Mei

Di abad na parjolo, masa ma haraparon “di liat portibi on”. Bayakkon ma dampak ni haraparon i tu halak Kristen di tikki i. Pasti khawatir do akka kepala keluarga songon dia nasida paradehon kebutuhan ni keluargana. Boha do molo akka na poso na berencana mangalehon godang tikki lao marbarita? Gabe tarpikkir do ra nasida menunda rencanana i. Alai dang soal songon dia situasina, boi do halak Kristen di abad na parjolo i menyesuaihon diri. Torus do nasida marbarita na uli sesuai tu kesanggupan ni nasida, jala las do roha ni nasida mangalehon bantuan tu akka dongan sahaporseaon na di Judea. (Ul. 11:​29, 30) Akka dongan na manjalo bantuan pe boi do mangida na diurupi Jahowa do nasida. (Mat. 6:​31-33) Gabe lam jonok ma nasida tu akka dongan sahaporseaon na mangalehon bantuan tu nasida. Asing ni i, akka dongan na menyumbang dohot na mangurupi marhite cara na asing pe marlas ni roha ala boi dohot mangalehon.—Ul. 20:35. w23.04 16 ¶12-13

Sipata dipakke Jahowa do akka halak na so manomba Ibana lao mangalusi tangiangta na mangido asa diurupi. Misalna digerakkon Ibana do roha ni Raja Artasasta lao mangoloi pangidoan ni si Nehemia mulak tu Jerusalem lao paturehon kota i. (Neh. 2:​3-6) Saonari pe boi do dibahen Jahowa cara na sarupa mangurupi hita tikki tahaporluhon. Dang sai ikkon luar biasa cara ni Jahowa mangalusi tangiangta. Alai sai dilehon Ibana do akka na tahaporluhon asa boi hita torus setia tu Ibana. Jadi porlu do taida songon dia Jahowa mangalusi tangiangta. Sian tikki tu tikki porlu do tarimangi songon dia Jahowa mangalusi tangiangta. (Ps. 66:​19, 20) Tarida do haporseaotta dang holan tikki martangiang, alai molo rade hita manjalo alus ni tangiangta dang soal songon dia carana.—Heb. 11:6. w23.05 11 ¶13; 12 ¶15-16

Tikki talehon diritta tu Jahowa, marjanji do hita manomba Ibana jala mangulahon lomo ni rohana. Ikkon torus do taingot janjitta i. Alai dang maol mangulahon i, alana ditoppa Jahowa do hita asa boi taulahon lomo ni rohana. (Pgk. 4:11) Nungnga disuanton Jahowa tu rohatta lao mananda dohot manomba Ibana, jala ditoppa do hita asa boi maniru Ibana. Hasilna boi ma hita jonok tu Ibana jala marlas ni roha ala mangulahon lomo ni rohana. Asing ni i, molo taulahon lomo ni roha ni Debata jala taihutton Anakna, gabe ‘dipargogoi’ ma hita. (Mat. 11:​28-30) Torus ma patogu holongmuna tu Jahowa. Rimangi ma akka na denggan naung dilehon Jahowa tu hamu dohot pasu-pasu di ari na naeng ro. Molo lam balga holongmuna tu Jahowa, gabe lam mura ma hamu mangoloi parettana. (1 Joh. 5:3) Marhasil do Jesus mangulahon lomo ni roha ni Debata, alana martangiang do ibana mangido bantuan ni Jahowa jala asa fokus tu upa na lao jaloonna. (Heb. 5:7; 12:2) Songon Jesus, martangiang ma hamu mangido gogo sian Jahowa jala asa sai diingot hamu janji taringot hangoluan salelengna. w23.08 27-28 ¶4-5

Lomo do rohatta tu halak na sabar. Taargai do nasida ala dang marungut-ungut tikki paimahon. Taargai do muse nasida ala sabar tu hita tikki tabahen na sala. Jala las do rohatta ala sabar guru studitta tikki maol hita marsiajar, mangattusi, manang mangulahon sada ajaran ni Bibel. Alai na paling penting, mandok mauliate do hita tu Debata Jahowa ala sabar Ibana tu hita. Nang pe taargai halak na sabar, alai dang sai mura asa toktong hita sabar. Uppamana, dang mura di hita boi toktong tenang tikki terjebak macet, tarlumobi ma tikki tarlambat hita. Boi do gabe muruk hita molo adong halak na mambahen jut rohatta. Jala sipata dang mura di hita asa torus sabar paimahon tano na imbaru na dijanjihon Jahowa. Alai ikkon sabar do hita di sude situasi i. w23.08 20 ¶1-2

Dipangido Jahowa do tu si Gidion asa mangorui hampir sude tentarana. Mungkin ro do tu pikkiran ni si Gidion, ‘Boasa ikkon adong perubahan? Marhasil do annon hami?’ Nang pe songon i, tetap do unduk si Gidion. Akka sintua pe saonari maniru si Gidion do, rade do nasida menerappon perubahan na dibahen organisasi. (Heb. 13:17) Dioloi si Gidion do paretta ni Jahowa nang pe mabiar ibana jala boi parohon bahaya tugasna i. (Pangh. 9:17) Dung dipapos Jahowa rohana, gabe dang ragu be si Gidion pasti diurupi Jahowa do ibana lao melindungi naposona. Akka sintua na tinggal di daerah na mangorai ulaonta pe maniru si Gidion do. Barani do nasida manguluhon parpunguan dohot ulaon marbarita nang pe i boi mambahen nasida ditakkup, diinterogasi, kehilangan pekerjaan, manang dianiaya. Saleleng hasusaan bolon haduan, ikkon barani do akka sintua mangihutton petunjuk aha pe na dilehon tu nasida, nang pe i berbahaya. w23.06 5-6 ¶12-13

Dipastihon Jahowa do asa disurat teladan ni si Jehoyada di Bibel lao mangajari hita. (Rom 15:4) Jala tikki mate si Jehoyada, dilehon do hasangapon tu ibana, i ma dikuburhon ‘di kuburan ni akka raja di Kota ni si Daud, alana diulahon ibana do akka na denggan tu halak Israel, tu Debata na sittong, dohot tu jabu ni Debata’. (2 Kron. 24:​15, 16) Sian contoh ni si Jehoyada, marsiajar do hita massai penting do makkabiari Debata. Molo dihabiari akka sintua Debata, berupaya do nasida asa torus mangalului cara lao melindungi huria. (Ul. 20:28) Akka na matua pe boi do marsiajar sian si Jehoyada. Molo dihabiari nasida Jahowa jala toktong setia, boi do dipakke Jahowa nasida lao pasautton lomo ni rohana. Marsiajar do tong akka na poso sian Jahowa. Sangap do dibahen Jahowa si Jehoyada nang pe nungnga matua ibana. Hamu akka na poso, sangap ma bahen akka dongan na matua, tarlumobi naung setia melayani Jahowa saleleng martaon-taon. (Poda 16:31) Toktong ma hita setia mendukung akka “na manguluhon” hita jala unduk ma hita tu nasida.—Heb. 13:17. w23.06 17 ¶14-15

Patudu ma pertimbangan tikki naeng mangalehon komentar. Molo pajotjothu hita tunjuk tangan, gabe tabahen do pemandu merasa terpaksa marulak-ulak menunjuk hita, hape akka dongan na asing dang dope mangalehon komentar. Akibatna gabe kecil hati ma akka donganta jala dang olo be tunjuk tangan. (Pjm. 3:7) Molo godang na tunjuk tangan saleleng pembahasan, sipata olo do dang ditunjuk pemandu i hita nanggo apala sahali. Olo do ra hita kecewa alani i. Alai berupaya ma hita asa unang haccit rohatta. (Pjm. 7:9) Molo dang boi hamu jotjot markomentar songon na dihalomohon rohamuna, denggan ma parrohahon hamu komentar ni na asing. Dung i dung sae marpungu, puji ma komentar ni nasida na denggan i. Pujianmuna i boi do patoguhon akka dongan, dos songon komentar naung dipersiappon hamu. w23.04 23-24 ¶14-16

Parsiajari jala rimangi ma Hata ni Debata. Songon hau na boi hot jongjong ala bagas marurat tu toru, hita pe boi do toktong togu haporseaotta molo bagas haporseaotta tu Hata ni Debata. Boi do urat ni hau i lam bagas jala rarat. Suang songon i ma, molo taparsiajari jala tarimangi Hata ni Debata, boi do lam togu haporseaotta jala lam pos rohatta undenggan do dalan ni Jahowa. (Kol. 2:​6, 7) Rimangi ma muse songon dia petunjuk, panogu-noguon, dohot perlindungan sian Jahowa boi mangurupi naposona di tikki najolo. Uppamana di sada parnidaan, manat do diparrohahon si Hesekiel tikki adong suru-suruan mangukkur bagas joro. Gabe dipatogu do si Hesekiel alani parnidaan i, jala gabe diurupi do tong hita asa torus mangulahon ibadat na sittong sesuai tu standar ni Jahowa. (Hes. 40:​1-4; 43:​10-12) Hita pe boi do mandapot manfaat molo talehon tikki lao marsiajar jala mangarimangi akka na bagas na adong di Bibel. Tapatogu ma rohatta molo botul-botul hita marhaposan tu Jahowa.—Ps. 112:7. w23.07 18 ¶15-16

Di Bibel, godang do dipaboa taringot akka bawa na makkaholongi Jahowa. Jala marragam do tugas ni nasida lao mangurupi naposo ni Debata. Gabe sitiruon do nasida tu akka bawa na poso. Asing ni i, adong do akka bawa di keluarga manang di huria na boi gabe sitiruon di hamu. (Heb. 13:7) Jala boi do ditiru hamu Jesus Kristus ala ibana do sitiruon na sempurna. (1 Ptr. 2:21) Tikki diparsiajari hamu akka pengalaman ni nasida, parrohahon ma akka parange ni nasida na naeng ditiru hamu. (Heb. 12:​1, 2) Jala pikkirhon ma songon dia caramuna maniru nasida. Molo manat sahalak bawa marpikkir, pasti jolo dipertimbakkon ibana do pilihanna sebelum mambahen keputusan. Jadi ikkon marsitutu do ibana marlatik asa boi gabe halak na songon i jala toktong patuduhon i. Parsiajari hamu ma akka prinsip ni Bibel jala pikkirhon ma aha labana di hamu. Dung i pakke ma akka prinsip i lao mangurupi hamu mambahen keputusan na boi palasson roha ni Jahowa. (Ps. 119:9) Sada keterampilan na massai penting do on asa togu haporseaonmuna tu Jahowa.—Poda 2:​11, 12; Heb. 5:14. w23.12 24-25 ¶4-5

Boi do akka natua-tua mangajarhon tu gelleng ni nasida songon dia carana asa lambok mangalusi akka halak na manukkun taringot haporseaonna. (Jak. 3:13) Adong do natua-tua na mambahen sesi latihan saleleng ibadat keluarga. Dibahas nasida ma akka situasi na boi masa di sikkola, jala dibahen nasida ma peragaan songon dia carana mangalusi. Dung i diajarhon nasida do muse gelleng ni nasida songon dia carana mambahen asa menarik jala lambok patorakkon i. Hamu akka na poso, molo jolo marlatik hamu, boi do i mangurupi hamu paposson rohamuna tu hasittongan jala boi ma hamu patorakkon i tu na asing. Di jw.org adong do seri na marjudul “Pertanyaan Anak Muda”. Disi adong do dibahen lembar kegiatan tu akka na poso na boi paposson roha ni nasida tu hasittongan, jala mangalusi sukkun-sukkun ni halak mamakke hata ni nasida sandiri. Molo diparsiajari hamu on rap dohot keluargamuna, gabe denggan jala lambok ma caramuna tikki mambela haporseaonmuna. w23.09 17 ¶10; 18 ¶15-16

Hea do dibahen hamu cita-cita rohani alai maol mencapai i? Molo hea, dang holan hamu na songon i. Misalna lomo do roha ni si Philip asa lam denggan jala lam jotjot martangiang, alai maol do ibana mangalului tikki lao martangiang. Molo si Erika lomo do rohana asa tepat waktu ro tu parpunguan lao marbarita, alai jotjot do ibana tarlambat. Molo adong cita-citamuna saonari alai dang boi dope dicapai hamu, unang ma merasa kecil hati hamu. Cita-cita na sederhana pe porlu do godang tikki dohot upaya lao mencapai i. Sasittongna holan adong pe keinginanmuna lao mencapai cita-citamuna, on patuduhon na diargai hamu do hubunganmuna tu Jahowa jala lomo rohamuna mangalehon na terbaik tu Ibana. Diargai Jahowa do upayamuna i. Tottu dang dipangido Ibana lobi sian na boi dilehon hamu. (Ps. 103:14; Mik. 6:8) Jadi bahen hamu ma cita-cita na masuk akkal sesuai tu keadaanmuna. w23.05 26 ¶1-2

Halak na barani olo do mabiar, alai dang dipasombu ibana biar ni rohana mambahen ibana dang mangulahon na sittong. Songon i ma si Daniel. Diparsiajari si Daniel do akka tulisan ni akka panurirang ni Debata, termasuk ma surirang ni si Jeremia. Sian i gabe diboto si Daniel ma na lao marujung penawanan ni halak Jahudi di Babel. (Dan. 9:2) Dung diida si Daniel sai saut do hata ni Jahowa, gabe lam pos ma rohana tu Jahowa, jala i ma na mambahen ibana gabe barani. (Rom 8: 32, 37-39.) Jala na paling penting, jotjot do si Daniel martangiang tu Bapakna na di surgo. (Dan. 6:10) Diakkui ibana do hasalaanna tu Jahowa jala dipaboa ibana do sude na di rohana. Dipangido si Daniel do muse bantuan sian Jahowa. (Dan. 9:​4, 5, 19) Sarupa do si Daniel songon hita. Dang disi tubu ibana gabe halak na barani. Alai ala marsiajar, martangiang, jala porsea tu Jahowa, gabe boi ma ibana patuduhon sifat i. w23.08 3 ¶4; 4 ¶7

Molo taoloi aturan ni pamaretta, parohon laba do i tu diritta sandiri dohot tu na asing. Alana gabe dang hona hukum hita songon na dihilala akka halak na so mangoloi aturan ni pamaretta. (Rom 13:​1, 4) Molo taoloi pamaretta, gabe boi ma diida nasida warga negara na burju do Saksi Jahowa i. Misalna, adong sada pengalaman di Nigeria marpulu taon na salpu. Adong ma akka tentara na masuk tu Bale Harajaon saleleng acara parpunguan, lao manakkup halak na protes tu aturan ni pamaretta taringot pajak. Alai adong ma sada petugas na mandok tu akka tentara i asa lao sian i. Didok ibana, “Molo Saksi Jahowa on, torus do nasida manggarar pajak.” Jadi, molo dioloi hamu aturan ni pamaretta gabe denggan ma pandangan ni akka halak taringot Saksi Jahowa. Jala boi ma i melindungi akka dongan. w23.10 9 ¶13

Adong do piga-piga naposo ni Jahowa naung leleng paima-imahon ujung ni portibi na jahat on. Sian pandangan ni jolma, leleng nai dope ari ni Jahowa i. Diboto Jahowa do songon dia perasaan ni akka naposona. I do alana dipapos Ibana roha ni Panurirang Habakuk jala didok, “Ai na lao saut do parnidaan i di tikki naung ditottuhon, na lao tibu nama i masa, jala sittong do parnidaan i. Ai molo pe tarlambat i masa, toktong ma pos roham paimahon i! Ai pasti do saut i. Jala dang na lao tarlambat.” (Hab. 2:3) Holan tu si Habakuk do dipaboa Debata janji on? Manang marlakku do tong janji on tu hita saonari? Marhite panogu-noguon ni tondi parbadia, disuratton Apostel Paulus do muse hata on tu halak Kristen na tarpaima tu tano na imbaru. (Heb. 10:37) Pos ma rohatta nang pe hira na leleng dope ari ni Jahowa i, ‘pasti do saut i jala dang na lao tarlambat’. w23.04 30 ¶16

Nang pe nga takkas diida nasida akka bukti sian Jahowa, alai godang do halak Israel na so mangakkui si Musa na dipakke Jahowa lao manogu-nogu nasida. (4 Mus. 14:​10, 11) Mulak-ulak do nasida dang mangargai si Musa. Akibatna dang diloas Jahowa nasida masuk tu Tano na Dijanjihon. (4 Mus. 14:30) Alai adong do halak Israel na olo mangihutton petunjuk ni Jahowa. Contohna didok Jahowa do, “Anggo si Kaleb . . . torus do diihutton ibana Au sian nasa rohana.” (4 Mus. 14:24) Dipasu-pasu Jahowa do si Kaleb. Diloas Jahowa do ibana mamillit tano parbagiananna di Kanaan. (Jos. 14:​12-14) Akka pinoppar ni halak Israel na mate di padang belantara pe tong do mangihutton petunjuk ni Jahowa. Tikki dipillit si Musa si Josua lao manggattihon ibana, ‘dipasangap nasida ma si Josua saleleng ni ngoluna’. (Jos. 4:14) Hasilna dipasu-pasu Jahowa do nasida. Boi ma nasida tinggal di Tano na Dijanjihon i.—Jos. 21:​43, 44. w24.02 21 ¶6-7

Tikki dipareso dokter denyut ni naditta, boi ma diboto ibana songon dia kesehatan ni jantungta. Dos songon i ma, boi do taboto sadia balga holongta tu Jahowa molo tapareso sadia balga holongta tu akka dongan. Molo dang togu be holongta tu akka dongan songon najolo, on patuduhon na gale do tong holongta tu Jahowa. Alai molo torus tapatudu holong tu akka dongan, on patuduhon na togu do holongta tu Jahowa. Molo tahilala nungnga lam gale holongta tu akka dongan, ikkon manat do hita. Boasa? Alana i patuduhon nungnga lam gale be holongta tu Jahowa. I do alana takkas dipaingot Apostel Johannes tu hita, “Molo dang dihaholongi sasahalak dongan na niidana, dang boi ibana makkaholongi Debata na so niidana.” (1 Joh. 4:20) Aha do parsiajaranna tu hita? Asa las roha ni Jahowa, ikkon “marsihaholongan” do hita dohot na asing.—1 Joh. 4:​7-9, 11. w23.11 8 ¶3; 9 ¶5-6

Tikki poso dope si Jehoas mate ma bapakna, jala Sintua ni Malim Jehoyada ma na pagodang-godangkon ibana dohot mangajari ibana taringot Jahowa. Jadi boi pe marbisuk si Jehoas, ala ditangihon ibana do nasehat ni si Jehoyada. Alani teladan ni si Jehoyada, gabe dipillit si Jehoas do manomba Jahowa jala diurupi ibana do naposona asa dohot manomba Jahowa. Dang holan i, dipadenggan ibana do muse bagas joro ni Jahowa. (2 Kron. 24:​1, 2, 4, 13, 14) Silehon-lehon na massai arga do molo diajari natua-tuamuna hamu asa makkaholongi Jahowa jala mangihutton standarna. (Poda 2:​1, 10-12) Godang do cara ni natua-tua boi mangalatik hamu. Pasti las do roha ni natua-tuamuna molo olo hamu manangihon poda ni nasida na sian Bibel. Na uppetting, pasti las do roha ni Debata tu hamu jala lam togu ma hubunganmuna tu Ibana. (Poda 22:6; 23:​15, 24) On ma alasanna boasa ikkon tatiru si Jehoas tikki poso dope ibana. w23.09 8-9 ¶3-5

Marjanji do Jahowa tangihononna tangiangta. Ala holong do roha ni Jahowa tu akka naposona na setia, pasti ditangihon Ibana do tangiang ni nasida. (Ps. 10:17; 37:28) Alai on dang patuduhon pasti dilehon Ibana sude pangidoatta. Adong do ra pangidoatta na ikkon tapaima sahat tu na gabe paradeiso tano on. Dipikkirhon Jahowa do kaitan ni tangiangta tu lomo ni rohana. (Jes. 55:​8, 9) Sada tujuan ni Jahowa manoppa tano on, asa holan halak na mangoloi Ibana ma na mangingani tano on. Alai didok Sibolis, boi do undenggan ngolu ni jolma molo mamaretta dirina sandiri. (1 Mus. 3:​1-5) Lao mambuktihon dang toho hata ni Sibolis i, dipaloas Jahowa ma jolma mamaretta dirina sandiri. Akibatna godang ma sitaononta saonari. (Pjm. 8:9) Nungnga takkas be taboto dang na lao salpuhonon ni Jahowa sude sitaononta saonari. w23.11 21 ¶4-5

Didok Jahowa do tu si Abraham, dapotan pasu-pasu do “sude keluarga na di tano on” marhite ibana. Alai sappe marumur 100 taon si Abraham jala marumur 90 taon si Sara, dang marna adong dope anak ni nasida. Sian pandangan ni jolma, hira na so mungkin do si Abraham dohot si Sara boi marianakkon. Sasittongna, boi do on manguji haporseaon ni si Abraham. Alai didok di Bibel, “Porsea jala pos do roha ni si Abraham na boi ibana gabe ama ni godang bangso.” (Rom 4:​18, 19) Ujungna saut do janji na dipaima-ima si Abraham. Tubu ma si Isak, anak na leleng dipaima-ima ibana. (Rom 4:​20-22) Hita pe boi do mambahen las roha ni Debata, gabe ale-alena, jala didok halak na mangulahon na sittong songon si Abraham. On ma na didok si Paulus di suratna, “Sasittongna, dang holan tu [si Abraham] disurat hata na mandok, ‘Alani haporseaonna i didok do ibana mangulahon na sittong.’ Alai dohot do i disurat tu hita. Didok do hita sittong, ala porsea do hita tu Debata na pahehehon Jesus.” (Rom 4:​23, 24) Songon si Abraham, ikkon porsea do hita tu Jahowa, taulahon ma akka ulaon na denggan, jala pos ma rohatta na lao saut do janji ni Jahowa. w23.12 7 ¶16-17

Tikki adong sitaononta na mambahen hita mabiar, adong do na porlu taingot. Diboto Jahowa do songon dia sitaononta i jala diboto Ibana do songon dia perasaanta alani sitaononta i. Contohna diboto Jahowa do dibahen halak Mesir na so denggan tu halak Israel. Alai dang holan i, takkas do diboto Jahowa “songon dia haccit ni sitaonon ni nasida”. (2 Mus. 3:7) Tikki adong sitaonon, olo do sukkun-sukkun rohamuna songon dia cara ni Jahowa mangurupi hamu. Attong aha ma na boi diulahon hamu? Martangiang ma asa boi diida hamu songon dia cara ni Jahowa mangurupi hamu. (2 Raj. 6:​15-17) Olo do ra adong jamita, komentar di parpunguan, publikasi, video, manang lagu di JW Broadcasting na patoguhon hamu. Asing ni i, adong do ra dongan sahaporseaon na mambagihon ayat manang arta na arga sian Bibel na boi patoguhon hamu. Ala nga jotjot tadapot i sude, olo do ra gabe hurang taargai i. Alai sasittongna, hadiah na luar biasa do i sian Jahowa. (Jes. 65:13; Mrk. 10:​29, 30) Sudena i patuduhon na parduli do Jahowa tu hamu. (Jes. 49:​14-16) Jala i patuduhon na boi do pos rohamuna tu Ibana. w24.01 4-5 ¶9-10

Sebelum nakkok Jesus tu surgo, dilehon ibana do tugas tu akka siseanna lao marbarita taringot ibana “di Jerusalem, di sude luat na di Judea, di Samaria, sahat tu ujung ni tano on”. (Ul. 1:8; Luk. 24:​46-48) Dang leleng dukkon i, ditakkup pamimpin ni agama Jahudi ma Apostel Petrus dohot Apostel Johannes jala diboan ma nasida tu Sanhedrin. Diparettahon do nasida asa unang marbarita be, bahkan diancam do nasida. (Ul. 4:​18, 21) Didok si Petrus dohot si Johannes ma, “Hamu sandiri ma na manottuhon, dia do na sittong di jolo ni Debata, manangihon hamu do manang manangihon Debata? Alai dang tarbahen hami mangulahon hatamuna i. Ikkon dipaboa hami do aha naung diida hami dohot na dibege hami.” (Ul. 4:​19, 20) Dung dipalua si Petrus dohot si Johannes, martangiang do akka sisean ni Jesus tu Jahowa asa boi nasida mangulahon lomo ni roha ni Jahowa. Dialusi Jahowa do tangiang ni nasida i.—Ul. 4:31. w23.05 5 ¶11-12

Nungnga marmiliar taon Jesus rap dohot Bapakna di surgo. Alani i hubungan ni nasida ma na ulleleng jala ussolhot sian hubungan ni manang ise pe. Molo tajaha ayat harian sadari on, takkas do dipaboa Jahowa sadia balga holong ni rohana tu Jesus. Sasittongna boi hian do holan didok Jahowa, ‘Las situtu do rohakku mangida Jesus.’ Alai lomo do roha ni Jahowa asa taboto na massai holong rohana tu Jesus. Jadi didok Ibana do, “On do Anakku, haholongakki.” Bangga hian do Jahowa tu Jesus, tarlumobi ala rade Jesus mangalehon ngoluna gabe tobusan. (Eps. 1:7) Jala pos situtu do roha ni Jesus, na massai holong do Bapakna tu ibana. Buktina mulak-ulak do didokkon Jesus na massai holong do Bapakna tu ibana.—Joh. 3:35; 10:17; 17:24. w24.01 28 ¶8

Tabayakkon ma molo adong donganta na paroa-roahon hita. Taboto do dang toho hatana i. Alai adong do halak na porsea tu hatana i. Jala na umparah, dipaboa-boa nasida do gabus i tu halak na asing. Gabe godang ma halak na porsea tu gabus i. Songon dia do perasaanta mamboto on? Pasti lungun do rohatta alana gabe roa ma pandangan ni halak taringot hita. Contoh on mangurupi hita mangattusi songon dia perasaan ni Jahowa tikki didok na so denggan taringot Ibana. Adong do sada suru-suruan na paroa-roahon Ibana tu si Hawa. Sibolis do suru-suruan i. Porsea do si Hawa tu gabus i. Akibatna gabe dialo si Adam dohot si Hawa ma Jahowa. Jala ujungna gabe mardosa jala mate ma sude jolma. (1 Mus. 3:​1-6; Rom 5:12) Asing ni i, gabe godang ma masalah di portibi on songon hamatean, porang, dohot sitaonon. Tottu gabe lungun do roha ni Jahowa alani i. Alai dang gabe mandele Jahowa. Gariada toktong do Ibana “marlas ni roha”.—1 Tim. 1:11. w24.02 8 ¶1-2

Tikki digoda hita, boha do caratta maniru si Josep? Mulai sian saonari, pikkirhon hian ma aha na naeng taulahon tikki digoda. Marlatik ma hita lao manolak akka ulaon na dihasogohon Jahowa, jala unang olo hita mamikkirhon akka ulaon i. (Ps. 97:10; 119:165) Molo nungnga taboto hian aha na ikkon taulahon tikki digoda, gabe dang taulahon be dosa. Nungnga pos be rohamuna on do hasittongan, jala lomo do rohamuna manomba Jahowa sian nasa rohamuna. Alai mungkin adong dope na mambahen ragu hamu lao mangalehon ngolumuna tu Jahowa jala tardidi. Boi do ditiru hamu Raja Daud. Martangiang do ibana tu Jahowa, “Ale Debata, manat ma parrohahon au jala ida ma rohakku. Manat ma parrohahon au, jala ida ma arsak ni rohakku. Ida ma atik na adong do na jahat di rohakku, jala togu-togu ma au di dalan na so adong ujungna.” (Ps. 139:​23, 24) Dipasu-pasu Jahowa do akka “halak na marsitutu mangalului Ibana”. Molo dibahen hamu upaya asa boi mangalehon ngolumuna tu Jahowa jala tardidi, gabe boi ma diida Jahowa na marsitutu do hamu mangalului Ibana.—Heb. 11:6. w24.03 6 ¶13-15

Najolo ditugasson do sintua ni malim manguluhon halak Israel lao manomba Debata. Si Aron ma sintua ni malim halak Israel na parjolo sahali. Dipillit Debata do ibana tikki diresmihon tabernakel. Alai songon na didok Apostel Paulus “mate do akka malim i. Alani i, ikkon gattion ni na asing ma malim na parjolo i lao manorusson ulaon ni nasida”. (Heb. 7:​23-26) Jala ala dang sempurna nasida, ikkon dilehon nasida do pelean lao manesa dosa ni nasida sandiri. Alai imbar situtu do sintua ni malim ni halak Israel najolo tu Sintua ni Malim na umbalga, i ma Jesus Kristus. Jesus Kristus do Sintua ni Malimta. “Marhobas ma ibana di inganan na badia di kemah na sasittongna i. Jahowa do na pajongjokkon i dang jolma”. (Heb. 8:​1, 2) Didok si Paulus “dang porlu [Jesus] gattion ni na asing, ai mangolu do ibana saleleng ni lelengna”. Didok ibana do muse ‘na so ramun do Jesus, jala asing sian halak pardosa’. Jala ‘dang songon sintua ni malim na asing ibana na ikkon ganup ari mangalehon pelean alani dosana’. w23.10 26 ¶8-9

‘Langit na parjolo’ maksudna sistem politik na dirajai Sibolis dohot suru-suruan na jahat. (Mat. 4:​8, 9; 1 Joh. 5:19) Jotjot do dipakke hata “tano” di Bibel, lao manggombarhon jolma na adong di tano on. (1 Mus. 11:1; Ps. 96:1) “Tano na parjolo”, maksudna akka jolma na jahat na mangolu saonari. Dang lao patureon ni Jahowa “langit” dohot “tano” on, alai lao digatti Ibana do i. Digatti Ibana ma langit dohot tano na adong saonari tu “langit na imbaru dohot tano na imbaru”. Langit na imbaru, i ma pamarettaon na baru. Jala tano na imbaru, i ma rakyat na baru na tigor marroha. Jadi lao bahenon ni Jahowa do tano dohot jolma gabe sempurna muse. Songon surirang ni si Jesaya, bahenon ni Jahowa ma saluhut tano on gabe inganan na bagak songon Taman Eden. Dipaimbaru ma hita sude, dipamalum ma nasa sahit. Lao dipamalum ma na pakpang, na buta, dohot halak na so marbinege. Jala mulak mangolu muse halak naung mate.—Jes. 25:8; 35:​1-7. w23.11 4 ¶9-10

Satokkin nai lao masa nama “hasusaan bolon”. (Mat. 24:21) Alai dang songon godang bencana na asing, nungnga taboto memang ikkon masa do i. Hira-hira 2.000 taon naung salpu, dipaingot Jesus do akka siseanna asa mangarade tu ari i. Molo rade hita, gabe ummura ma hita martahan mangalewati hasusaan bolon i, jala boi mangurupi na asing mangulahon na sarupa. (Luk. 21:36) Di situasi sisongon i, ikkon toktong do hita sabar jala togu. Taoloi ma Jahowa jala porsea ma hita tu Ibana na linggomanna do hita. Boha do molo taboto adong akka donganta na agoan arta? (Hab. 3:​17, 18) Porlu do di hita asi ni roha asa tergerak hita mangurupi nasida. Tikki marsada akka bangso menyerang hita, songon dia do reaksitta molo dipangido hita asa rap tinggal saleleng piga-piga tikki dohot dongan sahaporseaon? (Hes. 38:​10-12) Porlu do togu holongta tu akka dongan asa boi hita mangalewati situasi na maol on. w23.07 2 ¶2-3

Boi do pasangan naung menikah maniru teladan ni si Akuila dohot si Priskilla, sapasang suami istri na direspek halak Kristen di abad na parjolo. (Rom 16:​3, 4) Rap karejo do nasida, marbarita na uli, dohot mangurupi na asing. (Ul. 18:​2, 3, 24-26) Gariada, sai rap do goar ni nasida dipaboa di akka ayat ni Bibel. Songon dia do suami dohot istri boi maniru nasida? Pikkirhon ma akka kegiatan na porlu diulahon hamu dohot pasanganmuna. Boi do hamu rap mangulahon i daripada mangulahon i sahalakmuna? Misalna, rap marbarita do si Akuila dohot si Priskilla. Boi do dibahen hamu jadwal asa rap marbarita na uli? Asing ni i, rap karejo do si Akuila dohot si Priskilla. Bisa jadi dang sarupa karejomuna dohot pasanganmuna. Alai boi do rap hamu makkarejohon tugas di jabu? (Pjm. 4:9) Molo marsiurupan hamu makkarejohon tugas di jabu, gabe songon sada tim ma hamu jala gabe adong ma kesempatanmuna makkata-hatai. w23.05 22-23 ¶10-12

Sude do jolma pasti hea mabiar. Contohna si Daud. Tikki naeng dipamate Raja Saul ibana, lari do ibana tu Kota Gat, huta ni halak Palistim. Alai di pudian ni ari, diboto si Akis raja ni halak Gat i ma si Daud do hape tentara na pamatehon “marpulu ribu” halak Palistim. “Gabe mabiar situtu” ma si Daud alani i. (1 Sam. 21:​10-12) Aha ma na diulahon si Daud asa boi ibana tetap tenang? Di Psalmen 56, dipaboa si Daud do songon dia perasaanna tikki di Gat, di kota ni Raja Akis. Di psalmen i, takkas do dipaboa si Daud aha na mambahen ibana mabiar. Alai dipaboa ibana do tong aha na mambahen ibana toktong tenang. Tikki mabiar ibana, pos do rohana tu Jahowa. (Ps. 56:​1-3, 11) Jala memang diurupi Jahowa do ibana. Buktina dipasu-pasu Jahowa do rencana ni si Daud asa boi malua sian Raja Akis. Dibahen si Daud do dirina songon halak na rittik. Hira na so masuk akkal do rencanana i, alai marhasil do i. Gabe dang jadi ibana dipamate Raja Akis.—1 Sam. 21:13–22:1. w24.01 2 ¶1-3

Ise do na dimaksud di ayat sadari on? Akka halak na miniahan naung dipahehe tu surgo. Andorang so marujung hasusaan bolon, nungnga diangkat be halak na miniahan i tu surgo. Jala pittor marporang do nasida annon rap dohot Jesus. Dung nakkok annon nasida tu surgo, lao marporang ma nasida rap dohot Jesus dohot suru-suruanna lao mangalo musu ni Debata. Tabayakkon ma, saonari piga-piga donganta na miniahan i nungnga matua jala gale. Alai dung nakkok nasida annon tu surgo, gabe margogo ma nasida jala mardaging na so boi mate. Marporang ma nasida raphon dohot Jesus. Dung sae porang Armagedon, rap ma nasida dohot Jesus lao mangurupi akka halak asa gabe sempurna. Takkas ma, unggodang do na boi diulahon nasida annon lao mangurupi akka dongan di tano on, sian tikki di tano on dope nasida. w24.02 6-7 ¶15-16

Adong do piga-piga halak na ragu dope naeng mangalehon ngoluna tu Jahowa jala tardidi. Olo do ra ala mabiar nasida dung tardidi annon gabe diulahon nasida dosa na balga jala ujungna dipecat sian huria. Molo songon i na dihilala hamu, pos ma rohamuna pasti diurupi Jahowa do hamu asa boi ‘marpangalaho hombar tu lomo ni rohana’. (Kol. 1:10) Dilehon Jahowa do tong gogo tu hamu asa boi mangulahon na sittong. Jala nungnga godang na diurupi Jahowa mangulahon i. (1 Kor. 10:13) Buktina holan saotik do halak na dipecat sian huria. Takkas ma, diurupi Jahowa do naposona asa toktong setia tu Ibana. Ala jolma na so sempurna dope hita, olo do targoda hita lao mangulahon na sala. (Jak. 1:14) Alai hita do na mamutusson aha na naeng taulahon tikki targoda hita. Hita sandiri do na manottuhon naeng gabe halak na songon dia hita. Adong do piga-piga halak na mandok, dang boi dirajai ibana dirina. Sasittongna dang toho i, alana boi do talatik diritta asa unang mangulahon na sala. w24.03 5 ¶11-12