Oktober

Sude do hita boi berpartisipasi di parpunguan lao marende dohot mangalehon komentar. Alai adong do akka donganta na merasa maol mangulahon i. Songon i do na dihilala hamu? Molo songon i, marsiajar ma hamu sian akka dongan naung berhasil mangatasi i. Godang do na diurupi asa boi marende sian roha ala marsiajar sian akka dongan. Tikki marende hita di parpunguan, tujuanta i ma lao mamuji Jahowa. Persiappon ma akka ende parpunguan di jabu. Jotjot ma marlatik marende di jabu, jala pikkiri ma aha kaitan ni lagu i tu bahan na lao dibahas. On boi mambahen hita lam fokus tu makna ni lagu i, dang tu soaratta. Mangalehon komentar pe boi do gabe tantangan. Songon dia mangatasi i? Jotjot ma markomentar. Ingot ma, dang masalah molo singkat alusta, sederhana, jala langsung tu intina. Massai diargai Jahowa do upayatta mangalehon komentar di parpunguan. w22.04 7-8 ¶12-15

Hata “mangurupi” di ayat on dipakke tu sasahalak na pittor ro mangurupi halak na mangido bantuan. Cocok do hatorangan on tu Jahowa. Alana pittor hatop do Ibana ro mangurupi sasahalak na susa alani sitaonon. On patuduhon lomo do roha ni Jahowa mangurupi hita. Molo diurupi Jahowa hita, boi ma hita martahan jala marlas ni roha nang pe adong sitaonon. Songon dia cara ni Jahowa mangurupi hita? Taida ma alusna sian bukku Jesaya. Alana godang do surirang ni si Jesaya na marlakku dope tu naposo ni Debata saonari. Jala jotjot do si Jesaya mamakke hata dohot ilustrasi na mura attusan lao paboahon hatorangan taringot Jahowa. Misalna di Jesaya bindu 30. Di bindu i dipakke si Jesaya do ilustrasi na manggombarhon songon dia cara ni Jahowa mangurupi naposona, i ma (1) manangihon jala mangalusi tangiangta, (2) manogu-nogu hita, jala (3) mangalean akka na denggan tu hita saonari dohot di ari naeng ro. w22.11 8 ¶2-3

Di suratna tu huria Smirna dohot Piladelpia, didok Jesus do tu nasida asa unang mabiar tikki dianiaya. Alana dipasu-pasu Jahowa do nasida molo toktong setia. (Pgk. 3:10) Ikkon siap ma hita dianiaya jala toktong ma hita setia. (Mat. 24:​9, 13; 2 Kor. 12:10) Sian bukku Pangungkapon, taboto ma na lao dianiaya do akka naposo ni Debata di “ari ni Tuan i”, i ma di jamanta saonari. (Pgk. 1:10) Di Pangungkapon bindu 12 dipaboa ma dung mamaretta Jesus gabe Raja, adong ma porang di surgo. Marporang do Jesus Kristus na digoari si Mikhael rap dohot suru-suruanna mangalo Sibolis dohot akka suru-suruan na jahat. (Pgk. 12:​7, 8) Talu do akka musu ni Debata i jala disappatton ma nasida tu tano on. Ujungna gabe susa ma portibi on dibahen nasida.—Pgk. 12:​9, 12. w22.05 5 ¶12-13

Hakim na adil do Jahowa i. Dang hea dibeda-bedahon Ibana halak. Diampuni Jahowa pe sasahalak dang ala mangida penampilanna, artana, bakatna, manang ala terkenal ibana. (1 Sam. 16:7; Jak. 2:​1-4) Dang olo Jahowa manjalo suap. Jala tikki mambahen keputusan Jahowa, dang dibahen Ibana i holan mangihutton perasaanna. (2 Mus. 34:7) Takkas ma Jahowa do Hakim na terbaik, ala diboto Ibana do sude taringot hita dohot situasitta. (5 Mus. 32:4) Panurat ni Akka Bukku Heber, jotjot do paboahon molo cara ni Jahowa mengampuni berbeda tu cara ni jolma mengampuni. Sada referensi mandok, “Dipakke nasida do sada hata di bahasa Heber na holan manggombarhon cara ni Jahowa mengampuni akka pardosa. Dang hea dipakke hata i lao manggombarhon cara ni jolma mengampuni halak na asing.” Jadi takkas ma, holan Jahowa do na boi botul-botul mengampuni sahalak pardosa naung bertobat. w22.06 4 ¶10-11

Molo sahalakmuna do pagodang-godangkon gellengmuna manang dang Saksi Jahowa pasanganmuna, pos ma rohamuna gabe dipatogu do akka dongan na asing alani teladanmuna i. Songon dia do molo diida hamu hira na so tertarik gellengmuna melayani Jahowa? Ingot ma, porlu do godang tikki mangalatik dakdanak. Molo disuan hamu sada bibit, porlu do godang tikki asa boi i tubu, lam balga, jala marparbue. Memang dang boi dipastihon hamu marparbue suan-suanan i. Alai molo torus disiram hamu i, gabe lam bagak ma partubuna. (Mrk. 4:​26-29) Songon i ma tong, sipata khawatir do hamu dang boi diurupi hamu gellengmuna botul-botul makkaholongi Jahowa. Jala memang ujungna ikkon nasida do na mambahen keputusan. Alai molo torus do dilatik hamu nasida, gabe lam balga ma kesempatan ni halak i boi marale-ale tu Jahowa. w22.04 19-20 ¶16-17

Tikki setia dope si Salomo, seimbang do ibana mangida dirina sandiri. Tikki poso dope si Salomo jala tikki baru gabe raja ibana, diakkui ibana do keterbatasanna jala dipangido ibana do petunjuk sian Jahowa. (1 Raj. 3:​7-9) Hea do ditaringoti ibana bahayana molo ginjang rohatta. Alai dung piga-piga taon mamaretta, gabe ginjang ma roha ni si Salomo. Jala dang dioloi ibana be paretta ni Debata. Misalna adong do patik na mandok ‘dang boi godang istri ni sahalak raja, asa unang manirpang rohana sian Jahowa’. (5 Mus. 17:17) Dang dioloi si Salomo patik i. Dibuat ibana do 700 istri dohot 300 gundik. (1 Raj. 11:​1-3) Olo do ra didok roha ni si Salomo dang pola gabe masalah i. Alai ujungna gabe mandao do ibana sian Jahowa alani akka istrina i, jala gabe susa ma ibana.—1 Raj. 11:​9-13. w22.05 23 ¶12

Hita sude porlu do mambahen keputusan na penting. Debata Jahowa parhuaso ni alam semesta on do na tadukung manang Sibolis musu ni Debata? Ikkon adong do na tapillit, dang boi hita di pihak netral. Jala pilihan na tabahen i, manottuhon dapotta do hangoluan na saleleng ni lelengna manang na dang. (Mat. 25:​31-33, 46) Saleleng “hasusaan bolon” lao dilehon ma tanda tu sude jolma naeng dipalua do nasida manang dipamate. (Pgk. 7:14; 14:​9-11; Hes. 9:​4, 6) Molo dipillit hamu do mendukung Harajaon ni Debata, nungnga dibahen hamu be keputusan na denggan. Pasti lomo do rohamuna mangurupi na asing asa mambahen keputusan na sarupa. Pasu-pasuon ni Jahowa ma sude halak na mendukung Harajaon ni Debata. Penting do taparsiajari akka hatorangan i, asa lam bertekad hita toktong setia melayani Jahowa. Boi do muse tapakke i mangurupi na asing mambahen keputusan lao melayani Jahowa jala asa toktong setia tu Ibana. w22.05 15 ¶1-2

Ikkon Jahowa do na tatangihon, unang akka musutta. Ditangihon si Job do Jahowa tikki makkatai tu ibana. Hira na didok Jahowa do tu si Job, ‘Na dirippu ho do dang sanggup au mangurupi ho? Pos ma roham, huparrohahon do sude na masa tu ho.’ Ujungna diakkui si Job do kesalahanna jala diargai ibana do haburjuon ni Jahowa. Didok si Job ma mangalusi, “Saleleng on dibege pinggolhu do taringot tu Ho, alai saonari nungnga diida matakku Ho.” (Job 42:5) Tikki sadihari do si Job mandokkon i? Tikki hundul dope ibana di orbuk jala tikki marsahit dope ibana. Alai nungnga boi dihilala ibana na holong roha ni Jahowa tu ibana, jala na arga do ibana di Jahowa. (Job 42:​7, 8) Saonari godang do halak na menghina hita jala mambahen hita merasa dang mararga. Diparoa-roa nasida do hita asa hancur reputasitta manang reputasi ni organisasi. Alai sian pengalaman ni si Job taboto do, pos situtu do roha ni Jahowa na boi hita toktong setia tu Ibana nang pe godang hasusaatta. w22.06 23-24 ¶15-16

Bayakkon ma perasaan ni akka halak na setia na di tano on dung diida nasida dihancurhon Debata sude musuna. Pasti marlas ni roha do nasida. Sude na di surgo pe marlas ni roha do, ala nungnga dihancurhon Babel na Balga i. Alai adong dope las ni roha na umbalga sian i. (Pgk. 19:​1-3) On ma peristiwa na massai penting na adong di bukku Pangungkapon, i ma “pesta parbogason ni Anak ni Biru-Biru i”. Andorang so masa dope porang Armagedon, nungnga lengkap be jumlah ni si 144.000 i. Alai dang i dope tikkina pesta parbogason ni Anak ni Biru-Biru i. (Pgk. 21:​1, 2) Andigan do masa pesta parbogason i? Masa ma i dukkon dipamate sude musu ni Jahowa di porang Armagedon. (Ps. 45:​3, 4, 13-17) Aha do tujuan ni pesta parbogason ni Anak ni Biru-Biru i? Songon pernikahan na pasadahon sahalak bawa dohot sahalak borua, pernikahan ni Anak ni Biru-Biru i pe pasadahon Jesus dohot ‘pengantinna’ si 144.000 i. Peristiwa penting on ma na membentuk pamarettaon na baru na lao mamaretta tu tano on saleleng 1.000 taon.—Pgk. 20:6. w22.05 17 ¶11-13

Nungnga dipaboa Jesus hian, saleleng ari parpudi dipillit ibana do “naposo haposan jala na marbisuk” lao mangalehon petunjuk sian Bibel tu akka siseanna. (Mat. 24:45) Jala songon i do na masa! Dipillit Jesus do sada punguan ni akka bawa na dimiahi tondi parbadia. Bekerja keras do nasida mangalehon petunjuk na pas “di tikkina” tu hita naposo ni Debata dohot tu akka parsiajar Bibel. Nang pe songon i, dang hea dianggap nasida dirina songon tuan na mangarajai haporseaon ni akka donganna. (2 Kor. 1:24) Sebalikna nasida mangakkui Jesus Kristus do ‘pamimpin dohot komandan’ ni akka siseanna. (Jes. 55:4) Mulai sian taon 1919, nungnga diparade naposo haposan godang bukku lao mangurupi akka halak marsiajar Bibel. Contohna taon 1921, diparade naposo haposan do bukku The Harp of God, lao mangurupi akka halak na berminat mamboto ajaran dasar ni Bibel. Dung i, dibahen ma muse akka bukku na asing. Bukku na dia do na dipakke hamu tikki marsiajar Bibel? w22.07 10 ¶9-10

Debata na massai burju do Jahowa i. Unggodang do pasu-pasu na lao lehononna tu hamu sian pengorbanan na dibahen hamu tu Ibana. (Mrk. 10:​29, 30) Molo disomba hamu Jahowa, bahenonna ma hamu marlas ni roha jala merasa puas nang pe mangolu di portibi na jahat on. Boi do hamu manomba Jahowa sahat tu saleleng ni lelengna. Lam bagas holongmuna tu Jahowa songon i ma tong holong ni Jahowa tu hamu. Dang holan i, boi ma hamu mangolu saleleng ni lelengna songon Jahowa. Tikki dilehon hamu ngolumuna tu Debata jala tardidi, on ma kesempatan di hamu lao mangalehon na ummarga tu Jahowa. Nungnga dilehon Jahowa tu hamu sude akka na denggan dohot kenangan na mambahen las rohamuna. Alani i lehon hamu ma tu Nappunasa langit dohot tano on aha na so adong di Ibana, i ma pelayanan dohot kesetiaanmuna. (Job 1:8; 41:11; Poda 27:11) On ma keputusan na terbaik na boi dibahen hamu di ngolumuna. w23.03 6 ¶16-17

Tikki remaja hamu, kuat hian do keinginan lao mangulahon seks jala adong do ra na menggoda hamu asa mangulahon i. Sibolis pe lomo do rohana asa diulahon hamu seks na so patut. Alai boi do hamu menolak godaan i. Songon dia carana? (1 Tes. 4:​3, 4) Martangiang ma hamu tu Jahowa. Paboa ma tu Jahowa perasaanmuna, jala pangido ma gogo asa boi hamu menolak i. (Mat. 6:13) Ingot ma lomo do roha ni Jahowa mangurupi hamu. Pos ma rohamuna molo dipaboa hamu perasaanmuna, dang dihakimi Ibana hamu. (Ps. 103:​13, 14) Unang ma sahalakmuna mangatasi masalahmuna. Pangido ma bantuan sian natua-tuamuna. Memang dang sai mura paboahon i tu nasida, alai godang do manfaatna molo diulahon hamu i. Molo dijaha hamu Bibel jala dirimangi hamu akka prinsipna, gabe ummura ma hamu mambahen keputusan na palashon roha ni Jahowa. Jala molo torus hamu mambahen kemajuan rohani, gabe lam diattusi hamu ma dang porlu daftar peraturan di hamu. Alana nungnga diattusi hamu cara marpikkir ni Jahowa. w22.08 5 ¶10-12

Adong do tanggung jawab ni kepala keluarga na balga, i ma paradehon kebutuhan ni keluargana. Molo hamu sahalak kepala keluarga, khawatir do ra hamu dang boi paradehon kebutuhan ni keluargamuna dohot mambayar sewa ni jabumuna. Asing ni i, olo do ra mabiar hamu dipecat sian parkarejoanmuna jala dang boi be dapotmuna karejo na baru. Olo do ra ragu hamu naeng mambahen sederhana parngoluanmuna. Alai sai taingot ma, boi do dimanfaatton Sibolis biar ni roha sisongon i, asa unang setia be hita melayani Jahowa. Berupaya do Sibolis mambahen hita ragu tu holong ni Jahowa dohot tu janjina lao mangurupi hita memenuhi kebutuhan ni keluargatta. Akibatna olo do didok rohatta ikkon taulahon manang aha pe asal ma boi hita tetap karejo. Bahkan olo do gabe taulahon na so sesuai tu prinsip ni Bibel lao mampartahatton karejotta i. w22.06 15 ¶5-6

Taboto ma muse sian Bibel ‘burju jala parasi roha do Jahowa, lambat tarrimas, jala gok holong ni roha dohot hasittongan’ do Ibana. (2 Mus. 34:6) Dihaholongi Jahowa do muse hukum na tigor. (Jes. 61:8) Lungun do rohana mangida hita susa, alani i ma marjanji do Ibana lao pasaehon sude sitaononta. (Jer. 29:11) Pasti tarpaima do hita saut i! On ma alasanna boasa holong hian rohatta tu Jahowa. Alasan na asing boasa olo hita gabe Saksi Jahowa, ala godang manfaat na tadapot sian hasittongan i. Misalna gabe taboto ma janji taringot ngolu na dumenggan di ari naeng ro. Sarupa songon jangkar na mambahen hot kapal di ingananna, janji na adong di Bibel pe mangurupi hita asa toktong tenang tikki marsitaonon hita. Janji na dipaboa si Paulus di ayat sadari on, i ma harapan lao mangolu salelengna di surgo tu halak Kristen na dimiahi tondi parbadia. Alai ayat on pe marlakku do tu halak Kristen na naeng mangolu salelengna di tano on. (Joh. 3:16) Takkas ma janji taringot hangoluan saleleng ni lelengna mambahen gabe martujuan ngolutta. w22.08 14-15 ¶3-5

Asa boi tahaporseai akka dongan, ikkon tahaholongi do nasida. Di 1 Korint bindu 13, dipaboa do songon dia halak na marholong ni roha i. Akka sifat na adong disi boi mangurupi hita asa toktong porsea tu akka dongan di huria. (1 Kor. 13:​4-8) Contohna di ayat 4 didok do molo ‘halak na marholong ni roha i sabar jala burju’. Sabar do Jahowa tu hita nang pe jotjot hita mambahen haccit rohana. Jadi tatiru ma Jahowa. Molo adong na mambahen haccit rohatta, sabar ma hita. Di ayat 5 didok do, ‘[Halak na marholong ni roha i] dang parmuruk, jala dang dipaingot-ingot ibana hasalaan ni halak.’ Jadi unang ma sai torus taingot-ingot hasalaan ni akka dongan na mambahen haccit rohatta. Di Parjamita 7:9 didok do asa ‘unang mura-mura haccit rohatta’. Tatiru ma cara pandang ni Jahowa. Holong do roha ni Jahowa tu nasida, jala dang hea dipaingot-ingot Jahowa dosa ni nasida. Hita pe ikkon songon i do. (Ps. 130:3) Unang ma talului hasalaan ni akka donganta. Alai berfokus ma hita tu sifat ni nasida na denggan.—Mat. 7:​1-5. w22.09 3-4 ¶6-7

Dipaboa do di bukku Daniel akka peristiwa na masa saleleng ari parpudi. Contohna Daniel 12:1 paboahon molo si Mikhael, i ma Jesus Kristus ‘ro lao mangurupi bangso ni Debata’. Sebagian sian surirang i digenapi di taon 1914 tikki dilantik Jesus gabe Raja di Harajaon ni Debata. Didok si Daniel muse, ro do Jesus tikki masa hasusaan. “Dang hea dope masa hasusaan na songon i mulai sian adong akka bangso sahat tu tikki i.” Hasusaan na di bukku Daniel i sarupa do i tu “hasusaan bolon” na dipaboa di Mateus 24:21. Di ujung ni hasusaan bolon i, i ma tikki Armagedon, ro ma Jesus mambela ‘bangso ni Debata’. Di bukku Pangungkapon, bangso ni Debata i digoari do sada punguan bolon “na malua sian hasusaan bolon”.—Pgk. 7:​9, 14. w22.09 21 ¶4-5

Nang pe nungnga tarsurat goarta saonari di bukku i, alai hira na mamakke pensil dope i disurat, jala boi dope i tarsesa. (Pgk. 3:5) Jadi ikkon tapastihon do toktong tarsurat goarta di bukku hangoluan, sappe permanen i disurat songon na mamakke pulpen. Sada kelompok na tarsurat goarna di bukku hangoluan i, i ma akka halak na tarpillit lao mamaretta rap dohot Jesus di surgo. Sesuai tu surat ni si Paulus tu halak Kristen di Pilippi, goar ni akka halak na tarpillit tu surgo nungnga tarsurat di bukku hangoluan. (Plp. 4:3) Alai ikkon toktong do nasida setia asa torus tarsurat goar ni nasida di bukku hangoluan i. Tarsurat ma permanen goar ni nasida di bukku hangoluan i molo nga dapot ni nasida materai na parpudi, sebelum mate nasida manang sebelum dimulai hasusaan bolon.—Pgk. 7:3. w22.09 14 ¶3; 15 ¶5-6

Bayakkon ma jo situasi on. Adong ma na mangalehon sipanganon na tabo tu hamu. Alai ala adong na dipikkiri hamu manang lagi buru-buru hamu, gabe dang dinikmati hamu be na mangan i. Songon i ma tikki manjaha Bibel. Molo pahatophu hita manjaha Bibel, gabe dang taattusi na tajaha i. Jadi porlu do taparade tikki lao manjaha Bibel. Ikkon tabayakkon do situasina dohot peristiwa na adong disi jala tapikkirhon ma na tajaha i. Molo taulahon i, gabe las ma rohatta. Dipillit Jesus do “naposo haposan jala na marbisuk” lao paradehon godang petunjuk sian Bibel di tikki na pas asa toktong togu haporseaotta. (Mat. 24:45) Berdasarkan isi ni Bibel do sude publikasi na diparade naposo haposan.—1 Tes. 2:13. w22.10 7-8 ¶6-8

Nungnga dipaboa di Bibel, lam godang do akka pangarehei di ari parpudi. (2 Ptr. 3:​3, 4) Diihutton nasida do “hisap-hisap ni nasida na jahat”. (Jud. 7, 17, 18) Songon dia do carana manjaga diritta sian akka pangarehei? Unang ma bergaul hita dohot akka halak na kritis. (Ps. 1:1) Jala unang ma olo hita manjaha sijahaon na dibahen halak na murtad manang mambege hata ni nasida. Molo dang hati-hati, boi do gabe halak na kritis hita, jala gabe taraguhon ma bimbingan ni Jahowa dohot akka petunjuk sian organisasi. Tasukkun ma diritta, ‘Molo adong petunjuk manang pemahaman na baru, olo do au mangihutton i? Jotjot do au mangkritik jala mangida hasalaan ni akka dongan bawa na manguluhon di huria?’ Molo hatop tapadenggan kelemahanta i, las ma roha ni Jahowa tu hita.—Poda 3:​34, 35. w22.10 20 ¶9-10

Tondi parbadia mangurupi si Hesekiel marbarita tu akka halak “sijogal rukkung” jala na ‘takkang rohana’. Didok Jahowa do tu si Hesekiel, “Nungnga hubahen ho tegas jala karas songon nasida. Nungnga hubahen ho songon batu intan, ukkaras sian batu api. Unang pola mabiar ho tu nasida manang makkahitir mangida bohi ni nasida.” (Hes. 3:​8, 9) Hira na didok Jahowa ma tu si Hesekiel, ‘Unang pola metmet roham molo songon i tanggapan ni halak i. Sai na donganakku do ho.’ Dung i, diboan tondi parbadia ni Jahowa ma si Hesekiel tu daerahna marbarita. Didok si Hesekiel, “Huhilala ma tondi parbadia ni Jahowa na massai gogo manogu-nogu au.” Porlu do tikki saminggu di si Hesekiel asa barani ibana paboahon i tu akka halak. (Hes. 3:​14, 15) Dung i diarahon Jahowa ma ibana tu sada rura, jala ‘ro ma tondi parbadia ni Debata tu bagasan dirina’. (Hes. 3:​23, 24) Gabe rade ma si Hesekiel memulai pelayananna. w22.11 4 ¶8-9

Godang do hasusaan na masa tu Panurirang Habakuk, jala hea do ibana merasa dang parduli be Jahowa tu ibana. Dipaboa ibana do songon dia pakkilalaanna di tangiangna tu Jahowa. Dialusi Jahowa do tangiang ni si Habakuk. (Hab. 2:​2, 3) Dung dirimangi si Habakuk songon dia Jahowa paluahon naposona, gabe marlas ni roha ma ibana muse. Gabe lam pos ma rohana na parduli do Jahowa tu ibana jala diurupi asa toktong martahan mangadopi akka hasusaan. (Hab. 3:​17-19) Aha do parsiajaranna tu hita? Tikki masa hasusaan, martangiang ma hita tu Jahowa paboahon sude perasaanta. Dung i, pangido ma bantuanna. Molo taulahon i, gabe pos ma rohatta pasti lehonon ni Jahowa do gogo tu hita asa boi martahan. Jala molo nungnga tahilala diurupi Jahowa hita, lam togu ma haporseaotta tu Ibana. Molo torus do taulahon akka ulaon na mambahen hita jonok tu Jahowa, gabe dang taloas hasusaatta manang keraguanta manirang hita sian Jahowa.—1 Tim. 6:​6-8. w22.11 15 ¶6-7

Haccit do dihilala Jesus dohot dua parjahat na di sappingna tikki naeng mate nasida. (Luk. 23:​32, 33) Direhei dua parjahat i do Jesus. (Mat. 27:44; Mrk. 15:32) Alai sada sian parjahat i gabe muba do pandanganna tu Jesus. Didok ibana ma tu Jesus, “Jesus, ingot ma au molo dung masuk ho tu Harajaonmi.” Dialusi Jesus ma ibana songon di ayat harian sadari on. (Luk. 23:​39-42) Hata ni Jesus tu parjahat i mambahen hita mamikkirhon songon dia do annon ngolutta di Paradeiso. Boi do taboto songon dia Paradeiso i sian pamarettaon ni Raja Salomo na dame. Dipaboa do di Bibel umbalga do Jesus sian si Salomo. Jadi pos ma rohatta pasti undenggan do annon pamarettaon ni Jesus dohot si 144.000 i lao mambahen tano on gabe Paradeiso na massai uli. (Mat. 12:42) Pasti lomo do roha ni ‘biru-biru na asing’ mamboto aha na porlu ulahonon ni nasida asa boi mangolu salelengna di Paradeiso.—Joh. 10:16. w22.12 8 ¶1; 9 ¶4

Dipapos si Jesaya do rohatta na olo do Jahowa manangihon pangidoatta jala hatop mangalusi tangiangta. Didok si Jesaya do muse, “Pittor alusanna do ho disi dibege Ibana pangidoanmi.” Hata on paingotton hita na lomo do roha ni Bapakta Jahowa mangurupi halak na mangido bantuanna. Penting do taboto on, asa boi hita martahan jala marlas ni roha nang pe godang tantangan. Manat do ditangihon Jahowa tangiangta masing-masing. Boasa tadok songon i? Di bagian parjolo ni Jesaya bindu 30 dipakke do hata “hamu” alana Jahowa makkatai tu naposona secara kelompok. Alai di ayat 19 dipakke do hata “ho” tu naposona secara pribadi. Didok disi, “Dang na lao tangis be ho”; “patuduhononna do asi ni rohana tu ho”; “pittor alusanna do ho”. Ala Bapak na parholong do Jahowa, parduli do Ibana tu hita secara pribadi. Jala ditangihon Ibana do tangiangta masing-masing.—Ps. 116:1; Jes. 57:15. w22.11 9 ¶5-6

Molo toktong hita marbarita manang mangajari nang pe adong paraloan, boi do hita marlas ni roha dohot makkilala hadameon. Di abad na parjolo, diorai akka pamimpin ni halak Jahudi do akka apostel marbarita na uli. Alai setia do nasida jala dioloi do Debata. Torus do nasida marbarita na uli jala ulaon i ma na mambahen nasida marlas ni roha. (Ul. 5:​27-29, 41, 42) Memang molo diorai pamaretta ulaonta, ikkon marbisuk do hita tikki marbarita na uli. Alai molo tabahen na terbaik, tahilala ma dame ni roha ala nungnga tapaboa barita haluaon tu akka halak jala nungnga tabahen las roha ni Jahowa. Pos ma rohatta nang pe mangadopi hasusaan, boi do tetap dame rohatta. Di tikki sisongon i, taingot ma dame na sian Jahowa do na tahaporluhon, jala holan Jahowa do na boi mangalehon i. Andalhon hamu ma Ibana molo masa wabah penyakit, bencana alam, manang penganiayaan. Toktong ma jonok hamu tu organisasi ni Jahowa, jala torus ma ingot harapanmuna di ari na naeng ro. Molo diulahon hamu i, “donganan ni Debata silehon dame i ma hamu”.—Plp. 4:9. w22.12 21 ¶17-18

Ikkon berupaya do hita mangulahon on. Misalna, ikkon berjuang do hita mambolokkon sogo ni roha, muruk, dohot rimas sian diritta. (Eps. 4:​31, 32) Boasa gabe tantangan on? Alana sifat na roa i olo do nungnga marurat marakar di diritta. Misalna dipaboa do di Bibel, adong halak na sifatna “mura muruk”. (Poda 29:22) Akka halak na sifatna songon on ikkon torus do berjuang asa boi mambahen hamubaon, nang pe nungnga tardidi nasida. (Rom 7:​21-23) Molo maol hamu mambolokkon sifat na so denggan, martangiang ma hamu tu Jahowa. Pos ma rohamuna tangihononna do hamu jala urupanna hamu. (1 Joh. 5:​14, 15) Memang dang secara mukjizat dibolokkon Jahowa akka sifatmuna na so denggan i. Alai lehononna do gogo tu hamu asa unang menyerah. (1 Ptr. 5:10) Asing ni i, berupaya ma asa sesuai pangalahomuna tu tangiangmuna i. Pasiding ma akka ulaon na mambahen mulak muse pangalahomuna na leleng i. Jala molo toppu ro muse akka sifat na roa i, pittor hatop ma bolokkon.—Plp. 4:8; Kol. 3:2. w23.01 10 ¶7, 9-10

Sada carana patuduhon holongta, i ma molo semangat hita marbarita na uli tu sude halak. Unang ma tabeda-bedahon halak alani ras, suku, keadaan ekonomi, manang alani latar belakangna. Molo marbarita hita tu sude halak, on patuduhon na taulahon do lomo ni roha ni Jahowa “asa malua saluhut jolma jala boi mandapot parbinotoan na bagas taringot tu hasittongan i”. (1 Tim. 2:4) Cara na asing patuduhon na holong rohatta tu Jahowa dohot tu Jesus i ma molo tahaholongi akka dongan. Taparrohahon ma akka donganta khususna tikki masa hasusaan tu nasida. Tahibur ma akka dongan na lungun rohana ala mate halak na dihaholongi nasida. Takunjungi ma akka dongan na marsahit jala tapatogu ma akka dongan na kecil hati. (2 Kor. 1:​3-7; 1 Tes. 5:​11, 14) Tatangiakkon ma nasida ala taboto “margogo do tangiang ni halak na mangulahon na sittong”.—Jak. 5:16. w23.01 28-29 ¶7-8

Songon parkarejo bangunan na porlu maningkatton keterampilanna, hita pe porlu do maningkatton keterampilanta lao patoguhon akka dongan. Dipatogu do akka dongan molo taceritahon pengalaman ni akka naposo ni Jahowa najolo na marhasil manaon hasusaan. (Heb. 11:​32-35; 12:1) Asing ni i molo akka na denggan do na tahatahon taringot akka donganta, gabe dame ma huria. (Eps. 4:3) Dipatogu do muse haporseaon ni akka dongan molo tabagihon akka parsiajaran na tadapot sian Bibel, molo taurupi nasida, jala tapatogu akka dongan na gale haporseaonna. Boi do hita makkilala las ni roha sisongon i molo olo hita patoguhon akka dongan di huria. Molo Bale Harajaon boi do sega, alai anggo hasil ni ulaonta lao patoguhon akka dongan sahaporseaon, martahan do i saleleng ni lelengna. w22.08 22 ¶6; 25 ¶17-18

Dipaboa Jesus do cara na asing asa boi hita mangattusi isi ni Bibel, i ma manat mamparrohahon na tajaha. (Mat. 24:15) Boha do carana mangulahon i? Ikkon tapakke do kesanggupanta marpikkir asa boi mangattusi kaitan manang perbedaan ni sada gagasan tu gagasan na asing, nang pe dang langsung dipaboa di Bibel. Dipaboa Jesus do muse ikkon manat do hita mamparrohahon peristiwa na dia do na menggenapi surirang ni Bibel. Porlu do muse tapakke kesanggupan marpikkir tikki manjaha bagian ni Bibel na asing asa tadapot manfaat sian i. Dilehon Jahowa do kesanggupan marpikkir tu naposona. Alani i martangiang ma hamu tu Jahowa mangido bantuanna. Alai dang sae holan i, adong dope na porlu diulahon hamu. Tikki manjaha Bibel, pareso hamu ma na dijahamuna i jala pikkirhon ma songon dia hatorangan i marhaitan tu hatorangan naung diboto hamu. Riset ma lapatan ni sada ayat di Bibel jala songon dia carana menerappon ayat i di ngolumuna. (Heb. 5:14) Molo dipakke hamu kesanggupan marpikkir tikki manjaha Bibel, gabe lam tamba ma pangattusionmuna taringot Hata ni Debata. w23.02 10 ¶7-8

Bayakkon ma adong donganmuna na mangalean sada jabu tu hamu. Nang pe pudar warna cat ni jabu i jala adong bocorna, alai arga ni jabu i miliaran rupiah. Pasti diargai hamu do i jala berupaya do hamu mangarawat jabu i. Sarupa songon i ma nungnga dilehon Jahowa tu hita silehon-lehon na massai arga, i ma hangoluan. Sasittongna, massai arga do hangoluatta di Jahowa. I do alana dilehon Ibana Anakna lao manobus hita. (Joh. 3:16) Sian Jahowa do ro hangoluan. (Ps. 36:9) Setuju do Apostel Paulus tu hata on tikki didok ibana, “Alani Ibana do hita gabe adong, marhosa, jala mangolu.” (Ul. 17:​25, 28) Jadi boi ma tadok silehon-lehon sian Debata do hangoluan. Diparade Ibana do aha na tahaporluhon asa toktong hita mangolu. (Ul. 14:​15-17) Alai saonari dang dibahen Jahowa mukjizat asa boi hita toktong mangolu. Gariada dipangido Ibana do hita asa toktong manjaga kesehatan jala manomba Ibana.—2 Kor. 7:1. w23.02 20 ¶1-2

Pasti mandok mauliate do hita tu Debata Jahowa alani Bibel. Diparade Jahowa do di Bibel akka nasehat na denggan asa boi hita marhasil mangadopi masalahta saonari. Dilehon Ibana do muse harapan na luar biasa di ari na naeng ro. Jala na lebih penting dipakke Jahowa do Bibel lao paboahon akka sifatna. Tikki tapikkirhon sifat ni Jahowa pasti hona do i tu rohatta. Gabe tergerak ma hita lam jonok tu Debata jala marale-ale tu Ibana. (Ps. 25:14) Lomo do roha ni Jahowa asa ditanda akka halak Ibana. Najolo, dipaboa Jahowa do taringot dirina marhite nipi, parnidaan, dohot akka suru-suruan. (4 Mus. 12:6; Ul. 10:​3, 4) Alai dang boi taparsiajari nipi, parnidaan, dohot akka hata na dipasahat suru-suruan i molo dang disuratton i. On ma alasanna disuru Jahowa piga-piga bawa lao manurat “di sada bukku” aha na porlu taboto taringot Ibana. Ala “denggan do sude ulaon ni Debata na sittong i”, pos do rohatta on ma cara komunikasi na denggan lao mangurupi hita.—Ps. 18:30. w23.02 2 ¶1-2

Bahen ma cita-cita na boi patoguhon haporseaonmuna jala mambahen hamu gabe halak Kristen na matang. (Eps. 3:16) Contohna boi do dibahen hamu jadwal asa taratur manjaha dohot marsiajar Bibel. (Ps. 1:​2, 3) Berupaya ma hamu asa lam jotjot martangiang tu Jahowa jala asa lam denggan isi ni tangiangmuna i. Asing ni i, mulai sian saonari marbisuk ma hamu mamillit hiburan, jala atur ma asa unang habis tikkimuna tusi. (Eps. 5:​15, 16) Boi do hamu gabe halak Kristen na matang molo olo hamu mangurupi na asing. Contohna boi do dibahen hamu cita-cita lao mangurupi akka na matua dohot na marsahit di huria. Boi do ra diurupi hamu nasida mamakke perangkat elektronik manang berbelanja. Cara na asing patuduhon holong tu akka halak, i ma marbarita na uli. (Mat. 9:​36, 37) Jadi molo cocok do situasimuna, bahen ma cita-cita gabe perintis, melayani di Betel, manang dohot tu proyek pembangunan. w22.08 6-7 ¶16-17