September

Nungnga dilehon Debata huaso tu Jesus lao manalpuhon sude sitaonon ni jolma. Marhite akka mukjizat, dipatudu Jesus do na sanggup ibana manalpuhon sude sitaonon na so boi diatasi jolma. Misalna, sanggup do Jesus paluahon hita sian dosa warisan na mambahen hita susa, termasuk ma i sahit dohot hamatean. (Mat. 9:​1-6; Rom 5:​12, 18, 19) Akka mukjizat ni Jesus i patuduhon sanggup do ibana pamaluppon “sude sahit” jala pahehehon na mate. (Mat. 4:23; Joh. 11:​43, 44) Asing ni i, sanggup do Jesus pasohon badai jala paluahon jolma sian suru-suruan na jahat. (Mrk. 4:​37-39; Luk. 8:2) Pasti gabe dipatogu do rohatta mamboto na dilehon Jahowa do huaso tu Jesus Anakna lao paluahon hita. Pos ma rohatta na lao saut do akka janji ni Debata dung mamaretta Harajaon ni Debata di tano on. Akka mukjizat na dibahen Jesus tikki mangolu di tano on paposson rohatta, umbalga dope annon bahenonna dung mamaretta Harajaon ni Debata tu tano on. w23.04 3 ¶5-7

Molo bergabung hamu di huria na balga, olo do jarang hamu ditunjuk pemandu. Gabe dang semangat be hamu mangalehon komentar. Alai unang ma menyerah. Persiappon ma piga-piga komentar tu setiap parpunguan. Jadi molo dang ditunjuk hamu di awal pembahasan, adong dope kesempatanmuna mangalehon komentar di bagian na asing. Tikki dipersiappon hamu Joujou Paboahon, pikkirhon ma songon dia setiap paragraf berkaitan tu tema ni artikel i. Molo dibahen hamu songon i, gabe godang ma na boi dikomentari hamu saleleng pembahasan. Asing ni i, persiappon ma komentar tu akka paragraf na mambahas taringot ajaran ni Bibel na bagas, na maol dipatorang. Boasa? Alana sipata otik do na mangalehon komentar di bagian i. Boha do molo dang marna ditunjuk hamu? Paboa ma tu pemandu sebelum acara parpunguan, sukkun-sukkun na dia na naeng dialusi hamu. w23.04 21-22 ¶9-10

Rade do si Josep mangihutton petunjuk sian Jahowa, jala on ma na mambahen ibana gabe suami na burju. Di tolu peristiwa, dijalo ibana do petunjuk sian Jahowa taringot keluargana. Pittor dioloi ibana do petunjuk i, nang pe maol di ibana. (Mat. 1:20; 2:​13-15, 19-21) Ala diihutton si Josep do petunjuk sian Jahowa, gabe terlindung ma si Maria jala terpenuhi ma kebutuhanna. Pasti gabe lam tamba ma holong dohot respek ni si Maria tu si Josep! Hamu akka suami, boi do ditiru hamu si Josep molo dilului hamu petunjuk sian Bibel lao mangurus keluargamuna. Molo diulahon hamu akka petunjuk i nang pe dang sai mura i di hamu, on patuduhon na holong do rohamuna tu istrimuna jala gabe lam togu ma perkawinanmuna. Sahalak donganta borua di Vanuatu naung menikah lobi sian 20 taon mandok, “Tikki dilului suamikku petunjuk sian Jahowa jala diulahon ibana i, gabe lam respek ma au tu ibana. Gabe merasa aman ma au, jala gabe pos rohakku tu keputusanna.” w23.05 21 ¶5

Gabe “bangso na badia” do halak Israel na mulak sian Babel i di jolo ni Debata. (5 Mus. 7:6) Alai on dang berarti na so porlu be nasida mambahen perubahan lao palasson roha ni Debata. Godangan halak Jahudi tubu di Babel jala godang sian nasida nungnga terpengaruh tu cara marpikkir dohot standar ni halak Babel. Hampir 70 taon dung mulak halak Jahudi tu Israel, longang do roha ni Gubernur Nehemia dung mamboto dang boi gelleng ni nasida na tubu di Israel mangattusi bahasa Heber. (5 Mus. 6:​6, 7; Neh. 13:​23, 24) Songon dia ma akka gellengna i boi makkaholongi jala manomba Jahowa molo dang diboto nasida bahasa Heber, hape i do bahasa na dipakke lao manuratton Hata ni Debata? (Esr. 10:​3, 44) Takkas ma, ikkon dibahen halak Jahudi i do perubahan na balga di ngolu ni nasida. Alai ummura ma nasida mambahen perubahan molo tinggal nasida di Israel. Alana disi do ibadat na sittong secara bertahap dipadenggan.—Neh. 8:​8, 9. w23.05 15 ¶6-7

Dang soal sadia balga keinginan dohot upayatta lao mencapai cita-cita rohanitta, olo do maol mangulahon i. Misalna olo do masa “akka na so diharappon” na mambahen dang adong be tikkitta lao mencapai cita-citatta. (Pjm. 9:11) Olo do muse masa situasi na borat na mambahen hita kecil hati manang dang margogo. (Poda 24:10) Ala jolma na so sempurna hita, olo do muse tabahen kesalahan na mambahen hita maol mencapai tujuanta. (Rom 7:23) Manang olo do palojahu hita. (Mat. 26:43) Aha do na boi mangurupi hita asa unang kecil hati tikki maol tacapai cita-cita rohanitta? Ingot ma nang pe hea hamu gagal, dang na berarti torus hamu gagal. Bibel mandok olo do mulak-ulak taadopi hasusaan dohot tantangan. Alai takkas do dipaboa di Bibel, boi do hita hehe muse. Jadi molo toktong hamu berupaya mencapai cita-citamuna nang pe hea gagal, on patuduhon na massai lomo do rohamuna mambahen las roha ni Jahowa. Pasti las do roha ni Jahowa molo toktong hamu berupaya mencapai cita-cita rohanimuna. w23.05 30 ¶14-15

Molo merintis sasahalak sian tikki poso, gabe tarlatik ma ibana asa denggan bekerja sama. Asing ni i, gabe malo ma ibana mangatur hepengna. (Plp. 4:​11-13) Cara na denggan lao memulai dinas sepenuh waktu, i ma merintis ekstra. Ala dibahen songon i, gabe rade ma ibana merintis biasa. Jala dung merintis biasa ibana, gabe adong ma kesempatan diundang lao mangurupi ulaon pembangunan manang karejo di Betel. Sahalak doli-doli boi do marcita-cita asa gabe sintua lao mangurupi akka dongan di huria. Alana didok Bibel molo marsitutu sahalak bawa naeng gabe sintua, “na lomo do rohana mandapot ulaon na denggan”. (1 Tim. 3:1) Na parjolo, ikkon berupaya do ibana asa memenuhi syarat gabe sahalak parhobas. Godang do na boi diulahon sahalak parhobas lao mangurupi akka sintua. Ikkon serep do roha ni akka sintua dohot parhobas mangurupi akka dongan di huria, jala semangat di ulaon marbarita. w23.12 28 ¶14-16

Tikki remaja Raja Josia, nungnga mulai ibana mangalului Jahowa. Lomo do rohana marsiajar taringot Jahowa, jala mangulahon lomo ni roha ni Jahowa. Nang pe songon i, godang do tantangan na diadopi ibana tikki gabe raja. Tikki ibana mamaretta, godang do akka halak na manomba debata na so sittong. Jadi ikkon barani do si Josia mangorai bangsona asa unang manomba debata na so sittong. Jala memang i do na diulahon ibana. Sebelum dapot umurna 20 taon, nungnga mulai ibana mangaropukkon akka inganan panombaon ni debata na so sittong di wilayah pamarettaonna. (2 Kron. 34:​1, 2) Nang pe poso dope hamu, boi do hamu maniru si Josia. Marsiajar ma taringot Jahowa dohot akka sifatna. Hasilna, gabe taronjar ma rohamuna lao mangalehon ngolumuna tu Jahowa. Molo dibahen hamu keputusan sisongon i, aha do pengaruhna tu ngolumuna? Olo do ra sarupa tekadmuna songon si Luke na tardidi tikki marumur 14 taon. Tikki dilehon ibana ngoluna tu Jahowa marjanji do ibana mulai di tikki i, Jahowa ma na uppetting di ngoluna, jala berupaya mambahen las rohana. (Mrk. 12:30) Molo songon i tekadmuna, pasti dapotmuna do annon pasu-pasu sian Jahowa! w23.09 11 ¶12-13

Tikki dibahen Apostel Paulus suratna na parjolo tu huria Tessalonik, dang adong dope sataon dibentuk huria i. Bisa jadi akka sintua na dilantik disi dang marpengalaman dope jala olo do mambahen kesalahan. Alai nang pe songon i, ikkon tetap do nasida diargai. Nungnga lam jonok be hasusaan bolon, alani i sian saonari ikkon taihutton do petunjuk ni akka sintua. Bisa jadi annon, dang boi dapotta petunjuk sian akka dongan na adong di kantor pusat dohot kantor cabang. Jadi massai penting do tapatudu holong dohot pangargaion tu akka sintua. Torus ma tajaga pikkiranta dang soal aha na masa. Unang ma fokus hita tu hahurangan ni akka sintua, alai taingot ma Jahowa do na manogu-nogu nasida marhite Kristus. Sarupa songon takkuluk bosi na boi melindungi ulu ni sahalak tentara, pos ni roha tu janji ni Jahowa taringot haluaon pe boi melindungi pikkiranta. Gabe sadar ma hita dang mararga akka na ditawarhon portibi on. (Plp. 3:8) Boi do i mangurupi hita asa toktong tenang jala denggan cara marpikkirta. w23.06 11-12 ¶11-12

Akka halak na mambege soara ni “borua na oto” i ikkon mamutusson dijalo nasida do undanganna i manang na daong. Adong do alasanna boasa dang boi hita mangulahon seks na so patut. “Borua na oto” na didok nakkin mandok, “Manis do aek na ditakko.” (Poda 9:17) Aha do “aek na ditakko” i? Di Bibel dipatudos do hubungan seks ni suami istri songon aek. (Poda 5:​15-18) Bawa dohot borua naung sah menikah boi do menikmati hubungan seks dohot pasanganna. Asing do i tu seks na so patut, na dipatudos songon “aek na ditakko”. Biasana halak na mangulahon seks na so patut manabunihon ulaon ni nasida i asa unang diboto na asing, dos songon sasahalak na sip-sip manakko. Hira na manis do “aek na ditakko” i ala dirippu nasida dang adong na lao mamboto i. Alai sasittongna na mangoto-otoi dirina sandiri do nasida disi, alana diida Jahowa do sudena i. Dang adong be na umhaccit molo sega parale-aleotta tu Jahowa, jala pasti dang “manis” i.—1 Kor. 6:​9, 10. w23.06 22 ¶7-9

Boha do molo dihilala hamu dang sian nasa roha be hamu martangiang? Manang dang pola semangat be hamu marbarita? Molo songon i na dihilala hamu, dang na so diurupi Jahowa be hamu. Olo do songon i perasaanta ala dang sempurna dope hita. Molo moru semangatmuna, ingot ma si Paulus. Nang pe berupaya ibana maniru Jesus, olo do sipata moru semangatna mangulahon i. Marsitutu do si Paulus mangulahon tanggung jawabna nang pe sipata dang semangat ibana mangulahon i. Tiru ma si Paulus. Unang ma dibahen hamu keputusan mangihutton perasaanmuna. Alai toktong ma ulahon na sittong nang pe dang semangat hamu mangulahon i. Molo toktong diulahon hamu na denggan, pasti boi do hamu semangat muse.—1 Kor. 9:16. w24.03 11-12 ¶12-13

Hita pe boi do patuduhon holong tu akka donganta molo olo hita gabe dongan ni nasida, jala mangalehon tikki rap dohot nasida. (2 Kor. 6:​11-13) Di huriatta, olo do marragam latar belakang dohot kepribadian ni akka donganta. Boi do lam balga holongta tu nasida molo berfokus hita tu akka sifat ni nasida na denggan. Molo marsiajar hita mangida na asing songon cara ni Jahowa mangida nasida, on patuduhon na holong do rohatta tu nasida. Massai penting do patuduhon holong tu akka donganta saleleng hasusaan bolon. Songon dia do Jahowa melindungi hita tikki dimulai hasusaan bolon i? Parrohahon ma aha na didok Jahowa tu naposona tikki diserang Kota Babel najolo. Didok Ibana, “Ale bangsokku, masuk ma hamu tu akka kamarmuna, jala tutup hamu ma pintu na di pudimuna. Martabuni ma hamu satokkin, sahat tu na salpu rimas i.” (Jes. 26:20) Marlakku do tong hata on tu hita saleleng hasusaan bolon haduan. w23.07 6-7 ¶14-16

Pikkirhon ma sukkun-sukkun on, ‘Ditanda do au halak na masuk akkal jala olo mengalah? Manang ditanda do au halak na kaku, kasar, jala sijogal rukkung? Olo do au mengalah dohot manangihon na asing?’ Molo masuk akkal hita, berarti na tatiru do Jahowa dohot Jesus. Ikkon masuk akkal do hita tikki muba situasitta. Alana tikki muba situasitta, olo do ro akka masalah na so hea dope tabayakkon. Misalna olo do marsahit na parah hita, muba situasi di parhepengonta, manang muba situasi politik na mambahen susa ngolutta. (Pjm. 9:11) Bahkan olo do muba tugasta di organisasi ni Jahowa. Boi do hita marhasil menyesuaihon diri tu situasi na baru molo taihutton opat langkah on: (1) tasadari ma nungnga muba be situasitta, (2) berfokus ma tu ari na naeng ro, (3) rimangi ma akka na denggan di ngolutta, jala (4) taurupi ma na asing. w23.07 21-22 ¶7-8

Poso dope si Daniel tikki diboan ibana gabe tawanan sian Jerusalem tu Babel. Alai terkesan do akka pejabat istana tu si Daniel, ala “ganteng” do ibana jala sian keluarga na sangap. (1 Sam. 16:7) Alani i dilatik halak Babel ma ibana asa boi karejo di istana. (Dan. 1:​3, 4, 6) Holong do roha ni Jahowa tu si Daniel, ala setia do ibana tu Jahowa. Dianggap Jahowa do si Daniel halak na tigor marroha songon si Noak dohot si Job. Hape di tikki i, hira-hira marumur 20 taon dope si Daniel, dang songon si Noak dohot si Job naung martaon-taon setia manomba Debata. (1 Mus. 5:32; 6:​9, 10; Job 42:​16, 17; Hes. 14:14.) Jala torus do dihaholongi Jahowa si Daniel saleleng ngoluna.—Dan. 10:​11, 19. w23.08 2 ¶1-2

Tikki naeng manuhor jabu hamu, pasti lomo do rohamuna naeng mamboto ganup bagian ni jabu i andorang so dituhor. Dos songon i ma tikki manjaha dohot marsiajar Bibel hita. Molo holan tajaha sambing Bibel i, gabe holan “ajaran na parjolo sian hata ni Debata” do na taboto. (Heb. 5:12) Alai ikkon manat do hita mamparsiajari Bibel asa lam taattusi isina. Molo taulahon i, hira na “masuk” tu jabu na naeng tatuhor i do hita. Talului ma songon dia ganup bagian ni Bibel adong kaitanna. Marsitutu ma hita mangattusi aha na tahaporseai, jala boasa porsea hita tu hasittongan i. Asa boi taattusi isi ni Bibel, ikkon bagas do taparsiajari i. Najolo, dijujui Apostel Paulus do akka donganna asa ringgas mamparsiajari Hata ni Debata asa ‘diboto nasida bidangna, ganjangna, timbona, dohot bagasna’. Ala diulahon nasida i, gabe “togu” ma haporseaon ni nasida jala “marsihohot” tusi. (Eps. 3:​14-19) Songon i ma nian hita. w23.10 18 ¶1-3

Godang dope contoh ni akka halak na sabar na disurat di Bibel. Denggan do molo tariset taringot nasida. Misalna, poso dope si Daud tikki dilantik gabe raja ni Israel. Alai ikkon sabar do ibana paimahon saleleng martaon-taon asa boi mamaretta di Israel. Asing ni i, toktong do si Simeon dohot si Hanna setia manomba Jahowa huhut paimahon Messias na dijanjihon. (Luk. 2:​25, 36-38) Tikki diparsiajari hamu akka contoh on, lului hamu ma alus ni sukkun-sukkun on: Boasa boi sabar ibana? Aha do manfaat na didapot ibana ala sabar? Boha do carakku maniru ibana? Taparsiajari ma muse contoh ni akka halak na so patuduhon hasabaron. (1 Sam. 13:​8-14) Sukkun ma muse dirimuna, ‘Boasa dang sabar nasida? Jala aha do akibatna ala dang sabar nasida?’ w23.08 25 ¶15

Setia do si Petrus. Dang diloas ibana manang aha pe mambahen ibana gabe maninggalhon Jesus. Contohna, hea ma sada tikki adong hata ni Jesus na so diattusi akka siseanna. (Joh. 6:68) Godang do akka sisean na maninggalhon Jesus ala dang olo nasida mangalului lapatan ni hata ni Jesus i. Alai dang songon i si Petrus. Setia do ibana. Gariada didok ibana do, holan hata ni Jesus do “na parohon hangoluan na saleleng ni lelengna”. Diboto Jesus do na lao ditinggalhon si Petrus dohot akka apostelna do ibana. Alai dipapos Jesus do roha ni si Petrus na lao mulak do muse si Petrus tu ibana jala toktong setia. (Luk. 22:​31, 32) Asing ni i, diboto Jesus do “anggo roha i naeng do nian mangulahon na sittong, alai gale do daging i”. (Mrk. 14:38) Jadi nang pe nungnga disoadahon si Petrus ibana, alai dang olo Jesus maninggalhon si Petrus. Dung hehe Jesus, dipatuduhon ibana do dirina tu si Petrus tikki sahalakna. (Mrk. 16:7; Luk. 24:34; 1 Kor. 15:5) Pasti dipatogu do roha ni si Petrus ala dibahen Jesus songon i! w23.09 22 ¶9-10

Disesa Jahowa do hasalaan ni akka halak na marhaporseaon tu Ibana. Jala dang dipaingot-ingot Jahowa be akka dosana i. (Ps. 32:​1, 2) Jadi alani haporseaon ni sasahalak do gabe didok Jahowa ibana halak na mangulahon na sittong. Didok Jahowa do si Abraham, si Daud, dohot akka naposona na setia halak na mangulahon na sittong. Memang, jolma na so sempurna do nasida. Alai ala porsea nasida tu Debata, didok ma nasida halak na mangulahon na sittong. Takkas do i tarida molo dibandingkon tu akka halak na so porsea tu Debata. (Eps. 2:12) Di surat ni si Paulus tu halak Rom, dipaboa ibana na ikkon marhaporseaon do hita tu Jahowa asa boi gabe ale-alena. Si Abraham dohot si Daud boi marale-ale tu Jahowa ala porsea do nasida tu Ibana. Hita pe boi do songon nasida. w23.12 3 ¶6-7

Sada hasangapon do di sude halak Kristen saonari on boi manomba Jahowa. Dilehon nasida do tikki, gogo, dohot arta ni nasida lao melayani Ibana. Molo talehon na dumenggan tu Jahowa, on patuduhon na taargai do hasangapon na dilehon Jahowa tu hita lao manomba Ibana. Dipaboa Apostel Paulus do akka na ikkon taulahon lao manomba Jahowa. (Heb. 10:​22-25) Contohna martangiang, marbarita na uli, marpungu, jala patoguhon akka dongan. Jadi “lam marsitutu ma hita mangulahon i, ai nungnga lam jonok ari ni [Jahowa]”. Di panutup ni bukku Pangungkapon dua hali ma didok suru-suruan, “Somba ma Debata.” (Pgk. 19:10; 22:9) Jadi torus ma taingot akka naung taparsiajari taringot bagas joro ni Jahowa na mulia. Jala taargai ma hasangapon ala boi manomba Debata! w23.10 29 ¶17-18

Lomo do rohatta asa ‘toktong marsihaholongan’. Alai adong sipaingot ni Jesus na ikkon taingot. Didok ibana, “Lam ngali ma holong ni godang jolma.” (Mat. 24:12) Dang didok Jesus na so marsihaholongan be annon akka siseanna. Alai ikkon manat do hita asa unang tatiru akka halak na di portibi on, na hurang makkaholongi donganna. Huhut mangarimangi on, tabahas ma jo alus ni sukkun-sukkun na massai penting on: Sian dia do taboto na togu dope holongta tu akka dongan? Sada cara lao mamboto na togu dope holongta tu akka dongan, i ma molo tarimangi songon dia caratta mangadopi situasi na masa di ngolutta. (2 Kor. 8:8) Contohna didok Apostel Petrus do, “Na urrikkot sian saluhutna, marsitutu ma hamu marsihaholongan. Ai halak na marholong ni roha, rade do manalpuhon hasalaan.” (1 Ptr. 4:8) Olo do ra taida hahurangan ni donganta manang hea haccit rohatta dibahen nasida. Sian tanggapanta tikki masa situasi sisongon i, tarida ma na togu dope holongta tu nasida manang na dang. w23.11 10-11 ¶12-13

Molo holan tu piga-piga dongan di huria do holong rohatta, dang boi tadok na taoloi paretta ni Jesus asa makkaholongi akka dongan. Olo do ra adong dongan kompakta di huria. Jesus pe songon i do, adong dongan kompakna. (Joh. 13:23; 20:2) Alai dipaingot Apostel Petrus do hita asa berupaya “makkaholongi sude dongan sahaporseaon”, alana keluargatta do tong nasida. (1 Ptr. 2:17) Didok si Petrus do muse tu hita, “Marsihaholongan ma hamu sian nasa roha.” (1 Ptr. 1:22) Hata “sian nasa roha” di ayat on maksudna, toktong makkaholongi sasahalak nang pe maol mangulahon i. Misalna aha do na diulahon hamu molo adong na mambahen haccit rohamuna? Biasana dang olo hita patuduhon holong tu ibana. Gariada pittor naeng tabalos do songon na dibahenna i tu hita. Alai marsiajar do si Petrus sian Jesus, dang lomo roha ni Debata molo songon i akka naposona. (Joh. 18:​10, 11) Disurat si Petrus do muse, “Unang ma balos hamu na jahat dohot na jahat manang issak-issak dohot issak-issak. Alai balos hamu ma na jahat dohot na denggan.” (1 Ptr. 3:9) Jadi molo sian nasa roha do tahaholongi akka dongan, pasti burju jala asi do rohatta tu nasida. w23.09 28-29 ¶9-11

Longang do rohatta mangida pertumbuhan ni dakdanak, alana pasti magodang do nasida. Alai dang songon i molo naeng gabe halak Kristen na togu haporseaonna tu Jahowa. Ikkon adong do upaya na tabahen. (1 Kor. 13:11; Heb. 6:1) Asa boi togu haporseaotta, ikkon jonok do hubungatta tu Jahowa. Jala porlu do hita diurupi tondi parbadia ni Jahowa asa boi patuduhon parange na denggan, mamparsiajari akka keterampilan na marguna, dohot paradehon diri lao mandalatton tanggung jawab di ari na naeng ro. (Poda 1:5) Ditoppa Jahowa do bawa dohot borua. (1 Mus. 1:27) Mura do taida beda ni bawa dohot borua secara fisik. Alai dang holan i bedana. Asing do tugas na dilehon Jahowa tu bawa dohot tu borua. Alani i, porlu do diparsiajari nasida akka parange dohot keterampilan na boi mangurupi nasida mandalatton tugas ni nasida be.—1 Mus. 2:18. w23.12 18 ¶1-2

Lomo do tong roha ni Jesus asa dijou akka halak goar ni Debata. Alai didok akka pamimpin agama di tikki i, na mangaleai Debata do molo tajou goar ni Debata. Nang pe songon i, dang diihutton Jesus na didok nasida i. Toktong do dipasangap ibana goar ni Bapakna. Contohna, hea do dipamalum ibana sahalak bawa na disonggopi suru-suruan na jahat na di Gerasa. Mabiar do akka halak di tikki i jala disuru ma Jesus maninggalhon inganan i. Jadi lao ma Jesus sian i. (Mrk. 5:​16, 17) Nang pe songon i, toktong do lomo roha ni Jesus asa diboto akka halak na disi goar ni Jahowa. Jadi disuru ibana do bawa na dipamalum ibana i asa paboahon tu akka halak na disi sude na binahen ni Jahowa. (Mrk. 5:19) Saonari pe lomo do tong roha ni Jesus asa tapaboa goar ni Bapakna tu sude halak di liat portibi on. (Mat. 24:14; 28:20) Jadi molo taulahon songon i, tabahen do las roha ni Jesus. w24.02 10 ¶10

Sada pasu-pasu do di hita boi gabe bagian sian organisasi ni Jahowa saleleng ari parpudi on. Lam tu susana do annon parngoluotta, alai nungnga dilehon Jahowa akka dongan na boi mangurupi hita. (Ps. 133:1) Diurupi Jahowa do keluargatta asa boi marlas ni roha. (Eps. 5:33–6:1) Jala dilehon Ibana do tong bisuk asa boi hita makkilala dame ni roha. Nang pe songon i, ikkon marsitutu do hita asa toktong setia manomba Jahowa. Alana olo do haccit rohatta alani hata manang pambahenan ni akka donganta. Olo do muse metmet rohatta tikki tabahen hasalaan, tarlumobi molo mulak-ulak tabahen hasalaan i. Di artikel on lao tabahas ma songon dia carana toktong setia manomba Jahowa nang pe (1) haccit rohatta dibahen dongan sahaporseaon, (2) kecewa hita dibahen pasanganta, jala (3) nang pe metmet rohatta alani hasalaatta sandiri. w24.03 14 ¶1-2

Jotjot do ra dibege hamu pengalaman ni akka donganta na mangalehon gumodang tikkina tu Jahowa. Misalna, dohot do nasida tu Sikkola tu Parbarita Harajaon manang pinda tu inganan na makkaporluhon parbarita. Molo cocok do tu situasimuna, bahen ma i gabe cita-citamuna. Lomo do roha ni naposo ni Jahowa mangalehon gumodang tikkina tu Jahowa. (Ul. 16:9) Alai molo dang boi dope diulahon hamu i, unang ma pola metmet rohamuna. Toktong ma hamu setia tu Jahowa, alana i do na uppetting di Ibana. (Mat. 10:22) Ingot ma, las do roha ni Jahowa molo disomba hamu Ibana sian nasa tolapmuna. Jadi on ma cara na dumenggan asa boi toktong mangihutton Jesus.—Ps. 26:1. w24.03 11 ¶11

Nungnga marjanji Jahowa salpuhononna do dosatta molo bertobat hita. (Ps. 86:5) Boi do tahaporseai janjina i. Jadi molo tasolsoli dosatta, pasti salpuhononna do i. Taingot ma masuk akkal do Jahowa i. Dang hea dipaksa hita mangulahon lobi sian na tolap taulahon. Gariada diargai Ibana do sude na taulahon sian nasa gogotta. Asing ni i, rimangi ma akka halak na disurat di Bibel na toktong manomba Jahowa sian nasa gogona. Contohna Apostel Paulus. Semangat do ibana marbarita na uli saleleng martaon-taon. Lao do ibana marribu-ribu kilometer jala dibahen ibana do godang huria na baru. Alai tikki muba situasina, dang boi diulahon ibana songon najolo i. Gabe kecewa do Jahowa mangida ibana? Daong, alana torus do diulahon si Paulus aha na boi diulahon ibana, jala dipasu-pasu Jahowa do ibana. (Ul. 28:​30, 31) Dos songon i ma, molo dang boi be taulahon songon najolo i, ingot ma alasanta mangulahon i do na uppetting di Jahowa, dang godangna. w24.03 27 ¶7, 9

Dibahen Jesus do sitiruon tu akka siseanna tikki martangiang. Saleleng di tano on, jotjot do Jesus martangiang tu Jahowa. Diatur ibana do tikkina lao martangiang nang pe sibuk ibana jala sering dikalilingi godang halak. (Mrk. 6:​31, 45, 46) Tibu do ibana dungo manogot asa boi sahalakna martangiang. Hea do muse Jesus martangiang saborngin manipat sebelum mambahen keputusan na penting. (Luk. 6:​12, 13) Jala marulak-ulak do Jesus martangiang di borngin andorang so mate ibana, sebelum dipasae ibana tugasna na massai maol di portibi on. (Mat. 26:​39, 42, 44) Sian teladan ni Jesus marsiajar do hita, dang soal sadia sibuk hita porlu do taparade tikki lao martangiang. Misalna boi do hita hatop dungo lao martangiang, manang martangiang di bornginna i. Molo taulahon i, on patuduhon na mandok mauliate do hita tu silehon-lehon ni Jahowa na massai arga on. w23.05 3 ¶4-5

Di sada kamus ni Bibel, hata “diusehon” na di ayat harian sadari on dipatudos do i songon “aek na doras”. Jadi massai balga do holong ni roha ni Debata tu akka na miniahan. Diboto akka na miniahan do tong, na holong roha ni Jahowa tu nasida. (Jud. 1) Misalna, dipaboa Apostel Johannes do di suratna, “Ida hamu ma balga ni holong ni Ama i tu hita, digoari do hita anak ni Debata!” (1 Joh. 3:1) Alai holan tu akka na miniahan do holong roha ni Debata? Daong. Holong do tong roha ni Jahowa tu hita sude. Aha do buktina? Tobusan. Marhite tobusan, dipatudu Jahowa do na massai holong rohana tu hita sian manang ise pe!—Joh. 3:16; Rom 5:8. w24.01 28 ¶9-10

Di ayat on, dipaboa si Daud do aha na diulahon ibana asa unang mabiar. Tikki terancam ngoluna, dirimangi ibana do aha na lao bahenon ni Jahowa tu ibana. Diboto ibana do na lao paluaon ni Jahowa do ibana di tikkina. Alana nungnga dipaboa Jahowa hian tu ibana, na lao gabe raja ni halak Israel do ibana. (1 Sam. 16:​1, 13) Jadi pos do roha ni si Daud pasti saut do janji ni Jahowa tu ibana. Aha do janji ni Jahowa tu hamu? Memang dang disalpuhon Jahowa sude masalahta saonari. Alai taingot ma marjanji do Jahowa salpuhononna do i sude haduan di tano na imbaru. (Jes. 25:​7-9) Ala Jahowa do na manoppa hita, dang maol di Ibana pahehehon halak na mate, pamaluppon sahitta dohot lungun ni rohatta, jala pamatehon sude musutta.—1 Joh. 4:4. w24.01 6 ¶12-13

Rimangi ma boasa olo hamu mangalehon diri tu Jahowa jala tardidi. Olo pe hamu mambahen keputusan i ala lomo do rohamuna marpihak tu Jahowa. Ingot ma muse aha do na paposson rohamuna molo hamu nungnga mandapot hasittongan. Nungnga dapotmuna be parbinotoan na sittong taringot Jahowa, jala holong do rohamuna tu Ibana. Nungnga lam balga haporseaonmuna jala mangonjar hamu asa bertobat. Gabe tergerak ma hamu maninggalhon akka ulaon na sala jala mangulahon lomo ni roha ni Debata. Las do rohamuna mamboto nungnga disalpuhon Debata hasalaanmuna. (Ps. 32:2) Nungnga ro hamu marpungu jala dipaboa hamu do na denggan na diparsiajari hamu tu na asing. Dung dilehon hamu dirimu tu Jahowa jala tardidi, mardalan ma hamu di dalan hangoluan, jala bertekad do hamu asa toktong mardalan di dalan i. (Mat. 7:​13, 14) Torus ma hita togu, torus ma hita setia tu Jahowa jala mangoloi parettana. w23.07 17 ¶14; 19 ¶19

Molo diingot hamu tangiangmuna tikki mangalehon ngolumuna tu Jahowa, gabe margogo ma hamu lao menolak godaan. Tottu dang olo hamu manggoda na so pasanganmuna. Alana nungnga marjanji hamu tu Jahowa dang mangulahon akka na dihasogohon rohana. Jala molo dang diloas hamu keinginan na sala adong di rohamuna, gabe dang maol be hamu annon lao mambolokkon keinginan sisongon i. Jala boi ma hamu mandao sian “dalan ni parjahat”. (Poda 4:​14, 15) Asing ni i, molo dirimangi hamu songon dia teladan ni Jesus na toktong mambahen las roha ni Bapakna, gabe boi ma pittor ditolak hamu akka na dihasogohon Debata. (Mat. 4:10; Joh. 8:29) Sasittongna tikki mangadopi tantangan dohot godaan, di tikki i ma hamu boi patuduhon na toktong do diihutton hamu Jesus. Molo diulahon hamu i, gabe pos ma rohamuna na diurupi Jahowa do hamu. w24.03 10 ¶8-10