Agustus

Taparrohahon ma dua parsiajaran penting sian ayat on: (1) Godang do hasusaan ni halak na tigor marroha. (2) Paluaon ni Jahowa do hita sian sitaononta. Songon dia do Jahowa paluahon hita? Sada carana i ma mangurupi hita asa seimbang mangida parngoluotta di portibi saonari on. Marjanji do Jahowa molo tasomba Ibana tahilala ma las ni roha, alai dang dijanjihon Ibana na bebas hita sian sitaonon di ngolutta saonari. (Jes. 66:14) Dilehon Jahowa do tu hita harapan lao mangolu salelengna di ari na naeng ro, jala lomo do rohana asa berfokus hita tu harapan i. (2 Kor. 4:​16-18) Sambil paimahon i, diurupi Ibana do hita asa torus setia manomba Ibana ganup ari. (And. 3:​22-24) Aha do na boi taparsiajari sian akka naposo ni Jahowa na disurat di Bibel dohot di jamanta saonari? Songon nasida, olo do masa tu hita sitaonon na so tarduga. Alai molo taandalhon Jahowa, sai urupanna do hita.—Ps. 55:22. w23.04 14-15 ¶3-4

Marsiajar ma hita sian teladan ni si Josep dohot si Maria, na rade mangoloi aturan ni pamaretta nang pe maol di nasida. (Luk. 2:​1-6) Sada tikki dibahen Kesar Agustus ma aturan asa mulak sude jolma tu huta hatubuanna be lao mandaftarhon diri. Alani i, borhat ma si Josep dohot si Maria tu Betlehem na daona hira-hira 150 kilometer mangalewati luat na mardolok-dolok. Pasti dang mura on di nasida tarlumobi tu si Maria, alana di tikki i nungnga hamil sia bulan ibana. Khawatir do ra nasida taringot keselamatan ni si Maria dohot poso-poso na di bortianna. Songon dia ma annon molo tubu poso-posona i? Hape poso-poso na di bortianna i Messias na dijanjihon Debata. Sasittongna boi do i gabe alasan ni nasida asa unang mangoloi aturan ni pamaretta. Nang pe godang na dikhawatirhon si Josep dohot si Maria, alai tetap do nasida unduk tu peraturan ni pamaretta. Dipasu-pasu Jahowa do ala unduk nasida. Selamat do nasida sahat tu Betlehem. Sehat do poso-poso na ditubuhon si Maria, jala gabe saut do surirang ni Bibel taringot Messias!—Mik. 5:2. w23.10 8 ¶9; 9 ¶11-12

Merasa gugup do hamu tikki naeng mangalehon komentar? Denggan do molo dipersiappon hamu bahan i. (Poda 21:5) Molo nungnga dipersiappon hamu bahan na naeng diparsiajari, gabe dang pola gugup hamu tikki mangalehon komentar. Asing ni i, singkat ma bahen komentarmuna. (Poda 15:23; 17:27) Biasana, dang pola gugup hita molo singkat komentarta. Molo tabahen komentar na singkat jala mamakke kata-kata sendiri, on patuduhon denggan do taparade jala taattusi bahan i. Songon dia do molo nungnga dicoba hamu saran i, alai tong dope hamu gugup mangalehon lobi sian sada manang dua komentar? Pos ma rohamuna diargai Jahowa do upayamuna sesuai tu kesanggupanmuna. (Luk. 21:​1-4) Dang hea dipangido Jahowa hita mangulahon lobi sian na tolap taulahon. (Plp. 4:5) Pikkirhon ma aha na boi diulahon hamu, bahen ma tujuan lao mangulahon i, jala martangiang ma asa tenang hamu tikki mangalehon komentar. Mulana tetappon ma tujuan mangalehon sada komentar na singkat. w23.04 21 ¶6-8

Dipatudos si Paulus do hita songon tentara na marjaga-jaga jala mamakke baju porang. Sahalak tentara ikkon rade do marporang tikki sadihari pe. Suang songon i ma, ikkon rade do hita tu ari ni Jahowa. Tapakke ma baju partahanan, i ma haporseaon dohot holong jala tapakke takkuluk bosi, i ma pos ni roha tu janji ni Debata taringot haluaon. Songon baju partahanan na boi melindungi jantung ni sahalak tentara, haporseaon dohot holong pe boi do melindungi rohatta. On mangurupi hita toktong manomba Debata jala mangihutton Jesus. Haporseaon paposson rohatta pasti lehonon ni Jahowa do upa tu hita molo talului Jahowa sian nasa rohatta. (Heb. 11:6) Gabe taronjar ma rohatta asa toktong setia tu Pamimpinta Jesus, bahkan molo masa sitaonon na borat tu hita. Asa toktong togu haporseaotta jala boi hita martahan di situasi na maol, taparsiajari ma contoh ni akka donganta di jamanta saonari na toktong setia nang pe dianiaya manang susa di parhepengon. Jala asa unang holongan di hepeng dohot arta hita, tatiru ma akka dongan na mambahen sederhana ngolu ni nasida asa boi manjumolohon ulaon Harajaon. w23.06 10 ¶8-9

Porlu do hita mangarajai diri asa unang mangulahon na sala. Alai sasittongna porlu do tong sifat mangarajai diri asa boi hita mangulahon ulaon na denggan, tarlumobi molo maol ulaon i manang molo dang adong keinginanta lao mangulahon i. Ingot ma sada sian parbue ni tondi parbadia do sifat mangarajai diri on. Alani i pangido ma tondi parbadia ni Jahowa asa boi hamu patuduhon sifat on. (Luk. 11:13; Gal. 5:​22, 23) Unang ma paima jolo denggan situasina. Di portibi on dang adong situasi na sempurna. Molo sai tapaima do jolo denggan situasitta, dang na lao boi tacapai cita-citatta. Bisa jadi dang semangat hita mencapai cita-citatta ala songon na maol tahilala mangulahon i. Molo i do na dihilala hamu, boi do dimulai hamu sian langkah na sederhana lao mencapai cita-citamuna i. Misalna molo berupaya hamu padenggatton sada sifat, berupaya ma patuduhon i marhite akka cara na sederhana. Molo lomo rohamuna manjaha sude isi ni Bibel, singkat ma bahen tikkimuna manjaha Bibel jala bahen ma jadwal na taratur. w23.05 29 ¶11-13

Di akka ari parpudi on, dipakke Jahowa do organisasina lao paradehon akka publikasi lao mangurupi hita asa toktong mardalan di “Dalan na Badia” i. (Jes. 35:8; 48:17; 60:17) Boi do tadok molo olo sasahalak marsiajar Bibel, dilehon ma tu ibana kesempatan lao mardalan di “Dalan na Badia” i. Adong do piga-piga halak na holan satokkin mardalan disi, dung i maninggalhon dalan i. Na asing toktong mardalan di dalan i sahat tu tujuan. Tudia do tujuan ni nasida? Molo tu akka halak na lao mangolu di surgo, “Dalan na Badia” i mambahen nasida mandapot hangoluan “di paradeiso ni Debata” di surgo. (Pgk. 2:7) Molo tu akka halak na harapanna mangolu di tano on, “Dalan na Badia” i mambahen nasida sempurna di ujung ni Pamarettaon Saribu Taon ni Kristus. Molo nungnga mardalan di dalan i hamu saonari, unang be mangida tu pudi manang kaluar sian dalan i, sahat tu na sahat hamu di tujuanmuna di tano na imbaru. w23.05 17 ¶15; 19 ¶16-18

Molo dirimangi hamu sude na dibahen Jahowa tu hamu, tottu gabe taronjar do rohamuna lao mangalehon ngolumuna tu Ibana. (Ps. 116:​12-14) Didok di Bibel sian Jahowa do ro “sude silehon-lehon na denggan jala na sun denggan”. (Jak. 1:17) Rimangi ma muse silehon-lehon na luar biasa na dilehon Jahowa tu hita, i ma tobusan. Alani tobusan ni Jesus, gabe boi ma hita marale-ale tu Jahowa jala mangolu salelengna haduan. (1 Joh. 4:​9, 10) Mangalehon diritta tu Jahowa ma cara na terbaik lao mandok mauliate tu Ibana alani tobusan dohot sude pasu-pasuna.—5 Mus. 16:17; 2 Kor. 5:15. w24.03 5 ¶8

Tikki taida pangalaho ni akka halak saonari, boi ma tahilala songon dia perasaan ni si Lot. ‘Marsak situtu do ibana alani ulaon ni akka parjahat na so umboto ila’ ala diboto ibana sogo do roha ni Debata tu pangalaho sisongon i. (2 Ptr. 2:​7, 8) Ala dihaholongi jala dihabiari si Lot do Debata, sogo do rohana tu akka pangalaho na rorang na masa di sakalilingna. Hita pe saonari dikalilingi akka halak na so mangargai standar moral ni Jahowa. Alai nang pe songon i, boi do toktong denggan pangalahotta molo torus tahaholongi Debata jala torus tahabiari Ibana. (Poda 14:2) Diurupi Jahowa do hita marhite akka nasehat na adong di bukku Poda. Sude halak Kristen, bawa, borua, na poso, dohot na matua boi mandapot manfaat sian akka nasehat na adong disi. Molo mabiar hita tu Jahowa, dang olo hita marale-ale tu akka halak na so denggan pangalahona. w23.06 20 ¶1-2; 21 ¶5

Olo do ra diorai keluargamuna hamu marsiajar Bibel. Manang nungnga dibahen hamu godang pengorbanan jala dipakke hamu artamuna lao manjumolohon Harajaon ni Debata. (Mat. 6:33) Pos ma rohamuna pasti diida Jahowa do pengorbananmuna i. (Heb. 6:10) Nungnga dihilala hamu hata ni Jesus na mandok, “Manang ise na manadikkon jabuna, haha anggina, ibotona, omakna, bapakna, anakkonna, manang tanona alani au dohot alani barita na uli, jaloonna do 100 hali loppit unggodang di tikki on. Jaloonna do unggodang jabu, haha anggi, iboto, omak, anakkon, dohot tano, nang pe ikkon manaon na haccit ibana. Jala jaloonna do hangoluan saleleng ni lelengna di tikki na naeng ro.” (Mrk. 10:​29, 30) Jadi unggodang do pasu-pasu na lao jaloonmuna sian pengorbanan na dibahen hamu.—Ps. 37:4. w24.03 9 ¶5

Tikki masa haraparon na parah tu halak Kristen na di Judea, diputusson akka dongan na di huria Antiokia Siria ma lao mangurupi. “Sapandapot ma akka sisean papunguhon silehon-lehon sesuai tu na tarbahen ni nasida be lao mangurupi akka dongan na di Judea.” (Ul. 11:​27-30) Nang pe dao inganan ni akka dongan na hona bencana i, alai berupaya do halak Kristen na di Antiokia mangurupi nasida. (1 Joh. 3:​17, 18) Saonari pe boi do tapatudu asi ni roha molo taboto adong akka dongan na susa alani bencana alam. Pasti lomo do rohatta mangurupi nasida. Ra olo do tasukkun tu sintua, di proyek penanggulangan bencana na dia ma hita boi mangurupi. Asing ni i, talehon do muse sumbangan tu ulaonta di liat portibi on manang tatangiakkon do akka donganta na gabe korban bencana. Porlu do akka donganta diurupi mandapot akka na dihaporluhon nasida. Tikki ro annon Rajatta Jesus Kristus manguhumi akka halak, sai anggiat ma hita dianggap ibana halak na marasi ni roha jala na tama masuk tu Harajaonna.—Mat. 25:​34-40. w23.07 4 ¶9-10; 6 ¶12

Ditiru Jesus do sikap masuk akkal ni Jahowa. Sasittongna, “holan tu halak Israel na songon biru-biru na lilu” do Jesus disuru marbarita. Alai dipatudu Jesus do sikap masuk akkal tikki marbarita tu akka halak. Contohna hea ma adong sahalak borua na so halak Israel mangelek-elek tu Jesus asa dipamalum boruna na disonggopi suru-suruan na jahat. Asi do roha ni Jesus tu borua i, jala dipamalum ma boruna i. (Mat. 15:​21-28) Parrohahon ma muse contoh na asing. Di awal ni pelayanan ni Jesus, didok ibana do, “Manang ise na maila mananda au . . . , au pe maila ma mananda ibana.” (Mat. 10:33) Alai tikki tolu hali disoadahon si Petrus Jesus, dang na gabe ditolak Jesus ibana. Alana diboto Jesus, halak na setia do si Petrus jala botul-botul do ibana manolsoli tindakanna i. Dung dipahehe, dipataridahon Jesus do dirina tu si Petrus jala dipapos do roha ni si Petrus nungnga diampuni be ibana jala holong do roha ni Jesus tu si Petrus. (Luk. 24:​33, 34) Masuk akkal do Jahowa dohot Jesus. Boha do molo hita? Dipangido Jahowa do hita asa marbisuk manang bersikap masuk akkal. w23.07 21 ¶6-7

Molo adong halak na so porsea tu janji ni Debata, aha ma na boi tadokkon lao paposson roha ni nasida? Na parjolo, Jahowa sandiri do na marjanji. Bukku Pangungkapon mandok, “Dung i didok Ibana na hundul di tahta i ma, ‘Ida ma! Hupaimbaru do saluhutna.’” Marbisuk do Jahowa, marhuaso do Ibana, jala lomo do rohana pasautton janjina. Na paduahon, diboto Jahowa do na lao saut hatana i. I do alana marhak do Ibana mandok, “Ai sittong jala boi do dihaporseai akka hata on. . . . Nungnga saut be akka i!” Na patoluhon, dang adong na boi pasohon ulaon na dimulai Jahowa. I do alana didok Ibana, “Au do Alpa dohot Omega.” (Pgk. 21:6) Patuduon ni Jahowa ma molo Sibolis pargabus jala dang boi ibana mangabbati tujuan ni Jahowa. Jadi molo adong halak na mandok, “Dang mungkin on terjadi”, jaha jala patorang hamu ma Pangungkapon 21:5 dohot 6. Paboa ma nungnga dijamin Jahowa pasti saut janjina i, songon dokumen naung ditanda tangani Ibana.—Jes. 65:16. w23.11 7 ¶18-19

Marumur 75 taon ma si Abraham tikki dipaboa Jahowa janjina i tu ibana. Tikki i dang adong dope gellengna. Memang dang diida ibana saut sude janji ni Jahowa i. Dukkon menyeberang ibana sian Sunge Euprat jala paimahon saleleng 25 taon, diida si Abraham do tubu anakna si Isak. Jala 60 taon dukkon i, diida ibana do tubu pahoppuna, i ma si Esau dohot si Jakkob. (Heb. 6:15) Alai dang diida si Abraham pinopparna i gabe bangso na bolon jala mangingani Tano na Dijanjihon. Nang pe songon i, toktong do ibana setia jala marale-ale tu Jahowa. (Jak. 2:23) Molo dung hehe annon si Abraham, pasti las do rohana mamboto gabe dipasu-pasu do sude bangso di tano on alani haporseaon dohot hasabaronna. (1 Mus. 22:18) Aha do parsiajaranna? Olo do ra dang saut dope sude janji ni Jahowa di tikkitta saonari. Alai molo sabar hita songon si Abraham, pos ma rohatta pasu-pasuon ni Jahowa do hita saonari jala umbalga do upa na lao jalootta di tano na imbaru.—Mrk. 10:​29, 30. w23.08 24 ¶14

Tikki poso dope Raja Usia, serep do rohana. Marsiajar do ibana “makkabiari Debata na sittong”. Jala dipasu-pasu Jahowa do si Usia sappe hira-hira marumur 68 taon. (2 Kron. 26:​1-4) Godang do musu na ditaluhon si Usia jala toktong do aman kota Jerusalem saleleng mamaretta ibana. (2 Kron. 26:​6-15) Pasti las do roha ni si Usia ala diurupi Debata do sude na diulahon ibana. (Pjm. 3:​12, 13) Somal do Raja Usia mambahen paretta tu akka halak. Alani i do ra, gabe didok rohana boi lomo-lomona mangulahon manang aha pe. Hea ma sada tikki masuk ibana tu bagas joro ni Jahowa jala manutung dupa di langgatan. Hape, dang boi raja mangulahon i. (2 Kron. 26:​16-18) Dipasingot Sintua ni Malim Azaria ma ibana. Alai muruk do ibana tu si Azaria. Ujungna dang setia ibana tu Jahowa, jala dibahen Jahowa ma ibana marsahit kusta. (2 Kron. 26:​19-21) Autsugari toktong serep rohana pasti dang songon i ngoluna! w23.09 10 ¶9-10

Nang pe si Petrus nungnga gabe halak na miniahan, alai ikkon berjuang dope ibana mangatasi hagaleonna i. Di taon 36 M, disuru Debata ma ibana lao manjuppangi si Kornelius na so halak Jahudi. Di tikki i ma dimiahi Debata si Kornelius. Sian on takkas ma tarida, ‘na so marimbar jolma di jolo ni Debata’ jala na boi do halak na so Jahudi gabe bagian ni huria Kristen. (Ul. 10:​34, 44, 45) Dukkon i, rap mangan ma si Petrus dohot halak na so Jahudi. Hape dang hea diulahon ibana on sebelumna. Alai didok roha ni piga-piga halak Jahudi, dang boi nasida rap mangan dohot halak na so Jahudi. Tikki di Antiokia si Petrus, adong dope akka dongan na di huria i na songon i pandanganna. Alani i gabe dang olo be mangan si Petrus dohot akka dongan na so halak Jahudi, ala mabiar ibana tu akka halak Jahudi na di huria i. Diida si Paulus do na munafik si Petrus disi jala dipasingot do ibana di jolo ni godang halak. (Gal. 2:​13, 14) Nang pe mambahen kesalahan si Petrus, alai dang menyerah ibana mangatasi hagaleonna i. w23.09 22 ¶8

Olo do disadari hamu adong na porlu dipadenggan hamu. Alai unang ma metmet rohamuna. ‘Burju do Tuan i’, jala pasti urupanna do hamu asa gabe lam denggan. (1 Ptr. 2:3) Dipapos Apostel Petrus do hita, ‘Togu-toguon ni Debata do hamu sahat tu ujungna. Patoguonna ma hamu.’ Mulana didok roha ni si Petrus do dang tama ibana rap dohot Jesus. (Luk. 5:8) Alai ala diurupi Jahowa dohot Jesus, gabe marsitutu ma ibana mangihutton Jesus. Dilehon Jahowa ma tu si Petrus “hamuliaon masuk tu Harajaon na saleleng ni lelengna, i ma Harajaon ni Jesus Kristus Tuan jala Sipalua hita”. (2 Ptr. 1:11) Pasu-pasu na luar biasa do on! Hamu pe molo dang menyerah songon si Petrus jala olo hamu ditogu-togu Jahowa, boi do dapotmuna hangoluan saleleng ni lelengna. Pos ma rohamuna ‘dapotmuna do haluaon i alani haporseaon’.—1 Ptr. 1:9. w23.09 31 ¶16-17

Adong do alaman di luar ni tabernakel, jala disi ma akka malim mangulahon tugas ni nasida. Di alaman i do dibahen langgatan manutung pelean dohot bak na sian tombaga na dipakke akka malim lao paiasson diri ni nasida andorang so mangulahon tugasna. (2 Mus. 30:​17-20; 40:​6-8) Andorang so gabe malim akka halak na miniahan, setia do nasida marhobas saleleng di tano on, i ma di alaman ni bagas joro na di bagasan. Jala bak na sian tombaga i paingotton nasida dohot sude halak Kristen asa toktong ias roha, pikkiran, dohot pangalaho ni nasida. Adong do muse “punguan bolon”. Didia do nasida manomba Jahowa? Diida Apostel Johannes do ‘nasida jongjong di jolo ni tahta i. . . . Jala marhobas tu Ibana arian nang borngin di bagas jorona’. Di tano on do nasida marhobas, i ma di alaman luar ni bagas joro. (Pgk. 7:​9, 13-15) Mandok mauliate do hita ala boi hita manomba Debata di bagas joro na mulia! w23.10 28 ¶15-16

Sada cara ni Jahowa mangalehon gogo tu hita, i ma marhite akka sintua. (Jes. 32:​1, 2) Jadi molo holsoan hamu, paboa ma i tu akka sintua, jala unang ma maila manjalo bantuan sian nasida. Alana, nasida do na dipakke Jahowa lao mambahen hamu margogo. Janji ni Debata na dipaboa di Bibel taringot hangoluan salelengna mangurupi hita asa toktong margogo lao manomba Jahowa. (Rom 4:​3, 18-19) Harapanta i boi mangurupi hita toktong martahan mangadopi masalahta, lam semangat marbarita na uli, dohot mangulahon akka tugasta di huria. (1 Tes. 1:3) Harapan on do tong na mambahen Apostel Paulus lam margogo. ‘Disosak do ibana’, ‘dibahen na haccit’, “didabuhon”, jala marsak do ibana. Sipata tarancam do ngoluna. (2 Kor. 4:​8-10) Ala toktong diingot si Paulus harapanna, gabe lam margogo do ibana mangadopi akka sitaononna. (2 Kor. 4:​16-18) Sai toktong do diingot ibana upa na lao jaloonna, i ma hangoluan salelengna di surgo. Ala dirimangi ibana i sude, gabe ‘lam dipaimbaru do roha nang pikkiranna ganup ari’. w23.10 15-16 ¶14-17

Tikki martangiang, pikkirhon ma, ‘Memang on do tikki na pas Jahowa mangalusi tangiakku?’ Olo do ra tahilala pittor hatop ma nian dialusi tangiangta. Hape sebenarna holan Jahowa do na mamboto andigan tikki na pas lao mangalusi tangiangta. (Heb. 4:16) Jala molo dang pittor dialusi tangiangta, olo do didok rohatta ‘na so’ dialusi tangiangta i. Hape sebenarna, olo do ra ‘dang tikkina dope’ Jahowa mangalusi tangiangta i. Bayakkon ma sahalak bawa na marsahit na mangido asa dipamalum. Alai dang marna malum ibana. Molo dibahen Jahowa mukjizat pamaluppon ibana, olo do gabe didok Sibolis holan ala na sehat do bawa i umbahen na olo ibana manomba Jahowa. (Job 1:​9-11; 2:4) Asing ni i, nungnga ditottuhon Jahowa andigan tikkina lao pamaluppon sude sahit. (Jes. 33:24; Pgk. 21:​3, 4) Jadi saleleng so dapot dope tikkina, unang ma taharappon terjadi mukjizat na mambahen hita malum. Tumagon hian do dipangido bawa i tu Jahowa asa dilehon Jahowa gogo dohot dame ni roha tu ibana, asa boi ibana martahan saleleng marsahit jala setia manomba Jahowa. w23.11 24 ¶13

Nang pe balga kesalahan naung dibahen si Simson, alai toktong do ibana manomba Jahowa. Dilului ibana do kesempatan asa boi mangulahon tugas sian Jahowa lao manaluhon halak Palistim. (Pangh. 16:​28-30) Martangiang do ibana tu Jahowa. Didok ibana, “Loas ma au mambalos halak Palistim on.” Dialusi Jahowa do tangiangna i, jala dibahen ma si Simson mulak margogo muse. Ujungna boi ma ibana marhasil mangulahon tugasna i. Jala unggodang do na dipamate ibana di tikki i sian na dipamate ibana sebelumna. Nang pe gabe susa si Simson alani kesalahanna, alai dang na gabe so olo be ibana mangulahon tugas sian Jahowa. Songon si Simson, olo do ra hea taulahon na sala. Gabe dipissang hita manang dang dilehon be tanggung jawab tu hita. Molo songon i, unang ma gabe dang olo be hita mangulahon lomo ni roha ni Jahowa. Taingot ma rade do Jahowa manalpuhon kesalahanta. (Ps. 103:​8, 9) Nang pe hea taulahon kesalahan, alai olo do Jahowa mangalehon gogo tu hita songon na dibahen tu si Simson. w23.09 6 ¶15-16

Molo toktong hamu martahan nang pe marsitaonon, gabe las ma roha ni Jahowa tu hamu. Dang na berarti gabe las roha ni Jahowa molo susa hamu. Alai las do rohana ala toktong hamu martahan jala setia tu Ibana nang pe marsitaonon. Gabe dipatogu do rohatta mamboto on! (Ps. 5:12) Taingot ma si Abraham na toktong martahan mangadopi sitaononna. Las do roha ni Jahowa mangida ibana. Didok Jahowa ma ibana ale-alena jala didok do muse ibana halak na mangulahon na sittong. (1 Mus. 15:6; Rom 4:​13, 22) Hita pe boi do songon si Abraham. Molo toktong hita martahan mangadopi sitaononta jala setia tu Debata, gabe lomo ma rohana mangida hita. Jadi dang tugas manang tanggung jawabta di organisasina na mambahen lomo roha ni Debata tu hita. Dang soal sadia umurta, aha bakatta, jala songon dia situasitta, boi do hita sude toktong martahan. Molo adong sitaononmuna saonari jala toktong hamu martahan mangadopi i, pos ma rohamuna las do roha ni Debata mangida hamu. Jala molo diboto hamu na las roha ni Debata mangida hamu, pasti lam pos ma rohamuna tu janji ni Debata. w23.12 11 ¶13-14

Ikkon marlatik do sahalak bawa asa denggan makkata-hatai. Lapatanna, porlu do ibana denggan manangihon jala mangattusi pikkiran dohot perasaan ni halak na asing. (Poda 20:5) Porlu do denggan diparrohahon ibana nada suara, bohi, dohot gerak tubuh ni sasahalak tikki makkata-hatai dohot ibana. Alana molo holan mangirim pesan manang email hamu lao makkata-hatai dohot halak na asing, boi do gabe maol hamu annon makkata-hatai secara langsung. Alani i, parade hamu ma tikkimuna lao marsaor dohot halak na asing secara langsung. (2 Joh. 12) Sahalak bawa na togu haporseaonna tu Jahowa pe ikkon boi do massari tu dirina sandiri dohot tu keluargana. (1 Tim. 5:8) Godang do labana molo diparsiajari hamu sada keterampilan, alana boi do i mangurupi hamu lao mangalului karejo. (Ul. 18:​2, 3; 20:34; Eps. 4:28) Molo ditanda halak hamu bawa na ringgas jala na martanggung jawab, gabe mura ma hamu mangalului karejo. Jala gabe lomo ma roha ni bosmuna mampartahatton hamu gabe parkarejona. w23.12 27 ¶12-13

“Ari ni Jahowa” na dipaboa di Bibel, i ma tikki dihancurhon Jahowa sude musuna jala dipalua Ibana akka naposona. Di tikki najolo nungnga hea Jahowa manghukum akka bangso. (Jes. 13:​1, 6; Hes. 13:5; Sep. 1:8) Satokkin nai dimulai ma “ari ni Jahowa” tikki dihancurhon Babel na Balga jala marujung ma i di porang Armagedon. Asa malua hita sian “ari” i, porlu do taparade diritta sian saonari. Jala didok Jesus ikkon ‘toktong do hita rade’ sahat tu na ro “hasusaan bolon”. (Mat. 24:21; Luk. 12:40) Di suratna na parjolo tu halak Tessalonik, dipakke si Paulus do piga-piga ilustrasi lao mangurupi halak Kristen asa rade tu ari panguhuman ni Jahowa. Diboto si Paulus do ari ni Jahowa dang ro di tikki i. (2 Tes. 2:​1-3) Alai dijujui ibana do akka dongan di tikki i asa mangarade jala mangingot na lao ro nama ari ni Jahowa satokkin nai. Hita pe boi do menerappon nasehat ni si Paulus on. w23.06 8 ¶1-2

Di taon 1978, dibangun ma sada gedung 60 tingkat na massai timbo di Tokyo, Jepang. Heran do akka halak boasa boi hot gedung i nang pe jotjot masa gempa bumi di kota i. Boasa boi songon i? Sasittongna nungnga dirancang gedung i boi hot jala boi tong menyesuaihon tu guncangan. Halak Kristen pe, ikkon songon gedung i do. Aha do maksudna? Ikkon togu do halak Kristen alai boi tong menyesuaihon diri. Ikkon toktong do hita togu lao mangoloi patik dohot standar ni Jahowa. Ikkon rade do hita mangoloi. Alai porlu do hita masuk akkal manang menyesuaihon diri molo porlu. (Jak. 3:17) Molo seimbang hita, dang gabe terlalu kaku hita manang gabe sepele tu patik dohot standar ni Jahowa. w23.07 14 ¶1-2

Hea do langsung didok Sibolis asa unang dioloi Jesus be Jahowa. Ikkon tegas do Jesus menolak sude godaan i. (Mat. 4:​1-11) Alana lomo do roha ni Sibolis asa gabe mardosa Jesus jala dang boi mangalehon dirina gabe tobusan. Godang do muse tantangan na diadopi Jesus. Hea do ibana naeng dipamate akka musuna. (Luk. 4:​28, 29; 13:31) Ikkon sabar do muse ibana tu akka siseanna na so sempurna. (Mrk. 9:​33, 34) Jala tikki naeng mate ibana, digattung do ibana di sada hau jala direhe-rehei akka halak. Dung i songon parjahat do ibana dihukum jala haccit hian do ditaon ibana i. (Heb. 12:​1-3) Sahat tu na mate Jesus, dipaloas Jahowa do ibana manaon na haccit. (Mat. 27:46) Takkas ma, balga hian do pengorbanan na dibahen Jesus asa boi ibana gabe tobusan. Molo tarimangi songon dia pengorbanan ni Jesus humokkop hita, gabe lam holong ma rohatta tu ibana. w24.01 10-11 ¶7-9

Ikkon sabar do hita asa denggan hubungatta dohot akka dongan. Denggan ma tatangihon nasida tikki makkatai. (Jak. 1:19) Hasabaron pe mangurupi hita asa mardame dohot na asing. Molo sabar hita, dang pahatophu hita bertindak manang mandok hata na so tabo begeon tikki marsak hita. Jala molo sabar hita, dang hatop hita muruk tikki adong na mambahen haccit rohatta. Dang olo hita mambalos, gariada ‘sabar do hita tu na asing, jala rade manalpuhon hasalaan ni nasida’. (Kol. 3:​12, 13) Molo sabar hita gabe diurupi do hita mambahen akka keputusan na denggan. Dang gabe terburu-buru hita, alai jolo tabahen do riset. (Poda 21:5) Misalna tikki naeng mangalului karejo. Molo sabar hita, tabahen do tikki lao mamikkirhon aha do pengaruh ni karejo i tu keluargatta dohot hubungatta tu Jahowa. Molo sabar hita, gabe dang tabahen keputusan na so denggan. w23.08 22 ¶8-9

Molo metmet rohamuna ala sipata dang marhasil hamu mangalo hisap-hisap ni dagingmuna, ingot ma janjimuna tu Jahowa. Pasti gabe lam bertekad do hamu lao menolak akka godaan. Boasa? Tikki dilehon hamu ngolumuna tu Jahowa, na disoadahon hamu do dirimuna sandiri. Lapatanna, dang mangihutton lomo ni rohamuna sandiri be hamu, jala akka na mambahen las roha ni Jahowa do na diulahon hamu. (Mat. 16:24) Jadi tikki ro godaan pittor diboto hamu ma aha na lao ulahononmuna. Alana nungnga dibahen hamu hian keputusan sebelum ro godaan i. Gabe boi ma hamu songon si Job na toktong mambahen las roha ni Jahowa. Nang pe borat sitaonon ni si Job, didok ibana do, “Toktong do au setia tu Debata!”—Job 27:5. w24.03 9 ¶6-7

Sai didongani Jahowa ‘Debata parholong’ i do hita! (2 Kor. 13:11) Holong do rohana tu hita ganup marsada-sada. Pos ma rohatta ‘dipatudu Ibana do holong ni rohana lao manjaga hita’. (Ps. 32:10) Molo jotjot tarimangi on sude, gabe boi ma tahilala holong ni Jahowa jala lam jonok ma hita tu Ibana. Martangiang ma hita manang sadihari pe, jala tapaboa ma na massai arga do holong ni rohana i tu hita. Tapaboa ma sude holso ni rohatta tu Jahowa. Pos ma rohatta diattusi Jahowa do situasitta, jala lomo do rohana mangurupi hita. (Ps. 145:19) Songon api unggun na mambahen las dagingta tikki ngali ari, songon i ma holong ni Jahowa tu hita. Boi do i mangapuli rohatta tikki borat sitaononta. Gabe lam jonok ma hita tu Ibana. Alani i, las ma rohamuna ala dihaholongi Jahowa hamu. Jala songon panurat Psalmen dok ma, “Holong do rohakku tu Jahowa”!—Ps. 116:1. w24.01 31 ¶19-20

Jesus dang holan paboahon tu akka halak taringot goar ni Debata. Alana, halak Jahudi na diajari Jesus di tikki i sasittongna nungnga mamboto goar ni Debata. Alai lobi sian i do na diulahon Jesus. Bagas do dipatorang ibana taringot tu Debata. (Joh. 1:​17, 18) Contohna di Akka Bukku Heber dipaboa, Debata na marasi ni roha do Jahowa i. (2 Mus. 34:​5-7) Alai asa takkas diattusi halak aha lapatanna, dibahen Jesus ma tudosan taringot anak na mago na diampuni bapakna. Di ujung ni tudosan i, dipaboa do na bertobat anak na mago i jala mulak tu bapakna. Disi diida bapakna anakna i sian na dao dope, gabe asi ma roha ni bapakna i. “Marlojong ma ibana, dihaol, jala diumma ma anakna i.” Songon bapak na di tudosan ni Jesus i do Jahowa. Gabe boi ma tabayakkon Debata parasi roha do Ibana. (Luk. 15:​11-32) Takkas ma, diurupi Jesus do akka halak asa boi mamboto Debata na songon dia Jahowa i. w24.02 10 ¶8-9

Pangapulion sian Jahowa mambahen hita margogo manaon sitaononta. Songon dia ma caratta maniru asi ni roha ni Jahowa jala patoguhon na asing? Carana, jolo tapatudu ma akka sifat na boi mambahen hita marasi ni roha tu na asing. Akka sifat aha ma i? Aha do na boi mambahen asa lam taronjar rohatta lao patoguhon akka donganta ganup ari? (1 Tes. 4:18) Ikkon sapakkilalaan ma hita dohot akka donganta, marsihaholongan, jala burju ma hita tu nasida. (Kol. 3:12; 1 Ptr. 3:8) Boasa ikkon tapatudu akka sifat on? Alana molo boi tapatudu akka sifat on jala asi rohatta tu akka donganta, pasti gabe taronjar ma rohatta lao patoguhon nasida di tikki susa. Songon na didok Jesus, “Nasa na adong di roha, i do dihatahon pamangan. Alani i, dihatahon halak na burju do na denggan, ai akka na denggan do di rohana.” (Mat. 12:​34, 35) Tikki tapatogu akka donganta, disi ma hita patuduhon na holong rohatta tu nasida. w23.11 10 ¶10-11

Porlu do tapangido bantuan asa boi taattusi surirang ni Bibel. Bayakkon ma molo lao hamu mardalani tu sada tempat, jala dang diboto hamu dope daerah i. Alai adong ma donganmuna na takkas mamboto daerah i. Tikki dipaboa hamu didia posisimuna, diboto ibana do i dohot akka dalan na adong disi. Pasti las do rohamuna molo olo donganmuna i mandongani hamu. Dos songon donganmuna i do Jahowa. Diboto Ibana do aha na lao masa di joloan ni ari. Jadi asa boi taattusi surirang ni Bibel, ikkon serep do rohatta mangido bantuan ni Jahowa. (Dan. 2:28; 2 Ptr. 1:​19, 20) Songon natua-tua na parholong, lomo do roha ni Jahowa asa denggan ngolu ni ianakkonna di ari na naeng ro. (Jer. 29:11) Alai dang diboto natua-tuatta aha na lao masa di ari na naeng ro. Holan Jahowa do na mamboto i, jala sittong do sude hatana i. Dipillit Ibana do akka bawa lao manurat akka surirang ni Bibel asa boi taboto akka peristiwa na penting di ari na naeng ro.—Jes. 46:10. w23.08 8 ¶3-4