April

Holong hian do roha ni Jesus tu jolma. Rade do ibana mate lao manobus hita. (Joh. 15:13) Dang tarbalos hita holong ni Jahowa dohot Jesus. Alai tapatudu ma na taargai tobusan i sian parngoluotta ganup ari. (Kol. 3:15) Massai arga do tobusan di akka halak na dipillit lao mangolu tu surgo. (Mat. 20:28) Alana molo porsea nasida tu tobusan ni Kristus, didok Jahowa ma nasida halak na tigor jala dianggap ma nasida anakna. (Rom 5:1; 8:15-17, 23) Songon i nang biru-biru na asing. Molo porsea nasida tu tobusan, gabe dianggap Debata ma nasida akka halak na sittong jala boi ma nasida malua sian “hasusaan bolon”. (Pgk. 7:13-15) Molo ro hita tu Borngin Parningotan ganup taon, i patuduhon na taargai do tobusan. w22.01 23 ¶14-15

Haccit hian do dihilala Jesus ala ditudu ibana sebagai parjahat na mangaleai Debata dohot goarna. (Mat. 26:64-66) Marsak situtu do Jesus alani i, jala hea do dipangido ibana tu Jahowa asa unang i alasanna ibana dihukum mate. (Mat. 26:38, 39, 42) Digattung do Jesus di hau lao paluahon halak Jahudi sian bura. (Gal. 3:10) Nungnga marjanji halak Jahudi mangoloi Patik ni Debata, alai dilanggar nasida do i. Gabe hona bura ma nasida jala ikkon mate, ala pinoppar ni si Adam do nasida. (Rom 5:12) Di Patik ni si Musa, halak na mardosa ikkon dipamate do. Dung i, digattung ma bakkena di hau. Menurut Patik i, magigi situtu do Debata tu halak na targattung di hau. (5 Mus. 21:22, 23; 27:26) Tikki digattung Jesus di hau, na manggattihon halak Jahudi do ibana disi, gabe adong ma kesempatan ni nasida mangolu saleleng ni lelengna. w21.04 16 ¶5-6

Bayakkon ma songon dia haccitna tikki naeng dipamate Jesus. Ditakkup tentara ni Rom do ibana jala dipukkuli. (Mat. 26:52-54; Joh. 18:3; 19:1) Dicambuk nasida ma Jesus sappe marmudari. Dung i disuru ma Jesus mamboan hau na massai borat di tanggurungna na marmudari i, ujungna dang margogo be Jesus. Jadi, disuru akka tentara i ma si Simon mamboan hau i tu inganan ni Jesus dipakkuhon. Ai pas lewat do ibana tikki i. (Mat. 27:32) Dung sahat tusi, dipakkuhon akka tentara i ma tangan dohot pat ni Jesus tu hau. Tikki dipajongjong hau i, lam haccit ma dihilala Jesus jala maol ma ibana marhosa. Tangis do omakna dohot akka donganna, alai molo halak Jahudi direhei do Jesus. (Luk. 23:32-38; Joh. 19:25) Alai nang pe songon i haccitna, toktong do Jesus setia. Martangiang ma ibana tu Jahowa pasahatton ngoluna, dung i unduk ma ibana jala mate. (Mrk. 15:37; Luk. 23:46; Joh. 10:17, 18; 19:30) On ma hamatean na ungngeri na hea masa, ala ikkon jolo leleng do Jesus tersiksa jala dileai. w21.04 16 ¶4

Dipaboa Jesus do tu 11 apostelna taringot dua parjanjian, i ma parjanjian na imbaru dohot parjanjian Harajaon. (Luk. 22:20, 28-30) Ala nungnga dibahen Jesus parjanjian dohot nasida, gabe boi ma akka apostel i dohot akka halak na dipillit lao mangolu tu surgo gabe raja dohot malim di surgo. (Pgk. 5:10; 14:1) Alani i, holan akka halak na dipillit tu surgo do na boi mangallang roti dohot manginum anggur di acara Borngin Parningotan i. Alana holan nasida do na dohot tu dua parjanjian i. Akka aha do harapan na lao dijalo nasida? Dapot ni nasida ma daging na so boi busuk, mangolu ma nasida salelengna di surgo, rap mamaretta ma nasida dohot Jesus, jala boi ma nasida mangida Jahowa! (1 Kor. 15:51-53; 1 Joh. 3:2) Asa boi dapot ni nasida i, ikkon toktong do nasida setia tu Jahowa.​—2 Tim. 4:7, 8. w22.01 21 ¶4-5

Adong do dua parjahat na dipakkuhon di sapping ni Jesus. (Luk. 23:40, 41) Alai gabe muba do roha ni sahalak sian parjahat i jala didok ibana, “Jesus, ingot ma au molo dung masuk ho tu Harajaonmi.” (Luk. 23:42) Ala diboto Jesus na parasi roha do Bapakna, didok ma tu parjahat i na lao mangolu do ibana di Paradeiso. (Ps. 103:8; Heb. 1:3) Jadi pos ma rohatta, lomo do roha ni Jahowa manalpuhon hasalaatta ala parasi roha do Ibana. Alai ikkon jolo muba do hita jala tapatudu haporseaon tu tobusan ni Jesus. (1 Joh. 1:7) Nang pe songon i, adong do ra sian hita na merasa dang mungkin disalpuhon Jahowa hasalaatta. Molo songon i do pakkilalaanmuna, pikkirhon ma on: Molo tu parjahat na baru bertobat sajo asi roha ni Jahowa, apalagi ma tu akka naposona na setia.​—Ps. 51:1; 1 Joh. 2:1, 2. w21.04 9 ¶5-6

Ala setia do Jesus sahat tu na mate, boi ma dipasae ibana sude tugas sian Jahowa. Na parjolo, dibuktihon Jesus ma pargabus do Sibolis. Dipatudu Jesus do na boi jolma na sempurna toktong setia tu Jahowa nang pe dibahen Sibolis tantangan na maol. Na paduahon, dilean Jesus ma ngoluna gabe tobusan. Alani i, boi ma jolma na so sempurna jonok tu Jahowa, jala adong ma harapan ni nasida mangolu salelengna. Na patoluhon, dipabadia Jesus ma goar ni Jahowa jala dipatudu ma holan pamarettaon ni Jahowa do na adil jala na sittong. Songon Jesus, anggiat ma boi hita setia tu Jahowa ganup ari. Molo tung pe ikkon mate hita, nga boi be tadok, “Jahowa, nungnga hubuktihon be kesetiaanku, nungnga hupatudu pargabus do Sibolis, nungnga hupabadia goarmu, jala huakkui do holan Ho na marhak mamaretta!” w21.04 12 ¶13-14

Dung dileai, disiksa, jala ditudu Jesus mangulahon hajahaton na so hea diulahon ibana, dipakkuhon ma tangan dohot patna. Pasti haccit hian do dihilala Jesus molo bergerak manang makkatai ibana. Alai nang pe songon i, tetap do Jesus makkatai lao paboahon parsiajaran na penting. Dipaingot do hita asa olo manalpuhon hasalaan ni dongan, jala pos ma rohatta olo do Jahowa manalpuhon hasalaatta. Adong do akka dongan sahaporseaon na songon keluargatta, na sai rade mangurupi hita. Molo porlu hita diurupi, ikkon olo do hita paboahon i tu nasida. Taingot ma, urupan ni Jahowa do hita asa boi martahan manaon hasusaan. Dipaingot do hita muse asa manjaga kesetiaanta tu Jahowa tiap ari jala menganggap i sebagai kesempatan parpudi patuduhon kesetiaanta. Pos ma rohatta molo tung pe mate hita, paheheon ni Jahowa do hita. w21.04 8 ¶1; 13 ¶17

Molo taihutton bogas ni pat ni Jesus, dapotta ma hangoluan saleleng ni lelengna. Hea do disukkun sahalak bawa na mora tu Jesus songon dia carana mandapot hangoluan na saleleng ni lelengna. Didok Jesus ma, “Ihutton ma au.” (Mat. 19:16-21) Hea do muse didok Jesus tu halak Jahudi na so porsea tu ibana songon on, “Diihutton [biru-birukku] do au. Lehonokku do hangoluan na saleleng ni lelengna tu nasida.” (Joh. 10:24-29) Molo porsea hita tu Jesus, pasti taihutton do sude na diajarhon dohot na diulahon ibana. Hasilna, dapotta ma hangoluan na saleleng ni lelengna i. (Mat. 7:14) Asa boi taihutton bogas ni pat ni Jesus, ikkon jolo takkas do tatanda ibana, jala torus taparsiajari akka sifatna, cara marpikkirna, dohot parettana. Dang soal nungnga sadia leleng hita di hasittongan, ikkon torus do berupaya hita mananda Jahowa dohot Jesus, Anakna i. w21.04 4 ¶9-10

Jotjot do Apostel Paulus manolsoli hasalaanna sebelum gabe halak Kristen. Jala hea do didok ibana, “Dosakku ma na unggodang.” (1 Tim. 1:15) Sebelum mananda hasittongan, jotjot do si Paulus menganiaya halak Kristen, mamenjarahon nasida, jala mendukung akka halak na naeng pamatehon nasida. (Ul. 26:10, 11) Bayakkon ma songon dia perasaan ni si Paulus tikki pajuppang dohot akka na poso di huria naung mate natua-tuana alani ibana. Pasti merasa bersalah do ibana. Alai disadari ibana do, dang tarbahenna be manguba situasi. Porsea do si Paulus, mate do Jesus humokkop dosana. Didok ibana, “Alai ala asi ni roha ni Debata na massai balga i do umbahen na boi au songon saonari on.” (1 Kor. 15:3, 10) Aha do parsiajaranna tu hita? Pos ma rohamuna, mate do Jesus humokkop hamu asa boi hamu marale-ale tu Jahowa. (Ul. 3:19) Na uppetting di Jahowa, i ma na taulahon saonari dohot di ari na naeng ro, dang na taulahon najolo i.​—Jes. 1:18. w21.04 23 ¶11

Nang pe godang halak Jahudi di jaman ni Jesus marpikkir dang porlu mate Messias, alai Surat na Badia mandok, “Nungnga dilehon ibana dirina tu hamatean jala dirippu halak do ibana parjahat, diusung ibana do dosa ni godang halak, jala ibana ma na mambahen pangidoan tu Debata taringot tu halak na mardosa.” (Jes. 53:12) Jadi, dang adong alasan ni halak Jahudi manolak Jesus ala dihukum mate di hau. Molo saonari dibege hamu barita na hurang denggan taringot Saksi Jahowa, lului ma fakta na sasittongna. Di Jamita na di Dolok, nungnga didok Jesus na lao “diparoa-roa” do akka siseanna. (Mat. 5:11) Sibolis do na mambahen i. Dipengaruhi ibana do akka halak lao paroa-roahon hita. (Pgk. 12:9, 10) Unang ma porsea hita tu gabus i jala unang ma gabe gale haporseaotta alani i. w21.05 12 ¶14, 16

Dipapos Jesus do roha ni akka siseanna na urupan ni Jahowa do nasida. (Mat. 10:19, 20, 29, 30) Hita pe, taurupi ma studitta marpos ni roha tu Jahowa. Rap martangiang ma hamu dohot ibana taringot cita-citana. Donganta si Franciszek na tinggal di Polandia mandok, “Jotjot do najolo guru studikku manangiakkon cita-citakku tikki rap martangiang hami. Ala huida dialusi Jahowa tangiangna i, gabe tergerak ma au martangiang secara pribadi. Huingot do songon dia Jahowa mangurupi au tikki mangido cuti sian tempat karejokku na baru asa boi marpungu dohot kebaktian.” Sian on taboto, parduli do Jahowa tu akka parsiajar Bibel. Dihaholongi jala diargai Ibana do akka penyiar na berupaya mangurupi studina asa jonok tu Ibana. (Jes. 52:7) Molo dang adong dope studimuna saonari, dohot ma hamu mandongani akka penyiar na asing mangurupi studina mambahen kemajuan jala tardidi. w21.06 7 ¶17-18

Hadiah sian Jahowa do Bibel. Molo taratur hita manjaha i, on patuduhon na taargai do hadiah i. Tabahen ma jadwal manjaha jala mamparsiajari Bibel, jala taihutton i. Molo taulahon i, lam togu ma haporseaotta tu Jahowa. Berbeda do hita sian “halak na bisuk dohot halak na pistar” di portibi on. Porsea do hita tu Debata, jala haporseaotta i adong do dasarna di Bibel. (Mat. 11:25, 26) Ala taparsiajari Bibel, gabe taboto ma boasa godang hasusaan di portibi on, jala aha na lao bahenon ni Jahowa di ari na naeng ro. Alani i, tapatogu ma haporseaotta tu Jahowa jala taurupi ma akka halak mananda Ibana. (1 Tim. 2:3, 4) Tarpaima-ima do hita sude halak marsurak mandok, “Ale Jahowa Debatanami, na tama do ho manjalo hasangapon . . . Ai ho do manoppa saluhutna.”​—Pgk. 4:11. w21.08 18-19 ¶18-20

Sintua do na martanggung jawab mangalean nasehat tu akka dongan di huria. Ikkon berupaya do nasida asa “parohon las ni roha” nasehat i. (Poda 27:9) Ala holong roha ni akka sintua tu dongan sahaporseaon, dipasingot nasida do akka dongan na hampir mangulahon na sala. (Gal. 6:1) Alai sebelum mangalehon nasehat, ikkon dipikkiri akka sintua do hata ni si Paulus on, “Halak na marholong ni roha i sabar, burju . . . Tahan manaon sude hasusaan, porsea di sasude, toktong paimahon akka na denggan di sasude, sabar jala togu do haporseaonna tikki mangadopi manang aha pe.” (1 Kor. 13:4, 7) Molo dirimangi akka sintua ayat on, gabe boi ma nasida patuduhon holong tikki mangalehon nasehat. Molo boi dirasahon sasahalak na parduli do sintua i, gabe lam mura ma ibana mangulahon nasehat i. w22.02 14 ¶3; 15 ¶5

Sempurna do ditoppa Debata suru-suruan dohot jolma. Alai adong ma sada suru-suruan na mangalo. Digoari ma ibana Setan (lapatanna “Pangalo”). Digoda ibana ma si Adam dohot si Hawa asa mangalo tu Jahowa. Digoda do tong akka suru-suruan na asing dohot pinoppar ni si Adam asa dohot mangalo. (Jud. 6) Nang pe songon i, toktong do sabar Jahowa paimahon sappe dapot tikkina manghukum akka pangalo i. Dung i, dang adong be parjahat di tano on. Jala marlas ni roha ma hita rap dohot Jahowa. Didok Sibolis, olo pe si Job dohot akka naposo ni Jahowa na asing manomba Debata, ala na adong do na binuatna. (Job 1:8-11; 2:3-5) Sahat tu saonari songon i dope didok Sibolis. (Pgk. 12:10) Alai gabus do i. Boi do tabuktihon na tutu holong rohatta tu Jahowa molo toktong hita setia tu Jahowa nang pe adong hasusaan. w21.07 9 ¶7-8

Dipaboa Apostel Paulus do di suratna sada ilustrasi lao patuduhon massai penting do mengubah gaya hidupta. Didok ibana, ikkon ‘tapakkuhon do pangalahotta najolo i di hau’. (Rom 6:6) Olo do Jesus dipakkuhon di hau asa boi mambahen las roha ni Jahowa. Hita pe ikkon olo do mambolokkon sifat dohot kebiasaan na dihasogohon Jahowa. Boi ma ias panggora ni rohatta molo taulahon i, jala boi ma dapotta hangoluan saleleng ni lelengna. (Joh. 17:3; 1 Ptr. 3:21) Dang Jahowa na ikkon mangihutton standarta, alai hita do na ikkon muba asa boi mangihutton standarna. (Jes. 1:17, 18; 55:9) Nang pe nungnga tardidi hamu, ikkon torus do hamu berjuang mangalo keinginan na sala. Martangiang ma tu Jahowa, jala tondi parbadiana ma andalhon hamu, unang gogomuna sandiri. (Gal. 5:22; Plp. 4:6) Ikkon bertekad do hita mambolokkon pangalaho na leleng. w22.03 6 ¶15-17

Molo tautamahon Harajaon ni Debata dohot lomo ni rohana, marjanji do Jahowa paradehon sipanganon, pakkean, dohot tempat tinggal di hita. (Mat. 6:33) Unang ma hea ro tu rohatta, ikkon godang do arta asa boi las roha jala aman ngolutta. Alana taboto do, asa boi hita marlas ni roha ikkon taulahon do lomo ni roha ni Jahowa. (Plp. 4:6, 7) Molo tung pe godang barang na boi tatuhor, ikkon tapikkiri do boha carana mangurus i. Olo do gabe holan i na tapikkiri. Hape dipangido Jahowa do hita mangutamahon lomo ni rohana. Pasti dang olo hita songon bawa na mora na di jaman ni Jesus. Ala paholongku rohana tu artana, gabe disia-siahon ibana ma kesempatan lao manomba Jahowa jala gabe anak ni Debata!​—Mrk. 10:17-22. w21.08 6 ¶17

Molo taparsiajari Bibel, gabe taboto ma akka sifat ni Jahowa. Tarida do akka sifatna i sian akka toppaanna. (2 Mus. 34:6, 7; Ps. 145:8, 9) Molo lam takkas tatanda akka sifatna i, gabe lam pos ma rohatta na tutu do adong Jahowa, lam togu ma haporseaotta, lam holong ma rohatta tu Jahowa, jala lam togu ma parale-aleotta tu Ibana. Asing ni i, marbarita na uli ma hamu tu akka halak. Boha do molo dang diboto hamu mangalusi halak na mandok dang tutu adong Debata. Lului ma alusna sian publikasitta. Pangido ma muse donganta naung marpengalaman mangurupi hamu. Jala unang ma kecewa hamu molo dang diterima nasida penjelasanmuna. Tetap do adong manfaatna molo mangariset hamu, gabe lam togu ma haporseaonmuna. w21.08 18 ¶14-15

Asa boi tabahen las roha ni Jahowa, dang na berarti dang boi taulahon aha na tahalomohon. (Pjm. 5:19, 20) Alai molo i do tabahen na uppetting di ngolutta, sarupa ma hita songon bawa na di tudosan ni Jesus. Bekerja keras do ibana asa sonang ngoluna, alai gabe dilupahon ibana do Debata. (Luk. 12:16-21) Molo adong tantangan na taadopi, ikkon martangiang do hita tu Jahowa jala tapikkiri ma songon dia cara mangatasi i. (Poda 3:21) Nungnga godang pasu-pasu na tajalo sian Jahowa, jadi taargai ma i. Berupaya ma hita mangulahon manang aha pe na parohon sangap tu goar ni Jahowa. (Heb. 13:15) Molo taulahon i, lam godang ma dapotta pasu-pasu sian Jahowa. Bertekad ma hita ‘mandai jala mangida haburjuon ni Jahowa’ ganup ari. Dung i boi ma tatiru Jesus na mandok, “Sipanganokku, i ma mangulahon lomo ni roha ni na marsuru au jala pasaehon ulaon na sian Ibana.”​—Joh. 4:34. w21.08 30-31 ¶16-19

Lomo do roha ni Sibolis asa sombong hita. Alana molo sombong hita songon ibana, dang dapotta be hangoluan na saleleng ni lelengna. Alani i do dipaingot si Paulus “asa unang ginjang [rohatta] jala gabe diuhumi songon Sibolis”. (1 Tim. 3:6, 7) Ise pe hita, na baru manang naung leleng di hasittongan, boi do masuk tu jorat ni Sibolis on. Halak na sombong, biasana egois do. Lomo do roha ni Sibolis asa holan diritta sandiri na tapikkiri jala dang fokus manomba Jahowa, khususna tikki adong masalahta. Hea do hamu digosipi? Hea do hamu diperlakukan tidak adil? Tikki masa i, lomo do roha ni Sibolis asa muruk hita tu Jahowa dohot tu akka dongan. Ujungna dang poda ni Jahowa be na tapakke pasaehon masalah i, alai gabe tapakke ma caratta sandiri.​—Pjm. 7:16, 20. w21.06 15 ¶4-5

Taon 520 SM, dilehon Jahowa ma tugas tu si Haggai lao patoguhon halak Jahudi asa semangat muse mambangun bagas joro. (Esr. 6:14, 15) Boasa disuru Jahowa si Haggai mangulahon i? Taon 537 SM, mulak ma halak Jahudi sian Babel tu Jerusalem. Piga-piga bulan dung sahat di Jerusalem, dibahen nasida ma fondasi ni bagas joro. (Esr. 3:8, 10) Alai dang leleng dukkon i, adong ma situasi na maol na diadopi nasida. Gabe mabiar do nasida tu akka bangso di sekitar ni halak i, jadi dipaso ma pembangunan i. (Esr. 4:4; Hag. 1:1, 2) Disuru Jahowa ma si Haggai paboahon surirang na mambahen togu haporseaon ni halak Jahudi. Istilah “Jahowa Pamimpin ni Akka Tentara”, mambahen pos roha ni nasida massai godang do tentara ni Jahowa, i ma akka suru-suruan. Jadi ikkon Jahowa do na diandalhon nasida asa boi marhasil. w21.09 15 ¶4-5

Saonari, diihutton Saksi Jahowa do hata ni Jesus on. Nang pe ro sian marragam suku dohot bangso, alai marsada jala marsihaholongan do hita dohot akka dongan sahaporseaon di liat portibi on, songon sada keluarga. Tikki ro hita tu parpunguan wilayah manang regional, boi ma takkas taida i. On ma bukti na paposson rohatta, na tasomba do Jahowa marhite cara na sittong. (Joh. 13:34) Bibel mandok, “Marsitutu ma hamu marsihaholongan.” (1 Ptr. 4:8) Molo holong rohatta tu akka dongan, rade ma hita manalpuhon hasalaan ni nasida jala sabar ma hita mangadopi hahurangan ni akka donganta. Sai burju jala ramah ma hita tu sude dongan di huria, termasuk tu dongan na hea mambahen haccit rohatta. (Kol. 3:12-14) Molo tapatudu holong sisongon i, botoon ni halak ma agamatta do na sittong. w21.10 22 ¶13-14

Molo dipecat sasahalak, boi do i mangurupi ibana asa bertobat jala mulak muse tu Jahowa. Godang do donganta paboahon, dung dipecat pe nasida asa sadar nungnga parah hasalaan ni nasida i. Alani i gabe bertobat ma nasida, dipauba ma pangalahona, jala gabe mulak muse tu Jahowa. (Heb. 12:5, 6) Taparrohahon ma jo contoh on. Molo adong biru-biru na marsahit, porlu do dipapulik biru-biru i sian akka biru-biru na asing. Memang, boi do gabe lam gale-gale biru-biru na marsahit i molo dipapulik sian na asing. Alana biru-biru biasana ikkon sai rap do dohot akka biru-biru na asing. Attong na so marasi ni roha do parmahan i? Dang songon i. Molo dang dipapulik ibana biru-biru i, gabe tertular ma annon sahitna i tu biru-biru na asing. Jadi ikkon dipapulik do biru-biru na marsahit i lao manjaga akka biru-biru na asing. w21.10 10 ¶9-10

Sakeluarga do hita dohot sude donganta di liat portibi on. Rap manomba Jahowa do hita dohot nasida. Alani i tajaga ma pangalahotta asa unang sappe tabahen roa goar ni Jahowa dohot akka naposona. Molo torus hita berupaya mangulahon i, olo do gabe tertarik halak mambege barita na uli jala manomba Jahowa. Alai adong do halak na menentang jala menganiaya hita, ala toktong hita setia tu Bapakta Jahowa. Boha do molo mabiar hita paboahon haporseaotta tu nasida? Pos ma rohatta na urupan ni Jahowa dohot Jesus do hita. Didok Jesus do tu akka siseanna, “Unang ma marsak hamu mamikkiri aha na lao dohononmuna.” Boasa? Didok Jesus muse, “Ai laos di tikki i do dipaboa tu hamu aha na lao dohononmuna. Ai dang sian pikkiranmuna sandiri hata na lao dohononmuna i, alai sian Debata do i na dipaboa marhite tondi parbadiana.”​—Mat. 10:19, 20. w21.09 24 ¶17-18

Si Musa mandok, Jahowa do inganan parlinggoman di ibana. (Ps. 90:1) Hea do didok si Musa, “Debata do inganan marlinggom sian najolo, tanganna na manoktong i do na manogu-nogu ho.” (5 Mus. 33:27) Tikki didok si Musa, “tanganna na manoktong i do na manogu-nogu ho”, aha do lapatan ni i? Molo Jahowa do tabahen gabe inganan parlinggoman di hita, dame ma tahilala nang pe sipata adong hasusaan na mambahen hita marsak. Songon dia ma cara ni Jahowa mangurupi hita? (Ps. 136:23) Gomos do ditiop Ibana tanganta, ditogu-togu Ibana do hita, jala urupanna do hita asa unang sai marsak be. (Ps. 28:9; 94:18) Molo taingot i, gabe pos ma rohatta na parduli do Jahowa tu hita jala sai jagaon do hita manang na didia pe hita tinggal. w21.11 6 ¶15-16

Diboto Jesus do na lao diadopi akka siseanna ketidakadilan. Asa boi nasida martahan, dipaboa Jesus ma sada ilustrasi taringot ina na mabalu na torus mangido keadilan tu sahalak hakim na so makkabiari Debata. Nang pe dang burju hakim i, alai pos do roha ni ina na mabalu i molo torus ibana ro manjuppangi hakim i, pasti dilehon do pangidoanna i. Berbeda do Jahowa sian hakim i. Debata na adil do Jahowa. Jesus mandok, “Pasti do bahenon ni Debata hukum na tigor tu halak na pinillitna, na jou-jou tu Ibana arian dohot borngin.” (Luk. 18:1-8) Didok Jesus muse, “Tikki ro Anak ni jolma i, juppangna dope jolma na songon i haporseaonna di tano on?” Jadi tatiru ma haporseaon ni borua i. Molo tung pe ikkon manaon ketidakadilan, sabar ma hita. Pasti bertindak do Jahowa lao mambela hita. Torus ma hita martangiang. Pos ma rohatta alusan ni Jahowa do tangiangta i di tikki na pas. w21.11 23 ¶12; 24 ¶14

Hamu akka na poso, pakakuhu do menurut hamu aturan ni Jahowa? Las do roha ni Sibolis molo songon i na dihilala hamu. Lomo do rohana molo dihilala hamu ussonang ngolu ni halak na mardalan di dalan na bidang i. Berupaya do Sibolis asa merasa hamu dang sonang ngolumuna, songon akka dongan sasikkolamuna dohot akka halak na diida hamu di internet. Alai ingot ma: Tipuan do i sude. Godang pe halak mardalan sian i ala na so diboto nasida do songon dia ujung ni dalan i. (Mat. 7:13, 14) Alai takkas do dipaboa Jahowa, gabe sonang do ngolumuna molo tetap hamu di dalan na tu hangoluan i.​—Ps. 37:29; Jes. 35:5, 6; 65:21-23. w21.12 23 ¶6-7

Taboto do ikkon tasalpuhon hasalaan ni na asing. Alai dang sai mura mangulahon i. Songon i do na dihilala Apostel Petrus. (Mat. 18:21, 22) Attong aha do na ikkon taulahon asa boi tasesa hasalaan ni na asing? Na parjolo, sai taingot ma sadia jotjot Jahowa manesa hasalaatta. (Mat. 18:32, 33) Sabotulna dang layak hita diampuni, alai sai rade do Ibana manesa dosatta. (Ps. 103:8-10) Asing ni i, diparettahon Jahowa do hita ‘ikkon marsihaholongan’, jadi ikkon olo do hita manalpuhon hasalaan ni dongan. (1 Joh. 4:11) Na paduahon, pikkiri ma aha manfaatna molo olo hita mengampuni. Gabe dang terbebani be donganta na marsala tu hita, gabe dame ma huria, denggan ma hubungatta tu Jahowa, jala lubbang ma tahilala ala nungnga tabolokkon boban na borat i. (2 Kor. 2:7; Kol. 3:14) Na parpudi, martangiang ma tu Jahowa asa boi manalpuhon hasalaan ni na asing. Unang ma taloas Sibolis manegai hubungatta dohot akka dongan. (Eps. 4:26, 27) Taingot ma porlu do hita diurupi Jahowa asa boi tetap dame huria. w21.06 22 ¶11; 23 ¶14

Susa do ngolu ni si Daud ala ikkon melarikan diri sian Raja Saul na naeng pamatehon ibana. Lao ma ibana tu kota Nob mangalului siallangonna. (1 Sam. 21:1, 3) Dung i ikkon martabuni do ibana rap dohot akka tentarana di gua. (1 Sam. 22:1) Boasa sappe naeng dipamate Raja Saul si Daud? Cemburu do si Saul tu si Daud ala unlomo roha ni halak mangida si Daud sian ibana jala unggodang do musu na ditaluhon si Daud. Diboto si Saul do muse nungnga ditolak Jahowa ibana jala nungnga dipillit Jahowa si Daud manggattihon ibana gabe raja. (1 Sam. 23:16, 17) Jadi dimanfaatton ibana ma tentarana na godang i lao mendukung rencanana i. Boasa barani si Saul naeng pamatehon halak na dipillit Jahowa? Na dirippu si Saul do boi digagalhon ibana rencana ni Jahowa? (Jes. 55:11) Memang dang dipaboa di Bibel alasanna. Alai na pasti, rencana ni si Saul i mambahen sogo roha ni Jahowa tu ibana. Jala dang adong manang ise pe na boi marhasil mangalo Jahowa. w22.01 2 ¶1-2

Holong do roha ni Jesus tu sude halak jala asi do rohana tu nasida, jadi berupaya do ibana marbarita na uli setiap adong kesempatan. (Luk. 19:47, 48) Alani sibukna marbarita, hea do Jesus dohot akka siseanna ‘sappe so sanga be mangan’. (Mrk. 3:20) Hea do muse ibana marbarita na uli tikki borngin tu si Nikodemus, ala i do tikki na pas di si Nikodemus. Memang dang sude halak na mambege barita na uli na dipasahat Jesus i gabe siseanna. Alai nungnga sude be nasida hea mambege barita na uli sian Jesus. Ikkon berupaya do hita maniru Jesus. Marbarita na uli ma hita tu sude halak. (Ul. 10:42) Carana, tasesuaihon ma jadwalta marbarita tu waktu na pas di akka halak, asa denggan hasilna jala unggodang na tajuppangi. Molo taulahon i, las ma roha ni Jahowa. w22.01 17 ¶13-14

Godang do akka halak saonari dang porsea tu kalangan berwenang. Diida nasida do molo sistem politik dohot hukum lebih melindungi halak na mora manang halak na sangap, jala dang adil tu halak na pogos. Asing ni i, godang do pamimpin agama na so suman pangalahona. On mambahen akka halak dang porsea be tu Debata. Jadi tikki taurupi nasida marsiajar Bibel, gabe maol ma paposson rohana asa porsea tu Jahowa dohot tu akka bawa na martanggung jawab di organisasi. Tottu dang holan parsiajar Bibel na porlu paposson rohana tu Jahowa dohot tu organisasi. Hita naung leleng manomba Jahowa pe, porlu do torus paposson rohatta memang cara ni Jahowa i do na undenggan, nang pe sipata adong na mambahen ganggu rohatta. w22.02 2 ¶1-2