Agustus

Pingkirhon ma loja ni si Gidion dohot tentarana marporang mangalo halak Midian. Dialo jala dilele si Gidion do halak Midian dohot angka bangso na mandongani halak Midian saborngin manipat, daona hirahira 32 kilometer. Nunga martaontaon disusai halak Midian halak Israel, alani i ndang olo nasida talu. Alai, ditaluhon si Gidion dohot tentarana do halak Midian i! (Pangh. 7:22; 8:4, 10, 28) Hita pe dohot do tu parporangan na mambahen hita loja. Hita marporang mangalo Sibolis, portibi na nirajaanna dohot hagaleonta. Adong do sian hita naung leleng mangalo musu on. Alai, pangurupion ni Jahowa mambahen hita monang. Ndang sae dope parporanganta. Sipata, olo do ndang margogo tahilala. Manang, loja paimahon ujung ni portibi na jahat on. Nunga dipaboa Jesus hian, godang pangunjunan dohot hasusaan na ro tu hita saleleng ari parpudi. Alai, molo marhabengeton hita, boi do hita monang.​—Luk. 21:19. w16.04 2:1, 2

Di parpunguan, diajari Jahowa do hita marhite hataNa, Bibel. (Jes. 30:20, 21) Tingki halak na asing ro tu parpunguanta, boi do idaon ni nasida molo hita dipasupasu Debata. (1 Kor. 14:23-25) Jahowa do na manogunogu hita di parpunguan marhite tondi parbadia, jala sude na taparsiajari di parpunguan ro sian Ibana. Alani i, tingki ro hita tu parpunguan, hita manangihon Hata ni Jahowa, mangkilala holong ni rohaNa jala lam solhot tu Ibana. Jesus, ulu ni huria mandok, ”Ai anggo pungu dua manang tolu pe marhitehite Goarhu, sai dongananku do nasida.” (Mat. 18:20) Dipaboa Bibel muse tu hita, Jesus ”mardalan di holangholang” ni huria. (Pgk. 1:20–2:1) Jahowa dohot Jesus mamasumasu hita jala patoguhon rohanta di parpunguan. Songon dia do pangkilalaan ni Jahowa, tingki diida hita marsitutu laho manjonok tu Ibana dohot tu AnakNa? w16.04 3:13, 14

Adong ma sahalak donganta borua manjangkon dua halak donganta baoa di sada ulaon. Sahalak sian donganta baoa i, hansit rohana tu cara ni donganta borua i manjangkon nasida. Dung ditadingkon nasida donganta borua i, dipaboa ibana ma na hansit rohana mangida donganta borua i. Alai, donganta baoa na sada nai mandok, molo donganta borua on, nunga 40 taon marsihohot manomba Jahowa nang pe manaon godang hasusaan. Didok ibana muse, ndang na adong di pingkiran ni donganta borua i laho mambahen hansit rohana. Songon dia do didok donganta baoa na marhansit ni roha i? Ibana mandok, ”Tutu do na didokmi.” Dung i, marsitutu ma ibana manalpuhon hansit ni rohana i. Aha do na taparsiajari sian on? Hita do na manontuhon songon dia bahenonta tingki hansit rohanta dibahen sasahalak. Alai sahalak parholong, rade do manalpuhon hasalaan. (Poda 10:12; 1 Ptr. 4:8) Molo tahalupahon hasalaan ni dongan, uli do i di jolo ni Jahowa. (Poda 19:11) Alani i, molo adong sasahalak mandok manang mangulahon na mambahen hansit rohanta, tasungkun ma dirinta, ’Salpuhononku do hasalaanna i? Simpanonku do i di rohangku?’ w16.05 1:8, 9

Saonari, ise do na mamaritahon barita na uli taringot Harajaon? Holan Sitindangi Ni Jahowa! Sian dia taboto? Ala hita pasahathon barita na sintong, i ma barita na uli taringot Harajaon. Tingki marbarita, hita mamangke cara na sintong. Hita taronjar sian ias ni roha na patuduhon holongta tu Jahowa dohot tu dongan. Ulaon marbarita on ma ulaon na umbalga, ala ingkon dibaritahon tu sude halak na adong di sude bangso dohot marragam bahasa. Dung i, ingkon tongtong do hita mamaritahon barita na uli taringot Harajaon sahat tu na ro ujungna! Longang do rohanta mangida ulaon ni naposo ni Jahowa mamaritahon barita na uli saleleng ari parpudi. Alai, boasa boi taulahon i? Didok apostel Paulus ma songon na di ayat sadari on. Jahowa do na mangalehon hagogoon asa boi hita tongtong mamaritahon barita na uli!​—2 Tim. 4:5. w16.05 2:17, 18

Diloas do hita mamillit laho mangoloi Jahowa manang ndang. Tingki tapillit mangoloi Jahowa jala marsitutu mangulahon lomo ni rohaNa, on patuduhon hita mangkaholongi jala mambahen las rohaNa. Didok Sibolis do molo Jahowa ndang Parhuaso na denggan. Alani i molo taoloi Jahowa, patuduhon na lomo do rohanta molo Ibana gabe Parhuaso di hita. Jala pos do rohanta, diargai Jahowa do ganup na taulahon asa boi mangoloi Ibana. (Job 2:3-5; Poda 27:11) Tingki marsitutu hita mangorom hahuranganta nang pe maol taulahon, on patuduhon na marsihohot do hita tu Jahowa jala lomo rohanta Ibana gabe Parhuaso di hita. Didok Jahowa, ingkon marsitutu do hita maniru angka parangeNa. (Kol. 3:12; 2 Ptr. 1:5-7) Dipangido Ibana do asa marsitutu hita mangorom roha dohot pingkiranta. (Rom 8:5) Tingki marsitutu hita mambahen hamubaon jala marhasil, tahilala ma las ni roha. w16.05 4:12, 13

Songon sitopa hudon na malo jala mamboto ragam ni tano liat, diboto Jahowa do sude taringot hita. Diboto do hagaleonta, gogonta, hamubaon na tabahen, jala ditopa do hita mangihuthon na tolap tabahen. (Ps. 103:10-14) Taboto do pangkilalaan ni Jahowa tu hita marhite pambahenan ni Jesus maradophon hagaleon ni angka siseanna. Hea ma marsoal angka siseanna taringot ise sian nasida na umsangap. Molo disi hita, songon dia do pangkilalaanta mangida parange ni angka apostel i? Ra, tadok do nasida ndang songon tano liat na mura ditopa. Alai diboto Jesus do, molo ditangihon siseanna i podana jala ditiru serep ni rohana, boi dope nasida ditopa. (Mrk. 9:33-37; 10:37, 41-45; Luk. 22:24-27) Dung hehe Jesus, dijalo angka siseanna ma tondi parbadia jala ndang dipingkirhon nasida be ise na umsangap. Alai, marsitutu do nasida mangulahon ulaon na diparentahon ni Jesus.​—Ul. 5:42. w16.06 1:10

Jahowa do Debata na sintong, ndang adong Debata na songon Ibana. (2 Sam. 7:22) Ndang boi halak Israel mangihuthon angka halak na tading di humaliang ni nasida na manomba ganaganaan. Dihaporseai halak na tading disi do, ganaganaan na mangatur sude na masa di tano on. Umpamana, halak Mesir manomba dewa Ra, i ma dewa matahari, Nut, i ma dewa langit, Geb, i ma dewa tano, Hapi, i ma dewa Nil, dohot angka dewa binatang. Dipatudu Jahowa do huasoNa maradophon angka dewa on tingki parohon sampulu tulah tu Mesir. Baal do debata na disomba halak Kanaan. Dihaporseai nasida do Baal mangalehon tondi na so boi mate. Porsea do nasida tu dewa langit, dewa udan, dohot dewa ronggur. Di godang inganan, porsea do nasida Baal na mangalinggomi. (4 Mus. 25:3) Ingkon diingot halak Israel, Jahowa do Debata na sintong jala tandi sian na asing.​—5 Mus. 4:35, 39. w16.06 3:4, 5

Sitiruon na dipatudu Jesus mangajari hita marsihohot tu Jahowa dohot tu organisasiNa. Nunga taida, diramoti Jahowa do naposoNa di tingki naung salpu sahat ro di ujungna. Diurupi do nasida marbarita na uli di liat portibi on, jala holan angka naposoNa do na mangulahon i. Marsada do naposoNa jala marlas ni roha alani hasintongan na diajarhon ni Jahowa. Nunga didok Jahowa hian, ”Ida ma, marolopolop sogot anggo angka naposongku sian sonang ni rohana.” (Jes. 65:14) Las do rohanta ala ditogutogu jala diurupi Jahowa hita mangulahon na denggan. Alai, halak na dirajai Sibolis, ndang marlas ni roha jala ndang marpangkirimon. Alani i, ndang marbisuk hita molo tatadingkon Jahowa dohot organisasiNa holan alani hasalaan ni sasahalak di huria! Ingkon tongtong do hita marsihohot tu Jahowa jala mangihuthon tudutuduNa. Ringkot do taparsiajari songon dia hita maradophon hasalaan ni dongan. w16.06 4:10-12

Tadapot ma parsiajaran sian panjaga ni kota najolo. Songon Jerusalem, godang do kota na dihaliangi tembok na timbo asa unang masuk musu. Jongjong ma angka panjaga i di ginjang ni tembok, jala sian i boi do diida nasida sude kota i. Panjaga na asing jongjong di gerbang ni kota. Ingkon dungo do nasida arian dohot borngin. Molo diida nasida adong musu, ingkon dipaboa do tu angka halak na di kota. (Jes. 62:6) Diboto nasida, ringkot do tongtong dungo jala mamparrohahon aha na masa. Molo tarpodom nasida, mate ma godang halak. (Hes. 33:6) Si Yosefus, na manurat taringot sejarah ni halak Jahudi, patorangkon boasa boi halak Rom masuk tu Jerusalem di taon 70 M. Na tarpodom do angka panjaga ni kota i, gabe masuk ma tentara ni halak Rom tusi. Masuk ma nasida tu bagas joro, ditutung ma i, jala dilengsehon ma Jerusalem. On ma hasusaan bolon na umbalga na hea dihilala halak Jahudi. w16.07 2:2, 7, 8

Tajalo ma godang pasupasu alani asi ni roha ni Jahowa. Alai, unang ma hita sala mamangke holong ni Debata laho mangulahon dosa. Di abad na parjolo, adong do halak Kristen na ”sala mamangke di asi ni roha ni Debata laho pasombuhon hisaphisapnasida”. (Jud. 4, Bibel siganup ari) Dirimpu nasida, salpuhonon ni Jahowa ma hasalaan ni nasida nang pe sai mangulahon dosa nasida. Ditogihon do angka dongan sahaporseaon asa mangihuthon nasida. Di tingkinta saonari, molo adong sasahalak na mangulahon sisongon i, ”na mangaleai Tondi parasian i” do nasida. (Heb. 10:29, Bibel siganup ari) Saonari, Sibolis mangotootoi halak Kristen asa marpingkir ndang sala mangulahon dosa, alana sai disesa Debata do i. Tutu, disesa Jahowa do dosa ni sasahalak, alai dipangido Ibana do asa marhamubaon hita jala marsitutu pasidingkon dosa. w16.07 3:16, 17

Molo ndang ala na mangalangkup, halak na marsirang ndang boi marhasohotan muse. Olo do ra disalpuhon sasahalak hasalaan ni dongan saripena na mangalangkup. Songon si Hosea, disalpuhon do hasalaan ni tungganeboruna, i ma si Gomer, na mangalangkup. Suang songon i ma Jahowa, disalpuhon do hasalaan ni halak Israel na marhamubaon. (Hos. 3:1-5) Tingki diboto sasahalak na mangalangkup dongan saripena, alai tongtong dijangkon, on patuduhon disalpuhon ibana do hasalaan ni dongan saripena i, jala ndang ingkon marsirang nasida. Dung dipaboa Jesus songon na di ayat sadari on, didok ibana ma muse, adong do halak na so olo marhasohotan ala manjumolohon Harajaon ni Debata. ”Manang ise na tarbahen manjalo hata i, dijalo ma!” (Mat. 19:10-12) Godang do halak na so marhasohotan ala lomo roha ni nasida mangalehon gumodang tingki laho manomba Jahowa, jala sipujion do nasida! w16.08 1:15, 16

Godang do na boi diulahon angka na poso di ulaon partondion, ala gogo jala sehat dope nasida. (Poda 20:29) Adong do na karejo di Betel di bagian percetakan buku dohot Bibel. Na asing mangurupi tingki adong masa mara, pajongjongkon manang padengganhon Bale Harajaon. Dung i, adong muse na marsiajar bahasa na baru manang pinda tu luat na asing laho marbarita na uli. Panurat buku psalmen mandok, ”Ndang hurangan di nasa na denggan angka na mangalului Jahowa”. (Ps. 34:11) Tutu ma, molo talehon na dumenggan tu Jahowa, tadapot ma las ni roha ala taboto hita mambahen las rohaNa, jala sai diparrohahon do hita. w16.08 3:5, 8

Boi jala olo do Jahowa mangurupi hita, jala dilehon do tondi parbadiaNa patoguhon hita. (1 Kron. 29:12) Mansai ringkot do mangido tondi parbadia asa boi tatundalhon elaela ni Sibolis dohot portibi na nirajaanna. (Ps. 18:39; 1 Kor. 10:13) Mandok mauliate do hita ala tadapot pangurupion sian Bibel. Rimangi ma angka na taparsiajari sian publikasinta ganup bulan. Dipasahat do hata di Sakaria 8:9 dohot 13 tingki dipadenggan bagas joro di Jerusalem. On paposhon rohanta. Dipatogu Jahowa do hita marhite tudutudu na dilehon di parpunguan, di kebaktian, dohot di singkola teokratis. Tudutudu on mangurupi hita manomba Jahowa sian ias ni roha, asa marpangkirimon, jala mangurupi hita laho mangulahon tanggung jawab Kristen. (Ps. 119:32) Olo do hamu dipatogu marhite tudutudu sian Jahowa? w16.09 1:10, 11

Dipaboa di Patik ni si Musa, ndang lomo roha ni Jahowa mangida pangkean na so paimbarhon baoa dohot borua. Saonari, pangkean sisongon i didok pangkean na mambahen hita maol mananda na dia baoa, na dia borua. (5 Mus. 22:5) Sian Patik i, taboto ma ndang lomo roha ni Jahowa mangida pangkean na mambahen baoa songon borua, manang mambahen borua songon baoa. Prinsip sian Bibel mangurupi hita mamillit na denggan taringot marpangkean. Prinsip on marlangku tu hita ndang soal didia hita maringanan. Ndang tahaporluhon daftar na ganjang taringot pangkean na boi dipangke dohot na so boi dipangke. Taihuthon ma prinsip sian Bibel na paloashon hita mamillit na laho tapangke. w16.09 3:3, 4

Rimangi ma taringot tu hajujuron ni angka na manurat Bibel. Dipaboa do na sintong jala ndang mabiar nasida mangulahon i. Di tingki i, jotjot do angka panurat holan manurathon angka na denggan taringot tu bangsona dohot pemimpinna. Panurirang ni Jahowa ndang holan manurathon angka na denggan, alai disurat do taringot tu hajahaton ni bangso Israel dohot rajana. (2 Kron. 16:9, 10; 24:18-22) Disurat nasida do hasalaan ni nasida sandiri dohot naposo ni Debata na asing. (2 Sam. 12:1-14) Molo tapaloas Hata ni Debata manogunogu hita, tahilala ma pangkorhon na denggan. Pos ma rohanta, Bibel i sian Debata. (Ps. 19:8-12) Ala marsiajar Bibel, diboto godang halak ma ndang sintong sude na dihaporseai nasida. (Ps. 115:3-8) On mangurupi nasida marhaposan tu Jahowa, na manjanjihon ngolu na dumenggan. Alai, halak na mandok ndang adong Debata, mambahen angka na di tano on gabe debatana. Adong na mandok, jolma boi mambahen lam denggan ngolunta. Alai molo taida sian angka na diulahon jolma, ndang boi nasida pasohon hasusaan di portibi on.​—Ps. 146:3, 4. w16.09 4:10, 11

Parduli do si Boas tu si Rut ala ibana sahalak panompang. Didok si Boas asa diihuthon si Rut angka boruboru panabi i sian pudi, jala unang diganggu angka baoa panabi i ibana. Dilehon si Boas do sipanganon dohot siinumon tu si Rut, songon na dilehon tu angka panabina i. Dipatudu si Boas do burju ni roha tu si Rut. (Rut 2:8-10, 13, 14) Dipatudu si Boas pe burju ni roha tu si Rut ndang ala na simatuana, si Naomi, alai ala nunga manomba Jahowa do si Rut jala marhaposan tu Ibana. Tingki patuduhon burju ni roha tu si Rut, Jahowa do na ditiru si Boas. (Rut 2:12, 20; Poda 19:17) Suang songon i, molo burju hita, boi ma taurupi ”saluhut jolma” asa mamboto hasintongan jala mamboto na dihaholongi Jahowa do nasida.​—1 Tim. 2:3, 4. w16.10 1:10-12

Suang songon i, tingki taboto na dialusi Jahowa tangiangta jala dilehon na tahaporluhon di tingki na pas, lam togu ma haporseaonta. (1 Joh. 5:14, 15) Porlu do hita tongtong mangido tondi parbadia asa lam togu haporseaonta. (Luk. 11:9, 13) Tingki martangiang tu Jahowa, unang ma holan mangido na tahaporluhon. Ingkon tapuji jala tadok mauliate ganup ari tu Ibana. Alana, nunga godang angka na denggan na dilehon Jahowa! (Ps. 40:6) Ditangiangkon naposo ni Jahowa do sude dongan sahaporseaonna. Umpamana, taingot do ”angka na tarhurung”. Tatangiangkon do muse ”angka na manguluhon” hita. Tingki taboto na dialusi Jahowa tangiangta, lam togu ma haporseaonta jala lam jonok ma hita tu Ibana.​—Heb. 13:3, 7. w16.10 3:8, 9

Saonari, marhaporseaon jala masihaholongan do naposo ni Debata. Dipaboa nasida do taringot HarajaonNa. Nasida boi mangulahon on, ala olo nasida ditogutogu tondi parbadia. (Gal. 5:22, 23) Aha do hasilna? Lobi sian ualu juta Sitindangi marsada jala mardame di liat portibi on. Tangkas ma, mangkorhon do haporseaon dohot holong. Hita boi marsada holan alani pangurupion sian Debata. Alani i, tama do Jahowa dipuji. (Jes. 55:13) Tongtong do Jahowa mangurupi godang jolma marhaporseaon tu Ibana. Ujungna, sude jolma di tano on gabe sempurna, tigor, jala marlas ni roha mamuji Jahowa salelengna! w16.10 4:18, 19

Dilehon angka sintua do pengaturan sian Bibel, asa boi denggan jala dame huria. Ingkon taihuthon do tudutudu sian nasida. Di abad na parjolo, adong do ”na so maradat parangena”, diantoi nasida ulaon na so ulaonna. Dipasingot angka sintua do nasida asa marhamubaon. Dipaboa si Paulus do songon dia hita maradophon halak sisongon i. Didok ibana, ”Patanda hamu ma i; unang ma marparsaoran hamu dohot ibana.” Unang ma marsaor dohot nasida, alai ndang mambahen nasida gabe musu. (2 Tes. 3:11-15) Angka sintua saonari pe mangurupi donganta na so mangihuthon aturan ni Debata. Umpamana, na marhallet tu na so Sitindangi. (1 Kor. 7:39) Boi do angka sintua mangalehon jamita na patorangkon songon dia parange sisongon i mambahen halak mangkatahon na so denggan taringot hurianta. Songon dia do hamu maradophon i? Molo diboto hamu ise halakna, olo do hamu ndang marsaor dohot ibana? Molo diulahon hamu on, boi ma hamu mangurupi ibana mangantusi molo parangena i ndang dihalomohon Jahowa, jala ingkon marhamubaon do ibana. w16.11 2:13

Tingki Pentakoste taon 33 M, marribu halak Kristen dimiahi marhite tondi parbadia. Nasida gabe ”marga na pinillit . . . hamalimon na raja, bangso na badia, houm na ginomgomanna”. (1 Ptr. 2:9, 10) Tingki mangolu dope angka apostel, denggan do huria diparrohahon. Alai dung mate nasida, adong pigapiga baoa di huria na mangajarhon ajaran na so sintong jala mambahen angka sisean dao sian hasintongan. Lomo roha ni angka baoa on tu ajaran ni si Aristoteles dohot si Plato, jala ndang mangajarhon hasintongan sian Bibel. Pandapot ni nasida sandiri do na diajarhon tu huria. (2 Tes. 2:6-8) Angka sintua hian do nasida di huria. Nang pe didok Jesus tu angka siseanna, ”Saluhutna hamu marhahamaranggi,” alai mulai ma dibahen nasida punguan ni angka pandita.​—Mat. 23:8. w16.11 4:8

Ra, najolo godang do taulahon na sala jala ndang taboto songon dia pangkilalaan ni Jahowa mangida i. Hita pe gabe songon ”pangoloi di hahodaron” jala gabe ”hatoban ni dosa”. (Rom 6:19, 20) Alai dung marsiajar Bibel, taboto ma na dihalomohon Debata, marhamubaon, mangalehon diri tu Jahowa jala tardidi. Nunga ”malua hamu sian dosa” jala gabe ”tunduk do hamu mangoloi hatigoran i”. (Rom 6:17, 18) Boi do hita mamillit, laho mangihuthon giotgiot ni daging manang manundalhon i. Sungkun ma dirimu: ’Hupaloas do sangkapsangkap na sala tubu di rohangku na mambahen ahu mangulahon na sala? Hatop do i hupasiding?’ Molo tahamauliatehon asi ni roha ni Debata, taulahon ma na palashon rohaNa. w16.12 1:11, 12

Na ringkot taulahon asa mangkilala dame ni roha, i ma boi mardame tu keluarga dohot dongan di huria. Ala mardosa dope hita, olo do ra adong parsoalanta tu angka dongan sahaporseaon. Molo masa i, ihuthon ma poda ni Jesus na mandok, ”Jolo mardenggan dohot donganmi.” (Mat. 5:24) Ingot ma, dongan sahaporseaonta pe manomba Jahowa, ”Debata Pardame”. (Rom 15:33; 16:20) Molo sai tapingkirhon angka na hombar tu partondion, hita pe boi mardame tu Debata. Panurirang Jesaya manurat, ”Hombar tu sangkap na ojak do dipaian ho [Jahowa] dame, dame ma tutu, ai marnalom ni roha mida ho do ibana.”​—Jes. 26:3; Rom 5:1. w16.12 2:5, 18, 19

Nang pe hita mangolu di tingki parpudi pamarentaon ni Sibolis, sai dipasupasu Jahowa do naposoNa. Lomo do roha ni Debata asa tadapot godang parbinotoan dohot hadameon ala nunga gabe bagian sian dongan sahaporseaon di liat portibi on. (Jes. 54:13) Songon na dijanjihon Jesus, dilehon Jahowa do upa tu hita saonari, i ma angka dongan sahaporseaon di liat portibi on na mangkaholongi hita. (Mrk. 10:29, 30) Jala, angka na marsitutu mangalului Debata mandapot upa, i ma hadameon dohot las ni roha. (Plp. 4:5-7) Pos ma rohamu, molo ”tarula hamu lomo ni roha ni Debata”, boi ma ”dapot bagabaga i”. (Heb. 10:35, 36) Alani i, tongtong ma tapatogu haporseaonta jala marhiras ni roha ma hita manomba Jahowa. Pos ma rohanta, lehonon ni Jahowa do upa tu hita!​—Kol. 3:23, 24. w16.12 4:17, 20

Boi do tadok hakta laho mamillit mangihuthon aturan ni Debata parohon las ni roha? Boi! Alana, tarlinggomi do hita molo adong aturan. Umpamana, marmobil hita tu sada kota na dao. Songon dia ma molo di inganan i ndang adong aturan lalu lintas, jala lomolomo ni halak manontuhon sadia hatop jala di jalur dia nasida marmobil. Olo do hamu marmobil di dalan sisongon i? Tontu ndang olo. Dihaporluhon do aturan asa sude marlas ni roha jala mandapot laba sian hak laho mamillit. Taulas ma sitiruon na patuduhon songon dia aturan na dilehon Jahowa marlaba tu hita, ndang songon si Adam. Dipangan si Adam do parbue ni hau i. Ala diulahon i, on patuduhon ndang dijangkon ibana aturan ni Jahowa. Ala ndang denggan cara ni si Adam mamangke hak laho mamillit, gabe susa ma jolma. (Rom 5:12) Taingot ma muse aha pangkorhon ni na pinillit ni si Adam. On mangonjar rohanta asa denggan mamangke hak laho mamillit jala manjangkon aturan sian Jahowa. w17.01 2:6, 8

Tingki manjalo tanggung jawab na baru, martangiang ma hita jala denggan ma tapingkirhon na boi manang na ndang taulahon tanggung jawab na baru i. Molo unduk hita, porlu do hita mandok ndang boi. Lomo do roha ni Jahowa asa ”marpangalaho haserepon” hita maradophon Ibana. (Mik. 6:8) Songon si Gidion, tingki dilehon tu hita tanggung jawab na baru, tapangido ma pangurupion ni Jahowa. Manat ma tapingkirhon aha na dipaboa Jahowa marhite Bibel dohot organisasiNa. Taingot ma, aha pe na taulahon di organisasiNa, on ndang alani gogonta. Alai, ala serep ni roha ni Jahowa do jala lomo rohaNa mangurupi hita. (Ps. 18:36) Halak na unduk roha ndang olo umsangap sian na sasintongna. w17.01 3:17, 18

Diboto Jesus, ingkon adong do na manguduti ulaonna. Diboto ibana do ndang tipak angka siseanna. Alai pos do rohana, umbalga do ulaon ni siseanna sian naung diulahon ibana. (Joh. 14:12) Denggan do diajari Jesus nasida, jala tolap do nasida marbarita na uli manang didia pe. (Kol. 1:23) Dung mate Jesus, dipahehe Jahowa ma ibana, dilehon ma godang ulaon jala ibana mangaradoti sude ”nasa harajaon dohot huaso, nang hagogoon dohot hamuliaon”. (Eps. 1:19-21) Molo marsihohot hita sahat tu na mate, boi do paheheon ni Jahowa hita jala lehononNa do tu hita godang ulaon di tano na imbaru. Saonari, sude hita martanggung jawab laho marbarita na uli jala mambahen sisean. Ndang soal poso dope manang nunga matua, ingkon marsitutu ma hamu mangula ulaon ni Tuan i. w17.01 5:17, 18

Tobusan i dilehon holan sahali ro di salelengna. (Heb. 9:24-26) Si Adam parohon hamatean, alai Jesus mamboan tu hangoluan salelengna. Alani tobusan, malua ma hita sian portibi na nirajaan ni Sibolis dohot sian hamatean. (Heb. 2:14, 15) Sai saut do sude janji ni Debata. Songon hukum alam na so hea muba, Jahowa pe ndang hea muba. Ndang hea dibahen jut rohanta. Dilehon do silehonlehon na ummarga sian hangoluan. Dipatudu do holongNa tu hita. ”Nunga tatanda jala tahaporseai holong ni roha ni Debata di hita. Debata do haholongon.” (1 Joh. 4:16) Ndang sadia leleng nai, gabe paradeiso ma tano on. Sude halak boi maniru Jahowa jala masihaholongan. Dung i, na di surgo dohot na di tano on mandok, ”Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! Amen.”​—Pgk. 7:12. w17.02 2:16, 17

Menara Pengawal 1 Juni taon 1973, mangulas sungkunsungkun taringot ”boi do manang na ndang halak na marisap tardidi”. Didok disi ndang boi! Dienet majalah i do muse pigapiga ayat jala dipatorang, halak na marisap ingkon dipabali sian huria. (1 Kor. 5:7) Didok muse, aturan on ndang sian jolma, alai ”sian Debata, na paboahon taringot diriNa marhite HataNa, i ma Bibel”. Sada buku taringot tu agama di Amerika Serikat mandok, ”Jotjot do pamimpin ni gareja mangganti ajaran ni nasida asa hombar tu na dihalomohon ruasna dohot godangan halak.” Alai, Punguan na Mangaradoti Organisasi ndang songon i. Lomo do rohanasida ditogutogu marhite Hata ni Debata, jala on patuduhon Jahowa do sasintongna na manguluhon naposoNa saonari. Asing ni Sitindangi Ni Jahowa ndang adong agama na olo mangulahon sude na didok Hata ni Debata, ala dirimpu nasida maol do i diulahon. w17.02 4:15

Angka sintua di huria doshon parmahan na serep marroha. Ndang olo nasida dibahen songon artis. Alani i, mansai imbar do nasida sian angka pamimpin agama saonari dohot di tingki ni Jesus. Didok Jesus taringot tu angka pamimpin agama, ”Sai hundulan na sumangap do ditodo, uju di parpestaan, songon i bangku jolojolo di angka parguruan. Dipangido, naeng tabion nasida di onan.” (Mat. 23:6, 7) Unduk do angka sintua tu hata ni Jesus na mandok, ”Unang ma margoar guru, ai Sada do Gurumuna; saluhutna hamu marhahamaranggi. Ndang jadi goaronmuna manang ise sian hamu ”Ama” di tano on, ai Sada do Amamuna, i ma na di banua ginjang i! Jala ndang jadi goaron hamu Partogi, ai Sada do Partogimuna, i ma Kristus i! Alai na sumangap sian hamu, i ma gabe songon naposomuna!” (Mat. 23:8-11) Molo serep roha ni angka sintua jala unduk tu hata ni Jesus, dihaholongi, diargai, jala dipasangap dongan sahaporseaonna ma nasida. w17.03 1:14, 15

Ingkon taoloi do Hata ni Debata asa marbisuk manontuhon sipilliton. Alani i, unang ma gabe halak na asing na manontuhon sipillitonta. Alai ingkon taantusi, angka na denggan do na nidok ni Debata jala taulahon ma i. Boasa boi gabe halak na asing na manontuhon sipillitonta? Ala tapaloas nasida mangelaela hita mangulahon na sala. (Poda 1:10, 15) On mambahen hita marjea. Alani i, taihuthon ma panggora ni rohanta na hombar tu Bibel. Molo halak na asing na manontuhon sipillitonta, nasida do na taihuthon. On boi parohon jea tu hita. Dipaingot si Paulus do halak Galatia asa unang halak na manontuhon sipilliton di nasida. (Gal. 4:17) Lomo do roha ni pigapiga donganta baoa di Galatia manontuhon sipilliton ni dongan na asing di huria. w17.03 2:8-10

Marsitutu do si Josia mambahen las roha ni Jahowa. Molo hamu sahalak na poso, tiru ma si Josia jala lam solhot ma tu Jahowa. Sian na masa tu ompungna, i ma Raja Manasse, diboto si Josia do na rade Jahowa manalpuhon hasalaan. Hamu pe boi marsiajar sian natuatua di keluarga dohot di huria. Las do rohanasida paboahon angka pasupasu na dilehon Jahowa tu nasida. Ingot ma songon dia pangkilalaan ni si Josia dung mamboto na didok di buku patik. Marsitutu do ibana mambahen las roha ni Jahowa jala lam denggan marparange. Molo dijaha hamu Bibel, hamu pe boi marsitutu asa mangoloi Jahowa. Gabe lam togu ma paralealeonmuna tu Jahowa jala marlas ni roha ma hamu. Taronjar ma rohamu paboahon taringot Jahowa tu na asing. (2 Kron. 34:18, 19) Tingki marsiajar Bibel, ra gabe diboto hamu do aha na ingkon diuba hamu asa lam togu di partondion. Alani i, sai tatiru ma si Josia. w17.03 3:18, 19