tata wés nu a ngwés bés ngandak. Di béñge lelaa Yésu a bi gwélél i buk ini le “Tata” ngélé iba.

14. Lelaa Yésu a bi hôla bés i nok le hiki wada wés a yé nseñ i mis ma Yéhôva? (Matéô 10:​29-31) (Béñge yak titii.)

¹⁴ Di béñge ndugi i jam Yésu a bi pot i kaat Matéô 10:​29-31. (Añ.) Diuuna di yé disiina di dinuni di di nla bé bégés Yéhôva, di nla bé to gwés nye. To hala, Tata wés a ntôñ tjo, to hiada hi nla bé kwo ibabé le a yi. Ibale hala nyen a ntôñ dinuni, ni noode le hégda lelaa a ntehe hiki ngwélél wé nu a ngwélél nye ni ñem wé wonsôna! I bibañga bini le “yak tjôñ dinan di nyiba nsoñgi,” note d’étude i nlôñ 30 i ntoñol ha le: “Ibale Yéhôva a nyi yak nsoñgi u tjôñ tjés, hala a ñunda le a ntôñ toi hiki wada wés.” Yésu a nsômbôl le di yi le hiki wada wés a yé nseñ i mis ma Yéhôva.

15. Bibuk Yésu a bi pot i kaat Yôhanes 6:44 bi niiga kii bés inyu Tata wés nu ngii?

¹⁵ Di béñge lisañ lipe Yésu a bi gwélél i buk ini le “Tata.” (Añ Yôhanes 6:44.) Tata woñ nu ngii nyemede nyen a bi ôt we, nyen a bi boñ le u jôp i ntôñ wé. Inyuki a bi ôt we? Inyule a bi tehe le u gwé ngôñ i gwélél nye. (Minson mi baôma 13:48) Note d’étude munu kaat Yôhanes 6:44 i nkal le, bebek Yésu a bé hoñol pes kaat i Yérémia i i ñéga i yigil ini, i nkal le: “Me bi ôt we ipañ yem ni loñgeñem [tole, ndéñbe i gwés].” (Yérémia 31:3; buk isi lipep; hégha ni Hôséa 11:4.) Hala a nkobla le kii? Hala a nkobla le Yéhôva a ntehe bilem gwoñ bilam, bi wemede u ntehe bé.

16. (a) Kii Yésu a nkal bés, inyuki di nlama hémle nye? (b) Kii i nla hôla we i kônde hémle le Yéhôva a yé toi Isoñ? (Béñge minkéñék mi matila mini le “Isañ nu a nloo basañ bobasôna.”)

¹⁶ I ngéda Yésu a nsébél Yéhôva le Tata wés, a yé wengoñle a nkal bés le: “Ngo Yéhôva a ta ndik bé Tata wem, a yé yak Tata nan. Me nkal yaga bé le a ngwés bé, a ntôñ ki hiki wada nan ngandak.” Jon ibale u nkahal pééna le Yéhôva a ngwés we, yoñ ngéda, u badba le, ‘Baa me nlama bé hémle Man Nyambe nu a nyi Tata wés loñge loñge i ngéda a nkal me le Yéhôva a ngwés me?’​—1 Pétrô 2:22.

KÔNDE LÉDÉS HÉMLE YOÑ

17. Inyuki di nlama kônde hémle le Yéhôva a ngwés bés?

¹⁷ Di nlama kônde lédés hémle yés inyu neebe le Yéhôva a ngwés bés. Kiki di mbôk di tehe, Satan a ga waa bé jôs bés sañ inyu boñ le di waa gwélél Yéhôva. Inyu tômbôs bés, Satan a ga ke ni bisu i tembee le Nyambe a ngwés bé bés. Di ti bañ moo!​—Hiôb 27:5.

18. Kii i nla hôla we i kônde hémle le Yéhôva a ngwés we?

¹⁸ Inyu ke ni bisu i neebe le Yéhôva a ngwés we, u waa bañ soohe nye le a hôla we i tehe wemede kiki a ntehe we. Bigda lelaa i bôt ba bi tila Bibel ba bi pôdôl gwéha yé. Hoñol i mam a mbôñôl we i ngéda u ngwés nye; u nla bé gwés nye, ndi nye a gwés bé we. Bigda le Yésu a bi wo inyu yoñ. Hémle Yésu i ngéda a nkal we le Yéhôva a yé Tata woñ nu ngii. Ha ngéda i, ibale mut a mbat we le: “U nhoñol le Yéhôva a ngwés we?” U ga timbhe nye le: “Ndi wee! Yak me, me njo sañ inyu unda nye hiki kel le me ngwés nye!”