Agustus

Bisa jadi maksud ni Jesus di ayat on, i ma tentara ni Rom na mamakkuhon tangan dohot patna di hau i. Nang pe dibahen nasida songon i, dang muruk Jesus tu halak i jala disalpuhon do hasalaan ni nasida. (1 Ptr. 2:23) Songon Jesus, ikkon rade do hita manalpuhon hasalaan. (Kol. 3:13) Termasuk ma i hasalaan ni keluargatta na menentang hita. Bisa jadi dang diattusi nasida haporseaotta jala dang diattusi boasa beda parngoluotta sian nasida. Gabe dipaila ma hita di jolo ni halak, dihatahon na so tutu taringot hita, dibolokkon akka bukkutta, jala adong na sappe menganiaya hita. Alai unang ma torus jut rohatta tu nasida. Tatangiakkon ma tu Jahowa asa tertarik nasida manomba Ibana. (Mat. 5:44, 45) Sipata, maol hian do tasalpuhon hasalaan ni halak i ala nungnga pahaccittu tahilala. Alai molo tapasombu torus jut rohatta, hita sandiri do na rugi. (Ps. 37:8) Molo olo hita manalpuhon hasalaan, berarti na tabolokkon do sian rohatta muruk dohot jut ni roha.​—Eps. 4:31, 32. w21.04 8-9 ¶3-4

Pasti haccit hian do rohatta molo adong anggota keluargatta na maninggalhon Jahowa. Songon i do na dihilala Jahowa tikki adong suru-suruan na mangalo tu Ibana. (Jud. 6) Haccit hian do muse roha ni Jahowa tikki mulak-ulak bangso Israel mangalo tu Ibana. (Ps. 78:41) Jadi tikki lungun rohatta ala adong keluargatta na maninggalhon Jahowa, pasti lungun do tong roha ni Jahowa. Diattusi Jahowa do perasaanta i. Sai rade do Ibana mangurupi jala patoguhon hita. Tikki ditinggalhon anakkonna Jahowa, jotjot do natua-tua manalahon dirina sandiri. Didok roha ni nasida, ikkon boi do urupanna gellengna i asa unang sappe maninggalhon hasittongan. Sahalak donganta bawa na dipecat anakna mandok, “Jotjot do husalahon dirikku sandiri. Jala sappe mimpi buruk do au bornginna i.” Sahalak donganta borua mandok, “Sai sukkun-sukkun do rohakku, ‘Aha do salakku?’ Hurasa nga gagal au mangajarhon hasittongan tu anakki.” w21.09 26 ¶1-2, 4

Adong do akka halak na merasa dang cocok Saksi Jahowa mangajarhon isi ni Bibel, ala dang lulusan sikkola teologia nasida. Alai ikkon dipareso akka halak do faktana. I do na diulahon si Lukas. ‘Ditakkasi ibana do sudena sian mulana’, asa ‘takkas botoon ni akka halak sittong’ do sude na dibege nasida taringot Jesus. (Luk. 1:1-4) Songon i do tong halak Jahudi na tinggal di Berea. Tikki dibege nasida barita na uli taringot Jesus, dipareso nasida do Akka Bukku Heber lao mamastihon sittong do na dibege nasida i manang na dang. (Ul. 17:11) Songon nasida, pareso ma faktana. Bandingkon hamu ma na diajarhon Saksi Jahowa tu isi ni Bibel. Jala porlu do muse dipareso hamu akka ulaon ni Saksi Jahowa di tikkitta saonari on. Molo dipareso hamu faktana, dang berprasangka be hamu jala dang porsea be hamu tu cerita na so tutu. w21.05 3 ¶7-8

Adong do di huriamuna na merasa kesepian? Adong do ra akka dongan na so Saksi Jahowa keluargana. Olo do merasa kesepian nasida tikki keluargana i mangarayahon ari raya. Donganta na asing, olo do borat dihilala nasida di tanggal parmate ni halak na dihaholongi nasida. Jadi, molo olo hita mandongani nasida di tikki sisongon i, pasti las hian do roha ni halak i. Jala on patuduhon na sian ias ni roha do hita “mamparrohahon” nasida. (Plp. 2:20) Godang do na mambahen halak Kristen merasa kesepian. Alai taingot ma, diboto Jahowa do perasaanta i. Diurupi do hita marhite dongan sahaporseaon. (Mat. 12:48-50) Jadi sai taargai ma sude na binahen ni Jahowa i. Alani i rade ma hita mangurupi na asing. Dang soal songon dia na tahilala, sai didongani Jahowa do hita! w21.06 12-13 ¶18-20

Toktong do Jesus semangat marbarita na uli nang pe adong halak na so olo manangihon. Boasa? Ala diboto Jesus do na porlu botoon ni akka halak hasittongan. Jala lomo rohana asa godang halak manjalo barita Harajaon. Diboto Jesus do muse, adong do halak na so berminat hian, gabe olo manangihon. Jala i do na masa tu keluargana. Saleleng tolu satonga taon Jesus marbarita na uli, dang adong nanggo sada pe adek ni Jesus na gabe siseanna. (Joh. 7:5) Alai dung hehe ibana, gabe halak Kristen do nasida. (Ul. 1:14) Dang boi tapastihon ise na olo gabe Saksi Jahowa. Adong do na so pittor olo marsiajar Bibel. Alai molo toktong hita burju jala semangat, gabe ‘dipuji nasida ma Debata’. w21.05 18 ¶17-18

Tikki di portibi on Jesus, dilehon ibana do tugas tu akka siseanna lao marbarita na uli taringot tu Harajaon. Dipaboa Jesus do songon dia akka siseanna i mangulahon i. (Luk. 8:1) Nungnga dipaboa Jesus hian, dang sude halak lomo rohana mambege barita na uli i. (Luk. 9:2-5) Asing ni i, ikkon dibaritahon do muse barita na uli i tu “saluhut bangso” di liat portibi on. (Mat. 24:14; Ul. 1:8) Didok Jesus ikkon torus do taulahon on “sahat tu panutup ni jaman on”. (Mat. 28:18-20) Marhite parnidaan ni si Johannes pe, dipatudu Jesus do ikkon dohot do sude siseanna i mangajarhon taringot Jahowa tu akka halak.​—Pgk. 22:17. w21.07 3 ¶3-4

Godang do halak di portibi on sai naeng ibana unjago idaon. Misalna molo parbisnis ibana, dibahen do segala cara asa unang berhasil sainganna. Molo atlet ibana, berupaya do ibana mambahen celaka alona asa ibana na monang di parlumbaan i. Molo akka parsikkola, mancontek do asa boi dapotna nilai na denggan jala masuk tu universitas na jago. Alai hita halak Kristen pasti dang songon i, ala taboto do “parniulaon ni daging” do i. (Gal. 5:19-21) Nang pe songon i, olo do ra dang tasadari adong do keinginan di hita sai naeng bersaing. Jadi porlu do sai tapareso diritta ala boi do i mambahen huria dang marsada. Taparsiajari ma muse akka contoh naposo ni Debata na disurat di Bibel na so olo bersaing. w21.07 14 ¶1-2

Molo adong holong na manoktong di hita, berupaya do hita mangurupi akka dongan na marsak. Godang do donganta saonari na mangurupi akka dongan sahaporseaon na susa jala marsak. Ala holong roha ni nasida tu akka donganta sahaporseaon i, gabe berupaya ma halak i sian nasa gogona lao mangurupi akka donganta i. (Poda 12:25; 24:10) Na diulahon nasida i sesuai do tu hata ni si Paulus na mandok, “Patogu hamu ma roha ni na marsak, urupi hamu ma akka na gale, jala sabar ma hamu tu sude halak.” (1 Tes. 5:14) Sada cara na dumenggan na boi taulahon lao mangurupi akka donganta na marsak, rade ma hita manangihon nasida. Jala tapapos ma roha ni halak i na holong do rohatta tu nasida. Taingot ma diida Debata do sude na taulahon i. Alana di Heber 6:10 didok do, “Tigor do Debata, dang lupahononna . . . holong naung dipatudu hamu.” w21.11 10 ¶11-12

Songon dia do asa rade hita mangadopi akka hasusaan di ari na naeng ro? Ikkon puas do hita tu akka na adong di hita. Jala taingot ma na mambahen hita marlas ni roha, i ma hubungatta tu Jahowa. Molo lam takkas tatanda Ibana gabe lam pos ma rohatta na jagaonna do hita tikki ro serangan ni Gog na sian Magog. Ayat sadari on patuduhon, porsea situtu do si Daud tu Jahowa. Ala sai diandalhon ibana Jahowa, dang hea dibahen Jahowa ibana kecewa. Contohna tikki marporang ibana mangalo si Goliat, didok ibana, “Sadari on, pasahaton ni Jahowa ma ho tu tanganku.” (1 Sam. 17:46) Di pudian ni ari, tikki gabe pelayan ni Raja Saul si Daud, sai berupaya do si Saul pamatehon ibana. Alai dang marna saut rencana ni Raja Saul i, ala ‘sai didongani Jahowa do si Daud’. (1 Sam. 18:12) Ala nungnga dihilala si Daud songon dia Jahowa mangurupi ibana, gabe pos ma rohana sai urupan ni Jahowa do ibana mangadopi hasusaan manang aha pe. w22.01 6 ¶14-15

Sabar do Jahowa mangulahon sude ulaonna ala diboto Ibana porlu do tikki pasaehon i sude. Dibahen Jahowa pe songon i, asa dipasangap do goarna jala parohon manfaat tu akka toppaanna. Contohna tikki manoppa tano on. Bibel mandok, ditottuhon Jahowa do “ukkuranna”, dibahen ‘tiang panukkolna’, dung i dibahen “batu parsuhi-suhina”. (Job 38:5, 6) Dung sae ditoppa Jahowa tano on, diparade Ibana dope tikkina lao mamareso sude karejona i. (1 Mus. 1:10, 12) Boi do dibayakkon hamu songon dia perasaan ni akka suru-suruan mangida toppaanna i? Pasti las hian do roha ni nasida. Bibel mandok, sappe “marsurak marlas ni roha” do akka suru-suruan i. Nang pe porlu tikki marribu taon asa sae ditoppa Jahowa saluhutna, alai dung dipareso Ibana sude toppaan i, didok Ibana ma “massai denggan do i sude”.—1 Mus. 1:31. w21.08 9 ¶6-7

Di perumpamaan ni Jesus taringot sahalak bawa naeng mardalani tu huta na dao, dipaboa do molo bawa i manuru akka hatobanna mangurus artana. Dilehon ma tu nasida hombar tu na tolap uruson ni nasida. Dilean ma tu na sada lima talenta, tu na asing dua talenta, tu na sada nai sada talenta. Hatoban na parjolo dohot na paduahon, bertanggung jawab mandalatton tugas i. Alai molo hatoban na patoluhon, malas do ibana jala gabe diusir. Ala rajin hatoban na parjolo dohot na paduahon, gabe las ma roha ni tuanna jala dilehon ma muse tu nasida tanggung jawab tambahan. w21.08 21 ¶7; 22 ¶9-10

Dang lomo roha ni Jahowa adong sahalak jolma pe na diripasson. (2 Ptr. 3:9) Alani i dilehon Jahowa dope kesempatan tu nasida lao muba jala manomba Ibana. Molo dang taargai hasabaron dohot kesempatan na dilehon Jahowa i, gabe dihukum ma hita songon si Firaun. Didok Jahowa do tu si Firaun, “Sasittongna, boi do hupakke huasokku lao pamatehon ho dohot sude rakyatmu marhite sahit na posi, asa unang adong be hamu na mangolu di tano on. Alai, hupasombu dope ho mangolu, asa hupatudu tu ho huasokku, jala asa ditanda sude halak goarhu di sude liat portibi on.” (2 Mus. 9:15, 16) Jadi adong do tikkina botoon ni sude bangso ma holan Jahowa do Debata na sittong. (Hes. 38:23) Jadi tikki diok Jahowa, ‘huturokku sahali nai’ na lao diripasson Jahowa do akka halak na so mendukung Harajaon ni Debata, songon si Firaun na manolak Jahowa. w21.09 18 ¶17-18

Pasti haccit do rohatta molo dipecat anggota keluargata manang dongan akrabta. Dung i adong muse ma na mandok hata taringot pemecatan i na mambahen lam haccit rohatta. Alai unang ma pittor tersinggung hita. (Jak. 3:2) Taingot ma jolma na so sempurna do akka donganta i, jadi boi do nasida sala makkatai. Molo songon i na masa tu hita, taingot ma hata ni si Paulus na mandok, “Toktong ma hamu sabar tu na asing, jala rade ma hamu manalpuhon hasalaan ni nasida nang pe haccit rohamuna dibahen.” (Kol. 3:13) Molo adong donganta di huria na keluargana dipecat, rade ma hita mangurupi jala patoguhon nasida. (Heb. 10:24, 25) Alana sipata olo do halak i merasa akka dongan di huria mandao sian nasida. Porlu do muse tapatogu akka gelleng ni na dipecat, asa torus nasida setia manomba Jahowa. w21.09 29 ¶13-14; 30 ¶16

Molo olo akka na poso makkata-hatai dohot akka na matua, boi ma nasida masipatoguan. (Rom 1:12) Gabe boi ma lam pos roha ni akka na poso na holong do roha ni Jahowa tu akka naposona. Jala akka na matua pe boi makkilala na arga do nasida di Jahowa. Molo nga lam terbiasa be nasida makkata-hatai, gabe lam godang ma pengalaman ni akka na matua i na diceritahon tu akka na poso. Biasana molo nga matua halak, lam moru do haulionna. Alai molo akka naposo ni Jahowa na setia, lam matua nasida lam uli do di jolo ni Jahowa. (1 Tes. 1:2, 3) Alana saleleng martaon-taon, diurupi tondi parbadia do nasida padenggatton akka sifatna. Alani i, molo nga lam tatanda akka donganta naung matua i, pasti lam taargai jala tahaholongi ma nasida. Gabe marsada ma huria molo olo akka na poso mangargai akka na matua songon i nang sebalikna. w21.09 7 ¶15-18

Ikkon tatiru do “asi ni roha” ni Debata. (Eps. 2:4) Tapatudu ma i sian hata dohot “tindakanta”. Sai talului ma kesempatan lao patuduhon asi ni roha tu keluarga, tu akka dongan, dohot tu sude halak. Molo adong diboto hamu akka dongan na porlu diurupi, urupi hamu ma nasida. Contohna, mangantarhon sipanganon tu nasida manang mangalehon bantuan na asing. Molo adong dongan na baru dipulihkan, berupaya ma hamu gabe dongan ni nasida. Asing ni i, marbarita na uli ma hamu tu akka halak. (Job 29:12, 13; Rom 10:14, 15; Jak. 1:27) Molo parduli do hita tu na asing, pasti berupaya hita patuduhon asi ni roha. Tikki taulahon i, gabe las ma roha ni Jahowa, Debata ‘parasi roha’! w21.10 13-14 ¶20-22

Di Psalmen 23 dipaboa si Daud do akka pasu-pasu na dijalo ibana sian Jahowa, ala Jahowa do Siparmahan di ibana. Misalna ditogu-togu Jahowa do ibana “tu dalan na sittong”, jala torus do diurupi Jahowa ibana tikki susa nang sonang ngoluna. Hira na diboan Jahowa ma ibana maradi tu “inganan parmahanan na lomak”. Alai godang do akka musuna jala hea do metmet rohana, didok ibana ma songon na mardalan di “rura na massai golap” ibana. Nang pe songon i, “dang mabiar” ibana ala Jahowa do Siparmahan di ibana. Didok si Daud “dang hurangan manang aha” ibana. Boasa didok ibana songon i hape susa do ngoluna? Ala jonok ibana tu Jahowa. Puas do si Daud tu akka na adong di ibana. Jala dang arta na mambahen las rohana, alai hubunganna tu Jahowa do. Pos do rohana jagaon ni Jahowa ibana jala pasu-pasuonna. Sian on taboto ma ikkon seimbang do pandanganta tu arta jala dang boi tabahen i na uppetting di ngolutta. w22.01 3-4 ¶5-7

Najolo godang do halak na manolak barita na dipasahat naposo ni Jahowa. Misalna si Noak, didok do ibana “sahalak parbarita na paboahon dalan ni Debata na sittong i”. Jala diulahon ibana do tugasna i saleleng marpulu taon. (2 Ptr. 2:5) Pasti lomo do rohana asa ditangihon halak barita na dipasahatna i. Alai dang hea didok Jahowa pasti adong do halak na manangihon baritana i. Tikki naeng mambahen parau i, didok Jahowa ma tu si Noak, “Masuk ma ho tu parau i rap dohot sude anakmu, istrim, dohot sude parumaenmu.” (1 Mus. 6:18) Jala tikki dipaboa Jahowa ukkuran ni parau i tu si Noak, mungkin diboto si Noak do dang lao godang halak na manangihon baritana. Alana ukkuran ni parau i pe dang dibahen lao manampung godang halak. (1 Mus. 6:15) Jala memang dang adong nanggo sada pe na manangihon barita ni si Noak i. (1 Mus. 7:7) Na so marhasil do si Noak mangulahon tugasna i? Daong. Di Jahowa nungnga marhasil be si Noak ala nungnga diulahon ibana paretta ni Jahowa.​—1 Mus. 6:22. w21.10 26 ¶10-11

Bayakkon ma songon dia perasaan ni si Rut mambege hata ni simatuana i. Sai berupaya do si Rut mangurupi dohot patoguhon si Naomi tikki lungun rohana, jala mandongani si Naomi saleleng di pardalanan. Alai tetap dope didok si Naomi, “Dang adong be huboan manang aha tuson dibahen Jahowa.” Tikki didok si Naomi songon i hira na so diargai ibana ma sude pambahenan ni si Rut, na sai torus mandongani ibana. Pasti lungun hian do roha ni si Rut mambege i. Nang pe songon i tetap do diurupi ibana si Naomi. (Rut 1:3-18) Songon si Rut, olo do ra nungnga berupaya hita mangurupi donganta. Alai alani marsakna didok ibana ma hata na mambahen haccit rohatta. Unang ma pittor hatop hita tersinggung. Torus ma taurupi donganta i jala martangiang ma hita mangido gogo sian Jahowa, asa unang menyerah mangurupi ibana. (Poda 17:17) Molo tung pe di mulana ditolak ibana bantuanta i, alai torus ma tapatudu holong na manoktong tu ibana.​—Gal. 6:2. w21.11 11 ¶17-19

Molo di Bibel, hata “badia” berkaitan do i tu parange na ias, pangalaho na denggan, dohot tu ulaonta manomba Jahowa. Boi do muse dipakke hata badia tu halak na dipapulik lao marhobas tu Debata. Jadi molo denggan pangalahotta, tasomba Jahowa, jala molo jonok hubungatta tu Ibana, boi do hita didok badia. Pasti las hian do rohatta mamboto on. Alana nang pe dang sempurna hita, boi do hita marale-ale tu Jahowa Debata na tung massai badia i. Badia do Jahowa di sude ulaonna. Jala songon i do na didok akka serapim, i ma akka suru-suruan na melayani di tahta ni Jahowa. Didok nasida, “Badia, badia, badia do Jahowa Pamimpin ni Akka Tentara.” (Jes. 6:3) Boi pe marale-ale akka suru-suruan i tu Jahowa ala badia do nasida. w21.12 3 ¶4-5

Pasti lomo do roha ni akka naposo asa denggan ngoluna. Bisa jadi guru ni nasida di sikkola dohot anggota keluarga na so sahaporseaon manjujui nasida tu pendidikan tinggi, asa boi mandapot karejo na balga gajina. Molo diihutton nasida i, gabe godang ma habis tikkina tusi. Sebalikna, natua-tua manang akka dongan di huria manjujui akka na poso mangalehon godang tikki tu Jahowa. Songon dia do asa boi dibahen nasida keputusan na denggan? Boi do dijaha jala dirimangi nasida Epesus 5:15-17. Sian ayat i, boi ma dipikkiri nasida sukkun-sukkun on: ‘Aha do “lomo ni roha ni Jahowa” huulahon? Keputusan aha do na mambahen Jahowa marlas ni roha? Aha do na ikkon hupillit asa boi au denggan mamakke tikkikku?’ Taingot ma “mangolu di akka tikki na jahat do hita saonari on”, jala na lao hancur do portibi na dirajai Sibolis on. w22.01 27 ¶5

Nang pe mulana dang porsea si Jakobus tu Jesus, alai dung dipahehe jala ‘dipatuduhon Jesus dirina tu si Jakobus’, gabe porsea ma ibana. (1 Kor. 15:7) Dung gabe sisean ni Jesus, mandapot kesempatan ma si Jakobus digohi tondi parbadia di ari Pentakosta di Jerusalem. (Ul. 1:13, 14) Di pudian ni ari, dipillit ma si Jakobus gabe anggota punguan na mangaradoti huria Kristen di abad na parjolo. (Ul. 15:6, 13-22; Gal. 2:9) Jala di taon 62 M, dipillit Jahowa do ibana lao manuratton bukku Jakobus. Nang pe bukku i mulana disurat tu akka halak na dipillit lao mangolu tu surgo, alai bermanfaat dope i tu hita saonari dang soal tudia harapanta. (Jak. 1:1) Menurut sejarawan na margoar si Josephus, dihukum mate do si Jakobus alani haporseaonna. Sintua ni malim Ananias do na manuru ibana asa dihukum. Jadi torus do setia si Jakobus sahat tu ujung ni ngoluna. w22.01 9 ¶3, 5

Sian ayat sadari on marsiajar do hita, dang sai torus dijaga Jahowa naposona tikki mangadopi tantangan na manguji haporseaonna. Songon Jesus, bisa jadi dianiaya do hita bahkan sappe dipamate. (Mat. 16:24, 25) Alai pos ma rohatta dang pasombuon ni Jahowa hita manaon hasusaan lobi sian na tolapta. (1 Kor. 10:13) Sian ayat on pe hita marsiajar, bisa jadi hita dianiaya hape dang adong hasalaatta. (1 Ptr. 2:19, 20) Dianiaya pe hita ala na tabaritahon do na sittong jala dang taihutton portibi on. (Joh. 17:14; 1 Ptr. 4:15, 16) Diboto Jesus do boasa dipasombu Jahowa ibana susa. Alai hita, olo do sukkun-sukkun rohatta boasa dipasombu Jahowa hita susa. (Hab. 1:3) Taingot ma, Debata parasi roha jala na sabar do Jahowa. Jadi diattusi Ibana do boasa songon i perasaanta, dang alana gale haporseaotta. Alai ala porlu do hita dipatogu Ibana.​—2 Kor. 1:3, 4. w21.04 11 ¶9-10

Las do roha ni Jahowa molo sesuai ibadatta i tu lomo ni rohana. Tama do Jahowa disomba, jadi ikkon na undenggan do talehon tu Ibana. Sada caratta manomba Jahowa, i ma tikki martangiang. Di Bibel, dipatudos do tangiang i songon dupa na dipelehon di tabernakel manang di bagas joro. Lomo do roha ni Jahowa manganggo uap ni dupa i. Dos songon i ma, lomo do roha ni Jahowa mambege tangiang na sian ias ni roha nang pe sederhana hata na tapakke tikki martangiang. (Poda 15:8; 5 Mus. 33:10) Tikki martangiang, tapaboa ma na holong rohatta tu Jahowa jala na taargai sude na nilehonna tu hita. Molo taulahon i, las ma roha ni Jahowa mambege tangiangta i. Lomo do roha ni Jahowa molo tapaboa tu Ibana aha na takhawatirhon dohot na taharappon. Jadi sebelum martangiang, ikkon jolo tapikkirhon do aha na naeng tadokkon asa songon dupa na terbaik tangiangta i. w22.03 20 ¶2; 21 ¶7

Di Armagedon, dang hita na manottuhon ise na diselamatton dohot ise na dihukum. (Mat. 25:34, 41, 46) Pos do rohatta molo keputusan ni Jahowa i do na undenggan manang na gabe mandao do hita sian Ibana ala dang setuju tu keputusanna i? Saonari ma tikkina patoguhon haporseaotta tu Jahowa, asa pos rohatta tu Ibana haduan. Bayakkon ma na lao masa di tano on dung sae ari panguhuman ni Jahowa. Dang adong be agama palsu, dang adong be sistem perdagangan na tamak, dohot pamarettaon na mambahen godang halak susa. Dang adong be na marsahit, na matua, jala dang adong be hamatean. Dang boi be Sibolis dohot suru-suruan na jahat mangganggu jolma saleleng saribu taon. Dang hilalaotta be sude hasusaan na dibahen nasida. (Pgk. 20:2, 3) Tikki masa i, pasti massai las do rohatta ala nungnga marpos ni roha tu Jahowa saleleng ni ngolutta. w22.02 6-7 ¶16-17

Lomo do roha ni Jesus mardame dohot na asing jala dijujui ibana do akka siseanna mangulahon na sarupa. Diajarhon Jesus do asa olo Jahowa manjalo ibadat ni nasida, ikkon mardame do nasida tu na asing. (Mat. 5:23, 24) Tikki marsoal akka siseanna taringot ise na ussangap, diurupi Jesus do nasida asa mardame. (Luk. 9:46-48; 22:24-27) Asa gabe sibahen dame hita, dang sae holan menghindari parbadaan. Ikkon berupaya do mardame jala mangurupi akka donganta pasaehon parsoalan ni nasida. (Plp. 4:2, 3; Jak. 3:17, 18) Tasukkun ma diritta, ‘Olo do au mengalah asa mardame tu na asing? Molo adong dongan na mambahen haccit rohakku, torus do au muruk tu ibana? Olo do au na parjolo minta maaf nang pe ibana na sala?’ w22.03 10 ¶10-11

Saonari rade do naposo ni Jahowa mangihutton arahan ni Jesus lao melayani Jahowa, songon naung dipaboa Bibel hian. (Ps. 110:3) Ganup taon dipakke naposo ni Jahowa do marratus juta jom di ulaon marbarita. Las do roha ni nasida mangulahon i nang pe dang digaji. Dipakke nasida do tikki ni nasida lao mangurupi jala patoguhon akka donganna. Asing ni i, akka sintua dohot parhobas pe dilehon nasida do tikkina lao mempersiappon acara parpunguan dohot kunjungan penggembalaan. Boasa olo nasida mangulahon i? Ala holong roha ni nasida tu Jahowa dohot tu akka dongan. (Mat. 22:37-39) Sai tatiru ma Jesus na mambahen kebutuhan ni halak na asing lebih penting sian kebutuhanna sandiri. (Rom 15:1-3) Molo tatiru ibana godang do manfaat na tadapot. w22.02 20 ¶1-2

Najolo martani do godangan halak Israel. Molo adong parkarejona, ikkon dilehon do gajina dung botari sae karejo. Dang boi ditahan ibana gaji ni parkarejona i, ala hepeng i do pakkeonna lao manuhor kebutuhan ni keluargana. Bibel mandok, ‘Susa do ngolu ni parkarejona i jala sian gajina i do ibana mangolu.’ (5 Mus. 24:14, 15; Mat. 20:8) Saonari, dang tiap ari be akka parkarejo digaji. Alai marlakku dope prinsip na adong di 3 Musa 19:13. Godang do akka pengusaha na so adil tu karyawanna. Dilehon do gaji na massai otik, ala diboto halak i na massai penting do karejo i di akka karyawanna i. Hape molo dibahen akka pengusaha i songon i, sarupa ma i songon na ‘manahan gaji’ ni parkarejona. Dang boi halak Kristen songon i, ikkon adil do nasida tu karyawanna. w21.12 10 ¶9-10

Ala nungnga leleng Jesus haccitan, gabe mauas situtu ma dihilala ibana jala naeng minum. Dang maila Jesus paboahon naung mauas ibana. Sipata dang sai mura paboahon tu akka dongan na porlu hita diurupi. Alai molo ikkon diurupi do hita, unang ma maila paboahon i. Misalna akka dongan naung matua manang na marsahit-sahit, porlu do ra diurupi belanja tu toko manang didongani marubat tu dokter. Molo metmet rohatta taceritahon ma i tu sintua dohot tu dongan na tahaporseai, asa dipatogu hita marhite “hata na denggan”. (Poda 12:25) Taingot ma, holong do roha ni akka dongan tu hita jala sai rade do nasida mangurupi “tikki masa sitaonon”. (Poda 17:17) Alai molo dang olo hita paboahon na porlu hita diurupi, dang diboto nasida i. w21.04 11-12 ¶11-12

Gabe tantangan do molo muba situasitta. Adong do piga-piga dongan na sebelumna melayani sepenuh waktu khusus, ikkon menerima penugasan na baru. Na asing ikkon so sian penugasanna ala nungnga matua. Hape massai lomo do roha ni nasida di penugasanna i. Molo masa i, wajar do kecewa hita. Alai asa ummura hita menerima penyesuaian i, ikkon tasesuaihon cara pandangta tu cara pandang ni Jahowa. Taingot ma massai godang do ulaon ni Jahowa saonari. Jala dilehon do tu hita kesempatan lao mendukung Ibana, ala dongan sakarejo ni Jahowa do hita. (1 Kor. 3:9) Alai, dang hea berubah holong ni Jahowa tu hita. Molo adong perubahan na dibahen organisasi jala berdampak tu hita secara pribadi, unang ma sai tapikkiri boasa masa i. Daripada sai tadok “dumenggan do najolo sian saonari”, lebih baik ma hita martangiang tu Jahowa asa diurupi hita mangida manfaat ni perubahan i. (Pjm. 7:10) Massai penting do torus marpikkiran positif. Hasilna gabe boi ma hita toktong marlas ni roha jala setia nang pe berubah situasitta. w22.03 17 ¶11-12

Tu ise do dipatudu Jahowa holong na manoktong i? Dang tu sude jolma dipatudu Jahowa holong na manoktong i, holan tu akka halak na akrab tu Ibana do. Ai setia do Jahowa tu akka halak na marale-ale tu Ibana, dilean do harapan tu nasida, jala torus do dihaholongi Ibana nasida. Nang pe songon i, dipatudu Jahowa do holong ni rohana tu sude jolma. Tarida ma i sian hata ni Jesus tu si Nikodemus. Didok ibana, “Ai songon on do balga ni holong ni roha ni Debata tu portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.”​—Joh. 3:1, 16; Mat. 5:44, 45. w21.11 3 ¶3, 6; 4 ¶7

Saonari susa do parngoluotta, jala lam tu susana dope i annon. (Mat. 24:21) Pasti berharap do hita hatop dipasae Jahowa sude hasusaan on jala dang taingot be i. (Jes. 65: 16, 17) Alai ikkon toktong do hita sabar. Boasa? Didok Jesus, “Molo toktong hamu setia jala martahan, mangolu ma hamu.” (Luk. 21:19) Boi do hita lam mura patuduhon hasabaron, molo tatiru akka halak na toktong sabar tikki adong hasusaanna. Ise do na paling jotjot patuduhon hasabaron? Debata Jahowa. Sabotulna boi do langsung dipasae Jahowa sude hasusaan na masa di portibi na dirajai Sibolis on, ala massai gogo do Ibana. (Rom 9:22) Alai sabar do Jahowa paimahon sappe dapot tikki naung ditottuhon Ibana. w21.07 8 ¶2-4