Juni

Godang do hasusaan na diadopi omak ni panurirang Samuel, i ma si Hanna. Saleleng martaon-taon, dang boi ibana marianakkon. (1 Sam. 1:2) Didok halak Israel najolo, molo dang boi sahalak borua marianakkon na so dipasu-pasu Debata do ibana. Gabe maila do si Hanna alani i. (1 Mus. 30:1, 2) Jala na mambahen lam susa ibana, adong imbangna i ma si Pininna jala boi ibana marianakkon. Dipalea ibana do si Hanna. Massai lungun do roha ni si Hanna dibahen i. Alani jut ni rohana, “gabe tumatangis ibana jala ndang olo mangan”. On mambahen “marsak situtu rohana”. (1 Sam. 1:7, 10) Songon dia si Hanna boi dipatogu? Martangiang ma si Hanna tu Jahowa jala dipaboa ma sude arsak ni rohana. Dung sae martangiang, dipatorang ibana ma situasina tu Sintua ni Malim, i ma si Eli. Didok ma tu si Hanna, ‘Antong molo na songon i do, sai horas ma ho, sai anggiat ma dilehon Debata ni Israel na pinangidom i sian Ibana.’ Aha ma hasilna? Dukkon i, “laho ma [si Hanna], mangan ma ibana jala ndang marsak be ibana.” (1 Sam. 1:17, 18, Bibel siganup ari) Tangiang, mangurupi si Hanna asa toktong dame. w20.02 21 ¶4-5

Nunga lam jonok ajal ni portibi on. Alai, holan angka na “tama mandapot hangoluan saleleng ni lelengna” do na boi malua. (Ul. 13:48) Alani i, tontu lomo do rohanta marbarita tu keluarganta asa boi rap manomba Jahowa. Ama na parholong do Jahowa i, jala “ndang lomo rohana mago manang ise pe, alai naeng ma sude jolma marhamubaon”. (2 Ptr. 3:9) Taingot ma, adong do cara na denggan dohot cara na sala tingki marbarita. Ra, lambok do hita mangkatai tingki marbarita tu halak na so tatanda. Alai, olo do ra ndang songon i tabahen tingki marbarita tu keluarganta. Molo taingot muse tingki parjolo sahali hita marbarita tu keluarga, godang do sian hita na manolsoli ala ndang denggan caranta marbarita tu nasida tingki  i. Alani i, lomo do rohanta asa boi denggan caranta marbarita di tingki na asing. Denggan do molo taingot poda ni Apostel Paulus na dipaboa di ayat sadari on tingki marbarita tu keluarganta. Molo ndang denggan caranta, olo do gabe jut roha ni nasida jala ndang boi nasida taurupi. w19.08 14-15 ¶3-5

Boha do pakkilalaanmuna tikki mamboto hasittongan taringot Jesus? Nungnga diboto hamu Jesus i ma toppaan ni Jahowa na umsangap sian sude nasa na adong. Molo tapatudu sian parniulaotta na porsea do hita tu tobusan ni Jesus i, salpuhonon ni Debata ma dosatta jala gabe marale-ale ma hita tu Ibana. Ujungna, boi ma hita mangolu saleleng ni lelengna. (Joh. 3:16) Jesus do na gabe Sintua ni Malim di hita. Lomo do rohana mangurupi hita asa mandapot laba sian tobusan jala marale-ale tu Debata. (Heb. 4:15; 7:24, 25) Jesus do Raja di Harajaon ni Debata. Ibana do na dipakke Jahowa lao pabadiahon goar ni Debata, lao mangaripashon akka parjahat jala mangalehon gok pasu-pasu tu akka jolma di Paradeiso. (Mat. 6:9, 10; Pgk. 11:15) Jesus do na gabe sitiruon di hita. Dipakke ibana do saluhut ngoluna lao mangulahon lomo ni roha ni Debata, jala i ma na ikkon taihutton. (Joh. 4:34) Tikki dijalo hamu hasittongan sian Bibel taringot Jesus, gabe holong ma rohamuna tu ibana. Holong i ma na mangonjar rohamu asa mamakke ngolumuna lao mangulahon lomo ni roha ni Debata, songon naung diulahon Jesus. w20.03 10 ¶12-13

Andorang so mate Jesus jotjot do ibana martangiang. Umpamana, tingki dipatandahon Jesus ari parningotan tu hamamatena, ditangiangkon ibana do roti dohot anggur na diparade tingki i. (1 Kor. 11:23-25) Dung sae Jesus dohot angka siseanna mangarayahon Paska, martangiang do nasida. (Joh. 17:1-26) Dung sahat nasida di Dolok Jetun di borngin i, marulak-ulak do Jesus martangiang. (Mat. 26:36-39, 42, 44) Tingki naeng mate pe Jesus di hau partinaonan, martangiang do ibana. (Luk. 23:46) Martangiang do Jesus tu Jahowa taringot sude na masa di ari parpudi andorang so mate ibana. Boi do Jesus martahan mangadopi angka sitaonon ala mangasahon Jahowa marhite tangiang. Alai tingki i, ndang tongtong martangiang angka siseanna. Ujungna, ndang boi nasida martahan tingki adong sitaonon. (Mat. 26:40, 41, 43, 45, 56) Tingki mangadopi sitaonon, hita pe boi do tongtong setia molo maniru Jesus jala “sai martangiang”. w19.04 8-9 ¶4-5

Sogo do roha ni Jahowa tu spiritisme. Didok Ibana do tu halak Israel, “Na so tupa adong jumpang di tongatongamu sahalak na pabolushon anakna manang boruna sian api, manang halak pangarunding manang sijujur ari, manang sitabasi ulok manang parsibalik mata. Manang sibahen panutupi, manang partondung, manang na manungkun begu ni na mate. Ai marbiasbias situtu do roha ni Jahowa mida saluhut halak, angka na mangulahon sisongon i, jala ala ni biasbias angka sisongon i pabalion ni Jahowa.” (5 Mus. 18:10-12) Tutu, ndang Patik ni si Musa be na diihuthon halak Kristen. Alai taboto do, ndang muba pangkilalaan ni Jahowa tu spiritisme. Dipasingot Jahowa do hita asa pasidingkon spiritisme. Alana diboto Ibana, on do sada cara ni Sibolis laho mambahen susa angka jolma. Marhite spiritisme, digabusi Sibolis do angka jolma. Didok ibana mangolu dope tondi ni halak naung mate. (Pjm. 9:5) Dipangke Sibolis do spiritisme laho mambahen angka halak mabiar jala mandao sian Jahowa. Tujuan ni Sibolis, i ma mambahen angka halak na mangulahon spiritisme i porsea tu suru-suruan na jahat ndang tu Jahowa. w19.04 21 ¶5-6

Sada dosa na balga do pelecehan seksual tu dakdanak. Halak na mangulahon pelecehan i, mambahen susa jala mandele dakdanak na gabe korban i. Nunga dioto-otoi ibana dakdanak i, jala on mambahen dakdanak i gabe mabiar. Alani i, sude dakdanak ingkon dijaga do sian ulaon na jahat i. Jala angka na hea gabe korban pelecehan seksual, ingkon diapuli jala diurupi. (1 Tes. 5:14) Tingki sasahalak na di huria mangulahon pelecehan seksual, ibana nunga manegai jala mambahen roa goar ni huria. (Mat. 5:16; 1 Ptr. 2:12) Alani i, ingkon tapasiding do angka halak di huria na mambahen roa goar ni Debata, dohot na sai mangulahon na jahat jala ndang olo marhamubaon. Molo sasahalak di huria mangulahon pelecehan seksual, na mardosa do ibana tu pamarenta. (Bandingkon Ulaon ni Apostel 25:8.) Ndang boi angka sintua na mambahen hukuman tu ibana, jala ndang boi diambati nasida pamarenta laho mambahen hukuman tu ibana. w19.05 9 ¶4-7

Ala ditogu-togu Jahowa, boi do hita mangadopi sude hasusaan. (Jes. 30:20, 21) Marhite Bibel diajari do hita asa boi “rade mangulahon angka ulaon na denggan”. (2 Tim. 3:17) Molo taihuthon ajaran ni Bibel, gabe umbisuk do hita sian angka halak na mangihuthon “habisuhon ni portibi on”. (Ps. 119:97-100) Ala adong di hita roha na mangkaringkothon diri sandiri, olo do gabe mura hita mangihuthon bisuk ni portibi on. Ra tahilala gabe maol do pasidingkon pingkiran dohot parniulaon ni halak na mangihuthon bisuk ni portibi on. Alani i, Bibel mandok, “Manat ma hamu tu angka halak na laho mamparhatoban hamu marhite ajaran ni jolma dohot angka hata na so marguna, i ma na sian adat ni jolma.” (Kol. 2:8) Songon na dipaboa Bibel taringot ari parpudi, gabe “holongan tu giot-giot ni rohana” do angka halak. (2 Tim. 3:4) Ujungna, gabe godang do keluarga na sursar, adong do na gabe mandele jala godang na jotjot mangida pornografi. Asing ni i, gabe godang ma sahit alani hubungan seks, songon AIDS. On patuduhon haotoon do bisuk ni portibi on.​—2 Ptr. 2:19. w19.05 21 ¶1-2; 22 ¶4-5

Lomo roha ni Sibolis asa porsea halak Israel tu hasomalan na diulahon angka halak na so sisomba Jahowa, na adong di humaliang ni nasida. Asa ro udan, somal do angka halak na so sisomba Jahowa mambahen pelean tu debata ni nasida. Piga-piga halak Israel na so togu parale-aleonna tu Jahowa marpingkir, boi do nasida tongtong mangolu molo dohot nasida manomba Baal. Sibolis pe manjorat halak Israel, marhite giot-giot ni daging. Angka halak na so sisomba Jahowa mangulahon seks na so patut tingki manomba debata ni nasida. Jala adong do disi angka baoa dohot borua na gabe pelacur. Didok roha ni nasida, ndang sala mangulahon seks na so patut. (5 Mus. 23:18, 19; 1 Raj. 14:24) Porsea do nasida molo diulahon i, gabe dipasu-pasu debata ni nasida do sude angka suan-suanan ni nasida. Godang do halak Israel gabe dohot mangulahon seks na so patut. Jala dohot do nasida manomba debata na asing. Sasintongna, nunga dioto-otoi Sibolis nasida. w19.06 2 ¶3; 4 ¶7-8

Godang do angka donganta na dohot tu dinas sepenuh waktu manang na karejo di Betel na ingkon manadingkon penugasan ni nasida. Tontu ndang mura di nasida laho manadingkon penugasan na dihalomohon roha ni nasida. Molo i do tong na diadopi hamu, aha do na boi mangurupi? Tongtong ma patogu parale-aleonmuna tu Jahowa, jaha ma Bibel ganup ari jala rimangi ma na dijaha hamu i. Jala ringgas ma marbarita di huriamuna na baru. Sai diingot Jahowa do naposona na tongtong setia marhobas tu Ibana, nang pe ndang sarupa be songon najolo. Jumolohon ma angka na rumingkot. Unang ma paloas holso ni roha mambahen hamu gabe ndang manomba Jahowa. (Mat. 13:22) Ra, adong do dongan, keluarga, manang halak na so manomba Jahowa na naeng mangurupi hamu. Didok nasida, ingkon dipapungu hamu do godang hepeng asa lam denggan ngolumuna. Alai unang ma tangihon nasida. (1 Joh. 2:15-17) Pos ma rohanta tu Jahowa na marjanji mangalehon na tahaporluhon di tingki na pas. Diurupi Ibana do hita asa tongtong togu haporseaonta jala ndang mabiar. Lehononna do angka na tahaporluhon ganup ari.​—Heb. 4:16; 13:5, 6. w19.08 20 ¶4; 21-22 ¶7-8

Susa do dihilala hamu saonari? Tontu tarapul do rohanta dung mamboto songon dia Jahowa mangantusi pangkilalaanta tingki mangadopi hasusaan. Jala diboto Ibana do aha na boi dohot na so boi taulahon. Diantusi Jahowa do pingkiran dohot rohanta. (Ps. 103:14; 139:3, 4) Molo marhaposan tu Jahowa, boi ma hita martahan mangadopi angka hasusaan. Molo sai marsak hamu, boi do i mambahen hamu mandele jala mambahen metmet rohamuna. Alai molo masa sisongon i, ingot ma urupan ni Jahowa do hamu. Songon dia carana? Ditogihon Ibana do hamu asa paboahon sude na di rohamuna. Jala alusanna do tangiangmuna molo dipangido hamu asa diurupi. (Ps. 5:4; 1 Ptr. 5:7) Alani i, tongtong ma martangiang tu Jahowa laho paboahon sude arsak ni rohamuna. Tontu, ndang pintor mangkatai Jahowa tu hamu, alai dipatogu Jahowa do hamu marhite Bibel dohot organisasina. Angka contoh na di Bibel, boi patoguhon jala mangapuli rohamuna. Jala adong do angka dongan sahaporseaon na boi patoguhon hamu.​—Rom 15:4; Heb. 10:24, 25. w19.06 16 ¶7-8

Tingki mangadopi penganiayaan, martangiang ma tu Jahowa. “Usehon ma roham songon aek” jala paboa ma sude na mambahen hamu marsak jala mandele. (And. 2:19) Molo lam ringgas hamu martangiang, gabe lam togu ma parale-aleonmuna tu Jahowa. (Rom 8:38, 39) Marpos ni roha ma tu Harajaon ni Debata. (4 Mus. 23:19) Molo ndang togu haporseaonmuna tu janji ni Debata, gabe mura ma Sibolis dohot angka na mangihuthon ibana mambahen hamu mabiar. (Poda 24:10; Heb. 2:15) Sian saonari, riset hamu ma taringot janji ni Debata di Harajaonna jala boasa boi pos rohanta na laho saut do janjina i. Songon dia on boi mangurupi hita? Parrohahon ma pengalaman ni si Stanley Jones, na hea dipenjara saleleng pitu taon alani haporseaonna. Aha do na mangurupi ibana asa martahan? Didok ibana, “Gabe togu do haporseaonku ala huboto janji taringot Harajaon ni Debata. Pos do rohangku tusi. Alani i, ndang adong manang ise na boi mangambati ahu manomba Jahowa.” Molo togu haporseaonmuna tu janji ni Jahowa, ndang adong na boi mambahen hamu mabiar.​—Poda 3:25, 26. w19.07 2 ¶1; 3 ¶6-7

Boasa mambahen sisean ulaon na mansai ringkot? Alana holan sisean ni Jesus do na boi marale-ale dohot Debata. Asing ni i, sude na mangihuthon Jesus boi mangkilala ngolu na dumenggan saonari. Jala marpangkirimon laho mangolu salelengna di ari na naeng ro. (Joh. 14:6; 17:3) Alani i, dilehon Jesus do tanggung jawab na mansai ringkot tu hita. Alai ndang holan sahalakta na mangulahon i. Disurat si Paulus do taringot dirina dohot angka donganna. Didok, “Ai dongan saulaon ni Debata do hami.” (1 Kor. 3:9) Dilehon Jahowa dohot Jesus do hak istimewa tu jolma na so sempurna! Mansai las do rohanta tingki mangurupi halak gabe sisean. Laho mambahen sisean, ingkon talului do manang ise na lomo rohana mananda Debata. Molo marbarita hita tu sude halak, on patuduhon na Sitindangi Ni Jahowa do hita. Jala tingki taulahon parenta ni Jesus laho marbarita, on patuduhon na sisean ni Jesus do hita. w19.07 14-15 ¶3-5

Godang do halak lomo rohana mambege poda sian Bibel. Di New York, adong sahalak donganta borua na marbarita tu angka halak na marbahasa Mandarin. Didok ibana, “Hupatudu do na lomo rohangku mananda nasida jala hutangihon do nasida. Molo huboto sian negara na asing nasida, husungkun ma, ‘Las do rohamuna dison? Nunga dapot karejo hamu? Burju-burju do halak dison tu hamu?’” Sipata boi do on gabe cara na denggan laho paboahon taringot Bibel. Molo pas tingkina didok ibana do muse, “Menurutmu, aha do kuncina asa boi mardame dohot angka halak? Boi do hupatudu poda sian Bibel? Didok songon on, ‘Mula ni parsalisian suman do i tu tambok ni aek na marigat; padenggan ma i andorang so mapulha.’ Menurutmu, boi do poda on mangurupi hita asa mardame dohot na asing?” (Poda 17:14, Bibel siganup ari) Sian na tahatai, gabe taboto ma ise na lomo rohana tajumpangi muse. w19.07 23 ¶13

Porlu do taantusi situasi ni donganta na baru pinda. Olo do ra marsahit nasida manang keluargana. Manang, lungun rohana ala marujung ngolu sisolhotna. Nang pe ndang dipaboa nasida, ra masihol do nasida tu angka dongan di huria nasida najolo. Alani i, porlu do tingki asa boi muse nasida marlas ni roha. Molo rap hamu marbarita jala gabe sitiruon na denggan, boi do hamu mangurupi nasida marlas ni roha. Sahalak donganta borua naung martaon-taon marhobas di negara na asing mandok, “Di penugasanku najolo, ganup ari do ahu manguluhon parsiajaran Bibel. Alai di inganan na baru on, manjahahon ayat sian Bibel manang patuduhon video pe maol do tingki marbarita. Alai, ditogihon angka dongan di huria do ahu tu kunjungan kembali dohot tu parsiajar Bibel ni nasida. Gabe denggan do pingkiranku taringot angka halak di inganan na baru on. Huparsiajari ma carana mamungka pangkataion. Sude on mambahen ahu marlas ni roha muse.” w19.08 22 ¶10; 24 ¶13-14

Songon si Euodia dohot si Sintike, sipata maol do patuduhon holong molo sai taingot hasalaan ni angka dongan. Sude do hita mambahen hasalaan ganup ari. Alai molo hasalaan ni angka dongan do na sai tapingkiri, gabe lam maol do hita patuduhon holong tu nasida. Umpamana, molo adong sahalak donganta baoa na lupa mangurupi hita paiashon Bale Harajaon, ra gabe jut do rohanta tu ibana. Molo taingot-ingot muse hasalaanna na asing, gabe lam jut ma rohanta jala lam moru ma holongta tu ibana. Molo adong parsoalanmuna dohot angka dongan di huria, ingot ma, diida Jahowa do sude hasalaanmuna dohot hasalaan ni nasida. Alai, tongtong do dihaholongi Jahowa hita. Alani i, ingkon tatiru do Jahowa jala taida ma angka na denggan sian angka donganta. Molo marsitutu hita patuduhon holong tu angka dongan, gabe lam marsada ma hita.​—Plp. 2:1, 2. w19.08 9-10 ¶7-8

Dihaholongi Jahowa do halak na serep roha, jala holan nasida do na boi marale-ale tu Ibana. Alai, “ditanda do sian na dao na ginjang roha”. Tontu, lomo do rohanta mambahen las roha ni Jahowa jala mangkilala holongna. Alani i, taparsiajari ma songon dia carana patuduhon serep ni roha. Serep ni roha, i ma parange na patuduhon ndang mangkaringkothon diri sandiri jala ndang marginjang ni roha. Bibel mandok, diharingkothon halak na serep roha do parale-aleonna tu Debata dohot tu angka dongan. Jala diboto halak na serep roha do, dumenggan do halak na asing sian ibana. (Plp. 2:3, 4) Boi do sasahalak songon na serep rohana idaon. Ra, ala parsipsip ibana manang parila. Manang, gabe pantun nasida idaon ala songon i do na diajarhon natua-tuana. Hape sasintongna, olo do ra ginjang rohana. Alai di sada tingki, tarida do aha na adong di bagasan rohana.​—Luk. 6:45. w19.09 2 ¶1, 3-4

“Barita na uli taringot tu Tuanta Jesus”, i ma sude hasintongan na diajarhon Jesus. Taoloi do barita na uli tingki taulahon i di ngolunta. Asing ni i, tajumolohon do Harajaon ni Debata, mangihuthon sude prinsip ni Bibel, jala mamaritahon Harajaon ni Debata. (Mat. 6:33; 24:14) Jala, taurupi do angka halak Kristen na miniahan na mangulahon tanggung jawab na ringkot di organisasi. (Mat. 25:31-40) Baloson ni nasida do haburjuon na hea dipatudu angka ‘biru-biru na asing’. (Joh. 10:16) Boasa didok songon i? Alana andorang so dimulai porang Armagedon, nunga diboan be sude 144.000 halak Kristen na miniahan tu surgo. Dohot do nasida gabe tentara na di surgo laho mangaripashon Gog jala manjaga “punguan bolon”. (Pgk. 2:26, 27; 7:9, 10) Mansai las do roha ni punguan bolon ala boi mangurupi angka halak Kristen na miniahan tingki di tano on dope nasida! w19.09 12-13 ¶16-18

Boasa tugas na dilehon Jesus boi patoguhon hita? Ala tadapot pengawas na dumenggan. Jahowa, i ma Pengawas Natumimbul, ndang songon bos na kasar na so mangargai parkarejona. Diargai Jahowa do sude na taulahon. (Heb. 6:10) Jala dilehon Ibana do gogo tu hita asa boi mangulahon tugas na dilehon Ibana. (2 Kor. 4:7; Gal. 6:5) Rajanta, i ma Jesus mangalehon sitiruon na dumenggan taringot songon dia maradophon na asing. (Joh. 13:15) Jala marsitutu do angka sintua na mamparmahani hita laho maniru Jesus, “parmahan na bolon”. (Heb. 13:20; 1 Ptr. 5:2) Diulahon nasida do nasa tolapna laho patoguhon, patuduhon haburjuon dohot habaranion tingki mangajari jala mangondingi hita. Tadapot do muse dongan saulaon na dumenggan. Ndang adong manang ise pe na songon angka donganta na mangkaholongi hita jala mangargai tugas na taulahon. Pingkirhon ma on: Rap saulaon do hita dohot angka dongan na marpangalaho na denggan, alai ndang ginjang roha ni nasida. Jala ndang didok roha ni nasida, na rumingkot do nasida sian dongan na asing. Ndang holan gabe dongan saulaon, alai gabe marale-ale do hita tu nasida. Mansai holong do roha ni nasida tu hita umbahen rade nasida mate humongkop hita! w19.09 20 ¶1; 23 ¶12-14

Sipasingot sian si Paulus on paboahon songon dia carana asa rade hita tingki ro “ari ni Jahowa”. (1 Tes. 5:1-6) Di ayat on, didok si Paulus do taringot “ari ni Jahowa”. Laho dimulai ma i tingki diserang “Babel na Balga”, manang sude agama palsu di portibi on. Jala dipaujung ma i di porang Armagedon. (Pgk. 16:14, 16; 17:5) Si Paulus mandok, “Unang ma tarpodom hita songon na asing.” Ingkon “sai dungo ma hita” jala tongtong jaga asa unang parsidohot tu politik ni portibi on. Alana molo dohot hita tusi, gabe bagian “sian portibi on” ma hita. (Joh. 15:19) Taboto do, holan Harajaon ni Debata do na boi parohon dame di portibi on. Ingkon taurupi do angka halak asa mamboto taringot angka na laho masa di portibi on songon na didok di Bibel. Tingki dimulai hasusaan bolon, ndang adong be tingki di nasida laho manomba Jahowa. I do alana, mansai ringkot do marbarita saonari! w19.10 8 ¶3; 9 ¶5-6

Dung sae gulungan i disurat, ingkon pos do roha ni si Jeremia tu si Baruk laho paboahon isi ni gulungan i tu angka halak. (Jer. 36:5, 6) Barani do si Baruk laho mangulahon tugas na berbahaya on. Tontu, bangga do si Jeremia tingki laho si Baruk tu alaman ni bagas joro jala manjahahon isi ni gulungan i tu angka halak. (Jer. 36:8-10) Nunga dibege angka pejabat ni Juda aha na diulahon si Baruk, alani i disuru ma asa gogo dijahahon si Baruk gulungan i tu nasida! (Jer. 36:14, 15) Naeng dipaboa nasida do tu Raja Joiakim aha na didok si Jeremia i. Dung mambege hata ni si Jeremia, muruk hian ma Raja Joiakim. Ditutung ibana ma gulungan i jala diparentahon ma asa dipenjarahon si Jeremia dohot si Baruk. Alai dibuat ibana do muse gulungan na baru, dung i dilehon tu si Baruk. Dipaboa si Jeremia do muse sipasingot sian Jahowa tu si Baruk. Dung i, disurat si Baruk ma muse “sude na tarsurat di buku na ginulung na parjolo” na ditutung si Joiakim, Raja ni Juda.​—Jer. 36:26-28, 32, Bibel siganup ari. w19.11 3-4 ¶4-6

Boi do Jahowa gabe aha pe laho pasauthon sangkapna. Umpamana, boi do Jahowa gabe Guru, Sipangapul, dohot Parbarita na uli. On holan piga-piga sian godang angka naung diulahon Ibana. (Jes. 48:17; 2 Kor. 7:6; Gal. 3:8) Alai jotjot do dipangke Ibana jolma laho pasauthon sangkapna. (Mat. 24:14; 28:19, 20; 2 Kor. 1:3, 4) Jala dilehon Jahowa do bisuk dohot gogo tu hita asa boi mangulahon lomo ni rohana. On ma lapatan ni goar ni Jahowa, songon na diantusi piga-piga pakar. Lomo do rohanta sude asa dipangke Jahowa hita laho mangulahon lomo ni rohana. Alai adong dope na ganggu rohana. Boasa? Ra dihilala, ndang sanggup nasida mangulahon i alani umur, situasi, manang ala ndang malo. Na asing mangkilala, nunga sae be na diulahon nasida saonari jala ndang porlu be mangulahon angka ulaon na asing. w19.10 20 ¶1-2

Holongan di hepeng boi mambahen gale haporseaonta jala gabe ndang talehon be na dumenggan tu Jahowa. Didok apostel Paulus, “Ndang adong sahalak tentara na mandalanhon tugasna huhut marsitutu mangalului hepeng. Ai naeng do bahenonna las roha ni komandanna.” (2 Tim. 2:4) Najolo, ndang diloas tentara ni Rom martiga-tiga. Dos do hita songon angka tentara na marlatik i. Na rumingkot di ngolunta, i ma mambahen las roha ni Komandanta, i ma Jahowa dohot Jesus. On ma na ummarga di ngolunta sian na adong di portibi on. Ingkon tongtong do talehon tingki dohot gogonta laho manomba Jahowa. Jala ingkon tajaga do perisainta, i ma haporseaon dohot perlengkapan porang na asing na sian Debata asa tongtong denggan. Ingkon sai jaga do hita! Boasa? Didok apostel Paulus, “manang ise na marsangkap naeng mamora” boi do gabe “lilu sian haporseaon”.​—1 Tim. 6:9, 10. w19.11 17 ¶12, 14-15

Andorang so ro “ari ni Jahowa”, adong ma boa-boa na mandok “dame do jala ndang adong be sihabiaran!” (1 Tes. 5:1-6) Di 1 Tessalonik 5:2, na didok “ari ni Jahowa” i ma “hasusaan bolon”. (Pgk. 7:14) Songon dia do hita mamboto na laho masa hasusaan bolon i? Adong do didok di Bibel taringot boa-boa na so hea masa. Jala i do na gabe tanda laho dimulai hasusaan bolon i. Laho adong boa-boa na mandok “dame do jala ndang adong be sihabiaran!” Dohot do angka pamimpin ni agama disi? Ra, dohot do nasida. Alai taboto ma molo boa-boa i gabus sian suru-suruan na jahat do. Bahaya do gabus i, alana dirimpu angka halak aman do nasida. Hape, laho ro nama hasusaan bolon na so hea masa di portibi on. Di tingki i, “tompu ma diripashon nasida. Tompu do i masa dos songon pangae ni sahalak ina na laho tubu-tubuan.” Aha ma na laho masa tu naposo ni Jahowa na setia? Ala ndang tangkas diboto nasida andigan dimulai hasusaan bolon i, ra tarsonggot do nasida tingki masa i. Alai nunga rade be nasida. w19.09 9 ¶7-8

Tingki mambahen sada keputusan, bahen ma rencana. Molo tangkas dibahen hamu rencana, gabe lam mura ma hamu mangulahon keputusan i. Umpamana, dibahen hamu keputusan asa taratur manjaha Bibel. Alai molo ndang dibahen hamu jadwal, ra gabe maol do hamu mangulahon i. Manang, dibahen angka sintua do keputusan asa taratur mambahen kunjungan penggembalaan. Alai dung piga-piga leleng, ndang diulahon nasida i. Asa boi marhasil, ingkon disungkun nasida do dirina: “Nga dibahen hami daftar ni angka dongan na boi mandapot laba sian kunjungannami? Nga ditontuhon hami tingki na pas laho manjumpangi nasida?” Jala ulahon ma sian nasa tolapmuna. Ndang boi sude tingki, hepeng dohot gogonta tapangke laho mangulahon sude na tahalomohon. Alani i, ingkon masuk akal do hamu, jala ulahon ma sian nasa tolapmuna. Sipata, olo do ra ingkon dipauba hamu keputusanmuna molo dihilala hamu ndang tolap hamu mangulahon i. w19.11 29 ¶11-12

Di Jesaya 65:21-23 dipaboa do tu hita songon dia ngolunta di tano on di ari na naeng ro. Mansai godang do ulaon di tingki i. Didok di Bibel, godang do ulaon ni naposo ni Debata na mambahen las roha. Jala di ujung ni Pamarentaon Saribu Taon, pos ma rohanta ndang “gabe hatoban ni dosa dohot hamatean sude tompaan i. Jala dapot ni nasida ma hasangapon na mansai balga songon na dilehon tu angka anak ni Debata”. (Rom 8:21) Dibahen Jahowa do pengaturan tu halak Israel taringot tingki laho karejo dohot tingki maradi. Jala laho dibahen Jahowa do pengaturan na sarupa tu naposona saleleng Pamarentaon Saribu Taon. Disi, godang ma tingkinta laho manomba Debata. Jala i do na mambahen hita marlas ni roha saonari dohot di tano na imbaru. Tontu, marlas ni roha ma sude naposo ni Jahowa na setia saleleng Pamarentaon Saribu Taon. Alana, mansai godang do ulaon na parohon las ni roha jala sude hita manomba Debata. w19.12 13 ¶15, 17-18

Hata “mangajarhon” boi do lapatanna “marulak-ulak mangajari dohot paingothon”. Laho mangulahon i, ingkon dilehon angka natua-tua do godang tingki tu ianakhonna. Sipata, olo do gabe metmet roha ni natua-tua ala marulak-ulak paingothon ianakhon ni nasida. Alai, on ma sada cara laho mangurupi ianakhon ni nasida asa mangantusi Hata ni Debata jala mangulahon i. Ingkon tangkas do ditanda hamu ianakhonmuna. Di Psalmen 127, dipatudos do ianakhon songon panah. (Ps. 127:4) Marragam do jenis ni panah dohot ukuranna. Suang songon i ma, ndang sai sarupa ganup dakdanak. Ingkon marsitutu do natua-tua laho mangalatik ganup ianakhon ni nasida. Di negara Israel, adong natua-tua na marhasil pagodang-godangkon dua ianakhon ni nasida. Aha do na mangurupi nasida? Didok nasida, “Ndang sahali rap dibahen hami ianakhonnami marsiajar Bibel.” Tontu, kepala keluarga do na manontuhon porlu manang na ndang dibahen nasida cara sisongon i. w19.12 26-27 ¶18-20

Massai taargai do akka halak na rade mangurupi hita tikki taadopi sitaonon na borat! Si Ryan na mate bapakna alani kecelakaan mandok, “Tikki marsitaonon, gabe maol do taulahon akka na somal taulahon ganup ari. Alani i, gabe dipatogu do rohatta tikki adong sasahalak na rade mangurupi nang pe otik.” Ingot ma, boi do hamu patoguhon na asing nang pe dang godang na boi diulahon hamu. Si Markus, i ma halak Kristen na ringgas di abad na parjolo. Nang pe songon i, dilehon ibana do tikkina lao patoguhon roha ni Apostel Paulus. Alani i, lomo do roha ni si Paulus tikki diurupi si Markus ibana. Tikki mate oppung boru ni si Angela ala dibunu, diargai ibana do akka dongan na rade patoguhon rohana. Didok, “Lomo do roha ni akka dongan mangurupi, jala mura do nasida dijonoki. Huparrohahon, sai rade do nasida mangurupi manang andigan pe.” Alani i, tasukkun ma dirinta, ‘Ditanda do au sahalak na rade patoguhon roha ni akka dongan?’ w20.01 11-12 ¶14-16

Boi do sahalak na miniahan didok “ndang tama” molo mangan roti dohot minum anggur ibana tikki Borngin Parningotan alai dang mangoloi patik ni Jahowa. (Heb. 6:4-6; 10:26-29) Diboto akka na miniahan do, ikkon toktong do nasida setia asa boi “mandapot upa, i ma panjouon ni Debata marhite Kristus Jesus tu hangoluan na di surgo”. (Plp. 3:13-16) Tondi parbadia ni Jahowa mangurupi naposona asa marserep ni roha dang marginjang ni roha. (Eps. 4:1-3; Kol. 3:10, 12) Alani i dang didok roha ni akka na miniahan, nasida do na dumenggan sian halak na asing. Diboto nasida do, sarupa do tondi parbadia na dilehon Jahowa tu nasida dohot tu na asing. Dang didok roha ni nasida, umbagas parbinotoan ni nasida sian akka dongan na asing taringot Bibel. Dang dipaboa-boa nasida tu na asing molo nasida nungnga dipillit Jahowa jala ikkon mangan roti dohot minum anggur di Borngin Parningotan. Diboto nasida do, Jahowa do na mamillit sasahalak lao mangolu tu surgo. w20.01 27-28 ¶4-5

Lomo do roha ni Jahowa asa marale-ale hita tu Ibana jala jotjot makkatai tu Ibana. Dijujui Ibana do hita asa ‘toktong martangiang’, jala sai rade do Ibana manangihon hita. (Rom 12:12) Sai rade do Jahowa jala dang hea loja Ibana lao manangihon hita. Hita pe porlu manangihon Ibana marhite manjaha Bibel dohot publikasi na mangurupi hita mangattusi aha na tajaha sian Bibel. Asing ni i, taparrohahon ma akka na dipasahat di parpunguan. Jala jotjot ma makkatai tu Jahowa asa toktong hita jonok tu Ibana. Lomo do roha ni Jahowa asa tapaboa sude na di rohatta di bagasan tangiang. (Ps. 62:9) Alani i, tasukkun ma diritta: ‘Sai mulak-ulak do na hudok di tangiangku? Manang sian ias ni roha do au martangiang?’ Tontu massai holong do rohamuna tu Jahowa jala marsitutu do hamu asa toktong togu parale-aleonmuna tu Ibana. Asa boi songon i, jotjot ma hamu martangiang. Pos ma roham tu Ibana. Paboa ma las ni roha dohot holso ni roham tu Ibana. Jala boi do pangidoonmu asa diurupi Ibana hamu. w20.02 9 ¶4-5

Dilehon Jahowa do tanggung jawab tu angka sintua laho mamparmahani angka naposona. Angka sintua boi marsiajar sian contoh ni si Nehemia tingki maradophon naposo ni Jahowa. Sahalak gubernur di Juda do si Nehemia jala balga do tanggung jawabna. (Neh. 1:11; 2:7, 8; 5:14) Alai bayangkon ma angka ambat-ambat na diadopi si Nehemia. Diboto ibana ma, dipangke halak Jahudi do bagas joro tu ulaon na so suman. Ndang dilehon nasida sumbangan tu halak Lepi songon na diparentahon Patik. Ndang diihuthon nasida patik taringot Sabbat, jala piga-piga baoa mangoli tu borua sian bangso na so manomba Jahowa. Ingkon diadopi Gubernur Nehemia ma situasi na susa i. (Neh. 13:4-30) Nang pe sahalak na marpangkat, alai ndang hea dipaksa si Nehemia halak Israel asa mangoloi hatana. Gariada, dipangido ibana do tudu-tudu sian Jahowa marhite tangiang jala diajarhon ibana do Patik tu halak Israel tingki i. (Neh. 1:4-10; 13:1-3) Ala serep do roha ni si Nehemia, olo do ibana rap karejo dohot halak Israel padengganhon tembok ni Jerusalem.​—Neh. 4:15. w19.09 15-16 ¶9-10