Juli
Sabtu, 1 Juli
Molo rade ibana marsiajar sian [pissang-pissang] . . . boi ma ulahononna lomo ni roha ni Debata jala dame ma rohana.—Heb. 12:11.
Pengaturan pemecatan, i ma bukti holong ni Jahowa tu halak na mardosa. Alai olo do adong dongan na so terima keputusan i. Gabe didok ma akka komentar na negatif. Sasittongna dang taboto sude faktana, jadi pos ma rohatta tu keputusan ni akka sintua. Alana prinsip ni Bibel do na diihutton nasida tikki mambahen keputusan, jala mangadili “di bagasan goar ni Jahowa” do nasida. (2 Kron. 19:6) Molo tadukung keputusan ni sintua, na mangurupi halak na dipecat i do hita asa hatop mulak tu Jahowa. Donganta si Elisabet mandok, “Maol hian do huhilala manahan dirikku asa unang mangattoi anakku na dipecat. Alai huihutton do pengaturan ni Jahowa jala bermanfaat do i. Dung diterima muse anakki, didok ibana ma pengaturan na massai denggan do pemecatan i.” w21.09 28-29 ¶11-12
Minggu, 2 Juli
Diida ibana ma sahalak ina na mabalu na pogos pamasukkon dua hepeng logam na otik argana.—Luk. 21:2.
Massai susa keadaan ni ina na mabalu i. Alai nang pe songon i, dilean ibana do sumbangan na undenggan tu Jahowa, jala massai arga do sumbanganna i di Jahowa. Aha ma na boi taparsiajari sian i? Molo talean na undenggan sian nasa rohatta dohot sian nasa ngolutta tu Jahowa, pasti diargai Ibana do i. (Mat. 22:37; Kol. 3:23) Las do roha ni Jahowa molo tabahen sian nasa tolapta lao melayani Ibana. Berupaya ma hita mangalean tikki dohot gogo lao marpungu dohot marbarita. Asing ni i, tapikkirhon ma ise halak na porlu dipatogu. Adong do ra di huriatta sahalak donganta borua na matua na marmetmet ni roha, ala marsahit-sahit jala dang boi be jotjot marbarita na uli. Tapapos ma roha ni donganta i, sude upayana lao melayani pasti diargai Jahowa do i. w21.04 6-7 ¶17, 19-20
Senin, 3 Juli
Marlas ni roha ma halak na setia nang pe adong sitaonon. Ai molo tahan ibana diuji, jaloonna ma mahkota hangoluan.—Jak. 1:12.
Diboto Jahowa do andigan tikki na pas manghancurhon portibi na jahat on. Ala toktong sabar Jahowa sahat tu saonari, nungnga adong be marjuta halak na manomba Ibana. Ala sabar Jahowa paimahon, gabe adong kesempatanta marsiajar taringot Ibana jala mangalean diri tu Ibana. Jadi tatiru ma hasabaron ni Jahowa. Toktong ma hita setia jala martahan, asa boi tabuktihon dang sia-sia hasabaron ni Jahowa saleleng on. Nang pe lungun roha ni Jahowa mangida hasusaan na dibahen Sibolis, alai toktong “[Ibana] marlas ni roha”. (1 Tim. 1:11) Hita pe boi do toktong marlas ni roha jala sabar paimahon Jahowa pabadiahon goarna jala mambuktihon holan Ibana na marhak mamaretta. Sabar ma paimahon Jahowa pasaehon hajahaton, dohot sude masalah na adong di tano on. Tatiru ma hasabaron ni Jahowa asa boi hita martahan. w21.07 13 ¶18-19
Selasa, 4 Juli
Tarbahen ma na denggan ro sian Nasaret?—Joh. 1:46.
Godang halak di abad na parjolo dang porsea tu Jesus. Alana Jesus anak ni tukkang hau na pogos, jala asalna sian sada huta na gelleng na dianggap halak dang penting, i ma Nasaret. Bahkan Si Natanael pe sebelum gabe sisean ni Jesus hea do mandok songon on, “Tarbahen ma na denggan ro sian Nasaret?” Olo do ra diingot ibana Mika 5:2 na mandok di Betlehem do Messias tubu, dang di Nasaret. Dang pola heran hita boasa songon i reaksi ni nasida. Alana nungnga didok si Jesaya hian, ‘dang adong na parduli sian dia haroro ni Messias’. (Jes. 53:8) Sabotulna molo dilehon nasida tikki mamareso i, botoon ni nasida ma molo Jesus i tubu di Betlehem songon na tarsurat di Mika 5:2, jala botoon ni nasida ma pinoppar ni Raja Daud do ibana. (Luk. 2:4-7) Attong boasa dang porsea akka halak tu Jesus? Ala pahatoppu nasida mambahen kesimpulan jala dang jolo dilului buktina, i do na mambahen nasida manolak Jesus. w21.05 2-3 ¶4-6
Rabu, 5 Juli
Molo dipissang [halak na tigor marroha] au, dos songon miak do i di ulukku.—Ps. 141:5.
Di Bibel dipaboa do contoh ni halak na dipasu-pasu Jahowa ala olo dinasehati. Contohna, si Job. Holong do rohana tu Jahowa jala las do rohana mangulahon parettana. Alai dang sempurna ibana. Alani borat ni sitaononna, hea do sala cara marpikkirna. Gabe dipasingot Jahowa ma ibana marhite si Elihu. Boha do tanggapan ni si Job? Didok ibana, “Makkatai ma au, alai asal hupandok do hatakku . . . hutarik ma hatakki, hundul nama au di orbuk dohot di abu ala husolsoli hatakki.” (Job 42:3-6, 12-17) Ala serep roha ni si Job, olo do ibana dipasingot si Elihu na dao upposo sian ibana. (Job 32:6, 7) Jadi molo serep rohatta, pasti olo do hita manjalo nasehat, nang pe tahilala nasehat i dang cocok tu hita manang halak na mangalehon nasehat i upposo sian hita. Alana porlu do hita sude dipasingot asa boi lam denggan patuduhon parbue ni tondi parbadia jala asa gabe guru na lam terampil di ulaon marbarita. w22.02 11 ¶8; 12 ¶12
Kamis, 6 Juli
Molo marsihaholongan hamu, botoon ni sude jolma ma na siseanku hamu.—Joh. 13:35.
Sude hita na di huria ikkon berupaya do patuduhon holong asa unang adong donganta na merasa dang dipardulihon. Aha na tahatahon dohot na taulahon berpengaruh do i tu akka dongan. Molo adong donganta di huria na sahalakna Saksi Jahowa, aha do na boi taulahon asa merasa ibana bagian sian keluarga ni Jahowa? Berupaya ma hita asa boi jonok tu ibana. (Rom 15:7) Dung i berupaya ma hita marale-ale tu ibana. Tikki makkata-hatai, tapatudu ma parduli hita tu ibana. Boi do tasukkun tantangan aha na diadopi ibana, alai unang ma sappe tabahen ibana maila. Adong do donganta na so pola olo paboahon perasaanna. Alani i, unang ma tapaksa ibana mangalusi akka sukkun-sukkunta. Lambok jala manat ma hita tikki manukkun. Dung i sabar ma hita manangihon alusna. Contohna, boi do tasukkun songon dia ibana mananda hasittongan. w21.06 11 ¶13-14
Jumat, 7 Juli
Tangihonon ni nasida ma soarakku, gabe sada punguan ma nasida jala sada parmahan.—Joh. 10:16.
“Sada punguan” jala “sada parmahan” do hita dohot akka dongan na asing. Bukku Diorganisasi untuk Melakukan Kehendak Yehuwa halaman 165 mandok, “Godang do manfaat na tadapot ala marsada huria, jadi ikkon sai berupaya do hita mambahen huria asa torus marsada.” Alani i, ikkon ‘talatik do diritta asa boi maniru cara ni Jahowa mangida akka dongan’. Molo di Jahowa, arga do hita sude “na metmet on”. Songon i do tong perasaanta tu dongan na asing? Diida jala diargai Jahowa do upaya na tabahen lao mangurupi dohot mamparrohahon dongan na asing. (Mat. 10:42) Molo tahaholongi akka dongan, “marsitutu ma hita asa unang tabahen gale haporseaon ni donganta manang gabe manimbil nasida”. (Rom 14:13) Sai taanggap ma ussangap do dongan na asing sian hita jala tasalpuhon ma hasalaan ni nasida. Unang ma taloas adong manang aha pe mambahen gabe gale haporseaotta. Gariada sai “marsitutu ma [hita] mangulahon akka na mambahen dame jala masipatoguan ma [hita]”.—Rom 14:19. w21.06 24 ¶16-17
Sabtu, 8 Juli
[Debata] do na mambahen i tubu.—1 Kor. 3:7.
Molo ringgas hita marsiajar Bibel, taulahon na taparsiajari i, jala taihutton petunjuk sian organisasi, lam leleng lam mirip ma sifatta tu Kristus jala lam takkas ma tatanda Jahowa. Dipatudos Jesus do barita Harajaon na tapasahat i tu boni manang bibit na gelleng na tubu di roha ni halak na tulus marroha. Didok Jesus, “Martunas ma boni i, jala lam timbo ma tubu. Alai dang diboto ibana [panabur i] songon dia i masa. Tano i sandiri do na mangalehon parbuena sian tikki tu tikki, mulana ro ma tumburna, dung i biurna, ujungna marisi ma biurna i.” (Mrk. 4:27, 28) Songon na didok Jesus, butuh waktu do asa boi martunas jala lam timbo bibit na gelleng i. Sarupa songon i, porlu do godang tikki asa boi parsiajar Bibelta mambahen kemajuan. Boi do taida i tikki taurupi sasahalak marsiajar Bibel. Molo nga lam jonok ibana tu Jahowa, lam leleng lam denggan ma pangalahona. (Eps. 4:22-24) Ikkon taingot do muse, Jahowa do na mambahen tubu boni na gelleng i di roha ni sasahalak. w21.08 8-9 ¶4-5
Minggu, 9 Juli
Tumagon do las roha alani na adong di jolo niba sian apala mangalului na so adong.—Pjm. 6:9.
Molo fokus hita tu ‘na adong di jolotta’, gabe puas jala marlas ni roha ma hita tu situasitta saonari. Alai molo halak na sai “mangalului na so adong”, maol do merasa puas. Jadi, fokus ma hita tu na adong di hita asa marlas ni roha hita. Unang ma tapaksahon ikkon tadapot cita-cita na so boi be tacapai. Pasti lomo do rohatta belajar hal-hal na baru manang mandapot tugas na baru. Wajar do i, ala songon i do hita ditoppa. Attong songon dia do carana asa boi hita puas tu ‘na adong di jolotta’? Marsiajar ma hita sian perumpamaan ni Jesus taringot talenta na disurat di Mateus 25:14-30. Taparrohahon ma songon dia akka ayat i mangurupi hita asa boi toktong marlas ni roha hita manang na songon dia pe situasitta. w21.08 21 ¶5-6
Senin, 10 Juli
Di inganan na timbo jala na badia do Au maringanan.—Jes. 57:15.
Parduli do Jahowa tu “halak na malala rohana”. Jadi berupaya ma hita patoguhon akka dongan di huria. Sude do hita martanggung jawab mangulahon i, dang holan akka sintua. Tapatudu ma na parduli hita tu akka dongan. Taurupi ma nasida asa boi makkilala na holong roha ni Jahowa tu nasida. (Poda 19:17) Boi do muse taurupi akka dongan molo serep rohatta. Jadi unang taanggarhon kemampuanta, asa unang cemburu na asing. Alai tapakke ma kemampuanta i patoguhon nasida. (1 Ptr. 4:10, 11) Tatiru ma Jesus tikki berurusan dohot akka siseanna. Jesus do jolma na ummalo na hea mangolu di tano on. Alai ‘lambok do ibana jala serep do rohana’. (Mat. 11:28-30) Tikki mangajari, bahasa dohot ilustrasi na sederhana dipakke ibana asa boi hona tu roha ni halak.—Luk. 10:21. w21.07 23 ¶11-12
Selasa, 11 Juli
Sukkun ma tu pangituai, alusan ni nasida ma hamu.—5 Mus. 32:7.
Hita ma na parjolo manjonoki akka donganta naung matua. Memang nungnga rambonon nasida, dang boi hatop-hatop mardalan, jala makkatai pe nga lambat, alai toktong do nasida semangat melayani Jahowa. Jala nungnga dibahen nasida “goar na denggan” di jolo ni Jahowa. (Pjm. 7:1) Taingot ma muse mararga do nasida di Jahowa, jadi taargai ma nasida. Tatiru ma si Elisa na toktong setia mandongani si Elia. Tolu hali ma didok ibana tu si Elia, “Ikkon donganakku do ho.” (2 Raj. 2:2, 4, 6) Asa lam jonok hita tu akka dongan naung matua, taajak ma nasida makkata-hatai. (Poda 1:5; 20:5; 1 Tim. 5:1, 2) Boi do tasukkun: Aha do na paposson rohamuna on do hasittongan? Adong do pengalamanmuna na mambahen hamu gabe lam jonok tu Jahowa? Aha do rahasiana asa boi hamu toktong setia melayani Jahowa? (1 Tim. 6:6-8) Dung i manat ma tabege alus ni nasida. w21.09 5 ¶14; 7 ¶15
Rabu, 12 Juli
Debata do na mangalehon gogo tu hamu lao mangulahon lomo ni rohana. Dibahen Ibana do hamu rade jala margogo mangulahon i.—Plp. 2:13.
Ala holong rohatta tu Jahowa taoloi do parettana lao marbarita na uli dohot mambahen sisean. (1 Joh. 5:3) Ingot ma songon dia perasaanmuna tikki parjolo sahali marbarita na uli sian jabu tu jabu. Pasti jantungon do hamu ate. Alai ala holong rohamuna tu Jahowa jala diboto hamu paretta ni Jesus do i, olo do hamu marbarita na uli sian jabu tu jabu nang pe dang sai mura i. Lam jotjot diulahon hamuna i, gabe terbiasa ma hamu marbarita na uli. Alai songon dia do perasaanmuna tikki naeng mambahen studi? Tong do ra jantungon hamu ate. Molo songon i, martangiang ma hamu tu Jahowa mangido habaranion. w21.07 3 ¶7
Kamis, 13 Juli
Dipaksa ibana ma sude halak, . . . mambahen tanda di tangan kanan ni nasida manang di dahi ni nasida.—Pgk. 13:16.
Najolo dibahen tuanna do tanda tu hatobanna lao patuduhon hatoban ni ise ibana. Songon i do tong sistem politik na di portibi on, dipangido do asa dibahen akka halak tanda simbolis lao patuduhon ise na didukung halak i. Diharappon akka pamarettaon na di portibi on do asa didukung akka halak sistem politik ni nasida marhite tindakan dohot pikkiranna. Molo dang olo hita manjalo tanda simbolis i jala mendukung nasida, gabe susa ma ngolutta. Bukku Pangungkapon mandok, “Dang adong halak na boi manggadis dohot manuhor situhoron, molo dang adong tanda i di ibana.” (Pgk. 13:17) Alai takkas do taboto sian Pangungkapon 14:9, 10, na lao dihukum do sude halak na manjalo tanda sian akka pamarettaon na di portibi on. Jadi unang ma tajalo tanda i, alai tapatudu ma na “appuna ni Jahowa” do hita. (Jes. 44:5) Saonari ma tikkina patoguhon hubungatta tu Jahowa, asa diakkui Jahowa hita appunana. w21.09 18 ¶15-16
Jumat, 14 Juli
Songon bosi na patajompon bosi, songon i ma sahalak jolma na mangurupi donganna asa lam denggan mangulahon ulaonna.—Poda 27:17.
Asa marhasil di ulaon marbarita, tajalo ma saran sian dongan na asing. Dipatudu si Paulus do tu si Timoteus songon dia cara marbarita dohot mangajari. Jala dipangido ibana do asa diajarhon si Timoteus i tu na asing. (1 Kor. 4:17) Songon si Timoteus, pasti lomo do rohatta marsiajar sian akka dongan na marpengalaman. Porlu do muse hita martangiang tu Jahowa tikki naeng marbarita, alana ikkon diurupi tondi parbadia do hita asa boi marhasil. (Ps. 127:1; Luk. 11:13) Tikki martangiang, ikkon jelas do tapaboa tu Jahowa aha pangidoatta. Misalna, tapangido ma asa dipatudu tu hita dia halak na berminat. Ikkon marsiajar pribadi do tong hita. Bibel mandok, ikkon ‘takkas do taboto lomo ni roha ni Debata’. (Rom 12:2) Molo takkas taboto hasittongan taringot tu Debata, gabe lam pos ma rohatta paboahon i tikki marbarita na uli. w21.05 18 ¶14-16
Sabtu, 15 Juli
Dang marisuang halojaonmuna marhobas tu Tuhan i.—1 Kor. 15:58.
Olo do ra nungnga berupaya hamu gabe guru studi na terampil, jala sai ditangiakkon hamu do studimuna i. Alai dang dibahen ibana kemajuan, gabe dipaso hamu ma parsiajaran i. Manang, olo do ra dang hea diurupi hamu sasahalak sappe tardidi. Dang porlu hamu merasa bersalah alani i, jala merasa dang dipasu-pasu Jahowa upayamuna. Diparrohahon Jahowa do sude na taulahon i. Las do rohana mangida hita torus semangat marbarita na uli nang pe dang adong halak na manjalo hita. Didok si Paulus, “Tigor do Debata, dang lupahononna akka naung diulahon hamu dohot holong naung dipatudu hamu tu goarna i. Dipatuduhon hamu do i marhite mangurupi akka na badia i sahat tu saonari.” (Heb. 6:10) Jadi nang pe dang adong na boi taurupi sappe tardidi, diingot Jahowa do kerja kerasta dohot holongta tu Ibana. Alani i, toktong ma taingot hata ni si Paulus di ayat sadari on. w21.10 25 ¶4-6
Minggu, 16 Juli
Sude halak na dipasahat Ama i tu au, na lao ro do i tu au. Jala dang palaookku manang ise halak na ro tu au.—Joh. 6:37.
Burju do Jesus tu akka siseanna jala holong do rohana tu nasida. Diboto ibana do marasing-asing kemampuan dohot situasi ni nasida, jadi dang diharappon ibana sarupa tugas dohot hasil karejo ni nasida. Diargai Jesus do upaya ni sude siseanna lao mangalean na dumenggan. Tarida ma i sian ilustrasina taringot talenta. Di ilustrasi i, disuru sahalak bawa do akka hatobanna mangurus artana “hombar tu na tolap uruson ni nasida”. Adong dua hatobanna na ringgas. Alai unggodang do hasil na dapot ni sahalak hatoban. Nang pe songon i, dipuji do hatobanna na dua i. Didok ibana, “Denggan ma na binahenmi. Tutu ma ho hatoban na burju jala haposan!” (Mat. 25:14-23) Pos ma rohatta, diboto Jesus do marasing-asing kemampuan dohot situasitta. Las do rohana molo tabahen na dumenggan tikki mangulahon tugasta. Jadi tatiru ma Jesus. w21.07 23 ¶12-14
Senin, 17 Juli
Dang bahenokku na jahat tu tuanku.—1 Sam. 24:10.
Hea do Raja Daud dang patuduhon asi ni roha. Muruk do ibana ala dang olo si Nabal mangalehon sipanganon tu akka tentarana jala kasar si Nabal makkatai tu nasida. Alani murukna, naeng dipamate ibana ma si Nabal dohot sude bawa na di keluargana. Alai pittor ro ma istri ni si Nabal, i ma si Abigail mandapotton si Daud. Diabbati si Abigail ma rencana ni si Daud i. (1 Sam. 25:9-22, 32-35) Hea do muse si Daud dang patuduhon asi ni roha tikki mambege ilustrasi ni si Natan. Didok ibana ikkon dipamate do bawa na mambuat biru-biru ni sahalak bawa na pogos i. Hape halak na burju do si Daud on, alai boasa ma songon i kejamna cara ni ibana mangadili? Alana dang togu be hubunganna tu Jahowa. Sian on taboto ma, molo jotjot sasahalak menghakimi na asing, i patuduhon dang togu be hubunganna tu Jahowa. w21.10 12 ¶17-18, 20
Selasa, 18 Juli
Ikkon badia do hamu, ai badia do Au.—1 Ptr. 1:16.
Ikkon tatiru do Jahowa Debata na badia i, ikkon badia do hita di sude parniulaotta. Sipata olo do ra tahilala dang mungkin boi hita badia ala dang sempurna hita. Alai taingot ma Apostel Petrus, nang pe adong kesalahanna didok do ibana halak na badia. Tikki dibege halak hata badia, olo do ra na dibayakkon nasida akka pamimpin agama na penampilanna serius jala dang parekkel. Alai dang songon i didok Bibel. Debata na badia do Jahowa, alai didok do Ibana “Debata na marlas ni roha”. (1 Tim. 1:11) Akka halak na manomba Jahowa pe, didok do “marlas ni roha”. (Ps. 144:15) Asing ni i, hea do dipissang Jesus akka pamimpin agama na mamakke jubah jala na mangulahon na denggan holan asa badia diida halak. (Mat. 6:1; Mrk. 12:38) Jadi ala holong roha ni Jahowa tu hita, dang mungkin dipangido Ibana hita mangulahon paretta na so sanggup taulahon. w21.12 2 ¶1, 3
Rabu, 19 Juli
Ikkon haholonganmu do Jahowa Debatamuna sian nasa rohamuna.—Mrk. 12:30.
Pasu-pasu na massai arga do ala boi hita manomba Jahowa. “Molo taoloi akka parettana”, berarti na holong do rohatta tu Jahowa. (1 Joh. 5:3) Hea do dipaboa Jesus paretta ni Jahowa na ikkon taulahon, i ma mambahen sisean jala mandidi nasida. (Mat. 28:19) Parettana na asing, ikkon masihaholongan do hita dohot akka dongan. (Joh. 13:35) Molo taoloi akka parettana i, boi ma hita gabe anggota keluarga ni Jahowa. (Ps. 15:1, 2) Ala holong do sifat utama ni Jahowa, dipangido do hita patuduhon holong tu na asing. (1 Joh. 4:8) Nungnga dihaholongi Jahowa hita nang pe dang tatanda dope Ibana. (1 Joh. 4:9, 10) Tatiru ma Ibana, tahaholongi ma halak na asing. (Eps. 5:1) Sada carana, taurupi ma nasida mananda Jahowa selagi adong dope tikki. (Mat. 9:36-38) Molo taulahon i, boi ma ibana gabe anggota keluarga ni Jahowa. w21.08 5-6 ¶13-14
Kamis, 20 Juli
Dang adong holong na umbalga sian holong ni halak na olo mangalehon ngoluna humokkop akka donganna.—Joh. 15:13.
Ala massai holong roha ni Jesus tu Jahowa, olo do ibana mangulahon paretta ni Bapakna jala berkorban tu hita. (Joh. 14:31) Tarida do i sian parngoluonna tikki di tano on. Ganup ari dipatudu ibana do holong dohot asi ni roha tu sude halak, nang pe adong na marsogo ni roha tu ibana. Jala diajarhon ibana do muse Harajaon ni Debata tu nasida. (Luk. 4:43, 44) Olo do muse ibana dianiaya jala dipamate asa boi hita mangolu saleleng ni lelengna. Jadi tatiru ma Jesus. Molo holong rohatta tu Jahowa, pasti olo do hita mangalehon ngolutta tu Ibana jala tardidi. Ikkon tahaholongi do tong na asing. Didok Apostel Johannes, “Molo dang dihaholongi sasahalak dongan na niidana, dang boi ibana makkaholongi Debata na so niidana.”—1 Joh. 4:20. w22.03 10 ¶8-9
Jumat, 21 Juli
Sai parrohahon hamu ma pangalahomuna. Unang ma songon halak na so marbisuk hamu, alai marbisuk ma hamu. Denggan ma pakke tikkimuna.—Eps. 5:15, 16.
Lomo do rohatta martangiang dohot marsiajar Bibel, alai sipata alani sibukna gabe maol ma hita mangalean tikki tu Jahowa. Ikkon karejo do hita, adong tanggung jawab keluarga, dohot ulaon na asing. Jadi olo do didok rohatta dang adong be tikkitta lao martangiang, marsiajar, dohot mangarimangi. Adong dope tantangan na asing. Molo dang hati-hati hita, boi do habis tikki na taparade hian tu Jahowa ala tapakke mangulahon na asing, misalna rekreasi. Memang bermanfaat do rekreasi i, alai boi do i mambahen habis tikkitta. Jadi manat ma hita asa unang sappe tabahen rekreasi gabe na uppetting di ngolutta.—Poda 25:27; 1 Tim. 4:8. w22.01 26 ¶2-3
Sabtu, 22 Juli
Bahen hamu ma halak panoppang i songon halak Israel. Haholongi ma nasida doshon dirim.—3 Mus. 19:34.
Tikki didok Jahowa tu halak Israel, “Ikkon haholonganmuna do donganmuna jolma doshon dirimuna,” na didok Jahowa disi dang holan dongan ni nasida sabangso, alai termasuk do bangso na asing na tinggal disi. Songon i do na dipaboa di 3 Musa 19:33, 34. Didok Jahowa, “Bahen hamu ma halak panoppang i songon halak Israel. Haholongi ma nasida doshon dirim.” Sada cara mangulahon i, ikkon diloas do penduduk asing i mambuat sisa ni panen, dos songon na dibahen nasida tu halak Israel na pogos. (3 Mus. 19:9, 10) Prinsip na adong di ayat i marlakku do tong sahat tu saonari. (Luk. 10:30-37) Boha ma carana hita mandalatton i? Molo adong penduduk asing na tinggal di sekitarta, tapatudu ma na taargai jala parduli hita tu nasida sude, tu bawa, tu borua, dohot tu akka dakdanak. w21.12 12 ¶16
Minggu, 23 Juli
Dang hurangan manang aha akka halak na mangalului Jahowa.—Ps. 34:10.
Molo sai taandalhon Jahowa, gabe lam porsea ma hita tu Ibana. Ikkon pos do rohatta tu Jahowa asa barani hita mangido ijin sian bosta asa boi dohot tu parpunguan wilayah manang regional, asa boi taratur marpungu, dohot marbarita na uli. Alai boha ma molo dang dapotta ijin jala gabe dipecat hita? Ikkon pos do rohatta na sanggup Jahowa paradehon kebutuhanta. (Heb. 13:5) Setia do Jahowa tu akka naposona. Godang do donganta na sepenuh waktu naung mambuktihon i. Sai dilehon Jahowa do kebutuhan ni nasida. Jadi dang porlu hita khawatir mamikkiri aha na masa di ari na naeng ro. Alana sai di labbungta do Jahowa, dang hea tinggalhononna hita saleleng tabahen Ibana na uppetting di ngolutta. w22.01 7 ¶16-17
Senin, 24 Juli
Di bagasan goar ni Jahowa do hamu mangadili, dang di bagasan goar ni jolma.—2 Kron. 19:6.
Diuji do pos ni rohatta tu akka sittua tikki adong keluarga manang dongan akrabta na dipecat. Gabe sukkun-sukkunma rohatta: ‘Tutu do naung diboto akka sintua sude faktana? Tutu do naung dibahen nasida keputusan na sesuai tu lomo ni roha ni Jahowa?’ Molo songon i na adong di rohatta, sai taingot ma molo pemecatan i pengaturan sian Jahowa, jala bermanfaat do i tu huria dohot tu halak na mangulahon dosa na serius. Alana molo torus ibana dipasombu di huria, boi do ibana mempengaruhi akka dongan na asing. (Gal. 5:9) Pemecatan pe mangurupi halak na mangulahon dosa na serius asa menyadari kesalahanna jala mangonjar rohana asa muba. Alana molo dang muba ibana, gabe sogo ma roha ni Jahowa tu ibana. (Pjm. 8:11) Jadi tanggung jawab na balga do di akka sintua lao manottuhon ikkon dipecat do sasahalak manang na dang. w22.02 5-6 ¶13-14
Selasa, 25 Juli
Dang diponggolhon ibana batang ni bulu naung maropuk. Jala dang bahenonna mittop sumbu na mellep.—Mat. 12:20.
Porlu do akka sintua sabar jala lambok tu halak na maol mangulahon nasehat sian Bibel. Unang ma pittor kesal akka sintua tu ibana. Boi do ditangiakkon sintua halak na dinasehati i asa mangattusi boasa ibana porlu dinasehati jala songon dia ibana mangulahon nasehat i. Porlu do tikki di sasahalak lao mamikkirhon nasehat na dilehon tu ibana. Jadi molo lambok jala sabar sintua menasehati, gabe lam mura ma donganta i manangihon nasehat i. Alai ikkon sian Bibel do nasehatna na dilehon i. Alana tujuanta mangalehon nasehat dang holan sekedar asa muba, alai asa boi do nasehat i “parohon las ni roha”.—Poda 27:9. w22.02 18 ¶17; 19 ¶19
Rabu, 26 Juli
Pahaccitton roha do molo sundat na dipaima-ima roha.—Poda 13:12.
Hea do ra hita martangiang mangido bantuan sian Jahowa lao mangadopi hasusaatta manang lao mangatasi kelemahanta. Alai olo do ra hita merasa dang marna dialusi Jahowa tangiangta i. Menurut hamu, boasa dang langsung dialusi Jahowa tangiangta? Sabotulna molo martangiang hita tu Jahowa sian nasa rohatta, i patuduhon na porsea do hita tu Ibana. (Heb. 11:6) Dipangido Jahowa do hita asa bertindak sesuai tu tangiangta. (1 Joh. 3:22) Molo martangiang hita tu Jahowa asa unang taulahon be na so dihalomohon rohana, ikkon tabahen do upaya asa boi muba jala ikkon sabar do hita. Alana songon na didok Jesus, dang sude tangiangta i langsung dialusi Jahowa. Didok ibana, “Sai pangido hamu ma, ai na lehononna do i tu hamu. Sai lului hamu ma, ai na dapotmuna do i. Sai tuktuki hamu ma, ai na bukkaonna do i tu hamu. Ai pasti adong do jaloon ni ganup halak na toktong mangido, pasti adong do dapot ni ganup halak na toktong mangalului, jala pasti dibukka do pintu tu ganup halak na toktong manuktuki.”—Mat. 7:7, 8. w21.08 8 ¶1; 10 ¶9-10
Kamis, 27 Juli
Massai holong do rohakku tu patikmi! Huparsiajari do i ganup ari.—Ps. 119:97.
Ikkon torus do taparsiajari Bibel asa lam togu haporseaotta tu Sitoppa hita. (Jos. 1:8) Molo taparsiajari boasa dang bertentangan isi ni Bibel nang pe marasing-asing panuratna, gabe lam porsea ma hita tu Sitoppa hita jala lam pos ma rohatta tutu do Bibel i Hatana. (2 Tim. 3:14; 2 Ptr. 1:21) Molo taparsiajari Bibel, godang do nasehat na denggan na boi tadapot. Misalna, Bibel mandok unang ma tabahen hepeng na uppetting di ngolutta, ala boi do i “parohon na haccit”. (1 Tim. 6:9, 10; Poda 28:20; Mat. 6:24) Takkas ma, marguna dope nasehat ni Bibel taringot hepeng sahat tu saonari. Godang nai dope nasehat ni Bibel na marguna di ngolutta. Molo nungnga tahilala manfaatna mamparsiajari Bibel, gabe lam pos ma rohatta na diboto Sitoppa hita do aha na dumenggan di ngolutta jala gabe Ibana ma na sai taandalhon. (Jak. 1:5) Hasilna, marlas ni roha ma hita.—Jes. 48:17, 18. w21.08 17-18 ¶12-13
Jumat, 28 Juli
Tigor do Debata, dang lupahononna akka naung diulahon hamu dohot holong naung dipatudu hamu tu goarna i.—Heb. 6:10.
Hamu akka dongan na matua, nang pe nungnga matua hamu, sai diingot Jahowa do sude kerja kerasmuna saleleng on. Torus do hamu semangat marbarita na uli. Torus do hamu setia nang pe godang tantangan na mambahen lungun rohamuna. Torus do didalatton hamu standar ni Jahowa, setia do hamu mandalatton tugasmuna di organisasi ni Jahowa, jala olo do hamu mangalatik na asing. Olo do hamu mangihutton kemajuan ni organisasi. Didukung hamu do akka dongan na dohot tu dinas sepenuh waktu. Alani i, holong hian do roha ni Jahowa tu hamu. Marjanji do Ibana, “dang tinggalhononna akka naposona na setia”! (Ps. 37:28) Didok Jahowa do muse, “Sahat tu na ubanon pe ho, toktong do urupanku ho.” (Jes. 46:4) Jadi unang ma hea hamu merasa na so marguna be hamu. Alana sasittongna, penting hian do hamu di organisasi ni Jahowa. w21.09 3 ¶4
Sabtu, 29 Juli
Jahowa patuduhon asi ni rohana tu akka halak na makkabiari Ibana.—Ps. 103:13.
Berkaitan do asi roha ni Jahowa tu bisukna. Bibel mandok, “Gok asi ni roha dohot akka ulaon na denggan” do “bisuk na sian [Debata]”. (Jak. 3:17) Songon Bapak na parholong, diboto Jahowa porlu do Ibana patuduhon asi ni roha tu akka naposona. (Jes. 49:15) Dilehon do tu hita harapan nang pe dang sempurna hita. Alai seimbang do Jahowa patuduhon asi ni roha i. Jadi dang sai torus Ibana patuduhon asi ni roha, sipata tegas do Ibana. Dang didukung Ibana tindakan ni halak na mangulahon dosa serius. Attong songon dia do molo adong di huriatta na mangulahon dosa na serius? Didok si Paulus, ‘Unang mardongan be hita tu ibana.’ (1 Kor. 5:11) Molo dang olo bertobat halak na mangulahon dosa na serius i, ikkon dipecat do ibana sian huria. Tujuanna lao manjaga akka dongan di huria jala mangihutton standar ni Jahowa na badia. w21.10 9-10 ¶7-8
Minggu, 30 Juli
Dihaholongi Debata do halak na mangalehon sian las ni rohana.—2 Kor. 9:7.
Mangalean sumbangan, bagian sian ibadat tu Jahowa do i. Najolo dang boi ro halak Israel tu jolo ni Jahowa molo so adong diboan manang aha. (5 Mus. 16:16) Dipangido Jahowa do nasida mangalean sumbangan sesuai tu kesanggupanna. Sumbangan i bukti na diargai nasida do sude na dilehon Jahowa tu nasida. Saonari pe, tapatudu do na taargai sude na dilehon Jahowa molo rade hita mangalehon sumbangan lao mendukung ulaon ni organisasi. Songon na didok si Paulus, “Lomo do roha ni Debata tu halak na mangalehon sian ias ni rohana. Lomo do roha ni Debata tu halak na mangalehon sian na tolapna, dang sian na so tolapna.” (2 Kor. 8:4, 12) Jadi pasti diargai Jahowa do sude sumbangan na talehon sian ias ni rohatta, dang soal sadia godangna.—Mrk. 12:42-44. w22.03 24 ¶13
Senin, 31 Juli
Patogu hamu ma roha ni na marsak, urupi hamu ma akka na gale, jala sabar ma hamu tu sude halak.—1 Tes. 5:14.
Dang boi akka sintua pasaehon sitaonon na diadopi akka donganta. Nang pe songon i, dipangido Jahowa do nasida patoguhon jala manjaga akka naposona. Boha ma cara ni nasida mangulahon i? Diihutton nasida do teladan ni Apostel Paulus. Lomo do roha ni si Paulus mamuji jala patoguhon akka dongan sahaporseaonna. Akka sintua, ikkon burju jala holong do rohana tu akka dongan di huria. (1 Tes. 2:7) Dipapos si Paulus do roha ni akka donganna na holong do rohana tu nasida, songon i nang Jahowa. (2 Kor. 2:4; Eps. 2:4, 5) Dibahen si Paulus do sude na di huria gabe donganna jala jotjot do ibana paradehon tikki tu nasida. Porsea do ibana tu nasida, olo do ibana paboahon kekhawatiran dohot kelemahanna tu nasida. (2 Kor. 7:5; 1 Tim. 1:15) Alai diceritahon ibana pe i, dang alana berfokus tu masalahna sandiri, gariada na lomo do rohana mangurupi na asing. w22.03 28 ¶9-10