September

Nang pe malo Jesus mangajari, alai dang cukkup dope i dihilala akka halak. Ditolak nasida do Jesus ala dang olo ibana mambahen mukjizat asa las roha ni nasida. (Mat. 16:4) Hea do Panurirang Jesaya paboahon taringot Messias songon on, “Dang olo ibana marsurak manang mambahen gogo soarana, jala dang olo ibana tarbege soarana di akka dalan.” (Jes. 42:1, 2) Saleleng marbarita Jesus, dang hea ibana mangalului hasangapon tu dirina sandiri. Dang olo ibana mambangun bagas joro na megah, mamakke jubah songon akka pamimpin agama, jala dang olo ibana dijou mamakke gelar kehormatan. Tikki diadili pe ibana, dang olo ibana mambahen mukjizat asa las roha ni si Herodes. (Luk. 23:8-11) Marbarita na uli do fokus utama ni Jesus, dang mambahen mukjizat. Jala “alani i do umbahen na ro” ibana, songon na didok Jesus tu akka siseanna.​—Mrk. 1:38. w21.05 4 ¶9-10

Talului ma akka halak na “tama mandapot hangoluan saleleng ni lelengna”. (Ul. 13:48) Asa boi nasida gabe sisean, ikkon taurupi do nasida (1) mangattusi, (2) makkaporseai, jala (3) mangulahon na diparsiajari ibana sian Bibel. (Kol. 2:6, 7; 1 Tes. 2:13) Sude do hita na di huria boi mangurupi sahalak parsiajar Bibel. Tapatudu ma na tahaholongi do ibana jala tasambut ma ibana tikki ro tu parpunguan. (Joh. 13:35) Jala ikkon dilehon guru studina do godang tikki dohot upaya mangurupi studina i asa mangaruppakkon akka haporseaon dohot kebiasaan na sala “naung togu dipajongjong”. (2 Kor. 10:4, 5) Olo do ra ikkon sappe marbulan-bulan taurupi studitta i asa tardidi. Alai pos ma rohatta, dang sia-sia upayatta i. w21.07 3 ¶6

Aha do na mambahen pos rohatta Saksi Jahowa do agama na sittong? Jala aha do buktina na lomo do roha ni Jahowa tu caratta manomba Ibana? Massai togu do pos ni roha ni si Paulus tu hasittongan, jala dang holan perasaanna sajo i. (1 Tes. 1:5) Ringgas do ibana marsiajar Bibel. Pos do rohana “sian Debata do sude Surat na Badia i jala dilehon marhite panogu-noguon ni tondi parbadia”. (2 Tim. 3:16) Hasilna gabe dapotna ma akka bukti na patuduhon Jesus i do Messias. Alai molo akka pamimpin agama Jahudi, dang porsea tu akka bukti i. Mangakku do nasida mangajarhon na sittong taringot tu Debata, alai dang sesuai tu pangalahona. (Tit. 1:16) Molo si Paulus, dang dipillit ibana bagian na dia na dihaporseai ibana sian Hata ni Debata. Berupaya do ibana mangajarhon dohot mangulahon “sude lomo ni roha ni Debata”.​—Ul. 20:27. w21.10 18 ¶1-2

Nang pe hita na marbarita na uli, alai Jahowa do na mambahen i marhasil. (1 Kor. 3:6, 7) Massai arga do di Jahowa hangoluan ni jolma. Alani i ma dilean tu hita tugas rap saulaon dohot Anakna lao menyelamatton akka halak sebelum ro panutup ni jaman on. (Hag. 2:7) Dipatudos do ulaonta marbarita songon ulaon ni tim penyelamat na naeng menyelamatton halak na terjebak di pertambangan. Nang pe anggota tim na menyelamatton halak na terjebak i holan saotik, alai boi do nasida marhasil ala kerja sama. Songon i ma tong hita, memang dang taboto sadia godang halak na selamat sian portibi ni Sibolis on, alai dipakke Jahowa do hita sude mangurupi nasida. Si Andreas na tinggal di Bolivia mandok, “Dang alani kerja keras ni sahalak penyiar boi tardidi sahalak parsiajar Bibel, alai ala kerja sama do hita sude.” Jadi toktong ma hita semangat marbarita na uli. Molo taulahon i, pasu-pasuon ni Jahowa ma hita jala las ma rohatta. w21.05 19 ¶19-20

Tujuan ni parburu, i ma manakkup jala pamatehon buruanna. Marmacam-macam do jorat na dipakke ibana songon na didok di Bibel. (Job 18:8-10) Songon dia do dibahen parburu asa masuk binatang buruanna i tu jorat i? Diparsiajari ibana do kebiasaan ni binatang i, tudia binatang i jotjot lao, jala aha siallangonna. Dung diboto ibana i, dipakke ma jorat na cocok lao manakkup binatang i. Dos songon i ma Sibolis. Diamati ibana do kebiasaanta, diparrohahon ibana do tudia biasana hita lao, jala aha lomo ni rohatta. Dung i dipillit ibana ma jorat na cocok lao manjorat hita. Dipaboa do di Bibel, boi do hita malua sian jorat ni Sibolis. Dua jorat na sering dipakke Sibolis, i ma sifat sombong dohot tamak. Saleleng marribu taon, marhasil do Sibolis mamakke jorat on. Songon panakkup pidong do ibana. Dibahen ibana ma cara asa masuk hita tu joratna i. (Ps. 91:3) Alai boi do hita dang tarjorat, ala nungnga dipaboa Jahowa akka taktik na dipakke Sibolis.​—2 Kor. 2:11. w21.06 14 ¶1-2

Dipatudos do akka donganta na matua songon berlian na massai arga. Dipatudos Bibel do uban ni nasida songon mahkota na uli. (Poda 20:29) Alai sipata, olo do gabe taabaihon jala dang taargai nasida. Hape godang do parsiajaran na boi dapot ni akka na poso sian akka dongan na matua, jala ummarga do i sian arta. Diargai Jahowa do akka donganta na matua. Takkas do ditanda Jahowa nasida. Diargai Ibana do akka sifat ni nasida na denggan. Las do roha ni Jahowa ala olo nasida manceritahon pengalaman ni nasida lao mangurupi akka na poso asa marbisuk. (Job 12:12; Poda 1:1-4) Las do muse roha ni Jahowa mangida akka dongan na matua ala toktong setia. (Mal. 3:16) Sasittongna godang do masalah ni nasida. Alai toktong do togu haporseaon ni nasida tu Jahowa. Dang hea mago harapan ni nasida, gariada lam matua nasida, lam togu do harapanna. Massai holong do roha ni Jahowa tu nasida, ala torus do dibaritahon nasida goar ni Jahowa “nang pe nungnga matua”.​—Ps. 92:12-15. w21.09 2 ¶2-3

Porlu do sai torus tapareso diritta. Tasukkun ma diritta, ‘Jotjot do hubandingkon dirikku tu na asing jala marpikkir au do na undenggan sian nasida? Tikki hubahen na dumenggan mangulahon tugashu di huria, holan asa jago do au idaon ni halak manang lao mambahen las roha ni Jahowa?’ Bibel mandok unang ma tabandingkon diritta tu na asing. Boasa? Alana molo merasa undenggan hita sian nasida, gabe ginjang ma rohatta. Alai molo merasa hita dang marguna, gabe metmet ma rohatta. (Rom 12:3) Ikkon sai taingot do ditarik Jahowa pe hita tu organisasina dang ala na bagak, ala na malo, manang ala terkenal hita. Alai ala holong do rohatta tu Ibana jala olo manangihon Anakna i.​—Joh. 6:44; 1 Kor. 1:26-31. w21.07 14-15 ¶3-4

Asa boi taubah cara marpikkir na negatif, porlu do martangiang hita, manjaha Bibel, jala mangarimangi i. Torus ma taulahon i jala tajalo ma gogo sian Jahowa. Pasti diurupi tondi parbadia ni Jahowa do hita asa unang tabandingkon diritta tu na asing. Diurupi Jahowa do muse hita mambolokkan late ni roha dohot ginjang ni roha sian diritta. (2 Kron. 6:29, 30) Diboto Jahowa do isi ni rohatta dohot perjuanganta mangalo pengaruh na jahat sian portibi on dohot kelemahanta sandiri. Tikki diida Jahowa upayatta, gabe lam holong ma rohana tu hita. Holong hian do roha ni Jahowa tu hita. Dipatudos ma i songon holong ni sahalak borua tu anakkonna na manusu dope. (Jes. 49:15) Pasti las do rohatta mamboto na holong hian do roha ni Jahowa tu hita. w21.07 24-25 ¶17-19

Asa lam marlas ni roha hita, tabahen ma na undenggan tikki mandalatton tugasta. ‘Tapakke ma tikkitta’ lao marbarita na uli jala mangulahon tugas di huria. (Ul. 18:5; Heb. 10:24, 25) Persiapan ma hita sebelum marpungu, asa boi talean komentar na patoguhon akka dongan. Molo dapot tugas di parpunguan tonga pokkan, denggan ma taparade. Denggan ma takarejohon tugas manang aha pe na dilean tu hita. Unang ma hea didok rohatta adong tugas na hurang penting jala na pahabis-habisson tikki. Berupaya ma hita asa lam malo mangulahon karejotta. (Poda 22:29) Molo taulahon i, gabe lam jonok ma hita tu Jahowa jala tamba ma las ni rohatta. (Gal. 6:4) Molo tung pe donganta na asing na mandapot tugas na taharappon, dang mago las ni rohatta i. Gariada rap marlas ni roha do hita dohot ibana.​—Gal. 5:26. w21.08 22 ¶11

Ginjang ni roha sarupa do songon penyakit na boi mambahen sasahalak marsahit jantung. Alani i, tapasiding ma ginjang ni roha. Alana molo ginjang rohatta, gabe maol ma hita mangihutton petunjuk sian Jahowa. Songon i do na masa tu halak Parise. Ginjang do roha ni nasida, gabe dang olo nasida mangakkui molo Jesus i Anak ni Debata. (Joh. 12:37-40) Akibatna gabe dang boi dapot ni nasida hangoluan na salelengna. (Mat. 23:13, 33) Tatiru ma si Jakobus. Serep do rohana. Diihutton ibana do petunjuk sian Jahowa. Hita pe songon i ma. Tikki mambahen keputusan, tikki sala cara marpikkir manang sikapta, porlu do taihutton prinsip ni Bibel lao mangurupi hita. Jala tapangido ma tondi parbadia mangurupi hita asa sanggup mangulahon i. w22.01 10 ¶7

Pos ma rohatta ditangihon Ama na di surgo i do tangiangta. (Kol. 4:2) Taingot ma marjanji do Ibana mangalusi tangiangta i “di tikki na tahaporluhon” menurut Ibana. (Heb. 4:16) Unang ma tasalahon Jahowa molo dang langsung dialusi tangiangta i songon na taharappon. Misalna, nungnga martaon-taon ra hita martangiang asa ro Harajaonna pasaehon sude masalah di portibi on. Jala Jesus pe disuru do hita manangiakkon i. (Mat. 6:10) Alai molo dang masa dope i di tikki na taharappon, unang ma gabe gale haporseaotta. (Hab. 2:3; Mat. 24:44) Sabar ma hita paimahon Jahowa, jala torus ma hita martangiang. Pos ma rohatta, masa nama satokkin nai sude janji ni Debata. Nungnga ditottuhon Jahowa “ari dohot jamna”. Jala tikki naung ditottuhon Jahowa i ma tikki na paling pas di sude toppaanna.​—Mat. 24:36; 2 Ptr. 3:15. w21.08 10 ¶10-11

Molo serep roha ni sasahalak, disadari ibana do dang godang be na boi diulahon ibana songon najolo tikki poso. Songon i do na disadari akka pengawas wilayah. Molo nungnga marumur 70 taon nasida, dang gabe pengawas wilayah be nasida jala mandapot penugasan na baru nama. Pasti dang mura mangulahon i. Alai diboto nasida do, undenggan do hasilna molo akka dongan na upposo na mangulahon i. Sarupa do nasida songon halak Lepi najolo. Molo nga marumur 50 taon, dang melayani be halak i di tabernakel. Las dope nian roha ni nasida melayani di tabernakel. Alai diattusi halak Lepi i do, nang pe dang martugas be nasida disi, godang dope na boi diulahon nasida. Boi do nasida mangurupi jala mangalatik akka na poso. (4 Mus. 8:25, 26) Songon i do na diulahon akka donganta na hea gabe pengawas wilayah. Torus do nasida marlas ni roha melayani Jahowa di huria. w21.09 8-9 ¶3-4

Dipaboa Jesus do ilustrasi taringot anak na mago na disurat di Lukas 15:11-32. Di ilustrasi i, adong ma sahalak bawa na mangalo tu bapakna. Ditinggalhon ma jabu ni bapakna jala lao “tu luat na dao”. Disi marsonang-sonang ma ibana jala dang hasea pangalahona. Dung i gabe susa ma ngoluna. Alai songon na didok Jesus, gabe ‘sadar’ ma ibana nungnga sala ibana. Disadari ibana do muse undenggan do ngoluna tikki di jabu ni bapakna. Jadi diputusson ibana ma asa mulak muse tu jabu ni bapakna jala minta maaf. Dipatudu ibana do na botul-botul ibana bertobat sian tindakanna. Sian ilustrasi ni Jesus on boi do akka sintua marsiajar carana mamboto nungnga botul-botul bertobat do sasahalak manang na dang. w21.10 5 ¶14-15

Tikki didok Apostel Paulus akka na so tarhutur, aha do maksudna? Didok ibana, “Ala naeng jalootta do Harajaon na so tarhutur i, toktong ma manomba Ibana marhite cara na sesuai tu lomo ni rohana mardongan biar ni roha dohot unduk ni roha.” (Heb. 12:28) Tikki dihutur Jahowa sahali nai tano on, holan Harajaon ni Debata do na so tarhutur manang na martahan saleleng ni lelengna. (Ps. 110:5, 6; Dan. 2:44) Saonari ma tikkina ikkon dibahen akka halak keputusan. Molo portibi on do na didukung halak i, dihukum Jahowa ma nasida jala dipamate. Alai molo Harajaon ni Debata do na didukung halak i, boi ma nasida mangolu saleleng ni lelengna. (Heb. 12:25) Molo marbarita na uli hita tu nasida, boi ma taurupi nasida mambahen keputusan na penting lao mamillit ise do dukungonna. Sai anggiat ma torus taingot hata ni Jesus na mandok, “Dibaritahon ma barita na uli taringot tu Harajaon i di liat portibi on, asa saluhut bangso mambege barita i. Dung masa i ro ma ujungna.”​—Mat. 24:14. w21.09 18-19 ¶18-20

Tanggung jawab ni akka sintua do patoguhon keluarga ni na dipecat. (1 Tes. 5:14) Berupaya ma akka sintua makkata-hatai dohot keluarga ni na dipecat i, sebelum manang dung sae marpungu. Kunjungi hamu ma nasida tu jabuna, jala rap martangiang ma hamu. Bahen hamu ma jadwal asa boi rap marbarita na uli dohot nasida. Boi do muse diundang hamu nasida tu ibadat keluargamuna. Patudu hamu ma tu nasida holong dohot asi ni roha, lao patoguhon akka dongan na marsak i. (1 Tes. 2:7, 8) ‘Dang lomo roha ni Jahowa diripasson manang ise pe’, alai lomo ni rohana “naeng ma sude jolma marhamubaon”. (2 Ptr. 3:9) Arga do hangoluan ni sasahalak di Debata, tung pe hea ibana mangulahon dosa na balga. Massai arga do ditobus Jahowa jolma, sappe mate do Anak haholonganna i. Alani asi ni rohana, diurupi Jahowa do halak na mardosa asa mulak muse tu Ibana. Jala sai diharappon Jahowa do asa mulak nasida songon ilustrasi ni Jesus taringot anak na mago.​—Luk. 15:11-32. w21.09 30-31 ¶17-19

Olo do ra maol hamu marbarita na uli alani masalah kesehatan. Alai nang pe songon i, boi do hamu tetap marlas ni roha. Taingot ma pengalaman ni Raja Daud. Tikki i naeng marporang do ibana dohot akka tentarana mangalo halak Amalek, lao paluahon keluarga ni nasida. Alai adong ma 200 tentarana na palojahu lao marporang. Jadi disuru ibana ma nasida tinggal lao manjaga akka barang. Dung monang si Daud dohot akka tentarana, dibuat nasida ma arta ni halak Amalek i. Dung i disuru si Daud ma asa dibagi rata jarahan i tu halak na dohot marporang dohot tu na manjaga barang. (1 Sam. 30:21-25) Dos songon i ma ulaonta marbarita na uli. Sude do hita boi marlas ni roha molo tardidi sasahalak. Diida Jahowa do kerja kerasta. Diboto Ibana do ala holong do rohatta tu Ibana makana taulahon i. Pos ma rohatta pasti dipasu-pasu Jahowa do hita, jala urupanna do hita asa marlas ni roha di ulaon marbarita. (Joh. 14:12) Taingot ma, pasti las do roha ni Jahowa tu hita molo dang menyerah hita marbarita na uli! w21.10 27-28 ¶15-17

Molo nungnga lam matua hita, olo do sipata mabiar hita dang godang be na boi talean tu Jahowa songon najolo i. Memang nungnga moru be gogotta saonari, alai molo lam matua hita lam godang do pengalamanta na mambahen hita marbisuk. Boi do tabagihon pengalamanta i lao mangurupi akka dongan na poso mandalatton akka tanggung jawab di organisasi. Porlu do serep roha ni akka dongan na matua asa rade nasida mangurupi akka na poso. Halak na serep rohana dang manganggap uppetting ibana sian na asing. (Plp. 2:3, 4) Ikkon disadari nasida do muse, godang do cara makkarejoi sada tugas, jala dang maralo i tu prinsip ni Bibel. Alani i, unang ma dipaksahon nasida ikkon sesuai cara ni na poso tu cara ni nasida. (Pjm. 7:10) Memang godang do pengalaman ni akka dongan na matua, alai ikkon disadari nasida do “muba do sude na masa di portibi on”. Jadi ikkon olo do nasida menyesuaihon cara ni nasida makkarejoi sada tugas tu situasi na baru.​—1 Kor. 7:31. w21.09 8 ¶1, 3

Dang hea dipangido Jahowa asa diulahon akka naposona ulaon na parohon ila. Ai dang ulaon na badia i. Jadi lao paingotton halak Israel na massai badia do Jahowa, disuru Ibana do asa diukir hata “Na Badia do Jahowa” di lempengan mas na diikkat di sorban ni sintua ni malim. (2 Mus. 28:36-38) Hata na diukir di lempengan mas i, pasti gabe sipaingot na takkas tu sude halak Israel. Alai songon dia ma molo adong halak Israel na so boi mangida i ala dang hea ibana juppang tu sintua ni malim? Boi do diboto ibana na badia Jahowa? Boi. Alana tiap dijahahon patik ni Jahowa tu bangso i, takkas do dipaboa hata i. Jala sude do nasida boi mambege i, bawa, borua, dohot dakdanak. (5 Mus. 31:9-12) Seandaina disi hamu najolo, pasti jotjot do dibege hamu hata songon on: “Au do Jahowa Debatamuna. . . . Alani i, ikkon badia do hamu. Ai badia do Au.” “Ikkon badia do hamu di jolokku, ai badia do Au. Au do Jahowa.”​—3 Mus. 11:44, 45; 20:7, 26. w21.12 3 ¶6-7

Adong do ra piga-piga halak na marsak ala mamikkiri aha allangonna, pakkeonna, dohot tempat tinggalna. Mungkin maol do di negara ni nasida mangalului hepeng. Gabe maol ma manuhor kebutuhan ni keluargana. Manang adong do ra na mate sian keluarga i. Hape ibana do saleleng on na massari di keluarga i. Alai unang ma pamarsakhu hita. Marjanji do Jahowa, lehononna do na porlu di hita molo tautamahon Ibana di ngolutta. (Mat. 6:32, 33) Sai ditepati Ibana do janjina. (5 Mus. 8:4, 15, 16; Ps. 37:25) Haru akka pidong dohot akka bunga pe diparrohahon Jahowa do. Jadi unang ma pamarsakhu hita mamikkiri aha na lao allangotta dohot pakkeotta! (Mat. 6:26-30; Plp. 4:6, 7) Pasti berusaha do natua-tua na parholong paradehon na porlu tu akka gellengna. Dos songon i ma Jahowa, ala holong do rohana tu hita pasti dilehon Ibana do akka na porlu tu hita. w21.12 17 ¶4-5; 18 ¶8

Hea do hamu mandapot perlakuan na so adil sian akka donganta? Marsiajar ma hita sian si Josep. Kejam do akka abangna tu ibana. Alai torus do ibana fokus manomba Jahowa, jala dipasu-pasu Jahowa do hasabaronna i. Dang sai diingot-ingot si Josep hasalaan ni akka abangna i. Gabe boi ma diida ibana songon dia Jahowa mangurupi ibana. (1 Mus. 45:5) Molo hea do dibahen na so adil tu hita, tatiru ma si Josep. Toktong ma jonok hita tu Jahowa jala tapasahat ma masalahta i tu Ibana. (Ps. 7:17; 73:28) Molo adong na mambahen na so adil tu hamu manang dibahen haccit rohamuna, ingot ma jonok do Jahowa tu “halak na mandele”. (Ps. 34:18) Jadi, toktong ma hita sabar paimahon Jahowa. Tapasahat ma sude holso ni rohatta tu Ibana. (Ps. 55:22) Ibana do Hakim ni saluhut tano on. Jadi diida Ibana do sude na masa i. (1 Ptr. 3:12) Alani i, molo adong masalahmuna na so boi dipasae hamu saonari, sabar ma hamu paimahon Jahowa pasaehon i sude. w21.08 12 ¶14, 16

Marbisuk ma hita asa boi mangulahon akka na mambahen las roha ni Jahowa. Asa boi denggan tapakke tikkitta, ikkon tapillit do ulaon na uppetting sian ulaon na asing, nang pe dang sala akka ulaon i. Taida ma contohna tikki ro Jesus tu jabu ni si Maria dohot si Marta. Las do roha ni nasida tikki ro Jesus tu jabuna jala diparade si Marta do gok sipanganon. Hape molo si Maria dipillit ibana do asa manangihon Jesus jala hundul di labbung ni pat ni Tuan i. Dang sala na diulahon ni si Marta i, alai Jesus paboahon ‘dipillit si Maria do na dumenggan’. (Luk. 10:38-42) Olo do ra lupa si Maria tu sipanganon na diparade di tikki i, alai pasti diingot ibana do aha na diajarhon Jesus di tikki i. Jadi songon si Maria na mamillit mangalean tikkina rap dohot Jesus, hita pe songon i ma talean ma tikkitta tu Jahowa. w22.01 27 ¶5-6

Nang pe dipatutoru si Ahab dirina, alai dang botul-botul ibana bertobat. Misalna dang dihancurhon ibana akka patung Baal. Jala dang disuru ibana bangso Israel asa mulak muse manomba Jahowa. Dung mate si Ahab dipatudu Jahowa ma halak na songon dia ibana. Panurirang Jehu mandok, “halak na jahat” do ibana. (2 Kron. 19:1, 2) Memang menyesal do si Ahab di mulana. Alai seandaina botul-botul ibana bertobat, dang mungkin didok Jahowa ibana halak na jahat. Aha na boi taparsiajari sian pengalaman ni Raja Ahab? Dung dibege ibana hukuman ni Jahowa na dipaboa si Elia, dipatutoru si Ahab do dirina. Memang denggan do i. Alai sian tindakanna dang botul-botul ibana bertobat. Jadi sian on marsiajar ma hita, halak na bertobat i dang cukkup holan merasa menyesal. Alai porlu do dibuktihon ibana i sian tindakanna. w21.10 3 ¶4-5, 7-8

Melayani Jahowa do na uppetting di si Jesaya dohot istrina. Panurirang do si Jesaya jala istrina pe “panurirang borua” do. (Jes. 8:1-4) Fokus do nasida melayani Jahowa. Akka na menikah, boi do maniru teladan ni si Jesaya dohot istrina. Fokus ma hamu melayani Jahowa jala patogu ma haporseaonmuna. Misalna rap marsiajar ma hamu taringot surirang di Bibel jala songon dia akka surirang i boi saut. (Tit. 1:2) Dung i, dohot ma hamu menggenapi akka surirang na adong di Bibel. Contohna, surirang ni Jesus taringot mambaritahon barita na uli tu saluhut portibi on. Molo lam pos rohamuna tu akka surirang di Bibel, gabe taronjar ma rohamuna lao mangalehon gumodang gogo dohot tikki melayani Jahowa. w21.11 16 ¶9-10

Parduli do Jesus tu omakna naung mabalu. Ala holong rohana tu omakna si Maria, dipasahat ma ibana tu si Johannes. Pos do roha ni Jesus, na boi urupan ni si Johannes omakna i toktong setia tu Jahowa. Mulai sian i, gabe hira anak ni si Maria ma si Johannes jala diurus si Johannes ma si Maria songon omakna. Takkas ma, dipatudu Jesus do holong tu omakna i naung mangurus ibana sian mulai tubu jala na toktong mandongani ibana sahat tu na mate. Ala sakeluarga do hita dohot akka dongan sahaporseaon, gabe unjonok do tahilala hubungatta tu nasida sian tu keluargatta sandiri. Olo do ra ditentang hita bahkan dang dianggap be anggota keluarga. Alai marjanji do Jesus jalootta do “100 hali loppit unggodang” sian na tatinggalhon molo toktong hita setia tu Jahowa dohot tu organisasina. Godang do na boi gabe anakta, borutta, omakta, dohot bapakta. (Mrk. 10:29, 30) Pasti las do rohatta gabe bagian sian keluarga ni Jahowa na masihaholongan jala na rap makkaholongi Jahowa.​—Kol. 3:14; 1 Ptr. 2:17. w21.04 9-11 ¶7-8

Molo adong holong na manoktong di hita, pasti berupaya do hita sian nasa tolapta lao mangurupi na asing. Godang do akka donganta saonari na patuduhon i, nang pe dang ditanda nasida dope dongan na dibantu i. Misalna tikki masa bencana alam, pittor hatop do nasida mangurupi. Molo adong na susa di parhepengon, dipikkirhon nasida do aha na boi diulahon lao mangurupi donganta i. I do na diulahon halak Kristen di Makedonia di abad na parjolo. Dibahen halak i do pengorbanan, “gariada lobi” sian na tolap ni nasida. (2 Kor. 8:3) Diargai jala dipuji akka sintua ma akka dongan na mangurupi na asing asa torus nasida semangat mangulahon i.​—Jes. 32:1, 2. w21.11 11 ¶14; 12 ¶21

Hita sude porlu do dinasehati. Sipata olo do hita sandiri na mangido nasehat sian dongan na asing. Alai bisa jadi adong do akka dongan na pasingotton hita sebelum ‘taulahon na sala’. (Gal. 6:1) Boi do tong nasehat i berupa disiplin tikki taulahon dosa na balga. Jadi dang soal sipasingot aha na dilehon tu hita, ikkon tatangihon do i jala taulahon, ala boi do i paluahon ngolutta. (Poda 6:23) Ayat harian sadari on manjujui hita asa ‘manangihon hata ni halak na marbisuk’. Dang adong jolma na mamboto sasudena. Pasti sai adong do halak na ummalo manang na lebih berpengalaman sian hita. (Poda 12:15) Jadi molo tatangihon nasehat, i patuduhon na serep do rohatta jala na tasadari do hahurangatta. Hasilna, gabe boi ma tacapai tujuatta. Raja Salomo mandok, “Saut do [sakkap] molo godang na mamodai.”​—Poda 15:22. w22.02 8 ¶1-2

Halak na botul-botul bertobat dang cukkup holan merasa menyesal. Alai ikkon berupaya do ibana padenggatton cara marpikkirna dohot pangalahona. Ikkon ditinggalhon ibana do dosana i jala diulahon ibana lomo ni roha ni Jahowa. (Hes. 33:14-16) Na paling penting, ikkon berupaya do ibana padenggatton hubunganna tu Jahowa. Alai boha do molo taboto dongan akrabta mangulahon dosa serius? Unang ma tatutup-tutupi dosana i. Dang adong guna ni i, ala diida Jahowa do sudena i. (Poda 5:21, 22) Tapaingot ma donganta i asa melapor tu sintua. Molo dang olo ibana, hita ma na melapor. Molo taulahon i, berarti na mangurupi donganta i do hita disi. w21.10 7 ¶19-21

Hita sude porlu do maniru Jesus na rade mangurupi na asing. Bibel mandok olo do Jesus “gabe songon hatoban”. (Plp. 2:7) Sahalak hatoban pasti berupaya do pasonakkon roha ni tuanna. Dos songon i ma hita, hatoban ni Jahowa do hita jala pelayan ni akka donganta. Tottu lomo do rohatta boi dipakke Jahowa lao mangurupi akka dongan. Tapikkirhon ma sukkun-sukkun on: ‘Olo do au paradehon tikki dohot gogokku lao mangurupi na asing? Olo do au mangurupi paiasson gedung kebaktian manang Bale Harajaon?’ Molo tarasa hurang semangat dope hita mangurupi na asing, aha ma na boi taulahon? Martangiang ma tu Jahowa. Tapaboa ma songon dia perasaanta jala tapangido ma asa ‘dibahen Ibana hita rade jala margogo’ mangurupi na asing.​—Plp. 2:13. w22.02 22-23 ¶9-11

Lambok do Jesus jala bersikap masuk akkal. (Mat. 11:29, 30) Misalna hea do dipangido sahalak borua Penisia asa olo Jesus pamaluppon boruna. Mulana ditolak Jesus do pangidoan ni borua i. Alai ala diida Jesus massai togu haporseaonna, ujungna dipamalum Jesus ma boruna i. (Mat. 15:22-28) Alai nang pe burju Jesus, olo do ibana mangalehon nasehat. Sipata tegas do ibana pasingotton na asing jala i do bukti na holong rohana tu nasida. Misalna hea do dipissang Jesus si Petrus di jolo ni akka sisean na asing. (Mrk. 8:32, 33) Diulahon Jesus pe i dang naeng pailahon si Petrus, alai lao mangalatik ibana do jala pasingotton sisean na asing asa unang diabbati nasida Jesus mangulahon lomo ni roha ni Jahowa. Pasti maila do si Petrus di tikki i, alai dapotna do manfaat sian nasehat ni Jesus i. Ala holong rohatta tu donganta, sipata ikkon tanasehati do nasida. Tatiru ma Jesus, talehon ma nasehat sian Bibel jala lambok ma hita makkatai tu ibana. w22.03 11 ¶12-13

Tapuji ma Jahowa. (Ps. 34:1) Tapuji do Jahowa molo tapaboa akka sifat dohot akka ulaonna. Molo tarimangi akka na denggan naung dilehon Jahowa tu hita, gabe tergerak ma hita mamuji Ibana sian nasa rohatta. Sada cara lao mamuji Debata, i ma marbarita na uli. Di Bibel, didok do ulaon marbarita na uli “pelean” tu Debata. Songon tangiang na ikkon dipersiappon, hita pe sebelum lao marbarita na uli, ikkon jolo persiapan do. Pasti lomo do rohatta mangalean pelean na undenggan tu Debata. Jala molo persiapan hita, gabe lam semangat ma hita marbarita na uli. w22.03 21 ¶8