1 Kronika
21 Dung i ro ma Sibolis* mangalo halak Israel, jala dibahen ma asa olo si Daud mangetong godang ni halak Israel.+ 2 Didok si Daud ma tu si Joab+ dohot tu akka pamimpin ni halak Israel, “Lao ma hamu, etong ma halak Israel mulai sian Ber-seba sahat tu Dan.+ Dung i paboa ma tu au, asa huboto godang ni nasida.” 3 Alai didok si Joab ma tu raja, “Anggiat ma dibahen Jahowa Debatam lam godang nasida sappe 100 hali loppit! Rakyatmu do nasida sude, ale rajanami. Boasa ma ikkon etongon ni tuanku godang ni nasida? Jala boasa ma gabe mardosa halak Israel bahenonmu?”
4 Alai dang olo raja i manangihon hata ni si Joab. Alani i, lao ma si Joab tu sude huta ni halak Israel. Dung i, mulak ma ibana tu Jerusalem.+ 5 Dipaboa si Joab ma tu raja godang ni halak na didaftar. Sian halak Israel adong 1.100.000 tentara na marsinjata podang, jala sian halak Juda adong 470.000 tentara na marsinjata podang.+ 6 Alai dang dietong ibana be godang ni halak Lepi dohot halak Benjamin.+ Ai nungnga sogo roha ni si Joab mambege paretta ni raja i.+
7 Alani i, dihukum Debata na sittong ma halak Israel. Ai dang lomo rohana dietong godang ni halak Israel. 8 Dung i didok si Daud ma tu Debata na sittong, “Nungnga balga dosakku+ ala hubahen songon on! Sesa ma dosa ni naposomon.+ Ai haotoon do na hubahen i.”+ 9 Didok Jahowa ma tu si Gad+ halak na pasahatton parnidaan tu si Daud, 10 “Lao ma ho mandapotton si Daud, jala dokkon ma tu ibana, ‘Songon on ma hata ni Jahowa, “Nungnga hubahen tolu sipillitonmu. Manang na dia na dipillit ho, i do bahenokku tu ho.”’” 11 Dung i, dijuppangi si Gad ma si Daud, jala didok ma tu ibana, “On ma na didok ni Jahowa, ‘Dia ma pillitonmu? 12 Masa tolu taon haraparon di luatmon,+ manang tolu bulan ho sai dilelei musum jala talu alani podang ni musum.+ Manang hilalaonmu podang ni Jahowa saleleng tolu ari, i ma sahit na masa di godang inganan+ na dibahen suru-suruan ni Jahowa na mambahen susa sude halak Israel.’+ Manat ma pikkiri na dia lao sipillitonmu, asa hupaboa tu Debata na manuru au.” 13 Didok si Daud ma tu si Gad, “Marsak hian do au mamikkiri on. Dumenggan ma Jahowa manghukum hita, ai parasi roha do Ibana.+ Unang ma loas jolma manghukum au.”+
14 Dibahen Jahowa ma masa sahit di godang inganan+ tu halak Israel. Gabe mate ma 70.000 halak Israel.+ 15 Asing ni i, disuru Debata na sittong ma sada suru-suruan pamatehon pangisi ni Jerusalem. Tikki naeng dipamate suru-suruan i pangisi ni kota i, gabe lungun* ma roha ni Jahowa.+ Didok Ibana ma tu suru-suruan i, “Nga sae be i.+ Paturun ma tanganmi.” Tikki i, di labbung ni inganan pardegean ni si Ornan+ halak Jebus+ do jongjong suru-suruan ni Jahowa i.
16 Tikki diida si Daud tu langit,* diida ibana ma jongjong suru-suruan ni Jahowa disi. Ditiop suru-suruan i do podang+ jala dibahen do podang i tu arah Jerusalem. Gabe marsinggang+ ma si Daud dohot akka pangituai* huhut mamakke abit goni.+ 17 Didok si Daud ma tu Debata na sittong, “Au do na manuru asa dietong godang ni bangso on. Au do na mardosa, jala au do na marsala.+ Alani i, au dohot keluarga ni bapakku ma hukum, ale Jahowa Debatakku. Alai anggo bangso na songon biru-biru on, dang marsala nasida. Unang ma hukum nasida.”+
18 Dung i, disuru suru-suruan ni Jahowa ma+ si Gad manjuppangi si Daud. Disuru ma si Daud mambahen sada langgatan tu Jahowa di inganan pardegean ni si Ornan halak Jebus i.+ 19 Dung i diulahon si Daud ma paretta ni Jahowa na dipasahat marhite Panurirang* Gad jala lao ma ibana. 20 Tikki i, mardege gandum do si Ornan. Diida ibana ma tu pudi jala diida ma suru-suruan. Gabe martabuni ma opat anakna na rap dohot ibana. 21 Dung sahat si Daud disi, diida si Ornan ma si Daud. Pittor kaluar ma ibana sian inganan pardegean i, jala marsinggang ma ibana tu jolo ni si Daud. 22 Didok si Daud ma tu si Ornan, “Gadis* ma inganan pardegeanmi tu au. Manang na sadia pe argana, tuhorokku do i. Ai naeng pajongjongokku do disi sada langgatan di Jahowa, asa so sahit na posi na masa tu bangso on.”+ 23 Didok si Ornan ma tu si Daud, “Unang pola tuhor inganan pardegean i tuan. Ulahon ma manang aha na denggan di roham. Adong do dison akka lombu na boi bahenonmu gabe pelean situtungon. Jala adong do dison gandum na boi bahenonmu gabe pelean sipanganon.* Pakke ma akka hau na dipasang tu lombu i+ gabe soban.”
24 Didok Raja Daud ma tu si Ornan, “Dang boi songon i. Ikkon tuhorokku do i manang na sadia pe argana. Molo dang martuhor i, dang olo au mamelehon i gabe pelean situtungon tu Jahowa.”+ 25 Dung i dilehon si Daud ma tu si Ornan 600 sekel* mas tuhor ni inganan pardegean i. 26 Dipajongjong si Daud ma disi sada langgatan+ tu Jahowa. Dipelehon ibana ma pelean situtungon dohot pelean pardamean.* Dung i martangiang ma ibana tu Jahowa. Dialusi Debata ma tangiangna i. Gabe diparo ma api+ sian langit manutung pelean situtungon na di langgatan i. 27 Ujungna, disuru Jahowa ma asa dipamasuk suru-suruan i+ podangna tu ingananna. 28 Diida si Daud ma na dialusi Jahowa do tangiangna di inganan pardegean ni si Ornan halak Jebus i. Gabe disi ma ibana toktong mangalehon pelean. 29 Hape tikki i, nungnga di Dolok Gibeon langgatan ni pelean situtungon dohot tabernakel ni Jahowa na binahen ni si Musa tikki di gurun.+ 30 Alai dang lao be si Daud tusi lao manukkun Debata, ai mabiar do ibana tu podang ni suru-suruan ni Jahowa.