Juli

Sian hata dohot tindakan ni Jesus, sempurna do ibana maniru cara marpikkir dohot perasaan ni Bapakna, termasuk tikki mambahen mukjizat. (Joh. 14:9) Aha do parsiajaran na boi tadapot sian mukjizat na dibahen Jesus? Massai holong do roha ni Jesus dohot Bapakna tu hita. Tikki di tano on Jesus, dipatudu ibana do holongna tu akka halak. Dibahen ibana do mukjizat lao mangurupi akka halak na marsitaonon. Misalna, hea do dua halak na buta jou-jou mangido asa diurupi Jesus. (Mat. 20:​30-34) Gabe “asi ma roha ni Jesus” jala dipamalum ma nasida. Alani holongna gabe asi ma rohana. Jala alani holong i do gabe olo Jesus mangalehon mangan dohot pamaluppon sahalak na marsahit kusta. (Mat. 15:32; Mrk. 1:41) Pos do rohatta massai holong do roha ni Jahowa Debata ‘parasi roha’ dohot Jesus Anakna tu hita. Haccit do dihilala nasida molo marsitaonon hita. (Luk. 1:78; 1 Ptr. 5:7) Pasti massai lomo do roha ni nasida lao manalpuhon akka na mambahen jolma marsitaonon! w23.04 3 ¶4-5

Berupaya ma hita asa unang maniru cara marpikkir ni akka halak di portibi on sian akka na tabege dohot na tajaha. Taisi ma pikkiranta dohot akka na denggan. Misalna tajaha ma Bibel jala taparsiajari ma i. Ro ma hita tu parpunguan jala sibuk ma hita di ulaon marbarita asa terlindung cara marpikkirta. Jala marjanji do Jahowa urupanna do hita asa boi menolak godaan aha pe. (1 Kor. 10:​12, 13) Sude hita ikkon berupaya do asa lam ringgas martangiang sian na sebelumna asa boi setia tu Jahowa saleleng ari parpudi na maol on. Lomo do roha ni Jahowa asa ‘tapaboa sude na di bagasan rohatta tu Ibana’. (Ps. 62:8) Puji ma Jahowa jala dok ma mauliate tu sude na dibahen Ibana. Pangido ma bantuan ni Jahowa asa barani hamu marbarita. Jala pangido ma muse bantuanna tikki masa hasusaan tu hamu, jala asa boi menolak godaan. Unang ma paloas aha pe manang ise pe mambahen hamu dang taratur martangiang tu Jahowa. w23.05 7 ¶17-18

Boasa ro hita tu parpunguan? Alasan na utama, i ma lao mamuji Jahowa. (Ps. 26:12; 111:1) Asing ni i molo ro hita tu parpunguan, gabe dipatogu ma akka dongan di situasi na maol saonari. (1 Tes. 5:11) Taulahon do na dua on tikki markomentar hita di parpunguan. Olo do maol hita mangalehon komentar ala terlalu gugup, manang ala dang ditunjuk pemandu hita songon na taharappon. Aha do na boi mangurupi hita? Didok si Paulus do ikkon berfokus hita ‘patoguhon akka donganta’. Gabe dipatogu do akka donganta molo talehon komentar, nang pe sederhana komentarta i. Molo taingot on, gabe dang terlalu gugup be hita mangalehon komentar. Jala molo tung pe dang sering ditunjuk pemandu hita songon na taharappon, tong do boi las rohatta alana gabe adong kesempatan tu akka dongan na asing mangalehon komentar.—1 Ptr. 3:8. w23.04 20 ¶1-3

Nungnga dibahen raja be sada boa-boa! Sude halak Jahudi naung ditawan di Babel saleleng 70 taon boi mulak tu huta ni nasida di Israel. (Esr. 1:​2-4) Holan Jahowa do na boi pasautton i. Alana halak Babel dang olo paluahon tawananna. (Jes. 14:​4, 17) Alai nungnga ditaluhon be Babel, jala pamaretta na baru pe mandok nungnga boi be halak Jahudi maninggalhon negara i. Alani i, ikkon dibahen halak Jahudi khususna kepala keluarga do keputusan: Tetap do di Babel manang kaluar sian i. Dang keputusan na mura on. Godang do halak Israel naung matua. Pasti maol do di nasida menempuh pardalanan na dao. Asing ni i, godangan halak Jahudi tubu di Babel jala dang hea dope tinggal di inganan na asing. Jadi menurut nasida huta ni oppungna do luat Israel i. Adong do muse piga-piga halak Jahudi na marhasil di Babel. Adong do jabu ni nasida na nyaman dohot parkarejoan ni nasida disi. Alani i pasti maol do dihilala nasida maninggalhon i jala pinda tu inganan na baru na so ditanda nasida dope. w23.05 14 ¶1-2

Di Bibel dijujui do hita asa toktong sabar jala togu, patuduhon asi ni roha, dohot patuduhon holong. Misalna Lukas 21:19 mandok, “Molo toktong hamu setia jala martahan, mangolu ma hamu.” 1 Petrus 3:8 mandok, ‘Marasi ni roha ma hamu sude.’ 1 Tessalonik 4:​9, 10 mandok, “Nungnga diajari Debata hamu asa marsihaholongan. . . . Alai hujujui hami ma hamu akka dongan, asa lam marsitutu hamu mangulahon i.” Sasittongna disurat do akka ayat i tu akka sisean ni Jesus naung toktong sabar jala togu, patuduhon asi ni roha, dohot patuduhon holong. Alai ikkon torus do nasida marsiajar patuduhon akka sifat i. Hita pe songon i do. Pikkirhon ma songon dia halak Kristen di abad na parjolo patuduhon akka sifat i. Dung i pikkirhon ma songon dia hita boi maniru nasida jala mambuktihon na rade hita mangadopi hasusaan bolon. Hasilna, tikki ro annon hasusaan bolon i, gabe lam bertekad ma hamu asa toktong martahan. w23.07 3 ¶4, 8

Dang soal hita na miniahan manang ‘biru-biru na asing’, ikkon mardalan do hita di “Dalan na Badia” i, asa boi hita toktong manomba Jahowa saonari jala mandapot pasu-pasu di Harajaon ni Debata haduan. (Joh. 10:16) Mulai taon 1919 M, marjuta bawa, borua, dohot dakdanak nungnga maninggalhon Babel na Balga, i ma sude agama na so sittong, jala mardalan ma nasida di “Dalan na Badia” i. Tikki kaluar halak Jahudi sian Babel, didok Jahowa bolokkononna do sude abbat-abbat na adong di dalan i. (Jes. 57:14) Boha do taringot “Dalan na Badia” di tikkitta saonari? Marratus taon sebelum taon 1919, dipakke Jahowa do piga-piga bawa na makkabiari Ibana lao mangurupi akka halak kaluar sian Babel na Balga. (Bandingkon tu Jesaya 40:3.) Nasida ma na mampersiappon manang padenggatton dalan i. Lapatanna diurupi nasida do akka halak na tigor marroha kaluar sian Babel na Balga asa boi manomba Jahowa. w23.05 15-16 ¶8-9

Lomo do roha ni Jahowa asa marlas ni roha hita manomba Ibana jala sian ias ni rohatta. (2 Kor. 9:7) Alai boha do molo dang songon i perasaatta? Porlu dope hita berupaya mencapai cita-cita rohanitta? Tatiru ma Apostel Paulus. Didok ibana, “Hulissingi do dagingku jala hubahen do au songon hatoban.” (1 Kor. 9:​25-27) Nang pe dang adong semangat ni si Paulus lao mangulahon lomo ni roha ni Jahowa, alai dipaksa ibana do dirina mangulahon i. Las do roha ni Jahowa tu na diulahon si Paulus, jala dipasu-pasu Jahowa do upayana i. (2 Tim. 4:​7, 8) Dos songon i ma, las do roha ni Jahowa molo berupaya hita mencapai cita-citatta nang pe hurang semangat hita. Las do rohana alana nang pe dang sai semangat hita mangulahon i, alai tetap do taulahon i ala na massai holong rohatta tu Ibana. Songon Jahowa na mamasu-masu si Paulus, pasti pasu-pasuon ni Jahowa do tong hita alani upayatta. (Ps. 126:5) Jala tikki tanikmati pasu-pasu ni Jahowa i, gabe lam semangat ma hita muse. w23.05 29 ¶9-10

Dipatudos Apostel Paulus do halak na so malua di ari ni Jahowa songon halak na tarpodom. Dang diboto nasida aha na masa di sakaliling ni nasida. Alani i dang diboto nasida masa akka peristiwa na penting jala dang adong diulahon nasida manang aha. Godangan halak saonari songon halak na tarpodom do. (Rom 11:8) Dang porsea nasida molo hita mangolu di “ari parpudi” jala na lao ro nama hasusaan bolon. (2 Ptr. 3:​3, 4) Alai taboto do massai penting do taihutton nasehat ni si Paulus asa toktong hita sadar. (1 Tes. 5:6) Saonari godang do masalah sosial dohot masalah politik. Lam jonok ari ni Jahowa, lam balga do tekanan lao mendukung masalah sosial dohot masalah politik. Alai dang pola porlu mabiar hita. Boi do tondi parbadia ni Debata mangurupi hita toktong tenang, dang panik, jala mambahen keputusan na denggan.—Luk. 12:​11, 12. w23.06 10 ¶6-7

Molo dibege hamu taringot si Simson, aha ma na dibayakkon hamu? Dibayakkon hamu do ra sahalak bawa na massai gogo. Tutu do i. Alai hea do dibahen si Simson keputusan na sala na mambahen susa ibana. Nang pe songon i, sai diingot Jahowa do akka na denggan na diulahon si Simson. Jala disurat do di Bibel taringot kesetiaanna asa gabe sitiruon tu hita. Dipakke Jahowa do si Simson mangulahon lomo ni rohana lao mangurupi bangso Israel. Marratus taon dung mate ibana, disuru Jahowa do Apostel Paulus manuratton goar ni si Simson gabe sada sian akka halak na porsea. (Heb. 11:​32-34) Sai diandalhon si Simson do Jahowa tarlumobi tikki mangadopi situasi na maol. Boi do tadapot parsiajaran jala dipatogu sian teladan ni si Simson. w23.09 2 ¶1-2

Boi do hita toktong sabar jala togu molo jotjot hita martangiang tu Jahowa jala tapaboa sude holso ni rohatta tu Ibana. (1 Tes. 5:17) Mungkin saonari dang balga dope masalah na diadopi hamu. Alai nang pe songon i, tikki lungun rohamuna, bingung, manang tikki dang diboto hamu aha na lao ulahononmuna, torus do hamu mangalului petunjuk ni Jahowa? Molo torus hamu mangido tu Debata asa diurupi toktong sabar jala togu mangadopi masalahmuna ganup ari, gabe dang ragu be hamu martangiang tu Jahowa tikki ro masalah na umbalga di ari na naeng ro. Jala di tikki i, gabe pos ma rohamuna na diboto Jahowa do cara dohot tikki na terbaik lao mangurupi hamu. (Ps. 27:​1, 3) Boi do hita martahan tikki masa hasusaan bolon haduan, molo toktong hita sabar jala togu tikki mangadopi hasusaatta saonari. (Rom 5:3) Godang do donganta mandok tikki marhasil nasida mangadopi sada situasi na maol, gabe lam mura ma nasida martahan tikki ro muse sitaonon na asing. Boasa? Tikki marhasil nasida martahan alani bantuan ni Jahowa, gabe pos ma roha ni nasida na lomo do roha ni Jahowa mangurupi nasida.—Jak. 1:​2-4. w23.07 3 ¶7-8

Masuk akkal do Jahowa ala serep rohana jala marasi ni roha. Misalna, dipatudu Jahowa do serep ni rohana tikki naeng pamatehon halak Sodom na jahat. Disuru Jahowa do suru-suruanna lao paboahon tu si Lot halak na tigor marroha asa lari tu inganan na mardolok-dolok. Mabiar do si Lot lao tu inganan i. Alani i dipangido ibana ma asa diloas Jahowa ibana dohot keluargana lao tu Kota Zoar na seharusna dihancurhon Jahowa. Boi do sasittongna Jahowa mandok ikkon ihuttonon ni si Lot do parettana. Alai diloas Jahowa do si Lot lao tu Zoar jala dang dihancurhon Ibana kota i. (1 Mus. 19:​18-22) Marratus taon dukkon i, dipatudu Jahowa do asi ni roha tu halak Ninive. Tikki i, disuru Ibana do Panurirang Jona paboahon lao dihancurhon nama kota i jala pamateonna ma akka halak na disi. Alai dung diida Jahowa bertobat halak Ninive, gabe asi ma roha ni Jahowa tu nasida jala dang dihancurhon Jahowa be kota i.—Jona 3:​1, 10; 4:​10, 11. w23.07 21 ¶5

Aha do na boi taparsiajari sian contoh ni si Jehoas? Sarupa do si Jehoas songon hau na so bagas tartanom uratna, jala na holan bergantung tu hau penopang. Dung mate si Jehoyada na mendukung ibana jala dung ditangihon ibana halak na murtad, gabe dang setia be ibana tu Jahowa. Sian on marsiajar do hita, unang ma taoloi Jahowa holan alani keluargatta dohot akka dongan di huria. Asa torus tahabiari Jahowa, ikkon tapasangap do ibana jala tapatogu hubungatta tu Ibana. Carana? Taratur ma hita marsiajar Bibel, mangarimangi isina, dohot martangiang. (Jer. 17:​7, 8; Kol. 2:​6, 7) Dang hea dipangido Jahowa hita mangulahon lobi sian na tolapta. Na dipangido ibana tarsurat do di Parjamita 12:13 na mandok, “Habiari ma Debata na sittong jala oloi ma parettana. Ai on do na ikkon ulahonon ni sude jolma.” Molo tahabiari Debata, boi ma hita toktong setia tu Jahowa dang soal aha na lao masa di ari na naeng ro. Hasilna, dang adong manang aha pe na boi manegai parale-aleotta tu Jahowa! w23.06 19 ¶17-19

Di mula ni ayat 5 didok do, “Dung i didok Ibana na hundul di tahta i ma.” (Pgk. 21:5a) Istimewa do hata on. Alana, tolu hali ma hata sisongon on disurat di bukku Pangungkapon, na patuduhon Jahowa sandiri do na mandok on. Dang sian suru-suruan manang sian Jesus ro jaminan on, alai sian Jahowa sandiri do. On gabe bukti na boi do hita porsea tu hata ni Jahowa na berikutna. Boasa boi songon i? Ala “Debata na so margabus” do Jahowa. (Tit. 1:2) Pasti saut do janji na disurat di Pangungkapon 21:​5, 6. Rimangi ma hata “Ida ma!” (Pgk. 21:5) Hata Junani na diterjemahon gabe “ida ma”, jotjot do dipakke di bukku Pangungkapon. Aha do huroha na didok Debata muse? Didok Debata, “Hupaimbaru do saluhutna.” Memang di ari na naeng ro do pasauton ni Jahowa i. Alai pos do roha ni Jahowa pasti saut do janjina i. Gariada hira naung saut do janjina i.—Jes. 46:10. w23.11 3-4 ¶7-8

Ikkon berjuang do si Petrus mangatasi hagaleonna. Contohna tikki didok Jesus na lao marsitaonon ibana jala mate songon naung disurirangkon, didok si Petrus dang na lao masa i. (Mrk. 8:​31-33) Marulak-ulak do muse si Petrus dohot akka apostel na asing marsoal taringot ise na ussangap sian nasida. (Mrk. 9:​33, 34) Asing ni i muse di borngin andorang so mate Jesus, disittakkon si Petrus do pinggol ni sahalak bawa. (Joh. 18:10) Laos di borngin i muse tolu hali ma disoadahon si Petrus Jesus, ala mabiar ibana tu akka halak. (Mrk. 14:​66-72) Pasti hancur hian do perasaan ni si Petrus di tikki i. Alai dang ditinggalhon Jesus si Petrus na marmetmet ni roha i. Gariada dung hehe Jesus, dilehon Jesus do muse kesempatan tu si Petrus lao mambuktihon na holong do roha ni si Petrus tu ibana. Jala dipangido Jesus do si Petrus asa gabe parmahan tu akka biru-biruna. (Joh. 21:​15-17) Pittor dioloi si Petrus do i. Buktina, di Jerusalem do ibana tikki ari Pentakosta jala ibana ma sada sian akka halak na dimiahi tondi parbadia. w23.09 22 ¶6-7

Didok Apostel Petrus do tu akka sintua, “Parmahani hamu ma biru-biru ni Debata.” (1 Ptr. 5:​1-4) Hamu akka sintua, diboto hami do na holong rohamuna tu akka dongan jala lomo do rohamuna patoguhon nasida. Alai sipata olo do dang sanggup dihilala hamu mangulahon i, ala nga palojahu manang ala massai godang ulaonmuna. Aha ma na boi diulahon hamu? Paboa ma sude perasaanmuna i tu Jahowa jala paboa ma na lomo do rohamuna mangurupi akka dongan. Disurat si Petrus do muse, “Molo diurupi ibana donganna na asing, diulahon ma i mangasahon gogo ni Debata.” (1 Ptr. 4:11) Bisa jadi godang do sitaonon ni akka donganmuna na so boi dipasae di tikkitta saonari. Alai ingot ma, boi do Jesus mangurupi nasida saonari dohot di tano na imbaru. Jala undenggan do cara ni Jesus Kristus “parmahan na sumurung” i mangurupi nasida sian caramuna sandiri. Jadi na dipangido Debata sian hamu akka sintua, i ma asa makkaholongi akka dongan, mamparmahani nasida, jala gabe “sitiruon” tu nasida. w23.09 29-30 ¶13-14

Unang ma taihutton cara marpikkir ni portibi on. Molo tatiru cara marpikkir ni halak na di portibi on, boi do gabe taabaihon Jahowa dohot akka standarna. (1 Kor. 3:19) ‘Bisuk na sian portibi on’ jotjot do mambahen halak dang mangoloi Debata. Piga-piga halak Kristen na di Pergamos dohot Tiatira dipengaruhi akka halak di kota i na mangulahon seks na so patut jala manomba patung. Dilehon Jesus do sipasingot na tegas tu dua huria i asa unang terpengaruh tu akka halak di sakaliling ni nasida na menganggap dang sala akka ulaon i. (Pgk. 2:​14, 20) Saonari pe, ditekan do hita asa manjalo cara marpikkir na sala. Olo do keluarga dohot akka dongan mandok na pakakuhu do hita jala dang pola ikkon taihutton standar ni Jahowa. Uppamana didok nasida, ‘Bahen ma lomo ni roham’ manang ‘Nungnga ketinggalan jaman be Bibel.’ Sipata boi do ro tu pikkiranta hurang jelas do petunjuk na dilehon Jahowa. Alani i gabe targoda ma hita lao mangulahon “lobi sian na tarsurat” di Bibel.—1 Kor. 4:6. w23.07 16 ¶10-11

Porlu do gogo sian Jahowa di si Maria, omak ni Jesus. Tabayakkon ma songon dia perasaanna tikki dipaboa na lao hamil ibana. Hape di tikki i dang muli dope ibana. Jala dang adong dope pengalamanna lao pagodang-godangkon dakdanak, hape ikkon dijaga ibana do sahalak dakdanak na lao gabe Messias. Asing ni i muse dang hea ibana mangulahon seks dohot si Josep. Jadi boha ma cara ni si Maria lao paboahon i sude tu si Josep? (Luk. 1:​26-33) Aha do na diulahon si Maria asa margogo ibana? Dipangido ibana do bantuan sian na asing. Misalna, dipangido ibana do tu si Gabriel asa dipaboa gumodang hatorangan taringot tugasna i. (Luk. 1:34) Dang leleng dukkon i, lao ma si Maria tu “sada kota na di Juda na adong di dolok” manjuppangi si Elisabet keluargana. Dipuji si Elisabet do si Maria. Jala marhite panogu-noguon ni Jahowa, dipaboa si Elisabet do surirang na patoguhon taringot poso-poso na adong di rahim ni si Maria i. (Luk. 1:​39-45) Gabe didok si Maria ma, “Dibahen [Jahowa] do akka ulaon na palongang roha marhite tanganna na gogo i.” (Luk. 1:​46-51) Takkas ma, dipatogu Jahowa do roha ni si Maria marhite si Gabriel dohot si Elisabet. w23.10 14-15 ¶10-12

Adong 144.000 sisean ni Kristus naung dimiahi tondi parbadia. Istimewa do hubungan ni nasida dohot Jahowa, jala lao gabe malim ma nasida di surgo rap dohot Jesus. (Pgk. 14:1) Inganan na Badia di tabernakel manggombarhon naung dipillit Debata nasida gabe anakna tikki mangolu dope di tano on. (Rom 8:​15-17) Inganan na Massai Badia manggombarhon surgo, inganan ni Jahowa. “Tire pembatas” ni dua ruangan i manggombarhon daging ni Jesus. Saleleng mangolu di tano on dope Jesus, dang boi ibana masuk tu surgo lao gabe Sintua ni Malim di bagas joro na mulia i. Ikkon jolo mate do ibana jala ikkon jolo dipelehon ibana do dagingna gabe tobusan tu sude jolma. Dung i, gabe tarbukka ma dalan tu sude halak Kristen na miniahan lao mangolu salelengna di surgo. Jala ikkon jolo mate do nasida asa boi dapot ni nasida upa di surgo.—Heb. 10:​19, 20; 1 Kor. 15:50. w23.10 28 ¶13

Boi do si Gidion tetap tenang tikki dikritik halak Epraim ibana. (Pangh. 8:​1-3) Dang gabe muruk si Gidion mangalusi nasida. Serep do rohana, olo do ibana manangihon, jala lambok do ibana mangalusi nasida. Hasilna gabe dang muruk be halak Epraim. Songon si Gidion, berupaya do akka sintua manangihon jala lambok mangalusi tikki dikritik. (Jak. 3:13) Molo dibahen nasida songon i, gabe toktong ma dame huria. Tikki dipuji na asing si Gidion ala marhasil manaluhon halak Midian, diarahon ibana do pujian i tu Jahowa. (Pangh. 8:​22, 23) Songon dia do akka sintua boi maniru si Gidion? Tikki marhasil nasida mangulahon sada ulaon jala dipuji nasida alani i, ikkon diarahon nasida do pujian i tu Jahowa. (1 Kor. 4:​6, 7) Misalna molo dipuji sahalak sintua ala malo ibana mangajari, boi do ibana mangurupi akka dongan asa berfokus tu sumber ni pengajaran i, i ma Hata ni Debata manang tu pelatihan na dibahen organisasi. Boi do muse dirimangi akka sintua songon dia cara ni nasida mangajari, pasangappon Jahowa do manang holan asa terkesan akka halak. w23.06 4 ¶7-8

Molo dang dialusi dope tangiangta, porlu do tapikkirhon tolu sukkun-sukkun on. Na parjolo, ‘Sittong do pangidoakkon?’ Sering do didok rohatta, taboto dia na dumenggan di hita. Hape sebenarna, dang botul-botul bermanfaat pangidoatta i tu ari na naeng ro. Molo taringot sada masalah do na tatangiakkon, olo do ra adong cara na asing na dumenggan sian cara na tapangido. Jala olo do ra piga-piga pangidoatta dang sadalan tu lomo ni roha ni Debata. (1 Joh. 5:14) Misalna, bayakkon ma natua-natua na martangiang asa boi toktong gellengna manomba Jahowa. Songon na denggan do begeon tangiang ni nasida i. Alai taingot ma, dang hea dipaksa Jahowa hita lao manomba Ibana. Lomo do rohana asa sian ias ni roha hita dohot gellengta manomba Ibana. (5 Mus. 10:​12, 13; 30:​19, 20) Jadi tumagon do ditangiakkon nasida asa boi diurupi gellengna manomba Jahowa sian ias ni rohana jala marale-ale tu Ibana.—Poda 22:6; Eps. 6:4. w23.11 21 ¶5; 23 ¶12

Molo tapatogu donganta, boasa i patuduhon na holong rohatta tu nasida? Menurut sada referensi ni Bibel, hata “patoguhon” na dipakke si Paulus di ayat i, boi do maksudna “sasahalak na jongjong manogu donganna na gale alani sitaonon”. Tikki tapatogu donganta na susa, sasittongna na taurupi do ibana asa toktong setia manomba Jahowa. Jala tikki tapatogu donganta i, on patuduhon na holong do rohatta tu nasida. (2 Kor. 7:​6, 7, 13) Sadalan do patoguhon tu asi ni roha. Boasa tadok songon i? Alana molo asi roha ni sasahalak, gabe taronjar do ibana lao patoguhon donganna na marsitaonon. Jadi ikkon jolo asi do rohatta tu sasahalak baru pe olo hita patoguhon ibana. Didok si Paulus, Jahowa i “Ama parasi roha, na lambok, jala Debata Sipangapul na sumurung”.—2 Kor. 1:3. w23.11 9-10 ¶8-10

Didok si Paulus, tikki susa hita boi do lam tamba pos ni rohatta tu janji ni Debata. Hira na so masuk akkal do on tahilala. Alai taboto, sude halak Kristen adong do sitaononna. Contohna si Paulus. Didok ibana do tu halak Tessalonik, “Tikki rap dope hami dohot hamu, nungnga dipaboa hami tu hamu na lao masa akka hasusaan tu hita. Jala tutu do i masa songon na diboto hamu.” (1 Tes. 3:4) Jala didok ibana do tu halak Korint, “Ale akka dongan, didok rohanami naeng do diboto hamu sitaonon na masa tu hami . . . Dang hurippu hami be boi hami mangolu.” (2 Kor. 1:8; 11:​23-27) Halak Kristen saonari pe tong do mangadopi sitaonon. (2 Tim. 3:12) Olo do ra dongan manang keluargamuna mangarehei manang mambahen na jahat tu hamu ala porsea hamu tu Jesus jala gabe siseanna. Manang olo do gabe susa hamu dibahen bos manang dongan sakarejomuna ala berupaya hamu jujur. (Heb. 13:18) Asing ni i, olo do ra dianiaya pamaretta hamu ala marbarita na uli. Manang aha pe tantangan na taadopi saonari, didok si Paulus boi do hita marlas ni roha. w23.12 10-11 ¶9-10

Godang do sitaonon na masa tu si Jakkob. Gabe marlea do goar ni keluargana dohot goar ni Jahowa dibahen si Simeon dohot si Lepi. Asing ni i, mate do si Rahel istri na dihaholongi si Jakkob tikki manubuhon anakna na paduahon. Jala alani kelaparan na massai parah, ikkon pinda do si Jakkob tu Mesir dung matua ibana. (1 Mus. 35:​16-19; 37:28; 45:​9-11, 28) Nang pe masa sude sitaonon i, dang gabe gale haporseaon ni si Jakkob tu Jahowa dohot tu janjina. Jala dipatudu Jahowa do na lomo rohana tu si Jakkob. Misalna dilehon Jahowa do godang arta tu si Jakkob. Pikkirhon ma songon dia las ni roha ni si Jakkob boi pajuppang muse dohot anakna si Josep, na dirippu ibana nungnga mate. Pasti mandok mauliate do ibana tu Jahowa alani i! Boi do marhasil si Jakkob mangadopi sitaonon ala jonok hubunganna tu Jahowa. (1 Mus. 30:43; 32:​9, 10; 46:​28-30) Takkas ma, molo jonok hubungatta tu Jahowa, boi do hita marhasil mangadopi sitaonon na so tarduga. w23.04 15 ¶6-7

Di Psalmen 23, dipaboa si Daud do na pos rohana dihaholongi Jahowa do ibana. Dipaboa ibana do sadia jonok hubunganna dohot Jahowa. Didok si Daud do Jahowa i Parmahanna. Ala ditogu-togu Jahowa si Daud, gabe aman ma dihilala ibana, jala pos situtu do rohana tu Jahowa. Pos do roha ni si Daud, sai dihaholongi Jahowa do ibana saleleng ni ngoluna. Boasa boi didok ibana songon i? Alana saleleng on, dihilala si Daud do na parduli Jahowa tu ibana, jala sai dilehon Jahowa do sude na dihaporluhon ibana. Las do rohana marale-ale tu Jahowa. Gabe pos do rohana manang aha pe na lao masa, pasti dilehon Jahowa do sude na dihaporluhon ibana. Ala porsea si Daud na dihaholongi jala dijaga Jahowa ibana, gabe dang holsoan be ibana jala toktong marlas ni roha.—Ps. 16:11. w24.01 29 ¶12-13

Dung sae Perang Dunia II, bebas do naposo ni Jahowa marbarita na uli di godang negara. Hasilna lam godang ma halak na boi mananda Jahowa. Saonari toktong do Punguan na Mangaradoti Organisasi mangalului petunjuk sian Jesus. Alana lomo do roha ni nasida asa sarupa petunjuk na dilehon nasida songon cara marpikkir ni Jahowa dohot Jesus. Jala dipakke nasida do akka pengawas wilayah dohot akka sintua lao mangalehon petunjuk i tu sude huria. Jadi di ‘tangan kanan’ ni Jesus do sude sintua, na miniahan nang songon i na so miniahan. (Pgk. 2:1) Memang, dang sempurna akka sintua i jala olo do mambahen kesalahan. Si Musa dohot si Josua pe hea do mambahen kesalahan. Songon i do tong akka apostel. (4 Mus. 20:12; Jos. 9:​14, 15; Rom 3:23) Alai ditogu-togu Jesus do naposo haposan dohot akka sintua, jala toktong do diulahon Jesus i. I do alasanna boasa boi pos rohatta tu petunjuk na dilehon Jesus marhite akka halak na dipillit Jahowa. w24.02 23-24 ¶13-14

Boi do tabahen las roha ni Jahowa. Tapaboa ma tu halak na asing taringot Ibana. Sian caratta paboahon i, boi do tarida na massai holong do rohatta tu Jahowa jala taargai Ibana. Tikki marbarita hita, taingot ma tujuanta. Lomo do rohatta mangurupi halak na asing asa jonok tu Jahowa. Jala asa holong roha ni nasida tu Debata dos songon hita. (Jak. 4:8) Las do rohatta patuduhon sian Bibel, Debata na songon dia do Jahowa i. Tapaboa ma akka sifatna, songon holong, adil, bisuk, huaso, dohot na asing. Boi do muse tapuji Jahowa jala tabahen las rohana molo marsitutu hita maniru Ibana di akka ulaonta siganup ari. Gabe boi ma diparrohahon halak na asing na marimbar do hita sian akka halak di portibi on. Olo do ra sukkun-sukkun roha ni nasida, boasa songon i hita. (Mat. 5:​14-16) Tikki berurusan hita dohot nasida, boi do tapaboa alasanna. Hasilna, gabe lomo ma roha ni halak na serep rohana jonok tu Jahowa. Molo tapuji Jahowa marhite akka cara on, pasti las do rohana.—1 Tim. 2:​3, 4. w24.02 10 ¶7

Asa boi togu haporseaonmuna tu Jahowa, porlu do diparsiajari hamu akka keterampilan. Alana molo adong keterampilanmuna, boi ma didalatton hamu tanggung jawabmuna di huria, massari na porlu di hamu dohot di keluargamuna, jala gabe denggan ma hubunganmuna tu halak na asing. Contohna, marlatik ma asa lam denggan manjaha dohot manurat. Bibel mandok halak na marlas ni roha jala na marhasil, i ma halak na mangalean tikkina lao manjaha jala mangarimangi Hata ni Debata ganup ari. (Ps. 1:​1-3) Molo taratur hamu manjaha Bibel ganup ari, gabe diboto hamu ma cara marpikkir ni Jahowa. Jala on boi mangurupi hamu asa manat marpikkir jala mangulahon na diparsiajari hamu. (Poda 1:​3, 4) Di huria porlu do akka bawa na malo mangajari jala mangalehon poda na sian Bibel. Molo denggan hamu manjaha dohot manurat, boi ma dipersiappon hamu jamita dohot komentar na patoguhon haporseaon ni akka dongan. Asing ni i, boi ma hamu denggan mambahen catatan na boi dipakke hamu lao patoguhon haporseaonmuna dohot patoguhon halak na asing. w23.12 26-27 ¶9-11

Molo mabiar hamu, bayakkon hamu ma aha na lao bahenon ni Jahowa di ari na naeng ro molo dang adong be Sibolis. Sada pertunjukan di parpunguan regional taon 2014 patuduhon songon dia sahalak ama rap dohot keluargana na mambahas songon dia ngolu ni nasida haduan molo nungnga gabe paradeiso tano on. Jala didok bapakna, gabe songon on ma haduan isi ni 2 Timoteus 3:​1-5, “Marlas ni roha ma hita di tano na imbaru, ai makkaholongi donganna ma jolma, lomo rohana marale-ale tu Debata, serep rohana, lomo rohana mamuji Debata, mangoloi natua-tuana jala mandok mauliate, setia do nasida, dihaholongi do keluargana, lomo rohana mardos ni roha jala makkatahon na denggan taringot donganna, boi mangorom diri, lambok, lomo rohana tu akka na denggan, boi dihaporseai, sipangoloi, unlomo do rohana mangoloi Debata sian apala mangoloi giot-giot ni rohana, jala dioloi nasida do Debata sian ias ni rohana. Marale-ale ma hamu tu halak sisongon i.” Hamu pe boi do tong mambahas taringot ngolutta di tano na imbaru rap dohot keluarga manang dongan sahaporseaonmuna. w24.01 6 ¶13-14

Bibel mandok, “Las do roha ni Jahowa mangida bangsona.” (Ps. 149:4) Pasti dipatogu do hita mamboto na dihaholongi Jahowa do sude naposona. Alai tikki mandele hita olo do sukkun-sukkun rohatta, ‘Dihaholongi Jahowa do au?’ Najolo godang do tong naposo ni Jahowa na disurat di Bibel na hea makkilala songon i. (1 Sam. 1:​6-10; Job 29:​2, 4; Ps. 51:11) Takkas do dipaboa di Bibel na boi do jolma na so sempurna dihaholongi Jahowa. Boha do carana? Ikkon tapatudu do haporseaon tu Jesus Kristus jala ikkon tardidi do hita. (Joh. 3:16) Molo taulahon i, gabe boi ma diida akka halak naung muba hita sian akka dosatta jala naung marjanji hita tu Debata lao mangulahon lomo ni rohana. (Ul. 2:38; 3:19) Las do roha ni Jahowa molo taulahon i. Alana on patuduhon na lomo do rohatta gabe ale-alena. Jadi molo torus hita setia tu Jahowa, jala taulahon sian nasa gogotta lao manggohi janjitta i, gabe las ma roha ni Jahowa jala dianggap Ibana ma hita ale-alena.—Ps. 25:14. w24.03 26 ¶1-2

Tatiru ma akka apostel na toktong marbarita nang pe diorai pamaretta. Pos ma rohatta urupan ni Jahowa do hita asa boi marhasil di ulaon marbarita. Alani i tapangido ma habaranion dohot bisuk. Pangido ma muse tu Jahowa asa boi martahan nang pe masa sitaonon. Godang do sian hita na marsitaonon alani sahit, marsitaonon ala terkuras secara emosi, mate halak na dihaholongi, adong masalah keluarga, penganiayaan, manang masalah na asing. Tamba do muse borat ni masalah i ala terjadi pandemi dohot porang. Tikki martangiang, paboa ma songon dia perasaan dohot situasimuna tu Jahowa, songon tikki makkata-hatai hamu dohot ale-alemuna. Porsea ma hamu tu Ibana, pasti ‘urupanna do hamu’. (Ps. 37:​3, 5) Molo torus hita martangiang tu Jahowa, boi do i mangurupi hita asa toktong ‘sabar jala togu tikki masa sitaonon’. (Rom 12:12) Diboto Jahowa do hasusaan na diadopi akka naposona, jala “ditangihon Ibana do angguk-angguk ni nasida na mangido asa diurupi”.—Ps. 145:​18, 19. w23.05 5-6 ¶12-15

Tikki naeng mambahen keputusan na penting hita, talului ma “lomo ni roha ni Jahowa” jala tapatudu ma na sadalan tindakanta tu lomo ni roha ni Jahowa i. (Eps. 5:17) Molo talului prinsip ni Bibel na cocok tu situasitta, na berupaya mangattusi cara marpikkir ni Jahowa do hita disi. Jala molo taihutton prinsip ni Bibel, boi ma tabahen keputusan na denggan. Lomo do roha ni musutta Sibolis asa sibuk hita mangulahon akka ulaon di portibi on. Akibatna gabe dang adong be tikkitta lao manomba Jahowa. (1 Joh. 5:19) Boi do gabe habis tikki ni sasahalak alani hepeng, pendidikan, dohot karejo. Molo i na diulahon ibana, patuduhon na diihutton ibana do cara marpikkir ni akka halak di portibi on. Hape boi do dipakke ibana tikkina i lao mangulahon na gumodang tu Jahowa. Memang dang sala mangalului hepeng, manang mamillit pendidikan dohot karejo na denggan. Alai unang ma tabahen i gabe na uppetting di ngolutta. w24.03 24 ¶16-17