April

Si Aristarkus, i ma halak Makedonia na sian Tessalonik na toktong setia mandongani Apostel Paulus. Parjolo sahali tajaha di Bibel taringot si Aristarkus, i ma di tikki pardalanan ni si Paulus na patoluhalihon gabe misionaris tu Epesus. Tikki rap dohot si Paulus, ro ma godang halak manakkup ibana. (Ul. 19:29) Dung malua sian penjara, dang olo si Aristarkus manadikkon si Paulus. Piga-piga bulan dukkon i, tikki di Junani, toktong do si Aristarkus mandongani si Paulus nang pe adong akka halak na naeng mambunu si Paulus. (Ul. 20:2-4) Hira-hira taon 58 M, diboan ma si Paulus tu Rom lao dipenjarahon jala dohot do si Aristarkus di tikki i. Jala rap martahan do nasida tikki naeng lonong kapal na ditoppang nasida. (Ul. 27:1, 2, 41) Dung sahat di Rom, hea do ibana rap dipenjarahon dohot si Paulus. (Kol. 4:10) Tontu, dipatogu do roha ni si Paulus alani donganna na setia i! Songon si Aristarkus, boi do hita gabe dongan na setia. Dang holan di tikki sonang, alai dohot do di tikki mangadopi sitaonon. w20.01 9 ¶4-5

Sasahalak na dimiahi tondi parbadia ra makkilala dang tama dirina manjalo i. Alai pos do rohana molo Jahowa nungnga mamillit ibana. On mambahen massai las rohana jala mandok mauliate tu Debata ala pakkirimon lao mangolu tu surgo. (1 Ptr. 1:3, 4) Alai, na lomo do roha ni halak Kristen na miniahan asa hatop mate? Dialusi apostel Paulus ma sukkun-sukkun i. Dibandikkon ibana ma daging ni jolma songon kemah jala didok, “Sasintongna, marhoi-hoi do hita jala manaon sitaonon na borat di kemahta sisaonari on. Dang lomo ni rohanta manadingkon kemahta on songon na paluahon pangkeanta. Alai na lomo do rohanta manjalo inganan na di banua ginjang i asa dipauba dagingta na boi mate i tu hangoluan na saleleng ni lelengna.” (2 Kor. 5:4) Alani i, dang na bosan halak Kristen na miniahan mangolu di tano on jala dang lomo rohana asa hatop mate. Alai, las do roha ni nasida mangolu jala ganup ari dipakke nasida do tikki lao manomba Jahowa rap dohot keluarga dohot akka dongan. Manang aha pe na diulahon nasida, sai diingot nasida do pakkirimonna di ari na naeng ro.​—1 Kor. 15:53; 2 Ptr. 1:4; 1 Joh. 3:2, 3. w20.01 23 ¶12-13

Lao mangalatik hita, sipata dipissang Jahowa do hita. Marragam do cara ni Jahowa mamissang hita. Umpamana, marhite aha na tajaha di Bibel manang na tatangihon di parpunguan, gabe taboto ma adong na porlu tapauba di diritta. Manang boi do i tadapot sian akka sintua. Songon dia pe cara ni Jahowa mamissang hita, taboto alani holongna do i tu hita. (Jer. 30:11) Diurupi Jahowa do hita asa boi martahan. Songon sahalak ama na mangurupi ianakkonna di tikki susa, hita pe diurupi Jahowa do asa toktong martahan tikki marsitaonon. Dilehon do tondi parbadiana lao manjaga hita asa unang sega parale-aleotta tu Jahowa. (Luk. 11:13) Diurupi Jahowa do hita tikki marsak. Umpamana, dilehon Ibana do pakkirimon na massai denggan. On mangurupi hita asa martahan mangadopi akka hasusaan. Ingot ma: Aha pe sitaonon na masa tu hita, na lao salpuhonon ni Debata do i. Holan satokkin do hasusaan na taadopi, alai manoktong do pasu-pasu na dilehon Jahowa.​—2 Kor. 4:16-18. w20.02 5 ¶14-15

Boi do hita marhasil pasidikkon roha mangiburu! Pikkirhon ma contoh sian akka abang ni si Josep. Martaon-taon dung dibahen nasida na jahat tu si Josep, pajumpang ma muse nasida dohot si Josep di Mesir. Andorang so dipaboa ibana taringot dirina, diuji si Josep ma akka abangna lao mamboto naung marhamubaon do nasida manang na dang. Ditogihon ibana ma nasida sude mangan. Alai gumodang ma dilehon ibana sipanganon tu anggina si Benjamin sian tu akka abangna. (1 Mus. 43:32, 33) Alai dang mangiburu akka abangna tu si Benjamin. Gariada, dipatudu nasida do holong ni roha tu anggina i dohot tu bapakna si Jakkob. (1 Mus. 44:30-34) Ala dang mangiburu be akka abang ni si Josep, gabe boi ma mardame muse keluarga ni nasida. (1 Mus. 45:4, 15) Suang songon i ma, molo tapasiding do roha mangiburu, boi ma tajaga keluarga dohot huria asa toktong dame. Lomo do roha ni Jahowa asa tapasiding roha mangiburu jala gabe siboan dame. Molo sai tapatudu serep ni roha, marlas ni roha di akka na adong, jala taargai halak na asing, gabe dang olo be hita mangiburu. w20.02 19 ¶17-18

Sada cara lao mangargai holong ni Jahowa, i ma marhite martangiang tu Ibana. Lam bagas ma holongmu tu Debata molo dipaboa hamu holso ni rohamuna, jala mandok mauliate tu sude naung binahenna tu hamu. Lam togu ma parale-aleonmuna tu Jahowa, tikki diida hamu dialusi Ibana do tangiangmuna i. Gabe pos ma rohamuna sai diattusi Ibana do hamu. Alai asa lam solhot tu Jahowa, porlu do diboto hamu aha na ikkon ulahononmuna asa las rohana. Boha carana? Parsiajari ma Bibel, Hata ni Debata. Marsiajar ma hamu lao mangargai i. Holan di Bibel do dipaboa hasittongan taringot Jahowa, jala aha do na lao bahenonna tu hamu. Patudu ma na diargai hamu do Bibel. Carana, jaha hamu ma Bibel ganup ari. Denggan ma hamu persiapan tikki naeng marsiajar Bibel. Jala ulahon ma akka naung diparsiajari hamu. (Ps. 119:97, 99; Joh. 17:17) Adong do dibahen hamu jadwal lao manjaha Bibel? Diihutton hamu do jadwal i, jala dijaha hamu do Bibel ganup ari? w20.03 5 ¶8-9

Molo ndang tolap hamu leleng mardalan, boi do hundul hamu di inganan na godang halak lewat jala marbarita tu nasida. Manang, boi do hamu mangulahon kesaksian tidak resmi, mambahen surat, manang kesaksian telepon. Godang do angka donganta na tongtong marlas ni roha ala boi marbarita nang pe marhite cara na asing. Nang pe marsahit, boi do hamu marbarita sian nasa gogomuna. Si Paulus mandok, “Margogo do ahu di sude na masa, ala dilehon Debata do huaso tu ahu.” (Plp. 4:13) Tingki marsahit si Paulus, dihaporluhon ibana do gogo i asa boi tongtong marbarita. Didok ibana ma tu halak Galatia, “Ala na marsahit i do ahu umbahen na boi paboahon barita na uli tu hamu.” (Gal. 4:13) Suang songon i ma, tingki marsahit pe boi do hita tongtong marbarita. Umpamana, marbarita tu dokter, perawat, manang tu halak na karejo di rumah sakit. Ra godang do sian nasida na so boi tajumpangi di jabu ni nasida. w19.04 4 ¶10-11

Di taon 2018, adong lobi sian 223.000 Sitindangi na tinggal di negara na mangorai manang na mambatasi ulaonta. Tontu, ndang longang be rohanta disi. Ingkon dianiaya do halak Kristen. Alani i, didia pe hita tinggal, ra boi do tompu diorai pamarenta ulaonta manomba Jahowa. Molo diorai pamarenta ulaonta manomba Jahowa, ra olo do didok rohanta na so lomo be roha ni Debata tu hita. Alai ingot ma, ndang na so lomo roha ni Jahowa tu hita umbahen na dipaloas hita dianiaya. Umpamana songon apostel Paulus. Las do roha ni Debata tu ibana. Disurat ibana do 14 angka buku Junani Kristen, jala gabe apostel tu angka bangso na asing do ibana. Alai nang pe songon i, godang do hasusaan na dihilala si Paulus. (2 Kor. 11:23-27) Sian pengalaman ni si Paulus taboto ma, dipaloas Jahowa do naposona dianiaya. w19.07 8 ¶1, 3

Dipatudu Jahowa do holongna tu naposona marhite mangurupi hita mangalo musunta, i ma Sibolis dohot suru-suruanna. Jala dipaboa Jahowa do taringot angka musu i tu hita dohot songon dia carana mangalo nasida. (Eps. 6:10-13) Tontu on mambahen las rohanta. Molo unduk hita tu Jahowa jala marsihohot tu Ibana, boi ma hita marhasil mangalo Sibolis. Pos ma rohanta songon si Paulus na mandok, “Molo Debata do donganta, ise ma na boi mangalo hita?” (Rom 8:31) Tontu ndang olo hita gabe suda tingki laho mamingkirhon taringot Sibolis dohot suru-suruanna. Alana na rumingkot di halak Kristen, i ma marsiajar taringot Jahowa jala manomba Ibana. (Ps. 25:5) Alai porlu do taboto angka aha do na diulahon Sibolis. Boasa? Asa unang gabe dioto-otoi Sibolis hita.​—2 Kor. 2:11; surat na di toru. w19.04 20 ¶1-2

Tikki mangurupi donganta na marhabot ni roha, songon dia hita patuduhon na denggan do tatangihon nasida? Ndang cukup holan manangihon sambing jala ndang mandok manang aha. Sipata, boi do tadok hata na patoguhon rohana. Umpamana boi do tadok, “Dohot do ahu marlungun ni roha taringot na masa tu hamu!” Manang boi do dibahen hamu sungkun-sungkun laho patuduhon na diantusi hamu do aha na didokna i. Cara songon i, boi do mambahen nasida marpos ni roha na taantusi do aha na didokna i. (1 Kor. 13:4, 7) Ingkon manat do hita mangkatai. Carana, unang ma pintor mangkatai hita tingki mangkatai dope ibana. Alai sabar ma hita manangihon! Tumagon ma tapatudu holong dohot asi ni roha, sian na pintor paboahon aha na ingkon diulahon nasida.​—1 Ptr. 3:8. w19.05 17-18 ¶15-17

Di keluarga, sahalak suami ingkon mangkaholongi istrina “dos songon na niulahon ni Kristus tu huria i”. (Eps. 5:28, 29) Ingkon ditiru nasida do holong ni Jesus na so mangkaringkothon diri marhite manjumolohon aha na dihaporluhon istrina. Ra, maol do di piga-piga baoa mangulahon i ala ndang somal di luat nasida patuduhon holong sisongon i tu halak na asing. On mambahen nasida maol mambolongkon hasomalan na roa. Alai ingkon marhamubaon do nasida laho patuduhon unduk tu patik ni Kristus. Molo dipatudu suami holong na so mangkaringkothon diri, gabe dipasangap istrina ma ibana. Jala, sahalak ama na holong tu ianakhonna ndang olo mambahen hansit roha ni anakna marhite pangkataion manang parniulaonna. (Eps. 4:31) Alai, patuduhononna do holong tu ianakhonna marhite mambahen pos jala dame roha ni anakna. Molo diulahon ibana songon i, gabe dihaholongi anakna ma ibana. w19.05 6 ¶21

Aha do hira-hira na dipingkirhon si Maria tingki mambege hata ni si Gabriel i? Na dirimpu ibana do Jesus na laho manggantihon si Herodes na mamarenta Israel tingki i? Molo gabe raja Jesus, tontu si Maria gabe omak ni raja jala tading ma keluargana di istana na balga. Alai ndang hea dipangido si Maria, asa dibahen ibana tu siamun ni Jesus dung gabe raja Jesus di surgo. Sahalak borua na marserep ni roha situtu do si Maria! Taingot ma, tujuanta marsiajar Bibel dohot angka publikasi, i ma asa lam jonok hita tu Jahowa. Jala lomo do rohanta laho mamboto halak na songon dia do hita sasintongna, jala aha dope na porlu tapadenggan di dirinta asa mambahen las roha ni Jahowa. (Jak. 1:22-25; 4:8) Tingki naeng marsiajar Bibel, tapangido ma tondi parbadia ni Jahowa. Tapangido ma asa diurupi hita mandapot godang laba sian na taparsiajari jala mamboto aha na ingkon taulahon. w19.05 30-31 ¶18-19

Sipata, olo do adong piga-piga hasusaan na ro tu hita di tingki na sarupa. Parrohahon ma angka contoh on. Sahalak Sitindangi na margoar si John marsahit tulang belakang. Dung i, ditadingkon istrina ma ibana. Hape nunga 19 taon nasida marhasohotan. Dung i, dua boruna ndang olo be manomba Jahowa. On mambahen lungun rohana jala marsak. Si Bob dohot si Linda mangadopi hasusaan na asing. Dipecat do nasida sian parkarejoan. Alani i, ndang boi be nasida manggarar sewa ni jabu. Marsahit jantung muse si Linda, jala adong sahit na asing na mambahen ibana mura gale. Alai pos ma rohanta, diantusi Jahowa do songon dia pangkilalaanta tingki mangadopi hasusaan. Jala lomo do rohana mangurupi hita asa boi mangadopi hasusaan i. (Plp. 4:6, 7) Di Bibel, godang do angka contoh sian naposo ni Jahowa na tongtong martahan tingki mangadopi hasusaan. Jala dipaboa do songon dia Jahowa mangurupi nasida. w19.06 14 ¶2-3

Tingki taapuli angka dongan na ditadingkon dongan saripena, on patuduhon na holong do rohanta tu nasida. Di situasi sisongon i, porlu do di nasida dongan na burju. Songon dia carana asa boi hita gabe dongan na burju? Boi do tatogihon nasida asa rap mangan, rap mardalani, manang rap marbarita. Sipata, boi do tatogihon rap dohot tu ibadat keluarga. Molo taulahon i, las ma roha ni Jahowa. Alana jonok do Ibana tu “angka halak na marsak roha” jala “mangondihon angka na mabalu”. (Ps. 34:19; 68:6, Bibel siganup ari) Satongkin nai, dung mamarenta Harajaon ni Debata di tano on, sude “angka hasusaan di tingki na salpu, nunga salpu be i jala dihalupahon”. Tontu tarpaima do hita tingki ‘angka na masa di tingki na salpu i, halupahononhon saluhut’. (Jes. 65:16, 17, Bibel siganup ari) Alai andorang so ro tingki i, masiurupan ma hita dohot angka dongan jala tapatudu ma sian pangkataion dohot sian parniulaonta na holong do rohanta tu sude dongan sahaporseaonta.​—1 Ptr. 3:8. w19.06 25 ¶18-19

Piga-piga taon naung salpu, sada artikel di Joujou Paboahon hea mandok, “Halak na solhot tu Debata tongtong do porsea tu Ibana tingki adong penganiayaan.” Alani i, asa boi hita martahan tingki mangadopi penganiayaan, ingkon tahaholongi do Jahowa jala porsea tu Ibana. (Mat. 22:36-38; Jak. 5:11) Asa lam solhot tu Jahowa, jaha ma Bibel ganup ari. (Jak. 4:8) Tingki dijaha hamu Bibel, parrohahon ma angka parange ni Jahowa. Parrohahon ma songon dia Jahowa patuduhon holong sian aha na dihatahon dohot na diulahon Ibana. (2 Mus. 34:6) Ra adong do piga-piga halak na maol porsea tu holong ni Debata ala nasida sandiri ndang hea dihaholongi halak na asing. Molo songon i na dihilala hamu, ganup ari bahen ma daftar jala surat ma songon dia Jahowa tongtong patuduhon haburjuon dohot asi ni rohana tu hamu. (Ps. 78:38, 39; Rom 8:32) Molo sai dirimangi hamu pengalamanmuna dohot aha na dijaha hamu di Bibel, gabe godang ma na boi disurat hamu taringot naung diulahon Jahowa tu hamu. Molo diargai hamu do sude na hea diulahon Jahowa tu hamu, lam togu ma parale-aleonmuna tu Ibana.​—Ps. 116:1, 2. w19.07 2-3 ¶4-5

Ndang dilehon Jahowa tu hita hak laho mangatur dongan na asing. Molo adong sasahalak na mangulahon i, boi do on gabe mambahen jea tu donganna. Jala gabe songon tuan na mangarajai haporseaon ni donganna do ibana disi. Marsitutu do Sibolis asa dianiaya angka naposo ni Jahowa. (1 Ptr. 5:8; Pgk. 2:10) Lomo do roha ni Sibolis dohot sude na mangihuthon ibana asa diorai ulaonta manomba Jahowa. Alai, unang ma mabiar hita! (5 Mus. 7:21) Didongani Jahowa do hita jala sai urupanna do hita nang pe diorai ulaonta. (2 Kron. 32:7, 8) Anggiat ma hita songon halak Kristen di abad na parjolo. Didok nasida tu pamarenta di tingki i, “Hamu sandiri ma na manontuhon, dia do na sintong di adopan ni Debata, manangihon hamu do manang manangihon Debata? Alai ndang tarbahen hami so mangkatahon taringot tu na niida dohot na binegenami.”​—Ul. 4:19, 20. w19.07 13 ¶18-20

Tikki marbarita, ingkon taantusi do boasa songon i dihilala halak na tajumpangi i. Halak Jahudi do Apostel Paulus. Alai disesuaihon ibana do carana marbarita tu angka na so halak Jahudi. Alana, ndang pola diboto nasida taringot Jahowa dohot taringot na tarsurat. Porlu do tabahen riset manang tasungkun ma angka naung berpengalaman di hurianta asa taantusi pandapot ni angka halak di ingananta. (1 Kor. 9:20-23) Tujuanta, i ma mangalului halak “na olo manjalo” barita na tapasahat. (Mat. 10:11) Asa denggan taulahon on, ingkon tasungkun do pandapot ni angka halak jala manat ma tatangihon pandapot ni nasida. Sahalak donganta baoa di Inggris manungkun pandapot ni halak taringot songon dia asa denggan parsaripeon, pagodang-godangkon ianakhon, manang songon dia molo adong na manusai hita. Dung ditangihon pandapot ni nasida, didok ibana ma, “Adong sada poda na disurat 2.000 taon naung salpu. Boha do menurutmu poda on?” Ndang pola didok ibana i na sian “Bibel”. Alai dipatudu do isi ni ayat naung diparade hian di HP-na. w19.07 21 ¶7-8

Ingkon sadia balga do holongta tu Jahowa? Didok Jesus tu angka halak Parise, “Ingkon haholonganmu do Jahowa Debatam sian nasa roham, sian nasa ngolum dohot sian nasa pingkiranmu.” (Mat. 22:36, 37) Lomo rohanta mangkaholongi Debata sian nasa rohanta. Jala lomo rohanta asa lam togu holongta tu Ibana ganup ari. Asa boi tahaholongi Debata, ingkon tatanda do Ibana. Bibel mandok, “Manang ise na so marholong ni roha, ndang ditanda ibana Debata, ai holong do Debata.” (1 Joh. 4:8) Didok si Paulus, gabe lam togu do holongta tu Debata molo lam martamba ‘parbinotoan dohot pangantusionta na bagas’ taringot Ibana. (Plp. 1:9) Tingki parjolo sahali hita marsiajar Bibel, tahaholongi do Debata nang pe otik dope na taboto taringot Ibana. Dung lam godang na taparsiajari taringot Jahowa, gabe lam togu ma holongta tu Ibana. Alani i, mansai ringkot do mambahen parsiajaran Bibel pribadi jala mangarimangi aha na tajaha!​—Plp. 2:16. w19.08 9 ¶4-5

Molo pinda hamu tu inganan na baru, lului ma dongan di huriamuna na baru i. Ingot ma, ingkon burju do hita asa boi mandapot dongan. Paboa ma angka pengalamanmuna na denggan saleleng marhobas tu Jahowa asa boi diida nasida las ni rohamuna. Molo ditadingkon hamu penugasanmuna ala marsahit dongan saripemuna, unang ma salahon ibana. Jala molo hamu do na marsahit, unang ma sai salahon hamu dirimuna jala unang ma didok rohamu nunga dibahen hamu kecewa dongan saripemuna. Ingot ma, sada daging do hamu jala nunga marjanji hamu tu Jahowa laho masihaholongan manang aha pe na masa. (Mat. 19:5, 6) Asing ni i, molo ditadingkon hamu penugasan ala marianakkon hape ndang direncanahon, patudu ma tu ianakhonmuna na rumingkot do ibana sian penugasanmuna najolo. Jotjot ma paboa tu ianakhonmuna molo ibana “silehon-lehon” sian Debata. (Ps. 127:3-5) Jala, paboa ma angka pengalaman na denggan sian penugasanmuna najolo. Molo diulahon hamu i, boi do gabe taronjar rohana dohot tu dinas sepenuh waktu songon hamu. w19.08 22 ¶10-11

Babel na Balga manggombarhon sude agama palsu. Gabe lea do goar ni Debata dibahen Babel na Balga ala diajarhon nasida na so sintong taringot Debata. Songon boru-boru na so hasea, ndang setia agama palsu tu Debata ala parsidohot tu politik. Kejam jala holan hepeng do na diharingkothon nasida. Godang do muse halak na mate dibahen agama palsu on, dohot ma i angka naposo ni Debata. (Pgk. 18:24; 19:2) Dipangke Jahowa do “sampulu tanduk” sian “binatang buas na rara songon api” laho mangaripashon “boru-boru na so hasea”. Binatang buas i manggombarhon Perserikatan Bangsa-Bangsa. Jala sampulu tanduk, i ma sude pamarentaon na dohot tu Perserikatan Bangsa-Bangsa. Di tingki naung ditontuhon Debata, laho diserang nasida ma Babel na Balga. “Buaton ni nasida ma sude artana jala bahenon ni nasida ma ibana ndang marpangkean” marhite mambuat hamoraonna jala paboahon hajahatonna. (Pgk. 17:3, 16) Tompu do i masa songon “di bagasan sadari”. Alani i, tarsonggot ma angka na parsidohot tu agama palsu, ala sai didok Babel na Balga i, “Ndang hilalaonku lungun ni roha.”​—Pgk. 18:7, 8. w19.09 10 ¶10-11

Digokkon Jesus do sude halak asa ro tu ibana, jala ndang hea dijua ibana manang ise pe na olo marhobas tu Jahowa. (Joh. 6:37, 38) Sude na mangihuthon Jesus mandapot hak istimewa laho mangulahon tugas na dilehon Jahowa tu Jesus. Alani i, pos ma rohanta sai didongani jala diurupi Jesus do hita laho mangulahon tugas i. (Mat. 28:18-20) Halak na marserep ni roha do na olo marale-ale dohot Jesus. (Mat. 19:13, 14; Luk. 7:37, 38) Boasa? Pingkirhon ma imbar ni Jesus dohot halak Parise. Ginjang do roha ni nasida jala ndang parduli tu na asing. (Mat. 12:9-14) Alai molo Jesus, parholong jala serep do rohana. Lomo do roha ni halak Parise asa ditanda halak nasida, jala gabe umsangap sian na asing. Alai didok Jesus sala do i, jala diajari ibana do angka siseanna asa marserep ni roha jala manarihon na asing. (Mat. 23:2, 6-11) Adong pe angka halak na olo unduk tu halak Parise, ala mabiar do nasida dihukum. (Joh. 9:13, 22) Alai molo Jesus, dipatogu ibana do na asing marhite patuduhon holong dohot hata na lambok. Adong do na boi ditiru hamu sian Jesus? w19.09 20 ¶1; 21 ¶7-8; 23 ¶9

Parpunguan boi do mangurupi hita asa lam solhot tu Jahowa. Molo ringgas hita marpungu, boi ma hita martahan tingki adong penganiayaan di ari na naeng ro. (Heb. 10:24, 25) Boasa? Alana, molo sian saonari tapaloas masalah na gelleng mambahen hita gabe ndang ro marpungu, tarlumobi ma haduan molo adong penganiayaan. Alana haduan olo do ra ditangkup hita manang dipamate ala marpungu. Alai molo marsitutu do hita ro tu parpunguan, tontu di ari na naeng ro pe ndang adong na boi mangambati hita ro marpungu. Alani i, sian saonari ma ingkon lomo do rohanta marpungu. Molo lomo rohanta marpungu, manang ise pe ndang adong na boi mangambati hita mangoloi Debata. (Ul. 5:29) Ingot ma angka ayat favoritmuna. (Mat. 13:52) Tontu ndang boi taingot sude ayat ni Bibel. Alai boi do tondi parbadia mangurupi hita laho mangingot muse angka ayat na hea tajaha. (Joh. 14:26) Angka ayat ni Bibel i mangurupi hamu asa tongtong togu parale-aleonmuna tu Jahowa jala asa boi martahan. w19.07 3 ¶5; 4 ¶8-9

Molo tubu hamu dungkon taon 1914, lapatanna hamu mangolu saleleng ari parpudi ni portibi on. Sude hita nunga mambege angka na dipaboa Jesus na masa di tingkinta saonari. Umpamana, porang, haraparon, gempa, sahit, lam godang hajahaton, jala dianiaya angka naposo ni Jahowa. (Mat. 24:3, 7-9, 12; Luk. 21:10-12) Jala taida muse pangalaho ni angka halak hombar tu na didok apostel Paulus. Ala Sitindangi Ni Jahowa hita, tangkas do taboto molo hita mangolu di “ari parpudi”. Nunga leleng salpu taon 1914, lapatanna hita saonari mangolu di ujung ni “ari parpudi”. Ala nunga jonok ajal ni hasiangan on, porlu do taalusi angka sungkun-sungkun na ringkot on: Aha do na laho masa di ujung ni “ari parpudi”? Jala aha do na dipangido Jahowa asa taulahon huhut paimahon angka na laho masa i? w19.10 8 ¶1-2

Manang aha pe situasina, boi do hita martahan molo marhaposan tu Jahowa. (Rom 12:12) Lapatan ni janji ni Jesus di ayat sadari on, i ma ingkon tongtong do hita setia manang aha pe hasusaan na taadopi. Molo boi hita martahan saonari, gabe lam togu ma haporseaonta andorang so dimulai hasusaan bolon. Asa boi martahan, ingkon marhaposan do hita tu Jahowa. Suang songon i ma, asa boi barani ingkon marhaposan do hita tu Jahowa. Songon dia carana? Marhite manjaha Bibel ganup ari jala mangarimangi songon dia Jahowa paluahon naposona di tingki najolo. (Ps. 68:21; 2 Ptr. 2:9) Ingkon barani do hita jala lam marhaposan tu Jahowa tarlumobi tingki ro serangan sian angka bangso saleleng hasusaan bolon. (Ps. 112:7, 8; Heb. 13:6) Molo sian saonari hita marhaposan tu Jahowa, boi ma lam barani hita tingki ro serangan sian Gog. On paposhon rohanta, alani holongna, sai diramoti Jahowa do hita.​—1 Kor. 13:8. w19.10 17-18 ¶15-16

Sibolis do na mangarajai portibi on, jala dibahen ibana do angka na adong di portibi on gabe na rumingkot di ngolunta. Jala mambahen hita maol pasidingkon giot-giot na sala. (Eps. 2:1-3) Tujuan ni ibana asa ndang tu Jahowa be hita marale-ale. Dung disurat si Petrus taringot ajal ni portibi ni Sibolis dohot tano na imbaru na naeng ro, didok ibana muse, “Angka dongan na hinaholongan, ala dipaima-ima hamu do angka i, marsitutu ma hamu asa didapot Ibana hamu ias, ndang marcacat, jala di bagasan dame.” (2 Ptr. 3:14) Molo unduk hita tu Debata, jala taulahon aha na dihalomohon rohana, on patuduhon holan Jahowa do na tasomba. Marsitutu do Sibolis dohot portibi on mambahen hita asa mangkaringkothon na asing unang apala Jahowa. (Luk. 4:13) Alai, unang ma tapaloas ise pe manang aha pe manggantihon Jahowa di rohanta. Marsitutu ma hita holan manomba Jahowa, ala tama do Ibana manjalo i! w19.10 26 ¶4; 31 ¶18-19

Sipata, ndang sala hita holsoan. Contohna, holsoan do hita laho mamingkirhon aha na mambahen las roha ni Jahowa dohot Jesus. (1 Kor. 7:32) Molo taulahon dosa na balga, tontu tapingkirhon do carana asa padengganhon parale-aleonta tu Debata. Sai tapingkiri do carana mambahen las roha ni dongan saripe, jala mangurupi keluarga dohot dongan sahaporseaon. (1 Kor. 7:33; 2 Kor. 11:28) Olo do paholsohu hita taringot sipanganon dohot pangkean. (Mat. 6:31, 32) Olo do ra gabe sai tapingkirhon laho mangalului godang arta. Jala boi do i mambahen gale haporseaonta dohot parale-aleonta tu Jahowa. (Mrk. 4:19; 1 Tim. 6:10) Manang alani mamingkirhon pandapot ni halak taringot hita, gabe umbiar do hita molo direhei manang dianiaya sian ndang mambahen las roha ni Jahowa. Asa unang songon i, tapangido ma tu Jahowa asa unang mabiar hita tu jolma.​—Poda 29:25; Luk. 17:5. w19.11 15 ¶6-7

Adong do piga-piga keputusan na ringkot na so boi tapauba. Umpamana, ingkon tongtong do hita manomba Jahowa jala tongtong setia tu dongan saripenta. (Mat. 16:24; 19:6) Alai, olo do ra adong keputusan na ingkon tapauba. Boasa? Ala olo do muba situasi di ngolunta. Aha do na boi mangurupi hita laho mambahen keputusan na denggan? Martangiang ma mangido bisuk. Sipata, “hurangan bisuk” do hita sude. Alani i, martangiang ma tu Jahowa asa diurupi hamu tingki mambahen keputusan dohot tingki manguba keputusanmuna i. Urupan ni Jahowa do hamu laho mambahen keputusan na denggan. Bahen ma riset. Parsiajari ma Bibel, jaha ma publikasi na diparade organisasi ni Jahowa, jala paboa ma rencanamuna tu dongan na boi mangurupi hamu. (Poda 20:18) Ringkot do mambahen riset tingki naeng mambahen keputusan laho mangalului karejo na baru, pinda tu inganan na asing, manang tingki naeng mamillit keterampilan asa boi mandapot karejo na boi mangurupi hamu di ulaon marbarita. w19.11 27 ¶6-8

Tontu mandok mauliate do hita tu Debata ala dibahen Ibana pengaturan asa boi hita malua sian dosa. Jesus ma na dipillit laho paluahon hita. Lobi sian 700 taon andorang so ro Jesus tu tano on, nunga disurirangkon si Jesaya na laho adong haluaon na dumenggan sian haluaon ni halak Israel saleleng taon Yobel. Didok ibana, “Songgop do tu ahu tondi ni Tuhan Jahowa, ala naung miniahan ni Jahowa ahu mamaritahon barita na uli tu halak na dangol, marsuru ahu pauliuli halak parroha na bojok, maningtingkon haluaon tu halak na tarhurung.” (Jes. 61:1) Tu ise do surirang i marlangku? Mansai ringkot do surirang taringot haluaon i. Jala dimulai ma i dung dimulai Jesus ulaonna marbarita. Tingki laho ibana tu sinagoga di hutana di Nasaret, dijahahon Jesus do surirang ni si Jesaya i tu angka halak Jahudi na ro tusi jala dipaboa ibana songon dia surirang i saut tu dirina.​—Luk. 4:16-19. w19.12 9-10 ¶6-8

Ingkon barani do hamu tingki mangadopi penganiayaan. Alai molo dihilala hamu ndang barani hamu, aha ma na porlu ulahononmuna? Ingot ma, habaranion ndang ditontuhon sian balga ni dagingmuna, gogomuna manang hapistaranmuna. Pingkirhon ma songon dia si Daud mangalo si Goliat tingki poso ibana. Gelleng jala gale hian do si Daud marimbangkon si Goliat, jala ndang adong sinjata ni si Daud. Nang pe songon i, ndang mabiar si Daud. Barani do si Daud mandapothon si Goliat laho mangalo ibana. Boasa mansai barani si Daud? Ala pos do rohana na sai didongani Jahowa do ibana. (1 Sam. 17:37, 45-47) Nang pe dao umbalga si Goliat sian si Daud, alai ndang i na sai dipingkiri si Daud. Alana dibayangkon ibana, dao do umbalga Jahowa sian si Goliat. Aha ma na boi taparsiajari? Boi do hita gabe barani molo pos rohanta na sai didongani Jahowa do hita. Jala taingot ma, dao do umgelleng angka na marsogo ni roha tu hita sian Jahowa, Debata na Marhuaso.​—2 Kron. 20:15; Ps. 16:8. w19.07 5 ¶11-13

Si Tikikus, i ma sahalak Kristen jala dongan ni Apostel Paulus na boi dihaporseai. (Ul. 20:4) Hira-hira taon 55 M, dibahen si Paulus ma pengaturan asa papunguhon hepeng lao mangurupi halak Kristen di Judea. Ra, si Tikikus do na mangulahon tugas na rikkot i. (2 Kor. 8:18-20) Dung i, tikki parjolo sahali si Paulus dipenjarahon di Rom, si Tikikus ma na mamboan surat ni si Paulus na patoguhon akka dongan di huria di Asia. (Kol. 4:7-9) Toktong do si Tikikus gabe dongan na boi dihaporseai si Paulus. (Tit. 3:12) Di tikki i, dang godang na boi dihaporseai songon si Tikikus. Hira-hira taon 65 M, tikki dipenjarahon si Paulus na paduahalihon, dibahen ibana ma surat na mandok, godang akka dongan di provinsi Asia dang olo be marsaor dohot ibana ala mabiar tu akka musu. (2 Tim. 1:15) Alai, toktong do si Tikikus boi dihaporseai jala dilehon do muse tu ibana tugas na baru. (2 Tim. 4:12) Tontu massai arga do di si Paulus dongan na burju songon si Tikikus. w20.01 10 ¶7-8

Ra didok rohamuna, dipillit Jahowa do hamu lao mangolu di surgo. Molo songon i, pikkirhon ma jolo akka sukkun-sukkun on: Massai lomo do rohamu mangulahon lomo ni roha ni Debata? Ringgas situtu do hamu di ulaon marbarita? Massai las do rohamu marsiajar Bibel manang mamboto “angka na buni di bagasan diri ni Debata”? Dihilala hamu do pasu-pasu ni Jahowa tikki marbarita na uli? Marsitutu do hamu mangurupi akka halak asa manomba Jahowa? Dihilala hamu do songon dia Jahowa mangurupi hamu di parngoluonmuna? Molo i do na dihilala hamu tu sude sukkun-sukkun on, na patuduhon naung dipillit Jahowa do hamu lao mangolu tu surgo? Daong. Boasa? Alana sude do naposo ni Jahowa boi makkilala songon i. Sasittongna, molo sai sukkun-sukkun do rohamu na lao tu surgo do hamu manang na dang, on patuduhon dang dijou hamu lao tu surgo. Dang ganggu roha ni akka halak na miniahan molo nasida nungnga dipillit Jahowa! w20.01 23 ¶14