Kee ni bisu i gwés Yéhôva

Bañga bikristen i nyoñ makidik le yom yo ki yo, to mut nye ki nye a ôbôs bañ maada map ni Yéhôva. Me nhoñol le yak we makidik moñ ma. Yéhôva a yé maséé i ngéda di nke ni bisu i gwélél nye. (Añ 1 Miñañ 28:9) Imbe ngéda i nla ba ndutu i éba le u ngwélél Yéhôva, ndi kii i nla hôla we?

1. Lelaa bôt bape ba nla noode bii hémle yés i biwénél?

Bôt bape ba ngwés le di waa gwélél Yéhôva. I nla ba batjañgbene maliga, hala wee, i bôt ba bi waa gwélél Yéhôva, ba kahal kolba ntôñ. I nla ki ba baéga bibase ba ba mpot bitembee inyu yés, inyu yoña i bôt ba gwé bé hémle ngui. Jon di nlama bé kwel ni bo, to ni njel internet. Di añ bañ bitilna gwap, di béñge bañ to bividéô gwap. Yésu a bi ti bés maéba le di yoñ yihe ni i bôt ba nsômbôl le di waa gwélél Yéhôva. A kal le: “Nwaha bo. Ba yé baéga ba ba yé ndim. Ndi, ibale mut ndim a ñéga mut ndim, ngo bo iba ba ga kwo ikété bee.”—Matéô 15:14.

2. Lelaa i mam di ngwés ma ñéba le di ntéñbe ni Yéhôva?

Di ngwés Yéhôva jon di nsômbôl bé bana maada ni kwéha base. Hala a mbéñge bôlô yés, minson di ngwel, to ntôñ wo ki wo, u u nla bana maada ni kwéha base. Yéhôva a mbéhe bés le: “A bôt bem, pama nyeni i [Babilôn Nunkeñi].”—Masoola 18:2, 4.

KÔNDE TÉM

3. Di yoñ yihe ni baniiga ba bitembee

Kii di nla boñ i ngéda di nok mut a mpot bitembee inyu ntôñ u Yéhôva? Añ Bingéngén 14:15, i mbus ni kwélél mbadga ini:

• Inyuki di nlama bé hémle hiki jam di nok?

Añ 2 Yôhanes 9-11, i mbus ni kwélél mambadga mana:

• Mambe maéba i pes kaat ini i nti bés inyu batjañgbene maliga?

• To ibale di gwé bé maada mo ki mo ni batjañgbene maliga, mambe manjel ma nla boñ le, ndék ni ndék biniigana gwap bi kahal lémél bés?

• We u hoñol lelaa? Kii Yéhôva a ga nôgda ibale a nyi le u ñemble bôt ba ba mpot bitembee inyu yé ni inyu ntôñ wé?

4. Lelaa u nla éba le u nke ni bisu i gwés Djob?

Ibale u nyi le mankéé mu likoda a mboñ béba ikeñi, kii u nlama boñ? Béñge i mbén Djob a bi ti bon ba Israel. Añ Lôk Lévi 5:1.

Inoñnaga ni litiñ di nléba munu nlôñ kaat unu, ibale u nyi le mankéé a mboñ béba ikeñi u nlama kal mimañ. Ndi ilole u nke tehe mimañ, i yé loñge le u ti i mankéé nu makénd le nyemede a kee a tehe mimañ, a kal bo i yom a mboñ. Ndi ibale a mboñ bé hala, gwéha yés inyu Yéhôva i ntinde bés i ke tehe mimañ ni i kal bo i jam a mboñ. Inyuki i boñ hala i ñéba le di nke ni bisu i gwés . . .

• Yéhôva?

• i mut a mboñ béba?

• ni ini lôk kéé ipe i likoda?

5. Ni kee haa ni Babilôn Nunkeñi

VIDÉÔ: Pama i Babilôn Nunkeñi! (5:06)

Añ Lukas 4:8 ni Masoola 18:4, 5, i mbus ni kwélél mambadga mana:

• Baa me nginda gwéé maada mo ki mo ni nlômbi wem base?

• Baa me yé i ngim ntôñ u u gwéé maada ni Babilôñ Nunkeñi?

• Baa i bôlô me nsal i gwéé maada ni kwéha base?

• Mu niñ yem, baa ngim yom i ñéba le me gwéé maada ni kwéha base?

• Ibale me ntimbhe le ñ, to inyu mbadga yada, mambe mahéñha me nlama boñ?

To i ba lelaa, di nlama yoñ makidik ma ma ñéba le di nke ni bisu i gwés Yéhôva ni i tééda kiññem i i mpôp.

I SEM KWEP

Inyu éba Yéhôva le di nke ni bisu i gwés nye, di nlama bé kiha ni bôt ba ba noode lôk bés ni yumus bés.

Mambadga ma mbigda

• Inyuki di nlama bé emble batjañgbene maliga?

• Ibale di nyi le mankéé wada a mboñ béba keñi, kii di nlama boñ?

• Lelaa kristen i nla éba le i gwéé ha bé maada mo ki mo ni kwéha base?

KÔNDE YÉÑ

Kii u nlama boñ i ngéda bôt ba ntjam bitembee inyu ôbôs Mbôgi Yéhôva jôl?

“Baa ni ntibil wan mam?” (Nkum Ntat, Hikañ 2018)

Kii di nla boñ ibale di nkôs ngim bôlô i i nla tinde bés i nit kwéha base?

“Téñbe ni nson munu mamélél ma dilo di nsôk” (Nkum Ntat, Biôôm 2019, maben 16-18)

Kii i bôt ba nkolba Mbôgi Yéhôva ba yé bebee i boñ inyu tômbôs hémle yés?

Ni yoñ yihe ni bôt ba malôga (9:32)

Ñañ u pada yada i base i Shintoiste i i bi kit maada ni kwéha base “Je recherchais Dieu depuis mon enfance.”

“La Bible transforme des vies” (La Tour de Garde 1er juillet 2011)