Mei

Aha do na ingkon diulahon natua-tua laho mangurupi ianakhonna asa mangkaholongi Jahowa? Martangiang ma asa diurupi Jahowa. Gabe sitiruon ma hamu. Umbalga do pengaruh ni na diulahon hamu sian na dihatahon hamu tu ianakhonmuna. Dilehon si Josep dohot si Maria do sitiruon na denggan tu ianakhonna, tarmasuk ma tu Jesus. Ringgas do si Josep karejo laho manarihon keluargana. Jala, dijujui ibana do keluargana asa mangargai parale-aleonna tu Debata. (5 Mus. 4:9, 10) Diboan si Josep do keluargana “ganup taon” laho mangarayahon Paska. (Luk. 2:41, 42) Ra, piga-piga kepala keluarga di tingki i marpingkir, maol do mamboan sude keluargana tu Jerusalem. Boi do i pasudahon godang tingki dohot hepeng. Nang pe songon i, diharingkothon si Josep do parale-aleon tu Debata, jala diajarhon ibana do i tu ianakhonna. Asing ni i, tangkas do diboto si Maria Hata ni Debata. Marhite na dihatahon dohot na diulahon ibana, diajarhon si Maria do ianakhonna asa mangkaholongi Hata ni Debata. w19.12 24-25 ¶9-12

Boi do taida holong ni Jahowa molo tarimangi aha na diulahon Ibana tikki mangalo si Adam tu Ibana. Dung mardosa si Adam, dang bagian sian keluarga ni Jahowa be ibana dohot akka pinomparna. (Rom 5:12) Alai adong do na diulahon Jahowa lao mangurupi akka pinoppar ni si Adam. Dihukum Jahowa do si Adam. Alai, marjanji do Jahowa lao mangurupi akka pinopparna. Jala lao paluaonna do akka halak na mangoloi Ibana asa gabe bagian sian keluargana. (1 Mus. 3:15; Rom 8:20, 21) Alani tobusan ni Jesus, boi do tadapot pasu-pasu i. Dilehon Jahowa do Anakna humokkop hita. On patuduhon na massai holong do rohana tu hita. (Joh. 3:16) Ibana ma Ama na massai burju tu hita. Ditangihon Ibana do tangiangta jala diparade do aha na tahaporluhon ganup ari dohot akka na patoguhon parale-aleotta tu Ibana. Dilatik jala diurupi do hita. Dilehon do muse pakkirimon tu ari na naeng ro. Las do rohatta ala mamboto na massai holong jala disarihon Jahowa do hita! w20.02 6 ¶16-17; 7 ¶20

Hea do hamu marsak? Olo do ra gabe marsak hamu alani pakkataion dohot pambahenan ni halak. Manang alani aha na dihatahon manang na diulahon hamu. Umpamana, hea do ra hamu mangulahon dosa jala didok rohamu dang sesaon ni Jahowa dosamuna i. Jala ala marsak situtu hamu, gabe didok rohamu ma na gale haporseaonmuna tu Debata. Pikkirhon ma piga-piga contoh na adong di Bibel. Si Hanna omak ni panurirang Samuel, i ma sahalak borua na togu haporseaonna. Alai hea do marsak rohana ala adong sasahalak di keluargana na mambahen jut rohana. (1 Sam. 1:7) Togu do haporseaon ni apostel Paulus, alai jotjot do ibana “holsoan alani sude huria”. (2 Kor. 11:28) Togu do haporseaon ni Raja Daud jala massai holong do roha ni Jahowa tu ibana. (Ul. 13:22) Nang pe songon i, hea do ibana mangulahon dosa na balga na mambahen ibana marsak situtu. (Ps. 38:5) Alai, dipatogu jala diapuli Jahowa do nasida sude. w20.02 20 ¶1-2

Tikki mangalehon diri tu Debata, paboa ma di bagasan tangiangmuna, holan Jahowa do na lao sombaonmu saleleng ngolumuna. Tikki dilehon hamu ngolumuna tu Jahowa, gabe ‘disoadahon hamu ma dirimuna’. Lapatanna, marjanji ma hamu tu Jahowa, holan Ibana ma na urrikkot di ngolumuna, dang be dirimuna sandiri. Gabe ampuna ni Jahowa ma hamu. Sada hasangapon na massai arga do i. (Rom 14:8) On ma janji na dibahen hamu tu Debata. Dang olo Jahowa mamaksa hita lao marjanji tu Ibana. Alai, molo nga marjanji hita tu Jahowa, ikkon taulahon do i. (Ps. 116:12, 14) Tikki mangalehon diri tu Jahowa, holan hamu dohot Jahowa do na mamboto i. Alai molo tardidi, di jolo ni halak do hamu mangulahon i, somalna tikki di kebaktian. Tikki tardidi hamu, dipatudu hamu ma tu akka halak, nungnga dilehon hamu dirimuna tu Jahowa. Gabe diboto nasida ma, na dihaholongi hamu do Jahowa sian nasa roha, ngolu, pikkiran dohot gogomuna. Jala diboto nasida ma, nungnga rade be hamu manomba Jahowa saleleng ni ngolumuna.​—Mrk. 12:30. w20.03 9 ¶4-5

Sibolis mambahen halak dao sian Jahowa. Dung mate angka apostel ni Jesus, piga-piga halak Kristen na murtad paboahon ajaran na so sintong. (Ul. 20:29, 30) Ndang dipaboa nasida taringot Debata na sintong. Umpamana, dihapus nasida do goar ni Debata di Bibel. Jala diganti nasida do i gabe gelar songon ‘Tuhan’. Gabe ndang diboto angka halak na manjaha Bibel be, na imbar do Jahowa sian debata na asing. (1 Kor. 8:5) Jala dipangke nasida do gelar ‘Tuhan’ tu Jahowa dohot Jesus. Alani i, gabe ndang diantusi nasida be na imbar do Jahowa dohot Jesus. (Joh. 17:3) On mambahen gabe adong ajaran debata Sitolu Sada, na so adong diajarhon di Bibel. Ujungna, gabe godang ma halak marpingkir, ndang boi ditanda nasida Debata jala ndang boi marale-ale tu Ibana. Gabus na mansai jahat do on.​—Ul. 17:27. w19.06 5 ¶11

Sada cara asa boi marbarita sian nasa gogo, i ma mangalatik caranta marbarita. (Poda 1:5; 1 Tim. 4:13, 15) Sada hasangapon do di hita boi gabe “dongan saulaon” ni Jahowa! (1 Kor. 3:9) Dung “diboto hamu dia na rumingkot” jala sai manjumolohon pangkobasion ni halak Kristen, boi ma hamu manomba “Jahowa marhitehite las ni roha”. (Plp. 1:10; Ps. 100:2) Pos ma rohamuna, urupan ni Jahowa do hamu asa boi tongtong marbarita nang pe mangadopi angka hasusaan dohot sitaonon. (2 Kor. 4:1, 7; 6:4) Nang pe ndang boi godang na dilehon hamu, alai molo dilehon hamu na dumenggan boi ma hamu “marlas ni roha”. (Gal. 6:4) Tingki marbarita hita sian nasa gogonta, on patuduhon holongta tu Jahowa dohot tu angka dongan. Jala “molo diulahon ho i na paluahon dirim do ho dohot na manangihon ho”.​—1 Tim. 4:16. w19.04 6 ¶15; 7 ¶17

Dipangke Sibolis dohot suru-suruanna do spiritisme laho mangaliluhon angka jolma. Angka halak na mangulahon spiritisme mangangku boi mamboto jala mangulahon na so boi diboto jala diulahon halak na asing. Umpamana, naeng mamboto aha na masa di ari na naeng ro marhite ramalan bintang. Na asing mangangku boi do nasida mangkatai dohot halak naung mate. Adong muse na mangulahon ilmu sihir dohot mandormai halak na asing. Tingki disungkun angka halak di 18 negara di Amerika Latin dohot Karibia, sapartolu sian nasida porsea tu ilmu gaib, sihir manang mangaramal. Jala godang sian nasida na porsea boi mangkatai dohot tondi ni halak naung mate. Tingki disungkun muse angka halak di 18 negara di Afrika, lobi satonga sian nasida porsea tu sihir. Tontu didia pe hita tading, ingkon tapasiding do angka spiritisme. w19.04 20-21 ¶3-4

Sogo do roha ni Jahowa tu sude hajahaton, dohot ma i pelecehan seksual tu dakdanak. (Ps. 5:5-7) Mansai dihagigihon Jahowa do hajahaton sisongon i! Ingkon dihagigihon Sitindangi Ni Jahowa do pelecehan seksual tu dakdanak jala ingkon dipasiding do halak na mangulahon i sian huria Kristen. (Rom 12:9) Maralo situtu do pelecehan seksual tu dakdanak tu “patik ni Kristus”! (Gal. 6:2) Patik ni Kristus, i ma sude na diajarhon Jesus marhite hatana dohot parniulaonna. Fondasi ni patik i, i ma holong jala tongtong patuduhon hatigoran. Ala mangihuthon patik i, sude halak Kristen ingkon lambok maradophon dakdanak asa dihilala nasida holong dohot hadameon. Alai pelecehan seksual mambahen dakdanak gabe mabiar jala didok rohana ndang adong na mangkaholongi ibana. Adong do pengaruhna tu halak Kristen. Boasa? Alana lam godang do “angka parjahat dohot panipu”. Ra, adong piga-piga na ro tu huria. (2 Tim. 3:13) Jala adong do piga-piga halak di huria na dirajai giot-giot ni dagingna gabe mangulahon pelecehan seksual tu dakdanak. w19.05 8 ¶1-3

Olo do dirimpu halak na marmetmet ni roha ndang boi be nasida marale-ale tu Jahowa marhite tangiang. Boi do taapuli nasida marhite manogihon nasida asa rap martangiang jala boi do tadok goar ni nasida di tangiang i. Tingki martangiang, tadok ma tu Jahowa na mansai holong do rohanta dohot angka dongan di huria tu donganta i. Tapangido ma tu Jahowa asa diurupi jala diapuli ibana. Tangiang sisongon i boi do mangapuli donganta na marmetmet ni roha. Hata na asal didok boi mambahen hansit roha, alai hata na denggan boi mangapuli roha. Alani i, ingkon jolo tapingkiri do hata na laho tadok. (Poda 12:18) Pangido ma tu Jahowa asa hita boi marbisuk mamillit hata na denggan, na lambok, jala mangapuli roha. Alai ingot ma, hata ni Jahowa do na dumenggan laho mangapuli angka halak jala boi do i tadapot di Bibel. (Heb. 4:12) Tingki taapuli dongan na asing, sarupa do i songon paboahon na holong do roha ni Jahowa tu nasida. Jala ingot ma, Jahowa i ma Debata hatigoran. Ndang adong na boi ditabunihon sian Ibana. Diboto Jahowa do sude halak na hea gabe korban pelecehan seksual. Jala laho uhumonna do angka halak na mangulahon na jahat jala ndang olo marhamubaon.​—4 Mus. 14:18. w19.05 18 ¶18-19; 19 ¶21

Lomo do roha ni Sibolis asa unang tasomba be Jahowa. Marsitutu do ibana manegai pingkiranta asa sarupa dohot pingkiranna. Dibahen Sibolis do cara asa taulahon angka na dihalomohon rohana marhite angka na tahalomohon. (Kol. 2:4) Ingkon manat do hita asa unang dililuhon Sibolis. Ingot ma, ndang tu halak na so sisomba Jahowa disurat si Paulus sipasingot na di Kolosse 2:8. Alai tu halak Kristen naung dimiahi tondi parbadia do i disurat ibana. (Kol. 1:2, 5) I do alana ingkon manat do nasida, tarlumobi ma hita saonari. (1 Kor. 10:12) Boasa? Alana nunga didabuhon Sibolis tu tano on. Jala marsitutu do ibana laho mangaliluhon sude naposo ni Debata. (Pgk. 12:9, 12, 17) Asing ni i, “lam tu jahatna” do angka parjahat dohot panipu di tingkinta saonari.​—2 Tim. 3:1, 13. w19.06 2 ¶1-2

Sada tingki, gabe mabiar do si Elia. Alana didok Ratu Isebel, naeng bunuonna do ibana. Alani i, lari ma si Elia tu Berseba. Gabe metmet ma rohana sampe “mangidohon mate” ibana tu Debata. Boasa songon i pangkilalaan ni si Elia? Ala halak na so sempurna do ibana jala “dos do pangkilalaanta dohot ibana”. (Jak. 5:17) Ra dihilala si Elia pe songon i, ala marsak do ibana jala palojahu. Marisuang do dihilala ibana manjujui halak Israel laho manomba Jahowa. Jala dirimpu ibana, holan ibana nama na manomba Jahowa. (1 Raj. 18:3, 4, 13; 19:10, 14) Diantusi Jahowa do songon dia pangkilalaanna jala ndang muruk Jahowa tu ibana. Gariada, dipatogu do rohana. (1 Raj. 19:5-7) Dung i, diurupi Jahowa do si Elia asa paubahon cara marpingkirna marhite patuduhon huasona na balga. Didok Jahowa tu si Elia, adong dope 7.000 halak Israel na so olo manomba Baal. (1 Raj. 19:11-18) Marhite cara on, dipatudu Jahowa do na holong rohana tu si Elia. w19.06 15-16 ¶5-6

Tongtong ma ihuthon tudu-tudu. Tadapot do laba molo mangihuthon tudu-tudu sian angka dongan na martanggung jawab di organisasi. Umpamana, tingki diorai ulaonta di sada negara, dilehon angka dongan na martanggung jawab disi do tudu-tudu asa unang dilehon be publikasi na tercetak tingki marbarita. Alai sahalak donganta baoa perintis, ndang mangihuthon tudu-tudu i. Aha do akibatna? Dung sae ibana dohot donganna kesaksian tidak resmi, adong ma polisi na ro manungkuni nasida. Hape, nunga adong sahalak na karejo di pamarenta na mangihut-ihuthon nasida jala dibuat ma angka publikasi naung dilehon nasida i. Aha do na boi taparsiajari sian pengalaman on? Ingkon tongtong ma taihuthon tudu-tudu nang pe sipata ndang setuju hita tu tudu-tudu i. Sai dipasu-pasu Jahowa do hita molo taoloi angka dongan na dipillit Jahowa laho manguluhon hita.​—Heb. 13:7, 17. w19.07 12 ¶17

Di borngin andorang so mate Jesus, didok ibana laho dihasogohon portibi on do angka siseanna. (Joh. 17:14) Sahat tu saonari pe, dianiaya angka halak na so sisomba Jahowa do angka halak Kristen na setia. Jala ala lam jonok ajal ni portibi on, lam marsitutu do nasida laho mambahen hita susa. (Mat. 24:9) Songon dia do hita saonari paradehon diri laho mangadopi penganiayaan? Unang ma sai tapingkiri angka hasusaan na boi masa tu hita. Alana, on boi mambahen hita gabe mabiar jala marsak. Molo mabiar hita, olo do gabe tatadingkon Jahowa andorang so tahilala dope penganiayaan i. (Poda 12:25; 17:22) Biar ni roha, i ma sada cara na dipangke ‘musunta Sibolis’ laho mambahen hita gabe ndang setia tu Jahowa. (1 Ptr. 5:8, 9) Alani i sian saonari, ingkon lam tapatogu do parale-aleonta tu Jahowa. w19.07 2 ¶1-3

Las do roha ni angka apostel tingki marpungu nasida di dolok. Dung hehe Jesus, disuru do angka siseanna asa manjumpangi ibana di dolok i. (Mat. 28:16) Ra, on ma tingkina ‘dipatuduhon muse dirina tu lobi sian 500 halak dongan sahaporseaon na marpungu di sada inganan’. (1 Kor. 15:6) Boasa disuru Jesus angka siseanna ro tusi? Laho mangalehon sada parenta tu nasida. Didok, “Alani i, laho ma hamu, bahen ma saluhut halak sian nasa bangso gabe siseanku.” (Mat. 28:18-20) Angka sisean na manangihon hata ni Jesus i ma na gabe bagian sian huria Kristen di abad na parjolo. Ulaon ni nasida na rumingkot, i ma mambahen angka halak gabe sisean ni Jesus. Saonari, marjuta Sitindangi di liat portibi on mangulahon na sarupa. w19.07 14 ¶1-2

Adong sahalak pengawas wilayah di Norwegia na mandok, molo halak disi ndang lomo rohana mangkatai taringot Debata. Alai jotjot do nasida mangkatai taringot angka na masa di portibi on. Dung marsitandaan, didok ibana do, “Menurut hamu, boha do annon ngolunta di ari na naeng ro? Boi do gabe lam denggan ngolunta dibahen angka pamarenta, ilmuwan, manang na asing?” Dung ditangihon ibana pandapotna, dijahahon manang dienet ma ayat taringot pangkirimon di ari na naeng ro. Adong do na las rohana mambege janji na sian Bibel taringot hangoluan salelenglelengna tu angka halak na tigor. (Ps. 37:29) Ingkon marragam do caranta mangkatai tu nasida. Aha na dihalomohon sasahalak ndang sarupa tu na dihalomohon halak na asing. Adong do na lomo rohana mangkatai taringot Debata manang taringot Bibel, alai na asing ndang olo pintor mangkatai taringot i. Alani i, ingkon marsitutu do hita mangkatai tu marragam halak. (Rom 1:14-16) Jahowa do na patubuhon hasintongan di roha ni sasahalak.​—1 Kor. 3:6, 7. w19.07 22-23 ¶10-11

Holong ni Jahowa na mansai balga manjujui hita laho mangkaholongi angka dongan. (1 Joh. 4:20, 21) Rap manomba Jahowa do hita dohot angka dongan jala lomo rohanta maniru Ibana. Tatiru do contoh sian Jesus na patuduhon holongna na mansai balga marhite mangalehon dirina gabe tobusan tu hita. I do alana, olo do ra didok rohanta mura do patuduhon holong tu angka dongan. Alai sipata, maol do mangulahon i. Si Euodia dohot si Sintike, i ma donganta borua na ringgas mangurupi si Paulus. Alai, hea do nasida ndang sapandapot jala gabe ndang mardongan. Tingki mambahen surat tu huria, tangkas do dipaboa si Paulus goar ni si Euodia dohot si Sintike. Dilehon ibana do sipaingot “asa marsada ni roha nasida marhobas tu Tuhan”. (Plp. 4:2, 3) Didok roha ni si Paulus, porlu do dilehon ibana sipaingot tu sude huria. Didok ibana, “Ulahon hamu ma sude so pola marungut-ungut dohot mangalo-alo.”​—Plp. 2:14. w19.08 9 ¶6-7

Tapujihon do godang huria dohot angka dongan na mangurupi donganta na asing asa tongtong dohot tu dinas sepenuh waktu. Dijujui nasida do asa tongtong donganta i di penugasanna, marhite mangalehon na dihaporluhon manang mangurus keluarga ni nasida. Molo adong donganta na mandapot tugas na baru tu huriamuna, unang ma didok rohamu na adong hasalaan na dibahen nasida. Alai urupi ma nasida asa boi marlas ni roha di inganan na baru. Jangkon ma nasida. Ra, ala marsahit ndang godang be na boi diulahon nasida. Nang pe songon i, tongtong ma puji angka naung diulahon nasida. Marale-ale ma dohot nasida. Marsiajar ma sian parbinotoan, pelatihan, dohot pengalaman ni nasida. Ra, angka dongan na mandapot tugas na baru porlu do diurupi mangalului jabu, kendaraan, parkarejoan, dohot na asing. w19.08 23-24 ¶12-13

Dipangke Gog do angka pasukan militerna laho menyerang naposo ni Debata. (2 Kron. 32:8) Pos do rohanta tu Jahowa nang pe hira na so margogo hita diida nasida. Dirimpu Gog jago do Babel na Balga i, hape ndang boi debatana i paluahon nasida sian “binatang buas” dohot sian “sampulu tanduk”! (Pgk. 17:16) Alani i, dirimpu Gog mura do laho mangaripashon naposo ni Debata. Jala diserang ma nasida “songon ombun laho manutup tano”. Alai botoon ni Gog ma, ndang boi nasida malua. Dos songon si Firaun tingki di Laut Rara, botoon ni Gog ma, Jahowa do na dialo nasida. (2 Mus. 14:1-4; Hes. 38:3, 4, 18, 21-23) Paluaon ni Jesus dohot angka tentarana na di surgo ma naposo ni Debata. Alai ripashonon ni nasida ma angka pamarenta dohot pasukan militerna. (Pgk. 19:11, 14, 15) Aha do na laho masa tu Sibolis na margabus tu pamarenta na mambahen nasida gabe menyerang naposo ni Debata di Armagedon? Sampathonon ni Jesus ma Sibolis dohot angka suru-suruanna tu lombang na mansai bagas. Jala dirante ma nasida saleleng saribu taon.​—Pgk. 20:1-3. w19.09 11-12 ¶14-15

Tontu mangkirim do hita tu sude janji ni Jahowa. Tingki ndang saut dope aha na tahirim, boi do i mambahen hita gabe ndang ringgas. Jala boi do i mambahen hita gabe marmetmet ni roha. (Poda 13:12) On ma na masa tu angka donganta na miniahan di taon 1914. Tingki i, dirimpu nasida di taon i do nasida laho mangolu di surgo. Alai tingki ndang saut dope na dihirim angka donganta i, aha do na diulahon nasida? Dang gabe menyerah nasida. Alana tujuan ni nasida, i ma mangulahon lomo ni roha ni Jahowa, ndang ala na naeng tu surgo. Tontu, hirim do rohamuna tingki dipabadia Jahowa goarna, dipatudu do na sintong Ibana mamarenta, jala dipasaut Ibana do angka janjina. Pos ma rohamuna, laho saut do i di tingki naung ditontuhon Jahowa. Alani i paima ro tingkina, tongtong ma hita setia manomba Jahowa. Nang pe ndang saut dope aha na tahirim, unang ma i mambahen hita marmetmet ni roha. w19.08 4-5 ¶9-10

Sungkun ma dirimuna: ‘Ditanda do ahu sahalak na lambok jala na marserep ni roha? Olo do ahu mangulahon ulaon na hurang sangap di halak na asing? Burju do ahu maradophon halak na asing?’ Dibahen Jesus do las roha ni angka halak na rap saulaon dohot ibana, jala las do rohana mangalatik nasida. (Luk. 10:1, 19-21) Alani i, ndang mabiar angka siseanna manungkun tu ibana. Jala olo do Jesus manangihon pandapot ni nasida. (Mat. 16:13-16) Songon suan-suanan na tubu di tano na denggan, diparsiajari angka sisean ni Jesus do aha na diajarhon ibana jala marparbue do nasida marhite godang ulaon na denggan. Adong do tanggung jawabmuna? Molo songon i, sungkun ma dirimuna: ‘Songon dia do ahu maradophon na asing tingki di parkarejoan manang tingki di jabu? Las do roha ni nasida rap dohot ahu? Mabiar do nasida laho manungkun tu ahu? Jala lomo do rohangku manangihon pandapot ni nasida?’ Unang ma songon halak Parise hita. Muruk do nasida molo adong halak na so satolop tu na diajarhon nasida, jala kejam do nasida tu halak na mangalehon pandapot na so dihalomohon roha ni nasida.​—Mrk. 3:1-6; Joh. 9:29-34. w19.09 20 ¶1; 23 ¶9-11

Sipata, tingki laho padamehon piga-piga negara, dibahen angka pamarenta do boa-boa na sarupa. Alai, imbar do i dohot boa-boa na mandok “dame do jala ndang adong be sihabiaran!” na dipaboa di Bibel. Boasa? Alana tingki masa i, ra dirimpu angka halak nunga marhasil pamarenta mambahen dame portibi on. Hape sasintongna, laho dimulai nama “hasusaan bolon”, dung i “tompu ma diripashon” nasida. (Mat. 24:21) Ndang taboto aha do na mambahen angka pamarenta mandok boa-boa i manang songon dia i dipasahat. Ra, olo do piga-piga hali i dipasahat manang holan sahali. Alai songon dia pe carana i dipasahat, taboto do: Ndang boi angka pamarenta mambahen dame portibi on. Alani i, unang ma olo hita dioto-otoi nasida. Gariada ingkon jaga ma hita. Alana, i do tandana laho dimulai nama “ari ni Jahowa”!​—1 Tes. 5:2. w19.10 8-9 ¶3-4

Laho dipaujung do pamarentaon ni portibi on di porang Armagedon. Alai ndang porlu hita mabiar. Boasa? Ala Jahowa do na marporang. (Poda 1:33; Hes. 38:18-20; Sak. 14:3) Dung dilehon Jahowa parenta tu Jesus, laho ma ibana manguluhon tentarana na di surgo, i ma angka na miniahan naung dipahehe tu surgo dohot angka suru-suruan. Marporang ma nasida mangalo Sibolis, suru-suruanna na jahat, dohot angka halak na mangalo Debata. (Pgk. 6:2; 17:14) Nunga didok Jahowa, “Nasa sinjata na jinadihon mangalo ho, ndang manjadi.” (Jes. 54:17) “Punguan bolon” i ma angka naposo ni Jahowa na setia laho “malua sian hasusaan bolon”. Jala tongtong ma nasida manomba Jahowa. (Pgk 7:9, 13-17) Godang do bukti na dipaboa di Bibel na boi paposhon rohanta taringot ari na naeng ro! Taboto do, “dijaga Jahowa do angka na porsea”. (Ps. 31:24) Marlas ni roha do sude na mangkaholongi jala mamuji Jahowa ala nunga dipabadia goar ni Debata.​—Hes. 38:23. w19.10 18-19 ¶17-18

Hita mangolu di ujung ni ari parpudi. Alani i, ra godang do sitaonon na taadopi. (2 Tim. 3:1) Umpamana, dung sae kampanye pemilu di sada negara di Afrika barat, gaor jala marbadai ma angka halak disi. Saleleng onom bulan, bahaya do molo kaluar angka dongan sian jabuna ala marbadai do angka halak di humaliang ni nasida. Di tingki sisongon i, aha do na mangurupi nasida? Laho ma piga-piga donganta tu jabu ni angka dongan na tading di luat na so berbahaya. Sahalak donganta mandok, “Tingki sisongon i, las do rohangku ala boi rap tading dohot angka dongan. Gabe boi ma hami masipatoguan.” Tingki ro “hasusaan bolon”, boi do tongtong las rohanta ala adong dongan na mangkaholongi hita. (Pgk. 7:14) Alani i, ringkot do tapatogu sian saonari parale-aleonta dohot angka dongan. (1 Ptr. 4:7, 8) Boasa? Alana, marsitutu do angka musu mambahen gabus asa unang marsada jala asa unang marpos ni roha be hita tu angka dongan. Alai, ndang na laho marhasil nasida. Ndang boi dibahen nasida hita gabe ndang mangkaholongi angka donganta. w19.11 2 ¶1-2; 7 ¶19

Sibolis, i ma “ama ni gabus”. Marhite angka na nirajaanna, dipararat ibana do gabus taringot Jahowa dohot angka donganta. (Joh. 8:44) Umpamana, dibahen angka na murtad do gabus taringot organisasi ni Jahowa. Ra, dipaboa do gabus i di internet, di TV, manang di koran. Angka gabus i, i ma “api na sian panah ni Sibolis”. Aha do na ingkon taulahon molo adong halak na paboahon taringot gabus i tu hita? Unang ma tangihon i! Boasa? Alana pos do rohanta tu Jahowa dohot tu angka donganta. Gariada, ingkon tapasiding do angka halak na murtad. Unang ma olo hita mangkata-hatai dohot nasida nang pe lomo rohanta naeng mamboto taringot barita na dibahen nasida i. Alana, boi do mambahen gale haporseaonta. Dipasiding hamu do angka halak na murtad jala ndang manangihon gabus na dipaboa nasida? Denggan do i. Alai, ingkon tongtong do hamu jaga. Alana, adong do sinjata ni Sibolis na asing na boi mangela-ela hita. w19.11 15 ¶8; 16 ¶11

Tingki mambahen sada keputusan, pingkirhon ma boasa dibahen hamu keputusan i. Lomo roha ni Jahowa asa jujur hita di saluhutna. Alani i, tingki mambahen keputusan, ingkon jujur do hita tu dirinta sandiri dohot tu halak na asing taringot boasa tabahen keputusan i. Molo ndang jujur hita, gabe maol do taulahon keputusan na tabahen i. Umpamana, sahalak donganta baoa na poso mambahen keputusan gabe perintis biasa. Alai dung piga-piga leleng, maol do di ibana manggohi jam dinas, jala ndang marlas ni roha be ibana. Ujungna, ndang merintis be ibana. Ra, didok rohana laho mambahen las roha ni Jahowa do ibana umbahen merintis. Hape sasintongna, naeng mambahen las roha ni natua-tuana manang halak na asing do. Pingkirhon ma contoh na asing. Sahalak parsiajar Bibel mambahen keputusan asa unang marisap. Saleleng dua minggu, marsitutu do ibana asa unang marisap alai sipata marisap do muse ibana. Nang pe songon i, ujungna marhasil do ibana asa so marisap! Ala holongna tu Jahowa jala naeng mambahen las rohana, gabe boi ma parsiajar Bibel i pasidingkon hasomalanna i.​—Kol. 1:10; 3:23. w19.11 27 ¶9; 29 ¶10

Pos do roha ni Apostel Paulus boi do ibana martahan ro di ujung jala mandapot upa sian Jahowa. Ala halak Kristen na miniahan do ibana, mangkirim do ibana asa “mandapot upa, i ma panjouon ni Debata”. Alai, ingkon “marlojong” do si Paulus asa boi mandapot upa i. (Plp. 3:14) Dipaboa si Paulus do tudosan on laho mangurupi halak Pilippi asa tongtong mangingot upa ni nasida. Dipaingot si Paulus do huria Pilippi. Didok ibana, naeng gabe warga negara di surgo do nasida. (Plp. 3:20) Boasa ingkon diingot nasida i? Di tingki i, godang do halak naeng gabe warga negara Rom ala godang do laba na boi didapot nasida. Alai, dao do dumenggan kewarganegaraan ni halak Kristen na miniahan, jala gumodang do laba na dapot ni nasida. Alana dumenggan do pamarentaon di surgo molo dibandingkon tu pamarentaon ni Rom! Saonari pe, gabe sitiruon na denggan do halak Kristen na miniahan, ala marsitutu do nasida asa mandapot upa laho mangolu di surgo. w19.08 6 ¶14-15

Dumenggan do haluaon on sian haluaon na didapot halak Israel saleleng taon Yobel! (3 Mus. 25:8-12) Umpamana, sahalak baoa na dipalua di taon Yobel olo do ra gabe hatoban muse. Jala ujungna mate do ibana. Tingki Pentakosta 33 M, marhite tondi parbadia dimiahi Jahowa ma angka apostel dohot angka sisean ni Jesus na setia. Gabe anak ni Debata ma nasida, jala di ari na naeng ro laho dipahehe nasida tu surgo laho mamarenta dohot Jesus. (Rom 8:2, 15-17) Nasida ma na parjolo sahali mandapot laba sian haluaon na dipaboa Jesus tingki di sinagoga di Nasaret. (Luk. 4:16-19, 21) Dipalua do nasida sian ajaran na so sintong dohot hasomalan na maralo tu Debata na diajarhon angka pamimpin agama Jahudi. Jala dipalua Debata ma nasida sian dosa dohot hamatean. Haluaon on dimulai tingki parjolo sahali sisean ni Jesus dimiahi Debata taon 33 M. Jala dipaujung ma i di ujung ni Pamarentaon Saribu Taon. w19.12 11 ¶11-12

Angka natua-tua, urupi ma ianakhonmuna asa mamillit dongan na burju. Ingkon diboto natua-tua do ise dongan ni ianakhonna jala aha na diulahon nasida. Dohot ma i angka dongan ni nasida na jotjot mangkatai marhite jejaring sosial dohot di HP ni nasida. Balga do pengaruh ni dongan i tu na dipingkirhon dohot na diulahon ianakhonmuna. Godang natua-tua mambahen cara asa boi ianakhonna marsaor dohot angka dongan na togu parale-aleonna tu Debata. Umpamana, si N’Déni dohot si Bomine na tading di Pantai Gading, jotjot manogihon angka pengawas wilayah asa manginap di jabu ni nasida. Didok si N’Déni, “Marlaba situtu do on tu anaknami. Gabe perintis ma ibana, jala saonari nunga gabe pengawas wilayah pengganti.” Lam hatop dilatik hamu ianakhonmuna, lam denggan do i. (Poda 22:6) Pingkirhon ma taringot si Timoteus. Omak ni si Timoteus, i ma si Eunike dohot ompungna, si Lois nunga mangalatik ibana “sian na metmet”.​—2 Tim. 1:5; 3:15. w19.12 25 ¶14; 26 ¶16-17

Marsitutu ma hita gabe dongan na boi dihaporseai. Umpamana, unang ma holan marjanji lao mangurupi akka dongan. Ikkon adong do na taulahon lao mangurupi nasida. (Mat. 5:37; Luk. 16:10) Tikki diboto akka dongan na rade hita mangurupi, gabe togu do roha ni nasida. Sahalak dongatta borua mandok, “Gabe dame do pakkilalaanmuna ala mamboto ro do akka dongan lao mangurupi di tikki na dijanjihon nasida.” Jotjot do halak na mangadopi hasusaan manang na marmetmet ni roha mangalului dongan na boi dihaporseai lao patoguhon roha ni nasida. Alai, asa boi gabe dongan na boi dihaporseai, ikkon toktong ma tapatudu hasabaron. Songon si Zhanna na ditadikkon suamina, dipatogu do rohana dung paboahon pakkilalaanna tu donganna. Didok ibana ma, “Sabar do nasida manangihon au nang pe marulak-ulak hata na hudok tu nasida.” Hamu pe, boi do gabe dongan na boi dihaporseai molo sabar manangihon. w20.01 10-11 ¶9-11

Di Bibel, godang do contoh akka naposo ni Debata na setia na mandapot tondi parbadia, alai dang marpakkirimon tu surgo. Umpamana, si Daud. Ditogu-togu tondi parbadia do ibana. (1 Sam. 16:13) Diurupi tondi parbadia do ibana mangantusi pikkiran ni Jahowa jala manurat piga-piga bagian ni Bibel. (Mrk. 12:36) Alai didok apostel Petrus do, “ndang nangkok si Daud tu banua ginjang”. (Ul. 2:34) Si Johannes Pandidi pe “digohi tondi parbadia” do. (Luk. 1:13-16) Didok Jesus, dang adong na umbalga sian si Johannes Pandidi. Alai dang dohot ibana rap dohot Jesus lao mamaretta di surgo. (Mat. 11:10, 11) Dipakke Jahowa do tondi parbadiana lao mangurupi nasida mangulahon akka ulaon na rikkot. Alai dang dipakke Ibana tondi parbadiana lao mamillit nasida asa mangolu tu surgo. Na hurang do haporseaon ni nasida? Dang songon i. Alai, lao paheheon ni Jahowa do nasida asa mangolu di paradeiso di tano on.​—Joh. 5:28, 29; Ul. 24:15. w20.01 25 ¶15

Digokkon Jahowa do hita gabe bagian sian keluargana. Akka na gabe bagian sian keluarga i, i ma akka halak na mangalehon dirina tu Debata jala na patuduhon haporseaon tu tobusan ni Jesus. Las do rohatta gabe bagian sian keluarga i. Adong do tujuan ni ngolutta, jala las do rohatta ala marpakkirimon lao mangolu salelengna di surgo manang di Paradeiso di tano on. Alani holongna, dibahen Jahowa pengorbanan na massai balga asa boi hita gabe bagian sian keluargana. (Joh. 3:16) Jala, arga do hita dituhor Ibana. (1 Kor. 6:20) Marhite tobusan, gabe boi ma hita marale-ale tu Ibana. Jala sada hasangapon do di hita boi manjou Ama tu Debata Natumimbul i jala Jahowa i ma Ama na massai burju tu hita. Songon sahalak panurat ni Bibel, ra sukkun-sukkun do rohatta, “Aha ma sibahenonku tu Jahowa, balos ni na denggan na binahenNa tu ahu?” (Ps. 116:12, Bibel siganup ari) Tutu, dang boi hita mambalos haburjuon ni Jahowa. Alai, taronjar do rohatta lao makkaholongi Ibana. w20.02 8 ¶1-3