Agustus

Holan akka halak na marale-ale tu Jesus do na boi mandapot laba sian tobusan. Didok Jesus ‘Dilehon ibana do ngoluna humokkop akka donganna.’ (Joh. 15:13) Adong do akka naposo ni Jahowa na mangolu andorang so ro Jesus tu tano on. Nasida pe ikkon marsiajar do taringot Jesus jala makkaholongi ibana. Dung dipahehe, ikkon marale-ale do nasida tu Jesus asa boi mandapot hangoluan salelengna. (Joh. 17:3; Ul. 24:15; Heb. 11:8-12, 24-26, 31) Las do rohatta rap saulaon dohot Jesus tikki marbarita na uli jala mangajari akka halak taringot Harajaon ni Debata. Tikki di tano on Jesus, gabe guru do ibana. Jala dung mulak ibana tu surgo, ibana ma na manguluhon huria jala na mangatur sude ulaon marbarita dohot mangajari. Diida jala diargai ibana do hamu ala marsitutu mangurupi godang halak asa mananda ibana dohot Amana. Sasittongna, ala diurupi Jahowa dohot Jesus do umbahen boi taulahon tugas on.—Joh. 15:4. w20.04 22 ¶7-8

Molo najolo, ‘raja utara’ i manggombarhon parhuaso na adong di sabola utara ni Israel. Jala ‘raja selatan’ manggombarhon parhuaso di sabola selatan ni Israel. (Dan. 10:14) Andorang so Pentakosta 33 M, halak Israel dope na gabe bangso ni Debata. Alai dung ari Pentakosta, dipillit Jahowa ma akka sisean ni Jesus gabe bangsona. Alani i, surirang na dipaboa si Daniel di bindu 11 i godangan mangulas taringot halak Kristen do, dang na taringot halak Israel najolo. (Ul. 2:1-4; Rom 9:6-8; Gal. 6:15, 16) Jala sian tikki tu tikki, margatti-gatti do ise na gabe raja utara dohot raja selatan on. Alai adong do na sarupa sian nasida. Na parjolo, dianiaya nasida do godang naposo ni Debata na tading di luat na dirajai nasida. Na paduahon, sian pambahenan ni nasida tu naposo ni Debata, tarida do sogo rohana tu Debata na sittong, i ma Jahowa. Jala na patoluhon, na bersaing do na dua raja i asa gabe na umgogo. w20.05 3 ¶3-4

Boi do Jahowa gabe manang aha pe na dihalomohon Ibana asa saut sakkapna. Jala boi do dipakke Ibana naposona, i ma jolma na so sempurna asa gabe manang aha pe na dihaporluhon Ibana lao pasautton sakkapna. (Jes. 64:8) Marhite akka cara on ma, dibahen Jahowa saut sude sakkapna. Dang adong manang aha pe na boi mangabbati Ibana lao mangulahon i. (Jes. 46:10, 11) Gabe lam taargai do Jahowa molo tarimangi akka naung diulahon Ibana jala songon dia Ibana mangurupi hita saleleng on. Misalna, molo tarimangi akka toppaan, longang situtu do rohatta mangida sude naung dibahen Jahowa. (Ps. 8:3, 4) Jala molo tarimangi songon dia Jahowa mangurupi hita asa boi mangulahon lomo ni rohana, gabe lam taargai ma Ibana. Luar biasa do goar ni Jahowa! Sian goarna i, boi do taboto sude taringot Ibana, aha do naung diulahon Ibana, jala aha do na lao bahenonna.—Ps. 89:7, 8. w20.06 9 ¶6-7

Oksigen do na dihirup jolma dohot binatang asa boi toktong mangolu. Alai dang hea habis oksigen di tano on. Jala, nang pe jolma dohot binatang pakaluarhon karbon dioksida sian pernapasan, dang hea gabe pagodangku karbon dioksida di langit. Boasa? Alana ditoppa Jahowa do akka suan-suanan, na gelleng nang na balga. Akka suan-suanan i ma na mambuat karbon dioksida i jala pakaluarhon oksigen. Sian sistem daur ulang oksigen on, gabe taboto ma na tutu do hata na disurat di ayat sadari on. Songon dia caratta patuduhon na taargai do tano on dohot akka isina? (Ps. 115:16) Rimangi ma akka toppaan ni Jahowa. Boi do on mangonjar rohatta asa mandok mauliate tu Ibana ala dilehon do akka na denggan tu hita ganup ari. Asing ni i, sai tajaga ma akka na di humaliangta asa toktong ias. w20.05 22 ¶5, 7

Songon dia do Jahowa pabadiahon goarna sian gabus na didokkon Sibolis di porlak Eden? Sai dipatudu Jahowa do bisuk, hasabaron, hatigoran, dohot huasona. Jala na urrikkot, dipatudu Ibana do holongna di sude ulaonna. (1 Joh. 4:8) Jadi, toktong do dipabadia Jahowa goarna. Sai dileai Sibolis do goar ni Debata sahat tu saonari. Dioto-otoi ibana do godang halak asa porsea molo Debata i dang tutu marhuaso, tigor, marbisuk, jala parholong. Misalna, dibahen ibana do asa porsea halak dang Jahowa na manoppa hita. Jala molo adong pe halak na porsea adong Debata, dibahen ibana do asa dirippu nasida kaku do Debata i, kejam, jala lomo rohana manutung jolma di api narokko. Tikki adong halak na porsea tu gabus ni Sibolis i, gabe dang olo nasida manjalo uhum ni Jahowa na tigor. w20.06 5 ¶13-15

Godang do akka donganta na berupaya marsiajar bahasa na baru. Jadi, olo do ra gabe maol dihilala nasida paboahon aha na adong di rohana. Alai unang ma kemampuan bahasa ni nasida na taparrohahon. Taida ma balga ni holong ni nasida tu Jahowa, upaya ni nasida lao manomba Ibana, dohot akka parangena na denggan. Unang ma gabe tadok tu nasida, ‘Dang porlu ho di hami,’ holan ala na so malo nasida makkatai di bahasatta. (1 Kor. 12:21) Dang soal hita bawa manang borua, na marhasohotan manang na dang, na poso manang na matua, malo makkatai di sada bahasa manang na dang, mararga do hita sude di Jahowa dohot di akka donganta. (Rom 12:4, 5; Kol. 3:10) Sai anggiat ma tapatogu akka donganta di huria jala lam makkaholongi dohot mangargai nasida. w20.08 31 ¶20-22

Dang menyerah Apostel Paulus marbarita tu halak Atena, nang pe godang nasida na manomba gana-ganaan, mangulahon na rorang, mangihutton ajaran na sala, jala godang do nasida na mangarehei si Paulus. Si Paulus sandiri pe hea do ‘mangaleai Debata jala mangalelei naposona’. (1 Tim. 1:13) Alai ujungna, gabe halak Kristen do ibana. Pos do roha ni Jesus boi do si Paulus gabe halak Kristen. Jadi si Paulus pe songon i do mangida halak Atena on. Jala tutu do memang adong piga-piga sian nasida na gabe halak Kristen. (Ul. 9:13-15) Di abad na parjolo, godang do halak sian marragam bangso na gabe sisean ni Jesus. Tikki dibahen si Paulus surat tu akka halak Kristen na di Korint, didok ibana adong do piga-piga sian nasida najolo na mangulahon na jahat manang mangulahon seks na so patut. Dung i didok ibana ma, ‘Adong do deba sian hamu na songon i pangalahona najolo. Alai, nungnga dipaias be hamu.’ (1 Kor. 6:9-11) Molo di tikki i hamu mangolu, pos do rohamu boi nasida muba jala gabe sisean ni Jesus? w20.04 12 ¶15-16

Akka sintua, unang ma pittor manguhumi molo adong na makkilala dang adong labana manomba Jahowa. Ikkon diattusi akka sintua do, boasa songon i pakkataion dohot parniulaon ni donganta i. Hea do si Elia lari sian Ratu Isebel. (1 Raj. 19:1-3) Dirippu ibana dang marlapatan akka ulaonna saleleng on jala dipangido do tu Debata asa tumagon ma mate ibana. (1 Raj. 19:10) Dang gabe muruk Jahowa tu si Elia. Gariada dipapos Jahowa do rohana, dang holan sahalakna na manomba Jahowa. Sabar do Jahowa manangihon si Elia, jala dilehon do tugas na baru tu ibana. (1 Raj. 19:11-16, 18) Aha do parsiajaranna? Sude hita tarlumobi akka sintua, ikkon lambok do maradoppon biru-biru ni Jahowa. Ra olo do muruk ibana manang makkilala dang mararga dirina di adopan ni Jahowa. Alai ikkon rade do akka sintua manangihon ibana. Jala porlu do dipapos nasida rohana, na holong do roha ni Jahowa tu ibana. w20.06 21-22 ¶13-14

Lomo do roha ni Jahowa asa marlas ni roha hita raphon keluargatta dohot ale-aletta. (Ps. 133:1) Jesus pe adong do ale-alena. (Joh. 15:15) Di Bibel dipaboa do labana molo marale-ale hita. (Poda 18:24) Jala didok do di Bibel, dang denggan molo hita dang olo marsaor dohot halak na asing. (Poda 18:1) Godang halak makkilala, boi do media sosial mangurupi hita asa mandapot godang ale-ale jala asa unang kesepian. Alai, ikkon manat do hita mamakke media sosial. Akka pakar mandok, halak na pajotjottu mangida komentar dohot poto na dibahen halak di media sosial, ujungna gabe kesepian jala marsak. Boasa? Alana, di media sosial jotjot do akka halak mambahen poto taringot akka na menarik di ngolu ni nasida. Misalna, dibahen nasida ma potona sandiri, poto ni akka donganna, dohot poto ni akka inganan na hea dikunjungi nasida. Halak na mangida poto sisongon i, ra gabe marpikkir biasa-biasa do ngoluna saleleng on, jala dang adong na menarik. w20.07 5-6 ¶12-13

Menara Pengawal seri 53 taon 1988 mandok, “Diboto sintua do marhite tondi parbadia, boi do diurupi Jesus sintua na dia pe mandapot petunjuk sian Bibel lao menangani sada parsoalan manang mambahen keputusan na rikkot di huria. (Ul. 15:7-15) Jadi diurupi tondi parbadia do sude sintua, dang holan sada.” Sahalak sintua na mangargai sintua na asing mamboto, dang ikkon ibana na parjolo makkatai tikki di rapat sintua. Jala dang holan ibana na sai torus makkatai di rapat i. Manang didok rohana holan pandapotna na sittong. Alai serep do rohana paboahon pandapotna. Olo do ibana manangihon pandapot ni sintua na asing. Jala na uppetting, olo do ibana rap mangulas dohot sintua na asing prinsip na adong di Bibel, dohot petunjuk sian “naposo haposan”. (Mat. 24:45-47) Molo olo do akka sintua patuduhon holong jala mangargai sintua na asing tikki rapat, diurupi tondi parbadia ma nasida lao mambahen keputusan.—Jak. 3:17, 18. w20.08 27 ¶5-6

Jotjot do dipukkuli akka musu si Paulus jala dipenjarahon. Asing ni i muse, adong piga-piga halak di huria na mangalo ibana. Hape sasittongna nasida ma nian na gabe donganna. (2 Kor. 12:11; Plp. 3:18) Alai, ditaluhon si Paulus do sude na mangalo ibana. Songon dia carana? Sai toktong do ibana marbarita. Toktong do setia ibana tu akka donganna, nang pe hea dibahen haccit rohana. Jala na urrikkot, toktong do setia ibana tu Jahowa sahat tu na mate. (2 Tim. 4:8) Boi do marhasil ibana, dang alani gogona sandiri, alai ala pos rohana tu Jahowa. Adong do na mangaleai manang menganiaya hamu? Molo adong, pakke ma Bibel lao mangalusi sukkun-sukkun ni halak taringot haporseaotta, toktong lambok tu halak na mambahen na so denggan tu hita, jala burju tu sude halak, tarmasuk akka musutta.—Mat. 5:44; 1 Ptr. 3:15-17. w20.07 17-18 ¶14-15

Boi do tadok na serep do roha ni Jahowa? I do, satolop do hita songon na didok Raja Daud di ayat sadari on. (Ps. 18:35) Tikki disurat si Daud on, diingot ibana do ra muse tikki ro si Samuel tu jabu ni bapakna, lao mamillit raja Israel na baru. Si Daud do na upposo sian ualu nasida na marhaha maranggi, alai ibana do na dipillit Jahowa gabe raja lao manggattihon si Saul. (1 Sam. 16:1, 10-13) Tottu, setuju do si Daud tu na didok sahalak panurat Psalmen taringot Jahowa. Didok, “Dipaserep dirina manatap na di angka banua ginjang dohot na di tano on . . . dipatimbul do na pogos i sian gambo. Laho pahundulhon ibana top dohot angka raja ni bangsona.” (Ps. 113:6-8) Sian cara ni Jahowa maradoppon akka jolma na so sempurna, takkas ma taboto na serep do rohana. Dang holan panombaonta na dijalo Jahowa, alai dibahen Ibana do hita gabe ale-alena. (Ps. 25:14, Bibel siganup ari) Asa boi hita marale-ale tu Ibana, dilehon Jahowa do Anakna gabe tobusan lao manesa dosatta. Takkas ma taida asi ni roha ni Jahowa tu hita! w20.08 8 ¶1-3

Nungnga ditottuhon Jahowa andigan tikkina ripassononna portibi na jahat on. (Mat. 24:36) Tarpaima do Jahowa pahehehon halak na mate, alai sabar do Ibana. Dang diulahon Ibana i andorang so dapot dope tikki naung ditottuhon Ibana. (Job 14:14, 15) Dipaima Jahowa do sahat tu na ro tikkina paheheonna halak na mate. (Joh. 5:28) Tottu mandok mauliate do hita alani hasabaron ni Jahowa. Pikkirhon ma ala sabar Jahowa, godang do halak boi “marhamubaon”, termasuk ma hita. Lomo do roha ni Jahowa asa godang halak mandapot ngolu salelengna. Jadi, tapatudu ma na taargai hasabaron ni Jahowa i. Songon dia carana? Marsitutu ma hita mangalului halak “na marpangalaho na denggan na mambahen nasida tama mandapot hangoluan saleleng ni lelengna”. Taurupi ma nasida asa makkaholongi jala manomba Jahowa. (Ul. 13:48) Hasilna, gabe boi ma diargai nasida hasabaron ni Jahowa, songon naung taulahon. w20.08 18 ¶17

Lomo do rohatta asa parsiajar Bibelta mangattusi parsiajaran i. Alai dang holan i, ikkon boi do i hona tu rohana asa boi diulahon ibana parsiajaran i. Songon i do na diulahon Jesus. Dibahen ibana do parsiajaran i hona tu roha ni akka halak. Gabe olo ma nasida mangihutton Jesus. (Luk. 24:15, 27, 32) Taurupi ma parsiajar Bibelta asa solhot marale-ale tu Jahowa. Molo taurupi ibana, boi ma Jahowa gabe Ama, Debata, dohot Ale-alena. (Ps. 25:5) Taurupi ma nasida mangida parange ni Jahowa. (2 Mus. 34:5, 6; 1 Ptr. 5:6, 7) Topik aha pe na diulas hamu, haitton ma i tu parange ni Jahowa songon holongna, haburjuonna, dohot asi ni rohana. Jesus mandok “parenta na umbalga jala na parjolo”, i ma ‘makkaholongi Jahowa’ sian nasa roha. (Mat. 22:37, 38) Alani i, urupi ma parsiajar Bibelmuna makkaholongi Jahowa sian nasa rohana. w20.10 10 ¶12

Diargai Jesus do akka borua. (Joh. 4:27) Massai arga do di Jesus akka borua na mangulahon lomo ni roha ni Amana. Dianggap do nasida songon ibotona jala bagian sian keluargana. (Mat. 12:50) Olo do Jesus marale-ale tu nasida. Parrohahon ma parale-aleon ni Jesus tu si Maria dohot si Marta, dua borua na so marhasohotan dope. (Luk. 10:38-42) Ala burju do Jesus, gabe las ma roha ni si Marta dohot si Maria jonok tu ibana. Las do roha ni si Maria hundul di labbung ni pat ni Jesus songon sahalak sisean. Jala si Marta pe dang mabiar paboahon aha na adong di rohana tu Jesus tikki dang diurupi si Maria ibana. Diurupi Jesus do nasida mandapot parsiajaran na rikkot di tikki i. Jala parduli do Jesus tu nasida, jotjot do dijuppangi Jesus nasida dohot ibotona, si Lasarus. (Joh. 12:1-3) I do alana tikki marsahit si Lasarus, pos do roha ni si Maria dohot si Marta na boi do Jesus mangurupi nasida.—Joh. 11:3. w20.09 20 ¶3; 21 ¶6

Sai tarpaima-ima do tong akka sisean ni Jesus, asa pittor ro Harajaon ni Debata, jala boi ma nasida dipalua sian pamarettaon ni Rom. Tarpaima do hita muse tu Harajaon ni Debata na lao pasaehon hajahaton, jala mambahen tano on gabe inganan ni akka halak na mangulahon paretta ni Debata. (2 Ptr. 3:13) Alai ikkon sabar do hita paimahon sahat tu na ro tikki naung ditottuhon Jahowa. Dilehon Jahowa do tikki tu si Noak lao mambahen parau, jala gabe “sahalak parbarita hatigoran”. (2 Ptr. 2:5; 1 Ptr. 3:20) Sabar do Jahowa manangihon sukkun-sukkun ni si Abraham na marulak-ulak taringot keputusanna lao manghancurhon kota Sodom dohot Gomora. (1 Mus. 18:20-33) Saleleng marratus taon sai torus do sabar Jahowa tu halak Israel na so setia. (Neh. 9:30, 31) Saonari pe sabar do Jahowa mangalehon tikki tu akka halak asa “marhamubaon”. (2 Ptr. 3:9; Joh. 6:44; 1 Tim. 2:3, 4) Contoh na dibahen Jahowa mangurupi hita asa toktong sabar tikki marbarita dohot mangajari. w20.09 10 ¶8-9

Tikki dipahehe Jahowa sasahalak, dipaulak Jahowa do muse ingatanna, jala dibahen Jahowa do sarupa pangalahona songon andorang so mate ibana. Pikkirhon ma aha lapatan ni i. Alani holongna, diparrohahon jala diingot Ibana do sude na tapikkirhon, tahilala, tahatahon, dohot na taulahon. Raja Daud mandok, takkas do ditanda Jahowa ganup halak. (Ps. 139:1-4) Alani i molo tarimangi na massai takkas do ditanda Jahowa hita, gabe dang holsoan be hita. Ingot ma, parduli do Jahowa tu hita. Mararga do ganup halak di Ibana. Diparrohahon Ibana do sude na masa di ngolutta. Jadi unang ma didok rohatta, holan sahalakta do hita. Alana, sai didongani Jahowa do hita, jala lomo do rohana mangurupi hita.—2 Kron. 16:9. w20.08 17 ¶13-14

Lomo do roha ni Jahowa mangajari naposona. Diajari Ibana do hita asa boi tatanda Ibana, tahaholongi, jala mandapot hangoluan saleleng ni lelengna. (Joh. 17:3) Dipakke Jahowa do huria Kristen di abad na parjolo mangajari naposona. (Kol. 1:9, 10) Songon naung dijanjihon Jesus, diurupi tondi parbadia do akka siseanna. (Joh. 14:16) Tondi parbadia do muse na mangurupi nasida mangattusi Hata ni Debata. Boi ma diingot akka siseanna aha na didok dohot na diulahon Jesus jala disuratton ma i di bukku Injil. Parbinotoan i ma na mambahen togu haporseaon ni akka halak Kristen di abad na parjolo. Lam holong ma roha ni nasida tu Debata, tu Jesus, dohot tu akka dongan. Nungnga disurirangkon Jahowa “di ujung ni angka ari”, marroan ma halak sian sude bangso lao nakkok tu dolok ni Jahowa asa diajari akka dalanna. (Jes. 2:2, 3) Saonari, nungnga taida surirang i digohi. w20.10 24 ¶14-15

Aha do na mambahen sasahalak dang olo manangihon sipasingot sian donganna? Ginjang ni roha. Halak siginjang roha, holan manangihon hata na pageok-geokkon pinggol nasida. Jala “ndang olo be nasida manangihon hasintongan”. (2 Tim. 4:3, 4) Didok roha ni nasida dang porlu be nasida dipasingot. Ai dirippu do umbisuk nasida jala urrikkot sian halak na asing. Alai didok si Paulus do, “Molo adong mandok dirina ringkot, hape ndang songon i, na manggabusi dirina do ibana disi.” (Gal. 6:3) Jala takkas do dipaboa Raja Salomo taringot on. Disurat ibana, “Tagonan do sada dolidoli na pogos jala na bistok sian sada raja naung matua nian hape na oto, na so olo be paingoton.” (Pjm. 4:13) Pikkirhon ma na diulahon si Petrus tikki dipasingot si Paulus ibana di jolo ni godang halak. (Gal. 2:11-14) Boi do muruk si Petrus tu si Paulus, ala hurang denggan cara ni si Paulus pasingotton ibana. Jala di jolo ni natorop muse ibana dipasingot. Alai marbisuk do si Petrus, dijalo ibana do sipasingot i jala dang sogo rohana tu si Paulus. Gariada di pudian ni ari didok si Petrus do si Paulus i “donganta na tahaholongi”.—2 Ptr. 3:15. w20.11 21 ¶9, 11-12

Aha do na mangurupi parsiajar Bibel asa maju? Ro tu parpunguan. Alana molo ro ibana tu parpunguan, boi ma lam bagas parbinotoanna, lam togu haporseaonna, jala lam balga holongna tu Jahowa. (Ul. 15:30-32) Jala boi do tapaboa tu ibana songon dia holongta tu Jahowa mambahen hita boi mangulahon paretta ni Debata. (2 Kor. 7:1; Plp. 4:13) Tikki ditanda parsiajar Bibel akka donganta na setia di huria, boi ma diparsiajari nasida songon dia cara mangulahon paretta ni Jesus lao makkaholongi Debata dohot akka dongan jolma. (Joh. 13:35; 1 Tim. 4:12) Boi do diida nasida akka dongan na mangadopi situasi na sarupa dohot ibana. Gabe pos ma rohana, ibana pe boi do muba asa boi gabe sisean ni Kristus. (5 Mus. 30:11) Sude akka dongan na di huria pe, boi do mangurupi parsiajar Bibel asa maju.—Mat. 5:16. w20.11 5 ¶10-12

Olo do ra na nidok ni Apostel Paulus dison, na tutu ibana mangalo binatang buas di sada stadion di Epesus. (2 Kor. 1:8; 4:10; 11:23) Alai olo do ra maksudna, paraloan sian halak Jahudi dohot sian akka halak na asing na dos songon “binatang buas”. (Ul. 19:26-34; 1 Kor. 16:9) Jadi manang aha pe maksud ni si Paulus dison, pasti berbahaya do situasina di tikki i. Alai nang pe songon i, toktong do pos rohana manatap ari na naeng ro. (1 Kor. 15:30, 31; 2 Kor. 4:16-18) Hita pe saonari, mangolu di tikki na berbahaya do. Adong do donganta na gabe korban kejahatan. Na asing, tinggal di daerah na so aman ala masa porang. Akka donganta na asing muse, dang bebas marbarita na uli ala diorai ulaonta marbarita di daerah ni nasida. Alai toktong do nasida marbarita na uli nang pe dipenjara manang dipamate. Torus do nasida setia manomba Jahowa. Jala gabe sitiruon na denggan do on tu hita. Dang mabiar nasida, alana molo tung pe mate saonari, adong do janji ni Debata sipaimaon ni nasida di ari na naeng ro. w20.12 9 ¶3-4

Hea do metmet rohamuna, ala dang denggan tanggapan ni akka halak di ingananmuna marbarita? Manang ala maol manjuppangi akka halak di jabuna? Molo songon i do situasina, penting hian do asa tetap positif hita. Aha do maksudna? Taingot ma, nungnga didok Jesus hian holan saotik do akka halak na mardalan di dalan hangoluan. (Mat. 7:13, 14) Jala tikki marbarita hita sada hasangapon do i, alana gabe rap saulaon ma hita dohot Jahowa, Jesus, dohot akka suru-suruan. (Mat. 28:19, 20; Pgk. 14:6, 7) Jahowa do na manarik sasahalak asa manomba Ibana. (Joh. 6:44) Jadi molo dang olo sasahalak manangihon barita na tapasahat, mungkin di tikki na asing olo do ra ibana manangihon. Sahalak donganta borua na margoar si Debora mandok, “Jotjot do marhasil Sibolis mamakke metmet ni rohatta asa unang tasomba be Jahowa.” Alai, umgogo do Jahowa sian Sibolis. w20.12 26 ¶18-19; 27 ¶21

Godangan halak Kristen karejo do mangalului hepeng asa boi diparade kebutuhanna dohot kebutuhan ni keluargana. Nang pe songon i disangahon nasida do asa boi dohot tu ulaon ni organisasi. Misalna adong do sian nasida na gabe relawan tikki masa bencana, gabe relawan konstruksi, jala sude do hita boi mangalehon sumbangan tu ulaon marbarita di liat portibi on. Diulahon nasida pe sudena i ala holong do roha ni nasida tu Debata dohot tu dongan jolma. Tapatudu do muse holongta tu dongan sahaporseaon tikki ro hita marpungu ganup minggu. Nang pe loja hita tausahahon do asa ro torus marpungu. Nang pe taroktokon hita taupayahon do mangalean komentar. Jala nang pe adong masalahta sandiri alai tapatogu do akka dongan na asing tikki makkata-hatai dohot nasida di parpunguan. (Heb. 10:24, 25) Pasti mandok mauliate do hita di sude upaya ni akka donganta on. w21.01 10 ¶11

Maol do di halak na ginjang roha lao mamuji halak na asing. Alana didok rohana, holan ibana do na ikkon dipuji. Sai dibanding-bandingkon ibana do dirina tu na asing, jala sai naeng bersaing do ibana tu nasida. Dang olo ibana mangalatik na asing dohot mangalehon tugas tu nasida. Didok rohana holan ibana do na boi denggan mangulahon sada ulaon. Alani i, molo adong parange sisongon i di hita, martangiang ma hita tu Jahowa asa diurupi hita ‘paubahon pikkiranta’. Jala asa unang gabe halak na ginjang roha hita. (Rom 12:2) Mandok mauliate do hita tu sitiruon na dibahen Jahowa tu hita! (Ps. 18:35) Takkas do boi taida serep ni roha ni Jahowa sian cara ni Ibana maradoppon akka naposona, jala lomo do rohatta maniru Ibana. Lomo do rohatta tong maniru akka naposo ni Jahowa na marserep ni roha. Toktong ma talehon sude hasangapon dohot hamuliaon holan tu Jahowa.—Pgk. 4:11. w20.08 12-13 ¶19-20

Hadiah na massai arga do pernikahan i sian Jahowa. Alai jolma na so sempurna do akka na marrumah tangga. (1 Joh. 1:8) Alani i do didok Bibel molo na marrumah tangga i manaon godang “hasusaan”. Dipangido Jahowa do suami Kristen mangurupi keluargana asa torus marale-ale tu Jahowa, mambahen nasida marlas ni roha, jala karejo lao paradehon kebutuhan ni keluargana. (1 Tim. 5:8) Alai istri pe porlu do paradehon tikkina lao manjaha jala mangarimangi Bibel dohot martangiang secara pribadi tu Jahowa nang pe sibuk ibana. Memang dang sai mura mangulahon i ala sibuk do akka istri. Hape massai penting hian do i. Boasa songon i? Ala dipangido Jahowa do asa ganup naposona marale-ale tu Ibana secara pribadi. (Ul. 17:27) Pasti berjuang do sahalak istri asa boi unduk tu suamina na so sempurna. Alai molo diattusi ibana boasa diparettahon Jahowa ikkon unduk istri tu suami, boi do gabe ummura ibana mangulahon i. w21.02 9 ¶3, 6-7

Dipatudos do sitaonon i songon api na dipakke lao manopa podang. Dung sian api dibahen ma muse podang i tu aek asa lam kuat. Songon i do tong haporseaotta, boi do lam togu molo martahan hita mangadopi godang hasusaan. Alani i do didok si Jakobus, “Molo toktong hamu togu, gabe sun denggan ma hamu di saluhutna jala dang hahurangan manang aha pe.” (Jak. 1:4) Dipaboa si Jakobus do muse akka na mambahen mago las ni rohatta. Molo dang taboto aha na ikkon taulahon tikki masa sitaonon boi do gabe mabiar hita jala mago las ni rohatta. Alani i molo masa sitaonon porlu do tapangido Jahowa mangurupi hita mambahen keputusan na palashon rohana, na bermanfaat tu dongan sahaporseaon, jala na mangurupi hita torus setia tu Jahowa. (Jer. 10:23) Porlu do di hita bisuk asa taboto aha na ikkon taulahon jala aha na ikkon tahatahon molo adong paraloan. w21.02 28 ¶7-9

Jahowa do sitiruon di hita. Massai holong do rohana tu hita. Alani i, molo setia hita tu Ibana “dang adong na boi manirang hita sian holong ni Debata”. (Rom 8:38, 39) Lapatan ni hata “sian nasa roha” di bahasa Junani, i ma marsitutu patuduhon holong. Alai sipata dang mura patuduhon holong tu akka dongan. Alani i, tikki adong na mambahen haccit rohatta, porlu do hita ‘marsihaholongan asa boi sabar tu na asing. Toktong marsada jala mardame ala ditogu-togu tondi parbadia’. (Eps. 4:1-3) Dang gabe hasalaan ni nasida be na taida. Ai songon i do cara ni Jahowa mangida hita, jadi tatiru ma Ibana. (1 Sam. 16:7; Ps. 130:3) Dang sai mura patuduhon holong tu akka donganta. Tarlumobi tikki taida adong na hurang denggan sian nasida. On do na hea masa tu halak Kristen di abad na parjolo. Songon si Euodia dohot si Sintike, dijujui si Paulus ma “asa marsada ni roha nasida marhobas tu Tuhan” i.—Plp. 4:2, 3. w21.01 22 ¶10-11

Holong do roha ni akka dongan na matua tu hamu. Alana, rap “marsada” do hamu dohot nasida manomba Jahowa. (Sep. 3:9) Diargai nasida do semangatmuna tikki mandalatton tugasmuna. Massai las do roha ni nasida mangida hamu. Hamu akka dongan bawa na poso, ingot ma, dihaholongi jala dihaporseai Jahowa do hamu. Ai nungnga didok Jahowa hian, akka na poso do tentarana na rade marhobas tu Ibana. (Ps. 110:1-3) Diboto Jahowa do na holong rohamuna tu Ibana. Diida Jahowa do upayamuna mangalehon na undenggan tu Ibana. Alani i, sabar ma hamu tu akka dongan na asing, jala unang paksahon dirimuna ikkon sempurna. Unang ma haccit rohamuna molo dipasingot. Rade ma hamu dilatik. Ingot ma pelatihan sian Jahowa do i. (Heb. 12:6) Ringgas ma hamu mandalatton tugas manang aha pe na dilean tu hamu. Jala na uppetting, bahen ma Jahowa bangga tu hamu.—Poda 27:11. w21.03 7 ¶17-18

Boi do gabe metmet rohatta ala marpikkiran negatif hita tu diritta sandiri, sai mangingot-ingot hasalaatta, manang alani parsahiton. Boi do muse gabe metmet rohatta ala dang dapotta dope tugas na taharappon manang ala dang denggan tanggapan ni akka halak di inganatta marbarita. Mura do hita marpikkiran negatif tu diritta sandiri jala sai mangingot akka hasalaatta di tikki naung salpu. Alani i, olo do ninna rohatta dang lomo be roha ni Jahowa hita sahat tu tano na imbaru. Bahaya do molo torus songon i pakkilalaatta. Ingot ma, didok do di Bibel “nunga mardosa sude jolma” asing ni Jesus. (Rom 3:23) Jadi dang hea diharappon Jahowa hita ikkon sempurna, jala dang sai dipaingot-ingot Jahowa hasalaatta i. Ama parholong do Jahowa i jala sabar. Lomo do rohana mangurupi hita. Diida Ibana do upayatta asa unang mangulahon na sala. Jala diida Ibana do upayatta asa unang marpikkiran negatif hita tu diritta sandiri. Sai rade do Ibana mangurupi hita.—Rom 7:18, 19. w20.12 22 ¶1-3

Sude do hita adong di sada dalan. Tujuanta asa boi mangolu di tano na imbaru na diparade Jahowa di Harajaonna. Ganup ari marsitutu do hita asa torus di dalan tu hangoluan. Alai songon na didok Jesus, soppit do dalan i jala maol do torus mardalan disi. (Mat. 7:13, 14) Ala dang sempurna hita, olo do gabe tatinggalhon dalan i. (Gal. 6:1) Molo naeng torus hita mardalan di dalan na soppit tu hangoluan i, ikkon olo do hita paubahon cara marpikkir, sikap, dohot pangalahotta. Dijujui Apostel Paulus do asa ‘toktong marhamubaon’. Dang mura mamareso roha dohot pikkiranta. Alana akkal do roha i. Jadi dang sai taboto aha na di bagasan roha dohot pikkiranta. (Jer. 17:9) Gabe olo do hita ‘dioto-otoi dirintta’ sandiri. (Jak. 1:22) Jadi, ikkon tapakke do Hata ni Debata lao mamareso diritta. Boi do Bibel mangurupi hita mamboto aha na adong di roha dohot “na adong di pingkiranta”.—Heb. 4:12, 13. w20.11 18 ¶1-3

Molo serep do rohatta, gabe boi ma hita marlas ni roha. Boasa? Molo taboto dang sai sude boi taulahon, las do rohatta tikki mandapot pangurupion sian halak na asing. Misalna, parrohahon ma aha na masa tikki dipamalum Jesus sappulu halak na hona kusta. Holan sada do sian nasida na mulak muse lao mandok mauliate tu Jesus, ala nungnga dipamalum Jesus ibana. Diboto ibana do, dang boi malum sahitna i molo so alani Jesus. Jadi mandok mauliate do ibana alani i, jala dipasangap ibana do Jahowa. (Luk. 17:11-19) Molo serep do roha ni sasahalak, dang maol ibana marsada jala marale-ale dohot na asing. Boasa? Alana diboto ibana godang do akka parange na denggan sian halak na asing. Las do roha ni halak na serep roha molo adong donganna na marhasil mangulahon tugasna. Dipuji jala diargai ibana do nasida. w20.08 12 ¶17-18