Oktober

Jahowa, i ma ”Debata nampuna habengeton dohot pangapulon”. (Rom 15:5) Holan Ibana do na mananda hita jala mangantusi pangkilalaanta. Alani i, tangkas do diboto Ibana aha na tahaporluhon asa boi marhabengeton. Alai, songon dia do Debata boi mangalusi tangiangta asa marhabengeton? Tingki tapangido Jahowa mangurupi hita asa marhabengeton, marjanji do Ibana ”mangalehon gogo”. (Jes. 40:29) Songon dia Ibana mangulahon i? Sipata, boi do pintor disalpuhon Ibana hasusaan i. Alai, jotjotan gogo do na dilehon Ibana tu hita asa ”mangkorhon nasa habengeton dohot lambas ni roha, mardongan las ni roha”. (Kol. 1:11) Diboto Ibana do taringot hita, pingkiran, pangkilalaan dohot gogonta, alani i ndang dipasombu Jahowa hita mangkilala hasusaan sian na so tolap ni gogonta. w16.04 2:5, 6

Bibel manjujui hita asa mangoloi pamarenta, alai didok do muse, ingkon tongtong do hita mangoloi Debata. (Ul. 5:29; Tit. 3:1) Songon di ayat sadari on, dipaboa Jesus do prinsip na mangurupi hita mamboto ise do na ingkon taoloi. Hita mangalehon ”tu Kesar, na sian Kesar”, molo taoloi uhum ni pamarenta, mangargai pamarenta jala manggarar pajak. (Rom 13:7) Alai, molo disuru pamarenta hita mangulahon ulaon na so dihalomohon Debata, ndang olo hita mangulahon i. Ingkon netral do hita tu politik. (Jes. 2:4) Ala Jahowa do na paloashon pamarenta manggomgomi, ndang boi hita mangalo nasida. Alai, hita pe ndang boi dohot tu ulaon patriotik manang nasionalistis. (Rom 13:1, 2) Ndang boi hita dohot mangkalomohon sasahalak laho mamarenta manang parsidohot tu politik, jala ndang boi hita dohot mamillit tingki pemilihan manang gabe sahalak parpolitik. w16.04 4:1, 2

Adong do parsalisian na boi dipasae holan dua halak. Alai sipata, olo do ingkon tapangido pangurupion sian na asing. Songon na dipaboa di Mateus 18:15-17. Hata ”dosa” na nidok ni Jesus dison, ndang parsoalan na gelleng. Sian dia taboto? Didok Jesus, molo ndang muba ibana dung tapaboa salana jala nunga adong na mangkatindangkon dohot nunga dipasahat tu sintua, ”etong ma ibana songon parbegu jala sijalobeo”. Lapatanna, dos ma ibana songon halak na dipabali sian huria. Hata dosa dison, i ma manipu manang paroaroahon. w16.05 1:14

Ndang sude na masa di parngoluonta diatur di Bibel. Umpamana, ndang ditontuhon di Bibel songon dia pangkean na ingkon tapangke. On patuduhon bisuk ni Jahowa. Nang pe mubauba model jala marragam pangkean na dipangke di liat portibi on, alai prinsip ni Bibel taringot pangkean ndang hea muba. Dung i, ndang ditontuhon di Bibel taringot karejo manang hiburan na laho tapillit. Jala, ndang diatur aha na ingkon taulahon asa tongtong hita sehat. Diloas Jahowa do ganup jolma dohot kepala keluarga laho mamillit siulahononna taringot sudena i. Molo ndang ditontuhon di Bibel aha na ingkon taulahon, songon dia do hita mamillit na dumenggan? Unang ma mangihuthon aha na tahalomohon, alai manat ma tapingkiri aha na laho taulahon, jala tapillit ma na mambahen las roha ni Jahowa. Dung i, pos ma rohanta, na urupanNa do hita mamillit na dumenggan.​—Ps. 37:5. w16.05 3:2, 6

Jotjot do adong ayat na tahalomohon sian Bibel. Umpamana, adong na lomo rohana manjaha buku injil, ala sian i, boi marsiajar sian parange ni Jahowa na tarida sian hangoluan ni Jesus. (Joh. 14:9) Adong na lomo rohana manjaha buku Pangungkapon, i ma surirang na paboahon taringot ”na naeng masa”. (Pgk. 1:1) Na asing muse, dame dihilala tingki manjaha buku Psalmen, jala adong na mandapot laba sian bisuk na disurat di buku Poda. Tangkas ma, Bibel buku na diparade tu sude jolma. Ala las do rohanta manjaha Bibel, tontu las do rohanta manjaha sude bukunta na dipatupa sian Bibel. Sude angka buku, brosur, majalah dohot angka na asing, Jahowa do na paradehon i tu hita. Angka buku i mangurupi hita jonok tu Ibana jala patoguhon haporseaonta.​—Tit. 2:2. w16.05 5:1-3

Marragam do cara ni tondi parbadia manopa hita. Umpamana, diurupi do hita maniru Jesus jala patuduhon parbue ni tondi. Sada sian parbue ni tondi, i ma holong. Tahaholongi Debata, taoloi Ibana, jala rade hita ditopa ala taboto sude parentaNa marlaba tu hita. Diurupi tondi parbadia do hita asa unang portibi na jahat on na manopa hita. (Eps. 2:2) Tingki poso dope apostel Paulus, ditiru ibana do parange ni pemimpin agama Jahudi. Alai, marhamubaon do ibana ala diurupi tondi parbadia. Dipaboa marhite suratna, ”Saluhutna do tarpatupa ahu marhitehite Ibana, na margogoihon ahu!” (Plp. 4:13) Hita pe, porlu mangido tondi parbadia ala taboto tangihonon ni Jahowa do tangiangta.​—Ps. 10:17. w16.06 1:12

Sasada Jahowa do Debatanta. Holan tu Ibana do talehon panombaonta. Ndang boi hita manomba debata na asing manang mangihuthon ajaran na so sintong tingki manomba Jahowa. Ndang holan ala na gumogo manang tumimbul Ibana sian debata na asing. Ibana do Debata na sintong, holan Ibana do na ingkon tasomba. Ingkon Jahowa do na rumingkot di ngolunta. Ingkon manat do hita asa unang adong na mangambati hita manomba Ibana. Aha do na boi mangambati hita manomba Ibana? Marhite sampulu patik, didok Jahowa tu halak Israel asa unang manomba debata na asing manang ganaganaan. (5 Mus. 5:6-10) Saonari, godang do ragam ni ganaganaan. Alai, ndang muba dope na dipangido Jahowa sian hita. Tongtong do Debatanta, ”Jahowa Sasadasa”.​—Mrk. 12:29. w16.06 3:10, 12

Tingki didokkon si Petrus ingkon pitu hali sesaon dosa ni donganna, didok Jesus ma, ”Ndada pitu hali dohononku tu ho, tung sintap pitupulu hali pitu do!” Jesus mangajarhon tu hita asa sai rade manalpuhon hasalaan ni dongan na asing. (Mat. 6:15; 18:21, 22) Ingot ma, molo na asing boi sala, hamu pe boi do sala. Molo diboto hamu hansit roha ni donganmu, ihuthon ma poda ni Bibel. Mangido sala ma hamu jala mardame. (Mat. 5:23, 24) Molo tapangido asa disalpuhon hasalaanta, hita pe ingkon rade manalpuhon hasalaan. Molo tahaholongi donganta, ndang sai taingot hasalaanna. (1 Kor. 13:5; Kol. 3:13) Molo tasalpuhon hasalaan ni donganta, salpuhonon ni Jahowa do hasalaanta. Molo adong sala ni donganta, tapatudu ma asi ni roha songon Jahowa na marasi ni roha tu hita.​—Ps. 103:12-14. w16.06 4:15, 17

Saonari, naposo ni Jahowa pe ingkon mamaritahon ”barita na uli on na taringot tu Harajaon . . . laho mangkatindangkonsa tu saluhutna bangso”. (Mat. 24:14) Barita na uli taringot Harajaon didok do ”barita na uli taringot tu asi ni roha ni Debata”. Boasa? Alani asi ni roha ni Debata do umbahen tadapot pasupasu di HarajaonNa. (Ul. 20:24; Eps. 1:3) Ringgas do si Paulus marbarita na uli patuduhon hamauliateonna. Olo do hita maniru si Paulus? (Rom 1:14, 15) Nang pe mardosa hita, alai tadapot do godang laba, taajari ma na asing taringot holong ni Debata jala songon dia nasida boi mandapot laba sian i. w16.07 4:4, 5

Andorang so mate, tolu hali ma dipaboa Jesus taringot on tu siseanna. (Joh. 12:31; 14:30; 16:11) Dipangke Sibolis do agama na so sintong laho mangotootoi jolma. I do alana godang halak ndang olo manjangkon surirang ni Bibel na patuduhon nunga jonok ajal ni portibi on. (Sep. 1:14) Tangkas ma, ”dipapitung debata ni portibi on do pingkiran ni angka na so porsea”. (2 Kor. 4:3-6) Alani i, tingki tapaboa tu halak naung jonok ajal ni portibi on jala Jesus nunga mamarenta, godang do na so olo manangihon. Nang pe godang halak ndang olo manjangkon surirang ni Bibel, unang ma marmetmet ni roha hita. Taboto do boasa ringkot tongtong dungo. w16.07 2:11, 12

Di pesta parbogason ni nasida, mansai las do roha ni baoa i mangida borua i. Dihalomohon Jahowa do asa martua parsaripeon, jala dilehon do podaNa di Bibel. (Poda 18:22) Alai, dipaboa do di Bibel, ”marniae di daging” do na mardongan saripe. (1 Kor. 7:28) Songon dia do asa unang sai adong parsoalan di parsaripeon? Aha do bahenon ni halak Kristen asa martua parsaripeonna? Dipaboa di Bibel, ingkon tapatudu do holong. Godang do cara na boi dibahen na mardongan saripe patuduhon holong. Umpamana, tapatudu ma lambok ni roha tu dongan saripe. Molo dung adong ianakhon, ringkot do tongtong patuduhon holong di keluarga. Alai, ingkon holong na marojahan tu Bibel do na mambahen martua parsaripeon. w16.08 2:1, 2

Tingki i, nunga martaontaon si Timoteus marbarita na uli. Alai, boasa dijujui muse ibana asa lam tu dengganna marbarita? Diboto si Timoteus, boi do muba parngoluon ni angka jolma. Alani i, ingkon muba do cara na dibahen ibana tingki marbarita na uli asa ditangihon angka jolma ibana. Suang songon i ma hita saonari. Di pigapiga inganan, tingki marbarita na uli hita sian jabu tu jabu, jotjot do ndang pajumpang hita dohot parjabu. Di inganan na asing, olo do ra adong halak di jabuna, alai ndang boi hita masuk. Molo songon i do di ingananta, olo do hita mambahen cara na asing asa boi pajumpang dohot nasida? Las do roha ni angka donganta marbarita di inganan na ribur. Umpamana, asa boi pajumpang dohot godang halak, laho do nasida tu stasiun kareta api, terminal, pasar, manang di inganan parkir. w16.08 3:14-16

Dilehon Jahowa do tu hita dongan sahaporseaon na boi patoguhon hita. (Heb. 12:12, 13) Godang do halak Kristen di abad na parjolo mandapot pangurupion sian dongan sahaporseaon. Songon i ma nang saonari. Aha ma na boi taulahon? Tingki marporang dohot halak Amalek, ditungkol si Aron dohot si Hur do tangan ni si Musa asa tongtong togu. (2 Mus. 17:8-13) Saonari, hita pe boi songon i marhite mangurupi angka donganta. Adong do angka donganta na gale ala lam matua, ala marsahit, adong tantangan sian keluarga, lungunlungunan, manang ala mate na hinaholonganna. Hita pe boi do patoguhon angka na poso, na jotjot dielaela mangulahon na sala manang asa sangap di portibi on. (1 Tes. 3:1-3; 5:11, 14) Alani i, lehon ma tingki laho mamparrohahon angka dongan di Bale Harajaon, tingki marbarita, tingki rap mangan, manang tingki martelepon tu nasida. w16.09 1:13, 14

Sian pangkeanta, ingkon tapatudu do tu Jahowa, tu dongan sahaporseaon, dohot tu halak di ingananta, na tapasangap do Jahowa dohot barita na tapasahat. (Rom 13:8-10) Mansai ringkot do mamingkiri caranta marpangkean tingki marpungu manang marbarita. Ingkon tapangke do pangkean na patut tu halak na manomba Debata. (1 Tim. 2:10) Tontu, di pigapiga inganan, ndang sai sarupa taringot cara marpangkean na denggan. Alani i, ndang soal didia hita maringanan, unang ma gabe sogo roha ni halak mangida caranta marpangkean. Tingki laho hita tu kebaktian, ingkon denggan do pangkeanta jala tama idaon. Unang ma tatiru cara marpangkean ni halak di portibi on. Molo denggan caranta marpangkean, las ma rohanta patandahon tu halak molo hita Sitindangi Ni Jahowa, jala rade hita marbarita di tingki sadihari pe. w16.09 3:7, 8

Tontu, adong do na merancang jala paulihon jabu. Alani i, gari jabu adong na mambahen, tarlumobi ma angka na mangolu, tontu adong na merancang jala manompa. Molo adong na so porsea tu Bibel, songon dia do martungkar pingkiran dohot ibana? Jolo tasungkun do na dihaporseai ibana. Boto ma aha na dihalomohon ibana. (Poda 18:13) Molo lomo rohana mangulas sains, lehon ma hatorangan sian Bibel na paboahon hombar do isi ni Bibel tu sains. Molo lomo rohana mangulas sejarah, paboa ma na masa na disurat di Bibel. Patudu ma songon dia Bibel manurirangkon sada situasi andorang so masa dope. Ra, olo do halak manangihon hamu molo dipatudu hamu hatorangan sian Bibel, na mangurupi nasida lam denggan di parngoluon, umpamana Jamita di Dolok. Ingot ma, unang marsoal tu na asing. Las do rohanta molo lomo rohanasida mangkatai tu hita jala marsiajar Bibel. Alani i, denggan ma sungkun jala tangihon ma alusna. Tingki tapatorang haporseaonta tu na asing, ingkon pantun do hita, tarlumobi molo umtua nasida sian hita. w16.09 4:14-16

Laho mangurupi sasahalak sian luat na asing marlas ni roha tingki marpungu, sungkun ma dirimu, ’Molo laho ahu tu negara na asing, aha do na huhalomohon bahenon ni halak tu ahu?’ (Mat. 7:12) Sabar ma maradophon halak na ro sian negara na asing. Tingki parjolo tatanda, maol do ra hita mangantusi cara marpingkir manang pangkilalaan ni nasida. Alani i, unang ma tapaksa nasida mangihuthon parniulaon dohot hasomalanta, alai tajangkon ma nasida. Molo talehon tingkinta mamparsiajari taringot negara dohot hasomalan ni nasida, on mambahen hita mura mangantusi nasida. Tingki panombaon na sasaripe, talului ma songon dia hasomalan ni halak na so tatanda na ro tu ingananta. Asa lam solhot tu nasida, boi do tatamue nasida mangan di jabunta. Jahowa pe, nunga ”diungkap pintu ni haporseaon i nang di halak sipelebegu”. Tatiru ma Jahowa jala tatamue ma halak na so tatanda naung gabe ”donganta sahaporseaon”.​—Ul. 14:27; Gal. 6:10; Job 31:32. w16.10 1:15, 16

Martahan do Jesus Kristus mangadopi sitaonon na mansai borat jala tongtong marsihohot tu Jahowa. Boasa ibana boi martahan? Didok si Paulus, ’Jesus, na manaonhon [siksaan] i, singkat ni las ni roha, tohapna i hian, so dietong i hailaon, gabe hundul di siamun ni habangsa ni Debata!’ (Heb. 12:2) Dijujui si Paulus do halak Kristen asa maniru Jesus. Songon Jesus, godang do halak Kristen di abad na parjolo mate ala marsihohot tu Jahowa. Si Antipas ma sada sian nasida. (Pgk. 2:13) Nasida nunga mandapot upa sian Jahowa. Alai naposo ni Debata na mangolu andorang so nasida, paimahon upa i dope. (Heb. 11:35) Dung gabe Raja Jesus taon 1914, halak Kristen na miniahan naung mate, dipahehe do tu surgo laho mamarenta angka jolma.​—Pgk. 20:4. w16.10 3:12

Adong do natuatua na so olo patoguhon ianakhonna ala nasida ndang hea dipatogu natuatua ni nasida. Halak na magodang pe porlu do dipatogu, alai ndang somal on diulahon. Umpamana, godang do na mandok ndang hea nasida dipuji di inganan parkarejoanna. Hita boi patoguhon na asing marhite mamuji nasida. Hita pe boi mangulahon i marhite paboahon angka parange na denggan na adong di sasahalak, jala mangapuli nasida tingki marmetmet ni roha. (1 Tes. 5:14) Ala jotjot hita rap dohot dongan sahaporseaon, godang do na boi tadok laho patoguhon nasida. (Pjm. 4:9, 10) Sungkun ma dirimu: ’Diboto na asing do molo ahu mangkaholongi nasida? Jotjot do huulahon on?’ Pingkirhon ma na dipaboa Bibel, ”Hata sisandok pe di tingki halehetanna, mansai denggan do.”​—Poda 15:23. w16.11 1:3-5

Nunga disurirangkon Debata, ”Pasadaonku ma nasida, songon birubiru di bagasan bara.” (Mik. 2:12) Disurirangkon Debata do naposoNa mandapot hasintongan sian Bibel jala marsada manomba Ibana. Didok Ibana, ”Patongononku tu angka bangso dila na pita, asa saluhut nasida manjou goar ni Jahowa, asa dioloi nasida ibana marroha sisangunjur.” (Sep. 3:9) Mandok mauliate do hita ala marsada hita manomba Jahowa! Tangkas ma, tingki halak Kristen di abad na parjolo mangihuthon tudutudu na adong di Buku na sian Debata, tongtong ma badia hurianasida, dame, jala marsada. (1 Kor. 1:10; Eps. 4:11-13; 1 Ptr. 3:8) Saonari pe, naposo ni Jahowa marsada jala taratur. Dipasahat nasida do barita na uli di tano on. w16.11 2:16, 18

Pigapiga ratus taon dungkon Masehi, adong dope halak na manjaha Bibel mamangke bahasa Junani manang Latin. Dibandingkon nasida ma ajaran sian Bibel dohot ajaran sian gareja. Tingki diboto nasida na sala do ajaran ni gareja, ndang olo nasida mangihuthon ajaran i. Alai, maol do paboahon taringot i tu na asing, alana dibunu do nasida molo diulahon i. Lam leleng, ndang godang be halak mamboto bahasa Junani manang Latin. Alai, ndang olo pemimpin ni gareja paloashon Bibel diterjemahon tu bahasa na godang dipangke. Diuhum do halak na so satolop tu ajaran ni gareja. Alani i, halak Kristen na miniahan na tongtong marsihohot, mambahen angka parpunguan na metmet, alai pigapiga sian nasida ndang boi dohot marpungu. Angka halak na miniahan ndang boi manomba Debata dohot cara na denggan. Tongtong dope Babel na Balga na mangarajai! w16.11 4:8, 10, 11

Tapasiding ma ulaon na parohon dosa, songon na diulahon halak di Korint. Ndang boi sai taulahon dosa huhut mangkirim dipatudu Jahowa asi ni rohaNa laho manalpuhon hasalaanta. Alai, songon dia do molo taulahon dosa na didok pigapiga halak ndang pola sala? Marsitutu do hita mangulahon na dumenggan asa unduk tu Jahowa di sude ulaonta? (Rom 6:14, 17) Pingkirhon ma na didok si Paulus, ”Pardaging do anggo ahu jala targadis tu gomgoman ni dosa. Ai ndang hutolopi na hubahen i; ai na huhagigihon, i do huula, ndada na huhalomohon i.” (Rom 7:14, 15) Nang pe ndang diulahon ibana na disurat di 1 Korint 6:9-11, alai diangkui si Paulus do mardosa dope ibana. Lomo rohana palashon roha ni Jahowa, alani i marsitutu do ibana asa unang mangulahon na sala. (Rom 7:21-23) Tatiru ma si Paulus, jala taoloi ma Jahowa. w16.12 1:15, 16

Cara na parjolo laho pasahathon holso ni rohanta tu Jahowa, i ma marhite tangiang. Tingki holsoan hita, lomo do roha ni Debata molo tapaboa pangkilalaanta tu Ibana. Molo nunga dibahen hamu sian nasa gogomuna laho mangadopi sitaonon, martangiang ma tu Jahowa mangido pangurupion asa unang paholsohu. (Ps. 94:18, 19) Hombar tu Pilippi 4:6, 7, songon dia do Jahowa maradophon tangiangta na sian ias ni roha? Boi do Ibana mangurupi hita asa dame pangkilalaan dohot pingkiranta. Debata ndang olo mambahen hita holsoan jala mabiar, alai lomo do rohaNa mangalehon hadameon na hea tahilala. Godang do donganta naung mangkilala on. Hamu pe, boi do mangkilala on. ”Dame ni Debata” boi mangurupi hita mangadopi sitaonon. Pos ma rohamuna tu janji ni Jahowa, ”Unang biahaton ho, ai ahu do Debatam: Ahu margogoihon ho huhut mangurupi ho.”​—Jes. 41:10. w16.12 3:3, 4

Ndang olo si Musa manjalo arta di Mesir. ”Tagonan do dipilit rohana: Rap tumaon na porsuk ibana dohot bangso ni Debata, sian na maruntung satongkin, bahenon ni dosa.” (Heb. 11:25, 26) Tatiru ma haporseaon ni angka halak na marsihohot, songon si Musa, taargai ma hak laho mamillit, mamangke i mangulahon lomo ni roha ni Debata. Ra, tabo do molo adong na manontuhon sipillitonta, alai ndang dapotta be pasupasu na arga taringot tu hakta laho mamillit molo taulahon songon i. Pasupasu aha i? Dialusi ma i di 5 Musa 30:19, 20. Di ayat 19, dilehon Debata do sipilliton tu halak Israel. Di ayat 20, taboto ma na dilehon Jahowa do tingki tu nasida laho patuduhon sadia balga holong ni nasida tu Jahowa. Hita pe boi do mamillit laho manomba Jahowa manang na ndang. Dilehon Jahowa do tingki asa denggan tapangke hak laho mamillit laho pasangaphon Jahowa jala patuduhon holongta tu Ibana! w17.01 2:10, 11

Lomo roha ni Jahowa asa tu ulaon na denggan tapangke bakat na dilehon Ibana tu hita. Boasa? Ala dihaholongi Ibana do hita, jala diboto boi do las rohanta molo tapangke bakat na nilehonNa i. Lomo roha ni Jahowa tapangke gogo dohot pingkiranta, nang pe diboto Ibana ndang sude boi taulahon. Umpamana, ndang boi tapasiding hagaleon, dosa, dohot hamatean. (1 Raj. 8:46) Ndang boi hita mangarajai halak, ala lomo ni ganup halak do mamillit. Ndang soal sadia godang parbinotoan dohot pengalamanta, ndang boi hita dos songon Jahowa. (Jes. 55:9) Tapaloas ma Jahowa manogunogu hita, pos ma rohanta na urupanNa do hita, jala boi do ulahononNa na so boi taulahon. Lomo roha ni Jahowa molo tapingkirhon cara pasaehon parsoalan dohot mangurupi na asing. Porlu do hita ’marhaposan tu Jahowa jala mangulahon na denggan’. w17.01 1:2-4

Ndang olo si Barsilai ditogihon si Daud. Boasa? Ala nunga matua ibana. Hak na sumurung do on, alai didok si Barsilai tumagon ma i dilehon tu si Kim Kana. Ra, anakna do si Kim Kana on. (2 Sam. 19:32-38) Boasa ndang olo si Barsilai ditogihon si Daud? Na so olo do ibana manjalo tanggung jawab? Ndang songon i. Serep do roha ni si Barsilai. Diboto ibana, nunga muba situasina jala ingkon diangkui do hahuranganna. (Gal. 6:4, 5) Songon si Barsilai, hita pe ingkon serep marroha. Unang ma tapatudos gogonta tu na asing manang holan mamingkirhon na tahalomohon. Talehon ma na dumenggan tu Jahowa. On ma na rumingkot sian hasangapon. (Gal. 5:26) Molo serep rohanta, lomo ma rohanta rap saulaon dohot dongan sahaporseaon laho pasangaphon Jahowa jala mangurupi na asing.​—1 Kor. 10:31. w17.01 4:5, 6

Jahowa, Panompa na so hatudosan. Mansai denggan do sude na tinompaNa. (Jer. 10:12) Dibahen Jahowa do uhum tu sude tompaanNa. Dibahen do uhum na mangatur alam dohot moral. Dibahen Ibana uhum on, asa taratur sude na di alam semesta on. (Ps. 19:8-10) Sude di alam semesta on, nunga dibahen be ingananna jala marguna do i. Umpamana, hukum gravitasi mambahen atmosfer jonok tu tano on, jala hukum on ma na mangatur laut dohot pasang surutna. Molo ndang adong gravitasi, ndang adong hangoluan di tano on. Taratur ma alam semesta on ala adong hukum na dibahen Jahowa. On patuduhon, adong do sangkapNa tu tano on dohot tu jolma. Tingki marbarita, taurupi ma halak asa mananda Sitompa hita.​—Pgk. 4:11. w17.02 1:4, 5

Dung mate si Musa, ”partogi ni parangan ni Jahowa”, i ma surusuruan, mangurupi si Josua manaluhon halak Kanaan. (Jos. 5:13-15; 6:2, 21) Tingki Raja Hiskia manguluhon naposo ni Debata, ro ma tentara ni Assur mamorangi Jerusalem. Alai holan di sada borngin, ”ruar ma suruan ni Jahowa, jala dibunu di parsaroan ni Assur saratus ualupulu lima ribu halak”. (2 Raj. 19:35) Tipak do surusuruan. Alai, halak na diurupi nasida ndang tipak. Hea do si Musa ndang pasangaphon Jahowa. (4 Mus. 20:12) Tingki halak Gibeon laho mambahen parjanjian tu si Josua, ndang jolo disungkun si Josua tu Jahowa aha na laho ulahononna. (Jos. 9:14, 15) Si Hiskia pe hea do marginjang ni roha. (2 Kron. 32:25, 26) Nang pe ndang tipak nasida, ingkon dioloi halak Israel do nasida. Diboto halak Israel do na disuru Jahowa surusuruan mangurupi angka baoa on. Tangkas ma, Jahowa manguluhon naposoNa. w17.02 3:7-9

Songon dia do caranta pasangaphon halak na asing? Marhite mamparrohahon nasida jala patuduhon pangargaion. Somalna, sasahalak dipasangap ala denggan mangulahon ulaonna manang ala adong jabatanna. Didok di Pangungkapon 5:13, ingkon tapasangap do ”na hundul di habangsa i”, i ma Jahowa dohot ”Birubiru i”. Di Pangungkapon bindu 4, dipaboa surusuruan do boasa Jahowa, ”na mangolu ro di salelenglelengna” ingkon tapasangap. Didok nasida, ”Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!”​—Pgk. 4:9-11. w17.03 1:1, 2

Saonari, godang do halak na marhaposan tu rohana tingki manontuhon sipilliton. Alai, ndang denggan songon i. Dipaingot Bibel do hita asa unang marhaposan tu rohanta tingki manontuhon sipilliton. Unang ma marhaposan tu roha, alana ”tung na angkal situtu do roha ni jolma, jala na ganggu”. (Jer. 17:9) Godang do tudosan di Bibel na patuduhon marjea do molo marhaposan hita tu rohanta. (1 Raj. 11:9; Jer. 3:17; 13:10) Alani i, aha do na masa molo marhaposan hita tu roha dohot pingkiranta tingki manontuhon sipilliton? Umpamana, maol do hita manontuhon sipilliton tingki muruk. (Poda 14:17; 29:22) Tingki marmetmet ni roha pe, maol do hita manontuhon sipilliton. (4 Mus. 32:6-12; Poda 24:10) Tingki manontuhon sipilliton, unang ma hita marhaposan tu rohanta sandiri. w17.03 2:12, 13

Mardosa do hita sude jala hea mangulahon na sala. Alai, diparade Jahowa do tobusan jala rade Ibana manalpuhon hasalaanta. Molo serep rohanta jala marhamubaon, disalpuhon Jahowa ma hasalaanta. Pos ma rohanta, ndang dibaloshon Jahowa pambahenanta ”hombar tu angka dosanta”. (Ps. 103:10) Alani i, tasomba ma Jahowa sian nasa rohanta. (1 Kron. 28:9) Sasahalak na manomba Debata ’sian nasa roha’, mansai mangkaholongi Jahowa jala lomo rohana manomba Jahowa salelengna. Di Bibel, lapatan ni hata ”roha”, i ma dirinta na sasintongna. Umpamana, caranta marpingkir, aha na tahalomohon, aha na laho taulahon, jala boasa taulahon sada ulaon. Nang pe mardosa, boi do hita manomba Jahowa sian nasa roha. Hita manomba Jahowa, ndang ala na dipangido manang ala dipaksa.​—2 Kron. 19:9. w17.03 3:1, 3

Tingki adong na mamuji hita manang tingki denggan parngoluonta, aha do siulahononta? Tarboto do na di bagasan rohanta sian parniulaonta. Umpamana, sahalak donganta baoa marsitutu paradehon jamitana jala denggan pasahathon jamita i tu na torop. Alani i, godang ma na mamuji ibana. Ingkon songon dia do ibana maradophon pujian i? Taingot ma na nidok ni Jesus, ”Molo dung diula hamu saluhut na nidokkonna i tu hamu, dok hamu ma: Naposo na so hasea do hami; intap ulaon na patut do huula hami.” (Luk. 17:10) Umpamana, gabe marginjang ni roha do si Hiskia, ndang dipatudu pangargaion tu pangurupion ni Jahowa. (2 Kron. 32:24-27, 31) Tarimangi ma pangurupion ni Jahowa asa taronjar rohanta laho paboahon, Jahowa do na mangurupi angka halak na marsihohot. w17.03 4:12-14