Mei

Disurat do parngoluan ni Jesus di bukku Mateus, Markus, Lukas, dohot Johannes. Disurat do disi akka na diulahon Jesus, na dihatahon ibana, dohot songon dia pakkilalaanna. Jadi, asa lam takkas tatanda Jesus, tajaha ma opat bukku on. Molo taulahon i, gabe boi ma taihutton teladan ni Jesus. Hira na ditinggalhon Jesus do bogas ni patna di opat bukku i. Jadi molo taparsiajari opat bukku i, sarupa do i songon na mangihutton bogas ni pat ni Jesus. Dang godang manfaat na tadapot sian opat bukku i molo holan tajaha sambing. Ikkon tabahen do tikki lao mamparsiajari bukku i, jala mangarimangi cara mangulahon i. (Bandingkon tu Josua 1:8.) Bayakkon ma situasina asa boi dibege, dirasahon, jala diida hamu aha na masa. Pakke ma alat riset na disediahon organisasi ni Jahowa asa mura hamu mambayakkon i. w21.04 4-5 ¶11-13

Marratus taon andorang so ro Jesus tu tano on, nungnga dipaboa Jahowa hian na lao dilean do 30 logam perak tu halak na menghianati Messias. (Sak. 11:12, 13) Jala halak na menghianati Messias i, ale-alena sandiri do. (Ps. 41:9) Dung i, nungnga dipaboa si Sakaria hian, “Attukonku ma parmahan i, gabe marserak ma akka biru-biru i.” (Sak. 13:7) Jadi seharusna molo serep do roha ni sasahalak, dang tolakonna Jesus alani na masa i. Gariada gabe dipatogu do haporseaonna ala diida ibana do saut sude na tarsurat i tu Jesus. Songon i do na masa saonari? Ido. Saonari piga-piga Saksi Jahowa adong do na maninggalhon hasittongan jala gabe murtad. Berupaya do halak i mempengaruhi akka Saksi na asing asa kaluar sian organisasi. Dibahen na murtad i ma barita na paroa-roahon Saksi Jahowa melalui TV, internet, manang koran. Alai molo halak na serep marroha dang olo terpengaruh tu barita i. Gariada gabe dipatogu do nasida ala nungnga diboto nasida na ikkon masa i.​—Mat. 24:24; 2 Ptr. 2:18-22. w21.05 11 ¶12; 12-13 ¶18-19

Bibel mandok dang boi sahali sude taboto taringot tu Debata. (Kol. 1:9, 10) Martahap do dipaboa Jahowa hasittongan i tu hita. Jadi asa boi lam taattusi hasittongan, ikkon sabar do hita. Tikki diida Punguan na Mangaradoti Organisasi adong pangattusion na porlu disesuaihon, pittor hatop do dibahen nasida perubahan. Molo akka gareja saonari dibahen nasida pe penyesuaian, lao pasonakkon anggotana do manang asa lam terkenal nasida. Hape Saksi Jahowa, dibahen nasida pe penyesuaian asa lam jonok do tu Debata jala asa lam denggan mangihutton dalan ni Jesus. (Jak. 4:4) Jadi tabahen pe penyesuaian dang lao mangihutton cara marpikkir ni jolma, alai mangihutton Hata ni Debata i ma Bibel. Takkas ma, massai holong do rohatta tu hasittongan!​—1 Tes. 2:3, 4. w21.10 22 ¶12

Tikki merasa kesepian, taingot ma songon dia Jahowa mangurupi hita saleleng on. (Ps. 55:22) Molo sai taingot i, gabe dang kesepian be hita. Taparrohahon ma muse songon dia Jahowa mangurupi dongan na asing. (1 Ptr. 5:9, 10) Donganta si Hendri na sahalakna Saksi Jahowa di keluargana mandok, “Sude do hita berupaya mangalehon na undenggan tu Jahowa. Molo sai taingot i, dipatogu ma hita nang pe holan sahalakta Saksi Jahowa di keluargatta.” Asing ni i, martangiang ma hita. Tapaboa ma sude na di rohatta tu Jahowa. Taratur ma hita manjaha dohot mangarimangi isi ni Bibel, asa boi taida na holong do roha ni Jahowa tu hita. Piga-piga donganta adong do na menghafal ayat ni Bibel na patoguhon nasida, misalna Psalmen 27:10 dohot Jesaya 41:10. Adong do muse na mambege rekaman audio tikki manjaha Bibel manang tikki mampersiappon bahan tu parpunguan asa unang merasa kesepian nasida. w21.06 9-10 ¶5-8

Molo mate halak na tahaholongi, pasti lungun do rohatta. Alai boi do toktong togu haporseaotta molo tarimangi janji ni Jahowa taringot tu haheheon. Lungun do muse rohatta molo adong keluargatta na dipecat. Alai taingot ma, pengaturan ni Jahowa do na dumenggan. Pasahat ma sude arsak ni rohamuna tu Jahowa jala unang ma mandao hamu sian akka dongan. (Poda 18:1) Nang pe marsak dope hamu alani situasi na borat i, toktong ma hamu sibuk. (Ps. 126:5, 6) Torus ma hamu marpungu, marbarita na uli, dohot manjaha Bibel. Jala torus ma ingot hamu akka janji ni Jahowa di ari na naeng ro. Molo nungnga dirasahon hamu songon dia Jahowa mangurupi hamu, gabe lam togu ma haporseaonmuna. w21.11 23 ¶11; 24 ¶17

Boasa didok Jesus akka siseanna songon halak “na metmet”? Coba ma jo tapikkiri on: Halak na mora, na terkenal, dohot na marhuaso do na penting di pandangan ni portibi on. Hape molo sisean ni Jesus, halak na so sangap jala na so penting do nasida di jolo ni jolma. (1 Kor. 1:26-29) Alai molo di Jahowa, arga do nasida sude. Boasa dihatai Jesus taringot “na metmet on”? Alana disukkun akka siseanna do tu ibana, “Ise do na umbalga di Harajaon banua ginjang i?” (Mat. 18:1) Godang halak Jahudi marpikkir molo halak na penting, i ma halak na adong kedudukan manang jabatanna. Sahalak pakar Alkitab mandok, “Na paling penting dianggap jolma, i ma molo boi sangap jala terkenal.” Jadi ikkon berupaya do akka sisean ni Jesus asa unang terpengaruh tu pandangan sisongon i. w21.06 20 ¶2; 21 ¶6, 8-9

Sitiruon na denggan do Apostel Paulus tu akka sintua. Misalna tikki porlu halak Kristen di Tessalonik dipasingot, barani do si Paulus pasingotton nasida. Alai sebelum pasingotton, jolo dipuji si Paulus do nasida ala toktong do nasida setia jala dang menyerah. Diakkui si Paulus do na sabar nasida manaon hasusaan jala toktong setia nang pe dianiaya. (1 Tes. 1:3; 2 Tes. 1:4) Bahkan didok si Paulus gabe teladan do halak i tu akka dongan na asing. (1 Tes. 1:8, 9) Pasti las do roha ni halak i mambege pujian ni si Paulus! Takkas ma massai holong do roha ni si Paulus tu nasida. I do alana gabe boi dilehon si Paulus sipasingot na denggan marhite dua suratna tu halak Kristen di Tessalonik.—1 Tes. 4:1, 3-5, 11; 2 Tes. 3:11, 12. w22.02 15 ¶6

Dipakke Sibolis do pamimpin agama lao mangajarhon Debata do na mambahen jolma susa jala kejam do Ibana. Molo adong dakdanak na mate, didok nasida do na dialap Debata ibana asa dibahen gabe suru-suruan di surgo. Massai kejam do tuduhan ni Sibolis i. Taboto do molo Jahowa i Debata parholong. Molo marsahit hita manang mate halak na tahaholongi, dang tasalahon Debata. Pos do rohatta, dang adong be haduan sahit jala hehe do muse akka na mate. Tapaboa do tu na asing molo Jahowa i Debata parholong. Ala tabahen songon i, boi ma dialusi Debata akka na mangarehei Ibana. (Poda 27:11) Debata parasi roha do Jahowa. Lungun hian do rohana molo susa hita ala dianiaya manang susa alani hagaleotta sandiri. (Ps. 22:23, 24) Diboto Jahowa do sude hasusaanta. Jala lomo do rohana pasaehon i.​—Bandingkon tu 2 Musa 3:7, 8; Jesaya 63:9. w21.07 9-10 ¶9-10

Molo toktong hita setia tu Jahowa, boi ma tahaholongi jala tasomba Ibana saleleng ni lelengna. Lao dipasae Jesus do sude hasusaan na dibahen si Adam dohot si Hawa ala dang setia tu Debata. Paheheon ni Jahowa ma marjuta halak naung mate asa boi mangolu saleleng ni lelengna di paradeiso. (Luk. 23:42, 43) Molo nga sempurna be annon sude jolma na di tano on, jaloon ni nasida ma “hamuliaon dohot hasangapon” sian Debata songon naung disuratton si Daud hian. Massai godang do pasu-pasu na diparade Jahowa tu “punguan bolon”. (Pgk. 7:9) Massai holong do roha ni Debata tu hamu. Lomo do rohana asa gabe bagian sian keluargana hamu. Jadi torus ma ulahon hamu lomo ni rohana. Ingot hamu ma akka janji ni Debata i tiap ari. Argai hamu ma kesempatan lao manomba Bapakta na di surgo i jala mamuji Ibana saleleng ni lelengna. w21.08 7 ¶18-19

Torus do marbarita Panurirang Jeremia saleleng 40 taon lobi, nang pe godang na manolak jala menentang ibana. ‘Dileai’ jala “direhei” akka halak do ibana. Alani i sanga do ibana marmetmet ni roha jala hampir menyerah. (Jer. 20:8, 9) Alai aha do na diulahon ibana asa boi semangat muse jala marlas ni roha mangulahon tugasna? Sai diingot si Jeremia do molo barita sian Debata i boi mambahen ‘denggan ngolu ni akka halak di ari na naeng ro’. (Jer. 29:11) Dung i diingot ibana do molo tugasna i pasangappon goar ni Jahowa. (Jer. 15:16) Hita pe saonari, ditugasson do pasahatton barita na mangalehon harapan tu akka halak, jala ulaon i pasangappon goar ni Jahowa. Molo torus taingot i, boi ma hita torus marlas ni roha dang soal songon dia tanggapan ni halak. Jadi, unang ma menyerah hamu molo dang hatop maju parsiajar Bibelmuna. Ingot ma, porlu do tikki lao mambahen sasahalak gabe sisean.—Jak. 5:7, 8. w21.10 27 ¶12-13

Dang soal nungnga sadia leleng hita manomba Jahowa, ikkon toktong do tapatogu haporseaotta tu Ibana. Alana molo dang manat hita, boi do gabe gale haporseaotta. Asa boi tahaporseai akka na so boi taida, ikkon adong do dasarna. Alai biasana, mura do talupahon akka na so boi taida. Didok si Paulus ‘dosa na boi mangabbati hita di parlumbaan’ do molo gale haporseaotta. Jadi songon dia ma caratta asa boi toktong togu haporseaotta i? (2 Tes. 1:3) Jotjot ma martangiang hita mangido tondi parbadia sian Jahowa. Boasa? Alana haporseaon i, parbue ni tondi parbadia do. (Gal. 5:22, 23) Jadi ikkon diurupi tondi parbadia do hita asa boi toktong togu haporseaotta. Molo torus tapangido tondi parbadia i, lehonon ni Jahowa do i. (Luk. 11:13) Tikki martangiang, tadok ma, “Tambai ma haporseaonnami.” (Luk. 17:5) Asing ni i, taratur ma hita pelajaran pribadi.​—Ps. 1:2, 3. w21.08 18 ¶16-18

Massai penting do akka dongan na matua di organisasi ni Jahowa. Memang, nungnga moru be gogo ni nasida. Alai godang do pengalaman ni nasida. Boi do dipakke Jahowa nasida lao mangulahon lomo ni rohana. Dipaboa do di Bibel songon dia akka naposo ni Jahowa naung matua toktong semangat melayani Ibana. Misalna si Musa, nungnga marumur 80 taon ibana tikki mandapot tugas sian Jahowa lao mamimpin bangso Israel. Dung i si Daniel, nang pe nungnga marumur 90 taon lobi, tong dope disuru Jahowa ibana gabe panurirang. Si Johannes pe disuru do manuratton bukku Pangungkapon nang pe nungnga 90 taon lobi umurna. Adong do muse si Simeon, halak ‘na mangulahon na sittong jala makkabiari Debata’. Nang pe dang godang na taboto taringot ibana di Bibel, alai takkas do ditanda Jahowa ibana. Dilean do tu ibana kesempatan mangida Jesus tikki poso-poso, jala paboahon surirang taringot Jesus dohot taringot si Maria, omak ni Jesus.​—Luk. 2:22, 25-35. w21.09 3-4 ¶5-7

Unang ma dibanding-bandingkon natua-tua anakkonna tu na asing. Jala unang ma disuru akka natua-tua anakkonna mangulahon akka na so sanggup diulahon ibana. Alana boi do i mambahen metmet roha ni anakkonna. (Eps. 6:4) Donganta si Sara mandok, “Diharappon omakku do ikkon dapot nilai 100 au tikki ujian. Hape dang mungkin i. Alani i, martaon-taon dung tamat sikkola au, olo dope sipata au merasa dang cukkup na hulean i tu Jahowa, nang pe nungnga hubahen na undenggan.” Raja Daud hea do paboahon, dang dilului ibana akka “ulaon na balga” manang na so sanggup diulahon ibana. Ala serep rohana, ‘gabe sonang jala dame ma dihilala ibana’. (Ps. 131:2) Aha do na boi ditiru natua-tua sian si Daud? Akka natua-tua na marserep ni roha, dang olo mamaksa dirina dohot anakkonna mangulahon akka na so tolap diulahon. Jadi nasida porlu mangurupi anakkonna mamboto kelebihan dohot kelemahanna, asa boi dibahen anakkonna i cita-cita na masuk akkal. w21.07 21-22 ¶5-6

Porlu do taingot, dilehon Jahowa do tu hita hak lao mamillit. Jadi hita do na mamillit naeng manomba Jahowa manang na dang. Adong do donganta na poso na mamillit manomba Jahowa nang pe orang tuana dang sisomba Jahowa. Na asing ditinggalhon do Jahowa, hape nga berupaya orang tuana mangajarhon hasittongan tu ibana. Jadi, hita sandiri do na mamillit manomba Jahowa manang na dang. (Jos. 24:15) Alani i, molo ditinggalhon gellengmuna pe Jahowa, dang salamuna i! Alai olo do ra adong orang tua na maninggalhon hasittongan. (Ps. 27:10) Pasti haccit hian do roha ni anakkonna molo masa i. Molo songon i do situasimuna, pos ma rohamuna diattusi Jahowa do perasaanmuna i, jala diargai Ibana do holong dohot kesetiaanmuna. Ingot ma dang hamu na martanggung jawab di keputusan ni orang tuamuna. w21.09 27 ¶5-7

Halak na dipecat sarupa songon biru-biru na marsahit, nungnga sega be hubunganna tu Jahowa. (Jak. 5:14) Sahit na manular, boi do i hona tu na asing. Sarupa songon i, halak na mangulahon dosa na serius pe boi do gabe pengaruh na so denggan tu akka dongan na asing. I do alana porlu ibana dipecat sian huria. Jadi pemecatan i bukti holong ni Jahowa tu akka dongan di huria. Pemecatan i pe boi do mangurupi na marsala i menyadari kesalahanna dung i boi ma ibana bertobat. Molo dung dipecat sasahalak, boi dope dipadenggan ibana hubunganna tu Jahowa. Carana, torus ma ibana ro marpungu, manjaha Bibel dohot akka publikasi, jala manotton JW Broadcasting^®. Molo diida akka sintua berupaya ibana muba, dilehon nasida ma akka saran asa boi muse ibana mulak gabe Saksi Jahowa. w21.10 10 ¶9, 11

Saonari berupaya do hita maniru teladan ni halak Kristen di abad na parjolo. Contohna, sarupa do caratta diorganisasi songon nasida. Adong do di hita pengawas wilayah, akka sintua, dohot parhobas. (Plp. 1:1; Tit. 1:5) Taihutton do aturan ni Jahowa taringot seks dohot pernikahan. Taihutton do pandangan ni Jahowa taringot mudar. Dibahen do muse pengaturan pemecatan molo adong di huria na so olo mangihutton paretta ni Jahowa. Sudena on patuduhon, na tatiru do halak Kristen di abad na parjolo. (Ul. 15:28, 29; 1 Kor. 5:11-13; 6:9, 10; Heb. 13:4) Takkas do didok di Bibel, holan ‘sada haporseaon’ manang sada agama do na dihalomohon roha ni Jahowa. (Eps. 4:4-6) Jadi sada hasangapon do di hita boi gabe naposo ni Jahowa jala mamboto hasittongan taringot Jahowa dohot akka janjina. Alani i, toktong ma gomos tatiop hasittongan i. w21.10 22-23 ¶15-17

Borat do masalah na diadopi Raja Jehosapat. Ro do godang tentara ni halak Ammon, halak Moab, dohot akka halak na di Dolok Seir menyerang ibana, keluargana, dohot rakyatna. (2 Kron. 20:1, 2) Aha do na diulahon si Jehosapat? Martangiang do ibana tu Jahowa mangido bantuan dohot gogo. Disurat do tangiang ni si Jehosapat i di 2 Kronika 20:5-12. Sian tangiangna i, boi ma taida na serep do rohana jala na pos situtu rohana tu Jahowa. Disuru Jahowa ma si Jehasiel na sian marga Lepi mandapotton si Jehosapat jala mandok hata na adong di ayat sadari on. Ala pos rohana tu Debata, diulahon si Jehosapat do sude petunjuk na sian Jahowa. Dang akka tentara na jago na dibahen ibana marbaris di jolo, alai akka parende do. Ujungna monang do nasida. Jadi takkas ma dialusi Jahowa do tangiang ni si Jehosapat i.​—2 Kron. 20:18-23. w21.11 15-16 ¶6-7

Tikki susa hita, pasti urupan ni Jahowa do hita asa boi toktong setia. (2 Kor. 4:7-9) Pos ma rohatta, patuduon ni Jahowa do holong na manoktong i tu hita. Bibel mandok, “Diparrohahon Jahowa do halak na makkabiari Ibana, halak na maima-ima holong ni roha na pinatuduna.” (Ps. 33:18-22) Andorang so tasomba dope Jahowa, nungnga tahilala holongna. Alai dung gabe sisomba Jahowa hita, gabe boi ma tahilala holongna na manoktong i. Tahilala do songon dia Jahowa manjaga hita, jala dilehon do harapan tu hita. Lomo do rohana asa marlas ni roha hita. (Ps. 46:1, 2, 7) Alani i, manang aha pe na masa di ngolutta, pos ma rohatta lehonon ni Jahowa do tu hita gogo asa boi toktong hita setia tu Ibana. w21.11 7 ¶17-18

Adong do halak na torus marsogo ni roha tu donganna sakarejo, donganna sasikkola, tu keluargana, manang tu na asing sappe martaon-taon. Songon i ma akka abang ni si Josep. Ala sogo roha ni halak i tu si Josep, dibahen nasida ma na jahat tu ibana. (1 Mus. 37:2-8, 25-28) Alai anggo si Josep dang songon i! Dung gabe halak na marhuaso ibana, dang dibalos ibana pambahenan ni akka abangna i, jala dang dendam ibana tu nasida. Gariada dipatudu ibana do asi ni rohana tu halak i. Sesuai do na diulahon si Josep i tu paretta na tarsurat di 3 Musa 19:18. (1 Mus. 50:19-21) Sude halak Kristen porlu do maniru si Josep. Dang boi hita dendam manang marsogo ni roha tu na asing, asa boi tabahen las roha ni Debata. Didok Jesus do ikkon tasalpuhon hasalaan ni na asing. (Mat. 6:9, 12) Apostel Paulus pe mandok, “Ale akka dongan, unang ma balosson hamu sogo ni rohamuna.”​—Rom 12:19. w21.12 11 ¶13-14

Di borngin tanggal 14 Nisan 33 M, lao ma Jesus tu taman Getsemane. Martangiang ma ibana paboahon sude na di rohana tu Jahowa. (Luk. 22:39-44) Ala massai susa dihilala Jesus tikki i, martangiang ma ibana pasahatton “pangidoanna marhite angguk-angguk dohot ilu-ilu”. (Heb. 5:7) Aha do na ditangiakkon Jesus tikki i? Martangiang do Jesus mangido gogo sian Jahowa, asa boi ibana toktong setia mangulahon lomo ni roha ni Jahowa. Dialusi Jahowa do tangiangna, disuru ma suru-suruan lao patoguhon Jesus. Diboto Jesus do na berpengaruh kesetiaanna i tu goar ni Jahowa na badia. Ala fokus utama ni Jesus lao pabadiahon goar ni Jahowa jala mampartahatton kesetiaanna, gabe ditangihon Jahowa ma pangidoan ni Jesus i. Molo tatiru do Jesus, pasti urupan ni Jahowa do hita.​—Ps. 145:18. w22.01 18 ¶15-17

Godang do halak saonari dang marlomo ni roha tu Saksi Jahowa ala netral hita di politik. Dipangido nasida do asa terlibat hita di pemilihan umum. Alai taboto do molo tapillit jolma gabe pamimpinta, na manolak Jahowa do hita disi. (1 Sam. 8:4-7) Na asing mangharappon hita mambangun sikkola dohot rumah sakit lao patuduhon na parduli hita tu akka halak. Alai dang tabahen songon i, fokus do hita marbarita na uli, dang pasaehon masalah. Aha ma na ikkon taulahon asa unang menyerah hita? (Mat. 7:21-23) Fokus ma hita mangulahon tugasta, i ma marbarita na uli. Unang ma gabe dang fokus hita alani masalah politik manang masalah na asing na adong di portibi on. Memang holong do rohatta tu akka halak jala parduli do hita tu nasida. Alai taboto do, cara na paling denggan mangurupi nasida, i ma mangajarhon Harajaon ni Debata tu nasida jala mangurupi nasida marale-ale tu Jahowa. w21.05 7 ¶19-20

Nang pe godang pamaretta mangakku manomba Debata, alai dang diakkui nasida pamarettaon ni Debata. Sarupa do nasida songon akka pamimpin di jaman ni Jesus. Dianiaya nasida do akka sisean ni Jesus, alai sasittongna na mangalo Jesus, Pamimpin na Dipillit Jahowa do nasida disi. (Ul. 4:25-28) Aha do tanggapan ni Jahowa? Psalmen 2:10-12 mandok, “Ale hamu akka raja, marbisuk ma hamu. Ale hamu akka hakim na di tano on, jalo ma pissang-pissang. Somba hamu ma Jahowa jala habiari ma Ibana, marlas ni roha ma hamu lao pasangappon Ibana. Pasangap ma anak i, asa unang muruk Debata asa unang dipalao Ibana hamu sian dalan ni halak na tigor marroha, ai hatop do marsigorgor rimasna. Marlas ni roha ma sude halak na marlinggom tu Ibana.” Dilehon Jahowa do kesempatan tu akka penentang asa muba jala mendukung Harajaon ni Debata. Alai dang godang be tikkina. (Jes. 61:2) Jadi ikkon hatop do nasida mambahen keputusan lao manomba Jahowa manang na dang. w21.09 15-16 ¶8-9

Didok Apostel Paulus, ikkon puas do hita tu akka na adong di hita. (Plp. 4:12) Sai taingot ma na ummarga di ngolutta on, hubungatta tu Jahowa do dang arta. (Hab. 3:17, 18) Parrohahon ma na nidok ni si Musa tu halak Israel tikki di gurun nasida saleleng 40 taon, “Nungnga dipasu-pasu Jahowa Debatamuna i sude ulaonmuna . . . Saleleng 40 taon on, sai didongani Jahowa Debatamuna do hamu, jala dang hahurangan manang aha hamu.” (5 Mus. 2:7) Saleleng 40 taon i, sai dipasu-pasu Jahowa do nasida. Dilehon Jahowa do tu nasida sipanganon, i ma manna jala dang hea maribak baju na dipakke nasida tikki kaluar sian Mesir. (5 Mus. 8:3, 4) Sian on hita marsiajar, las do roha ni Jahowa molo puas hita tu akka na adong di hita. Taanggap ma sude na adong di hita termasuk na gelleng pe, pasu-pasu sian Jahowa do i. w22.01 4-5 ¶10-11

Hamu akka suami, pasti martanggung jawab do hamu lao manjaga jala paradehon kebutuhan ni keluargamuna. Tikki adong tantangan, olo do ra hamu marpikkir boi do hamu sandiri na mangatasi i. Alai unang ma dirimuna na diandalhon hamu. Martangiang ma hamu tu Jahowa mangido bantuan. Martangiang ma hamu sahalakmuna, dung i martangiang ma hamu rap dohot istrimuna. Lului ma petunjuk ni Jahowa sian Bibel manang sian publikasitta. Jala bahen ma keputusan na sesuai tu prinsip ni Bibel. Alai adong do ra na so setuju tu keputusan na dibahen hamu. Didok nasida do ra muse ikkon godang do hepengmuna asa sonang jala denggan ngolumuna. Alai ingot ma contoh ni si Jehosapat. (2 Kron. 20:1-30) Marpos ni roha do ibana tu Jahowa jala diihutton ibana do petunjuk na sian Jahowa. Dang ditinggalhon Jahowa ibana. Jadi pos ma rohamuna, dang tinggalhonon ni Jahowa hamu.​—Ps. 37:28; Heb. 13:5. w21.11 15 ¶6; 16 ¶8

Ditoppa Debata do hita asa boi maniru sifatna. Alani i do lomo rohatta asa dibahen na adil tu na asing. (1 Mus. 1:26) Alai dang sempurna hita, jadi olo do sala caratta mangida sada situasi nang pe tarippu nga taboto sude faktana. Contohna si Jona. Muruk do ibana ala dang jadi dihukum Jahowa halak Ninive. (Jona 3:10–4:1) Hape ala marasi ni roha Jahowa, gabe boi ma selamat lobi sian 120.000 halak Ninive na bertobat. Jadi si Jona do na ikkon padenggatton cara marpikkirna, dang Jahowa. Dang wajib Jahowa paboahon tu hita boasa dibahen Ibana sada keputusan. Memang sipata diloas Jahowa do akka naposona paboahon pandapot ni nasida taringot keputusan na dibahen Ibana. (1 Mus. 18:25; Jona 4:2, 3) Jala sipata dipaboa Ibana do boasa dibahen ibana keputusan i. (Jona 4:10, 11) Alai sebenarna dang pola ikkon sukkunonna pandapotta sebelum manang dukkon dibahen Ibana sada keputusan.—Jes. 40:13, 14; 55:9. w22.02 3-4 ¶5-6

Molo taanggap do diritta “na upposo”, gabe tabahen ma sangap dongan na asing. (Plp. 2:3) Hasilna, gabe dang metmet roha ni akka dongan tabahen. Molo fokus hita tu kelebihan dohot sifat na denggan sian akka dongan, lam mura ma hita mambahen nasida sangap. Taingot ma poda ni Apostel Paulus tu halak Korint na mandok, “Ai aha huroa na adong di hamu umbahen na didok hamu dumenggan hamu sian na asing? Kan sian Debata do sude na adong di hamu? Molo Debata do na mangalehon sude na adong di hamu, boasa ginjang rohamuna gabe hira sian gogomuna i sude?” (1 Kor. 4:7) Jadi manat ma hita asa unang sappe taanggap diritta na uppenting sian na asing. Jala unang ma taharappon ikkon dipasangap dongan na asing hita. Molo adong donganta na malo marjamita manang malo memandu parsiajaran Bibel, ikkon Jahowa do na dipuji ibana. Alana nungnga dilean kemampuan i tu ibana. w21.06 21-22 ¶9-10

Godang do akka donganta na maol manjuppangi halak di jabu ni nasida. Alana godang do na tinggal di apartemen manang di perumahan na ketat pengamananna. Adong do satpam na manjaga disi na so paloasson halak na asing masuk, molo so adong undangan sian halak na tinggal disi. Donganta na asing manjuppangi holan saotik halak. Lao do nasida marbarita tu huta-huta, hape holan saotik do halak na tinggal disi manang dao-dao jarak ni jabu ni nasida jala dang sai adong halakna. Molo songon i do situasi di daerahta, unang ma menyerah. Tasesuaihon ma jadwalta asa boi tajuppangi akka halak. Tapikkirhon ma tikki sadihari do nasida di jabuna. Ai manang na boha pe pasti mulak do nasida tu jabuna be. Godang do donganta mandok unjotjot do juppang ni nasida halak di jabu, molo marbarita nasida tikki botari manang tikki borngin. Biasana di tikki i, nungnga santai be nasida jala olo makkata-hatai. w21.05 15 ¶5, 7

Songon i do na masa saonari? Ido. Godang do halak na marsogo ni roha tu Saksi Jahowa ala dang olo mangarayahon perayaan na so sesuai tu Bibel, songon Natal dohot ulang tahun. Godang do muse na muruk tu Saksi Jahowa, ala dang dohot tu perayaan nasional jala dang didalatton nasida adat na somal dipakke lao makkubur halak na mate. Didok nasida, diulahon nasida pe i lao manomba Debata do. Alai dang boi bahenon ni nasida las roha ni Debata molo diihutton nasida akka tradisi na so sesuai tu Bibel. (Mrk. 7:7-9) Aha do na ikkon taulahon? Porlu do tapabagas holongta tu aturan ni Jahowa dohot tu akka prinsipna. (Ps. 119:7, 113, 163-165) Ikkon umholong do rohatta tu Jahowa sian manang aha pe. Molo tutu do holong rohatta tu Jahowa, pasti dang olo hita mangihutton akka tradisi na mambahen sogo rohana. w21.05 6 ¶15-16

Aha do na ikkon taulahon asa boi mangulahon poda ni Apostel Paulus? Toktong ma taparsiajari Bibel, torus ma hita martangiang, jala sibuk ma hita mangulahon ulaon ni Tuan i. (2 Tim. 4:4) Molo togu haporseaotta, dang terpengaruh hita tu barita na paroa-roahon Saksi Jahowa. (Jes. 28:16) Molo holong do rohatta tu Jahowa, tu Hatana, dohot tu akka dongan, gabe boi ma hita toktong di hasittongan. Di abad na parjolo godang do halak na manolak Jesus, alai godang do tong na mangihutton ibana. Termasuk ma i sahalak anggota ni Sanhedrin dohot “akka malim”. (Ul. 6:7; Mat. 27:57-60; Mrk. 15:43) Saonari, adong do marjuta halak na toktong mangihutton Jesus. Boasa? Ala nungnga diboto jala dihaholongi nasida hasittongan. Bibel mandok, “Dame situtu do dihilala akka halak na makkaholongi patikmu. Dang adong na boi mambahen nasida tartuktuk.”​—Ps. 119:165. w21.05 13 ¶20-21

Diboto si Paulus do, boi pe ibana mangulahon sude tugasna i dang alani gogona sandiri, alai alani gogo na sian Jahowa do. Dilean Jahowa do tondi parbadia tu si Paulus asa marhasil ibana nang pe ikkon dianiaya, dipenjarahon, jala mangadopi tantangan na asing. Si Timoteus pe songon i do. Jahowa do na diandalhon ibana tikki mangulahon tugasna. Misalna dohot do si Timoteus mandongani si Paulus tikki missionaris dope ibana. Hea do diutus si Paulus si Timoteus makkunjungi akka huria lao patoguhon halak Kristen na disi. (1 Kor. 4:17) Alai dang sai mura i. Hea do merasa dang layak si Timoteus mangulahon tugasna i. Alani i didok si Paulus ma, “Unang ma adong na leas rohana tu ho ala poso dope ho.” (1 Tim. 4:12) Asing ni i, “jotjot do [si Timoteus] marsahit”. Jala songon suga di bagasan dagingna do sahitna i. (1 Tim. 5:23) Alai pos do roha ni si Timoteus, lehonon ni Debata do tondi parbadia tu ibana asa boi margogo lao marbarita na uli jala patoguhon dongan na asing.​—2 Tim. 1:7. w21.05 21 ¶6-7

Sebelum menasehati, denggan do dipikkirhon sintua prinsip di Jakobus 1:19 na mandok, “Ganup halak ikkon hatop manangihon, manat makkatai, lambat tarrimas.” Olo do sahalak sintua merasa nga mamboto aha na masa tu sasahalak, alai toho do i? Di Poda 18:13 paingotton hita, “Manang ise na mangalehon alus andorang so dibege dope parsoalan na sasittongna, haotoon do i jala pailahon dirina sandiri.” Jadi asa diboto sintua songon dia keadaan ni sasahalak, denggan do jolo disukkun ibana tu halakna jala rade manangihon. Misalna boi do disukkun sintua i, “Boha do keadaanmuna saonari? Aha do na masa tu hamu? Aha do na boi diurupi hami?” Molo rade akka sintua manangihon, gabe mura ma nasida patoguhon jala mangurupi akka dongan. Mangalehon nasehat dang sae holan paboahon piga-piga ayat manang paboahon aha na ikkon ulahonon ni donganta. Ikkon boi do dihilala akka donganta na botul-botul hita parduli tu nasida, lomo rohatta mangattusi situasi ni nasida, jala lomo rohatta mangurupi nasida. w22.02 17 ¶14-15