Agustus

Disurat do goar ni akka halak na makkabiari jala na mamikkiri goar ni Jahowa di sada “bukku lao mangingot” nasida. On patuduhon massai penting do di Jahowa aha na tahatahon. Jala memang akka na tahatai patuduhon aha na adong di rohatta. Songon na didok Jesus, “Nasa na adong di roha, i do dihatahon pamangan.” (Mat. 12:34) Lomo do roha ni Jahowa mangolu saleleng ni lelengna akka halak na makkaholongi Ibana. Caratta makkatai berpengaruh do tu ibadatta. Boi do i mambahen las roha ni Jahowa manang mambahen sogo rohana. (Jak. 1:26) Molo halak na so mananda Jahowa mura-mura do muruk, kasar, jala sombong makkatai. (2 Tim. 3:​1-5) Dang olo hita songon nasida. Berupaya do hita manjaga pakkataionta asa las roha ni Jahowa. Alai, songon dia do molo burju jala lambok hita makkatai holan tikki marbarita na uli manang di parpunguan, hape tu anggota keluargatta kasar hita makkatai ala dang diida halak? Boi do tabahen las roha ni Jahowa?—1 Ptr. 3:7. w22.04 5 ¶4-5

Debata do na mangonjar roha ni na sappulu tanduk dohot binatang buas i lao manghancurhon Babel na Balga. Bahenon ni Jahowa ma akka bangso i mamakke binatang buas na merah songon api manang PBB, lao manghancurhon sude agama palsu saleleng ni lelengna. (Pgk. 18:​21-24) Aha do pengaruhna tu hita? Ikkon torus do taulahon ibadat “na so ramun jala na ias di jolo ni Debata”. (Jak. 1:27) Unang ma taihutton akka ajaran na so sittong. Unang ma tarayahon akka perayaan na so sesuai tu prinsip ni Bibel, jala unang ma taulahon pangalaho na so hasea dohot ulaon spiritisme sian Babel na Balga. Torus ma tapasingot akka halak asa “kaluar” sian Babel na Balga, asa unang dohot nasida mangulahon akka dosana.—Pgk. 18:4. w22.05 11 ¶17; 14 ¶18

Hamu akka natua-tua, sering ma paboa tu ianakkonmuna akka na denggan naung dilehon Jahowa tu hamu. (5 Mus. 6:6, 7) Porlu do on diulahon terutama molo dang Saksi Jahowa pasanganta, jala dang leluasa hamu mangajari gellengmuna di jabu. Donganta borua si Christine mandok, “Dang leluasa au mangajari gellengku di jabu, jadi ikkon humanfaatton do setiap kesempatan na adong.” Asing ni i, ikkon sai na denggan do dihatahon hamu taringot akka dongan sahaporseaon dohot organisasi ni Jahowa. Jala unang ma hatahon hamu na negatif taringot akka sintua. Molo sai na denggan do na dihatahon hamu, gabe olo ma gellengmuna mangido bantuan ni nasida. Bahen ma dame suasana di jabumuna. Jotjot ma patudu tu suamimuna dohot tu anakkonmuna na dihaholongi hamu nasida. Lambok ma hamu makkatai tu suamimuna, jala ajari ma anakkonmuna mangulahon na sarupa. Jadi, bahen hamu ma songon i asa dame suasana di jabumuna, jala ummura ma hamu mangajarhon taringot Jahowa tu gellengmuna.—Jak. 3:18. w22.04 18 ¶10-11

Sian surat ni Jesus tu huria na di Epesus, boi ma taida na toktong do nasida togu, sabar, jala dang menyerah nang pe mangadopi hasusaan. Alai nang pe songon i, dang songon najolo i be holong ni nasida tu Jahowa. Molo torus dipasombu nasida songon i, dang dijalo Jahowa be ibadat ni nasida. Dos songon i ma hita saonari. Denggan do memang molo torus hita togu, sabar, jala dang menyerah mangadopi akka hasusaan. Alai dang sae holan i. Na paling penting di Jahowa dang holan aha na taulahon, alai boasa taulahon i. Lomo rohana asa tasomba Ibana ala memang holong rohatta tu Ibana jala taargai sude naung dilehon Ibana tu hita. (Poda 16:2; Mrk. 12:​29, 30) Toktong ma hita dungo. Asing do masalah na diadopi huria di Sardes. Sebelumna togu do haporseaon ni nasida tu Jahowa. Alai lam leleng dang bersemangat be halak i melayani Debata. Alani i dipasingot Jesus ma nasida asa “dungo”. (Pgk. 3:​1-3) Pos do rohatta diargai Jahowa sude naung taulahon tu Ibana.—Heb. 6:10. w22.05 3 ¶6-7

Didok si Salomo kerja keras boi do mambahen sasahalak marlas ni roha, jala “silehon-lehon ni Debata” do i. (Pjm. 5:​18, 19) Tutu do hata ni si Salomo on. Ibana sahalak pekerja keras do. Godang do jabu na dibangun ibana. Godang do porlak anggurna. Adong do taman dohot akka kolam na dibahen ibana. Adong do muse kota na dipajongjong ibana. (1 Raj. 9:19; Pjm. 2:​4-6) Sude kerja kerasna i parohon las ni roha do tu si Salomo. Alai disadari si Salomo do asa boi ibana botul-botul marlas ni roha, ikkon diulahon ibana do lomo ni roha ni Debata. Alani i dipajongjong ibana do bagas joro ni Jahowa saleleng pitu taon. (1 Raj. 6:38; 9:1) Dung diulahon ibana sudena i, disimpulhon si Salomo ma na paling penting diulahon jolma, i ma melayani Jahowa. Didok si Salomo do, “On do kesimpulan sian sude na tabege i: Habiari ma Debata na sittong jala oloi ma parettana.”—Pjm. 12:13.w22.05 22 ¶8

Di Bibel, godang do dipaboa akka halak na diampuni Jahowa. Ise ma hira-hira na diingot hamu? Diingot hamu do ra Raja Manasse. Godang do akka na jahat na diulahon ibana. Disomba ibana do debata na so sittong jala dijujui ibana do halak na asing mangulahon na sarupa. Ditutung ibana do anakna gabe pelean tu debata na so sittong. Dipajongjong ibana do muse akka langgatan tu debata na so sittong di bagas joro. Bibel mandok, “Massai godang do hajahaton na dibahen si Manasse di jolo ni Jahowa na mambahen haccit rohana.” (2 Kron. 33:​2-7) Alai tikki dipatudu si Manasse na botul-botul ibana bertobat, diampuni Jahowa do ibana. (2 Kron. 33:​12, 13) Contoh na asing, i ma Raja Daud. Hea do ibana berzina jala mambunu halak na so marsala. Alai tikki diakkui si Daud dosana jala botul-botul ibana bertobat, diampuni Jahowa do ibana. (2 Sam. 12:​9, 10, 13, 14) Akka contoh on paposson rohatta na rade do Jahowa mengampuni hita. w22.06 3 ¶7

Memang dang sai mura manjaga harapan i asa toktong togu. Olo do gabe dang sabar hita paimahon Jahowa pasautton akka janjina. Alai taingot ma berbeda do cara marpikkirta sian Jahowa, ai Debata na mangolu saleleng ni lelengna do Ibana. (2 Ptr. 3:​8, 9) Pos ma rohatta bahenon ni Jahowa do na dumenggan lao pasautton janjina i, nang pe dang sai songon na taharappon. Attong songon dia do asa sabar hita paimahon Jahowa? (Jak. 5:7) Ikkon jonok do hita tu Jahowa. Alana Ibana do na lao pasautton harapanta i. Adong do hubungan ni harapan tu haporseaon. Asa adong harapanta, ikkon porsea do hita na adong Jahowa jala “na lehononna upa tu halak na marsitutu mangalului Ibana”. (Heb. 11:​1, 6) Molo lam nyata Jahowa i di hita, lam balga ma pos ni rohatta na lao pasautonna sude janjina i. Asa toktong togu harapanta i, ikkon martangiang do hita tu Jahowa jala manjaha Bibel. Nang pe dang boi taida Jahowa, boi do hita jonok tu Ibana. Boi do hita makkatai tu Ibana marhite tangiang. Pos ma rohatta lomo do rohana manangihon tangiangta i.—Jer. 29:​11, 12. w22.10 26-27 ¶11-13

Bayakkon ma jo situasi on. Hundul ma si Job di orbuk huhut marlungun ni roha. (Job 2:8) Sai didok akka donganna i ma hata na so denggan taringot si Job, asa porsea si Job dang hea diulahon ibana na denggan. Pasti borat hian do situasi ni si Job tikki i. Hira na ditipa batu na massai borat ma ibana. Hape so mago dope lungun ni rohana ala na mate i akka gellengna. Mulana dang dialusi si Job hata ni akka donganna i. (Job 2:13) Ala sai sip si Job, olo do ra dirippu halak i nungnga mago be haporseaon ni si Job tu Debata. Alai sala do halak i. Ujungna dialusi si Job ma, “Sappe mate au, toktong do au setia tu Debata!” (Job 27:5) Pasti pos situtu do roha ni si Job tikki mandok hatana on. Boasa boi songon i togu haporseaon ni si Job, hape nungnga borat hian sitaononna? Alana dang hea mago pos ni rohana tu janji ni Debata. Porsea do ibana, bahenon ni Debata parholong i do marujung hasusaanna i. Jala yakin do si Job, molo tung pe ikkon mate ibana, paheheon ni Debata do ibana.—Job 14:​13-15. w22.06 22 ¶9

Dilehon sitoppa langit dohot tano on do hadiah na massai arga tu hita. Diloas Ibana do hita martangiang tu Ibana. Pikkirhon ma on: Boi do tapaboa sude na di rohatta tu Jahowa tikki sadihari pe, jala mamakke bahasa manang aha pe. Boi do hita martangiang tikki di rumah sakit, manang tikki di penjara. Jala pos do rohatta pasti ditangihon Jahowa do tangiangta i. Mandok mauliate do hita tu Jahowa alani hadiah on. Massai arga do tangiang di si Daud jala sada hasangapon do i di ibana. Didok ibana tu Jahowa, “Sai anggiat ma tangiakku gabe dos songon dupa na diparade di jolom.” (Ps. 141:​1, 2) Di jaman ni si Daud, dipakke do dupa gabe pelean tu Jahowa, jala denggan do i diparade akka malim. (2 Mus. 30:​34, 35) Sian hata ni si Daud on, taboto ma jolo dipikkiri ibana do aha na lao tangiakkononna tu Jahowa, asa songon dupa tangiangna i. Hita pe songon i ma nian. Denggan ma taparade tangiangta asa las roha ni Jahowa. w22.07 20 ¶1-2; 21 ¶4

Hak ni Jahowa do mambalos sasahalak. Dang diloas Jahowa hita mambalos halak na marsala tu hita. (Rom 12:​20, 21) Ala dang sempurna jala terbatas sudut pandangta, dang boi torus denggan caratta menangani situasi songon Jahowa. (Heb. 4:13) Jala sipata olo do holan mangihutton perasaan hita tikki mambahen keputusan. Asing ni i didok do di Bibel molo “halak na tarrimas dang diulahon i na sittong di jolo ni Debata”. (Jak. 1:20) Jadi pos ma rohatta pasti sittong jala adil do cara ni Jahowa menangani setiap situasi. Molo taampuni na asing, berarti na porsea do hita tu keadilan ni Jahowa. Molo tapasahat parsoalanta i tu Jahowa, on patuduhon na pos do rohatta apusan ni Jahowa do sude hasusaan na tahilala alani dosa. Nungnga marjanji Jahowa molo di tano na imbaru “dang ingoton be” akka na haccit na tahilala saonari, “jala dang tarsunggul be i di bagasan roha”.—Jes. 65:17. w22.06 10-11 ¶11-12

Nang pe ditentang hita, las ma rohatta ala nungnga taulahon lomo ni roha ni Jahowa. (Mat. 5:​11, 12) Sibolis do na mempengaruhi akka halak asa menentang hita. Alai taingot ma, dao do umgogo Jesus sian Sibolis. Pos ma rohatta molo didukung Jesus hita, pasti sahat do barita na uli i tu saluhut bangso. Adong dope tantangan na asing na taadopi. Ikkon dibaritahon do barita na uli on tu godang bahasa. Alai songon parnidaan na dilehon Jesus tu Apostel Johannes, boi do diatasi tantangan on. (Pgk. 14:​6, 7) Aha buktina? Nungnga dibahen situs webta jw.org tu lobi sian 1.000 bahasa. Disi boi ma akka halak manjaha godang publikasi na marisi barita na uli taringot tu Harajaon i. Jala bukku Mangolu Saleleng ni Lelengna pe nungnga diterjemahon tu lobi sian 700 bahasa. Bukku on do tapakke saonari lao mangurupi akka halak marsiajar Bibel. w22.07 9 ¶6-7

Asi do roha ni Jesus tu akka halak. Apostel Mateus mandok, “Diida Jesus ma godang halak marpungu jala asi ma rohana mangida nasida. Ai disusai do nasida jala dang disarihon, dos songon biru-biru na so adong parmahanna.” (Mat. 9:36) Molo Jahowa songon dia? Didok Jesus, “Dang lomo roha ni Damang na di banua ginjang i mago apala sada pe sian na metmet on.” (Mat. 18:14) Sian on taboto ma, massai holong do roha ni Jahowa tu hita. Jadi molo tatanda Jesus lam holong ma rohatta tu Jahowa. Cara na asing asa lam balga holongmuna tu Jahowa jala boi hamu mambahen kemajuan rohani, bergaul ma dohot akka dongan na matang di huria. Marlas ni roha do nasida melayani Jahowa jala dang hea disolsoli nasida keputusanna i. Alani i, pangido ma asa diceritahon nasida pengalamanna saleleng melayani Jahowa. Jala sukkun ma pandapot ni nasida tikki naeng mambahen keputusan na penting. Alana “molo godang na mamodai, boi do gabe marhasil” rencanamuna i. w22.08 3 ¶6-7

Sude do hita manaon hasusaatta be. Alai unang ma hita merasa holan sahalakta mangadopi i. Taingot ma Bapak na parholong do Jahowa i, na sai toktong mamparrohahon hita. Torus do Ibana jonok tu hita, lomo do rohana manangihon tangiangta jala mangurupi hita. (Jes. 43:2) Jadi pos ma rohatta sai urupanna do hita asa sanggup manaon hasusaatta i. Diloas do hita martangiang tu Ibana. Dilehon do Bibel, diparade organisasi do godang publikasi dohot video, jala adong akka dongan na toktong makkaholongi hita. Mandok mauliate do hita tu Jahowa ala sai diparrohahon hita. ‘Marlas ni roha do hita alani Ibana.’ (Ps. 33:21) Molo tamanfaatton akka na diparade Jahowa lao mangurupi hita, on patuduhon na taargai do holong ni Jahowa. Ikkon taulahon ma muse bagianta asa toktong hita dijaga Debata. Molo torus hita berupaya mangoloi Jahowa jala mangulahon na sittong di jolona, jagaonna do hita salelengna! w22.08 13 ¶15-16

Godang halak saonari dang mamboto ise do halak na boi dihaporseai nasida. Dang pos be roha ni nasida na botul-botul parduli akka pamimpin politik, akka ilmuwan, dohot parbisnis tu nasida. Asing ni i, kecewa do nasida tu akka pamimpin gareja na mangakku mangihutton Bibel. Alani i, dang heran be hita gabe godang halak saonari dang porsea be tu Bibel. Sude do naposo ni Jahowa porsea molo Jahowa “Debata na makkatahon na sittong” jala lomo do rohana mangalehon na terbaik tu hita. (Ps. 31:5; Jes. 48:17) Boi do hita porsea tu na tajaha di Bibel. Setuju do hita tu hata ni sahalak pakar ni Bibel na manurat, “Dang adong Hata ni Debata na sala, jala pasti saut do i. Ala porsea do naposona tu Debata, gabe porsea ma nasida tu hatana.” w23.01 2 ¶1-2

Molo taurupi akka dongan asa toktong marhaporseaon tu Jahowa, na patoguhon nasida do hita disi. Adong do na mandapot tantangan sian akka halak na so Saksi. Adong muse na marsahit na parah manang ikkon berjuang melawan perasaan negatif. Asing ni i, adong do donganta naung leleng tarpaima tu ari ni Jahowa. Akka situasi on boi do manguji haporseaon ni nasida tu Jahowa. Songon i do na dihilala halak Kristen di abad na parjolo. Songon dia ma si Paulus patoguhon nasida? Dipakke Apostel Paulus do Hata ni Debata lao patoguhon haporseaon ni akka donganna. Di tikki i adong do piga-piga halak Jahudi naung gabe halak Kristen, alai dang malo dope mambela haporseaonna di jolo ni keluargana na so sahaporseaon. Didok keluargana i, undenggan do agama Jahudi sian agama Kristen. Jadi marhite suratna tu halak Heber, diurupi si Paulus ma nasida asa boi patoguhon haporseaonna. (Heb. 1:​5, 6; 2:​2, 3; 9:​24, 25) Penjelasan ni si Paulus na masuk akkal di suratna i mangurupi nasida asa denggan mangalusi keluargana na menentang i. w22.08 23-24 ¶12-14

Saonari maol do akka halak porsea tu na asing. Alana jotjot do nasida dikecewahon akka pengusaha, tokoh politik, manang pamimpin agama. Maol do nasida porsea tu donganna, tetanggana, bahkan tu keluargana sandiri. Alai dang pola heran hita disi. Alana nungnga didok Bibel hian akka jolma ‘di ari parpudi dang setia, paroa-roahon donganna, jala mangulahon na jahat tu donganna’. Pangalaho ni nasida na jahat i patuduhon Sibolis do na ditiru nasida, i ma debata ni portibi on na so boi dihaporseai. (2 Tim. 3:​1-4; 2 Kor. 4:4) Hita halak Kristen porsea do tu Debata Jahowa. Pos do rohatta na holong rohana tu hita jala dang lao tadikkononna hita. (Ps. 9:10) Porsea do hita muse tu Jesus Kristus ala rade ibana mate lao manobus hita. (1 Ptr. 3:18) Porsea do hita tu Bibel ala nungnga tarasahon manfaatna di ngolutta.—2 Tim. 3:​16, 17. w22.09 2 ¶1-2

Las ni roha na sasittongna i dang parsatokkinan, alai boi do tahilala i saleleng ni ngolutta. Songon dia carana? Di Jamita na di Dolok didok Jesus do, “Marlas ni roha ma na mamboto rikkot ni marale-ale tu Debata.” (Mat. 5:3) Diboto Jesus do tikki ditoppa jolma, dilehon do tu nasida keinginan lao mananda jala manomba Jahowa na manoppa nasida. Asing ni i, Debata na marlas ni roha do Jahowa. Berarti sude halak na melayani Ibana boi do tong marlas ni roha. (1 Tim. 1:11) Dang ikkon jolo denggan situasi ni sasahalak asa boi ibana marlas ni roha. Di Jamita na di Dolok, didok Jesus boi do marlas ni roha halak “na marsak”. Didok Jesus do muse, “halak na manaon na haccit alani hasittongan” pe, boi do marlas ni roha. (Mat. 5:​4, 10, 11) Sian hata ni Jesus i, taboto ma las ni roha na sasittongna dang bergantung tu situasitta. Alai las ni roha i bergantung tu hubungatta dohot Jahowa.—Jak. 4:8. w22.10 6 ¶1-3

Molo marbisuk sasahalak diboto ibana do “adong do tikkina hohom, adong do tikkina makkatai”. (Pjm. 3:7) Sipata dumenggan do hohom sian apala makkatai. Adong do sahalak sintua na berpengalaman na jotjot dipangido lao mangurupi huria na asing pasaehon masalah. Donganna sintua mandok, “Sai manat do donganta i, asa unang sappe paboa-boahon informasi rahasia taringot huria na asing.” Ala marbisuk do donganta sintua i, gabe diargai akka donganna sintua ma ibana. Pos do roha ni nasida dang mungkin dipaboa-boa donganta i informasi rahasia di huria ni nasida tu na asing. Asa boi gabe halak na dihaporseai, ikkon jujur do hita. Pos do rohatta tu halak na jujur ala taboto sai na sittong do dihatahon ibana.—Eps. 4:25; Heb. 13:18. w22.09 12 ¶14-15

Godang do halak saonari dang olo mambege bisuk “na joujou di dalan”. (Poda 1:20) Bibel mandok adong tolu kelompok na so olo manangihon bisuk, i ma “akka na so marpengalaman”, “akka pangarehei”, dohot “akka na oto”. (Poda 1:​22-25) Halak “na so marpengalaman”, i ma halak na porsea tu sude na dibegena jala mura dioto-otoi. (Poda 14:15) Godang do halak saonari na ditipu akka pamimpin agama dohot akka pamimpin politik. Tarsonggot do ra nasida tikki mamboto dioto-otoi akka pamimpin i nasida. Alai halak “na so marpengalaman” na dipaboa di Poda 1:22 i dang olo muba, ai lomo do roha ni nasida tu sudena i. (Jer. 5:31) Dang olo nasida mangalului aha na didok Bibel jala mangulahon i di ngoluna. Alai dang olo hita maniru nasida. Ai sengaja do nasida manolak bisuk ni Jahowa.—Poda 1:32; 27:12. w22.10 19-20 ¶5-7

Dilehon organisasi do petunjuk tu hita asa toktong aman. Jotjot do hita dipaingot asa mangalehon nomor teleponta na terbaru dohot informasi na asing asa boi hita dihubungi akka sintua tikki masa situasi darurat. Bisa jadi dilehon do tu hita petunjuk asa toktong di jabu manang ikkon evakuasi tikki masa bencana. Adong do ra petunjuk taringot songon dia carana mandapot kebutuhan dasar, manang songon dia carana hita boi mangurupi na asing. Molo dang unduk hita tu akka petunjuk i, gabe parohon bahaya ma i tu ngolutta dohot tu akka sintua na manjaga hita. (Heb. 13:17) Godang do akka dongan na ikkon mangungsi alani bencana alam manang kerusuhan. Alai nang pe songon i, marhasil do nasida menyesuaihon diri tu situasi na baru jala boi muse marbarita na uli. Torus do nasida mambaritahon “barita na uli taringot tu hata ni Debata”, songon halak Kristen di abad na parjolo na marserak alani penganiayaan. (Ul. 8:4) Ulaon marbarita na uli mangurupi nasida fokus tu Harajaon ni Debata, dang tu hasusaan ni nasida. Hasilna gabe boi ma nasida toktong marlas ni roha jala merasa dame. w22.12 19 ¶12-13

Diargai Jahowa do hita secara pribadi. Andorang so disuru Jesus akka siseanna marbarita, diurupi Jesus do nasida asa unang mabiar tu paraloan. (Mat. 10:​29-31) Ditaringoti Jesus do sada pidong na ditanda halak Israel, i ma amporik. Mura do arga ni pidong i di tikki i. Alai didok ibana do tu akka siseanna, “Dang adong nanggo sada pe sian i na madabu tu tano na so diboto Amamuna.” Didok Jesus do muse, “Ummarga do hamu sian godang amporik.” Dipapos Jesus do roha ni akka siseanna na diargai Jahowa do nasida secara pribadi. Jadi dang porlu mabiar nasida tu penganiayaan. Pasti diingot akka sisean i do hata ni Jesus i tikki diida nasida akka amporik saleleng marbarita nasida di akka kota dohot huta. Dos songon i ma tikki diida hamu pidong na gelleng, ingot ma diargai Jahowa do hamu secara pribadi. Alana “ummarga do hamu sian godang amporik”. Marhite pangurupion ni Jahowa, boi do hamu marhasil mangadopi paraloan. w23.03 18 ¶12

Adong do sian hita na ditentang keluarga manang susa mangalului hepeng. Molo leleng hita manaon hasusaan, bisa jadi hita merasa dang adong be harapanta jala gabe mandele. Dipakke Sibolis do akka hasusaatta i mambahen hita marpikkir dang holong be roha ni Jahowa tu hita. Lomo do muse roha ni Sibolis asa ro tu pikkiranta ala melayani Jahowa jala bergabung tu organisasina do hita makana susa. Songon i do tong na masa tu halak Israel tikki di Mesir. Mulana, porsea do halak i Jahowa do na mamillit si Musa dohot si Aron lao paluahon nasida. (2 Mus. 4:​29-31) Alai tikki dibahen si Firaun nasida lam susa, gabe disalahon nasida ma si Musa dohot si Aron. (2 Mus. 5:​19, 20) Gabe disalahon nasida ma akka wakil ni Jahowa i. Jadi molo tung pe leleng hamu manaon hasusaan, paboa ma sude na adong di rohamuna tu Jahowa tikki martangiang jala pangido ma bantuanna. w22.11 15 ¶5-6

Sian Jahowa do ro hangoluan, jadi sanggup do Ibana pahehehon halak na mate. Contohna, dilehon Jahowa do huaso tu Panurirang Elia lao pahehehon anak ni ina na mabalu di Sarpat. (1 Raj. 17:​21-23) Asing ni i, dilehon Jahowa do huaso tu Panurirang Elisa lao pahehehon anak ni borua Sunem. (2 Raj. 4:​18-20, 34-37) Akka contoh on dohot contoh na asing mambuktihon sanggup do Jahowa pahehehon halak na mate. Tikki di tano on Jesus, dipatudu ibana do na sian Bapakna dapotna huaso lao pahehehon halak naung mate. (Joh. 11:​23-25, 43, 44) Saonari nga di surgo be Jesus jala nungnga dilehon tu ibana “saluhut huaso na di banua ginjang dohot na di tano on”. Alani i, boi ma ibana pasautton janji ni Jahowa lao pahehehon “saluhut na di kuburan” jala mangalehon hangoluan na saleleng ni lelengna tu nasida.—Mat. 28:18; Joh. 5:​26-29. w22.12 5 ¶10

Tikki ditolak halak Israel si Hesekiel, sasittongna na manolak Jahowa do nasida disi. Ayat harian sadari on ma na mambahen pos roha ni si Hesekiel, nang pe ditolak ibana dang na berarti gagal ibana mangulahon tugasna. Didok Jahowa do tu si Hesekiel molo dung masa annon panguhuman na dipaboa si Hesekiel i, botoon ni nasida ma “na adong panurirang di tonga-tonga ni nasida”. (Hes. 2:5; 33:33) Hasilna gabe barani jala margogo ma si Hesekiel mangulahon tugasna. Boi do hita gabe barani ala taboto Jahowa do na manuru hita marbarita. Didok Ibana do hita ‘saksina’. (Jes. 43:10) Sada hasangapon do on di hita. Najolo didok Jahowa do tu si Hesekiel, “Unang mabiar ho.” Songon i do tong didok Jahowa tu hita, “Unang pola busisaon hamu.” (Hes. 2:6) Boasa dang porlu hita mabiar tu akka penentang? Ala Jahowa do na manuru hita, jala dukungonna do hita songon si Hesekiel.—Jes. 44:8. w22.11 3 ¶4-5

Mandok mauliate do hita tu Jahowa ala adong akka sintua dohot akka parhobas di huria na boi tahaporseai jala denggan manjaga hita. Attong songon dia do hita mambuktihon na boi hita dihaporseai? Holong do rohatta tu dongan sahaporseaon. Lomo do rohatta mamboto songon dia keadaan ni nasida. Alai ikkon manat do hita asa unang sappe tacampuri na so urusatta. Adong do piga-piga halak Kristen di abad na parjolo na lomo rohana “pahata-hata halak, mangattoi na so urusanna, jala mangattoi na so ulaonna”. (1 Tim. 5:13) Pasti dang lomo rohatta songon nasida. Alai boha ma molo adong sahalak donganta na paboahon masalah pribadina tu hita? Contohna dipaboa tu hita masalah kesehatanna manang masalah na asing. Dipangido ibana ma tu hita asa unang tapaboa i tu halak na asing. Ikkon taargai do pangidoan ni donganta i. w22.09 10 ¶7-8

Hata Junani ‘paubahon pikkiran’ boi do diterjemahon gabe “paturehon pikkiran”. Songon sasahalak na paturehon jabu, dang sae holan mendekorasi jabu i asa bagak. Alai ikkon dipadenggan ibana do molo adong na sega. Suang songon i ma, asa boi tapauba pikkiranta, ikkon torus do tapareso diritta jala tabahen perubahan na porlu asa sesuai pangalahotta tu standar ni Jahowa. Ikkon torus do hita mangulahon i, dang sae holan sahali. Molo nungnga sempurna hita, boi do torus tabahen las roha ni Jahowa. Alai saonari ikkon berupaya keras dope hita mambahen las roha ni Jahowa. Parrohahon ma na disurat di Rom 12:2. Didok si Paulus, porlu do tapauba pikkiranta asa taboto aha do na dihalomohon Debata sian hita. Unang ma tapaloas portibi on mempengaruhi cara marpikkirta. Alani i tapastihon ma cara marpikkir ni Debata do na manogu-nogu hita tikki mambahen keputusan manang cita-cita, dang cara marpikkir ni portibi on. w23.01 8-9 ¶3-4

Sai dilindungi Jahowa do hita sian sude hasusaan na taadopi? Sai campur tangan do Jahowa di sude na masa di ngolutta? Daong. Dang songon i dipaboa di Bibel. (Pjm. 8:9; 9:11) Alai taingot ma tikki taadopi hasusaan, diparrohahon Jahowa do hita jala ditangihon Ibana do tangiangta. (Ps. 34:15; Jes. 59:1) Boi do diurupi Jahowa hita asa martahan mangadopi hasusaatta. Songon dia carana? Sada cara ni Jahowa mangurupi hita, i ma dipatogu jala diapuli do hita di tikki na pas. (2 Kor. 1:​3, 4) Boi do diingot hamu songon dia Jahowa mangapuli jala patoguhon hamu di tikki na pas? Jotjot do dang tasadari na diurupi Jahowa hita manaon sitaonon na masa tu hita. w23.01 17-18 ¶13-15

Hampir sarupa do ciri-ciri ni binatang i tu binatang buas na pitu uluna. Alai bedana, on warna merah. Digoari do ibana “patung ni binatang buas” jala on ma “raja na paualuhon”. (Pgk. 13:​14, 15; 17:​3, 8) Didok do “raja” i hea adong, dung i dang adong be, alai naeng ro muse. Cocok do on manggombarhon Perserikatan Bangsa-Bangsa (PBB), i ma organisasi na mendukung kerja sama politik di liat portibi on. Mulana digoari do organisasi on Liga Bangsa-Bangsa. Alai bubar do i saleleng Porang Dunia II. Dung i muncul ma i muse jala digoari Perserikatan Bangsa-Bangsa. Dipengaruhi binatang buas manang kuasa politik i do akka halak asa mangalo tu Jahowa jala menyerang akka naposona. Didok si Johannes dipapungu nasida do “akka raja na di tano on” tu porang Armagedon, i ma “ari ni Debata Pargogo na So Hatudosan i”.—Pgk. 16:​13, 14, 16. w22.05 10 ¶10-11

Tikki boi Jesus manjahahon Surat na Badia di sinagoga, gabe takkas ma diattusi Jesus Surat na Badia. Massai holong do rohana tu Hata ni Debata jala diulahon ibana do i di ngoluna. Misalna, taingot dope tikki Jesus marumur 12 taon di bagas joro. Longang do akka guru agama na mamboto Patik ni si Musa mambege hatana i, “ai massai godang do na diboto ibana jala massai marbisuk do ibana mangalusi”. (Luk. 2:​46, 47, 52) Hita pe boi do mangattusi jala makkaholongi Hata ni Debata molo taratur hita manjaha i. Marsiajar ma hita sian aha na didok Jesus tu siboto patik, halak Parise, dohot halak Saduse. Jotjot do akka pamimpin agama i manjaha Surat na Badia, alai dang dapot ni nasida manfaat sian na dijahana i. Dipaboa Jesus do tolu cara na seharusna diulahon nasida. Di artikel on, tabahas ma songon dia hata ni Jesus i mangurupi hita asa (1) mangattusi na tajaha, (2) mandapot arta na arga, dohot (3) paloasson Hata ni Debata membentuk cara marpikkirta. w23.02 8-9 ¶2-3

Akka bahaya na ikkon tahindari termasuk ma i menggoda lawan jenis, kecanduan minuman beralkohol, dirajai sipanganon na berlebihan, mandokkon hata na mambahen haccit roha, manonton hiburan na marisi kekerasan dohot pornografi, manang na asing. (Ps. 101:3) Sai berupaya do Sibolis mangalului kesempatan lao manegai hubungatta tu Jahowa. (1 Ptr. 5:8) Molo dang manat hita, gabe disuanton Sibolis do tu roha dohot pikkiranta akka sifat na so denggan, songon mangiburu, dang jujur, tamak, sogo ni roha, ginjang ni roha, dohot dendam. (Gal. 5:​19-21) Molo dang pittor tabolokkon i, boi do i hatop tubu di rohatta songon tanaman na marraccun jala parohon jea ma i tu hita. (Jak. 1:​14, 15) Sada contoh bahaya na agak maol tatanda, i ma pergaulan na so denggan. Alai taingot ma balga hian do pengaruh ni halak na jotjot rappak dohot hita. (1 Kor. 15:33) Alani i taparrohahon ma diritta. Tatolak ma pergaulan na so denggan khususna tu akka halak na so mangulahon standar ni Jahowa. (Luk. 21:34; 2 Kor. 6:15) Hasilna boi ma taboto bahaya jala tahindari ma i. w23.02 16 ¶7; 17 ¶10-11

Lam godang na taparsiajari taringot Jahowa, lam holong ma rohatta tu Ibana. Tottu lomo do rohamuna lam jonok tu Ibana saonari ro di salelengna. Jala boi do diulahon hamu i. Dijujui Jahowa do hamu asa mambahen las rohana. (Poda 23:​15, 16) Mambahen las roha ni Jahowa, i ma keputusan na terbaik na boi dibahen hamu di ngolumuna. Boi do dipatudu hamu i dang holan sian pakkataion alai dohot sian parniulaonmuna. Sian parngoluonmuna tarida ma na botul-botul do hamu makkaholongi Jahowa. Songon dia do hamu boi patuduhon holong tu Jahowa? Parjolo, lehon hamu ma dirimuna holan tu Jahowa, Debata na sittong marhite tangiang. (Ps. 40:8) Dung i, tardidi ma hamu lao patuduhon tu akka halak naung dilehon hamu dirimuna tu Jahowa. Gabe ari na istimewa do ari pandidion i jala parohon las ni roha. Mulai sian i Jahowa ma na uppetting di ngolumuna, dang dirimuna sandiri be. (Rom 14:8; 1 Ptr. 4:​1, 2) Memang keputusan na massai balga do on na ikkon dibahen hamu. Alai molo tardidi hamu boi ma dihilala hamu ngolu na dumenggan. w23.03 5-6 ¶14-15