Lédés maada moñ ni Yéhôva

HIKI nwii, ngandak bôt i ntémb i ntôñ u Yéhôva. Di hégda le “maséé ma yé ngii” ngéda ba ntémb! (Lukas 15:7, 10) Ibale u bi témb i ntôñ, yi le Yésu, biañgel, ni Yéhôva ba nkônôl we maséé ngandak. Ndi, kii u nke ni bisu i lédés maada moñ ni Yéhôva, w’a boma mandutu. Mambe mandutu w’a boma? Kii i yé le i hôla we?

MAMBE MANDUTU W’A BOMA?

Ngandak lôk kéé i yé i nimis makénd yak ngéda ba mal témb i ntôñ. Bebek le ni yé ni nôgda kiki Kiñe David. Tolakii Yéhôva a bi nwéhél nye bibéba gwé, a bi kal le: “Bibôñôl gwem bibe bi ñat me.” (Tjémbi 40:13; 65:4) Ngéda mut a ntémb ntôñ, a nwo nyuu tole kinñem i nla kéés nye nwii ndi nwii. Isabelle,a a bi pam ntôñ, a boñ 20 nwii nyoo mbédgé, a bi kal le: “Me bé hoñol le Yéhôva a ta bé le a nwéhél me.” Ibale u nimis makénd, i yé le i pam le u bana ha bé maada malam ni Yéhôva. (Bingéngén 24:10) Joo sañ inyu boñ le jam li li pémél bañ we.

Lôk kéé ipe i yé i nhoñol le i ga lôôha bane bo ndutu i boñ mam momasôna ma mbéda inyu lédés maada map ni Yéhôva. Ngéda Antoine a bi témb i ntôñ, a bi kal le: “A bé ndik wee me bi hôya i mam momasôna me bi nigil i ntôñ Yéhôva.” I lôk kéé i gwé nya mahoñol i, i yé le i kahal yeñgep mu nson wap i ntôñ u Yéhôva.

Di yoñ le hihéga, ibale mut a gwéhék ndap yé, ndi mbuk mbebi a bôk yo, a yé le a kahal badba too a ga la sal bôlô yosôna i mbéda inyu boñ le a tiimba oñ yo. Nlélém jam, ibale u bi boñ béba ikeñi, u bana ha bé maada malam ni Yéhôva, u yé le u nôgda wee i ga béda we ngandak bôlô inyu témbna maada moñ malam ni Yéhôva. Ndi u ta bé wetama.

Yéhôva a nkal bés le: “Loga, me nsoohe, di kaa.” (Yésaya 1:18) U ma sal ngandak inyu témbna maada malam ni Yéhôva. Yéhôva a nkônôl we maséé inyu biliya u mboñ. Kiki u ntémb i ntôñ, u mboñ le Yéhôva a éba le Satan a yé mut bitembee!—Bingéngén 27:11.

Kiki u ntémb yak Yéhôva, u nkôôge nye bebee, jon yak nye a mbôn le a ga kôôge we bebee. (Yakôbô 4:8) Ndi yi le kiki lôk kéé i ntehe we u ntémb i ntôñ, hala a yé loñge jam, ndi hala a kôli bé. U nlama ke ni bisu i lédés maada moñ ni Tata woñ ni Liwanda joñ le Yéhôva. Kii i nla hôla we i boñ hala?

YOÑ MAKIDIK I BOÑ NGIM MAM

Noode téé ngim mam w’a boñ. Bebek le mam ma bisu u bi nigil i ntôñ Yéhôva—ni mam momasôna a mbôn bés i Paradis—u ngi bigdaga mo. Ndi u nlama ke ni bisu i sal minson mi ntôñ kiki bo i ke likalô, i ke makoda, ni i tégbaha ngéda ni lôk kéé i bôda ni i bôlôm. Béñge le i mam u yé le u boñ.

Soohe Yéhôva hiki ngéda. Tata woñ le Yéhôva a nyi le hala kiki kinñem i nkéés we ngandak, u yé le u bana ndutu i soohe. (Rôma 8:26) Ndi, “téñbe ikété masoohe,” kal Yéhôva le u gwé ngôñ i ba liwanda jé. (Rôma 12:12) Andrej a nkal le: “Kinñem i bé kéés me ngandak, me bé wo nyuu. Ndi ngéda me bé soohe, me bé me nôgda hogbe ni ñem nwee.” Ibale u nyi bé lelaa u nla soohe, béñge masoohe ma Kiñe David ngéda a bi tam béba yé, ma di nléba i kaat Tjémbi 51 ni 65.

Nigil Bibel hiki ngéda. Yigil yoñ i Bibel i ga hôla we i bana maada ma bas bas ni Yéhôva ni i kônde gwés nye. (Tjémbi 19:8-12) Felipe a nkal le: “Kiki me bé nigil bé Bibel hiki ngéda, jon me bi tomb, me bana ha bé maada malam ni Yéhôva. Me bé sômbôl ha bé boñ hihôha hi, jon me bi kit le m’a nigil Bibel hiki ngéda.” Yak we u nla boñ hala. Ibale u gwé ngôñ ni mahôla inyu pohol minkwel mi u yé le u nigil, u yé le u bat nhôôlak mankéé mahôla.

Lédés maada moñ ni lôk kéé i bôda ni i bôlôm. Ngim lôk kéé i i bi témb i ntôñ i nkon woñi le lôk kéé i ga nun bo ni mis mabe. Larissa a nkal le: “Me bé wo nyuu. Me bé tehe ndik wee me bi wéha lôk kéé yem nyuu. Me bi nôgda hala ntandaa ngéda.” Yi le mimañ ni ini lôk kéé ipe i nsômbôl hôla we i témbna maada malam ni Yéhôva. (Béñge minkéñék mi matila mini le: “Kii mimañ mi nla boñ?”) Ba yé maséé kiki u ntémb i ntôñ, ba nsômbôl le yak we u ba maséé!—Bingéngén 17:17.

Kii i nla hôla we i kôôge bebee ni lôk kéé i bôda ni i bôlôm? Kee i makoda momasôna—u kenek ki likalô ni lôk kéé yoñ i bôda ni i bôlôm hiki ngéda. Inyuki hala a yé nseñ? Felix a nkal le: “Lôk kéé i bôda ni i bôlôm i bé bem le me témb i ntôñ. Ba bi unda me gwéha. Ba bi tibil leege me i likoda, me bi nôgda toi le Yéhôva a nwéhél me, ni le me nla ke ni bisu i gwélél nye.”—Béñge minkéñék mi matila mini le: “Kii u yé le u boñ?”

U TOMB BAÑ!

Satan a’ ke ni bisu i noode we mu kiki u njo sañ i lédés maada moñ ni Yéhôva. (Lukas 4:13) Nano nyen u nlama lédés hémle yoñ.

Yéhôva a mbôn mintômba nwé le: “M’a yéñ u u bi nimil, me témbna ki u u bi yôm, me kañ u u bi babaa bandas, m’a lédés ki u u bé ntombok.” (Ézékiel 34:16) Yéhôva a ma hôla ngandak bôt i témbna maada malam ni nye. Yi le a gwé ngôñ i hôla we i kônde lédés maada moñ ni nye.

Kii mimañ mi nla boñ?

Mimañ mi nla boñ ngandak mam inyu hôla mut a ntémb i ntôñ i lédés maada mé ni Yéhôva. Di béñge kii ba nla boñ.

Ni hôgbaha bo. Ñôma Paul a bé yi le i mut a ntémb i ntôñ a nla bana “ndutu ñem iloo hihéga.” (2 Korintô 2:7) A yé le a wo nyuu, kiññem i kéés ki nye ngandak. Paul a bi kal lôk kéé le ba ‘nwéhél nye, ba ti ki nye hogbe.’ Ngéda mut a ntémb i ntôñ, a gwé ngôñ i yi le Yéhôva ni lôk kéé yé i ngwés nye ngandak. Ngéda mimañ mi mbégés bo mi hôlga bo, hala a mboñ le ba nimis bañ makénd.

Ni soohe ni bo. “Minyemhe mi mut a téé sép mi gwé ngui ngandak.” (Yakôbô 5:16) Larissa nu di mbôk di pôdôl, a nkal le: “Me bi kal mimañ i mam momasôna ma bé ma nkônha me woñi. Ba bi soohe ni me. Ha nyen me bi nok le mimañ mi ñunbene bé me. Ba bé sômbôl hôla me i lédés maada mem ni Yéhôva.” Théo a nkal le: “Masoohe ma mimañ ma bi hôla me i yi le Yéhôva a ngwés toi me, a ntehe ndik bé i mam mabe me mboñ, ndi a ntehe yak malam.”

Ni yila mawanda map. Ngéda mut a ntémb i ntôñ, a gwé ngôñ ni mawanda. Mañ wada le Justin a nkal le: “Ni pam ni bo likalô hiki ngéda, ni yuuga ki bo mambai map. I yé nseñ ngandak le ni yila mawanda map.” Mañ umpe le Henry a nkal le: “Ibale lôk kéé i nyimbe le mimañ mi nyila mawanda ma mut a ntémb i ntôñ, yak bo ba ga yéñ i yila mawanda mé.”

Ni hôla bo i nigil. Nhôôlak mankéé u nla hôla i mut a ntémb i ntôñ i nigil Bibel hiki ngéda. Mañ wada le Darko a nkal le: “Me ngwés me nkal bo i tik ngok i mbuu me nléba mu kiki me añak Bibel, hala a mboñ le ba tehe le me ngwés yigil i Bibel. Me nyoñ yak bitelbene i nigil ni bo.” Mañ umpe le Clayton a nkal le: “Me yé me kal bo le ba añ miñañ mi bagwélél ba Djob ba ba bééna minlélém mi mandutu kiki bo.

Ni tééda bo loñge. I mut a ntémb i ntôñ a bi bôk ndugi a tehe mimañ kiki bakéés. Ndi nano, a nlama tehe bo kii batééda mintômba. (Yérémia 23:4) Ni emble nye loñge, ni bégés ki nye. Ni kwelek ni nye hiki ngéda. Di béñge i yom mañ wada le Marcus a mboñ ngéda a nke yuuga lôk kéé. A nkal le: “Di yé di añ pes kaat ntôñ, di bégés bo, di kal bo le di yé maséé hala kii ba njo sañ inyu témb i ntôñ, ni le yak Yéhôva a yé maséé. Ngéda di mal, di nôgla inyu lo yuuga bo kel ipe.”

a Di nhéñha ngim môl munu yigil ini.