September

Di Bibel, lapatan ni habengeton ndang holan sabar manaon hasusaan. Alai, na hombar muse tusi, i ma songon dia pangkilalaanta mangadopi hasusaan i. Habengeton mangurupi hita asa barani, marhaporseaon jala sabar. Sada buku referensi mandok, habengeton, i ma parange na boi mangurupi hita asa marpangkirimon na togu, jala boi denggan mangadopi tingki masa hasusaan. Dung i, mangurupi hita asa tongtong togu, nang pe mansai borat sitaononta. Unang ma holan hasusaan i na sai tapingkirhon, alai taingot ma pangkirimonta di ari na naeng ro. Asa boi marhabengeton, ingkon adong do di hita holong. (1 Kor. 13:4, 7) Holongta tu Jahowa mambahen hita marhabengeton manaon hasusaan na masa tu hita. (Luk. 22:41, 42) Holongta tu dongan sahaporseaon, mambahen hita marhabengeton tu hagaleon ni nasida. (1 Ptr. 4:8) Holongta tu dongan saripe, mambahen hita marhabengeton manaon hasusaan na jotjot masa di parsaripeon.​—1 Kor. 7:28. w16.04 2:3, 4

Tongtong do halak Kristen najolo rap marpungu manomba Jahowa. Ndang mansohot nasida rap marpungu, nang pe manaon hasusaan sian pamarentaon ni halak Rom dohot pemimpin ni agama Jahudi. Nang pe ndang mura, marsitutu do nasida asa boi rap marpungu. Saonari pe, marlas ni roha do naposo ni Jahowa di parpunguan. Si George Gangas, sahalak sian Punguan na Mangaradoti Organisasi lobi sian 22 taon mandok, ”Molo di ahu, marpungu dohot angka dongan, sada ulaon na pasonangkon roha.” Didok muse, ”Lomo hian do rohangku ro tu parpunguan.” Songon i do pangkilalaanta? Molo songon i do, marsitutu ma asa boi rap dohot donganta ro tu parpunguan nang pe maol. Patuduhon ma tu Jahowa na tahilala do songon pangkilalaan ni Raja Daud na mandok, ”Ale Jahowa, huhaholongi do hajongjongan ni bagasmu.”​—Ps. 26:8. w16.04 3:16-18

Molo adong hata manang ulaonta na mambahen hansit roha ni donganta, aha do na ingkon taulahon? Togihon hamu ma donganta i mangkatai laho mardame dohot ibana. Dung ditogihon hamu, paboa ma salamuna jala unang lului sala ni ibana. Mardame dohot donganta, i do na rumingkot di hita. Umpamana, tubu ma parbadaan di tongatonga ni parmahan ni si Abraham dohot si Lot ala ndang sae be inganan parmahanan tu pinahan ni nasida. Ala lomo roha ni si Abraham nasida mardame, parjolo do disuru ibana si Lot mamillit ingananna. (1 Mus. 13:1, 2, 5-9) Gabe pogos do si Abraham? Ndang. Gariada, marjanji do Jahowa laho mangalehon godang pasupasuNa tu si Abraham. (1 Mus. 13:14-17) Aha do na boi taparsiajari? Nang pe rugi hita, alai lehonon ni Jahowa do pasupasuNa molo rade hita pasaehon parsalisian marhite holong. w16.05 1:11, 12

Marhite Bibel, dilehon Jahowa tu hita patikNa asa taboto lomo ni rohaNa. Umpamana, dipaboa di Bibel ndang boi hita manangko, mabuk, mangulahon parmainanon manang manomba ganaganaan. (1 Kor. 6:9, 10) Dung i, dilehon Jesus Kristus do parenta na tangkas tu siihuthon ibana, ”Podai hamu ma saluhut bangso, didi hamu ma nasida tu bagasan Goar ni Ama. Anak dohot Tondi Parbadia! Laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on!” (Mat. 28:19, 20) Sude na diajarhon ni Jahowa dohot Jesus tu hita, mangurupi hita asa denggan parngoluonta. Patik ni Jahowa mangajari hita manarihon keluarganta, dung i asa tongtong hita sehat jala marlas ni roha. Na rumingkot, molo taoloi parenta ni Jahowa, songon marbarita na uli, on palashon rohaNa jala parohon pasupasuNa tu hita. w16.05 3:1

Molo taulahon i, boi ma Jahowa mangurupi hita mangantusi lomo ni rohaNa jala boi ma taparsiajari songon dia pingkiranNa. Dung i, aha na tapingkiri, na tahatahon dohot na taulahon boi ma mambahen las roha ni Jahowa. Jala boi ma hita marsiajar mangorom hahuranganta. (Luk. 11:13; Gal. 5:22, 23) Alai nang pe nunga taulahon on, porlu do hita sai marsitutu mangorom i. (Poda 4:23) Dihaporluhon do tingki laho marsiajar maniru parange ni Jahowa. Molo dihilala hamu ndang boi dope mambahen godang hamubaon laho maniru parange ni Debata, porlu ma hamu sabar. Parjolo sahali, ingkon marsitutu do hamu laho mangulahon na didok Bibel. Molo lam marsitutu hamu pahombarhon pingkiran dohot parniulaonmu tu lomo ni roha ni Jahowa, lam mura ma hamu mangihuthon pingkiranNa jala lam mura mangulahon na sintong.​—Ps. 37:31; Poda 23:12; Gal. 5:16, 17. w16.05 4:14, 16

Laho manopa hita, dipangke Jahowa do Bibel, tondi parbadia, dohot huria. Songon dia do Bibel boi manopa hita? Tajaha, tarimangi, jala tapangido ma Jahowa mangurupi hita mangulahon i. Songon na disurat raja Daud, ”Molo sapala diingot rohangku Ho di atas podomanku, laos torus sabornginna i marhusari ahu taringot tu Ho.” (Ps. 63:7) Didok ibana muse, ”Hupuji ma Jahowa na manogunogu ahu, jala di tingki borngin panggora ni rohangku mangajari ahu.” (Ps. 16:7, Bibel siganup ari) Dirimangi si Daud do patik ni Jahowa jala dipangke laho manopa roha dohot pingkiranna, nang pe sipata maol dihilala ibana mangulahon i. (2 Sam. 12:1-13) Dilehon si Daud do sitiruon na denggan tu hita, i ma serep ni roha dohot pangoloion. Tasungkun ma dirinta, ’Hea do hujaha Bibel, dung i hurimangi? Boi dope ahu marsitutu laho mangulahon i?’​—Ps. 1:3. w16.06 1:11

Sude do hita mardosa jala hea sala. Alani i, ndang tagamon donganta na asing ndang hea mandok manang mangulahon na sala. Alai, molo songon i do na tahirim, mago ma las ni roha. Jala, boi gale haporseaonta manang gabe manadingkon organisasi ni Jahowa. Dung i, mago ma pangkirimonta mangolu di tano na imbaru. Aha do na boi mangurupi hita asa tongtong marlas ni roha nang pe adong na mambahen hansit rohanta? Taingot ma janji ni Jahowa, ”Ai ida ma, ahu ma manompa langit na imbaru dohot tano na imbaru, jala ndang be ingoton angka na parjolo i manang tarsunggul tu roha.” (Jes. 65:17; 2 Ptr. 3:13) Lehonon ni Jahowa do tu hita pasupasuNa molo tongtong hita marsihohot tu Ibana. w16.06 4:13, 14

Hata ”Jahowa Sasadasa” boi do lapatanna ingkon saut sude janjiNa dohot ulaonNa. Debata Jahowa ndang mubauba. Ibana Debata na sintong jala marsihohot tu janjiNa. Umpamana, dijanjihon do tu si Abraham, pinomparna na mangingani tano Kanaan. Dipatudu Jahowa do godang tanda halongangan laho pasauthon janjiNa on. Nang pe naung opat ratus tolupulu taon dijanjihon, tongtong do digohi Jahowa janjiNa jala ndang hea muba sangkapNa. (1 Mus. 12:1, 2, 7; 2 Mus. 12:40, 41) Dung marratus taon, didok Jahowa tu halak Israel na gabe sitindangiNa, ”Ahu do Debata. Ndang adong debata na asing nang di tingki naung salpu, nang di tingki na naeng ro.” Dipasaut Jahowa do sude sangkapNa jala ndang hea muba, didok Ibana, ”Ahu do Debata, jala tongtong do i.” (Jes. 43:10, 13, Bibel siganup ari; 44:6; 48:12) Hak na sumurung do di halak Israel manomba Debata na tongtong marsihohot! Hak na sumurung do i di hita saonari.​—Mal. 3:6; Jak. 1:17. w16.06 3:6, 7

Dibahen angka pamarenta saonari do tentara dohot sistem keamanan na jago manjaga parbatasan kota ni nasida. Diboto nasida ma, ise manang aha na naeng manggugai negaranasida. Alai ndang diboto nasida, di surgo adong do pamarentaon na umgogo, i ma na diparenta Jesus Kristus. Pamarentaon on ma na laho mamorangi sude pamarentaon na di portibi on. (Jes. 9:5, 6; 56:10; Dan. 2:44) Tapaima ma haroro ni pamarentaon i jala mangarade ma hita. Taparrohahon ma surirang ni Bibel jala tongtong ma marsihohot tu Jahowa. (Ps. 130:6) Lam jonok tu ari i, lam maol ma hita tongtong dungo. Marisuang do molo ndang tongtong hita dungo! w16.07 2:2, 9, 10

Diboto si Paulus do ndang tarbalos asi ni roha ni Debata jala ndang patut ibana mandapot i. Alana, hea do ibana mangarehei jala mangalele halak Kristen. Disurat si Paulus do tu si Timoteus, ”Mauliate hudok di na margogoihon ahu, i ma Kristus Jesus, Tuhanta i; ai dietong do ahu haposan, umbahen na dipabangkit ahu gabe parhalado.” (1 Tim. 1:12-14) Aha do lapatanna? Dipaboa si Paulus tu angka sintua di Epesus, ”Alai ndang pola arga hurajumi hosangku, asal ma hupaujung langkangki dohot ulaon naung hujalo sian Tuhan Jesus, i ma na mangkatindangkon barita na uli taringot tu asi ni roha ni Debata.” (Ul. 20:24) Si Paulus ma sitiruon na denggan tu halak Kristen, alana ndang ”magopo” asi ni roha ni Debata dibahen ibana. w16.07 4:1-3

Sai diurupi Jahowa do angka naposoNa na marsihohot. Songon dia do molo ndang dilehon hak na sumurung tu hita, manang situasinta mambahen hita maol mangalehon gumodang tingki? Sabar ma paimahon. Tatiru ma si Abraham, marjanji do Jahowa mangalehon ianakhon tu ibana. Alai, leleng do ibana paimahon andorang so tubu dope si Isak. (1 Mus. 15:3, 4; 21:5; Heb. 6:12-15) Olo do ndang sabar hita paimahon. (Poda 13:12) Alai molo sai marungutungut hita, boi do i mambahen hita gabe marmetmet ni roha. Alani i, taparhaseang ma tingkinta laho padengganhon parange asa boi denggan hita mangulahon tanggung jawab na dilehon tu hita di joloan ni ari. Molo tarimangi aha na tajaha sian Bibel, gabe marbisuk ma hita tingki mamillit na dumenggan. Sian parbinotoan i, boi ma hita mambahen las roha ni Jahowa ganup ari. Taboto ma songon dia maradophon donganta, mangatur parhepengon, manang mamillit hiburan dohot pangkean na denggan. w16.08 3:9-11

Diurupi Jahowa do halak Israel manaluhon halak Amalek dohot halak Etiopia, jala dilehon do gogo tu si Nehemia dohot halak Jahudi laho padengganhon tembok Jerusalem. Saonari, dilehon Jahowa do gogo tu hita tingki marbarita na uli, nang pe godang sitaononta jala godang na so olo manjangkon. (1 Ptr. 5:10) Ndang pintor dipamago Jahowa sitaononta. Alani i, ingkon martahan do hita. Songon dia carana? Ingkon tajaha do Bibel ganup ari, paradehon na ringkot tu parpunguan. Marsiajar Bibel sahalakta, mambahen panombaon na sasaripe, jala tongtong martangiang tu Jahowa. Unang ma tapaloas manang aha pe na mangambati angka na diparade Jahowa laho patoguhon hita. Molo dihilala hamu songon na gale partondionmuna, pangido ma pangurupion sian Debata. Hilala ma panogunoguon sian tondi parbadia na patoguhon hamu jala mambahen hamu mangoloi lomo ni roha ni Debata. w16.09 1:12

Denggan do molo boi ndang marhasohotan. Alai, dilehon si Paulus do sipasingot songon na di ayat sadari on. Didok muse, ”Molo so harajaan nasida dirina, mardongan saripe ma; ai dengganan do mardongan saripe sian na [marsigorgor napsumuna].” Alani i, adong do halak na mamillit laho marhasohotan asa unang marsigorgor napsuna laho mangulahon parmainanon. Ingkon manat do angka dolidoli manang anak boru mamingkirhon molo naeng marhasohotan nasida. Didok si Paulus, ”Alai molo na hurang tama di rohana, pasombuonna songon i boruna na marbaju, anggo naung tangastangasan, ingkon tulus nama marhamulian, dipasaut ma lomo ni rohana, ndang mardosa ibana disi: Marbagas ma nasida.” (1 Kor. 7:9, 36; 1 Tim. 4:1-3) Unang ma marhasohotan holan alani hisaphisap ni daging di tingki haposoon. Alana, molo ndang matoras dope ibana, ndang boi dope martanggung jawab di parsaripeonna. w16.08 1:17

Sian caranta marpangkean, boi do diboto halak taringot dirinta. (1 Sam. 16:7) Ala naposo ni Debata hita, ndang tapangke angka pangkean holan alani lomo ni rohanta manang ala tabo dipangke. Tingki mangulahon prinsip ni Bibel, unang ma tapangke pangkean na paketathu jala ndang suman idaon. Tingki adong na mangida pangkeanta, unang ma gabe ganggu panggora ni rohana jala ndang tabo pangkilalaanna alani hita. Molo rapi, ias, jala denggan caranta marpangkean, lam diargai halak ma hita. Jala gabe lomo roha ni nasida mamboto taringot Debata, patuduhon pangargaion tu organisasinta, jala rade manangihon barita na tapasahat. w16.09 3:5, 6

Tingki martungkar pingkiran taringot tu panompaon manang Bibel, ingkon jolo taboto do na dihaporseai sasahalak. Ingot ma, halak na porsea tu evolusi pe porsea do tu Debata. Nasida mandok, marhite evolusi do Debata manompa nasa na mangolu. Na asing porsea tu evolusi ala diajarhon do i di singkola. Adong do na so porsea be tu Debata ala jut rohanasida mangida agama. Alani i, ingkon jolo tasungkun do na dihaporseai sasahalak jala boasa i dihaporseai. Dung i, denggan ma tangihon alusna. Molo songon i diulahon hamu, lomo ma rohana manangihon hamu. Molo adong na mangarehei ala porsea hamu tu Debata, lambok ma sungkun ibana laho patorangkon songon dia do hangoluan on ditompa. Dung i, boi ma tadok tu nasida, molo tutu do adong evolusi, sasintongna tompaan na parjolo boi do mambahen dirina sandiri asa adong muse. Alai, sahalak profesor kimia mandok, ”Sel na ummetmet pe nunga mambahen longang rohanta, ala maol antusan.” w16.09 4:12, 13

Rimangi ma taringot si Nabot dohot si Sakaria. Ala mangoloi Debata, didangguri ma nasida sahat tu na mate. (1 Raj. 21:3, 15; 2 Kron. 24:20, 21) Si Daniel didabuhon tu hurungan ni singa, jala angka donganna dipamasuk tu parapian na balga. Di rohanasida, tumagon do mate sian apala manadingkon Jahowa. Porsea situtu do nasida tu Jahowa, na laho lehononNa tondi parbadia jala mangurupi nasida martahan mangadopi sitaonon i. (Dan. 3:16-18, 20, 28; 6:14, 17, 22-24; Heb. 11:33, 34) Godang do panurirang, songon si Mika dohot si Jeremia, na direhei manang dipenjara. Na asing, songon si Elia, ”marpindapinda do nasida songon pangungsi di padang pasir dohot di dolokdolok, maringanan di liangliang dohot di angka lubang di toru ni tano”. Martahan do nasida mangadopi sitaonon jala marsihohot tu Debata, ala pos roha ni nasida tu pangkirimon.​—Heb. 11:1, 36-38, Bibel siganup ari; 1 Raj. 18:13; 22:24-27; Jer. 20:1, 2; 28:10, 11; 32:2. w16.10 3:10, 11

Patudu ma burju ni roha tu halak na so tatanda marhite manjangkon nasida di Bale Harajaon. Halak na baru ro sian negara na asing olo do maila laho marsaor. Ala asing hasomalan ni nasida, olo do maila nasida tu halak sian bangso na asing. Alani i, hita ma na parjolo manjangkon nasida jala patudu ma holong na sian roha. Molo adong JW Language di bahasamuna, boi do on mangurupi hamu mamboto cara laho manjangkon nasida mamangke bahasa ni nasida. (Plp. 2:4) Ra, ndang pola lomo rohanta mangkatai tu halak na asing hasomalanna sian hita. Asa unang songon i, tapaboa ma tu nasida taringot dirinta. Botoonmu ma, ra adong do hasomalanmuna na dos tu nasida. Alai ingot ma, adong do keunggulan dohot hahurangan ni ganup hasomalan. w16.10 1:13, 14

Dipaboa Bibel do aha na ingkon taulahon asa tongtong badia hurianta. Ingot ma na masa di Korint. Dihaholongi si Paulus do angka donganta disi. Godang do na diurupi ibana mananda hasintongan. (1 Kor. 1:1, 2) Alani i, rimangi ma songon dia pangkilalaanna tingki diida ibana adong donganta na mangulahon parmainanon jala angka dongan na asing paloashon ibana tongtong di huria! Dipaboa si Paulus ma tu angka sintua asa ”pasahaton ibana tu sibolis”. Ingkon dipabali angka sintua do halak na mardosa i sian huria. (1 Kor. 5:5-7, 12) Saonari pe, ingkon dipabali angka sintua do sasahalak sian huria molo mangulahon dosa na balga jala ndang marhamubaon. Alani i, taoloi do prinsip ni Bibel tingki maradophon halak sisongon i? Molo taulahon i, nunga dohot hita manjaga huria asa tongtong badia. Jala, gabe taurupi ma halak na dipabali i mangantusi porlu do ibana marhamubaon jala mangido asa disalpuhon Jahowa hasalaanna. w16.11 2:14

Tapingkirhon ma pangkorhonna molo tapatogu na asing. Si Ruben mandok, ”Saleleng martaontaon, marsitutu do ahu asa unang sai marmetmet ni roha. Alai sada tingki, marbarita ma ahu dohot sahalak sintua na mamboto hasusaan na huadopi. Ditangihon do tingki hupaboa sude na di rohangku. Didok ibana do angka na denggan na huulahon. Dipaingot ibana do ahu taringot hata ni Jesus, na mandok ummarga do hita sian angka pidong. Gabe jotjot ma huingot ayat i jala on mambahen las rohangku. Hata sian sintua i patoguhon rohangku.” (Mat. 10:31) Bibel paboahon, porlu do hita tongtong masipatoguan. Apostel Paulus manurat tu halak Kristen di Heber, ”Masiapoan ma hamu ganup ari.” Dipatorang si Paulus, ”Unang tung gabe pir roha ni manang ise sian hamu, hinorhon ni dosa na paotootohon!” (Heb. 3:13) Rimangi ma songon dia pangkilalaanmu tingki sasahalak patoguhon hamu. w16.11 1:2, 3

Di taon 313 M, mamarenta ma Kaisar Konstantin di Rom jala dibahen ibana agama Kristen na so sintong gabe agama resmi. Dung i, marpungu ma si Konstantin dohot pemimpin ni agama, na didok Konsili Nicea. Dung parpunguan i, disuru Kaisar i ma asa dipenjarahon sahalak imam na margoar si Arius, ala ndang olo mangkaporseai molo Jesus i do Debata. Dung i, si Theodosius ma na gabe Kaisar di Rom, jala Gareja Katolik dibahen gabe agama resmi di pamarentaon ni Rom. Sejarawan mandok, halak Rom na manomba ganaganaan gabe ”halak Kristen” tingki pamarentaon ni Kaisar Theodosius. Tingki i, ala dijalo halak Kristen na manimbil sian hasintongan ajaran ni sipelebegu, gabe bagian sian Babel na Balga ma nasida. Nang pe songon i, sai adong do halak Kristen na miniahan na tongtong marsihohot. Nasida songon eme na dipaboa Jesus. Marsitutu do nasida mangulahon na dumenggan asa boi manomba Debata, alai otik do na olo manangihon nasida.​—Mat. 13:24, 25, 37-39. w16.11 4:8, 9

Saonari, Sibolis ”songon babiat na marauang, mangalului sibondutonna”. (1 Ptr. 5:8; Pgk. 12:17) Ujungna, susa ma ngolu ni jolma, jala naposo ni Debata pe gabe holsoan. Naposo ni Debata najolo pe olo do holsoan. Umpamana, Bibel paboahon, sipata holsoan do Raja Daud. (Ps. 13:3) Apostel Paulus pe ”mangkolsohon saluhut huria”. (2 Kor. 11:28) Alai, aha do na boi taulahon molo holsoan hita? Jahowa mangurupi naposoNa najolo asa mandapot pangurupion tingki holsoan, jala lomo dope rohaNa mangulahon i saonari. Aha na ingkon taulahon? (1) Martangiang, (2) manjaha jala mangarimangi Bibel, (3) paloas ma tondi parbadia mangurupi hita, jala (4) mangkatai tu dongan na mangantusi pangkilalaanta. w16.12 3:1, 2

Di abad na parjolo, pigapiga halak di Korint mangulahon parmainanon, homoseksual, manangko, manomba ganaganaan, jala gabe parmabuk. Alai, dung mananda jala mangkaholongi Jahowa, marhamubaon ma nasida. Maila do nasida tu na hea diulahon nasida. (Rom 6:21; 1 Kor. 6:9-11) Halak Kristen di Rom pe porlu do marhamubaon. Didok si Paulus tu nasida, ”Unang ma pasahat hamu angka ruasmuna tu dosa i, bahen sinjata ni hajahaton; tu Debata ma tahe pasahat hamu dirimuna songon angka naung pinangolu sian na mate; songon i nang ruasmuna, tu Debata ma i, bahen sinjata ni hatigoran!” (Rom 6:13) Pos do roha ni si Paulus, boi nasida mangulahon na denggan jala tongtong mandapot laba sian asi ni roha ni Debata. w16.12 1:13

Tingki manompa jolma, dilehon Jahowa do hasurungan. Dilehon do pingkiran tu hita, na mangurupi hita pasaehon parsoalan dohot mamingkirhon ari na naeng ro. (Poda 2:11) Dilehon do tu hita huaso, na mambahen hita boi mangulahon lomo ni rohanta dohot na tatuju. (Plp. 2:13) Dilehon do panggora ni roha, i ma pamotoan taringot tu na denggan dohot na roa. On mangurupi hita pasidingkon dosa, asa unang mangulahon hasalaan. (Rom 2:15) Marhite HataNa, dipaingot Jahowa do hita asa denggan tapangke bakat na dilehon tu hita. Umpamana, di Angka Buku Heber, tajaha do, ”Sangkapsangkap ni halak na padot manjadihon hadumaon situtu,” jala ”manang aha na jumpang tanganmu siulaonmu, ula ma i sian nasa gogom”. (Poda 21:5; Pjm. 9:10) Di Angka Buku Junani, tajaha do, ”Binsan sadihari dope, taulahon ma na denggan di saluhut halak,” jala ”masipatureturean ma hamu, ganup marguru tu asiasi na jinalona”. (Gal. 6:10; 1 Ptr. 4:10) Lomo roha ni Jahowa asa taulahon ulaon na marlaba tu hita dohot tu na asing. w17.01 1:1, 2

Sude jolma nunga manean dosa dohot hamatean sian si Adam dohot si Hawa. Nang pe songon i, adong dope hakta laho mamillit. Taboto ma on sian cara ni Jahowa maradophon halak Israel. Dilehon Jahowa do tu nasida hak laho mamillit gabe bangsoNa manang na ndang. (2 Mus. 19:3-6) Dioloi halak Israel do Debata jala dijangkon do aturan sian Debata. Didok nasida, ”Saluhut na pinaboa ni Jahowa, bahenonnami ma.” (2 Mus. 19:8) Alai ujungna, ndang olo nasida manggohi janjina tu Jahowa. Parsiajaranna, denggan ma tapangke hak laho mamillit, tongtong ma jonok tu Jahowa, jala unduk tu patikNa. w17.01 2:9

Dipauli si Jeroboam do langgatan di Betel laho tu panombaon na so sintong. Disuru Jahowa sahalak panurirang sian Juda laho pasingothon si Jeroboam. Dioloi panurirang i do Jahowa jala dipasahat do sipasingot i. Muruk situtu ma raja i tu panurirang i, alai dilinggomi Jahowa do panurirang i. (1 Raj. 13:1-10) Didok Jahowa do asa unang mangan manang minum panurirang i di Israel jala mulak sian dalan na asing. Tingki mulak, pajumpang ma ibana dohot panurirang naung matua na margabus. Didok na matua i, adong tona sian Jahowa. Ditogihon ma ibana tu jabuna asa mangan dohot minum. Ndang unduk panurirang i tu Jahowa jala diihuthon ibana do na matua i. Ndang lomo roha ni Jahowa mangida ibana. Di dalan, disoro jala dipamate singa ma ibana. (1 Raj. 13:11-24) Ndang taboto boasa panurirang na matua i na ditangihon ibana. Alai taboto do, ibana ndang ”marpangalaho haserepon” maradophon Jahowa. w17.01 4:1-3

Bagas do lapatan ni hata na parjolo na disurat di Bibel, ”Di mula ni mulana ditompa Debata langit dohot tano on.” (1 Mus. 1:1) Holan saotik dope na taida sian godang tompaan ni Debata di alam semesta on, jala holan saotik dope na taboto taringot tu luar angkasa, sinondang, dohot gravitasi. (Pjm. 3:11) Alai, dipaboa Jahowa do tu hita taringot sangkapNa tu tano on dohot tu jolma. Ditompa Ibana do jolma tudos tu rupaNa jala lomo rohaNa asa marlas ni roha nasida di tano on. (1 Mus. 1:26) Nasida gabe ianakhonNa, jala Ibana gabe Ama ni nasida. Di bindu tolu sian 1 Musa, taboto ma boasa sundat sangkap ni Jahowa i. (1 Mus. 3:1-7) Alai, ndang adong parsoalan na so boi dipasae Jahowa. Ndang adong na boi mangambati sangkap ni Jahowa. (Jes. 46:10; 55:11) Pos do rohanta, sangkap ni Jahowa na parjolo ingkon saut di tingkina! w17.02 1:1, 2

Boasa boi diboto halak si Musa dipargogoi tondi parbadia? Dipargogoi tondi parbadia do si Musa mambahen tanda halongangan dohot paboahon goar ni Debata tu si Firaun. (2 Mus. 7:1-3) Tondi parbadia mangurupi si Musa gabe pamimpin na burju jala sabar. Tangkas ma, Jahowa do na mamillit si Musa manguluhon naposoNa. Ise do muse na mandapot tondi parbadia sian Jahowa laho manguluhon naposoNa? Bibel mandok, ”Gok Tondi hapistaran ma roha ni si Josua, anak ni si Nun.” (5 Mus. 34:9) ”Tondi ni Jahowa songgop tu si Gidion.” (Pangh. 6:34) Jala ”songgop ma Tondi ni Jahowa tu si Daud”. (1 Sam. 16:13) Tondi parbadia do na diasahon nasida laho mangurupi mangulahon na so boi diulahon sian gogona sandiri.​—Jos. 11:16, 17; Pangh. 7:7, 22; 1 Sam. 17:37, 50. w17.02 3:3-5

Tatiru ma si Paulus. Diboto ibana, marhak do dongan sahaporseaonna manontuhon sipilliton jala diargai ibana do i. Diihuthon angka sintua do on tingki mangalehon poda tu sasahalak na laho manontuhon sipilliton. Las do rohanasida paboahon hatorangan sian Bibel tu dongan sahaporseaonna. Alai dipaloas angka sintua do dongan sahaporseaonna manontuhon sipilliton, alana mangkorhon do sipilliton i tu parngoluon ni nasida. Parsiajaranna: Taurupi ma donganta mangantusi poda ni Bibel na hombar tu situasi ni ngoluna. Alai, marhak do dongan sahaporseaonta laho manontuhon sipilliton. Molo marbisuk nasida manontuhon sipilliton, dapotnasida ma laba. Alani i, unang ma gabe hita na manontuhon sipilliton ni angka donganta. w17.03 2:11

Punguan na Mangaradoti Organisasi patuduhon haporseaon na togu marhite ringgas marbarita. Taurupi do nasida mangulahon ulaon na ringkot on? Molo taurupi, las ma rohanta tingki didok Jesus tu hita, ”Nasa na binahenmuna tu sada sian anggingku angka na metmet on, na tu Ahu do i dibahen hamu!” (Mat. 25:34-40) Tingki tu surgo, ndang dilupahon Jesus siseanna. (Mat. 28:20) Tingki di tano on, diboto do molo ibana diurupi tondi parbadia, surusuruan, dohot Hata ni Debata laho manguluhon siseanna. Saonari pe, dilehon Jesus do pangurupion na sarupa tu naposo haposan. Punguan na Mangaradoti Organisasi mangihuthon ”Birubiru i”, i ma Jesus, ”manang tudia pe i laho”. (Pgk. 14:4) Molo taihuthon tudutudu sian na Mangaradoti Organisasi, hita pe nunga mangihuthon Jesus gabe Pamimpinta. Satongkin nai, toguonna ma hita tu hangoluan salelengna. (Pgk. 7:14-17) Ndang adong pamimpin na asing na boi mambahen janji sisongon i! w17.02 4:17-19

Tingki mangadopi hasusaan, marhaposan tu Jahowa ma hita, unang tu diri sandiri. Tapangido ma pangurupionNa, ndang soal songon dia sitaononta. Tapingkirhon ma: Tingki laho pasaehon parsoalan, marhaposan tu pamingkirionku do ahu? Manang, jolo husulingkiti do hatorangan sian Bibel, jala mangasahon i tingki pasaehon parsoalan? Umpamana alani keluarga, ra gabe maol hamu marpungu jala ro tu kebaktian. Tingki masa sisongon i, dipangido hamu do pangurupion tu Jahowa asa diboto hamu na laho ulahononmuna? Manang, ala nunga leleng ndang karejo, olo do ra adong mangalehon karejo tu hamu. Dipaboa hamu do tu ibana na ingkon marpungu hamu ganup minggu, jala ndang mabiar nang pe ingkon dipakaluar sian i? Ndang soal songon dia sitaononta, taingot ma hata ni panurat psalmen, songon na didok di ayat sadari on. w17.03 4:6