Juli

Tikki kasar sasahalak makkatai manang mambahen na so denggan tu hita, boi do i mambahen marsak rohatta. Tarlumobi molo na mangulahon i ale-ale manang keluargatta. Tikki marsak hita, taparsiajari ma aha na diulahon si Hanna tikki direhei istri paduahon ni suamina. (1 Sam. 1:12) Songon si Hanna, hita pe boi do leleng martangiang tu Jahowa paboahon holso ni rohatta dohot biar ni rohatta. Dang pola ikkon sempurna hata na tadok tikki martangiang. Sipata, olo do hita gabe tangis tikki paboahon arsak ni rohatta tu Jahowa. Nang pe songon i, dang hea loja Jahowa lao manangihon hita. Asing ni paboahon arsak ni rohatta, taingot ma poda na disurat di Pilippi 4:6, 7. Takkas do dipaboa Apostel Paulus, tikki martangiang porlu do hita mandok mauliate. Godang do alasan na boi mambahen hita mandok mauliate tu Jahowa songon hangoluanta, toppaanna, holongna, dohot pakkirimon na dilehon tu hita. w20.02 20 ¶3; 22 ¶6

Ditoppa Jahowa do hita asa boi makkatai. Sada silehon-lehon do i. (2 Mus. 4:10, 11; Pgk. 4:11) Marhite Bibel, diurupi do hita asa mangattusi songon dia mamakke silehon-lehon i. Manang sadihari pe, ikkon rade do hita makkatai taringot Jahowa dohot Harajaonna tu akka halak. (Mat. 24:14; Rom 10:14) Molo taulahon i, na maniru Jesus do hita. Sada tujuan ni Jesus ro tu tano on, i ma lao paboahon hasittongan taringot Amana. (Joh. 18:37) Alai taingot ma, rikkot do tong mamboto boha carana makkatai. Jadi tikki paboahon taringot Jahowa tu akka halak, ikkon ‘lambok ma hita jala sangap’ ma nasida. Jala ikkon taargai do pakkilalaan dohot haporseaon ni nasida. (1 Ptr. 3:15) Jadi tujuanta dang holan lao makkatai, alai lao mangajarhon hasittongan asa hona i tu roha ni nasida. Akka sintua pe, unang pola ganggu rohana lao makkatai tu sahalak dongan na porlu dipasingot. Tontu ikkon dipillit nasida do tikki na pas lao makkatai asa unang gabe maila dongan na dipasingot i. w20.03 18-19 ¶2-4

Akka aha do na boi tatangiangkon? Tingki martangiang tu Jahowa, boi do tadok “tambai ma haporseaonnami”. (Luk. 17:5; Joh. 14:1) Ingkon togu do haporseaonta, alana sai diela-ela Sibolis do angka na mangihuthon Jesus. (Luk. 22:31) Alai, songon dia do haporseaon boi mangurupi hita? Molo nunga taulahon sian nasa gogonta laho mangadopi sitaonon, haporseaon mambahen pos rohanta na laho urupan ni Jahowa do hita. Ala porsea hita tu Ibana, gabe dame ma pingkiran dohot rohanta. (1 Ptr. 5:6, 7) Tangiang boi do mangurupi hita asa dame roha dohot pingkiranta nang pe mangadopi angka hasusaan. Parrohahon ma pengalaman ni sahalak sintua na margoar si Robert naung marumur lobi 80 taon. Didok ibana, “Poda na disurat di Pilippi 4:6, 7 mangurupi ahu mangadopi angka hasusaan di ngolungku. Susa do ahu di parhepengon jala sanga do ndang sintua be ahu.” Aha do na mangurupi si Robert asa tongtong dame? Didok ibana, “Tingki marsak, pintor martangiang do ahu. Huboto do, molo jotjot martangiang, gabe lam dame do huhilala.” w19.04 9-10 ¶5-7

Pelecehan seksual tu dakdanak termasuk dosa na balga do di Debata. Tingki mardosa sasahalak tu donganna na asing, na mardosa do ibana tu Jahowa. Di Patik na dilehon Jahowa tu halak Israel najolo didok, molo adong halak na mamaksa mambuat ampuna ni donganna, na “mangalo parenta ni Jahowa” do i. (3 Mus. 5:21-23) Suang songon i ma, molo adong sasahalak di huria na mangulahon pelecehan seksual, nunga dibuat ibana las ni roha manang hadameon ni dakdanak i jala nunga mardosa ibana tu Jahowa. Angka halak sisongon i gabe mambahen roa goar ni Jahowa. Pelecehan seksual, i ma dosa na dihagigihon Debata. Alani i, ingkon dihukum do halak na mangulahon i. Di artikel Joujou Paboahon dohot Sadarlah!, dipaboa do aha na ingkon diulahon dakdanak na gabe korban i, songon dia angka na asing boi patoguhon ibana, jala songon dia natua-tua manjaga ianakhonna. Dilehon do tudu-tudu tu angka sintua marhite prinsip ni Bibel songon dia carana pasaehon parsoalan sisongon i. Jala sai diparrohahon organisasi do angka tudu-tudu i, jala sipata adong do na disesuaihon. w19.05 9 ¶8-9

Hata ni Debata dipatudos do i songon podang na tajom na boi pataridahon gabus ni Sibolis. (Eps. 6:17) Umpamana, sian Hata ni Debata taboto do ndang boi halak naung mate mangkatai dohot halak na mangolu. (Ps. 146:4) Jala taboto do holan Jahowa do na boi mamboto aha na laho masa di ari na naeng ro. (Jes. 45:21; 46:10) Molo tajaha jala tarimangi Hata ni Debata ganup ari, gabe boi ma hita pasidingkon jala mangkasogohon angka gabus ni Sibolis. Alani i, pasiding ma angka ulaon spiritisme. Tontu ndang olo halak Kristen mangulahon ulaon na adong hubunganna tu spiritisme. Umpamana, ndang ro hita tu inganan na adong hubunganna tu spiritisme manang mangkatai tu halak naung mate. Ndang dohot hita tu hasomalan taringot halak naung mate na mangajarhon mangolu dope tondi ni halak naung mate. Jala ndang olo hita mamangke ramalan bintang manang manungkun datu laho mamboto aha na masa di ari na naeng ro. Taboto bahaya do angka ulaon sisongon i. Dos do i songon na mangkatai langsung tu Sibolis dohot suru-suruanna. w19.04 21-22 ¶8-9

Angka halak na mangihuthon bisuk ni portibi on mandok ndang masuk angkal poda ni Bibel taringot seks. Ra, didok roha ni nasida, ‘Molo silehon-lehon sian Jahowa do hubungan seks i, boasa diorai hita mangulahon i?’ Angka halak na marpingkir songon i mangkilala boi do nasida mangulahon manang aha pe na dihalomohon rohana. Alai didok Bibel, ndang ingkon taulahon sude na dihalomohon rohanta. Ingkon boi do taorom dirinta. (Kol. 3:5) Asing ni i, adong do silehon-lehon sian Jahowa, i ma parsaripeon. Dung mardongan saripe, boi do suami dohot istri mangulahon hubungan seks. (1 Kor. 7:8, 9) Ndang songon bisuk ni portibi on, Bibel mangajarhon na denggan taringot seks. Didok do muse hubungan seks boi parohon las ni roha. (Poda 5:18, 19) Alai, Bibel mandok, “Ingkon sude do hamu mamboto songon dia mangarajai dirina be, asa sangap hamu jala badia. Unang ma ihuthon angka bangso na so mananda Debata, na so boi mangarajai hisap-hisap ni dagingna, jala na sai mangulahon i di ngoluna.”​—1 Tes. 4:4, 5. w19.05 22-23 ¶7-9

Ndang paloason ni Jahowa naposona diripashon angka musu. Las do roha ni nasida gabe naposo ni Debata, jala dioloi nasida do parentana asa kaluar sian Babel na Balga. (Ul. 15:16, 17; Pgk. 18:4) Jala marsitutu do nasida mangurupi angka halak asa kaluar sian Babel na Balga. Alani i, tingki diripashon Babel na Balga i, ndang dohot naposona “hona uhum”. Alai ingkon tongtong do togu haporseaon ni nasida asa boi martahan mangadopi situasi na laho masa dungkon i. (Hes. 38:2, 8) Dung diripashon sude agama palsu, holan sada ma agama na adong di tano on, i ma organisasi ni Jahowa. Gabe muruk ma Sibolis alani i. Dibahen ibana ma “surirang na ramun” na mambahen marpungu angka pamarenta laho menyerang naposo ni Jahowa. (Pgk. 16:13, 14) Angka pamarenta na marpungu i, i ma ‘Gog na sian Magog’. Tingki diserang nasida naposo ni Jahowa, mulai ma porang Armagedon.​—Pgk. 16:16. w19.09 11 ¶12-13

Di tingki ni halak Israel, dipangke Sibolis do agama palsu laho mangela-ela halak asa mangulahon seks na so patut. Saonari, sarupa dope na diulahon ibana. Dipaloas agama palsu do angka halak mangulahon seks na so patut. Didok roha ni nasida, ndang sala mangulahon i. Jala godang do naposo ni Debata ndang be mangihuthon prinsip ni Bibel. Di suratna tu halak Rom, dipaboa si Paulus do aha akibat ni ajaran ni agama palsu. (Rom 1:28-31) “Angka ulaon na so patut”, i ma sude ulaon seks na so patut, dohot ma i angka baoa na mangulahon seks dohot baoa. (Rom 1:24-27, 32; Pgk. 2:20) Alani i, mansai ringkot do di hita mangihuthon ajaran ni Bibel! Maralo do ajaran ni jolma tu na diajarhon Jahowa. Ajaran i mambahen sasahalak maol patuduhon parbue ni tondi. Alai gabe “parniulaon ni daging” do na dipatudu. (Gal. 5:19-23) Jala ajaran i manjujui halak gabe marginjang ni roha. Alani i, godang jolma saonari gabe “mangkaholongi dirina sandiri”. (2 Tim. 3:2-4) Hape lomo roha ni Jahowa asa dipatudu naposona serep ni roha.​—2 Sam. 22:28. w19.06 5-6 ¶12-14

Setia do si Elia tu Jahowa nang pe di tingki susa. Didok Jahowa tu si Elia asa dilehon deba tugasna tu si Elisa. Sasintongna, disuru Jahowa si Elia mangulahon i, asa adong do dongan na boi mangurupi ibana tingki marmetmet ni roha. Suang songon i ma nang hita, molo tapaboa pangkilalaanta tu dongan na boi dihaporseai, boi ma nasida mangurupi hita asa martahan. (2 Raj. 2:2) Molo dihilala hamu ndang adong dongan na boi mangurupi, martangiang ma tu Jahowa asa dapotmuna dongan na togu parale-aleonna tu Debata na boi mangurupi hamu. Diurupi Jahowa do si Elia asa boi tongtong martahan jala manomba Ibana saleleng martaon-taon. Pengalaman ni si Elia on boi mangurupi hita. Molo marsak hita, on mambahen loja daging dohot pingkiranta. Alai molo marhaposan hita tu Jahowa, lehononna do tu hita gogo asa boi tongtong manomba Ibana.​—Jes. 40:28, 29. w19.06 14 ¶4; 16 ¶9-10

Molo ringgas hita marbarita na uli paboahon taringot Harajaon ni Debata, boi ma hita gabe lam barani. Boasa? Alana tingki marbarita, diajari do hita asa lam marpos ni roha tu Jahowa jala ndang mabiar tu angka halak. Songon otot, lam gogo do molo dilatik. Hita pe boi do gabe lam barani tingki marbarita sian jabu tu jabu, di inganan na ribur, tingki kesaksian tidak resmi, manang di daerah bisnis. Molo lam barani hita marbarita saonari, boi ma lam rade hita marbarita nang pe diorai pamarenta. (1 Tes. 2:1, 2) Boi do hita marsiajar sian sahalak donganta borua na mansai barani. Donganta si Nancy Yuen, timbona holan 1,5 meter. Alai ndang parbiar ibana. Tongtong do ibana marbarita na uli nang pe diorai pamarenta. Ujungna, dipenjarahon pamarenta Cina ma ibana saleleng 20 taon. Angka na manangkup ibana mandok, molo donganta on “sahalak na jogal situtu” di negara i. w19.07 5-6 ¶13-14

Lomo do roha ni piga-piga halak marsiajar Bibel. Alai godang do na mulana, ndang lomo rohana marsiajar Bibel. Alani i, ingkon tajujui do nasida asa marsiajar. Asa olo halak manangihon hita, ingkon denggan do taparade. Pillit ma topik na menarik tu angka halak. Dung i, bahen ma hata pamungka na pas. Umpamana, boi do disungkun hamu tu parjabu, “Songon dia do pandapotmuna? Godang do hasusaan na diadopi angka jolma saonari di liat portibi on. Ninna rohamuna, adong do pamarentaon na boi manalpuhon hasusaan ni angka jolma?” Dung i, boi ma diulas hamu Daniel 2:44. Manang boi do disungkun hamu, “Ninna rohamuna, songon dia do carana pagodang-godangkon ianakhon asa boi denggan pangalahona?” Dung i, ulas ma 5 Musa 6:6, 7. Tontu, mansai las do rohanta tingki mangurupi halak gabe sisean ni Jesus. w19.07 15 ¶4, 6-7

Alai boha do molo didok halak na tajumpangi i ndang porsea ibana tu Debata? Adong sahalak donganta baoa na jotjot marbarita tu angka halak na so maragama di Asia Timur. Didok ibana, “Somalna molo didok halak, ‘Ndang porsea ahu tu Debata,’ maksudna ndang porsea ibana tu angka debata na disomba godangan halak disi. Alani i hudok ma, setuju do ahu molo saonari godang debata na dibahen jolma jala ndang debata na sintong i. Jotjot do hujahahon Jeremia 16:20 jala husungkun ma, ‘Songon dia do asa taboto dia Debata na sintong?’ Hutangihon ma pandapotna, dung i hujahahon ma Jesaya 41:23, na mandok, ‘Paboa hamu ma [taringot] angka na ro muse, asa tung hutanda hami angka debata hamu tutu.’ Dung i, hupatudu ma contoh songon dia Jahowa paboahon na laho masa di ari na naeng ro jala tutu do i masa.” Donganta baoa na asing mandok, “Hupatudu ma sian Bibel taringot poda na denggan, angka surirang naung masa, dohot taringot hukum na mangatur alam semesta. Dung i hupaboa ma songon dia i sude patuduhon na adong do na manompa hita. Molo nunga dihaporseai nasida na tutu adong Debata, hupatudu ma sian Bibel taringot Jahowa.” w19.07 23-24 ¶14-15

Angka na rumingkot, i ma pabadiahon goar ni Jahowa, angka janjina na laho masa, dohot mambahen huria dame jala marsada. (Mat. 6:9, 10; Joh. 13:35) Molo tabahen i sude gabe na rumingkot di ngolunta, on patuduhon na tahaholongi do Jahowa. Didok si Paulus do muse asa unang “marcacat” hita. Lapatanna, ndang ingkon gabe sempurna hita. Boi do hita sempurna manang ndang marcacat di adopan ni Jahowa, molo taulahon na dumenggan laho patoguhon holongta jala mamboto dia na rumingkot. Sada cara patuduhon holong, i ma molo taulahon sian nasa tolapta asa unang mambahen tartuktuk na asing. Sada sipasingot do tu hita unang mambahen tartuktuk na asing. Songon dia hita boi mambahen sasahalak tartuktuk? Ra boi do sian hiburan, pangkean, dohot karejo na tapillit. Ra ndang adong na sala sian na tapillit i. Alai boi do i gabe parohon jea molo mangganggu panggora ni roha ni sasahalak jala mambahen ibana tartuktuk.​—Mat. 18:6. w19.08 10 ¶9-11

Sian taon 1935, diboto Sitindangi Ni Jahowa do molo punguan bolon na dipaboa di parnidaan ni si Johannes, i ma halak Kristen na setia na marpangkirimon laho mangolu salelengna di tano on. (Pgk. 7:9, 10) Asa boi malua sian hasusaan bolon, ingkon marsiajar do nasida taringot Jahowa jala manomba Ibana andorang so mulai dope Pamarentaon ni Kristus. Ingkon dipatudu nasida do haporseaon na togu ‘asa malua sian sude na laho masa’ andorang so mulai Pamarentaon ni Kristus Saleleng Saribu Taon. (Luk. 21:34-36) Las do roha ni punguan bolon di pangkirimon ni nasida. Diboto nasida do, Jahowa do na manontuhon didia pangkirimon ni angka naposona, di surgo manang di tano on. Manang didia pe pangkirimonta, alani asi ni roha ni Jahowa na mansai balga do umbahen tadapot pangkirimon i na dipatudu marhite tobusan ni Jesus Kristus.​—Rom 3:24. w19.09 28 ¶10-12; 29 ¶13

Boi do hamu marhasil tingki mandapot tugas na baru. Alani i, tongtong ma ingot songon dia Jahowa mangurupi hamu di ngolumuna jala tongtong ma marbarita. Unang ma didok rohamu ala adong do na sala na diulahon hamu umbahen na mandapot tugas na baru hamu, manang unang ma didok rohamu ndang mararga be dirimuna. Tiru ma halak Kristen di abad na parjolo. Didia pe nasida, dibaritahon nasida do “barita na uli taringot tu hata ni Debata”. (Ul. 8:1, 4) Molo ringgas hamu marbarita, hilalaonmuna ma hasil na denggan. Contohna, adong angka perintis na diusir sian sada negara jala pinda tu pulo na mangkaporluhon parbarita di bahasa ni nasida. Piga-piga bulan dungkon i, gabe adong ma kelompok di bahasa ni nasida. Marale-ale tu Jahowa do silas ni roha na umbalga di hita. Alani i, tongtong ma jonok tu Jahowa, pangido ma bisuk dohot tudu-tudu asa tongtong marlas ni roha. Tontu las do rohamu di penugasanmuna najolo ala marsitutu hamu mangurupi angka halak disi. Suang songon i ma, tongtong ma marsitutu hamu mangulahon tugasmuna na baru. Urupan ni Jahowa do hamu asa marlas ni roha mangulahon i.​—Pjm. 7:10. w19.08 24-25 ¶15-16

Ingkon unduk do hita tu Jahowa ala Ibana do Sitompa hita. Alani i, marhak do Ibana mambahen aturan tu angka tompaanna. (Pgk. 4:11) Alai alasan na asing boasa ingkon unduk hita tu Jahowa, i ma ala dumenggan do carana mamarenta. Sian najolo, godang do jolma na mangarajai donganna jolma. Alai molo dibandingkon tu nasida, Jahowa do Parhuaso na umbisuk, parholong jala parasi roha. (2 Mus. 34:6; Rom 16:27; 1 Joh. 4:8) Na unduk do hita tu Jahowa molo taoloi Ibana sian nasa tolapta. Jala unang ma taasahon pingkiranta sandiri. (Poda 3:5) Gabe lam mura do hita unduk tu Jahowa molo taboto angka parangena na denggan. Alana angka parangena i tarida sian na diulahon Ibana. (Ps. 145:9) Molo lam tatanda Jahowa, gabe lam holong ma rohanta tu Ibana. Molo tahaholongi Jahowa, ndang porlu di hita godang aturan taringot aha na boi dohot na so boi taulahon. w19.09 14 ¶1, 3

Dibahen Sibolis do gabus na mambahen angka jolma ndang marpangkirimon. Umpamana, lomo rohana asa porsea hita na so olo Jahowa manesa dosanta jala ndang tama hita dihaholongi. Gabus na mansai jahat do i! (Joh. 8:44) Alai tingki ro hita tu Jesus, disesa Jahowa do angka dosanta. (Mat. 11:28) Jala taboto ma, mansai holong do roha ni Jahowa tu hita sude. (Rom 8:32, 38, 39) Imbar do tugas na dilehon Jesus tu hita sian tugas na asing. Umpamana, godang do halak na loja jala ndang marlas ni roha dung mulak sian karejo. Alai molo hita, mansai las do rohanta ala nunga talehon tingkinta marhobas tu Jahowa dohot tu Jesus. Ra nunga loja tahilala, hape ingkon laho dope muse marpungu di borngin i. Alai dung mulak marpungu, gabe lam togu do tahilala. Songon i ma muse na tahilala molo marsitutu hita marbarita dohot belajar pribadi! w19.09 20 ¶1; 23-24 ¶15-16

Ndang leleng nai, ro nama “ari” ni Jahowa. Alani i, dipangido Jahowa do hita asa tongtong ringgas di ulaon marbarita. Ingkon marsitutu do hita asa “mangulahon godang ulaon ni Tuhan i”. (1 Kor. 15:58) Tingki dipaboa Jesus angka na laho masa saleleng ari parpudi, didok do muse, “Alai jumolo do baritahononhon barita na uli i di sude bangso.” (Mrk. 13:4, 8, 10; Mat. 24:14) Rimangi ma: Tingki marbarita hamu, na dohot do hamu manggohi surirang ni Jesus i! Ganup taon, lam godang do halak na manangihon barita taringot Harajaon ni Debata. Umpamana, pingkirhon ma godang ni angka parbarita Harajaon na lam martamba di liat portibi on saleleng ari parpudi. Di taon 1914, adong 5.155 parbarita di 43 negara. Alai saonari, adong lobi sian 8,5 juta parbarita di 240 negara! Nang pe songon i, ndang sae dope ulaonta. Ingkon tongtong do hita paboahon, holan Harajaon ni Debata do na boi pasaehon sude hasusaan ni jolma.​—Ps. 145:11-13. w19.10 8 ¶3; 9-10 ¶7-8

Marratus taon dungkon i, dipangke Jahowa do si Barsilai laho mangurupi Raja Daud. Tingki i, nunga “male . . .  galegale jala mauas” si Daud dohot angka tentarana ala lari nasida sian anak ni si Daud, i ma si Absalom. Tingki i, nunga matua si Barsilai, jala boi do ibana dipamate ala paradehon na porlu di si Daud dohot tentarana. Alai nang pe matua, ndang didok roha ni si Barsilai ndang boi be ibana dipangke Jahowa. Gariada, dilehon ibana do angka na adong di ibana laho mangurupi naposo ni Debata. (2 Sam. 17:27-29) Aha do parsiajaranna tu hita? Nang pe naung matua hita, boi do dipangke Jahowa hita laho paradehon na dihaporluhon dongan, na adong di ingananta manang di inganan na asing na hahurangan. (Poda 3:27, 28; 19:17) Nang pe ndang boi pintor diurupi hamu nasida, boi do dilehon hamu sumbangan tu ulaon ni organisasi di liat portibi on laho mangurupi angka donganta tingki dihaporluhon.​—2 Kor. 8:14, 15. w19.10 21 ¶6

Ra, maol do hita paboahon tu halak na asing aha na tahilala molo hea adong na mambahen hansit rohanta. (Poda 18:19) Manang tahilala ndang adong tingki dohot gogonta laho marale-ale dohot dongan na asing. Alai unang ma menyerah. Molo lomo rohanta asa diurupi angka dongan tingki masa hasusaan, ingkon tapatogu do parale-aleonta dohot nasida sian saonari. Sada cara na ringkot na boi taulahon, i ma paboahon aha na tapingkirhon dohot aha na tahilala. (1 Ptr. 1:22) Pos do roha ni Jesus tu angka donganna. Alani i, dipaboa ibana do sude na di rohana tu nasida. (Joh. 15:15) Boi do tatiru Jesus. Boi do tapaboa tu na asing angka aha na mambahen hita marlas ni roha, marsak, dohot na mambahen jut rohanta. Tingki adong sasahalak na paboahon aha na di rohana tu hamu, denggan ma tangihon. Ra gabe diboto hamu ma, sarupa do hape cara marpingkir, pangkilalaan dohot tujuanmuna. Molo dipaboa hamu aha na adong di roha dohot pingkiranmuna tu angka dongan, jala denggan ditangihon hamu nasida tingki mangkatai, on mambahen lam togu parale-aleonmuna.​—Poda 27:9. w19.11 4 ¶8-9

Saleleng hasusaan bolon, laho muba do barita na tapasahat. Saonari, barita na uli taringot Harajaon do na tapasahat jala marsitutu do hita mambahen sisean. Alai di hasusaan bolon, ingkon tapasahat do barita panguhuman na dipatudos songon udan es. (Pgk. 16:21) Ra, ingkon tapasahat do barita na mandok laho hancur do portibi ni Sibolis on. Alai di tingkina, taboto ma aha do barita i jala songon dia hita pasahathon i. Laho tapangke do cara na sarupa manang cara na asing do na laho tapangke? Ndang taboto. Manang aha pe carana, sada hak istimewa do di hita boi pasahathon barita panguhuman ni Jahowa! (Hes. 2:3-5) Alani barita na tapasahat, gabe marsitutu do angka bangso mambahen hita asa unang be marbarita salelengna. Tingki masa i, ingkon porsea do hita tu Jahowa songon na taulahon saonari. Pos ma rohanta, dilehon Jahowa do gogo tu hita laho mangulahon lomo ni rohana.​—Mik. 3:8. w19.10 16 ¶8-9

Hata “lilu” na didok dison, patuduhon boi do hita gabe sai mamingkirhon angka na so tahaporluhon. Jala boi do i mambahen hita sai mamingkirhon “angka sangkap haotoon dohot sangkap na parohon jea”. (1 Tim. 6:9) Alai ingot ma, on do sinjata na dipangke Sibolis laho mambahen gale haporseaonta. Ra, adong do hepengta laho manuhor angka barang. Alai sala do molo tatuhor barang hape ndang apala tahaporluhon? Pingkirhon ma sungkun-sungkun on: Nang pe boi tatuhor barang i, adong dope tingki dohot gogonta laho mamangke manang mangarawat barang i? Gabe humolong do rohanta tu angka barang i? Gabe songon baoa na manjua gokkon ni Jesus i do hita? (Mrk. 10:17-22) Dumenggan do molo sederhana ngolunta jala mamangke godang tingki dohot gogo laho mangulahon lomo ni roha ni Debata! w19.11 17-18 ¶15-16

Boi do dibahen Debata hamu asa “margogo mangulahon” keputusanmuna. (Plp. 2:13) Alani i, martangiang ma tu Jahowa mangido tondi parbadiana asa dipargogoi hamu. Tongtong ma martangiang nang pe didok rohamu ndang dialusi dope tangiangmuna i. Didok Jesus, “Sai pangido ma, ai na lehononna do [tondi parbadia] tu hamu.” (Luk. 11:9, 13) Dung i, bahen ma rencana. Manang aha pe na laho ulahononmuna, ingkon jolo dibahen hamu do rencana. Dung i, ingkon diulahon hamu do rencana i. Suang songon i ma, tingki mambahen sada keputusan, bahen ma daftar tugas na ingkon diulahon hamu. Molo adong sada tugas na maol ulahononmu, ulahon ma i otik-otik asa ummura pasaeonmuna. Molo boi dipasae hamu deba sian i, gabe diboto hamu ma nunga lam marhasil hamu. Dijujui Apostel Paulus do halak Korint asa papunguhon hepeng sasaotik “di ari na parjolo di ganup minggu” unang apala dipapungu sahali sude tingki ro ibana. (1 Kor. 16:2) Molo otik-otik diulahon hamu sada tugas na maol, on mangurupi asa unang paborathu dihilala hamu mangulahon i. w19.11 29 ¶13-14

Ra, didok rohanta nunga tangkas tatanda Jahowa ala nunga taboto goarna, aha na dihatahon dohot na diulahon Ibana. Alai ndang sae holan i. Ingkon talehon do tingkinta marsiajar taringot Ibana dohot angka parangena na denggan. Gabe taantusi ma aha na mangonjar roha ni Jahowa sian na dihatahon dohot na diulahon Ibana. Jala on mangurupi hita laho mamboto aha na dihalomohon Ibana asa tapingkirhon jala taulahon. Molo nunga taboto aha na dihalomohon rohana, taulahon ma i. Ra, direhei piga-piga halak do hita ala naeng manomba Jahowa. Manang diorai do hita tingki parjolo sahali laho marpungu dohot angka dongan. Alai molo pos rohanta tu Jahowa, ndang tadingkononna hita. On ma na patuduhon naung marale-ale hita tu Jahowa, jala boi do i martahan salelengna. Boi do tangkas tatanda Jahowa? Boi! w19.12 16-17 ¶3-4

Sipata, mansai susa do dihilala natua-tua laho mangajarhon ianakhon ni nasida. Alai silehon-lehon sian Jahowa do ianakhon. Sai rade do Ibana laho mangurupi natua-tua. Ditangihon Ibana do tangiang ni natua-tua. Jala dialusi Ibana do i marhite Bibel, publikasi, dohot contoh manang poda sian angka natua-tua naung marpengalaman di huria. Piga-piga halak mandok, 20 taon do lelengna natua-tua pagodang-godang ianakhon. Alai sasintongna, tongtong do nasida gabe natua-tua. Jala na dumenggan na boi dilehon nasida tu ianakhon, i ma holong, tingki, dohot pelatihan na sian Bibel. Marragam do cara ni ganup dakdanak manjalo pelatihan i. Alai, godang do donganta na dipagodang-godang natua-tuana na mangkaholongi Jahowa, mangkilala na sarupa songon na dihilala donganta si Joanna Mae na tading di Asia. Didok ibana, “Mandok mauliate do ahu ala nunga dipaingot jala diajari natua-tuangku ahu asa mangkaholongi Jahowa. Ndang holan disarihon nasida ahu, alai gabe marlaba situtu do ngolungku alani nasida.” (Poda 23:24, 25) Marjuta donganta di liat portibi on pe mangkilala na sarupa. w19.12 27 ¶21-22

Sasittongna, dang maol lao patoguhon roha ni akka dongan. Ikkon talului do cara lao mangurupi akka dongan nang pe hira na mabiar hita mangulahon i. Ra, mabiar hita ala dang taboto aha na lao tadok manang taulahon lao mangapuli akka dongan. Boi do hita marhasil patoguhon akka dongan molo tapatudu na parduli hita tu nasida. Ala lao salpu do portibi on, lam jahat ma akka halak jala lam susa ma parngoluonta. (2 Tim. 3:13) Asing ni i, porlu do hita dipatogu ala jolma na so sempurna hita na jotjot mangulahon hasalaan. Boi do si Paulus toktong setia sahat tu na mate ala adong akka dongan sahaporseaon na patoguhon rohana. Molo taulahon tong songon i, boi ma hita mangurupi akka dongan asa toktong setia manomba Jahowa.​—1 Tes. 3:2, 3. w20.01 12-13 ¶17-19

Dang gabe dipangido akka na miniahan asa sangap ibana dibahen na asing. (Plp. 2:2, 3) Diboto ibana do, dang dipaboa Jahowa tu na asing molo ibana dimiahi tondi parbadia. Alani i, dang songgot be rohana molo adong piga-piga halak na so porsea molo ibana nunga dipillit Jahowa. Alana diboto ibana do adong didok di Bibel, dang boi pittor porsea hita tikki sasahalak mangakku mandapot silehon-lehon sian Debata. Dang lomo roha ni halak Kristen na miniahan asa sai diparrohahon halak. Alani i, dang dipaboa ibana tu halak na asing molo ibana sahalak na miniahan. Jala dang gabe dihaginjakkon dirina alani i. (1 Kor. 4:7, 8) Dang dilului nasida akka na miniahan na asing lao makkatai taringot pakkirimon ni nasida manang mambahen kelompok khusus asa rap marsiajar Bibel. (Gal. 1:15-17) Molo diulahon nasida i, boi do gabe dang marsada huria Kristen. Jala gabe dialo nasida do tondi parbadia, na mangurupi huria asa dame jala marsada.​—Rom 16:17, 18. w20.01 28 ¶6-7

Di tingki hasusaan bolon, gabe muruk ma angka halak na hea dohot tu organisasi ni agama naung dihancurhon i. Diida nasida ndang dihancurhon Sitindangi Ni Jahowa. Ra, dipatudu nasida do muruk ni roha ni nasida i di internet. Sogo do roha ni Sibolis dohot angka bangso ala holan organisasi ni Sitindangi Ni Jahowa do na tongtong adong di tano on. Marsitutu do nasida laho manghancurhon sude agama sian tano on. Alani i, gabe sude ma halak mamparrohahon hita. Tingki i, ro ma Gog na sian tano Magog na manggombarhon angka pamarenta. Marsada ma nasida laho menyerang naposo ni Jahowa. (Hes. 38:2, 14-16) Ra, olo do gabe holsoan hita saleleng hasusaan bolon ala ndang tangkas taboto aha na laho masa. Alai ingot ma, unang ma mabiar hita saleleng hasusaan bolon. Pos ma rohanta, sai lehonon ni Jahowa do tudu-tudu laho paluahon hita.​—Ps. 34:20. w19.10 16 ¶10-11

Alai dang sae holan mandok mauliate di bagasan rohatta, ikkon tapatudu do i sian pakkataion dohot parniulaotta. On mambahen hita gabe imbar sian akka halak di portibi on. Alana godang akka halak saonari dang olo mandok mauliate tu sude na diulahon Debata tu nasida. Jala on ma na patuduhon molo hita mangolu “di ari parpudi”, tikki akka halak dang diboto mandok mauliate. (2 Tim. 3:1, 2) Unang ma tatiru nasida! Lomo do roha ni Jahowa asa sude hita marsihaholongan. Gariada, holong do na gabe tanda ni halak Kristen. (Joh. 13:35) Tontu setuju do hita tu sahalak panurat psalmen na mandok, “Ida ma, dengganna i dohot sonangnai, molo tung pungu sahundulan angka na marhahamaranggi!” (Ps. 133:1) Tikki tahaholongi akka dongatta, on patuduhon na holong do rohatta tu Jahowa. (1 Joh. 4:20) Massai las do rohatta ala boi gabe bagian ni keluarga sian akka dongan na ‘burju tu na asing jala marasi ni roha’!​—Eps. 4:32. w20.02 9 ¶6-7

Dang pittor salpu hasusaan na diadopi si Hanna. Toktong do sajabu ibana dohot si Pininna. Jala dang adong didok di Bibel, muba pangalaho ni si Pininna. Alani i, ikkon toktong do sabar ibana mangadopi si Pininna. Alai dang jut be roha ni si Hanna. Ala pos do rohana na ditangihon Jahowa tangiangna i, gabe dang marsak be rohana. Dipaloas ibana do Jahowa lao patoguhon ibana. Dukkon i, dialusi Jahowa do tangiang ni si Hanna. Gabe boi ma ibana marianakkon! (1 Sam. 1:2, 6, 7, 17-20) Boi do dame muse rohatta nang pe toktong mangadopi hasusaan. Nungnga ringgas hita martangiang jala toktong ro tu parpunguan. Alai ra dang salpu dope hasusaanta. Boi ma hita marsiajar sian contoh ni si Hanna. Dang adong na boi mangambati Jahowa lao patoguhon rohatta. Dang lupahonon ni Jahowa hita jala pasu-pasuonna do hita molo dang menyerah.​—Heb. 11:6. w20.02 22 ¶9-10

Ikkon dipasahat akka sintua do prinsip ni Bibel lao mangurupi donganta na porlu dipasingot, asa lam marbisuk. Boasa ikkon barani nasida makkatai tikki dihaporluhon? Parrohahon ma contoh sahalak Sintua ni Malim na margoar si Eli. Jala adong dua anakna. Holong hian do rohana tu anakna i. Alai dang dipasangap nasida Jahowa. Dilehon do tu nasida tanggung jawab na balga, i ma gabe malim na marhobas di tabernakel. Alai gabe lomo-lomo ni nasida do. Dang diargai nasida pelean na dilehon tu Jahowa. Jala barani do nasida mangulahon seks na so patut. (1 Sam. 2:12-17, 22) Menurut Patik ni si Musa, ikkon dipamate do anak ni si Eli i. Alai palambokhu do si Eli pasingotton nasida. Jala tong do diloas nasida marhobas di tabernakel. (5 Mus. 21:18-21) Boha do pakkilalaan ni Jahowa tu cara ni si Eli pasingotton anakna i? Didok Jahowa ma tu si Eli, ‘Boasa ungsangap akka anakmu sian au dibahen ho?’ Ujungna, dipamate Jahowa ma dua anakna i.​—1 Sam. 2:29, 34. w20.03 19 ¶4-5