September

Molo denggan caratta makkatai boi ma diboto halak hita sisomba Jahowa. Jadi gabe boi ma takkas diida nasida “imbar ni halak na manomba Debata dohot halak na so manomba Ibana”. (Mal. 3:18) Taida ma jo saonari pengalaman ni donganta si Karen. Hea do ibana makkarejohon tugas kelompok dohot akka donganna sakalas. Adong ma sada donganna i mangida, beda do si Karen on sian akka donganna na asing. Dang olo ibana paroa-roahon halak, lambok, jala sopan do ibana makkatai. Jadi gabe tertarik ma donganna i naeng marsiajar Bibel tu si Karen. Molo sai tajaga caratta makkatai, bisa jadi gabe olo do halak marsiajar Bibel. Jala pasti las do roha ni Jahowa mangida i. Pasti las rohatta sude pasangappon Jahowa marhite caratta makkatai. w22.04 5-6 ¶5-7

Dipalua Jesus do si Maria Magdalena sian akka suru-suruan na jahat! Gabe olo ma si Maria mangihutton Jesus jala mendukung pelayananna. (Luk. 8:​1-3) Nang pe diargai si Maria sude na dibahen Jesus tu ibana, alai tikki i dang diboto ibana adong dope ulaon na umbalga na lao bahenon ni Jesus di ari na naeng ro. Lao dilehon Jesus do ngoluna asa “ganup na patuduhon haporseaon tu ibana” mandapot hangoluan saleleng ni lelengna. (Joh. 3:16) Nang pe dang diboto si Maria dope i, alai dipatudu ibana do pangargaion tu Jesus jala toktong setia. Tikki dipakkuhon Jesus di hau partinaonan, jongjong do si Maria di labbungna lao patuduhon na parduli do ibana tu Jesus jala lomo rohana patoguhon akka dongan na disi. (Joh. 19:25) Dung mate Jesus, lao ma si Maria dohot dua borua na asing mamboan rempah-rempah tu kuburan ni Jesus. (Mrk. 16:​1, 2) Dipasu-pasu do si Maria. Boi ma ibana pajuppang dohot Jesus naung dipahehe jala makkatai tu ibana. Sada hasangapon do on di ibana, alana dang sude sisean ni Jesus na boi mandapot kesempatan i.—Joh. 20:​11-18. w23.01 27 ¶4

Unang ma merasa nga cukkup be na taulahon najolo i lao melayani Jahowa. Nang pe terbatas na boi talehon saonari, ikkon torus do hita sibuk “mangulahon godang ulaon ni Tuhan i”. Jala toktong ma hita dungo sahat tu ujungna. (1 Kor. 15:58; Mat. 24:13; Mrk. 13:33) Ikkon semangat ma hita jala tasomba Jahowa sian nasa rohatta. Dipaboa Jesus do masalah na diadopi huria na di Laodikea. Didok do nasida “dang haru las manang dang haru ngali”. Alani i didok Jesus ma nasida halak ‘na susa jala na dangol’. Ikkon muba do nasida jala semangat muse melayani Jahowa. (Pgk. 3:​16, 17, 19) Aha ma parsiajaranna tu hita? Molo tahilala dang semangat be hita melayani Jahowa, taingot ma muse akka na denggan naung dilehon Jahowa dohot organisasina tu hita. (Pgk. 3:18) Unang ma fokus hita mangalului hamoraon ala didok rohatta hamoraon i boi mambahen nyaman ngolutta. Alai tabahen ma melayani Jahowa na uppetting di ngolutta. w22.05 3-4 ¶7-8

Saleleng marribu taon disurat Jahowa do goar ni akka naposona di sada bukku. Mulai ma i sian naposona na setia, i ma si Abel. (Luk. 11:​50, 51) Dung jaman ni si Abel, lam godang ma goar na tarsurat di bukku i. Jala saonari nungnga adong marjuta goar na tarsurat disi. Molo di Bibel digoari ma bukku i, “bukku hangoluan”. (Mal. 3:16; Pgk. 3:5; 17:8) Bukku on marisi goar ni akka halak na toktong manomba Jahowa jala pasangappon goarna. Dilehon do tu nasida kesempatan lao mangolu saleleng ni lelengna. Boi do tarsurat goarta di bukku hangoluan i molo togu hubungatta tu Jahowa, jala porsea hita tu tobusan ni Jesus Kristus. (Joh. 3:​16, 36) Pasti lomo do rohatta asa tarsurat goarta di bukku i, dang soal harapanta naeng mangolu tu surgo manang di tano on. w22.09 14 ¶1-2

Di bukku Pangungkapon dipaboa do muse taringot “sada naga na balga, merah do naga i songon api”. (Pgk. 12:3) Dialo naga i do Jesus dohot akka suru-suruanna. (Pgk. 12:​7-9) Diserang ibana do muse akka naposo ni Jahowa jala dilehon do huaso tu ‘binatang buas na pitu uluna’. (Pgk. 12:17; 13:4) Ise do naga i? “Ibana do ulok na parjolo i, na laos margoar Sibolis dohot Setan.” (Pgk. 12:9; 20:2) Ibana do na mangendalihon sude musu ni Jahowa. Aha do na lao masa tu naga i? Didok di Pangungkapon 20:​1-3 adong ma sada suru-suruan na manappatton Sibolis tu lombang na massai bagas. Saleleng disi Sibolis, ‘dang boi be dililuhon ibana akka bangso sahat tu na marujung 1.000 taon i’. Dung i, disappatton ma ibana dohot akka suru-suruan na jahat tu “laut api na mardongan belerang”. Lapatanna lao dihancurhon ma nasida saleleng ni lelengna. Bayakkon ma keadaan ni tano on tikki dang adong be Sibolis dohot suru-suruan na jahat. Pasti luar biasa do i! w22.05 14 ¶19-20

Sahalak pekerja keras do Jesus. Tikki di tano on, ditanda do ibana sahalak tukkang hau. (Mrk. 6:3) Pasti las do roha ni natua-tuana ala diurupi Jesus nasida paradehon akka na porlu di keluargana. Ala sempurna do ibana pasti lomo do roha ni halak tu hasil kerja ni Jesus. Jala Jesus pe dinikmati do karejona i. Alai nang pe songon i, sai dipastihon ibana do adong tikkina lao manomba Jahowa. (Joh. 7:15) Di pudian ni ari dung gabe sahalak parbarita na uli ibana, hea do didokkon ibana, “Unang ma karejo hamu lao mangalului sipanganon na olo busuk. Alai karejo ma hamu lao mangalului sipanganon na so olo busuk na parohon hangoluan saleleng ni lelengna.” (Joh. 6:27) Jala tikki dipasahat ibana Jamita na di Dolok didok ibana do, “Papungu-pungu ma arta di banua ginjang.” (Mat. 6:20) Bisuk na sian Jahowa boi do mangurupi hita asa seimbang mangida parkarejoanta. Hita halak Kristen, ikkon “ringgas” jala denggan mangulahon karejotta. w22.05 22 ¶9-10

Gabe teladan do si Eunike tu si Timoteus. Sian teladan ni omakna, boi do diida si Timoteus na massai holong rohana tu Jahowa. Takkas do diida ibana, las roha ni omakna ala melayani Jahowa. Saonari pe, godang do donganta borua na marhasil mangurupi keluargana manomba Jahowa ‘so pola didok nasida manang aha’. (1 Ptr. 3:​1, 2) Hamu pe boi do songon i. Songon dia carana? Utamahon ma hubunganmuna tu Jahowa. (5 Mus. 6:​5, 6) Pasti godang do pengorbanan na dibahen hamu lao mangurus gellengmuna. Godang do habis tikki, hepeng, waktu istirahatmuna, dohot na asing lao mangulahon i. Alai unang ma alani sibukna, sappe so adong be tikkimuna lao patoguhon hubunganmuna tu Jahowa. Bahen hamu ma jadwal asa boi hamu taratur martangiang secara pribadi, belajar pribadi, dohot marpungu. Molo dibahen hamu songon i, lam jonok ma hamu tu Jahowa. Jala gabe teladan ma hamu tu keluargamuna dohot tu akka dongan na asing. w22.04 16 ¶1; 19 ¶12-13

Las do rohatta mamboto dang dilehon Jahowa tu hita tanggung jawab lao mamutusson songon dia sasahalak ikkon diadili. Jahowa do Hakim ni Saluhutna, jadi Ibana do na marhak mangadili. (Rom 14:​10-12) Pos ma rohatta sai bahenon ni Jahowa do na adil, alana takkas do diboto Ibana dia na sittong dohot na sala. (1 Mus. 18:25) Dang mungkin bahenon ni Jahowa na so sittong! Tarpaima do hita salpuhonon ni Jahowa haduan sude akibat na tahilala alani dosa. Di tikki i sehat ma hita sude, sempurna, jala dang tahilala be na haccit. (Ps. 72:​12-14; Pgk. 21:​3, 4) Bahkan dang taingot be akka na mambahen lungun rohatta. Alai sambil paimahon i, taargai ma kesanggupan na dilehon Jahowa tu hita lao mengampuni na asing. w22.06 13 ¶18-19

Sahalak hakim ikkon takkas do mamboto hukum. Ikkon takkas do diboto ibana sude fakta ni sada kasus andorang so mambahen keputusan. Alani on ma tong Jahowa gabe Hakim na terbaik, ai takkas do diboto Ibana sude fakta ni sada kasus, dang songon akka hakim na di portibi on. (1 Mus. 18:​20, 21; Ps. 90:8) Cara ni Jahowa mangida sasahalak dang songon cara ni jolma. Alana diboto Jahowa do songon dia isi ni roha ni sasahalak. Diida Ibana do songon dia perasaanna, akka sifat na diwarisi sian natua-tuana, latar belakang pendidikanna, didia ibana tinggal, jala songon dia kesehatan mentalna. Jadi takkas do diboto Jahowa alasan di balik tindakan ni sasahalak. Dang buni sudena i sian jolo ni Jahowa. (Heb. 4:13) Alani i, diampuni Jahowa pe sasahalak ala nungnga takkas do diboto Ibana sude faktana. w22.06 4 ¶8-9

Sarupa do cara na dipakke Sibolis tu si Job dohot tu hita saonari. Jadi ikkon manat do hita. Didok Sibolis dang tahaholongi Jahowa sian ias ni rohatta, jala pasti tatinggalhon do Ibana molo terancam ngolutta. Didok Sibolis do muse, dang dihaholongi Jahowa hita jala dang diargai Ibana upayatta lao mambahen las rohana. Nang pe songon i, nungnga taboto rencana ni Sibolis tu hita. Jadi unang ma porsea hita tu gabusna i. Hasusaan na taadopi boi do gabe kesempatan lao mamareso diritta. Hasusaan na masa tu si Job, mangurupi ibana mamboto kelemahanna jala songon dia carana padenggatton i. Misalna gabe diboto si Job ma na porlu dope ibana asa lam marserep ni roha. (Job 42:3) Songon i ma hita. Taanggap ma hasusaatta i gabe kesempatan lao mamareso diritta. Molo nungnga taboto aha kelemahanta, berupaya ma hita padenggatton i. w22.06 23 ¶13-14

Marjanji do Jahowa mendukung hita. Sebelum didok Jahowa, “Hamu do akka saksikku,” didok Ibana do, “Tikki ditaripari ho laut, donganakku do ho, tikki ditaripari ho sunge, dang maup ho bahenon ni aekna. Tikki dibolus ho api, dang mosok ho bahenonna, jala dang matutung ho dibahen apina na marsigorgor.” (Jes. 43:2) Tikki marbarita na uli hita, olo do taadopi tantangan na songon banjir manang songon api. Nang pe songon i, sai diurupi Jahowa do hita asa toktong marbarita na uli. (Jes. 41:13) Saonari pe godang do halak na manolak barita na tapasahat. Alai taingot ma, molo ditolak pe hita dang na berarti gagal hita gabe Saksi Jahowa. Dipatogu do hita mamboto las do roha ni Jahowa molo toktong hita semangat marbarita. Apostel Paulus mandok, ‘Na lao jalootta do upatta sesuai tu na taulahon.’—1 Kor. 3:8; 4:​1, 2. w22.11 3-4 ¶5-6

Saonari nungnga digenapi be surirang na mandok, ro do akka halak sian “akka bangso” lao marsiajar “bahasa na murni”, i ma hasittongan na sian Bibel. (Sak. 8:23; Sep. 3:9) Adong do lobi sian ualu juta halak di 240 negeri na margabung tu organisasi ni Jahowa. Jala setiap taon, adong do lobi sian 100.000 halak na tardidi. Las do rohatta alani pertambahan i. Alai na paling penting, dipatudu akka na baru tardidi i do “pangalaho na imbaru”. (Kol. 3:​8-10) Dang diulahon nasida be seks na so patut, kekerasan, jala dang olo be nasida mambeda-bedahon halak. Berupaya do muse nasida netral di politik. Gabe tergenap ma surirang di Jesaya 2:4 na mandok, “Dang marsiajar marporang be nasida.” Molo torus hita berupaya patuduhon “pangalaho na imbaru” gabe tertarik ma halak mananda Jahowa, jala takkas ma tarida na torus taihutton arahan ni Jesus Kristus pamimpinta i. (Joh. 13:35) Boi pe sudena on taulahon ala sai diurupi Jesus do hita. w22.07 9 ¶7-8

Ikkon tapatudu do na tapasangap Jahowa tikki martangiang tu Ibana. Tabayakkon ma jo akka parnidaan ni si Jesaya, si Hesekiel, si Daniel, dohot si Johannes. Di akka parnidaan i, digombarhon do Jahowa sebagai Raja na tung massai sangap. Didok si Jesaya, “Jahowa hundul di tahta na massai timbo.” (Jes. 6:​1-3) Di parnidaan ni si Hesekiel, didok do Jahowa hundul di kareta surgawina. “Jala di sakalilingna massai tiur, songon pelangi.” (Hes. 1:​26-28) Molo di parnidaan ni si Daniel, didok do Jahowa ‘Naung Adong sian Najolo. Bottar do abitna jala sian api na marsigorgor do tahtana’. (Dan. 7:​9, 10) Di parnidaan ni si Johannes, Jahowa hundul di tahtana. Jala di sakaliling ni tahta i adong pelangi na songon jamrud. (Pgk. 4:​2-4) Sian akka parnidaan on taboto ma massai sangap do Jahowa. Nang pe songon i diloas do hita martangiang tu Ibana. Jadi taargai ma tangiang i. w22.07 20 ¶3

Hamu akka na poso, sai berupaya do Sibolis manegai hubunganmuna dohot Jahowa. Dipengaruhi ibana ma hamu asa ragu tu ajaran ni Bibel. Contohna taringot teori evolusi. Tikki gelleng hamu dang godang dope na diboto hamu taringot evolusi. Alai lam balga hamu, lam jotjot ma diparsiajari hamu i di sikkola. Aha na diajarhon gurumuna taringot evolusi hira na masuk akkal do ra begeon. Alai olo do ra dang hea dilului nasida bukti na patuduhon tutu adong Panoppa. Ingot ma prinsip na adong di Poda 18:​17, “Molo adong parsoalan, songon na sittong do hata ni halak na parjolo mangalu-alu, alai molo dung ro alona manukkun, tarida ma ise na sittong.” Jadi unang ma pittor porsea hamu tu sude na diajarhon gurumuna di sikkola. Ikkon dipertimbangkon hamu do hasittongan na adong di Bibel dohot di publikasitta. w22.08 2 ¶2; 4 ¶8

Ikkon taattusi do aha na tajaha di Bibel asa botul-botul hita mandapot manfaat sian i. Taparrohahon ma tikki makkata-hatai Jesus dohot “sahalak siboto patik”. (Luk. 10:​25-29) Disukkun bawa i do Jesus aha na porlu diulahon ibana asa boi mandapot hangoluan na saleleng ni lelengna. Diarahon Jesus ma ibana tu Hata ni Debata. Disukkun ibana ma bawa i, “Aha do na tarsurat di Patik i? Dung dijaha ho i, aha do na boi diattusi ho?” Sittong do alus ni bawa i. Dikutip ibana do sian Surat na Badia, ikkon dihaholongi ibana do Debata dohot halak na asing. (3 Mus. 19:18; 5 Mus. 6:5) Alai dukkon i disukkun bawa i ma, “Ise do sasittongna halak na ikkon huhaholongi?” Sian on tarida ma dang botul-botul diattusi bawa i aha na dijahana i. Akibatna, gabe dang diboto ibana songon dia menerappon Hata ni Debata di ngoluna. Porlu do hita diurupi Jahowa asa boi mangattusi isi ni Bibel. Alani i, pangido ma tondi parbadiana asa diurupi hita fokus tikki manjaha. w23.02 9 ¶4-5

“Aha do na mambahen hamu olo gabe Saksi Jahowa?” Sering do ra dibege hamu sukkun-sukkun on tikki marsitandaan dohot akka dongan. Lomo do rohatta mamboto songon dia akka donganta boi mananda Jahowa, jala lomo rohatta paboahon boasa olo hita gabe Saksi Jahowa. (Rom 1:11) Alana gabe dipaingot ma hita na massai arga do hasittongan i. Gabe bertekad ma hita “mangihutton hasittongan” jala mangulahon i di parngoluotta, asa tadapot pasu-pasu ni Jahowa jala tabahen las rohana. Godang do alasanna boasa olo hita gabe Saksi Jahowa. Alasan na utama ala holong rohatta tu Jahowa. Sian Bibel taboto ma balga hian do huaso ni Jahowa. Ibana do Sitoppa langit dohot tano. Alai dang holan i, Bapakta na parholong do Ibana jala parduli do Ibana tu hita.—1 Ptr. 5:7. w22.08 14 ¶1, 3

Dijujui Apostel Paulus do akka dongan “mangulahon na denggan” lao patuduhon holong ni roha. (Heb. 10:24) Si Paulus mangurupi akka dongan dang holan sian pakkataion alai dohot do sian pambahenan. Misalna tikki masa haraparon di Judea, dohot do si Paulus mangurupi papunguhon sumbangan tu nasida. (Ul. 11:​27-30) Sasittongna sibuk hian do si Paulus marbarita dohot mangajari. Alai sai dilului ibana do cara asa boi dohot mangurupi akka dongan na susa di parhepengon. Hasilna gabe lam pos ma roha ni akka dongan i, na sai jagaon ni Jahowa do nasida. Saonari pe molo talean tikki, keterampilan, dohot upayatta lao mangurupi akka dongan na hona bencana, na patoguhon haporseaon ni nasida do hita disi. Boi do muse talean sumbangan. Molo taulahon i sude, gabe pos ma roha ni akka dongan dang hea ditinggalhon Jahowa nasida. w22.08 24 ¶14

Godang do surirang ni Bibel naung digenapi, jala piga-piga sian akka surirang i digenapi dukkon disurat marratus taon. Sejarah patuduhon tutu do digenapi akka surirang i. Dang heran be hita disi ala takkas do taboto sian Jahowa do akka surirang i. Taparrohahon ma sada surirang taringot kehancuran ni kota Babel najolo. Di abad na paualuhon SM, nungnga dipaboa Panurirang Jesaya hian na lao dihancurhon nama kota Babel. Dipaboa do goar ni halak na manaluhon kota i, i ma si Sirus, jala dipaboa do songon dia ibana manaluhon kota i. (Jes. 44:27–45:2) Dipaboa si Jesaya do muse, na lao dihancurhon do kota Babel jala dang diingani be i sahat tu saleleng ni lelengna. (Jes. 13:​19, 20) Di taon 539 SM, ditaluhon halak Media dohot Persia do kota Babel, jala saonari holan akka tembok ni kota Babel na hancur nama disi. w23.01 4 ¶10

Nungnga dipillit Jahowa hita gabe keluargana. Sada hasangapon do i di hita, jala godang do pasu-pasu na tahilala alani i. (Mrk. 10:​29, 30) Godang do akka donganta di liat portibi on na makkaholongi Jahowa jala mangulahon parettana. Nang pe berbeda bahasa, budaya, dohot gaya berpakaian ni akka donganta, alai holong do rohatta tu nasida. Bahkan tikki parjolo sahali hita pajuppang tu nasida, boi do hita langsung akrab tu nasida. Las hian do rohatta tikki rap dohot akka dongan manomba Jahowa jala toktong marsada dohot nasida. (Ps. 133:1) Diurupi akka dongan do hita tikki marsitaonon. (Rom 15:1; Gal. 6:2) Boi do muse nasida patoguhon hita asa toktong jonok tu Jahowa jala semangat melayani Ibana. (Heb. 10:​23-25) Coba ma jo tapikkirhon songon dia keadaanta molo dang adong akka dongan di huria. Pasti dang sanggup hita mangalo Sibolis dohot akka halak na jahat di portibi on. w22.09 2-3 ¶3-4

Dang sai mura mangarajai diri, khususna tikki mamakke media sosial. Molo dang hati-hati hita, olo do dang sengaja tasebarhon rahasia tu godang halak disi. Berbahaya do i, alana dang boi be takendalihon aha na masa molo nga tersebar rahasia di media sosial. Asing ni i, sifat mangarajai diri mangurupi hita asa unang paboahon rahasia manang informasi taringot akka dongan tu polisi di daerah na mangorai ulaon ni Saksi Jahowa. Di situasi sisongon i, taterappon ma prinsip ni Bibel na mandok, “Jagaokku do babakku jala tutupokku do i.” (Ps. 39:1) Jadi asa boi hita dihaporseai, tarajai ma diritta tikki berurusan dohot keluarga, dongan sahaporseaon, dohot akka na asing. w22.09 13 ¶16

Ikkon tajaha jala taparsiajari do Hata ni Debata. Jesus mandok, “Dang holan sian roti jolma boi mangolu, alai sian ganup hata na kaluar sian pamangan ni Jahowa.” (Mat. 4:4) Alani i, ikkon tajaha do Hata ni Debata tiap ari. Holong hian do roha ni Jahowa tu hita. Marhite Bibel, dipaboa Jahowa do songon dia carana asa marlas ni roha hita. Gabe taboto ma aha do tujuanna hita ditoppa, aha na porlu taulahon asa jonok hita tu Jahowa jala asa disesa dosatta. Asing ni i, dipaboa do muse di Bibel janji ni Debata di ari na naeng ro. (Jer. 29:11) Molo taparsiajari sude hasittongan na adong di Bibel i, gabe marlas ni roha ma hita. Molo metmet rohatta alani akka hasusaan na taadopi, talehon ma tikkitta manjaha Hata ni Debata jala mangarimangi isina. w22.10 7 ¶4-6

Dijujui Bibel do hita asa ‘unang songon pikkiran ni dakdanak pikkiranta, alai songon pikkiran ni halak na magodang ma’. Asa boi hita marbisuk, porlu do taulahon prinsip ni Bibel. I ma na mangurupi hita pasaehon masalah jala mambahen keputusan na denggan. Jadi denggan do molo sai tapareso diritta. Contohna, molo nungnga taratur hamu marsiajar Bibel jala ro marpungu, pikkiri ma boasa dang tergerak dope hamu mangalehon diri tu Jahowa jala tardidi. Molo nungnga tardidi hita, berupaya do hita asa lam denggan marbarita dohot mangajari? Akka prinsip ni Bibel do na tapakke tikki mambahen keputusan? Sifat ni Jesus do na tatiru tikki berurusan dohot na asing? Molo taida adong na porlu dipadenggan, berupaya ma hita padenggatton i. Jala taingot ma, sipasingot na sian Jahowa boi do mambahen halak ‘na so marpengalaman gabe marbisuk’.—Ps. 19:7. w22.10 20 ¶8

Dipatogu do roha ni si Hesekiel dung mamboto massai gogo do tondi parbadia ni Jahowa i. Di sada parnidaan, diida ibana do songon dia tondi parbadia ni Jahowa mangurupi akka suru-suruan na massai gogo jala mangarahon kereta surgawi ni Jahowa. (Hes. 1:21) Boha do reaksi ni si Hesekiel? Didok ibana, “Tikki huida i, marsomba ma au.” (Hes. 1:28) Longang situtu do roha ni si Hesekiel mangida i. Parnidaan i paposson rohana boi do ibana marhasil mangulahon tugasna molo diurupi tondi parbadia ni Jahowa. Diparettahon Jahowa do tu si Hesekiel, “Ale anak ni jolma, jongjong ma ho, asa makkatai au tu ho.” Paretta i dohot tondi parbadia ni Debata mambahen si Hesekiel margogo lao jongjong muse. (Hes. 2:​1, 2) Mulai sian i, boi ma dirasahon si Hesekiel na ditogu-togu tondi parbadia ni Jahowa do ibana.—Hes. 3:22; 8:1; 33:22; 37:1; 40:1. w22.11 4 ¶7-8

Digombarhon Panurirang Jesaya do Jahowa i songon guru na mardalan di pudi ni akka muridna jala mangalehon petunjuk tu dia nasida lao. Saonari pe tabege do soara ni Debata sian puditta. Boasa tadok songon i? Petunjuk ni Debata nungnga disurat di Bibel leleng andorang so tubu dope hita. Jadi tikki tajaha Bibel, hira na mambege soara ni Jahowa sian puditta do hita disi. (Jes. 51:4) Songon dia do carana mandapot manfaat sian petunjuk ni Jahowa? Parrohahon ma dua kalimat na didok si Jesaya. Na parjolo, “on do dalan i”. Na paduahon, “ihutton ma i”. Jadi dang sae holan tatanda “dalan” i, alai porlu do ‘taihutton dalan’ i. Asa boi hita mangihutton dalan i, ikkon taboto aha do na dipangido Jahowa sian hita. Carana, marsiajar ma hita sian Bibel dohot organisasina. Dung taboto i, taulahon ma i. Ikkon taulahon do na dua i asa boi hita martahan jala marlas ni roha. Asing ni i, molo taulahon aha na taparsiajari pasti dilehon Jahowa do upa tu hita. w22.11 10-11 ¶10-11

Dung mate akka apostel ni Jesus, adong ma halak Kristen na murtad na mangajarhon na so sittong di huria. (Mat. 13:​24-27, 37-39) Diajarhon nasida ma ajaran na so sittong “asa gabe mandao akka sisean sian punguan i”. (Ul. 20:30) Sada sian ajaran na so sittong i mandok ikkon marulak-ulak do Jesus mangalehon dagingna gabe pelean. Hape Bibel mandok “holan sahali ro di saleleng ni lelengna do dipelehon [Jesus] dirina lao manesa dosa ni godang halak”. (Heb. 9:​27, 28) Saonari godang do halak na porsea tu ajaran i. Lao ma nasida tiap minggu tu gareja, sipata tiap ari lao mambahen parningotan ari hamamate ni Jesus. Molo di agama Katolik, didok do acara i “Ekaristi” manang “Misa Kudus”. Molo gareja na asing, dang pola jotjot mambahen parningotan i, jala godang do sian pengikutna dang mangattusi lapatan ni tobusan ni Jesus. w23.01 21 ¶5

Saleleng Pamarettaon Saribu Taon ni Jesus, dipahehe ma akka halak na mate jala gabe sempurna ma akka halak na mangoloi Jahowa. Lehonon ni Jahowa ma tano on “gabe parbagianan ni halak na tigor marroha, jala mangolu ma nasida disi saleleng ni lelengna”. (Ps. 37:​10, 11, 29) Massai las do muse rohatta, alana ditaluhon nama “musu na parpudi . . . , i ma hamatean”. (1 Kor. 15:26) Boi do pos rohatta tu janji taringot hangoluan na salelengna na disurat di Bibel. Janji i boi mangurupi hita asa toktong setia nang pe mangadopi hasusaan di ari parpudi on. Alai asa boi tabahen las roha ni Jahowa, unang ma tasomba Ibana holan ala naeng mangolu salelengna. Alasan utamatta setia tu Jahowa dohot Jesus, i ma ala massai holong do rohatta tu nasida. (2 Kor. 5:​14, 15) Holong i do na mangonjar rohatta maniru nasida jala paboahon harapanta tu na asing. (Rom 10:​13-15) Berupaya ma hita asa gabe halak na burju jala dang holan mamikkiri diritta sandiri. Molo taulahon i gabe las ma roha ni Jahowa tu hita jala gabe ale-alena ma hita salelengna. w22.12 6-7 ¶15-16

Olo do gabe mabiar hita jala khawatir mamikkiri aha na lao masa annon. Wajar do molo songon i perasaanta. Alai ikkon manat do hita alana didok Jesus, penganiayaan boi do mambahen akka siseanna gabe tartuktuk. (Joh. 16:​1, 2) Memang didok Jesus na lao dianiaya do hita. Alai dipapos ibana do rohatta na boi do hita tetap setia. (Joh. 15:20; 16:33) Tikki diorai manang dibatasi pamaretta ulaonta, olo do tajalo petunjuk sian kantor cabang dohot sian akka sintua. Petunjuk i dilehon lao manjaga hita, mamastihon asa toktong boi tadapot akka publikasi, jala mangurupi hita asa boi torus marbarita na uli. Berupaya ma hamu mangihutton akka petunjuk i. (Jak. 3:17) Asing ni i, unang ma paboa informasi manang aha pe taringot akka dongan tu halak na so marhak mamboto i.—Pjm. 3:7. w22.12 20 ¶14-16

Saonari, torus do diarahon Jesus akka siseanna paboahon Harajaon ni Debata di liat portibi on. Marhite organisasi ni Jahowa dilatik Jesus do hita songon dia carana marbarita, jala diparade do tong akka alat na tahaporluhon tikki marbarita na uli. (Mat. 28:​18-20) Nungnga diulahon Jesus be bagianna. Alani i taulahon ma bagianta, semangat ma hita marbarita dohot mangajari. Jala sai toktong ma hita marjaga-jaga huhut paimahon Jahowa manghancurhon portibi na dirajai Sibolis on. Molo taulahon nasehat di Heber 6:​11, 12, gabe ‘boi ma pos situtu rohatta sahat tu ujungna na lao saut do sude na tapaima-ima i’. Nungnga ditottuhon Jahowa andigan hancurhononna portibi na dirajai Sibolis on. Molo nungnga juppang tikkina, pasautton ni Jahowa ma sude surirang na disurat di Bibel. Sipata hira na leleng do tahilala ro ari ni Jahowa i. Alai pos ma rohatta, “dang na lao tarlambat” ari ni Jahowa i. (Hab. 2:3) Alani i, bertekad ma hita asa torus ‘maima-ima tu Jahowa’ jala ‘sabar ma hita paima-imahon Debata Sipalua hita’.—Mik. 7:7. w23.02 19 ¶15-16

Sasahalak na mendaki gunung berupaya do asa sahat tu puncak. Alai tikki di pardalanan, maradi do ibana sasatokkin lao menikmati pemandangan. Sarupa songon i ma, porlu do hita taratur maradi lao mamikkirhon songon dia Jahowa mambahen hita marhasil mangadopi hasusaatta. Setiap ari, sukkun ma tu dirimuna, ‘Pasu-pasu aha do na hujalo sian Jahowa sadarion? Nang pe dang sae dope masalahku, alai songon dia Jahowa mangurupi au asa boi martahan?’ Berupaya ma hamu ganup ari mamikkirhon pinomatna sada pasu-pasu ni Jahowa na mangurupi hamu asa marhasil. Olo do ra ditangiakkon hamu asa dipaujung sitaononmuna i. (Plp. 4:6) Alai unang ma lupa hita tu akka pasu-pasu na tadapot saonari. Marjanji do Jahowa patoguhon jala mangurupi hita asa toktong martahan. Jadi mandok mauliate ma tu Jahowa ala diurupi do hamu. Jala ida hamu ma songon dia Jahowa mangurupi hamu asa marhasil nang pe maol sitaononmuna.—1 Mus. 41:​51, 52. w23.01 19 ¶17-18

Tasukkun ma tu diritta: ‘Sian parngoluokku, takkas do hupatudu naung jonok ujung ni portibi na jahat on? Sian keputusanku taringot pendidikan dohot karejo, hupatudu do melayani Jahowa na uppetting di ngolukku? Pos do rohakku na paradeon ni Jahowa do kebutuhanku dohot kebutuhan ni keluargakku?’ Pasti las do roha ni Jahowa molo berupaya hita mangulahon lomo ni rohana. (Mat. 6:​25-27, 33; Plp. 4:​12, 13) Ikkon taratur do hita mamareso cara marpikkirta jala mambahen hamubaon na porlu. Didok Apostel Paulus do tu halak Korint, “Toktong ma uji jala pareso hamu dirimuna, asa botoonmuna na diihutton hamu dope haporseaon ni halak Kristen manang na dang.” (2 Kor. 13:5) Asa boi tapauba pikkiranta, tajaha ma Bibel, taparsiajari ma cara marpikkir ni Jahowa, jala taulahon ma manang aha pe na sesuai tu lomo ni rohana.—1 Kor. 2:​14-16. w23.01 9-10 ¶5-6