Oktober
Minggu, 1 Oktober
Marlas ni roha ma halak na so tartuktuk alani au.—Mat. 11:6.
Sude na diajarhon dohot na dihaporseai Saksi Jahowa sesuai do tu Hata ni Debata. Nang pe songon i, godang do na manolak hita. Alana menurut nasida, aha na taajarhon i dang sesuai tu na dihalomohon nasida. Didok Apostel Paulus do tu halak Kristen na di Rom, “Ikkon jolo dibege sasahalak do barita i asa boi ibana porsea. Jala begeonna ma i molo dung adong na mambaritahon taringot tu Kristus.” (Rom 10:17) Sian on taboto, asa boi togu haporseaotta ikkon taparsiajari do Bibel, dang na ikkon ro hita tu akka perayaan na tahalomohon jala na so sesuai tu isi ni Bibel. Jadi tapabagas ma parbinotoanta, asa togu haporseaonta. Alana “molo dang porsea sasahalak tu Debata, dang boi bahenonna las roha ni Debata”. (Heb. 11:1, 6) Asing ni i dang pola ikkon jolo taida mukjizat sian Debata asa pos rohatta tu Ibana. Molo botul-botul do taparsiajari Bibel, boi do togu haporseaotta. w21.05 4-5 ¶11-12
Senin, 2 Oktober
Gabe lam tarbarita do barita na uli alani na masa tu au.—Plp. 1:12.
Godang do hasusaan na diadopi si Paulus. Hea do ibana dipukkuli, dilempari batu, jala dipenjarahon. (2 Kor. 11:23-25) Dang holan i, hea do ibana marmetmet ni roha alani kelemahanna sandiri. (Rom 7:18, 19, 24) Adong do na songon ‘suga di bagasan dagingna’, jala mulak-ulak do dipangido ibana tu Debata asa dibolokkon i. (2 Kor. 12:7, 8) Alai, diurupi Jahowa do ibana asa boi torus marhobas nang pe godang tantanganna. Tikki gabe tahanan rumah si Paulus di Rom, barani do ibana marbarita na uli tu akka pamimpin ni halak Jahudi dohot tu akka pejabat na disi. (Ul. 28:17; Plp. 4:21, 22) Marbarita do ibana muse tu akka pengawal ni istana dohot tu akka halak na ro manjuppangi ibana. (Ul. 28:30, 31; Plp. 1:13) Dibahen ibana do muse akka surat lao patoguhon halak Kristen di tikki i jala marguna dope i sahat tu saonari. w21.05 20-21 ¶4-5
Selasa, 3 Oktober
“Unang ma ulahon lobi sian na tarsurat i.” Marhite i, dang marginjang ni roha be hamu.—1 Kor. 4:6.
Ala sombong Raja Usia, lomo ni rohana sandiri do na diulahon ibana jala dang olo dipasingot. Bawa na malo do si Usia. Jotjot do ibana monang tikki marporang, godang do kota na dibangun ibana, jala marhasil do ibana martani. Bibel mandok, “Sai dipasu-pasu Debata na sittong do ibana.” (2 Kron. 26:3-7, 10) Alai ‘dung lam marhuaso ibana, gabe ginjang ma rohana jala parohon jea do i’. Lao do ibana tu bagas joro jala ditutung dupa disi, hape diboto ibana do holan malim na boi manutung dupa. Gabe sogo ma roha ni Jahowa tu ibana jala dibahen ma ibana marsahit kusta. (2 Kron. 26:16-21) Songon si Usia, boi do gabe sombong hita molo holan diritta na tapikkiri. Taingot ma, molo tung pe malo hita manang adong tugas istimewa na tajalo, sian Jahowa do i. (1 Kor. 4:6, 7) Molo gabe sombong do hita alani i, dang pakkeon ni Jahowa be hita. w21.06 16 ¶7-8
Rabu, 4 Oktober
Unang ma las rohamuna ala tunduk tu hamu akka suru-suruan na jahat i. Alai, marlas ni roha ma hamu ala nungnga tarsurat goarmuna di banua ginjang.—Luk. 10:20.
Diboto Jesus do dang sude halak na dijuppangi akka siseanna tikki marbarita olo manangihon. Bahkan dang taboto sadia godang halak na olo manangihon i ujungna gabe sisean. Porlu do botoon ni akka sisean i, na mambahen Jahowa marlas ni roha, i ma kerja keras ni nasida dang hasilna. Molo diingot nasida i, marlas ni roha ma akka sisean i. Jadi hita pe torus ma tabahen na dumenggan lao marbarita na uli. Molo taulahon i, on patuduhon na olo do hita ditogu-togu tondi parbadia. Jala molo “dang marnaloja” hita marbarita na uli, lehonon ni Jahowa ma tu hita hangoluan na salelengna, dang soal adong halak na taurupi sappe tardidi manang na dang.—Gal. 6:7-9. w21.10 26 ¶8-9
Kamis, 5 Oktober
Gabe asi ma rohana . . . Dung i, godang ma diajarhon ibana tu nasida taringot tu Debata.—Mrk. 6:34.
Di sada tikki, hea do loja hian Jesus dung sae marbarita na uli. Jadi naeng istirahat ma ibana dohot akka siseanna. Hape ro ma massai godang halak mandapotton nasida. Gabe asi ma roha ni Jesus mangida akka halak na ro i, jala ‘godang do diajarhon Jesus tu nasida taringot tu Debata’. Diboto Jesus do susa ngolu ni nasida. Jadi porlu do dipaboa tu nasida janji ni Debata asa adong harapan ni nasida. Saonari pe godang do halak na idaon sonang ngoluna, hape sabotulna dang songon i. Dos do nasida songon biru-biru na so adong parmahanna. Jala didok si Paulus, dang ditanda nasida Debata jala dang adong harapan ni nasida. (Eps. 2:12) Molo taingot songon i do situasi ni akka halak di sakalilingta, gabe asi ma rohatta tu nasida jala tergerak ma hita mangurupi nasida. Cara na undenggan mangurupi, i ma manstudihon halak i. w21.07 5 ¶8
Jumat, 6 Oktober
Tapasiding ma ginjang ni roha, dang olo talu, dohot masilatean.—Gal. 5:26.
Halak na egois i sombong jala holan mamikkiri dirina sandiri. Molo halak na marlate ni roha, dang holan lomo rohana tu appuna ni donganna alai lomo rohana asa mago appuna ni donganna i. Jadi molo late roha ni sasahalak tu donganna, sabotulna na sogo do rohana tu donganna i. Sifat egois dohot late ni roha, dipatudos ma i songon hama na manegai suan-suanan. Molo adong sasahalak na manomba Jahowa alai egois ibana jala marlate ni roha, boi do gabe sega hubunganna tu Jahowa. (Poda 16:18) Ujungna dang disomba ibana be Jahowa, jala parohon na haccit do i tu dirina sandiri dohot tu na asing. Boi do tapasiding sifat egois molo taihutton sipasingot ni si Paulus tu halak Pilippi. Didok ibana, “Unang ma sai naeng marbada hamu manang holan mamikkiri diri sandiri. Alai toruk ma rohamuna, jala sangap ma bahen tu na asing.”—Plp. 2:3. w21.07 15 ¶6-8
Sabtu, 7 Oktober
Tikki dibaritahon hami barita na uli i tu hamu, dang holan hata-hata sabbing i, alai balga do pengaruh ni i tu hamu. Mardongan tondi parbadia do i dipasahat hami tu hamu dohot pos ni roha na togu.—1 Tes. 1:5.
Godang do halak mandok molo agama na sittong i ikkon boi mangalusi sude sukkun-sukkun, termasuk ma i sukkun-sukkun na so adong alusna di Bibel. Masuk akkal do i? Daong. Memang hea do didok si Paulus tu halak Kristen di abad na parjolo, “Uji hamu ma sasude, pastihon hamu ma dia na sittong.” (1 Tes. 5:21) Alai diakkui si Paulus do “dang sude dope” diboto ibana. Didok ibana, “Ai songon na markaca tu tombaga do hita saonari, dang takkas dope na taida i.” (1 Kor. 13:9, 12) Jadi dang sude diattusi si Paulus isi ni Surat na Badia, songon i nang hita saonari. Alai nungnga diattusi si Paulus hasittongan taringot Jahowa dohot akka janjina. I ma na mambahen pos rohana tu hasittongan. Asa lam pos rohatta naung sittong caratta manomba Debata, tabandingkon ma i tu cara ni Jesus manomba Debata. w21.10 18-19 ¶2-4
Minggu, 8 Oktober
Molo nungnga 50 taon umurna, dang dohot be ibana.—4 Mus. 8:25.
Hamu akka dongan na matua, boi do hamu mangurupi na asing dang soal hamu melayani sepenuh waktu manang na dang. Sesuaihon hamu ma cara mandalatton sada tugas tu situasimuna naung muba, bahen ma cita-cita na baru, jala fokus ma tu tugas na boi dope diulahon hamu. Boi do hamu marsiajar sian Raja Daud. Nang pe lomo rohana mambangun jabu ni Jahowa, alai didok Jahowa, anakna si Salomo do na lao mambangun i. Dijalo si Daud do keputusan ni Jahowa i, jala didukung do proyek pembangunan i. (1 Kron. 17:4; 22:5) Dang hea marpikkir si Daud, ibana do na paling cocok mambangun bagas joro i. Alana “poso dope [si Salomo], jala dang diboto dope manang aha”. (1 Kron. 29:1) Disadari si Daud do alani pasu-pasu ni Jahowa do boi marhasil pembangunan i, dang ala naung berpengalaman sasahalak. Songon si Daud, saonari pe boi do akka donganta na matua toktong melayani Jahowa nang pe muba tugasna. Jala pos do roha ni nasida pasu-pasuon ni Jahowa do akka dongan na poso na manggattihon nasida. w21.09 9 ¶4; 10 ¶5, 8
Senin, 9 Oktober
Ditogu-togu Ibana do halak na lambok roha lao mangulahon na sittong, jala diajarhon Ibana do taringot akka dalanna tu halak na lambok roha.—Ps. 25:9.
Molo tabahen cita-cita manang tujuan rohani, gabe bermakna ma ngolutta. Alai tapastihon sanggup hita mencapai cita-cita i. Unang ma sai naeng sarupa hita dohot na asing, asa unang gabe kecewa hita jala marmetmet ni roha. (Luk. 14:28) Marasing-asing do kemampuan ni sude naposo ni Jahowa, jala arga do nasida sude di Ibana. Ditarik Jahowa pe hita tu Ibana, dang ala na undenggan hita sian halak na asing. Alai ala diida Jahowa do serep rohatta, olo diajari, jala olo muba. Pos ma rohatta, diargai Jahowa do sude upayatta lao manomba Ibana. Molo toktong hita sabar jala setia, didok ma hita “halak na burju jala na tulus rohana”. (Luk. 8:15) Alani i, torus ma talean na dumenggan tu Jahowa asa marlas ni roha hita ‘alani ulaonta be’.—Gal. 6:4. w21.07 24 ¶15; 25 ¶20
Selasa, 10 Oktober
Manang ise na mamboan mulak sahalak pardosa sian dalanna na lilu i, na paluahon pardosa i do ibana.—Jak. 5:20.
Ikkon sabar do hita molo tahilala adong ketidakadilan di huria. Contohna, molo adong na mangulahon dosa serius di huria, martangiang do akka sintua mangido “bisuk” sian Jahowa, asa diurupi nasida manangani kasus i. (Jak. 3:17) Alana tujuan ni nasida “mamboan mulak sahalak pardosa sian dalanna na lilu i”. (Jak. 5:19, 20) Ikkon berupaya do akka sintua manjaga huria sian pengaruh ni halak na mangulahon dosa serius i, jala patoguhon dongan di huria na susa alani pambahenan ni pardosa i. (2 Kor. 1:3, 4) Parjolo-jolo dipastihon akka sintua ma aha na sebenarna terjadi. Porlu do godang tikki lao mangulahon i. Ikkon martangiang do nasida, mangalului prinsip ni Bibel na cocok tu kasus i, jala mandisiplin pardosa i “marhite cara na sittong”. (Jer. 30:11) Ikkon hatop do ditangani akka sintua masalah i, alai unang ma buru-buru nasida mambahen keputusan. Molo diihutton akka sintua do petunjuk sian Jahowa, pasti bermanfaat do i tu akka dongan di huria. w21.08 11 ¶12-13
Rabu, 11 Oktober
Manang tudia pe ho lao, tusi do au . . . Bangsom nama bangsokku, jala Debatam nama Debatakku.—Rut 1:16.
Sada tikki masa ma kelaparan di Israel. Gabe pinda ma si Naomi, suamina, dohot dua anakna tu Moab. Disi, mate ma suami ni si Naomi. Mangoli ma anakna na dua i, alai dang leleng dukkon i mate ma nasida. (Rut 1:3-5) Pasti lungun hian do roha ni si Naomi alani i, gabe dirippu ibana ma na so lomo roha ni Jahowa tu ibana. Didok ibana do, ‘Nungnga dihukum Jahowa be au.’ “Susa hian do ngolukku dibahen Debata.” Dung i didok ibana do muse, “Sogo do roha ni Jahowa tu au jala susa do ngolukku dibahen Debata.” (Rut 1:13, 20, 21) Diboto Jahowa do, “boi do gabe maoto halak na marbisuk molo susa ibana”. (Pjm. 7:7) Dipakke Jahowa ma si Rut patuduhon holong na manoktong tu si Naomi. Diurupi si Rut ma simatuana i asa boi muse semangat melayani Jahowa. w21.11 9 ¶9; 10 ¶10, 13
Kamis, 12 Oktober
Toktong ma i dipangido tu Debata.—Jak. 1:5.
Molo nga fokus hita mandalatton tugasta saonari, na so porlu be tabahen cita-cita na asing? Dang i maksudna. Boi dope tabahen cita-cita asa lam terampil marbarita, mangajari, manang asa lam ringgas hita mangurupi akka dongan. Boi do tercapai cita-cita i molo olo hita mamikkiri kebutuhan ni dongan na asing. (Poda 11:2; Ul. 20:35) Adong dope cita-cita na asing boi taupayahon? Martangiang ma hita mangido bisuk sian Jahowa lao manottuhon cita-cita na sesuai tu keadaanta. (Poda 16:3) Boi do ra hita gabe perintis ekstra, perintis biasa, karejo di Betel, manang dohot tu tim konstruksi. Boi do hita muse marsiajar bahasa na baru manang pinda tu inganan na asing lao marbarita na uli. w21.08 23 ¶14-15
Jumat, 13 Oktober
Toktong do dipatudu [Jahowa] holong na manoktong sahat tu saleleng ni lelengna.—Ps. 136:1, surat na di toru.
Massai lomo do roha ni Jahowa patuduhon holong na manoktong. (Hos. 6:6) Jala dipangido Jahowa do hita ‘makkaholongi holong na manoktong’ i. (Mik. 6:8, surat na di toru) Asa boi tapatudu holong na manoktong, ikkon parjolo do taboto aha artina. Adong lobi 200 hali hata “holong na manoktong” disurat di Bibel Terjemahan Tano na Imbaru di bahasa Batak Toba. Piga-piga terjemahan ni Bibel, menerjemahon holong na manoktong gabe “asi ni roha”, “burju ni roha”, dohot “holong ni roha”. Kamus ni Bibel paboahon, “Holong na manoktong i, jotjot dipatudu Debata tu jolma jala boi do dipatudu jolma tu donganna jolma.” Jahowa do teladan na sempurna patuduhon holong na manoktong. Didok si Daud: “Ale Jahowa, sahat tu langit do holong ni roha na pinatudum . . . Massai arga do holong ni roha na pinatudum.” (Ps. 36:5, 7) Songon si Daud, pasti taargai do holong ni Jahowa na manoktong i. w21.11 2 ¶1-2; 3 ¶4
Sabtu, 14 Oktober
Songon on ma hamu martangiang: “Ale Amanami na di banua ginjang.”—Mat. 6:9.
Godang do anggota keluarga ni Jahowa. Di surgo adong do Jesus “na parjolo ditoppa sian saluhutna” dohot marjuta suru-suruan. (Kol. 1:15; Ps. 103:20) Tikki di portibi on dope Jesus, hea do didok ibana tu akka siseanna, ‘Na lao ma au tu Damang i dohot tu Amamuna.’ (Joh. 20:17) Sian on taboto, Bapakta do Jahowa i. Jadi molo talehon diritta tu Jahowa jala tardidi, gabe anggota keluarga ni Jahowa ma hita. (Mrk. 10:29, 30) Bapak na parholong do Jahowa i. Boi do hita makkatai tu Ibana manang sadihari pe. Jala dang hea Jahowa mamaksa hita mangoloi Ibana. Diajari Jesus do akka siseanna asa manjou Jahowa “Amanami” tikki martangiang. Sasittongna boi do Jesus manjou Jahowa “Pargogo na So Hatudosan”, “Sitoppa saluhut”, manang “Raja na manoktong”. (1 Mus. 49:25; Jes. 40:28; 1 Tim. 1:17) Alai dang akka gelar i na dipakke Jesus. Sebalikna diajari Jesus do hita manjou Jahowa ‘Ama’. w21.09 20 ¶1, 3
Minggu, 15 Oktober
Gabe diboto si Manasse ma Jahowa do Debata na sittong.—2 Kron. 33:13.
Di mulana, dang olo Raja Manasse manangihon sipasingot ni akka panurirang. Ujungna, “dipasombu Jahowa ma pamimpin ni akka tentara ni raja ni Asiria manaluhon nasida. Ditakkup ma si Manasse mamakke hait-hait, diikkat ma tanganna mamakke dua ratte na sian tombaga, jala diboan ma ibana tu Babel”. Saleleng na dipenjarahon i, mulai ma dipikkiri si Manasse sude hajahatonna. Gabe “dipatutoru ibana ma dirina di jolo ni Debata ni akka ompuna”. Dung i “mangelek-elek ma ibana tu Jahowa Debatana” jala “sai martangiang do si Manasse” mangido asi ni roha ni Debata. (2 Kron. 33:10-12) Dialusi Jahowa do tangiang ni si Manasse. Boi do diida Jahowa, na botul-botul ibana nungnga muba. Alani i, disesa Jahowa ma dosa ni si Manasse jala diloas ma ibana muse gabe raja. w21.10 4 ¶10-11
Senin, 16 Oktober
Dumenggan do dua halak sian na sahalak. Ai boi ma nasida rap karejo, jala dumenggan ma hasilna.—Pjm. 4:9.
Ikkon ditinggalhon si Priskila dohot si Akuila do kota Rom, hape nga leleng nasida tinggal disi. Dung sahat di Korint, ikkon dilului nasida do karejo dohot jabu na baru. Boi ma tabayakkon dang mura situasi on di nasida. Alai toktong do nasida semangat mangurupi huria na disi. Kerja sama do nasida dohot si Paulus lao patoguhon akka dongan. Di pudian ni ari, pinda do nasida tu kota na asing lao marbarita na uli. (Ul. 18:18-21; Rom 16:3-5) Nang pe sibuk, alai marlas ni roha do nasida. Hamu akka naung menikah, tiru ma si Priskila dohot si Akuila. Bahen hamu ma melayani Jahowa na uppetting di ngolumuna. Alai molo berpacaran dope hamu, tetappon hamu ma cita-citamuna sian saonari. Molo kerja sama jala berupaya hamu mandapot cita-cita i, boi ma dihilala hamu na diurupi Jahowa do hamu.—Pjm. 4:12. w21.11 17 ¶11-12
Selasa, 17 Oktober
Ikkon pasangaponmuna do bapakmuna dohot omakmuna . . . Au do Jahowa Debatamuna.—3 Mus. 19:3.
Massai penting do mandalatton paretta ni Jahowa lao pasangappon natua-tua. Sebelum didok Jahowa paretta lao pasangappon natua-tua, jolo didok Ibana do, “Ikkon badia do hamu, ai badia do Au. Au do Jahowa Debatamuna.” (3 Mus. 19:2) Jadi massai penting do pasangappon natua-tuatta. Alai songon dia do molo tahilala hurang na taulahon lao pasangappon natua-tuatta? Tapadenggan ma i. Boi do talean unggodang tikkitta mangurupi nasida, paradehon kebutuhan ni nasida, mangurupi nasida asa toktong marlas ni roha, jala patoguhon hubungan ni nasida tu Jahowa. Molo berupaya hita mambahen songon i, berarti nga tadalatton be paretta ni Jahowa na tarsurat di 3 Musa 19:3. w21.12 4-5 ¶10-12
Rabu, 18 Oktober
Unang be uhumi hamu halak na asing.—Mat. 7:1.
Hea do Raja Daud mangulahon dosa na balga. Mangalakkup do ibana dohot si Bat-seba jala dipamate ibana do si Uria. (2 Sam. 11:2-4, 14, 15, 24) Akibatna gabe susa ma ibana dohot keluargana. (2 Sam. 12:10, 11) Asing ni i, hea do disuru si Daud asa dietong sadia godang tentarana, na patuduhon dang diandalhon ibana Jahowa. Aha ma akibatna? Gabe mate ma 70.000 halak Israel alani sahit. (2 Sam. 24:1-4, 10-15) Nang pe songon i, asi do roha ni Jahowa tu si Daud jala diampuni do dosa ni si Daud na balga i. Alana diingot Jahowa do akka na denggan sian si Daud. Holong do roha ni si Daud tu Jahowa, setia do ibana, lomo rohana mangulahon na sittong, jala olo muba sian ias ni rohana. Pasti mandok mauliate do hita tu Jahowa, ala akka na denggan do na diida Ibana sian hita.—1 Raj. 9:4; 1 Kron. 29:10, 17. w21.12 19 ¶11-13
Kamis, 19 Oktober
Pittor boi ma ibana marnida jala mardalan ma ibana mangihutton Jesus. Dipuji ibana ma Debata.—Luk. 18:43.
Dipatudu Jesus do asi ni rohana tu akka halak na cacat. Olo do ibana pamaluppon nasida. Hea do didok ibana tu si Johannes Pandidi, “Na mapitung boi marnida, na pakpang boi mardalan, na marsahit kusta dipamalum, na nengel marbinege, na mate dipangolu.” Alani mukjizat na dibahen Jesus i, godang ma halak na “mamuji Debata”. (Luk. 7:20-22) Pasti lomo do rohatta maniru Jesus na patuduhon asi ni roha tu halak na cacat. Burju jala sabar ma hita tu nasida. Nang pe dang boi tabahen mukjizat, alai adong do na boi taulahon lao mangurupi nasida. Marbarita na uli ma hita tu nasida. Tapaboa ma tu nasida janji taringot Paradeiso, dang adong be disi na marsahit jala sude halak boi do marale-ale tu Jahowa. (Luk. 4:18) Molo taulahon i, gabe dohot ma nasida mamuji Debata. w21.12 9 ¶5
Jumat, 20 Oktober
Nungnga dibege hamu, martahan do si Job manaon hasusaan jala nungnga diboto hamu songon dia Jahowa mamasu-masu ibana.—Jak. 5:11.
Tikki mangajari, Hata ni Debata do na dipakke si Jakobus. Dipakke do contoh ni si Job lao patuduhon songon dia Jahowa mamasu-masu akka naposona na setia. Dang dipakke si Jakobus hata na maol jala sederhana do carana patorakkon. Alani i gabe Jahowa ma na dipuji halak, dang si Jakobus. Parsiajaranna: Hata ni Debata ma na tapakke tikki mangajari jala sederhana ma caratta patorakkon. Taingot ma, tujuanta asa ditanda halak do Jahowa jala boi dirasahon nasida na parduli Ibana tu nasida. (Rom 11:33) Molo adong masalah ni parsiajar Bibelta, unang ma pittor tadok, ‘Molo au di posisim, songon on do hubahen.’ Alai marhite akka contoh na di Bibel, taurupi ma ibana mamboto cara marpikkir ni Jahowa. Molo taulahon i, gabe tarlatik ma ibana mangulahon lomo ni roha ni Jahowa. w22.01 11 ¶9-10
Sabtu, 21 Oktober
Ikkon haholonganmuna do donganmuna jolma doshon dirimuna.—3 Mus. 19:18.
Dang lomo roha ni Jahowa molo susa tabahen na asing. Alai dang sae holan i, ikkon tahaholongi do Jahowa asa boi tabahen las rohana. Dipatudu Jesus do na massai penting mangihutton paretta na tarsurat di 3 Musa 19:18. Hea do adong halak Parise manukkun tu Jesus, “Dia do paretta na umbalga sian akka Patik i?” Jesus mandok “paretta na umbalga jala na parjolo” i ma, makkaholongi Jahowa sian nasa roha, sian nasa ngolu, dohot sian nasa pikkiran. Dung i dikutip Jesus ma isi ni 3 Musa 19:18. Didok ibana, “Paretta na paduahon na dos tusi, i ma, ‘Ikkon haholonganmu do donganmu jolma doshon dirim.’” (Mat. 22:35-40) Godang do cara patuduhon holong tu na asing. Sada cara, i ma mandalatton paretta na tarsurat di 3 Musa 19:18 na mandok, “Unang balos pambahenan ni halak na jahat tu hamu, jala unang dendam hamu tu ibana.” w21.12 10-11 ¶11-13
Minggu, 22 Oktober
Dung diida ibana ro galumbang na balga, mabiar ma ibana. Tikki naeng lonong ibana, marsurak ma ibana. Didok ma, “Tuan, tolong jo au!”—Mat. 14:30.
Mulana tikki mardalan si Petrus di ginjang ni aek dang mabiar ibana tu galumbang na balga. Jadi boi ma ibana torus mardalan mandapotton Jesus. Alai tikki mulai diparrohahon ibana galumbang na balga i, gabe dang fokus be ibana tu Jesus. Dung i gabe mabiar ma ibana jala naeng lonong. (Mat. 14:24-31) Aha parsiajaranna tu hita? Olo do ra adong masalahta na manguji haporseaotta, na dos songon galumbang na balga. Molo dang pos be rohatta tu Jahowa dohot tu janjina, boi ma gabe sega haporseaotta jala holan masalahta i ma na tapikkirhon. Jadi torus ma hita marpos ni roha tu Jahowa jala taingot ma boi do Ibana mangurupi hita. w21.12 17-18 ¶6-7
Senin, 23 Oktober
Anggo au, na lao ro do au tu jabum, ai balga do holong ni roha na pinatudum.—Ps. 5:7.
Bagian sian ibadatta tu Jahowa do martangiang, marsiajar, dohot mangarimangi. Tikki martangiang hita, i ma tikkitta makkatai tu Bapakta Parholong i. Tikki marsiajar Bibel, i ma tikkina hita mandapot “parbinotoan taringot Debata” Silehon bisuk. (Poda 2:1-5) Tikki mangarimangi, tapikkirhon ma akka sifat ni Jahowa, dohot akka janjina na lao pasautonna di ari na naeng ro. Songon dia do hita boi mangulahon on nang pe terbatas tikkitta? Boi do hita marsiajar sian Jesus. Sebelum dimulai ibana pelayananna di tano on, lao do Jesus tu inganan na tenang di padang gurun. Disi ma ibana saleleng 40 ari. (Luk. 4:1, 2) Di inganan i, boi ma Jesus martangiang tu Jahowa jala mangarimangi aha na dipangido Bapakna lao ulahononna. On mangurupi Jesus asa siap menghadapi tantangan na lao ro. w22.01 27-28 ¶7-8
Selasa, 24 Oktober
Saut do [sakkap] molo godang na mamodai.—Poda 15:22.
Sipasingot boi do ro sian akka sintua manang sian akka dongan na gabe teladan. Molo adong dongan na mangalehon nasehat tu hita, ikkon taargai do i jala berupaya mangulahon nasehatna i. Tikki dinasehati, olo do gabe tersinggung hita. Nang pe taakkui hita jolma na mardosa jala sipata mambahen kesalahan, alai molo adong na paboahon kesalahanta jala dinasehati hita, dang sai mura manjalo i. (Pjm. 7:9) Olo do gabe membenarkan diri hita manang gabe ragu tu motif ni halak na mangalehon nasehat i, jala tersinggung tu carana pasahatton. Bahkan olo do ra gabe talului hasalaanna jala tadok di rohatta, ‘Ise haroa ibana? Ibana pe godang do hahuranganna!’ Ujungna gabe taabaihon nasehatna i jala tapangido nasehat sian halak na asing na sesuai tu lomo ni rohatta. w22.02 8-9 ¶2-4
Rabu, 25 Oktober
Molo torus do hamu porsea jala dang busisaon, lam margogo ma hamu.—Jes. 30:15.
Bisa jadi dung sahat hita di tano na imbaru, adong dope na boi manguji haporseaotta tu Jahowa. Misalna taingot ma contoh ni halak Israel najolo dung kaluar nasida sian Mesir. Sebenarna nungnga dilehon Jahowa manna lao allangon ni nasida. Alai magigi do nasida mangallang manna i, jala masihol do nasida tu sipanganon na diallang nasida tikki di Mesir. (4 Mus. 11:4-6; 21:5) Songon halak Israel i do annon sikapta dung sae Armagedon? Godang do annon karejotta lao padenggatton portibi on jala mambahen tano on gabe Paradeiso. Mulana pasti dang mura mangulahon i. Marungut-ungut do hita tu persediaan na dilehon Jahowa di tikki i? Taingot ma on: Molo taargai persediaan na dilehon Jahowa tu hita saonari, pasti gabe taargai do muse persediaan na dilehon Jahowa haduan. w22.02 7 ¶18-19
Kamis, 26 Oktober
Gomos ma ditiop nasida jubah ni sahalak Jahudi. Dokkonon ni nasida ma, “Dohot ma hami lao rap dohot ho.”—Sak. 8:23.
Hata “sahalak Jahudi” dohot “bangsom” na didok di ayat on, manggombarhon akka halak na dipillit lao mangolu tu surgo na adong dope di tano on. (Rom 2:28, 29) Jala “sappulu bawa na sian sude bahasa ni akka bangso” i manggombarhon biru-biru na asing. Didok do nasida ‘gomos maniop jubah ni halak Jahudi’ lao patuduhon na toktong do nasida setia mendukung halak na harapanna tu surgo. Jala marsada do nasida lao manomba Debata. Asa boi saut surirang di Hesekiel 37:15-19, 24, 25, ikkon bahenon ni Jahowa do marsada akka halak na harapanna mangolu tu surgo dohot biru-biru na asing. Di surirang i dipaboa do taringot dua tukkot. Tukkot na parjolo, i ma tukkot ni “si Juda” na manggombarhon akka halak na harapanna mangolu tu surgo. Cocok do gombaran i, alana sian marga Juda do dipillit akka raja ni Israel. Tukkot na paduahon, i ma tukkot ni “si Epraim” na manggombarhon akka halak na harapanna mangolu salelengna di tano on. Dibahen Jahowa do marsada dua tukkot i. Lapatanna, dibahen Jahowa do marsada biru-biru na asing dohot akka halak na harapanna mangolu tu surgo. Jala sada do raja ni nasida, i ma Jesus Kristus.—Joh. 10:16. w22.01 22 ¶9-10
Jumat, 27 Oktober
Molo diulahon hamu na sittong, unang ma diulahon hamu i holan asa diida halak. Alani i manat ma hamu.—Mat. 6:1.
Jesus paboahon adong do halak na mangurupi na pogos holan asa dipuji na asing nasida. Nang pe denggan na diulahon nasida i, alai dang marlapatan i di jolo ni Jahowa. (Mat. 6:1-4) Halak na marpangalaho na denggan, olo do bertindak lao mangulahon na denggan sian ias ni rohana. Jadi tasukkun ma diritta, ‘Molo huboto i denggan, huulahon do i? Aha do alasanku mangulahon i?’ Tondi parbadia i gogo ni Jahowa do jala boi do i mangurupi hita asa bertindak. (1 Mus. 1:2) Alani i sude sifat na gabe parbue ni tondi parbadia, ikkon menggerakkon hita lao bertindak. Contohna didok si Jakobus, “Mate do haporseaon molo so adong parniulaon.” (Jak. 2:26) Songon haporseaon i, akka sifat na asing pe ikkon tarida do sian parniulaonta. Molo taulahon i, on patuduhon na adong do tondi parbadia di hita. w22.03 11-12 ¶14-16
Sabtu, 28 Oktober
Alai songon Debata Nabadia na manjou hamu, badia ma hamu di sude parniulaonmuna.—1 Ptr. 1:15.
Ikkon berupaya do hita patoguhon hubungatta tu Jahowa, jala mangulahon akka na denggan tu na asing. Alai adong dope ulaon na asing na ikkon taulahon. Apostel Petrus mandok, “Parade hamu ma rohamuna asa marsitutu mangulahon akka ulaon.” (1 Ptr. 1:13) Ulaon na didok si Petrus i ma ‘paboahon taringot hamuliaon ni Debata’. (1 Ptr. 2:9) Memang tu halak Kristen na harapanna mangolu tu surgo do didok ibana hata on. Alai sabotulna sude do halak Kristen ikkon mangulahon i. On do ulaon na paling penting na boi taulahon. Kesempatan na istimewa do boi gabe bagian sian bangso ni Debata na badia jala paboahon barita na uli tu akka halak. (Mrk. 13:10) Molo berupaya hita mangulahon i, berarti na holong do rohatta tu Debata dohot tu halak na asing. Jala on pe patuduhon na lomo do rohatta asa “badia” di sude parniulaotta. w21.12 13 ¶18
Minggu, 29 Oktober
Molo disalpuhon hamu do dosa ni sasahalak, salpuhonokku do dosana i.—2 Kor. 2:10.
Positif do Apostel Paulus tu akka dongan sahaporseaonna. Diingot si Paulus do molo adong sasahalak na mangulahon kesalahan, dang na berarti halak na jahat ibana. Holong hian do roha ni si Paulus tu akka dongan sahaporseaonna. Molo adong akka dongan diida ibana na maol mangulahon na sittong, positif do ibana. Diingot ibana do nasida porlu diurupi, ala sabotulna lomo do roha ni nasida mangulahon na sittong. Parrohahon ma contoh on. Hea do si Paulus mangurupi dua dongan borua di huria Pilippi asa mardame, i ma si Euodia dohot si Sintike. (Plp. 4:1-3) Marbada do nasida na dua sappe dang marsiattoan. Alai si Paulus dang gabe kritis manang menghakimi nasida. Fokus do ibana tu akka sifat ni nasida na denggan. Diingot ibana do molo akka borua i nungnga setia melayani Jahowa saleleng martaon-taon. Diingot ibana do muse na holong roha ni Jahowa tu nasida. Hasilna, boi ma diurupi si Paulus akka borua i mardame. Toktong ma ibana marlas ni roha jala denggan ma hubunganna tu akka dongan di huria. w22.03 30 ¶16-18
Senin, 30 Oktober
Jonok do Jahowa tu halak na mandele. Dipalua Ibana do akka halak na marmetmet ni roha.—Ps. 34:18.
Hadameon na sian Jahowa i boi mambahen tenang pakkilalaatta jala boi mangurupi hita marpikkir lao mambahen keputusan na denggan. Songon i do na dialami donganta si Lusi. Didok ibana, “Berjuang do au mangatasi rasa kesepian. Alana sipata olo do au merasa dang dihaholongi Jahowa be au. Molo ro pikkiran sisongon i, pittor martangiang do au asa boi hukendalihon perasaanki.” Sian on taboto ma massai penting do tangiang, alana boi do i mambahen dame pakkilalaatta. (Plp. 4:6, 7) Molo mate halak na tahaholongi, pos do rohatta sai dipatogu Jahowa dohot Jesus do hita. Jadi tapatogu ma tong na asing, berupaya ma hita marbarita na uli tu sude halak. Diattusi Jahowa dohot Jesus do pakkilalaatta, jala olo do nasida mangurupi hita asa toktong setia. Tarpaima do hita saut janji ni Jahowa lao ‘mangapus ilu-ilu sian matatta’.—Pgk. 21:4. w22.01 15 ¶7; 19 ¶19-20
Selasa, 31 Oktober
Masuk ma hamu sian gerbang na soppit. Ai tu hamagoan do gerbang na balga dohot dalan na bidang i. Jala godang do halak na masuk sian i.—Mat. 7:13.
Didok Jesus adong dua gerbang na berbeda na menuju dua dalan na berbeda, i ma dalan na “bidang” dohot dalan na “maol” didalani. (Mat. 7:14) Dang adong dalan na patoluhon. Jadi ikkon tapillit do dalan na dia na ikkon tadalani. On ma keputusan na paling penting na ikkon tabahen di ngolutta. Alana holan sada do dalan na marujung tu hangoluan na saleleng ni lelengna. Godang do halak na mamillit dalan na “bidang” ala mura mandalani i. Dang diboto nasida Sibolis do na mamboan akka halak tu dalan i, jala tu hamatean do ujungna. (1 Kor. 6:9, 10; 1 Joh. 5:19) Lungun do rohatta ala godang halak na mamillit tetap di dalan i, jala mangihutton akka halak na mardalan disi. Alai anggo dalan na soppit na “maol” didalani, holan saotik do halak na mardalan disi. Boasa? Ala songon na didok Jesus, godang do akka panurirang palsu na mangajarhon na so sittong.—Mat. 7:15. w21.12 22-23 ¶3-5