Nyambe a nwaa bé gwés bés

1-2. Imbe ndutu ngandak lôk kéé i mboma?

DI HÉGDA le sitima i yé ikété tuye, mbuk mbebi a nhôñ. Mangudga ma nyiñgis sitima ni ngui. Ibale mut a ngwélél bé hikoba inyu boñ le i sitima i, i nyeñg ha bañ, mangudga ma nla kena yo. Hikoba hion hi nla boñ le mbuk mbebi a pôgôs ha bañ sitima.

² I ngéda u mboma mandutu, u yé kiki i sitima i. Nduña i mpôgôs we. U nyi le Yéhôva a ngwés we ni le a nit we; ndi ngim mangéda, u mbadba too Yéhôva a ntehe ndutu yoñ. (Tjémbi 10:1; 13:1) Liwanda joñ li yé le li lédés we ni bibuk bilam, hala a ti we ndék hogbe. (Bingéngén 17:17; 25:11) A mba a yii, u témb u kahal pééna. U yé le u hoñol yak le Yéhôva a nkôm we mbus. Kii i nla hôla we le u piñgla bañ i ngéda u mboma mandutu? Kii i nla hôla we i ke ni bisu i yi le Yéhôva a ngwés we ni le a ga hôla we?

3. Kii kaat Tjémbi 31:7 ni 136:1 i niiga bés inyu gwéha i Yéhôva, kii i ñunda le Yéhôva nyen a ñunda gwéha iloo bôt bobasôna? (Béñge yak titii.)

³ Jam jada li li nla hôla bés le di piñgla bañ i ngéda di mboma mandutu li yé le: di bigda le Yéhôva a ngwés bés, ni le a ga waa bé gwés bés. (Añ Tjémbi 31:7; 136:1.) I buk Lôk Héber di nkobol hana le “loñgeñem” i ngwéélana inyu pôdôl mut nu a ngwés bés ngandak, nu a ga waa bé to gwés bés kekikel. Yéhôva nyen a yé mut bisu i unda i nya gwéha i. Bibuk bi Lôk Héber ba ngwélél i kaat Manyodi 34:​6, 7 ni kaat Tjémbi 86:5 bi ñunda le Yéhôva a ngwés bés ngandak! Ni le a ga waa bé gwés bés. Hala a nkobla le kii? Hala a nkobla le kekikel, Yéhôva a ga tjôô bé bagwélél bé. I ngéda u mbigda le Yéhôva a’ waa bé gwés we, hala a nlédés we i ngéda u mboma mandutu.​— Tjémbi 23:4

BIGDA LE GWÉHA I YÉHÔVA I YÉ IKÉTÉ BINIIGANA BI BISU BI BIBEL

4. Sima ndék biniigana bi bisu bi Bibel, u toñol ki inyuki mut a ta bé le a lôk bés.

⁴ Jam lipe li li nla boñ le di piñgla bañ i ngéda di mboma mandutu li yé le: gwéha i Yéhôva i yé ikété biniigana bi bisu bi Bibel. Kii i yé “biniigana bi bisu bi Bibel”? Bebek i ngéda u nok bibuk bi, u nhoñol mam ma bisu u bi nigil ikété Bibel. Kiki hihéga, u bi nigil le jôl li Nyambe le Yéhôva, le Yésu a yé mpom wé Man, le bawoga ba nyi bé to jam, le hisi hi ga yila paradis, ni le bôt ba binam ba ga niñ mu i boga ni boga. (Tjémbi 83:18; Ñañal 9:5; Yôhanes 3:16; Masoola 21:​3, 4) I ngéda u bi nigil i mam ma, mut a bé bé le a lo a lôk we. Inyuki? Inyule u bé yi le maliga toi ma. Di tehe kii i nla hôla we le u pééna ha bañ le Yéhôva a ntôñ we, ni le a ntehe mandutu moñ.

5. Kii i nla hôla mut i tjél bitembee?

⁵ Kii i bi hôla we i tjél bitembee i ngéda u bi bôdôl nigil Bibel? Bebek, u bi béñge i mam ba bé niiga we i base yoñ, u béñge i mam Bibel i nkal. Di yoñ le hihéga: Bebek u bé hémle ndugi i tembee ini le Yésu a yé Nhek mam momasôna. I ngéda u bi bôdôl nigil Bibel, u bi badba le: ‘Baa maliga ma?’ U bi wan Bitilna, u tehe le bitembee bi. Jon u bi tjél i bitembee bi, u neebe maliga le Yésu a yé “mbôkgwéé ikété bihégél gwobisôna,” “mpom Man Nyambe.” (Kôlôsé 1:15; Yôhanes 3:18) Bitembee bi nla ba kiki “minkum mi mandap,” bun a ta bé i bôk nwo. (2 Korintô 10:​4, 5) Ndi i ngéda u bi tjél i bitembee bi, u bé ha bé le u hémle gwo.​—Filipi 3:13.

6. Kii i nyis we le Yéhôva a ga waa bé gwés we?

⁶ U nla boñ nlélém jam ibale u mpééna le Yéhôva a ngwés we. I ngéda u mboma mandutu, ndi u kahal pééna le Yéhôva a ngwés we, badba le: ‘Baa mahoñol mem ma téé?’ Hoñol bibañga bi yé i kaat Tjémbi 136:1​—pes kaat i i ñéga i yigil ini. I buk Lôk Héber ba nkobol hana le “loñgeñem” i ñéba le Yéhôva a ga waa bé gwés bés. Inyuki Yéhôva a bi tinde ntôp tjémbi i kal hala? Inyuki a bi pot i jam li letee ni 26 ngélé mu kaat Tjémbi 136? Kiki di mbôk di tehe, i biniigana bini le Yéhôva a ga waa bé gwés bés bi yé ikété biniigana bi bisu bi Bibel, kiki bini biniigana bipe di bi neebe. Jon ibale mut a nkal we le u ta bé nseñ i mis ma Yéhôva tole Yéhôva a nla bé gwés we, hala a yé bitembee. U neebe bañ i nya jam i. Tjél i tembee i, kiki u bi bôk u tjél bini bitembee bipe!

7. Sima ngim minlôñ mi Bibel mi mi ñunda le Yéhôva a ngwés toi bés.

⁷ Minlôñ mi Bibel mimpe mi ñunda bés le Yéhôva a ngwés toi bés. Kiki hihéga, Yésu a bi kal banigil bé le: “Ni gwé mahee iloo ngandak diuuna.” (Matéô 10:31) Yéhôva nyemede a bi kal bagwélél bé le: “M’a lédés we; ñ, m’a hôla we, m’a nit we ni woo wem walôm u telepsép.” (Yésaya 41:10) Baa u ntibil nok i bibuk bi? Yésu a nkal bé le ‘U yé le u bana mahee,’ to Yéhôva a nkal bé le ‘Me yé le me hôla we.’ Ndi ba nkal le: ‘U yé mahee’ ni le “M’a hôla we.” Ibale u mboma mandutu ndi u kahal pééna le Yéhôva a ngwés we, i minlôñ mini mi ga boñ ndik bé le u nôgda le Yéhôva a ngwés we, ndi mi ga boñ yak le u yi le Yéhôva a ngwés we. I bibañga bi yé munu minlôñ mini mi yé toi maliga. Ibale u nsoohe Yéhôva, u yoñ ngéda i ôt pék mu, ha nyen yak we w’a pot bibuk bi bi yé i kaat 1 Yôhanes 4:16 le: “Di bi pam i yi, di hémle ki gwéha Nyambe a gwé inyu yés.”a

8. Ibale u ngi péénaga le Yéhôva a ngwés we, kii i nla hôla we?

⁸ Ibale u ngi péénaga le Yéhôva a ngwés we, kii i nla hôla we? Hégha i yom u nôgda ni mam momasôna u nyi inyu Yéhôva. Ñem wés u yé le u lôk bés ngim mangéda, ndi Bibel i mpot maliga i ngéda i nkal le Yéhôva a ngwés bés. Ibale di mpééna le Yéhôva a ngwés bés, wee di mpééna yak le a yé gwéha.​—1 Yôhanes 4:8.

BIGDA LE YÉHÔVA “A NGWÉS WE”

9-10. Kii Yésu a bé pôdôl i ngéda a bi kal i kaat Yôhanes 16:​26, 27 le “Tata nyemede a ngwés bé”? (Béñge yak titii.)

⁹ Di nla nigil ngandak mam inyu gwéha i Yéhôva ibale di ntibil wan bibañga Yésu a bi kal banigil bé. A bi kal bo le: “Tata nyemede a ngwés bé.” (Añ Yôhanes 16:​26, 27.) Yésu a bi pot bé bibañga bini ndik inyu boñ le banigil bé ba ba maséé. I minlôñ mi yé ha ipañ mi ñunda le i jam li bé jon a bé pôdôl. Ndi a bé pôdôl jam lipe, masoohe.

¹⁰ Yésu a bé a ma tip kal banigil bé le ba nlama soohe ni njel yé, ndi nye bé nyen ba nlama soohe. (Yôhanes 16:​23, 24) I jam li, li bé nseñ ngandak. I mbus bitugne gwé, banigil bé ba bé le ba kahal soohe nye. Yésu a bé toi liwanda jap. Ba bé le ba hoñol le kiki Yésu a bé gwés bo, a bé le a emble masoohe map, a bat ki Yéhôva le a hôla bo. Ndi Yésu a bi kal bo le ba nlama bé bana i nya mahoñol i. Inyuki? A bi kal bo le: “Tata nyemede a ngwés bé.” I jam Yésu a bi kal bo, li yé ikété biniigana bi bisu bi Bibel inyu jam li masoohe. Lelaa bibañga bi, bi yé le bi hôla yak we? Yigil yoñ Bibel i bi hôla we i yi Yésu ni i gwés nye. (Yôhanes 14:21) Ndi kiki banigil ba bisu, yak we u nla soohe Nyambe, u yik le “nyemede a ngwés we.” Hiki ngéda u nsoohe Yéhôva, u ñéba le u nhémle toi hala.​—1 Yôhanes 5:14.

DI NLAMA YI INYUKI DI MPÉÉNA

11. Inyuki maséé ma yé le ma nol Satan i ngéda di mpééna le Yéhôva a ngwés bés?

¹¹ Inyuki di mpééna le Yéhôva a ngwés bés? U yé le u kal le Satan nyen a mboñ le di pééna, bitembee bé bi. Nsohop “a nyéñ je” bés. Jon ibale di mpééna le Yéhôva a ngwés bés, maséé ma yé le ma nol nye. (1 Pétrô 5:8) Gwéha Yéhôva a gwé inyu yés i bi tinde nye i neebe le Man wé a wo inyu yés, Satan a ngwés le di hoñol le di kôli bé ni i sesema i. (Lôk Héber 2:9) Ndi ibale di mpééna le Yéhôva a ngwés bés, njee a ga ba maséé? Di mal kal le Satan. Ibale di nwas le mandutu ma tômbôs bés, njee a ga ba maséé? Mut numpe bé, ndik Satan. Satan a gwé ngôñ le di hoñol le Yéhôva a ngwés bé bés, ndi maliga bé ma! I mut Yéhôva a ngwés bé, a yé Satan. Ndi hipa hié hiada hi yé le a nsômbôl le di hoñol le bés bon Yéhôva a ngwés bé, ni le bés bon Yéhôva a nkônôl bé maséé. (Éfésô 6:11) I ngéda di nyi minsoñgi mimbe ñoo wés le Satan a gwééne bés, hala a nkônde ti bés ngui i ‘kolba nye.’​—Yakôbô 4:7.

12-13. Lelaa béba di bi gwééna i nla tinde bés i pééna le Yéhôva a ngwés bés?

¹² Jam lipe li nla boñ le di kahal pééna le Yéhôva a ngwés bés. Limbe li jam? Béba di bi gwééna. (Tjémbi 51:5; Rôma 5:12) Béba i bi boñ le di kee haa ni Nhek wés, i bi ôbôs ki mahoñol més, ñem wés, ni nyuu yés.

¹³ Béba i bi ôbôs bés, yon i mboñ le kiññem i lôôha kéés bés, i nlona bés ngandak nduña, woñi, ni wonyuu. I ngéda di mboñ béba, di nla bana i nya ndutu i. Di nla ki nôgda hala i ngéda di mbigda hiki ngéda le di bi gwééne ikété béba, ndi hala bé nyen Yéhôva a bé gwés le bôt ba binam ba ba. (Rôma 8:​20, 21) I ngéda kôô litôa u yé ntubak, i litôa li, li nla bé ke loñge. Yak bés, kiki di bi gwééne ikété béba, di niñ bé kiki Yéhôva a bé gwés le di niñ. Jon ibale ngim mangéda, di mpééna le Yéhôva a ngwés bés, hala a nlama bé hélés bés. Ndi ibale di nkahal pééna, di bigda le Yéhôva a yé ‘Nyambe nunkeñi ni nu ba kôli kon woñi . . . nu a ntéñbe i gwés bôt ba ngwés nye, ba téédaga ki mambén mé.’​—Néhémia 1:5.

14. I ngéda di ñôt pék mu sesema Yéhôva a bi ti inyu yés, lelaa hala a nla hôla bés i nok le Yéhôva a ngwés bés? (Rôma 5:8) (Béñge yak minkéñék mi matila mini le “Yoñ yihe ni ‘ngui malôga i béba.’”)

¹⁴ Ngim mangéda, di yé le di hoñol le di kôli bé ni gwéha i Yéhôva. Inyu hala nyen gwéha yé i mbuma ñañ, inyule a ngwés bés tolakii di kôli bé, ni le di bi boñ bé jam jo ki jo inyu boñ le a gwés bés. Yéhôva a bi neebe le Man wé a wo inyu hô bibéba gwés inyule a ngwés bés. (1 Yôhanes 4:10) Bigda ki le Yésu a bi lo hana ’isi inyu tohol baboñbéba, a bi lo bé inyu bôt ba ba yé peles (Añ Rôma 5:8.) To wada wés a nla bé lémél Yéhôva hiki ngéda, to Yéhôva a nla bé bat bés le di boñ hala. I ngéda di nyi le ngo i béba di bi gwééna yon i ntinde bés i pééna le Yéhôva a ngwés bés, hala a nkônde ti bés ngui i jôs mahoñol mabe.​—Rôma 7:​24, 25.

YOÑ MAKIDIK I TÉÑBE NI YÉHÔVA

15-16. Ibale di ntéñbe ni Yéhôva, kii a ga boñ, inyuki? (2 Samuel 22:26)

¹⁵ Yéhôva a nsômbôl le di yoñ makidik malam le di ‘adbe nye.’ (Ndiimba Mbén 30:​19, 20) Ibale di mboñ hala, yak nye a ga waa bé gwés bés. (Añ 2 Samuel 22:26.) Di nyi le ibale di ntéñbe ni Yéhôva, to imbe ndutu di mboma, a ga hôla bés.

¹⁶ I yigil ini i niiga bés le di nlama bé piñgla i ngéda di mboma mandutu inyule di nyi le Yéhôva a ngwés bés, a ga hôla ki bés. Hala nyen Bibel i nkal. Ibale di nkahal pééna, di emble bañ i yom ñem wés u nkal ndi di bigda i yom Bañga i Djob i nkal. Kekikel di péénaga bañ i jam Bibel i nkal, le Yéhôva a ga waa bé gwés bés.