Mei

Dung diida si Johannes si 144.000 i, diida ibana ma muse “sada punguan bolon” na so taretong godangna. Aha do na taboto taringot nasida? Didok si Johannes, “Nasida do na malua sian hasusaan bolon. Nungnga disussi nasida jubah ni nasida jala bottar dibahen di bagasan mudar ni Anak ni Biru-Biru i.” (Pgk. 7:14) Dung malua nasida sian hasusaan bolon, dapot ni nasida ma godang pasu-pasu di tano on. (Ps. 37:​9-11, 27-29; Poda 2:​21, 22; Pgk. 7:​16, 17) Dang soal hita dipillit naeng mangolu tu surgo manang di tano on, pasti tarpaima do hita tu penggenapan ni surirang di Pangungkapon bindu 7. Pengalaman na luar biasa do on. Pasti marlas ni roha do hita ala nungnga tabahen keputusan lao mendukung pamarettaon ni Jahowa. w22.05 16 ¶6-7

Molo hita naeng mambahen keputusan na penting, pasti jolo martangiang do hita tu Jahowa mangido bisuk. Ala taboto porlu do i di hita. (Jak. 1:5) Si Salomo mandok, “[Bisuk] do na upporlu sian saluhutna.” (Poda 4:7) Na didok si Salomo dison dang bisuk ni jolma. Alai bisuk na sian Jahowa do. Memang boi do bisuk na sian Debata i mangurupi hita mangadopi akka tantangan di parngoluotta? Boi. Sada cara asa boi hita marbisuk, i ma mangihutton nasehat ni halak na marbisuk. Na parjolo i ma si Salomo. Didok di Bibel, “Dibahen Debata do si Salomo massai marbisuk, jala diurupi do ibana asa malo manottuhon dia na denggan.” (1 Raj. 4:29) Na paduahon, i ma Jesus. Ibana do halak na umbisuk na hea mangolu di tano on. (Mat. 12:42) Taringot Jesus dipaboa do di surirang ni si Jesaya, “Gok do tondi parbadia ni Jahowa di ibana. Alani i ma gabe marbisuk ibana, jala gok do na diattusi ibana.”—Jes. 11:2. w22.05 20 ¶1-2

Nang pe nga matua, tetap do boi tabahen cita-cita. Taida ma contoh ni si Beverley, sahalak donganta borua na marumur 75 taon. Ala adong masalah kesehatan, maol do ibana mardalan. Alai lomo do rohana mendukung ulaon marbarita saleleng bulan Parningotan. Jadi dibahen ibana ma tujuan na jelas. Dung marhasil si Beverley meraih cita-citana i, las hian ma rohana. Gabe tergerak ma akka dongan na asing maniru semangatna. Pasti diargai Jahowa do upaya na dibahen akka donganta na matua, nang pe terbatas kesanggupan ni nasida. (Ps. 71:17) Bahen ma cita-cita na boi diraih hamu. Berupaya ma hamu padenggatton akka sifatmuna asa las roha ni Jahowa. Parsiajari hamu ma akka keterampilan na mangurupi hamu mangalehon unggodang tu Debata dohot tu organisasina. Sai lului hamu ma cara mangurupi akka dongan sahaporseaon. Songon si Timoteus, marhite bantuan ni Jahowa boi ma “diida sude halak na lam togu parale-aleonmu tu Debata”.—1 Tim. 4:15. w22.04 27 ¶18-19

Boha do molo dang olo gellengmuna manomba Jahowa nang pe nga berusaha hamu mangurupi nasida? Unang ma didok rohamuna nga gagal hamu. Dilehon Jahowa do tu hita sude kebebasan mamillit, termasuk tu gellengmuna. Jadi berhak do nasida mamillit naeng manomba Jahowa manang na dang. Sabar ma hamu paimahon nasida mulak. Ingot ma ilustrasi taringot anak na mago. (Luk. 15:​11-19, 22-24) Roa do pangalahona, alai ujungna muba do ibana. Hamu akka natua-tua, nungnga dilehon Jahowa tugas na istimewa tu hamu lao mangajari gellengmuna asa manomba Ibana. (Ps. 78:​4-6) Memang dang tugas na mura on. Alai hupuji hami do hamu ala nungnga berupaya mangurupi gellengmuna. Torus ma urupi hamu nasida asa makkaholongi Jahowa jala mangoloi Ibana. Pos ma rohamuna pasti las do roha ni Jahowa tu hamu.—Eps. 6:4. w22.05 30-31 ¶16-18

Ikkon berupaya do hita sude mambahen huria mardame jala marsada. Taparrohahon ma jo pengalaman ni halak Kristen di abad na parjolo. (1 Kor. 12:​4, 7-11) Marragam do tugas dohot kesanggupan ni nasida. Nang pe songon i, dang bersaing nasida. Alana sai dijujui si Paulus do halak i asa “patoguhon daging ni Kristus”. Didok si Paulus do muse tu halak Kristen di Epesus, “Molo denggan ganup bagian mangulahon ulaonna be, gabe lam magodang ma daging i di bagasan holong.” (Eps. 4:​1-3, 11, 12, 16) Molo diihutton nasida do nasehat ni si Paulus i, gabe marsada ma huria. Jala i do tong na ikkon taulahon saonari. Bertekad ma hita asa unang mambanding-bandingkon diri tu na asing. Berupaya ma hita maniru akka sifat ni Jesus. Pos ma rohatta ‘dang lupahonon ni Jahowa akka naung taulahon i’. (Heb. 6:10) Pasti las do roha ni Jahowa molo talehon na undenggan tu Ibana. w22.04 14 ¶15-16

Las do rohatta ala dang dilehon tu hita tanggung jawab lao mamutusson nungnga diampuni Jahowa sahalak pardosa manang na dang. Alai adong do na ikkon taputusson. Aha ma i? Olo do ra adong halak na mangulahon dosa na balga tu hita, dung i menyesal ma ibana jala minta maaf. Alai molo tung pe dang diulahon ibana i, ikkon taputusson do naeng tamaappon ibana manang naeng torus muruk hita tu ibana. Memang dang mura mangulahon i, khususna molo nungnga haccit hian rohatta dibahen. Alai Menara Pengawal 15 September 1994 mandok, “Molo taampuni sasahalak, dang na berarti setuju hita tu dosana i. Alai molo taampuni ibana, berarti na tapasahat do parsoalan i tu Jahowa. Ibana do Hakim na terbaik jala pasti pasautonna do keadilan di tikkina.” w22.06 9 ¶6-7

Marjanji do Jahowa mambahen akka halak sian sude bangso, suku, dohot bahasa marsada manomba Ibana. Jala tutu do i masa. Saonari didok ma nasida “punguan bolon”. (Pgk. 7:​9, 10) Nang pe ro sian marragam latar belakang, alai marsada do nasida songon keluarga. (Ps. 133:1; Joh. 10:16) Ringgas do nasida marbarita na uli. Sai rade do nasida paboahon tu akka halak na olo manangihon molo haduan na lao adong do portibi na dumenggan. (Mat. 28:​19, 20; Pgk. 14:​6, 7; 22:17) Molo bagian sian punguan bolon do hamu, pasti arga do janji ni Jahowa i di hamu. Lomo do roha ni Sibolis asa unang marpos ni roha be hita tu akka janji ni Jahowa. Tujuanna, asa unang porsea hita na lao pasauton ni Jahowa do akka janjina i. Akibatna gabe gale ma haporseaotta jala dang tasomba be Jahowa. w22.06 20 ¶2-3

Harapan on mambahen dame rohatta nang pe borat situasitta, ala pos do rohatta adong hangoluan na dumenggan na tapaima-ima. Taingot ma nungnga didok Jesus na lao dianiaya akka siseanna. (Joh. 15:20) Alai molo tarimangi janji ni Jahowa di ari na naeng ro, gabe boi ma hita toktong semangat manomba Ibana nang pe dianiaya. Harapan ni Jesus na togu mangurupi ibana toktong setia tu Jahowa tikki naeng dihukum mate. Di ari Pentakosta taon 33 M, dikutip Apostel Petrus do hata sian bukku Psalmen na mandok, “Marhaposan tu Debata ma au di ngolukku. Ai dang pasombuonmu au di Kuburan jala dang pasombuonmu busuk naposom na setia. . . . Dibahen Ho do au marlas ni roha situtu di jolom.” (Ul. 2:​25-28; Ps. 16:​8-11) Sian ayat on boi taida, massai togu do harapan ni Jesus. I do na mambahen ibana toktong tenang. Boi do ibana toktong sabar jala togu, ala pos rohana sanggup do Jahowa pahehehon ibana jala na lao marsada do ibana muse dohot Bapakna di surgo.—Heb. 12:​2, 3. w22.10 25 ¶4-5

Hea do dua apostelna, i ma si Jakobus dohot si Johannes mandokkon tu omak ni nasida asa dipangido tu Jesus posisi na sangap di Harajaonna. (Mat. 20:​20, 21) Tindakan ni nasida i patuduhon na ginjang do roha ni nasida, jala lomo rohana gabe na ussangap sian na asing. (Poda 16:18) Dang holan si Jakobus dohot si Johannes na patuduhon sifat na so denggan di tikki i. Bibel mandok, “Tikki dibege sisean na sappulu i taringot i, muruk ma nasida tu dua halak na marhaha maranggi i.” (Mat. 20:24) Boi ma tabayakkon pasti marsoal do si Jakobus, si Johannes, dohot akka apostel na asing i. Aha do na diulahon Jesus? Dang gabe muruk ibana tu akka apostelna i. Dang didok ibana tumagon ma dilului ibana muse halak na asing gabe apostelna na olo patuduhon serep ni roha dohot holong tu na asing. Gariada sabar do Jesus paingotton nasida. Alana diboto Jesus do na lomo do roha ni nasida mangulahon na sittong. (Mat. 20:​25-28) Sai dipatudu Jesus do holong tu akka apostelna. w23.03 28-29 ¶10-13

Pasti nungnga godang pengorbanan na dibahen hamu. Ringgas do hamu marsiajar Bibel. Olo do ra sappe piga-piga taon hamu marsiajar. Lam leleng hamu marsiajar, lam pos ma rohamuna Hata ni Debata do Bibel i. Asing ni i gabe lam holong ma rohamuna tu Pangarang ni Bibel i, i ma Jahowa. Ala nungnga lam holong rohamuna tu Jahowa, gabe olo ma hamu mangalehon diri tu Ibana jala ujungna tardidi. Keputusan na massai denggan do i. Tikki naeng tardidi hamu, godang do tantangan na manguji kesetiaanmuna tu Jahowa. Alai dung tardidi pe, sai adong do tantangan na diadopi hamu. Berupaya do Sibolis mambahen asa unang holong be rohamuna tu Jahowa jala asa unang disomba hamu be Ibana. (Eps. 4:14) Alai boi do hamu monang mangalo Sibolis. Boi do hamu toktong setia tu Jahowa jala menepati janjimuna tu Ibana. “Marsitutu” ma mambahen kemajuan rohani asa gabe halak Kristen na toras hamu.—Heb. 6:1. w22.08 2 ¶1-2

Sude anggota keluarga martanggung jawab do manjaga rahasia ni keluargana. Contohna, sahalak suami tottu dang olo paboa-boahon kebiasaan ni istrina tu na asing na boi mambahen maila istrina i. Holong do rohana tu istrina jala dang olo ibana mambahen haccit roha ni istrina i. (Eps. 5:33) Ikkon diargai natua-tua do perasaan ni gellengna naung remaja. Jala unang ma dipaboa-boa nasida hahurangan ni gellengna tu na asing. (Kol. 3:21) Akka dakdanak porlu do marsiajar asa boi manjaga rahasia. Unang dipaboa-boa nasida masalah keluarga na boi mambahen maila keluargana. Molo sude anggota keluarga berupaya manjaga rahasia, pasti gabe kompak ma nasida. w22.09 10 ¶9

Tikki makkatai Jahowa tu si Job, dipaboa Ibana do taringot akka binatang. On patuduhon na marbisuk situtu do Jahowa jala holong rohana tu akka toppaanna. (Job 38:​1, 2; 39:​9, 13, 19, 27; 40:15; 41:​1, 2) Dipakke Jahowa do muse si Elihu, sahalak bawa na poso lao patoguhon jala menghibur ibana. Marhite si Elihu dipapos Jahowa ma roha ni si Job, na sai lehononna do upa tu akka halak na setia. Dipakke Jahowa do muse si Elihu mangalehon nasehat tu si Job. Diurupi si Elihu do si Job asa unang holan mamikkiri dirina sandiri, alana dang sadia ibana martimbakkon Debata Jahowa na manoppa sasudena. Dilehon Jahowa do muse tugas tu si Job lao manangiakkon tolu donganna na mardosa. (Job 42:​8-10) Songon dia do Jahowa mangurupi hita tikki masa sitaonon na borat? Saonari dang langsung be makkatai Jahowa tu hita, songon na dibahen Ibana tu si Job najolo. Alai makkatai do Ibana tu hita marhite Bibel.—Rom 15:4. w22.08 11 ¶10-11

Di huria na di Rom najolo, adong do halak Jahudi dohot akka halak sian bangso na asing. Ala dang marlakku be Patik ni si Musa, dang ikkon diihutton halak Kristen be patik taringot sipanganon na dia na boi diallang dohot na so boi diallang. (Mrk. 7:19) Mulai sian i adong ma piga-piga halak Jahudi na merasa dang sala mangallang sude sipanganon, alai halak Jahudi na asing dang setuju. Gabe dang marsada huria alani i. Diurupi si Paulus do akka dongan i asa mangida bahayana molo dang marsada huria. Boi do i mambahen gale haporseaon ni nasida. (Rom 14:​19, 20) Si Paulus pe olo do mengalah asa unang gabe gale haporseaon ni akka donganna. (1 Kor. 9:​19-22) Boi do hita patoguhon akka dongan jala gabe siboan dame di huria, molo olo hita mengalah jala dang mamaksahon pandapotta sandiri. w22.08 22 ¶7

Songon sasahalak na mambahen cita-cita rohani, pasti berupaya do ibana asa boi dapotna i. Suang songon i ma, ikkon berupaya do hita makkaholongi na sittong. Pos ma rohatta sai urupan ni Jahowa do hita lao mambahen kemajuan. (Ps. 84:​5, 7) Didok Jahowa dang gabe susa hita molo taulahon na sittong, justru melindungi hita do i. (1 Joh. 5:3) Taingot ma muse perlengkapan porang na sian Debata na dipaboa si Paulus. (Eps. 6:​14-18) Sada sian perlengkapan porang i, i ma “baju partahanan”, lapatanna mangulahon na sittong. Songon baju partahanan ni sahalak tentara na boi melindungi jantungna, songon i ma standar ni Jahowa taringot na sittong na manjaga roha dohot pikkiranta. Alani i massai penting do mamakke baju partahanan, i ma mangulahon na sittong.—Poda 4:23. w22.08 29 ¶13-14

Hata ni Debata marisi petunjuk na denggan tu akka bawa dohot borua na setia saleleng marribu taon. Boasa boi toktong adong Bibel sahat tu saonari? Dipastihon Jahowa do adong halak na manalin Hatana i. Nang pe dang sempurna nasida, manat do nasida manalin i. Sahalak pakar mandok, “Pos do rohatta dang adong bukku kuno na asing na akurat disalin songon Akka Bukku Heber.” Jadi, boi do pos rohatta molo na tajaha di Bibel saonari marisi pikkiran ni Pangarangna, i ma Jahowa. Sian Jahowa do “silehon-lehon na denggan jala na sun denggan”. (Jak. 1:17) Sada silehon-lehon na massai denggan tu hita i ma Bibel. Tikki adong sasahalak na mangalehon hadiah, sian hadiahna i gabe taboto ma na takkas ditanda ibana hita dohot aha na tahaporluhon. Sarupa songon i do Bibel. Tikki taparsiajari i gabe taboto ma taringot Jahowa. Taboto ma na takkas do ditanda Jahowa hita jala diboto Ibana aha na tahaporluhon. w23.02 2-3 ¶3-4

Bayakkon ma songon dia las ni rohatta tikki masa haheheon di tano on saleleng Pamarettaon Saribu Taon! Pasti masihol do hita sude naeng pajuppang dohot akka halak na tahaholongi naung mate. Jala songon i do tong perasaan ni Jahowa. (Job 14:15) Bayakkon ma las ni rohatta tikki dipahehe nasida. Akka “halak na burju” naung tarsurat goarna di bukku hangoluan, lao dipahehe ma “tu hangoluan”. (Ul. 24:15; Joh. 5:29) Godang do ra sian nasida lao dipahehe dang leleng dukkon Armagedon. Asing ni i, dipahehe do muse “halak na jahat”, i ma akka halak na so sanga melayani Jahowa tikki mangolu nasida. Sude halak na lao dipahehe i porlu do diajari. (Jes. 26:9; 61:11) Alani i ma porlu dibahen program pendidikan di saluhut tano on.—Jes. 11:10. w22.09 20 ¶1-2

Dipatudu Jahowa do na umbalga huasona nang pe bergabung akka pamaretta lao mangalo Ibana. Misalna hea do diurupi Jahowa halak Israel mambuat sebagian besar Tano na Dijanjihon. (Jos. 11:​4-6, 20; 12:​1, 7, 24) Jotjot do dipatudu Jahowa holan Ibana do “Debata Natumimbul”. Sada tikki, dibangga-banggahon Raja Nebukadnesar ma gogona dohot huasona ‘lao patuduhon balga ni hasangaponna’. Ala dang diakkui ibana holan Jahowa do na layak dipasangap, dibahen Jahowa ma ibana gabe rittik. Dung waras si Nebukadnesar, dipuji ibana ma “Natumimbul” i. Jala didok ibana holan Jahowa do na toktong mamaretta saleleng ni lelengna. Didok ibana muse, “Dang adong na boi mangabbati lomo ni rohana.” (Dan. 4:​30, 33-35) Didok panurat Psalmen do, “Sursar do dibahen Jahowa rencana ni akka bangso, jala sundat do dibahen Ibana lomo ni roha ni nasida.” Didok ibana muse, “Marlas ni roha ma bangso na Debatana Jahowa, bangso na pinillitna gabe appunana.” (Ps. 33:12) On ma alasanna boasa ikkon toktong hita setia tu Jahowa. w22.10 15-16 ¶13-15

Akka surirang ni Bibel naung digenapi paposson rohatta na lao saut do janji ni Debata di ari na naeng ro. Sarupa do pakkilalaatta songon panurat Psalmen na mandok, “Hupaima-ima do haluaon na sian Ho, ai hatam do na hupaima-ima.” (Ps. 119:81) Akka janji ni Jahowa di Bibel mambahen pos rohatta ‘na lao denggan do ngolutta di ari na naeng ro’. (Jer. 29:11) Masa depanta dang bergantung tu upaya ni jolma, alai tu janji ni Jahowa do. Alani i ringgas ma hita mamparsiajari akka surirang ni Bibel asa lam pos rohatta tu Hata ni Debata. Adong do bukti na mambahen pos rohatta tu Bibel, i ma ala nasehat ni Bibel boi mambahen lam denggan parngoluotta. (Psalmen 119:​66, 138) Misalna, sapasang suami istri na naeng marsirang hian ujungna boi marlas ni roha jala marsada muse. Jala marlas ni roha do gelleng ni nasida ala dipagodang-godang natua-tua Kristen na parduli jala parholong.—Eps. 5:​22-29. w23.01 5 ¶12-13

Pikkiri ma songon dia hamu sandiri mandapot manfaat ala nungnga digenapi Jahowa akka janjina na tarsurat di Bibel. Contohna nungnga didok Jesus hian pasti paradeon ni Jahowa do kebutuhanta. (Mat. 6:​32, 33) Dipapos Jesus do muse rohatta lehonon ni Jahowa do tondi parbadiana molo tapangido i sian Ibana. (Luk. 11:13) Nungnga ditepati Jahowa akka janjina i. Ditepati Jahowa do muse akka janjina na asing. Contohna marjanji do Ibana na lao manesa dosamuna, patoguhon hamu, jala mangurupi hamu asa toktong jonok tu Ibana. (Mat. 6:14; 24:45; 2 Kor. 1:3) Molo dirimangi hamu sude naung diulahon Jahowa tu hamu saleleng on, gabe lam togu ma harapanmuna tu sude na lao bahenon ni Jahowa di ari na naeng ro. Pos do rohatta pasti pasauton ni Jahowa do sude janjina. Songon na didok panurat Psalmen, “Marlas ni roha ma halak . . . na porsea tu Jahowa Debatana . . . Ibana do na toktong boi dihaporseai.”—Ps. 146:​5, 6. w22.10 27 ¶15; 28 ¶17

Marlakku dope surirang taringot ibadat na sittong i di jamanta saonari. Sian dia taboto? Mulai taon 1919, nungnga marjuta halak na dipalua sian Babel na Balga, i ma sude agama palsu. Ditogu-togu do nasida tu sada “luat” na dao undenggan sian Tano na Dijanjihon. Luat on, i ma situasi na aman na mambahen akka halak boi marale-ale tu Debata jala marsada manomba Ibana. (Jes. 51:3; 66:8) Mulai sian taon 1919, marsada do akka halak na harapanna mangolu di surgo manomba Jahowa. Dukkon i bergabung ma muse akka ‘biru-biru na asing’, i ma akka halak na harapanna mangolu di tano on. Marsada do nasida manomba Jahowa. Dipalua do nasida sian ajaran na so sittong jala massai godang do akka publikasi na mangurupi nasida marale-ale tu Jahowa. Godang do muse na diulahon nasida lao mendukung ulaon marbarita na uli. Sude do hita boi marale-ale tu Jahowa jala marsada dohot akka dongan. (Joh. 10:16; Jes. 25:6; 65:13) Saonari naposo ni Jahowa tinggal di liat portibi on, dang holan di sada inganan. Alai dang soal didia inganatta, boi do hita toktong tinggal di “luat” i molo taulahon ibadat na sittong jala tapatudu i sian pakkataion dohot pangalahotta. w22.11 11-12 ¶12-15

“Debata na toktong adong sahat tu saleleng ni lelengna do Jahowa.” (Jes. 40:28) Maol do ra diattusi hamu lapatan ni hata on. Memang godang do dang mangattusi on. I do alana didok si Elihu, “Dang taretong ganjang ni umurna.” (Job 36:26) Alai taingot ma nang pe dang taattusi taringot sada hal, dang na berarti dang tutu i adong. Misalna dang boi takkas taattusi sude taringot cahaya. Alai dang na berarti dang adong cahaya. Sarupa songon i ma, dang boi jolma botul-botul mangattusi na toktong adong saleleng ni lelengna do Jahowa i. Alai nang pe songon i faktana toktong do Jahowa i adong saleleng ni lelengna. (Rom 11:​33-36) Nungnga adong Jahowa sebelum adong mataniari, sumber ni cahaya. Jala “Ibana do na pahembangkon langit”.—Jer. 51:15. w22.12 2-3 ¶3-4

Sipata dipangido do hita mewakili na asing tikki martangiang. Contohna sahalak donganta borua, olo do dipangido martangiang tikki dohot manstudihon parsiajar Bibel ni donganta na asing. Alai molo so takkas dope ditanda ibana parsiajar Bibel i, undenggan do ra ibana martangiang dung sae marsiajar. Alana nga diboto ibana be aha na porlu ditangiakkon taringot parsiajar Bibel i. Olo do muse dipangido sahalak donganta bawa martangiang di parpunguan lao marbarita manang parpunguan di huria. Ikkon diingot donganta i do tujuan ni parpunguan i. Tikki martangiang, unang ma dipakke ibana kesempatan i lao pasingotton manang paboahon pengumuman. Alana molo di parpunguan, holan lima menit do tikki na diparade tu ende dohot tangiang. Jadi unang ma paganjanghu tangiangmuna, khususna di tangiang pamukka.—Mat. 6:7. w22.07 24 ¶17-18

Nungnga dipaboa Jesus hian saleleng ari parpudi masa ma “sahit di godang inganan”. (Luk. 21:11) Boi do gabe dame rohatta mamboto on, alana takkas do taboto ikkon masa do na didok Jesus i. Alani i taihutton ma hata ni Jesus tu akka halak na mangolu di ari parpudi na mandok, “Unang pola mabiar hamu.” Tikki masa wabah penyakit, olo do gabe maol hita mangulahon ulaon siganup ari. Alai unang ma sappe dang adong be tikkitta lao marsiajar Bibel pribadi manang ro tu parpunguan. Tatiru ma pengalaman ni akka dongan na adong di video dohot di publikasi, ala toktong do nasida setia nang pe mangadopi tantangan na sarupa. w22.12 17 ¶4, 6

Ala umholong do roha ni si Jakkob tu anakna si Josep, gabe sogo ma roha ni akka abangna tu ibana. (1 Mus. 37:​3, 4) Tikki adong kesempatan, dijual akka abangna i ma si Josep tu akka partiga-tiga na sian Midian. Diboan akka partiga-tiga i ma si Josep tu Mesir na daona marratus kilometer. Jala dijual ma muse ibana tu si Potipar, i ma kepala ni akka pengawal ni si Firaun. Hatop do muba situasi di ngolu ni si Josep. Sian anak hasian ni bapakna hian gabe hatoban di Mesir. (1 Mus. 39:1) Sipata, masa do tu hita ‘sitaonon na somal masa tu akka jolma’. (1 Kor. 10:13) Manang olo do masa sitaonon tu hita ala taihutton Jesus. Contohna, olo do diejek hita, ditentang bahkan dianiaya alani haporseaotta. (2 Tim. 3:12) Alai dang soal sitaonon aha pe na masa tu hamu, boi do Jahowa mambahen hamu marhasil. w23.01 14-15 ¶3-4

Sipata olo do tahilala porlu makkatai tu dongan na mambahen haccit rohatta. Alai denggan do jolo tapikkirhon sukkun-sukkun on: ‘Takkas do huboto sude faktana?’ (Poda 18:13) ‘Memang sengaja do ibana mambahen haccit rohakku?’ (Pjm. 7:20) ‘Hea do hubahen kesalahan na sarupa?’ (Pjm. 7:​21, 22) ‘Molo makkatai au tu ibana, gabe lam denggan do annon situasina manang gabe lam parah?’ Molo tapikkirhon sukkun-sukkun on, olo do tahilala dumenggan do mengabaihon kesalahanna i ala holong rohatta tu ibana. Hita secara pribadi boi do patuduhon na tutu hita halak Kristen na sittong. Tapatudu ma holong na rela berkorban tu akka dongan nang pe dang sempurna nasida. Molo taulahon i, gabe boi ma akka halak mananda agama na sittong jala rap dohot hita manomba Jahowa. Bertekad ma hita asa toktong patuduhon holong na gabe tanda ni halak Kristen na sittong. w23.03 31 ¶18-19

Dipaboa Bibel do tu hita sifat ni Jahowa na umbalga i ma holong. Dang dibahen Ibana godang informasi na so tahaporluhon lao manomba Ibana. On patuduhon massai holong do roha ni Jahowa tu hita. (Joh. 21:25) Tarida do holong ni Jahowa sian carana markomunikasi tu hita. Sangap do hita dibahen. Di Bibel, dang dibahen akka daftar aturan na ganjang lao mangatur aha na boi dohot na so boi taulahon di ngolutta. Alai marhite akka pengalaman, surirang, dohot nasehat na adong di Bibel, diurupi Jahowa do hita asa boi mambahen keputusan na denggan. Hasilna boi ma tergerak rohatta lao makkaholongi dohot mangoloi Ibana sian nasa rohatta. Dipaboa do di Bibel na parduli Jahowa tu hita. Boasa boi tadok songon i? Di Bibel, adong do disurat taringot akka naposo ni Jahowa. Boi do taattusi songon dia perasaan ni nasida ala “dos do pakkilalaatta” tu pakkilalaan ni nasida. (Jak. 5:17) Alai na paling penting marsiajar do hita songon dia Jahowa berurusan tu nasida. Gabe lam takkas ma taattusi Debata na ‘parholong jala parasi roha’ do Jahowa i.—Jak. 5:11. w23.02 5-6 ¶13-15

Ayat na parjolo di bukku na parpudi di Bibel mandok, “On ma pangungkapon sian Jesus Kristus. Dilehon Debata do pangungkapon on tu Jesus lao patuduhon tu akka naposona akka na lao masa satokkin nai.” (Pgk. 1:1) Alani i lomo do rohatta mamparrohahon songon dia akka na masa di portibi saonari on menggenapi surirang ni Bibel. Jala bersemangat do hita menceritahon i tu na asing. Alai tikki mambahas surirang ni Bibel ikkon manat do hita asa unang mambahen kesimpulan sandiri. Boasa? Alana dang lomo rohatta pandapotta i mambahen huria dang marsada. Bisa jadi hea do tabege akka pamimpin politik mambahas songon dia nasida boi pasaehon akka masalah, jala berupaya mambahen dame dohot aman portibi on. Unang ma taanggap pernyataan ni nasida i menggenapi surirang di 1 Tessalonik 5:3. Gariada ikkon torus do taihutton pemahaman na terbaru na diparade organisasi. Molo sesuai na tahatahon tu publikasi na diparade organisasi ni Jahowa, gabe boi ma taurupi huria asa toktong ‘sapikkiran jala sapandapot’.—1 Kor. 1:10; 4:6. w23.02 16 ¶4-5

Boasa holong rohamuna tu Jesus Kristus? Holong do roha ni Jesus tu na sittong dohot na tigor. Molo holong do rohamuna tu na sittong dohot na tigor, berarti dihaholongi hamu do tong Jesus Kristus alana barani do ibana mambela hasittongan. (Joh. 18:37) Asing ni i, dipatudu Jesus do tu akka halak na serep do rohana. Songon dia carana? Dipatudu Jesus do na serep rohana sian teladanna. Misalna sai tu Jahowa do ditujuhon ibana pujian, dang tu dirina sandiri. (Mrk. 10:​17,18; Joh. 5:19) Songon dia do perasaanmuna mamboto na massai serep do roha ni Jesus? Pasti on manggerakkon hamu lao makkaholongi Anak ni Debata i jala mangihutton Ibana. Boasa serep roha ni Jesus? Alana dihaholongi jala ditiru ibana do Bapakna Jahowa, Debata na serep roha. (Ps. 18:35; Heb. 1:3) Lomo do rohamuna jonok tu Jesus na sempurna maniru sifat ni Jahowa? w23.03 3-4 ¶6-7

Dipaboa do di Bibel adong dua kelompok ni halak na lao dipahehe di tano on jala mandapot kesempatan lao mangolu salelengna, i ma “halak na burju” dohot “halak na jahat”. “Halak na burju”, i ma akka halak na setia tu Jahowa sahat tu na mate. Molo “halak na jahat”, i ma halak na so sanga marsiajar taringot Jahowa. Ala dipahehe do dua kelompok on, boi do tadok tarsurat goar ni nasida di bukku hangoluan i? Sebelum mate akka “halak na burju”, nungnga tarsurat goar ni nasida di bukku hangoluan i. Gabe tarsesa do goar ni nasida sian bukku i tikki mate nasida? Daong, ala toktong do nasida diingot Jahowa. Bibel mandok, “Dang Debata ni na mate Ibana, alai Debata ni na mangolu do. Ai mangolu do nasida sude di adopanna.” (Luk. 20:38) Jadi tikki dipahehe nasida haduan, toktong dope tarsurat goar ni nasida di bukku i nang pe dang permanen dope i tarsurat.—Luk. 14:14. w22.09 16 ¶9-10

Lomo do roha ni Jahowa asa dinikmati jolma akka toppaanna. Tikki ditoppa Debata si Adam, dilehon do tu ibana Paradeiso na massai uli gabe tempat tinggalna. Dilehon Jahowa do tugas tu si Adam lao mangurus jala mambahen taman i lam bidang. (1 Mus. 2:​8, 9) Sada hasangapon do tugas on di si Adam! Bayakkon ma las ni roha ni si Adam tikki diida ibana tubu suan-suanan dohot akka bunga. Dipangido Jahowa do muse si Adam lao mambahen goar ni akka binatang. (1 Mus. 2:​19, 20) Sasittongna boi do Jahowa sandiri mangulahon i, alai dilehon Ibana do tugas i tu si Adam. Pasti sebelum diputusson si Adam aha goar ni binatang i, nungnga jolo manat diparrohahon ibana rupa dohot kebiasaan ni binatang i. Pasti dinikmati si Adam do tugasna on, jala gabe lam diattusi ibana ma na marbisuk do Jahowa i jala massai denggan do akka toppaanna. w23.03 15 ¶3

Digombarhon do kuasa dunia Anglo-Amerika sebagai pat ni patung na di nipi ni si Nebukadnesar. Jala on ma kuasa dunia na parpudi na dipaboa di Bibel. (Dan. 2:​31-33) Jadi dang na lao adong kuasa dunia na asing na lao manaluhon Anglo-Amerika. Alana haduan lao dihancurhon Harajaon ni Debata do i di Armagedon rap dohot sude pamarettaon na di portibi on. (Pgk. 16:​13, 14, 16; 19:​19, 20) Aha do manfaat ni surirang on tu hita? Surirang ni si Daniel on mangalehon bukti, na tutu hita mangolu di ari parpudi. Lobi sian 2.500 taon naung salpu nungnga dipaboa si Daniel hian, dung kehancuran ni Babel adong muse opat nai kuasa dunia na lao mangarajai naposo ni Debata. Jala dipaboa ibana do Anglo-Amerika ma na gabe kuasa dunia na parpudi. On paposson rohatta hancurhonon ni Harajaon ni Debata ma sude pamarettaon ni jolma satokkin nai, jala lao mamaretta ma Harajaon i di saluhut portibi on. w22.07 4 ¶9; 5 ¶11-12