Juni

Dipasu-pasu Jahowa do halak Kristen di abad na parjolo ala rade menyesuaihon diri tikki muba situasi ni nasida. Jotjot do nasida dianiaya, sipata masa do i di na so panagaman ni nasida. Parrohahon ma na masa tu si Barnabas dohot Apostel Paulus tikki marbarita na uli nasida di Listra. Mulana disambut akka halak na olo manangihon do nasida, alai ro ma akka halak na marsogo ni roha. “Dihasut nasida ma akka jolma” i, jala didangguri nasida ma Apostel Paulus. Dung i ditinggalhon ma ibana ala dirippu nungnga mate. (Ul. 14:19) Alai nang pe songon i, torus do marbarita na uli si Barnabas dohot si Paulus didia pe nasida tinggal. Hasilna, “godang ma na gabe sisean” jala lam togu do haporseaon ni akka dongan alani hata dohot tindakan ni nasida. (Ul. 14:​21, 22) Godang do manfaatna ala torus si Barnabas dohot si Paulus marbarita na uli nang pe dianiaya nasida. Dos songon i ma, molo torus hita mangulahon akka na dipangido Jahowa, pasti dipasu-pasu Ibana do hita. w23.04 16-17 ¶13-14

Jotjot do terancam ngolu ni si Daud alani musu jala jotjot do ibana mangido bantuan ni Jahowa di tangiangna. Pos do roha ni si Daud na manurat Psalmen i, na dialusi Jahowa do tangiangna. Hamu pe boi do songon i. Bibel paposson rohatta na dilean Jahowa do tu hita bisuk dohot gogo na tahaporluhon lao martahan. Dipakke Jahowa do muse akka dongan sahaporseaon manang akka halak na so manomba Ibana lao mangurupi hita. Nang pe dang songon cara na taharappon dialusi Jahowa tangiangta, alai taboto do pasti dialusi do i. Diparade Ibana do na tahaporluhon di tikki na pas. Alani i torus ma hamu martangiang jala porsea ma na ditangihon Jahowa do hamu. Pos ma rohamuna na parduli do Jahowa tu hamu saonari. Jala annon di tano na imbaru “lehononna ma na pinangido ni roham”.—Ps. 37:4. w23.05 8 ¶4; 13 ¶17-18

Pikkirhon ma manfaatna molo dicapai hamu cita-citamuna. Akka aha ma manfaatna molo fokus hamu tu cita-citamuna? Molo berupaya hamu meningkatton panjahaion Bibel dohot martangiang, pikkirhon ma songon dia i boi patoguhon hubunganmuna tu Jahowa. (Ps. 145:​18, 19) Molo berupaya hamu padenggatton sifatmuna, pikkirhon ma manfaatna songon dia i boi mambahen lam denggan hubunganmuna tu na asing. (Kol. 3:14) Mardongan ma dohot akka halak na manjujui hamu lao mencapai cita-citamuna. (Poda 13:20) Sipata adong do tikkina dang semangat hita. Maksudna na so porlu be hita berupaya mencapai tujuanta molo songon i? Daong. Boi do tacapai cita-citatta nang pe hurang semangat hita. Memang dang sai mura on, porlu do hita mangarajai diri. Alai pasti marlas ni roha do hita molo nungnga tercapai cita-citatta i. w23.05 27-28 ¶5-8

Molo taboto na martanggung jawab do hita tu keputusan na tabahen, gabe tergerak ma hita mangakkui dosatta, padenggatton pangalahotta, jala dang taulahon be kesalahan i. Molo taulahon i, boi ma hita toktong marlojong di parlumbaan i. Molo adong keputusanmuna na sala na so boi be diuba, unang ma gabe habis tikki dohot gogomuna lao mambuktihon dang hamu na sala, manang gabe disalahon hamu na asing. Akkui ma kesalahanmuna, jala sian saonari berupaya ma hamu mambahen na terbaik. Molo merasa bersalah hamu, martangiang ma tu Jahowa. Serep ma rohamuna mangakkui i, jala pangido ma asa disalpuhon kesalahanmuna i. (Ps. 25:11; 51:​3, 4) Minta maaf ma tu halak na haccit rohana dibahen hamu. Jala molo porlu, pangido ma bantuan ni akka sintua. (Jak. 5:​14, 15) Marsiajar ma sian kesalahanmuna i, jala unang be ulangi. Molo diulahon hamu i, hilalaonmuna ma asi ni roha ni Jahowa jala urupanna do hamu.—Ps. 103:​8-13. w23.08 28-29 ¶8-9

Diurupi si Jehoyada do Raja Jehoas gabe halak na burju. Hasilna tikki poso dope raja i, lomo do rohana mambahen las roha ni Jahowa. Alai dung mate si Jehoyada, ditangihon si Jehoas do akka pejabat na murtad. (2 Kron. 24:​4, 17, 18) Massai haccit do roha ni Jahowa mangida i, alai torus do ‘disuru Jahowa akka panurirang pasingotton nasida asa mulak tu Ibana. Nang pe songon i, dang olo nasida manangihon’. Dang olo halak Israel manangihon si Sakaria, anak ni si Jehoyada. Hape panurirang dohot malim do si Sakaria. Na upparah muse, dipamate Raja Jehoas do si Sakaria. (2 Kron. 22:11; 24:​19-22) Dang dipartahatton si Jehoas biar ni rohana tu Jahowa. Didok Jahowa do, “Leas do rohakku tu halak na leas rohana tu Au.” (1 Sam. 2:30) Sada tikki, marporang ma tentara ni si Jehoas mangalo tentara ni Siria. Talu do tentara ni si Jehoas, hape unggodang do tentarana sian tentara ni Siria i. Lukka parah do si Jehoas di parporangan i. (2 Kron. 24:​24,25) Dung lao tentara Siria i, dipamate akka parkarejona do si Jehoas, ala dipamate ibana si Sakaria. w23.06 18-19 ¶16-17

Dikunjungi si Paulus do Kota Epesus lao marbarita na uli dohot mangajari. (Ul. 19:​1, 8-10; 20:​20, 21) Holong do rohana tu akka dongan na disi, jala lomo do rohana mangurupi nasida asa toktong setia tu Jahowa. Andorang so gabe halak Kristen, manomba akka debata na so sittong do halak Epesus jala mangulahon spiritisme. Lomo do roha ni halak Epesus mangulahon seks na so patut, jala dang maila nasida mangulahon i. Taringot seks do na jotjot dihatai di pentas drama dohot di perayaan agama ni nasida. (Eps. 5:3) Bibel mandok, “Dang adong aturan di ngolu ni nasida.” Di bahasa Junani lapatanna “tikki diulahon nasida na sala, dang terganggu be panggora ni roha ni nasida”. (Eps. 4:​17-19) Songon i do halak Kristen di Epesus andorang so marsiajar nasida taringot standar ni Jahowa. Alani i ma didok si Paulus “di haholomon do pikkiran ni nasida jala pulik do nasida sian hangoluan na nilehon ni Debata”. Alai adong do sian halak Epesus na maninggalhon haholomon. w24.03 20 ¶2, 4; 21 ¶5-6

Kerja keras do si Gidion mangulahon tugasna gabe sahalak panguhum. Tikki melarikan diri halak Midian saleleng parporangan di tonga borngin, dilele si Gidion do nasida mulai sian Rura Jisreel sahat tu Sunge Jordan. (Pangh. 7:22) Gabe so do si Gidion tikki sahat di Sunge Jordan? Daong. Nang pe nungnga loja ibana dohot 300 tentarana, menyeberang do nasida jala torus mangalele halak Midian. Ujungna boi ma dapot ni nasida halak Midian jala ditaluhon ma nasida. (Pangh. 8:​4-12) Pos do roha ni si Gidion lehonon ni Jahowa do gogo tu ibana, jala memang i do na dibahen Jahowa. (Pangh. 6:​14, 34) Hea do mardalan pat si Gidion dohot akka tentarana mangalele dua raja ni Midian na naek unta. (Pangh. 8:​12, 21) Alai diurupi Jahowa do halak Israel mangalele jala manaluhon nasida. Akka sintua pe boi do mangandalhon Jahowa, na so hea “loja manang gale”. Pasti lehonon ni Jahowa do gogo tu nasida tikki sadihari pe.—Jes. 40:​28, 29. w23.06 6 ¶14, 16

Boi do hita togu dang soal tantangan manang aha pe na taadopi. Alani i marhaposan ma tu Jahowa. Parrohahon ma songon dia si Barak marhasil ala porsea tu Jahowa. Tikki i dang adong sinjata ni tentara ni Israel lao marporang. Alai disuru Jahowa do si Barak dohot tentarana marporang mangalo tentara ni Kanaan na marsinjata lengkap. Komandanna margoar si Sisera (Pangh. 5:8) Disuru Panurirang borua Debora ma si Barak asa turun lao marporang di inganan na rata mangalo si Sisera dohot 900 kareta porangna. Nang pe diboto si Barak pasti maol do annon ibana mangalo akka tentara na mamakke kareta porang i, alai dioloi ibana do paretta i. Tikki turun akka tentara sian Dolok Tabor, diparo Jahowa ma udan na doras sian langit. Gabe sakkot ma kareta ni Sisera di gambo. Jala dibahen Jahowa do monang si Barak. (Pangh. 4:​1-7, 10, 13-16) Songon i ma, molo porsea hita tu Jahowa jala unduk tu petunjukna marhite organisasina, boi do hita marhasil. w23.07 19 ¶17-18

Massai penting do hasabaron i asa boi tadapot hangoluan saleleng ni lelengna. Songon naposo ni Jahowa na setia najolo, ikkon sabar do hita paimahon Jahowa pasautton janjina. (Heb. 6:​11, 12) Dipatudos do di Bibel situasitta tu sahalak partani. (Jak. 5:​7, 8) Kerja keras do sahalak partani manuan dohot maniram suan-suananna. Alai dang diboto ibana andigan i tubu. Jadi ikkon sabar do partani jala pos rohana pasti panen do ibana annon. Dos songon i ma, toktong ma hita sibuk di ulaonta manomba Jahowa, nang pe ‘dang taboto andigan ro Tuanta i’. (Mat. 24:42) Sabar do hita paimahon, alana pos do rohatta pasti saut do sude janji ni Jahowa di tikkina. Molo dang sabar hita gabe loja ma hita paimahon, lam mandao sian hasittongan, jala gabe fokus ma hita mangalului hasonangan saonari. Alai molo sabar hita, gabe boi ma hita martahan sahat tu ujungna jala selamat.—Mik. 7:7. w23.08 22 ¶7

Molo tabandikkon surirang di Daniel 2:​41-43 tu surirang na asing di bukku Daniel dohot Pangungkapon, gabe taboto ma pat ni patung i manggombarhon kuasa dunia Anglo-Amerika. Pamarettaon na paling marhuaso do i di tikkitta saonari. Taringot kuasa dunia on, didok si Daniel, ‘gogo do deba bagian ni pamarettaon i, alai gale do na deba nai’. Boasa didok songon i? Alana akka rakyatna na digombarhon tano liat na lembek, dang boi marsada dohot nasida na songon bosi. Adong do dua hatorangan na taboto sian patung i, tarlumobi di bagian patna. Parjolo, dipatudu kuasa dunia Anglo-Amerika do na marhuaso nasida. Misalna Amerika Serikat dohot Inggris do negara na monang di Perang Dunia I dohot Perang Dunia II. Alai lam gale do kuasa dunia on ala dang marsada rakyatna jala mangalo do nasida tu pamaretta. Na paduahon, Anglo-Amerika do kuasa dunia na parpudi na mamaretta tikki ro Harajaon ni Debata. w23.08 10-11 ¶12-13

Sipata marsak do si Daud alani godang ni sitaononna. (Ps. 18:​4, 5) Alai alani holong ni Jahowa, gabe dipatogu do muse ibana. Diboan Jahowa do ibana tu “inganan parmahanan na lomak”, jala ditogu-togu do ibana maradi tu “inganan na godang aekna”. Gabe margogo ma muse si Daud jala toktong marlas ni roha manomba Jahowa. (Ps. 18:​28-32; 23:2) Dos songon si Daud ma hita saonari. Alani holong ni Jahowa, gabe boi ma martahan hita mangadopi sitaononta. (And. 3:22; Kol. 1:11) Jotjot do terancam ngolu ni si Daud, jala gogo do akka musuna. Alai alani holong ni Jahowa tu ibana, gabe aman ma dihilala si Daud. Boi do dihilala si Daud na sai dijaga Jahowa do ibana manang songon dia pe situasina. Gabe dipapos ma muse rohana. Alani i, didok si Daud ma di endena, “Dipalua [Jahowa] do au sian sude na mambahen au mabiar.” (Ps. 34:4) Memang, hea do si Daud mabiar situtu. Alai ala diboto ibana na dihaholongi jala sai didongani Jahowa ibana, gabe dang mabiar be ibana. w24.01 30 ¶15-17

Marsiajar ma hita sian keputusan ni si Jehoas na so denggan. Dung mate Sintua ni Malim Jehoyada, mardongan ma si Jehoas dohot akka halak na so denggan. (2 Kron. 24:​17, 18) Ditangihon ibana do akka pejabat ni Juda na so makkaholongi Jahowa. Sasittongna ikkon dipadao ibana do dirina sian akka halak na mangulahon na so denggan. Alai ditangihon ibana do nasida. Gariada tikki dipasingot sepupuna si Sakaria ibana, gabe dipamate ibana do si Sakaria. (2 Kron. 24:​20, 21; Mat. 23:35) Massai kejam jala oto do si Jehoas. Mulana burju do si Jehoas, alai lam leleng gabe manimbil do ibana sian Jahowa jala gabe pambunu. Ujungna, dipamate hatobanna do ibana. (2 Kron. 24:​22-25) Autsugari toktong ditangihon ibana Jahowa, dohot naposona na setia, dang songon i ngoluna. w23.09 9 ¶6

Diboto Jesus do na boi si Petrus toktong setia. Lambok do Jesus mandok tu si Petrus, “Unang pola mabiar ho.” Balga do pengaruh ni hata ni Jesus i tu si Petrus. Alani i, gabe ditinggalhon si Petrus dohot si Andreas ma ulaon ni nasida, i ma manjala dekke. Jala gabe mangihutton Jesus ma nasida. Dipasu-pasu Jahowa do nasida ala dibahen nasida keputusan sisongon i. (Mrk. 1:​16-18) Godang do pasu-pasu na dapot ni si Petrus, ala gabe sisean ni Jesus ibana. Boi ma diida ibana Jesus pamaluppon na marsahit, mangusir suru-suruan na jahat, jala pahehehon halak na mate. (Mat. 8:​14-17; Mrk. 5:​37, 41, 42) Dapot ni si Petrus do muse parnidaan taringot Jesus na lao gabe raja di Harajaon ni Debata. Jala balga do pengaruh ni parnidaan i tu ibana. (Mrk. 9:​1-8; 2 Ptr. 1:​16-18) Autsugari dang gabe sisean ni Jesus ibana, pasti dang boi dapotna akka pasu-pasu i. Massai las do roha ni si Petrus ala torus ibana berjuang mangatasi perasaan negatifna, boi ma dapotna akka pasu-pasu i! w23.09 21 ¶4-5

Di surat ni Apostel Petrus na parjolo, didok ibana do, “Marsitutu ma hamu marsihaholongan.” Holong sisongon i boi do manutup godang hasalaan. (1 Ptr. 4:8) Mungkin hea do diingot si Petrus na diajarhon Jesus tu ibana piga-piga taon sebelumna taringot manalpuhon hasalaan. Di tikki i, olo do ra didok roha ni si Petrus nungnga gabe halak na burju ibana ala olo ibana manalpuhon hasalaan ni donganna “sappe pitu hali”. Alai diajarhon Jesus do tu ibana asa manalpuhon hasalaan sappe “77 hali”, lapatanna dang adong batasna. Dang holan tu si Petrus sipasingot on, alai dohot do tu hita. (Mat. 18:21) Molo maol hamu mangulahon i, unang ma metmet rohamuna. Sude do hita dang sempurna, alani i sipata maol do hita manalpuhon hasalaan ni donganta. Alai saonari na paling penting, berupaya ma hamu manalpuhon hasalaan ni donganmuna jala mardame dohot ibana. w23.09 29 ¶12

Nang pe di bagasan butuha ni dekke, pos do roha ni si Jona pasti ditangihon Jahowa do tangiangna. Dung i dipalua Jahowa ma si Jona jala gabe rade ma ibana mangulahon tugas na sian Jahowa. (Jona 2:10–3:4) Hea do hamu gabe paholsohu alani sitaononmuna jala sappe dang diboto hamu aha sidokkononmuna tikki martangiang? Manang, hea do dihilala hamu nga palojahu hamu sappe dang tolap be lao belajar pribadi? Ingot ma, takkas do diattusi Jahowa situasimuna. Jadi nang pe singkat tangiangmuna, pos ma rohamuna, pasti dilehon Jahowa do aha na dihaporluhon hamu. (Eps. 3:20) Molo maol hamu manjaha manang belajar pribadi ala marsahit hamu, palojahu, manang paholsohu, boi do dibege hamu rekaman audio ni Bibel manang rekaman audio ni publikasitta. Asing ni i, boi do dibege hamu akka endetta manang manotton video sian jw.org. Lomo do roha ni Jahowa mambahen hita margogo. Alani i, asa boi dapotta gogo na sian Jahowa i, martangiang ma hita tu Ibana jala talului ma alus ni tangiangta i sian Bibel dohot sian akka publikasitta. w23.10 13 ¶6; 14 ¶9

Sarupa do akka na di bagasan ni tabernakel dohot akka na di bagasan bagas joro na di Jerusalem. Adong dua ruangan disi, i ma “Inganan na Badia” dohot “Inganan na Massai Badia”. Dibahen do tire gabe pembatas ni dua ruangan i. (Heb. 9:​2-5; 2 Mus. 26:​31-33) Di Inganan na Badia adong do inganan ni lampu na sian mas, langgatan manutung dupa, dohot inganan ni roti pelean. Holan malim na “dipillit” do na diloas masuk tusi lao mangulahon tugas ni nasida. (4 Mus. 3:​3, 7, 10) Molo di Inganan na Massai Badia, adong do disi poti parpadanan na sian mas na manggombarhon di tonga-tonga ni nasida do Jahowa. (2 Mus. 25:​21, 22) Holan sintua ni malim do na boi mangalewati tire tu Inganan na Massai Badia. Jala holan sahali sataon do ibana masuk tusi, i ma di Ari Pardamean. (3 Mus. 16:​2, 17) Masuk do ibana tusi mamboan mudar ni binatang lao manesa dosana sandiri dohot dosa ni bangso Israel. Lam leleng lam takkas do diurupi Jahowa hita mangattusi akka na adong di tabernakel.—Heb. 9:​6, 7. w23.10 27 ¶12

Jotjot do dipaboa di Bibel na ikkon “marsihaholongan” do hita. (Joh. 15:12; Rom 13:8; 1 Tes. 4:9; 1 Ptr. 1:22; 1 Joh. 4:11) Alai sifat na adong di bagasan roha do holong i. Jala molo dang tapatudu i, dang boi diboto akka dongan na holong rohatta tu nasida. Attong songon dia ma carana patuduhon holong tu akka dongan? Tapatudu ma i sian na tahatahon dohot na taulahon. Godang do carana lao patuduhon na holong rohatta tu akka dongan. Misalna didok do di Bibel, “Hatahon hamu na sittong tu donganmuna.” (Sak. 8:16) “Toktong ma hamu mardame dohot akka donganmuna.” (Mrk. 9:50) “Parjolo ma hamu pasangappon halak na asing.” (Rom 12:10) ‘Burju ma hamu manjalo donganmuna na asing.’ (Rom 15:7) ‘Rade ma hamu manalpuhon hasalaan ni na asing.’ (Kol. 3:13) “Toktong ma hamu masiurupan tikki masa hasusaan.” (Gal. 6:2) “Patogu hamu ma roha ni halak na asing.” (1 Tes. 4:18) “Apuli ma na asing.” (1 Tes. 5:​11, surat na di toru.) ‘Masitangiangan ma hamu.’—Jak. 5:16. w23.11 9 ¶7-8

Ikkon togu do haporseaotta tikki mambahen keputusan ganup ari. Misalna tikki mamillit dongan, hiburan, pendidikan, parkarejoan, pasangan, manang mamutusson lao marianakkon do hita manang na dang. Denggan do molo tasukkun diritta: ‘Sian pilihan na hubahen, hupatudu do na parsatokkinan portibi saonari on jala lao ro ma tano na imbaru manggattihon i? Manang sarupa do pilihan na hubahen songon pilihan ni akka halak na so porsea tu hangoluan salelengna?’ (Mat. 6:​19, 20; Luk. 12:​16-21) Molo togu haporseaotta tu tano na imbaru, gabe tabahen ma keputusan na terbaik. Ikkon togu do muse haporseaotta tikki masa sitaonon di ngolutta. Olo do dianiaya hita, marsahit na parah, manang mangadopi situasi na asing na mambahen hita kecil hati. Di mulana olo do tahilala sanggup do hita martahan mangadopi sitaonon i. Alai molo jotjot jala leleng masa sitaonon i, porlu do haporseaon na togu asa boi hita martahan jala torus marlas ni roha manomba Jahowa.—1 Ptr. 1:​6, 7. w23.04 27 ¶4-5

Dipangido Jahowa do asa sadalan na taulahon dohot na tatangiakkon. Contohna adong ma sahalak donganta na martangiang tu Jahowa asa diurupi ibana manjuppangi bosna lao mangido ijin dang masuk karejo, asa boi dohot tu parpunguan regional. Songon dia do Jahowa mangalusi tangiangna? Olo do ra dibahen Jahowa ibana asa barani manjuppangi bosna. Alai ikkon adong do na diulahon ibana. Ikkon dijuppangi ibana do bosna i lao mangido ijin. Olo do ra ikkon piga-piga hali ibana mangido ijin tu bosna. Manang ikkon minta tolong ibana tu dongan sakarejona asa margatti ari ni nasida karejo. Dipangido Jahowa do asa torus tatangiakkon i. Sian hata ni Jesus na disurat di Bibel boi ma taboto, adong do piga-piga tangiangta na so pittor dialusi Debata. (Luk. 11:9) Alai unang ma hita marnaloja! Torus ma tatangiakkon i. (Luk. 18:​1-7) Alana on patuduhon na massai penting do pangidoatta i jala porsea hita na sanggup do Jahowa mangurupi hita. w23.11 22 ¶10-11

Marjanji do Jahowa tu ale-alena si Abraham, na lao mandapot pasu-pasu sude bangso di tano on alani ibana. (1 Mus. 15:5; 22:18) Ala togu do haporseaon ni si Abraham tu Debata, pos do rohana na lao saut do janji ni Debata. Alai dung 100 taon umur ni si Abraham jala 90 taon umur ni istrina, dang marna adong gelleng ni nasida. (1 Mus. 21:​1-7) Nang pe songon i didok Bibel, “Porsea jala pos do roha ni si Abraham na boi ibana gabe ama ni godang bangso.” (Rom 4:18) Taboto, saut do na dipaima-ima si Abraham i. Dung leleng ibana paima-imahon, tubu ma anakna si Isak. Aha do na mambahen toktong pos roha ni si Abraham tu janji ni Debata i? Ala massai jonok do hubungan ni si Abraham tu Jahowa, “pos situtu do rohana pasauton ni Debata do sude janjina i”. (Rom 4:21) Lomo do roha ni Jahowa mangida si Abraham. Didok ma ibana halak na mangulahon na sittong alani haporseaonna.—Jak. 2:23. w23.12 8 ¶1-2

Asa boi akka bawa na poso gabe halak na boi diandalhon, ikkon ringgas do nasida mangulahon tugas ni nasida jala martanggung jawab. Jesus ma teladan na sempurna. Martanggung jawab do Jesus tu karejona, jala dang halak na gumarapus ibana. Alani i, boi ma ibana pasaehon sude tugas na dilehon Jahowa tu ibana, nang pe dang mura mangulahon i. Jala ala holong do rohana tu jolma tarlumobi tu akka siseanna, olo do ibana mangalehon ngoluna tu nasida. (Joh. 13:1) Alani i, tiru hamu ma Jesus. Marsitutu ma hamu pasaehon tugasmuna. Molo dang diboto hamu songon dia carana, serep ma rohamuna. Sukkun ma akka dongan bawa na togu haporseaonna tu Jahowa. Unang ma asal sae hamu mangulahon tugasmuna. (Rom 12:11) Ulahon ma i sian nasa roha “songon tu Jahowa, dang tu jolma”. (Kol. 3:23) Memang sude do hita dang sempurna, termasuk ma hamu. Olo do ra dibahen hamu kesalahan. Alani i serep ma rohamuna mangakkui kesalahanmuna i.—Poda 11:2. w23.12 26 ¶8

Tottu las do rohatta tikki tardidi hita jala gabe bagian sian keluarga ni Jahowa. Sada hasangapon do boi marale-ale tu Jahowa. Didok si Daud do, “Marlas ni roha ma halak na pinillitmu, na binoanmu lao tinggal di alamanmu.” (Ps. 65:4) Dang sude halak dipillit Jahowa lao gabe keluargana. Halak na dipillit Jahowa, i ma halak na mambuktihon na lomo do roha ni nasida marale-ale tu Ibana. (Jak. 4:8) Sada hasangapon do molo dilehon hamu ngolumuna tu Jahowa jala tardidi. Gabe pos ma rohamuna ‘lao usehonon ni Jahowa do pasu-pasu tu hamu sappe so adong be na hurangan’. (Mal. 3:10; Jer. 17:8) Tikki tardidi hamu, i ma mulana dilehon hamu ngolumuna tu Jahowa. Pasti lomo do rohamuna manggohi janjimuna i, jala toktong setia tu Jahowa nang pe godang tantangan dohot godaan na ro. (Pjm. 5:​4, 5) Ala nungnga gabe sisean ni Jesus hamu, ihutton ma teladan ni Jesus jala ulahon ma parettana sian nasa tolapmuna.—Mat. 28:​19, 20; 1 Ptr. 2:21. w24.03 8 ¶1-3

Boha do molo dang dinikmati hamu dohot pasanganmuna tikki rap hamu na dua? Aha do na boi diulahon hamu? Ingot ma api unggun. Tottu dang pittor balga apina tikki dipagalak. Ikkon palan-palan do ditambai sobanna asa boi balga apina. Dos songon i ma, coba ma lehon tikki ganup ari asa boi rap dohot pasanganmuna nang pe holan satokkin. Ulahon ma akka kegiatan na boi dinikmati hamu na dua. (Jak. 3:18) Molo dimulai hamu i sian akka na sederhana, gabe lam tamba ma holongmuna tu pasanganmuna. Massai penting do patuduhon sangap tu pasanganmuna. Sarupa do i songon oksigen na mambahen galak api unggun. Molo dang adong oksigen, pittor mittop ma apina i. Songon i ma, molo dang dipatudu suami dohot istri sangap tu pasanganna, boi do hatop ngali holong ni nasida. Alai molo dipatudu nasida i, lam marsihaholongan ma nasida. Alai porlu diingot hamu dang soal aha na dibahen hamu lao patuduhon sangap tu pasanganmuna, na paling penting ikkon boi do pasanganmuna merasa na diargai do nasida. w23.05 22 ¶9; 24 ¶14-15

Di Bibel dipaboa do taringot akka naposo ni Debata na mabiar jala marsak alani musu manang masalah na asing. (Ps. 18:4; 55:​1, 5) Dos songon i ma hita saonari. Olo do taadopi tantangan di sikkola, di tempat karejo, sian keluargatta, manang sian pamaretta. Asing ni i, mabiar do hita mate alani sahitta. Ala songon i situasitta, olo do mabiar hita dos songon dakdanak. Alai songon dia do Jahowa mangurupi hita? Marjanji do Jahowa lao apulanna do hita jala bahenonna las rohatta. Alani i jotjot ma martangiang tu Jahowa dohot manjaha Bibel. (Ps. 77:​1, 12-14) Molo nga terbiasa hamu mangulahon i, pittor diboto hamu ma aha na porlu diulahon hamu tikki marsak, i ma mangido bantuan ni Jahowa. Paboa ma tu Jahowa aha na mambahen hamu mabiar jala holsoan. Dung i jaha ma Bibel. Tikki dijaha hamu Bibel, dos songon na makkatai do Jahowa tu hamu. Jala i ma cara ni Jahowa mangapuli rohamuna.—Ps. 119:28. w24.01 24-25 ¶14-16

Asa boi tacapai cita-citatta, ikkon balga do keinginanta. Molo balga keinginan ni sasahalak, pasti berupaya keras do ibana mencapai cita-citana i. Martangiang ma tu Jahowa asa ditambai keinginanmuna. Boi do Jahowa mangalehon tondi parbadiana asa lam tamba keinginanta lao mencapai cita-citatta. Sipata olo do tabahen cita-cita ala taboto ikkon taulahon i, jala denggan do i. Alai boha do molo dang adong keinginanta lao mencapai i? Rimangi ma sude naung dibahen Jahowa tu hamu. (Ps. 143:5) Dirimangi Apostel Paulus do asi ni roha ni Debata na massai balga tu ibana, jala i ma na mangonjar rohana marsitutu melayani Jahowa. (1 Kor. 15:​9, 10; 1 Tim. 1:​12-14) Dos songon i ma, molo lam jotjot hamu mangarimangi sude naung dibahen Jahowa tu hamu, gabe lam tergerak ma rohamuna lao mencapai cita-citamuna.—Ps. 116:12. w23.05 27 ¶3-5

Boi do tabahen las roha ni Debata molo tapuji goarna. (Ps. 69:​30, 31) Alai, na songon jolma do Debata na ikkon dipuji asa las rohana? Tottu daong. Molo tapuji Bapakta Jahowa, boi ma tabuktihon dang toho gabus ni Sibolis taringot hita. Didok Sibolis dang adong jolma na toktong setia mambela goar ni Jahowa, tarlumobi tikki marsitaonon. Didok Sibolis, pasti ditinggalhon jolma do Jahowa, molo didok roha ni nasida dang adong uttungna manomba Jahowa. (Job 1:​9-11; 2:4) Alai toktong do si Job setia tu Debata. Jala dibuktihon ibana do na pargabus Sibolis. Boha molo hamu? Olo do hamu toktong setia tu Debata? Sude do hita boi mamillit naeng mambela Jahowa manang na dang. Molo lomo rohatta mambahen las roha ni Jahowa, toktong ma hita setia tu Ibana. (Poda 27:11) Sada hasangapon do di hita boi mangulahon i. w24.02 8-9 ¶3-5

Martaon-taon dukkon jaman ni si Musa dohot si Josua, dipillit Jahowa do akka panguhum lao manogu-nogu naposona. Jala dung mamaretta akka raja di Israel, dipillit Jahowa ma akka panurirang lao manogu-nogu naposona. Dioloi akka raja na setia do petunjuk sian akka panurirang i. Contohna, olo do Raja Daud manjalo sipasingot sian Panurirang Natan. (2 Sam. 12:​7, 13; 1 Kron. 17:​3, 4) Raja Jehosapat pe olo do mangido petunjuk sian Panurirang Jehasiel, jala dijujui ibana do halak Juda asa ‘porsea tu akka panurirang ni Jahowa’. (2 Kron. 20:​14, 15) Asing ni i, tikki marsak Raja Hiskia, dipangido ibana do petunjuk sian Panurirang Jesaya. (Jes. 37:​1-6) Molo diihutton akka raja ni Israel petunjuk ni Jahowa, pasti dipasu-pasu Jahowa do nasida jala dijaga Jahowa do bangso Israel. (2 Kron. 20:​29, 30; 32:22) Takkas do tarida na dipakke Jahowa do akka panurirangna lao manogu-nogu naposona. w24.02 21 ¶8

Lomo do roha ni Sibolis asa mardongan hita dohot akka halak na so mangihutton standar ni Jahowa. Taingot ma saonari boi do hita mardongan dohot halak di media sosial. Ikkon marsitutu do hita asa unang songon halak di portibi on na mandok dang sala mangulahon seks na so patut. Alana taboto sala do i. (Eps. 4:​19, 20) Tasukkun ma tu diritta, ‘Terlalu akrab do au tu dongan sakarejo, dongan sasikkola, manang halak na asing na so mangargai standar ni Jahowa? Barani do au mangihutton standar ni Jahowa nang pe gabe didok akka halak pakakuhu au?’ Asing ni i songon na disurat di 2 Timoteus 2:​20-22, ikkon manat do hita tikki mamillit dongan di huria. Alana adong do piga-piga halak na so boi mangurupi hita asa toktong setia manomba Jahowa. w24.03 22-23 ¶11-12

Hea do dibayakkon hamu songon dia Jahowa i? Memang dang boi taida Jahowa. Alai dipaboa Bibel do gombaran taringot Jahowa. Didok do Jahowa i dos “songon mataniari dohot perisai”, jala “songon api na pasudahon”. (Ps. 84:11; Heb. 12:29) Di parnidaan ni si Hesekiel, dipatudos do Ibana songon batu safir, songon mas na marcampur perak na marhillong, jala songon pelangi. (Hes. 1:​26-28) Ala dang boi taida Jahowa manang ala godang hian sitaononta, olo do gabe maol hita porsea na dihaholongi Jahowa hita. Adong muse sian hita na so hea dihaholongi bapakna. Alai diattusi Jahowa do boasa songon i perasaanta. Jala diboto Jahowa do ala songon i perasaanta, gabe maol ma hita jonok tu Ibana. Alani i marhite Bibel dipaboa Ibana do Debata na songon dia Ibana sasittongna. Didok di Bibel, “Holong do Jahowa.” (1 Joh. 4:8) Lapatanna, holong do na mangonjar roha ni Jahowa lao mangulahon manang aha pe. Burju do Jahowa. Dipatudu Ibana do tong holong ni rohana i tu halak na so manomba Ibana.—Mat. 5:​44, 45. w24.01 26 ¶1-3

Dipillit Jahowa do si Musa lao manogu-nogu halak Israel kaluar sian Mesir, jala dibahen Jahowa do ombun di tikki arian dohot api di tikki borngin. Songon tiang do bentuk ni ombun dohot api i. (2 Mus. 13:21) Diihutton si Musa do ombun dohot api i, jala sahat ma si Musa dohot bangso i di Laut Merah. Alai dukkon i, dilele halak Mesir do nasida. Gabe mabiar ma halak Israel, ala didok roha ni nasida lao bunuon ni halak Mesir i nama nasida. Didok nasida sala ni si Musa do on, alai sasittongna Jahowa do na mamakke si Musa lao manogu-nogu nasida. (2 Mus. 14:2) Dukkon i, dipalua Jahowa do nasida marhite cara na so hea dope tarbayakkon nasida. (2 Mus. 14:​26-28) Dung masa peristiwa i, toktong dope diihutton si Musa ombun na dibahen Jahowa lao manogu-nogu halak Israel saleleng 40 taon di padang belantara. (2 Mus. 33:​7, 9, 10) Marhite ombun i do Jahowa makkatai tu si Musa. Dung i, si Musa do na paboahon tu halak Israel aha na dipaboa Jahowa tu ibana. Jadi boi do diida halak Israel memang si Musa do na dipakke Jahowa lao manogu-nogu nasida. w24.02 21 ¶4-5