April

Sukkun ma diritta, ‘Boha do reaksikku tikki dipasingot? Huakkui do kesalahanku, manang membenarkan diri do au? Na asing do husalahon?’ Tikki manjaha akka halak na setia na disurat di Bibel, pikkiri ma songon dia do sikap ni nasida tikki mangadopi tantangan. Dung i sukkun ma dirimuna, ‘Aha do na boi huulahon asa boi hutiru naposo ni Jahowa na setia on?’ Sude do hita saonari boi marsiajar sian akka donganta na di huria, na matua nang akka na poso. Taparrohahon ma ise dongan di huria na toktong setia nang pe adong tantanganna na borat. Misalna akka dongan na marsahit, na mandapot tantangan sian donganna sasikkola manang sian keluargana. Parrohahon ma muse songon dia dibahen nasida mangadopi tantangan i. Dung i pikkiri ma akka sifat ni nasida na denggan na boi ditiru hamu. Molo marsiajar hita sian nasida, gabe boi ma tong hita martahan mangadopi akka tantanganta. Pasti mandok mauliate do hita ala godang do akka dongan na boi gabe sitiruon.—Heb. 13:7. w22.04 13 ¶13-14

Molo adong masalahta, sai rade do akka sintua mangalehon tikkina lao manangihon jala patoguhon hita. Asing ni i molo porlu hita diurupi manstudihon parsiajar Bibelta, adong do akka donganta perintis na olo mandongani hita jala mangalehon saran na tahaporluhon. Marlas ni roha do nasida mangurupi hita. Hita pe boi do marlas ni roha songon nasida, molo olo hita mangurupi na asing. Attong molo lomo do rohamuna maniru nasida, aha ma na porlu diulahon hamu? Ikkon jelas do ditetappon hamu cita-citamuna. Misalna olo do didok rohamuna, ‘Lomo do rohakku mandapot tugas tambahan di huria.’ Alai, molo dang jelas ditottuhon hamu tujuanmuna, gabe maol ma diulahon hamuna i. Jala, dang diboto hamu andigan boi tujuanmuna i tercapai. Jadi bahen ma cita-cita na jelas. Molo boi surat ma i jala songon dia carana mencapai i. w22.04 25 ¶12-13

Saonari dipapungu Jahowa do akka halak gabe sada “punguan bolon” jala dilatik Ibana do nasida gabe rakyat ni Harajaonna. (Pgk. 7:​9, 10) Godang halak saonari na tarbagi alani porang dohot prasangka, alai berupaya do punguan bolon marsada nang pe marasing-asing suku, ras, dohot bangso ni nasida. Dipatudu nasida do marhite parniulaonna, na dibahen nasida podang gabe mata bajak. (Mik. 4:3) Dang olo nasida marporang, gariada diurupi nasida do akka halak marsiajar taringot Jahowa dohot lomo ni rohana asa boi mandapot “hangoluan na saleleng ni lelengna”. (1 Tim. 6:19) Adong do na ditentang keluarga jala na susa parhepengonna ala mendukung Harajaon ni Debata. Alai pos do roha ni nasida lehonon ni Jahowa do akka na dihaporluhon nasida. (Mat. 6:​25, 30-33; Luk. 18:​29, 30) On paposson rohatta tutu do adong Harajaon ni Debata jala pasauton ni Harajaon i do lomo ni roha ni Jahowa. w22.12 5 ¶13

Di ujung ni 1.000 taon i, sempurna ma sude halak di tano on. Dang dihilala nasida be pengaruh ni dosa ni si Adam. Lao disalpuhon ma hamatean saleleng ni lelengna. (Rom 5:12) Jadi, boi didok lao ‘dipahehe’ ma sude jolma na di tano on, nungnga sempurna be nasida di ujung ni 1.000 taon i. (Pgk. 20:5) Taboto do, toktong do Jesus setia tu Jahowa nang pe digoda Sibolis ibana. Attong haduan molo dung sempurna sude jolma, boi do nasida toktong setia tu Jahowa tikki digoda Sibolis nasida sahali nai? Dibuktihon nasida ma i tikki dipalua Sibolis sian lombang na massai bagas di ujung ni 1.000 taon i. (Pgk. 20:7) Sude halak na toktong setia, mangolu ma saleleng ni lelengna jala boi ma dihilala nasida haluaon na sasittongna. (Rom 8:21) Alai akka halak na mangalo Jahowa lao dipamate ma saleleng ni lelengna.—Pgk. 20:​8-10. w22.05 19 ¶18-19

Digenapi do surirang on tikki dipakke Sibolis halak Jahudi dohot halak Rom mambunu Jesus. (Luk. 23:​13, 20-24) Molo lukka tumitta, boi do i malum. Jala biasana holan satokkin do hita dang boi mardalan. Songon i ma tong na masa tu Jesus. Tikki na mate i ibana, dang boi diulahon Jesus manang aha, alai holan satokkin do i. (Mat. 16:21) Asa boi saut surirang na di 1 Musa 3:​15, ikkon dipahehe do Jesus. Boasa? Alana didok di surirang i, ikkon diropukkon pinoppar ni borua i do ulu ni ulok i. Songon dia ma i masa? Dung tolu ari Jesus mate, dipahehe do ibana lao mangolu saleleng ni lelengna di surgo. Dung dapot tikki naung ditottuhon Debata, lao dihancurhon Jesus ma Sibolis saleleng ni lelengna. (Heb. 2:14) Dung i, rap ma Jesus dohot si 144.000 i manghancurhon pinoppar ni ulok i, i ma sude musu ni Debata.—Pgk. 17:14; 20:​4, 10. w22.07 16 ¶11-12

Hamu akka natua-tua, urupi ma gellengmuna mamillit dongan na denggan. Ditanda hamu do akka dongan ni gellengmuna? Aha ma na boi diulahon hamu asa mardongan gellengmuna tu halak na makkaholongi Jahowa? (1 Kor. 15:33) Boi do diajak hamu akka dongan na togu haporseaonna asa bergaul dohot keluargamuna. (Ps. 119:63) Sahalak bapak na margoar si Tony mandok, “Saleleng martaon-taon, jotjot do huundang hami akka dongan na poso manang na matua tu jabunami. Rap mangan do hami jala dohot do nasida tu ibadat keluarganami. Songon i ma caranami asa boi mananda akka dongan na makkaholongi Jahowa. . . . Balga do pengaruh ni pengalaman, semangat, dohot sikap rela berkorban ni nasida tu gellengnami. Jala on mangurupi nasida asa jonok tu Jahowa.” w22.05 29-30 ¶14-15

Tikki adong kasus dosa na balga na ditangani akka sintua, tujuan ni nasida, i ma mambahen keputusan na sarupa tu keputusan naung dibahen Jahowa di surgo. Aha do manfaat ni i? Boi ma i melindungi huria. Molo toktong adong sahalak pardosa na so bertobat di huria, gabe pengaruh na so denggan do i tu akka naposo ni Jahowa na asing. (1 Kor. 5:​6, 7, 11-13; Tit. 3:​10, 11) Keputusan i pe mangurupi pardosa i asa muba jala asa diampuni Jahowa ibana. (Luk. 5:32) Ikkon ditangiakkon akka sintua do halak na bertobat i asa diurupi Jahowa ibana padenggatton hubunganna tu Jahowa. (Jak. 5:15) Alai boha do molo dang olo sasahalak bertobat hape nungnga makkatai akka sintua tu ibana? Molo songon i situasina, ikkon dipecat do ibana sian huria. Alai molo di pudian ni ari dipatudu ibana na botul-botul ibana bertobat jala muba, pasti diampuni Jahowa do ibana nang pe balga hian dosana i.—Luk. 15:​17-24; 2 Kron. 33:​9, 12, 13; 1 Tim. 1:15. w22.06 9 ¶5-6

Sai diurupi Jahowa do akka naposona di liat portibi on asa marhasil nasida mangadopi akka hasusaan dohot tantangan na borat na dibahen Sibolis. (1 Ptr. 5:9) Hamu pe boi do marhasil mangadopi i. Satokkin nai suruon ni Jahowa ma Jesus dohot si 144.000 ‘mangaripasson akka ulaon ni Sibolis’. (1 Joh. 3:8) Dukkon i, ‘dang adong be na tahabiari, jala dang adong na mambahen hita mabiar’. (Jes. 54:14; Mik. 4:4) Alai saonari torus ma hita berupaya mangatasi biar ni rohatta. Pos ma rohatta massai holong do roha ni Jahowa tu hita jala pasti jagaonna do hita. Torus ma taingot songon dia Jahowa mangurupi akka naposona di tikki naung salpu. Jala taceritahon ma i tu na asing. Torus ma taingot songon dia Jahowa nungnga mangurupi hita mangadopi akka hasusaatta. Pos ma rohatta, boi do hita marhasil mangatasi biar ni rohatta molo diurupi Jahowa.—Ps. 34:4. w22.06 19 ¶19-20

Kuasa dunia na parpudi na digombarhon songon ‘pat ni patung na sian bosi na marcampur tano liat’, nungnga mamaretta saonari. Mulai ma i mamaretta saleleng Perang Dunia I, tikki bekerja sama Inggris dohot Amerika Serikat membentuk kuasa dunia Anglo-Amerika. Sian patung na adong di nipi si Nebukadnesar i, taboto ma dua informasi na patuduhon berbeda do kuasa dunia on sian akka kuasa dunia na sebelumna. Aha ma i? Na parjolo, patung na di nipi ni si Nebukadnesar i paboahon molo kuasa dunia Anglo-Amerika dibahen sian bosi na marcampur tano liat. Berbeda do i sian kuasa dunia sebelumna na dibahen sian bahan na karas jala na kuat, songon mas manang perak. Tano liat manggombarhon ‘rakyat’. (Dan. 2:43) Songon na taida saonari, balga do pengaruh ni akka rakyat di pemilihan umum. Berkampanye do nasida lao mandapot hak-hak ni nasida. Asing ni i, jotjot do nasida demonstrasi. Bergabung do muse nasida tu serikat buruh. Alani tindakan ni akka rakyat on, gabe maol ma kuasa dunia Anglo-Amerika mencapai tujuan ni nasida. w22.07 4-5 ¶9-10

Menahan diri do hamu lao tardidi? Denggan do molo disukkun hamu dirimuna, ‘Boasa ragu-ragu dope au?’ (Ul. 8:36) Disarupahon Jesus do mangulahon lomo ni roha ni Debata songon sipanganon. Dos songon sipanganon na mambahen hita sehat, sude paretta ni Jahowa mambahen lam denggan ngolutta. Dang lomo roha ni Jahowa molo taulahon na parohon jea tu hita. Lomo do roha ni Jahowa asa tardidi hamu. (Ul. 2:38) Alani i pos ma rohamuna molo diulahon hamu parettana asa tardidi, pasti parohon manfaat do i di hamu. Rimangi ma on: Molo dang ragu-ragu hamu mangallang sipanganon favoritmuna, attong boasa ragu-ragu dope hamu lao tardidi? Boasa adong piga-piga halak na ragu-ragu lao tardidi? Godang do na mandok, “Dang rade dope au bah.” Memang keputusan na massai penting do mangalehon ngolumuna tu Jahowa jala tardidi. Alani i, ikkon manat do dipikkirhon hamu i jala porlu do tikki dohot upaya asa memenuhi syarat hamu lao tardidi. w23.03 7 ¶18-20

Di tikki i, dimiahi tondi parbadia ma Jesus jala dilantik gabe pinoppar utama ni borua i. Dung i mate ma Jesus jala dipahehe ma ibana tu surgo. Dilehon ma tu ibana “hamuliaon dohot hasangapon”. Dilehon do muse tu ibana “huaso na di banua ginjang dohot na di tano on”. Termasuk ma i huaso lao ‘mangaripasson akka ulaon ni Sibolis’. (Heb. 2:7; Mat. 28:18; 1 Joh. 3:8) Asing ni Jesus, adong dope na gabe pinoppar ni borua i. Si Paulus mandok, nasida akka halak Kristen na dimiahi tondi parbadia, na ro sian bangso Jahudi dohot sian bangso na asing. Didok ibana, “Molo sisean ni Kristus do hamu, tutu ma hamu pinoppar ni si Abraham na lao manjalo pasu-pasu na dijanjihon i.” (Gal. 3:​28, 29) Jadi tikki dimiahi tondi parbadia ni Jahowa sahalak Kristen, dilantik ma ibana gabe pinoppar ni borua i. Saonari nungnga taboto be akka ise do pinoppar ni borua i, i ma Jesus dohot si 144.000 na tarpillit lao mamaretta rap dohot Jesus. (Pgk. 14:1) Berupaya do nasida sude maniru sifat dohot cara marpikkir ni Jahowa. w22.07 16 ¶8-9

Taboto do ikkon taadopi sitaonon saleleng ari parpudi on. (2 Tim. 3:1) Boi do gabe merasa tertekan hita jala dang sanggup manaon i. Tarlumobi ma molo margatti-gatti ro sitaonon i manang sahali ro sude. Alai taingot ma diparrohahon Jahowa do hita. Urupanna do hita asa toktong martahan mangadopi sitaonon na borat i. Marsiajar ma hita sian si Job. Hea do sahali ro masalah na borat tu ibana. Holan di bagasan sadari, dipaboa ma tu si Job nungnga habis be ternakna ditakko jala dipamate akka parkarejona. Bahkan gellengna pe nungnga mate be sude. (Job 1:​13-19) Pasti lungun hian do roha ni si Job alani i. Alai dang sae dope masalahna. Marsahit na parah muse ibana. (Job 2:7) Diparrohahon Jahowa do sude na masa tu si Job. Alani holongna, diurupi do si Job asa marhasil mangadopi sitaononna i. w22.08 11 ¶8-10

Molo dipissang hita, olo do gabe lungun rohatta. Boi do gabe merasa hita dang adil cara ni Jahowa mamissang hita, jala merasa dang cocok sipasingot i tu hita. Ujungna gabe dang boi be taida tujuan ni sipasingot i. Dipissang Jahowa pe hita ala na holong do rohana tu hita. (Heb 12:​5, 11) Alani i jalo ma pissang-pissang jala bahen ma perubahan. Adong piga-piga hali dipasingot Jesus si Petrus di jolo ni akka apostel na asing. (Mrk. 8:33; Luk. 22:​31-34) Pasti maila do si Petrus tikki na dipasingot i ibana. Alai toktong do setia si Petrus tu Jesus. Dijalo ibana do i jala marsiajar do ibana sian kesalahanna. Ala toktong setia si Petrus, dipasu-pasu Jahowa do ibana. Dilehon do tu ibana akka tugas na massai penting di huria. (Joh. 21:​15-17; Ul. 10:​24-33; 1 Ptr. 1:1) Memang maila do hita tikki dipissang, alai molo tajalo i jala rade hita mambahen perubahan, pasti godang do manfaatna tu hita dohot tu na asing. Gabe godang ma na boi taulahon tu Jahowa dohot tu akka dongan. w22.11 21-22 ¶6-7

Pos do roha ni si Abraham dang mungkin bahenon ni Debata ulaon na kejam manang na so sittong. Sesuai tu surat ni Apostel Paulus, porsea do si Abraham na sanggup do Jahowa pahehehon si Isak. (Heb. 11:​17-19) Asing ni i, nungnga marjanji Jahowa gabe sada bangso na balga do pinoppar ni si Isak, nang pe dang margelleng dope si Isak di tikki i. Ala holong hian do roha ni si Abraham tu Jahowa, pos do rohana sai bahenon ni Jahowa do na sittong. Gabe dioloi ibana ma pangidoan ni Jahowa i nang pe maol mangulahon i. (1 Mus. 22:​1-12) Songon dia do hita boi maniru si Abraham? Torus ma hita marsiajar taringot Jahowa. Molo taulahon i, gabe lam holong ma rohatta tu Jahowa jala lam jonok ma hita tu Ibana. (Ps. 73:28) Gabe tarlatik ma panggora ni rohatta lao mangihutton cara marpikkir ni Jahowa. (Heb. 5:14) Hasilna gabe lam mura ma hita menolak godaan. Bahkan dang ro tu pikkiranta lao mangulahon manang aha pe na mambahen lungun roha ni Jahowa jala na manegai hubungatta tu Ibana. w22.08 28-29 ¶11-12

Tikki mangunjungi huria di Listra, di Ikonium, dohot di Antiokia, “dipillit si Paulus dohot si Barnabas ma akka sintua di ganup huria”. (Ul. 14:​21-23) Akka sintua i ma na patoguhon akka dongan di huria i, dos songon na diulahon akka sintua saonari. Hamu akka sintua, parrohahon hamu ma ise di huriamuna na porlu dipatogu marhite “akka hata na denggan”. Dipaingot si Paulus do muse akka donganna taringot pengalaman ni akka naposo ni Jahowa najolo na ‘songon ombun godangna’. Martahan do nasida mangadopi hasusaan na borat ala diurupi Jahowa. (Heb. 12:1) Dipaboa si Paulus do on tu akka donganna i asa barani nasida jala fokus tu “kota ni Debata na mangolu i”. (Heb. 12:22) Songon i do tong na tahilala saonari. Dipatogu do hita tikki manjaha songon dia Jahowa mangurupi si Gidion, si Barak, si Daud, si Samuel, dohot na asing.—Heb. 11:​32-35. w22.08 21-22 ¶5-6

Didok di ayat i, diuhumi do akka halak na dipahehe i sesuai tu parniulaon ni nasida. Parniulaon ni nasida sebelum mate do maksudna? Daong! Taingot ma, dosa na diulahon nasida sebelum mate, nungnga disesa tikki mate nasida. Jadi parniulaon na didokna dison, dang parniulaon ni nasida sebelum mate. Alai on lapatanna, tanggapan ni nasida tu standar ni Jahowa na diajarhon di tano na imbaru. Bahkan akka naposo ni Jahowa songon si Noak, si Samuel, si Daud, dohot si Daniel pe porlu do marsiajar taringot Jesus jala patuduhon haporseaon tu tobusan. Molo nasida sajo porlu marsiajar, apalagi ma akka “halak na jahat” i.Aha do na lao masa tu akka halak na mangalo Jahowa? Pangungkapon 20:15 mandok, “Manang ise na so tarsurat goarna di bukku hangoluan i, disappatton ma ibana tu laut api i.” Lapatanna, na lao dipamate ma nasida saleleng ni lelengna. Alani i, ikkon tapastihon do toktong tarsurat goarta di bukku hangoluan i saleleng ni lelengna! w22.09 18-19 ¶17-19

Godang do keputusan na tabahen taringot kesehatan dohot perawatan medis berdasarkan na taparsiajari sian Bibel. (1 Tim. 3:9) Tikki tabahen keputusan jala tapaboa keputusanta i tu na asing, taingot ma prinsip di Pilippi 4:5. Didok disi, “Patuduhon ma tu saluhut halak na marbisuk do hamu.” Molo marbisuk hita, dang gabe terlalu khawatir hita tu kesehatanta. Ikkon tahaholongi do donganta jala ikkon taargai nasida, nang pe dang sarupa keputusan ni nasida tu hita. (Rom 14:​10-12) Tapatudu ma na taargai Jahowa Mual ni hangoluan, molo tajaga ngolutta jala talehon na undenggan tu Ibana. (Pgk. 4:11) Memang saonari olo do marsahit hita manang hona bencana. Alai taingot ma dang hangoluan sisongon i na dihalomohon Jahowa tu hita. Satokkin nai bahenonna ma asa boi hita mangolu saleleng ni lelengna jala dang adong be sahit dohot hamatean. (Pgk. 21:4) Huhut paimahon i, denggan do molo tajaga ngolutta jala tasomba Jahowa Bapakta na parholong i! w23.02 25 ¶17-18

Takkas do dipatudu Jahowa dao do umbalga huasona sian sude pamaretta na adong di portibi on. (Rom 13:1) Taida ma tolu contohna. Najolo massai kejam do si Firaun raja ni Mesir mamparhatoban naposo ni Jahowa. Mulak-ulak do ditolak ibana pangidoan ni Jahowa lao paluahon nasida. Alai ujungna dipalua Jahowa do bangsona i. Jala dilonokkon ma si Firaun di Laut Merah. (2 Mus. 14:​26-28; Ps. 136:15) Songon i do tong si Belsasar, raja ni Babel. Hea do sada tikki mambahen pesta ibana. Di pesta i, ‘ginjang do rohana maradoppon Tuan na di surgo i’, jala ‘akka debata sian perak dohot na sian mas do na dipuji ibana’, dang Jahowa. (Dan. 5:​22, 23) Alani i, dipaila Jahowa ma raja na sombong i. Laos di borngin i, mate tarbunu ma si Belsasar jala dipasahat ma harajaonna i tu halak Media dohot Persia. (Dan. 5: 30, 31) Songon i do tong na masa tu Raja Herodes Agripa I na sian Palestina. Dipamate ibana do Apostel Jakobus. Dung i dipenjarahon do Apostel Petrus jala berencana do ibana mambunu si Petrus. Alai digagalhon Jahowa do rencana ni si Herodes i. “Dibahen suru-suruan ni Jahowa ma ibana marsahit”, dung i mate ma ibana.—Ul. 12:​1-5, 21-23. w22.10 15 ¶12

Tikki taida songon dia Jahowa mangurupi akka naposona najolo, gabe lam togu ma haporseaotta tu Ibana. Taingot ma sude isi ni Bibel disurat “asa pos rohatta tu janji ni Debata, asa margogo, jala togu manaon sitaonon”. (Rom 15:4) Rimangi ma songon dia Jahowa pasautton akka janjina najolo. Parrohahon ma aha na dibahen Jahowa tu si Abraham dohot si Sara. Sebenarna dang boi be nasida maranakkon ala nungnga matua. Alai didok Jahowa na lao maranakkon do nasida. (1 Mus. 18:10) Songon dia ma reaksi ni si Abraham? Didok di Bibel, “Porsea jala pos do roha ni si Abraham na boi ibana gabe ama ni godang bangso.” (Rom 4:18) Hira na so mungkin do i masa, alai pos do roha ni si Abraham na lao pasauton ni Jahowa do janjina. Jala memang i do na masa. (Rom 4:​19-21) Sian on hita marsiajar, pasti pasauton ni Jahowa do sude janjina. w22.10 27 ¶13-14

Hata on digenapi dukkon mulak halak Jahudi sian tawanan. Ditogu-togu Ibana do naposona mulak muse mangulahon ibadat na sittong. Saonari pe dibuktihon Jahowa do molo Ibana Guru na Sangap di hita, jala mandok mauliate do hita alani i. Didok si Jesaya do hita songon murid na diajari Jahowa marhite dua cara. Na parjolo didok si Jesaya, “Idaonmuna nama Gurum na Sangap i.” Di ilustrasi on digombarhon si Jesaya do Jahowa songon guru na jongjong di jolo ni muridna. Jadi sada hasangapon do di hita saonari ala Debata do na mangajari hita. Songon dia Jahowa mangajari hita? Marhite organisasina, dilehon Jahowa do tu hita petunjuk na jelas. Las do rohatta mandapot petunjuk i di parpunguan, sian akka publikasi, acara broadcasting, dohot na asing. Sudena on mangurupi hita asa toktong martahan jala marlas ni roha nang pe mangadopi situasi na borat. w22.11 10 ¶8-9

Taringot kehancuran ni Jerusalem dohot bagas joro, dohot taringot “panutup ni jaman on” i ma di tikkitta saonari, didok Jesus do, “Taringot tu ari manang jamna dang adong na mamboto i, nang akka suru-suruan na di banua ginjang, nang anak i, holan Ama i do na mamboto.” Dung i dipaingot Jesus ma muse siseanna asa “toktong dungo” jala “sai jaga”. (Mrk. 13:​32-37) Ikkon toktong do marjaga-jaga halak Kristen na di Judea asa boi nasida malua. Dipaboa Jesus do tu akka siseanna, “Molo diida hamu markemah akka tentara di sakaliling ni Jerusalem, boto hamu ma nungnga jonok be tikkina dihancurhon nama Jerusalem.” Di tikki i, ikkon diparrohahon nasida do sipasingot ni Jesus jala ‘ikkon lari do nasida tu akka dolok’. (Luk. 21:​20, 21) Malua do akka halak na mamparrohahon sipasingot ni Jesus on tikki dihancurhon halak Rom kota Jerusalem. Saonari mangolu di ujung ni ari parpudi do hita. Jadi hita pe ikkon toktong do marjaga-jaga. w23.02 14 ¶1-2; 16 ¶3

Diajari Jahowa do naposona asa jujur jala mangulahon na sittong. On ma na mambahen nasida sangap jala makkilala hadameon. (Poda 13:​5,6) Songon i do na dihilala hamu dung marsiajar Bibel? Nungnga diboto hamu standar ni Jahowa do na dumenggan tu akka jolma, termasuk tu dirimuna sandiri. (Ps. 77:13) Gabe lomo do rohamuna mangulahon na sittong di jolo ni Debata. (Mat. 6:33) Gabe tergerak ma rohamuna lao mambela hasittongan jala mambuktihon na sala do tuduhan ni Sibolis taringot Jahowa. Songon dia do carana mangulahon i? Sian parngoluonmuna, boi do dipillit hamu manolak gabus ni Sibolis jala mambela na sittong. Boi do dipatudu hamu Jahowa na gabe Parhuaso di hamu jala lomo rohamuna mangulahon na sittong. Songon dia hamu mangulahon i? Lehon ma dirimuna tu Jahowa di bagasan tangiang, dung i tardidi ma hamu. Holong tu hasittongan dohot tu hatigoran ma na mangonjar rohamuna lao tardidi. w23.03 3 ¶4-5

Dang sude halak makkilala dame na sian Debata. Alana dame na sian Debata boi didapot molo marale-ale sasahalak tu Jahowa. Molo adong di hita dame na sian Debata, gabe aman ma perasaanta. (Plp. 4:​6, 7) Las do rohatta boi jonok tu akka halak na marale-ale tu Jahowa jala boi jonok tu “Debata Silehon dame”. (1 Tes. 5:23) Molo porsea hita jala unduk tu Bapakta na di surgo, dame ni Debata boi mambahen hita tetap tenang jala dang terlalu khawatir nang pe mangadopi situasi na borat. Boi do hita makkilala dame na sian Debata nang pe mangadopi hasusaan songon wabah penyakit, bencana alam, kerusuhan, manang penganiayaan? Memang olo do gabe mabiar hita molo masa i. Godang do akka donganta na mangihutton nasehat ni Jesus di ayat harian sadari on. Alani bantuan ni Jahowa, boi ma nasida toktong merasa dame nang pe mangadopi hasusaan. w22.12 16 ¶1-2

Dang boi takendalihon sude na masa di ngolutta. Alai taingot ma, na mambahen hita berharga di Jahowa dang penugasanta. Alani i, unang ma sai tabandingkon diritta tu na asing na mandapot tugas na so dilehon tu hita. (Gal. 6:4) Alani i, talului ma godang cara lao melayani Jahowa jala mangurupi na asing. Asa boi unggodang tikki na dilehon hamu tu Jahowa, sederhana ma bahen ngolumuna jala hindari ma utang na so porlu. Bahen ma cita-cita jangka pendek asa boi hamu mencapai cita-cita jangka panjang. Misalna molo lomo rohamuna gabe perintis biasa, coba hamu ma jo gabe perintis ekstra tetap. Molo cita-citamuna gabe parhobas di huria, boi do ditambai hamu tikkimuna di ulaon marbarita? Pengalaman na dapotmuna saonari, marguna do i di penugasanmuna haduan. Berupaya ma mangulahon na terbaik di tugas manang aha pe na dilehon tu hamu. w22.04 26 ¶16-17

Boi do Jahowa mangurupi hita mangadopi tantangan na masa jala marlas ni roha di ulaonta manomba Ibana. Tikki tapaboa tu Jahowa akka na takhawatirhon, pittor dilean Jahowa do tu hita gogo asa boi martahan. Molo tung pe dang pittor sae masalahta, unang ma menyerah hita. Torus ma tapangido tu Jahowa asa diurupi hita martahan. Lomo do roha ni Jahowa molo taulahon i. Tarida ma i sian hata ni si Jesaya na mandok, “Unang ma pasombu hamu [Jahowa] maradi.” (Jes. 62:7) Aha do maksud ni hata on? Ikkon torus do hita martangiang tu Jahowa seolah-olah dang tapaloas Ibana istirahat. Hata ni si Jesaya on paingotton hita tu ilustrasi ni Jesus taringot tangiang di Lukas 11:​8-10, 13. Di ilustrasi i, dijujui Jesus do hita asa ‘sai tapangido’ tondi parbadiana. Boi do muse tapangido tu Jahowa asa diurupi hita mambahen keputusan na denggan. w22.11 8 ¶1; 9 ¶6-7

Bahen hamu ma dohot keluarga persiapan sebelum masa penganiayaan. Unang ma sai dipikkiri hamu akka hasusaan na boi masa. Sebalikna, patogu ma parale-aleonmuna tu Jahowa, jala urupi ma akka gellengmuna mangulahon na sarupa. Molo khawatir hamu, pasahat ma i sude tu Jahowa. (Ps. 62:​7, 8) Bahas hamu ma dohot keluarga boasa boi pos rohamuna tu Jahowa. Godang do manfaatna tikki tabahen persiapan sebelum masa bencana alam. Suang songon i ma, godang do manfaatna molo tabahen persiapan sebelum masa penganiayaan. Molo taurupi gellengta asa mangandalhon Jahowa, gabe barani ma nasida jala toktong tenang tikki masa penganiayaan. Boi do dame na sian Debata manjaga roha dohot pikkiranta. (Plp. 4:​6, 7) Dibahen Jahowa do hita toktong tenang nang pe masa wabah penyakit, bencana alam, dohot penganiayaan. Dipakke Ibana do akka sintua na olo bekerja keras lao manjaga hita. Jala dilehon do hasangapon tu hita sude lao marsiurupan dohot akka dongan. Hadameon na tahilala saonari boi do paradehon hita lao mangadopi hasusaan na umbalga di ari na naeng ro, tarlumobi tikki masa “hasusaan bolon”.—Mat. 24:21. w22.12 27 ¶17-18

Ikkon berupaya do hita mambolokkon perasaan bersalah alani dosa na balga na hea taulahon. Memang dang na gabe “sengaja hita mangulahon dosa” ala taboto adong tobusan. (Heb. 10:​26-31) Alai pos ma rohatta disesa Jahowa do dosatta molo olo hita bertobat jala mangido bantuan sian akka sintua. (Jes. 55:7; Ul. 3:19) Pos ma rohatta nungnga disesa be sude dosatta alani tobusan ni Jesus, jala boi ma hita mangolu di Paradeiso. Dang marna bosan hita annon mangolu di Paradeiso, alana sai adong do ulaon na mambahen las rohatta. Boi do hita annon disi bergaul tu godang halak. Na uppetting, boi ma lam akrab hita tu Bapakta Jahowa jala boi menikmati sude na diparade Ibana. Sai adong do na boi taparsiajari taringot Jahowa, jala boi do hita marsiajar sian akka toppaanna. w22.12 12-13 ¶17, 19

“Borua” on dang si Hawa maksudna. Di surirang i dipaboa do molo pinoppar ni borua i lao ‘mangaropukkon’ ulu ni ulok i. Sibolis do ulok na dipaboa di surirang i, i ma suru-suruan na so setia. Jadi dang mungkin adong pinoppar ni si Hawa na boi mangaropukkon Sibolis. Attong taida ma jo hatorangan na asing taringot on. Dipaboa do di bukku Pangungkapon ise borua na di 1 Musa 3:15. (Pgk. 12:​1, 2, 5, 10) Disi didok, adong bulan di toru ni patna, jala adong mahkota na sian 12 bintang di atas ni uluna. Ditubuhon borua i ma Harajaon ni Debata. Ala di surgo do Harajaon i, berarti borua i pe di surgo do, dang di tano on. Jadi borua i manggombarhon organisasi ni Jahowa na di surgo, termasuk ma i akka suru-suruan na setia. (Gal. 4:26) Dipaboa do muse di Bibel Jesus do pinoppar utama ni borua i. Sian dia taboto? Akka surirang ni Bibel paboahon molo ibana ro sian pinoppar ni si Abraham.—1 Mus. 22:​15-18. w22.07 15-16 ¶6-8

Dipaboa Jahowa do di Bibel akka nasehat na mambahen hita marbisuk jala mambahen lam denggan ngolutta. Tikki ditogu-togu tondi parbadia ni Debata si Musa manuratton lima bukku na parjolo di Bibel, didok si Musa do tu halak Israel, “Dang holan hata sabbing akka hata i. Ai molo dioloi hamu hata i, boi do i mambahen hamu mangolu.” (5 Mus. 32:47) Akka halak na mangoloi Surat na Badia boi do marhasil jala marlas ni roha di ngolu ni nasida. (Ps. 1:​2, 3) Nang pe naung leleng Bibel disurat, alai boi do i mambahen lam denggan ngolu ni jolma. Nasehat ni Bibel marguna do i saleleng ni lelengna. Jala tarbukti do i boi mambahen lam denggan ngolu ni halak di sude jaman. Tikki tajaha Bibel jala tarimangi isina, dilean Pangarangna i ma tondi parbadiana lao mangurupi hita mangulahon akka nasehat ni Bibel di ngolutta. (Ps. 119:27; Mal. 3:16; Heb. 4:12) Jadi lomo do roha ni Pangarang ni Bibel mangurupi hita. Alani i berupaya ma hita asa taratur manjaha Bibel. w23.02 3 ¶5-6

Dipaboa di Pangungkapon bindu 13, kuasa dunia Anglo-Amerika do binatang buas na pitu uluna i. “Adong dua tandukna songon tanduk ni anak ni biru-biru, alai songon naga do ibana makkatai.” Dung i “dibahen ibana do muse akka tanda halongangan, jala dipaturun ibana do api sian langit tu tano on di jolo ni akka jolma”. (Pgk. 13:​11-15) Di Pangungkapon bindu 16 dohot 19 didok do binatang buas i “panurirang na makkatahon na so tutu”. (Pgk. 16:13; 19:20) Cocok do on tu surirang ni si Daniel na mandok molo binatang buas na manggombarhon kuasa dunia Anglo-Amerika i ‘mambahen hancur saluhutna’. (Dan. 8:​19, 23, 24) Tutu do i masa. Saleleng Porang Dunia II, adong dua bom atom na mambahen hancur wilayah Jepang. Akka ilmuwan sian Inggris dohot Amerika do na merancang bom atom i. Jadi takkas ma, kuasa dunia Anglo-Amerika parohon “api sian langit tu tano on”. w22.05 10 ¶9