Bayitjôdôt ba nyuuga Yésu

Ngim bôt i nlôl i pes likôl: Bayitjôdôt ba. Hala wee bôt ba ba nigil tjôdôt, ba kalak le ni njel i, ba nla toñol mam ma niñ i bôt. (Yésaya 47:13) Ngéda ba bé i mbai yap i likôl, ba bi tehe “hiôdôt,” ba bôdôl noñ hio ngandak mbôgôl i kilôméta letee ni Yérusalem, he i Bétléhém bé.

Ngéda bayitjôdôt ba mpam nyoo, ba mbat le: “Nu a ngwéé kiñe i Lôk Yuda a yé hee? Inyule di ntehe hiôdôt hié ngéda di bak i likôl, jon di nlo le di ti nye lipém.”​—Matéô 2:1, 2.

Hérôdé, kiñe i Yérusalem a nok bañ jam li, a unup ngandak. A nsébél prisi keñi ni baéga ba bibase ba Lôk Yuda, a bat bo het Kristô a nlama gwééne. Inoñnaga ni Bitilna, ba ntimbhe nye le: “I Bétléhém.” (Matéô 2:5; Mika 5:1) Kiki a nok hala, Hérôdé a nsébél bayitjôdôt bisôsôli, a kal bo le: “Kena, ni tibil yaga yéñ hisiina mañge, ngéda ni ntehe hio, ni lo ni kal me inyu boñ le yak me, me ke me ti nye lipém.” (Matéô 2:8) Ndi i pot maliga, Hérôdé a bé yéñ mañge inyu nol nye!

I mbus le bayitjôdôt ba nke, hélha jam i yé le i “hiôdôt” ba bi tehe ngéda ba bé i pes likôl hi nke ni bisu i éga bo. Ntiik, “hiôdôt” hini hi ta bé yañga hiôdôt, hi ntina tôbôtôbô inyu éga bo. Bayitjôdôt ba noñ hiôdôt letee hi ntelep i ngii ndap het Yôsep bo Maria ba niñ nano ni man wap.

Ngéda bayitjôdôt ba njôp i ndap, ba ñada Maria ni Yésu man wé munlôm. Bayitjôdôt ba ñôm maboñ bisu gwé. Ba nti nye makébla kiki bo gol, binunumba ni mire. I mbus, i ngéda ba yé bebee i témb i tehe Hérôdé, Djob a nkal bo i eem le ba boñ bañ hala. Jon ba ntémb i loñ yap ni njel ipe.

U nhoñol le njee a bi pémés “hiôdôt” inyu éga bayitjôdôt? Bigda le hiôdôt hi bi kena bé bo ngélé yada i Bétléhém, het Yésu a bééne. Ndi, hi bi kena ndugi bo i Yérusalem het ba bi boma Kiñe Hérôdé nu a bé sômbôl nol Yésu. A bé ki le a boñ jam li ibale Djob a pémél bé bayitjôdôt inyu béhe bo le ba kal bañ Hérôdé het Yésu a yéne. I pot maliga, ñoo Djob le Satan, nyen a bé gwélél i hiôdôt hi inyu yônôs njômbi yé i nol Yésu.