Juli

Rumingkotan do di boru ni si Jepta manomba Jahowa sian na marhasohotan dohot marianakhon. Songon dia do hita boi maniru haradeon ni boru ni si Jepta? Saonari, marribu do angka na poso na rade ndang marhasohotan manang ndang marianakhon. Boasa? Alana, nasida naeng marsitutu manomba Jahowa. Asing ni i, godang do angka naung matua rade mangalehon tingki dohot gogona tu Jahowa sian na mangalehon tingki tu ianakhon manang pahompuna. Godang do sian nasida na gabe parsidohot tu ulaon konstruksi manang dohot tu Singkola tu Parbaritaon Harajaon. Jala adong na pinda tu huria na mangkaporluhon godang penyiar. Na asing, mangalehon gumodang tingkina saleleng di bulan Parningotan hamamate ni Jesus. Ndang dihalupahon Jahowa holong ni sude halak na marsihohot tu Ibana. (Heb. 6:10-12) Songon dia do hamu? Olo do hamu mangalehon gumodang tingkimu marhobas tu Jahowa? w16.04 1:16, 17

Dipatudos Jesus do ibana dohot parmahan, jala siihuthon ibana punguan ni birubiru. Pingkirhon ma, molo adong dua birubiru di dolokdolok, dua di rura jala sada di inganan na asing, sapunguan do birubiru na lima on? Ndang, alana birubiru na sapunguan ingkon rap do di sada inganan mangihuthon parmahan. Songon i ma, na mandao do hita sian angka donganta molo ndang ro tu parpunguan. Ringkot hita rap marpungu asa boi gabe ”sada punguan” jala ”sada ma parmahan”. Parpunguanta mangurupi hita marsada songon sada keluarga na gok holong. (Ps. 133:1) Adong do donganta di huria na so dijangkon natuatua dohot keluargana. Alai, Jesus marjanji laho mangalehon keluarga na mangkaholongi jala manarihon nasida. (Mrk. 10:29, 30) Molo ro hita tu ganup parpunguan, boi do hita gabe songon bapa, omak, hahaanggi manang iboto tu donganta na di huria. Molo tapingkirhon on, boi taronjar rohanta mambahen na dumenggan di sude parpunguanta. w16.04 3:9, 10

Tingki hita martangiang, marbarita na uli manang tingki marpungu, hita manomba Jahowa. Ndang lomo roha ni Jahowa molo ndang mardame hita dohot donganta. Asa tongtong hita boi maraleale tu Jahowa, ingkon rade do hita manalpuhon hasalaan ni donganta. (Luk. 11:4; Eps. 4:32) Dipangido Jahowa do sude naposoNa asa rade manalpuhon hasalaan ni dongan jala mardame tu sude jolma. Tasungkun ma dirinta, ’Boi do hatop husalpuhon sala ni donganku? Las do rohangku rap dohot nasida?’ Molo adong sipadengganonta taringot on, martangiang ma hita mangido pangurupion laho mangulahon i. Ditangihon Jahowa do tangiang ni naposoNa na serep roha jala alusanNa do tangiang ni nasida.​—1 Joh. 5:14, 15. w16.05 1:6, 7

Sadia leleng do ulaon marbarita on diulahon? Jesus mandok, barita na uli dibaritahon sahat tu na ro ujungna. Tondi parbadia ni Debata do na mangurupi Sitindangi Ni Jahowa boi mangulahon ulaon parbaritaon on sahat tu na ro ari i. (Ul. 1:8; 1 Ptr. 4:14) Deba gareja olo do ra mandok, ’Adong tondi parbadia di nasida.’ Alai, boi do diulahon nasida songon na diulahon ni Sitindangi Ni Jahowa? Adong do kelompok na maniru ulaon ni Sitindangi Ni Jahowa, alai ndang tolap ni nasida mangulahon i. Adong do na rade marbarita, alai holan satongkin. Adong do na marbarita sian jabu tu jabu, alai ndang barita na uli taringot Harajaon ni Debata na dibaritahon. Alani i, ndang diulahon nasida ulaon marbarita songon na binahen ni Jesus. w16.05 2:13, 16

Apostel Paulus mandok tu halak Kristen, ”Tanggali hamu ma jolma na buruk i, isara di pangalaho najolo, ai laho mago do i hinorhon ni angka hisaphisap sipaotooto. Alai paimbaru hamu ma [tongtong] dirimuna di bagasan tondi ni rohamuna! Jala solukkon hamu ma jolma na imbaru, na tinompa suman tu Debata, di bagasan hatigoran dohot hapolinon na marhasintongan!” (Eps. 4:22-24) Ayat on patuduhon hita porlu tongtong marsitutu mambahen hamubaon jala manolukkon ”jolma na imbaru”. Alani i, nang pe hita nunga leleng manomba Jahowa, ingkon tongtong do taparsiajari angka parangeNa. Bibel boi do mangurupi hita mambahen hamubaon jala maniru parange ni Jahowa. w16.05 4:8, 9

Saonari, nunga tahilala mangolu di paradeiso partondion. On ma inganan na diparade Jahowa laho manopa hita. (Jes. 64:7) Boi ma dame tahilala nang pe hita mangolu di portibi na gok hajahaton. Nunga tatanda Jahowa jala tahilala holongNa songon holong ni sahalak ama. (Jak. 4:8) Di tano na imbaru, tahilala ma godang laba alani paradeiso partondion. Hilalaonta ma muse hangoluan na tipak (sempurna) di Harajaon ni Debata. Di tingki i, tongtong do Jahowa manopa jala mangajari hita hombar tu lomo ni rohaNa, nang pe ndang taboto songon dia i bahenonNa. (Jes. 11:9) Bahenon ni Jahowa do muse tipak pamatang dohot pingkiranta. Alani i, mura ma hita mangihuthon jala mangulahon tudutuduNa. Tapaloas ma Jahowa manopa hita jala tapatudu ma pangargaion tu Ibana. w16.06 1:8, 9

On ma hata parpudi sian si Musa tu halak Israel. Taon 1473 SM, nunga sahat bangso Israel di Moab jala nunga rade nasida manaripari sungai Jordan laho bongot tu Tano Kanaan. (5 Mus. 6:1) Nunga 40 taon si Musa manguluhon halak Israel, alani i dipatogu ma roha ni nasida asa boi mangadopi godang hasusaan. Porlu do nasida marhaporseaon jala marsihohot tu Jahowa. Dipatogu si Musa ma rohanasida laho mangulahon i. Dung dipaboa sampulu patik dohot uhum na dilehon Jahowa, didok si Musa ma sipaingot na ringkot na disurat di 5 Musa 6:4, 5. Nunga diboto halak Israel, Debata ”Jahowa Sasadasa do”. Holan Jahowa do na disomba nasida, i ma Debata ni ompunasida. w16.06 3:2, 3

Didok Jesus ma hata on tingki di tano on dope ibana. Alai saonari, ra nunga diboto Jesus andigan masa Armagedon, alana Jesus do na manguluhon porang i. (Pgk. 19:11-16) Molo hita, ndang taboto andigan ro ajal ni portibi on. Alani i, mansai ringkot do asa tongtong dungo. Nunga ditontuhon Jahowa andigan masa hasusaan bolon, jala lam jonok ma ari i. Alani i, ”ndang tagamon tartading” ari i. (Hab. 2:1-3) Boasa porsea hita na laho masa i? Sai saut do surirang ni Jahowa! Marjanji do Jahowa paluahon bangsoNa sian hasusaan bolon, jala mangalehon hangoluan salelengna di tano na imbaru. Pos ma rohanta tu janji ni Jahowa. Molo naeng mangolu di tano na imbaru, tongtong ma hita dungo. w16.07 2:4-6

Hea do si Petrus mangulahon na sala. Umpamana, didok si Petrus ndang tadingkononna Jesus nang pe donganna na asing manadingkon ibana. (Mrk. 14:27-31, 50) Alai, tingki Jesus ditangkup, ditadingkon sude apostel i do Jesus jala dohot do si Petrus. Dung i, tolu hali ma si Petrus mandok na so ditanda ibana Jesus. (Mrk. 14:53, 54, 66-72) Alai manolsoli do roha ni si Petrus. Alani i, marpamuati ma Jahowa jala tongtong do ibana gabe apostel. Molo mangolu hita di tingki i, jala taboto aha na diulahon si Petrus, tongtong dope hita marpos ni roha tu Jahowa? Sian angka tudosan on, taboto ma adong do naposo ni Jahowa na hea mangulahon na sala na mambahen gale haporseaon ni na asing. Aha do ulahononmu molo masa on tu hamu? Tasalahon do Jahowa dohot organisasiNa jala ndang ro tu parpunguan? Manang, taingot do Jahowa marasi ni roha jala dipaima Ibana sasahalak marhamubaon? Alai, adong do halak na so olo marhamubaon nang pe mangulahon dosa. Pos do rohamu na diboto Jahowa i, jala padengganonNa di tingkina? Patuduhonon ni Jahowa do na dumenggan. Pos do rohanta na tongtong Jahowa mangulahon na sintong? w16.06 4:8, 9

Dilehon Jahowa do pangapulion tu hita tingki marsitaonon. (Ps. 51:19) Tingki marsitaonon halak Kristen di Tessalonik, si Paulus manurat songon na dipaboa di ayat sadari on. Las situtu do rohanta, Jahowa parasi roha mangkaholongi jala mamparrohahon hita! Molo ndang alani Jahowa, ndang adong pangkirimonta ala mardosa dope hita. (Ps. 49:8, 9) Dilehon Jahowa do pangkirimon. Aha ma i? Jesus mandok, ”Ai on do dipangido roha ni Damang: Naeng ma dapotan hangoluan salelenglelengna ganup na marnida Anak i jala porsea di Ibana.” (Joh. 6:40) Alani asi ni roha ni Jahowa, marpangkirimon ma hita tu hangoluan salelengna. Si Paulus mandok, ”Ai nunga tarida asi ni roha ni Debata, sibahen haluaon ni saluhut jolma.”​—Tit. 2:11. w16.07 3:14, 15

Saonari pe, diorai do naposo ni Jahowa mangalangkup. Molo adong na mangalangkup jala marsirang asa boi marhasohotan muse, ingkon dipabali do ibana sian huria asa badia huria i. (1 Kor. 5:11-13) Alai, boi do mulak muse halak na dipabali i, molo marsitutu ibana marhamubaon. (Luk. 3:8; 2 Kor. 2:5-10) Ndang ditontuhon ingkon sadia leleng ibana patuduhon hamubaonna, alai ingkon marsitutu do ibana patuduhon hamubaon jala ro tu parpunguan. Nang pe songon i, ingkon martanggung jawab do ibana haduan taringot tu aha na diulahonna.​—Rom 14:10-12. w16.08 1: 12, 13

Dipuji si Paulus do baoa na naeng ”mangalului” hasintuaon. Rimangi ma tingki sasahalak naeng mambuat sada barang na dao sian ibana, ingkon marusaha do ibana asa boi buatonna. Suang songon i ma, sahalak baoa na naeng gabe parhobas di huria, ingkon marsitutu do patuduhon parange na denggan. Dung gabe parhobas, ingkon marsitutu do muse asa boi gabe sintua. Pigapiga donganta mambahen hamubaon di parngoluonna asa boi mangalehon gumodang tingki di ulaon partondion. Umpamana, merintis, karejo di Betel, manang pajongjongkon Bale Harajaon. w16.08 3:3, 4

Tingki laho si Nehemia tu Jerusalem, aha do na diida ibana? Diida ma angka musu sian inganan na asing mangancam halak Jahudi. Gabe ndang diuduti nasida be padengganhon tembok Jerusalem. Ndang boi be dijaga kota i, gabe mabiar ma halak Jahudi. Songon dia do pangkilalaan ni si Nehemia? Gabe mabiar do ibana jala gabe gale do tanganna? Ndang! Songon si Musa, si Asa dohot naposo ni Jahowa na asing na marsihohot, tongtong do si Nehemia marhaposan tu Jahowa. (2 Mus. 17:8-13; 2 Kron. 14:7-12) Martangiang do si Nehemia tu Jahowa mangido pangurupion jala ditangihon do tangiangna. Dipangke Jahowa do huasoNa na mansai balga laho patoguhon halak Jahudi. (Neh. 2:17-20; 6:9) Porsea do hamu na dipangke Jahowa gogoNa laho patoguhon naposoNa saonari? w16.09 1:9

Sada koran sian Belanda paboahon songon dia pemimpin ni gareja marpangkean tingki ro tu gareja. Didok, ”Jotjot do dipangke nasida angka pangkean na hurang tama idaon, tarlumobi tingki mohop ari.” Alai, didok muse di koran i, Sitindangi Ni Jahowa ndang songon i marpangkean tingki kebaktian. Jotjot do Sitindangi Ni Jahowa dipuji alani cara nasida marpangkean. Didok apostel Paulus, pangkean ni halak Kristen ingkon patuduhon ”hahormaton dohot toruk ni roha”, na patut tu naposo ni Debata. (1 Tim. 2:9, 10) Nang pe hata ni si Paulus on tu borua, alai marlangku do on tu angka baoa. Ala Sitindangi Ni Jahowa do hita, mansai ringkot do marpangkean na denggan, alana ringkot do i di adopan ni Debata. (1 Mus. 3:21) Tangkas do dipaboa di Bibel, dilehon Jahowa do aturan tu angka naposoNa taringot marpangkean. Alani i, aha na tapangke ingkon mambahen las roha ni Jahowa. w16.09 3:1, 2

Adong do na lomo rohana mamparsiajari surirang ni Bibel. Adong na mambandingkon isi ni Bibel tu sejarah, sains, manang arkeologi. Umpamana, hata di 1 Musa 3:15. Dung mangalo si Adam dohot si Hawa, dipaboa Jahowa ma surirang on. On ma surirang na parjolo di Bibel na mangurupi hita mangantusi songon dia Harajaon ni Debata patuduhon, holan Debata do na tama mamarenta jala songon dia sitaonon disalpuhon. Songon dia do hamu mamparsiajari 1 Musa 3:15? Bahen ma daftar angka ayat ni Bibel na mangalehon gumodang hatorangan na paboahon songon dia surirang on digohi. Dung i, botoonmu ma nandigan ayat i disurat jala susun ma hombar tu tingkina disurat. Botoonmu ma, nang pe angka panurat ni Bibel mangolu di tingki na so sarupa, alai sude na disurat nasida mambahen lam tangkas surirang i. On mangurupi hamu mangantusi, tondi parbadia ni Jahowa do na manogunogu nasida. w16.09 4:8

Hea do apostel Petrus ndang porsea tu halak na so Jahudi. Alai, marsitutu do ibana pasidingkon pingkiran sisongon i. (Ul. 10:28, 34, 35; Gal. 2:11-14) Hita pe ingkon marsitutu do pasidingkon pingkiran sisongon i. (1 Ptr. 1:22) Aha na boi mangurupi hita mangulahon i? Ingot ma, mardosa do hita sude, ndang soal sian dia haroronta jala sasintongna ndang tama hita ditobus. (Rom 3:9, 10, 21-24) Alani i, unang ma tadok dumenggan hita sian na asing! Tatiru ma si Paulus. Didok ibana tu halak Kristen, ”Ndang bangso na asing be hamu, ndang halak ruar,” alai nunga gabe ”anggota keluarga ni Debata” hamu. (Eps. 2:19, Bibel siganup ari) Ingkon marsitutu do hita pasidingkon pingkiran na so denggan taringot halak na so tatanda, asa boi tapaimbaru roha dohot pingkiranta.​—Kol. 3:10, 11. w16.10 1:9

Aha do na mangurupi hita togu marhaporseaon? Dilehon Jahowa do Bibel laho mangajari hita taringot tu janjiNa tu ari na naeng ro. Disi, dipaboa Ibana do na ingkon taulahon asa marlas ni roha. Alani i, ringkot do manjaha Bibel ganup ari jala mangihuthon tudutuduna. (Ps. 1:1-3; Ul. 17:11) Dilehon Jahowa do hita ”mangan di tingkina” marhite ”naposo haposan jala na marroha”. (Mat. 24:45) Dos songon naposo ni Debata najolo, tajaha jala tarimangi ma taringot janji ni Debata. On mangurupi hita tongtong marsihohot tu Debata jala paimahon HarajaonNa mamarenta di liat portibi on. (Heb. 11:1) Aha do muse na mangurupi naposo ni Debata najolo asa togu marhaporseaon? Martangiang do nasida tu Jahowa. Tingki diboto nasida na dialusi Jahowa tangiangna, lam togu ma haporseaon ni nasida.​—Neh. 1:4, 11; Ps. 34:5, 16, 18; Dan. 9:19-21. w16.10 3:7, 8

Jesus mandok, holong tu Debata do ”patik na umbalga”. (Mat. 22:35-40, Bibel siganup ari) Mansai ringkot do haporseaon dohot holong, jala jotjot do panurat ni Bibel rap manurathon dua parange i. Dijujui si Paulus do angka donganna asa mamangke ”haporseaon dohot haholongon songon baju partahanan”. (1 Tes. 5:8) Disurat si Johannes taringot parenta ni Debata, ”Naeng porsea hita di Goar ni Anakna Jesus Kristus, huhut masihaholongan.” (1 Joh. 3:23) Alai si Paulus manurat, ”Tolu do na hot: I ma haporseaon, pangkirimon dohot haholongon; alai haholongon do na umbalga.” (1 Kor. 13:13) Di ari na naeng ro, ndang porlu be hita marhaporseaon tu janji ni Jahowa, ala nunga saut be janjiNa. Marlas ni roha ma hita di ngolunta, songon na dipaboa di Bibel. Alai, ingkon sai tahaholongi do Debata dohot donganta. Sasintongna, lam togu ma holongta tu nasida salelengna. w16.10 4:15-17

Di abad na parjolo, pigapiga baoa ro tu huria laho paboahon ”patik na pinaputus ni angka apostel dohot sintua na di Jerusalem”, i ma sian punguan na mangaradoti organisasi. (Ul. 16:4) Diihuthon angka huria do tudutudu on, ”gabe lam togu ma haporseaon ni angka huria i, jala lam ganda toropnasida ganup ari”. Porlu do hita mangihuthon tudutudu sian organisasi ni Debata. Sasintongna, Bibel paboahon, ingkon unduk do hita tu halak na manguluhon hita. (5 Mus. 30:16; Heb. 13:7, 17) Angka halak na marsihohot tu Jahowa, ndang olo mangalo jala ndang olo marungutungut alani tudutudu na dilehon tu nasida. Ndang olo hita songon si Diotrepes, na so unduk tu halak na manguluhon huria. (3 Joh. 9, 10) Asa tongtong dame jala marsada di huria, ingkon taihuthon do tudutudu na dilehon. Alani i, tasungkun ma dirinta, ’Olo do ahu patoguhon dongan sahaporseaon asa marsihohot tu Jahowa? Pintor huihuthon do tudutudu na dilehon organisasi ni Debata?’ w16.11 2:10, 11

Halak Jahudi na mangihuthon tudutudu ni Jahowa, tongtong do mangulahon ulaon na somal di panabanan. Dipaloas halak Babel do halak Jahudi mangulahon ulaonna be jala mardalani di kota i. Di tingki i, Babel do pusat bisnis. Angka surat najolo patuduhon, di tingki panabanan, gabe diboto halak Jahudi taringot manuhor dohot manggadis, jala boi mambahen karya tangan. Adong do halak Jahudi na gabe mamora. Situasi di panabanan, ndang maol songon tingki halak Israel gabe hatoban di Mesir saleleng marratus taon. (2 Mus. 2:23-25) Alai boi dope halak Israel manomba Debata hombar tu na dihalomohon rohaNa? Di tingki i, maol do ra mangulahon i, alana ndang olo halak Babel paluahon halak na ditaban. Alai, nunga marjanji Debata Jahowa laho paluahon naposoNa, jala i do tutu na masa. Sai saut do janji ni Debata!​—Jes. 55:11. w16.11 4:3, 5

Marhite tobusan, disesa Jahowa do dosa ni si Paulus dohot halak Kristen di abad na parjolo. Dimiahi Jahowa nasida marhite tondi parbadia asa gabe anakNa. Molo tongtong marsihohot, mangolu ma nasida di surgo jala mamarenta raphon Jesus. Alai, boasa nasida didok ”naung mate di dosa”, hape mangolu dope nasida di tano on? Dibahen si Paulus do Jesus gabe tudosan. Didok ibana, dung mate Jesus, dipahehe ma ibana gabe tondi na so boi mate. I do alana, ”ndang dirajai hamatean i be Ibana”. Suang songon i ma, halak Kristen na miniahan pe songon naung mate. Gabe muba ma parngoluon ni nasida, ala ndang dirajai giotgiot na sala be nasida. Marsitutu do nasida mangulahon na dumenggan laho palashon roha ni Jahowa. Nang pe nasida ”songon naung mate di dosa i, alai mangolu di Debata di bagasan Kristus Jesus”.​—Rom 6:9, 11. w16.12 1:9, 10

Ndang na gabe holan taringot Jahowa dohot Bibel na tapingkirhon dohot na tahatai. Umpamana, pingkirhon ma halak Kristen di abad na parjolo. Marlas ni roha do nasida mangan, minum, marhasohotan, marianakhon, jala karejo. (Mrk. 6:3; 1 Tes. 2:9) Ndang dipaloas si Paulus dohot halak Kristen di abad na parjolo angka ulaon on gabe rumingkot di ngoluna. Taboto do si Paulus mangalului hepeng marhite mambahen tenda. Alai, ndang gabe i na rumingkot di ngoluna. Manomba Debata do na rumingkot di si Paulus. Marsitutu do ibana marbarita dohot mangajar. (Ul. 18:2-4; 20:20, 21, 34, 35) Halak Kristen di Rom porlu maniru si Paulus, suang songon i ma hita.​—Rom 15:15, 16. w16.12 2:5, 15, 16

Pos rohanta na diargai Jahowa do sude na taulahon laho manomba Ibana. Diboto Jahowa do, sipata ndang pos rohanta tu dirinta sandiri. Disarihon do hita tingki holsoan taringot parkarejoan manang taringot keluarga. Jala diantusi Ibana do, tingki marsahit manang marsitaonon hita, ndang boi be godang na taulahon di ulaon parbaritaon. Nang pe adong sitaononta, pos ma rohanta diargai Jahowa do molo tongtong hita marsihohot. (Heb. 6:10, 11) Ingot ma muse, Jahowa do ”sitangihon tangiang”. Pos ma rohanta, tingki martangiang hita tangihononNa do hita. (Ps. 65:3) ”Ama Parasiroha situtu jala Debata, Sipangapul na sumurung” mangalehon sude na tahaporluhon asa tongtong solhot tu Ibana. Sipata, olo do Ibana mangurupi hita marhite dongan sahaporseaon. (2 Kor. 1:3) Las do roha ni Jahowa molo burju hita tu na asing. (Mat. 6:3, 4) Marjanji do Ibana mangalehon upa molo tapatudu haburjuon. w16.12 4:13, 14

Tingki di tano on Jesus, ditundalhon do elaela ni Sibolis. (Mat. 4:10) Di borngin andorang so mate, didok Jesus do tu Jahowa, mangulahon parentaNa do na dihalomohon. Didok ibana, ”Amang, aut olo ma Ho nian pasalpuhon siinumon on sian Ahu! Alai unang ma rohangku saut, roham ma!” (Luk. 22:42) Boi do hita maniru Jesus jala mamangke hak laho mamillit asa pasangaphon Jahowa dohot mangulahon parentaNa? Boi do tatiru Jesus, alana hita pe ditompa tumiru Debata. (1 Mus. 1:26) Alai, hakta laho mamillit ndang dos songon Jahowa. Bibel patorangkon, dilehon Jahowa do aturan taringot hak laho mamillit jala lomo rohaNa asa tajangkon aturan i. Umpamana, taringot keluarga, ingkon unduk do tungganeboru tu tungganedolina jala dakdanak unduk tu natuatuana.​—Eps. 5:22; 6:1. w17.01 2:4, 5

Hita mangolu di tingki parpudi. Lam tu majuna do organisasi ni Jahowa di portibi on. Lapatanna, sai adong do na muba. Hamubaon on mangkorhon tu dirinta jala ndang sai mura mangadopi i. On boi taadopi molo serep rohanta jala mangkaringkothon Harajaon ni Debata sian na mangkaringkothon diri sandiri. Molo taulahon on, tongtong ma hita marsada. Didok si Paulus tu halak Kristen di Rom, ”Songon ruas ni dagingta na marasingasing ulaonna, songon i ma ganup halak di huria marasingasing do tanggung jawabna.” (Rom 12:4, 5) Diharingkothon naposo ni Jahowa do Harajaon ni Debata jala diulahon nasida do na pinangido ni Debata. Boi do baoa na umtua mangalatik na poso. Tingki manjalo tanggung jawab, ingkon pantun jala serep do roha ni na poso. Diargai tungganedoli do pangurupion ni tungganeboruna tingki adong situasi na muba. Ditiru angka borua ma si Priskilla na mangurupi tungganedolina, si Akuila.​—Ul. 18:2. w17.01 5:15, 16

Porsea do si Gidion tu Jahowa, jala didalanhon do tanggung jawabna. Dipingkiri do aha na dipangido Jahowa sian ibana, jala dipangido ibana pangurupion ni Jahowa. (Pangh. 6:36-40) Barani jala gogo do si Gidion, alai marbisuk do ibana jala manat. (Pangh. 6:11, 27) Tingki disuru bangso i ibana mamarenta, ndang olo ibana. Dung diulahon na pinangido ni Jahowa, mulak ma ibana tu jabuna. (Pangh. 8:22, 23, 29) Molo dijalo sasahalak tanggung jawab na baru, manang lomo rohana mangulahon godang ulaon di huria, on ndang patuduhon na so unduk ibana. Bibel mandok, denggan do molo talehon godang tingki mangurupi dongan sahaporseaonta jala mambahen hamajuon. (1 Tim. 4:13-15) Ingkon manjalo tanggung jawab na baru do hita asa marhamajuon? Ndang. Hita sude boi do lam denggan marparange, jala mamangke haboion na dilehon Jahowa asa lam denggan manomba Ibana dohot mangurupi na asing. w17.01 3:15, 16

Mansai arga do tobusan i di Jahowa. (1 Ptr. 1:19) Mansai arga do hita di Jahowa, alani i ma dilehon Ibana anakNa mate humongkop hita. Boi ma tadok, Jesus do ama di hita, ndang si Adam. (1 Kor. 15:45) Ndang holan hangoluan na salelengna na tadapot marhite Jesus, alai boi ma hita gabe keluarga ni Debata. Marhite tobusan, gabe tipak ma jolma jala jangkonon ni Jahowa ma nasida gabe keluargaNa. Rimangi ma songon dia las ni rohanta haduan tingki sude jolma na marsihohot tu Ibana boi gabe tipak! Ujungna, angka na di surgo dohot di tano on dipasada gabe sada keluarga. Hita sude gabe anak ni Debata. (Rom 8:21) Las ni rohanta alani tobusan ni Jesus mangonjar hita paboahon tu halak na asing taringot tu silehonlehon na mansai arga on. w17.02 1:17, 19

Menara Pengawal 15 Juli 2013 paboahon, ”naposo haposan jala na marroha”, i ma pigapiga donganta baoa na miniahan na gabe Punguan na Mangaradoti Organisasi. Sahali saminggu, marrapot do Punguan on laho mambahen keputusan na ringkot. On mangurupi nasida asa solhot jala marsada. (Poda 20:18) Ndang adong sian nasida na tumimbul sian na asing. Alani i, margantiganti do nasida manguluhon tingki marrapot. (1 Ptr. 5: 1) Songon i do tong dibahen di onom panitia sian Punguan na Mangaradoti Organisasi. Ndang didok rohanasida, umsangap nasida sian na asing. Ganup sian nasida didok do naposo, jala dohot manjalo sipanganon partondion sian naposo haposan jala mangihuthon i. Ndang langsung mangkatai Jahowa tu Punguan na Mangaradoti Organisasi tingki laho mangalehon tudutudu, jala nasida pe jolma na mardosa do. w17.02 4:10-12

Sada cara na rumingkot laho patuduhon hamauliateonta alani tobusan, i ma mangalehon diri tu Jahowa jala tardidi. On patuduhon marhaporseaon do hita tu tobusan jala Jahowa do nampuna hita. (Rom 14:8) Sude ulaon ni Jahowa diulahon alani holongNa. Marsangkap do Ibana asa sude naposoNa maniru Ibana jala masihaholongan. (1 Joh. 4:8-11) Molo tahaholongi halak na asing, on patuduhon lomo rohanta ”gabe anak ni [Debata] na di banua ginjang i”. (Mat. 5:43-48) Adong dua parenta na umbalga, i ma mangkaholongi Jahowa dohot mangkaholongi dongan jolma. (Mat. 22:37-40) Tapatudu ma holong tu dongan jolma marhite mangajari nasida taringot tu Harajaon ni Debata. Molo taoloi parenta ni Jahowa asa mangkaholongi donganta, tarlumobi dongan sahaporseaonta, lam balga ma holongta tu Ibana.​—1 Joh. 4:12, 20. w17.02 2:13, 14

Mura do mamillit on, alana manomba Jahowa do na dumenggan. Ndang olo halak na marbisuk manomba ganaganaan. Alai, ndang olo halak Israel manontuhon sipilliton. Didok di Bibel, mardua roha do halak Israel. Alani i, dijujui si Elia ma nasida asa manomba Jahowa, Debata na sintong. Boasa maol di halak Israel laho mamillit na denggan? Parjolo, ndang marhaporseaon nasida tu Jahowa, jala ndang olo manangihon Jahowa. Ndang pos rohanasida tu Jahowa, jala ndang olo marsiajar taringot tu Jahowa manang bisukNa. Autsugari diulahon nasida songon i, boi ma nasida marbisuk manontuhon sipilliton. (Ps. 25:12) Paduahon, gabe tarelaela do halak Israel, jala bangso parbegu i do na manontuhon sipilliton di nasida. Gabe diihuthon halak Israel ma bangso parbegu i, jala manomba debata ni nasida. Hape, nunga leleng Jahowa paingothon nasida taringot on.​—2 Mus. 23:2. w17.03 2:6, 7

Songon dia do muse caranta maniru si Hiskia? Ra, adong do na boi mambahen sega paralealeonta tu Jahowa manang mambahen hita manimbil sian Ibana. Saonari, godang do halak na mandebatahon sasahalak, songon angka artis na so ditanda nasida. Godang do na pasudahon tingkina laho manjahajaha taringot tu ngolu ni sasahalak jala mangida angka fotona. Adong do na jotjot mangkatai tu angka halak marhite Internet. Tontu, las do rohanta molo boi mangkatai tu keluarga dohot aleale marhite Internet. Alai, boi do suda tingkinta molo jotjot marinternet. Ra, mansai las do rohanta molo godang na mangida foto dohot komentar na tabahen di Internet. Alai, molo taboto ndang adong be na mangida angka fotonta, olo do gabe jut rohanta. Tasungkun ma dirinta: ’Manat do ahu asa unang mandebatahon sasahalak? Huulahon do angka na rumingkot di parngoluonku?’​—Eps. 5:15, 16. w17.03 3:14, 17