Oktober

Hea do maol dihilala hamu unduk? Raja Daud hea do makkilala songon i. Jadi dipangido ibana ma di tangiangna tu Debata, “Bahen ma asa rade rohakku mangoloi Ho.” (Ps. 51:12) Holong do roha ni si Daud tu Jahowa. Alai sipata olo do maol ibana unduk, jala hita pe olo do songon i. Boasa? Na parjolo, alana hita jolma na mardosa. Na paduahon, torus do Sibolis mambahen hita asa unang unduk songon ibana. (2 Kor. 11:3) Na patoluhon, alana hita mangolu di tonga-tonga ni “akka halak na so mangoloi Debata”. (Eps. 2:2) Jadi ikkon berjuang do hita mangalo hagaleotta, Sibolis, dohot portibi on. Jala ikkon unduk do hita tu Jahowa dohot tu akka halak na dilehon Ibana hak lao mambahen aturan tu hita. w23.10 6 ¶1

Aha ma na boi taparsiajari sian mukjizat na dibahen Jesus? Marsiajar do hita massai penting do patuduhon serep ni roha. Dang gabe dibangga-banggahon Jesus dirina alani mukjizat i. Jala dang hea dibangga-banggahon Jesus dirina alani akka na diulahon ibana. Sebalikna serep do rohana jala sai ditujuhon ibana do sude pujian dohot hasangapon holan tu Bapakna. (Joh. 5:​19, 30; 8:28) Tatiru ma Jesus na serep roha. Seimbang ma caratta mangida diritta sandiri. Unang ma tabangga-banggahon diritta di sude na marhasil taulahon. Unang ma diritta na tabangga-banggahon alai tapuji ma Jahowa Debata na tasomba. (Jer. 9:​23, 24) Alana holan Ibana do na layak dipuji. Taingot ma dang boi hita marhasil molo dang diurupi Jahowa. (1 Kor. 1:​26-31) Molo serep rohatta unang ma tatarik pujian tu diritta sandiri alani akka na denggan na taulahon tu donganta na asing. Puas do tahilala mamboto na diida Jahowa jala diargai Ibana do na taulahon i. (Bandingkon tu Mateus 6:​2-4; Heb. 13:16) Pasti las do roha ni Jahowa molo tatiru Jesus na patuduhon serep ni roha.—1 Ptr. 5:6. w23.04 4 ¶9; 5 ¶11-12

Marhite panogu-noguon ni tondi parbadia, dijujui Apostel Paulus do halak Kristen asa mamparrohahon na asing. Songon dia do hita boi menerappon nasehat on saleleng di parpunguan? Taingot ma, akka donganta na asing pe lomo do rohana mangalehon komentar. Pikkirhon ma jo on: Tikki makkata-hatai hamu dohot donganmuna, holan hamu do na makkatai? Tottu daong. Lomo do rohamuna asa dohot donganmuna i makkatai. Dos songon i ma, tikki di parpunguan lomo do rohatta sering mangalehon komentar. Alai sada cara na terbaik lao patoguhon akka dongan, i ma mangalehon kesempatan tu nasida asa mangalehon komentar lao patuduhon haporseaon ni nasida. (1 Kor. 10:24) Singkat ma tabahen komentarta asa adong tikki tu akka dongan na asing mangalehon komentar. Jala nang pe singkat komentarta, unang ma takomentari sude gagasan. Alana molo takomentari sude gagasan di paragraf i, gabe dang adong be na boi dikomentari akka dongan na asing. w23.04 22-23 ¶11-13

Tikki marbarita, porlu do hita bersikap masuk akkal. Alana marasing-asing do budaya, latar belakang, dohot agama ni akka halak na tajuppangi. Boi do hita marsiajar sian Apostel Paulus na bersikap masuk akkal. Dilantik Jesus do ibana gabe “apostel tu akka bangso na asing”. (Rom 11:13) Alani i marbarita do si Paulus tu halak Jahudi, halak Junani, parsikkola na timbo, rakyat biasa, pejabat pamaretta, dohot akka raja. Ikkon ‘dibahen si Paulus do sian nasa gogona’ asa boi baritana i hona tu roha ni nasida. (1 Kor. 9:​19-22) Manat do diparrohahon ibana budaya, latar belakang, dohot haporseaon ni akka halak na manangihon ibana. Jala disesuaihon ibana do baritana i asa menarik tu nasida. Hita pe boi do lam terampil marbarita molo rade hita menyesuaihon diri jala mamikkirhon songon dia asa tertarik akka halak tu barita na tapasahat. w23.07 23 ¶11-12

Halak na lambok roha dang berarti halak na gale ibana. Alana boi do ibana mengendalihon dirina jala toktong tenang tikki mangadopi situasi na maol. Lambok ni roha i ma sada sian “parbue ni tondi”. (Gal. 5:​22, 23) Hata “lambok ni roha” di bahasa Junani, biasana dipakke lao manggombarhon sada hoda na liar naung dipajinak. Bayakkon ma, nang pe nungnga jinak hoda i, alai dang berarti dang margogo hoda i. Attong boha ma carana asa gabe halak na lambok roha jala boi takendalihon diritta? Ikkon martangiang do hita mangido tondi parbadia asa diurupi hita lao patuduhon sifat on. Alana dang boi alani gogotta hita mangulahon i. Godang do pengalaman ni akka halak naung marhasil gabe halak na lambok roha. Misalna godang do Saksi Jahowa na toktong tenang tikki adong halak na naeng berdebat dohot nasida. Ala dipatudu nasida songon i, gabe denggan ma pandangan ni halak tu nasida.—2 Tim. 2:​24, 25. w23.09 15 ¶3

Di parnidaanna, diida Apostel Johannes ma 24 sintua marsomba tu Jahowa. Dipuji nasida do Jahowa, ala tama do Ibana manjalo “hasangapon, hamuliaon, dohot huaso”. (Pgk. 4:​10, 11) Akka suru-suruan pe dipuji nasida do Jahowa. Di surgo do nasida rap dohot Debata, jala takkas do ditanda nasida Debata. Tikki diida nasida sifat ni Jahowa na tarida sian akka toppaanna, gabe tergerak ma nasida mamuji Ibana. (Job 38:​4-7) Hita pe tapuji ma Jahowa tikki martangiang. Paboa ma na massai holong do rohatta jala tapasangap Ibana. Tikki dijaha jala diparsiajari hamu Bibel, lului ma sifat ni Jahowa na menarik di hamu. (Job 37:23; Rom 11:33) Dung i tikki martangiang, paboa ma tu Jahowa songon dia perasaanmuna taringot sifatna i. Tapuji ma Jahowa ala diurupi Ibana do hita dohot sude dongan sahaporseaon.—1 Sam. 2:​1, 2. w23.05 3-4 ¶6-7

Di taon 1919, nungnga malua be naposo ni Debata sian Babel na Balga. Alana di taon i, nungnga mulai “naposo haposan jala na marbisuk” mangulahon tugasna. Diurupi nasida do akka halak na tigor marroha mardalan di “Dalan na Badia”. (Mat. 24:​45-47; Jes. 35:8) Ulaon na dibahen nasida di tikki naung salpu lao mampersiappon dalan i mangurupi akka halak lao marsiajar taringot Jahowa dohot sakkapna. (Poda 4:18) Boi ma nasida mangulahon lomo ni roha ni Jahowa di ngolu ni nasida. Dang dibahen Jahowa akka naposona pittor mambahen perubahan di tikki i, alai secara bertahap do. Pasti las do rohatta ala boi tabahen las roha ni Jahowa di sude na taulahon. Setiap dalan porlu do taratur dipadenggan. Songon i do tong “Dalan na Badia” i. Mulai taon 1919, torus do dibahen ulaon padenggatton dalan i lao mangurupi akka halak kaluar sian Babel na Balga. w23.05 17 ¶15-16

Dibahen do akka panitia lao mangurupi Punguan na Mangaradoti. Dilatik Punguan na Mangaradoti do akka dongan na mangurupi di panitia i. Saonari gabe boi ma denggan diulahon akka donganta on tanggung jawab ni nasida di organisasi. Jala gabe rade ma nasida asa toktong manjaga biru-biru ni Kristus saleleng hasusaan bolon haduan. Jadi tikki naeng marujung hasusaan bolon nakkok ma halak na miniahan tu surgo. Alai toktong do naposo ni Debata na di tano on setia manomba Jahowa. Songon na taboto, di tikki i lao ro ma akka bangso, i ma na digoari Gog na sian Magog lao mangalo naposo ni Debata. (Hes. 38:​18-20) Alai dang na lao marhasil nasida mangorai naposo ni Debata manomba Jahowa. Tottu lao paluaon ni Jahowa do naposona. Jala di sada parnidaan, diida Apostel Johannes do “sada punguan bolon” i ma biru-biru na asing. Di parnidaan i dipaboa do tu si Johannes “na malua sian hasusaan bolon” do punguan bolon i. (Pgk. 7:​9, 14) Jadi taboto ma, pasti dipalua Jahowa do naposona! w24.02 5-6 ¶13-14

Aha do na boi taulahon asa tadapot tondi parbadia i? Martangiang ma hita mangido tondi parbadia, taparsiajari ma Hata ni Debata, jala tadukung ma organisasi ni Debata na diarahon tondi parbadia. Molo taulahon i, gabe diurupi ma hita patuduhon “parbue ni tondi parbadia”. (Gal. 5:​22, 23) Dilehon Debata do tondi parbadiana holan tu akka halak na manjaga pikkiran dohot pangalaho toktong badia. Dang torus dilehon Ibana i tu hita molo tapikkirhon manang taulahon na so badia. (1 Tes. 4:​7, 8) Asing ni i, asa boi tajalo tondi parbadia, ‘unang ma leas rohatta tu surirang’. (1 Tes. 5:​20, surat na di toru) Hata “surirang” di ayat on, i ma Hata ni Debata na dilehon tu hita marhite tondi parbadiana, termasuk ma i taringot ari ni Jahowa na lam jonok. Unang ma tapikkir molo ari ni Jahowa manang Armagedon dang na lao masa di tikkitta. Alai taingot ma nungnga jonok be ari i. Alani i ikkon ‘marsitutu do hita manomba Debata’ jala toktong ma ‘badia pangalahotta’.—2 Ptr. 3:​11, 12. w23.06 12 ¶13-14

Aha do na ikkon taulahon molo toppu taida pornografi di perangkat elektronikta? Unang ma torus taida i. Ummura do hita mangulahon i molo taingot hubungatta tu Jahowa do na ummarga di hita. Ikkon tahindari do muse akka gambar na boi mambahen hita mamikkirhon na rorang, nang pe i dang pornografi. Alana boi do akka gambar i mambahen hita mangulahon seks na so patut bahkan di bagasan rohatta. (Mat. 5:​28, 29) Sahalak sintua di Thailand na margoar si David mandok, “Husukkun do dirikku, ‘Tung pe dang pornografi akka gambar i, alai las do roha ni Jahowa molo sai huida i?’ Sukkun-sukkun on mangurupi au asa denggan pangalahokku.” Molo tahabiari Jahowa, dang olo hita mambahen haccit rohana. Boi do on mangurupi hita asa denggan pangalahotta. Biar mida Jahowa do “parmulaan ni bisuk”. w23.06 23 ¶12-13

Hata ‘kamar’ di ayat on manggombarhon huriatta. Marjanji do Jahowa jagaonna do hita saleleng hasusaan bolon molo torus marsada hita dohot akka donganta. Alani i, sian saonari ikkon marsitutu do hita asa botul-botul makkaholongi akka dongan sahaporseaon. Alana on ma sada na manottuhon selamat do hita manang na dang. Parohon hasusaan tu sude jolma do “ari ni Jahowa, ari na balga i”. (Sep. 1:​14, 15) Naposo ni Jahowa pe pasti susa do. Alai molo nungnga tabahen persiapan sian saonari, boi ma hita toktong tenang jala boi mangurupi na asing. Boi do hita sabar jala togu mangadopi tantangan manang aha pe. Tapatudu do asi ni roha tikki marsitaonon akka dongan sahaporseaon, jala tabahen do na terbaik paradehon na porlu tu nasida. Asing ni i molo tahaholongi akka donganta, boi ma hita tetap marsada dohot nasida di ari na naeng ro. Pos ma rohatta lehonon ni Jahowa do upa tu hita, i ma hangoluan na salelengna di tano na imbaru, jala dang masa be disi akka bencana dohot hasusaan.—Jes. 65:17. w23.07 7 ¶16-17

Jotjot do tajaha di Bibel taringot akka bawa na gogo jala na togu haporseaonna tu Jahowa. Alai nang pe nasida gogo, hea do nasida gale. Contohna Raja Daud. Hea do ibana “togu songon dolok”, alai hea do tong ibana “mabiar”. (Ps. 30:7) Songon i do tong si Simson. Tondi parbadia ni Jahowa do na mambahen ibana margogo. Jadi diboto ibana do molo dang alani tondi parbadia ni Jahowa, ‘gabe gale do ibana songon na asing’. (Pangh. 14:​5, 6; 16:17) Jadi margogo pe si Daud dohot si Simson, alana dilehon Jahowa do gogo tu nasida. Diboto Apostel Paulus do ikkon diurupi Jahowa do tong ibana asa boi margogo. (2 Kor. 12:​9, 10) Si Paulus pe marsahit do. (Gal. 4:​13, 14) Ikkon berjuang do tong ibana lao mangulahon na sittong. (Rom 7:​18, 19) Jala sipata holsoan do ibana jala mabiar mamikkirhon aha na lao masa tu ibana. (2 Kor. 1:​8, 9) Alai nang pe gale si Paulus, boi do ibana gabe lam margogo. Boasa? Ala dilehon Jahowa do gogo tu si Paulus asa toktong martahan mangadopi akka sitaononna i. w23.10 12 ¶1-2

Molo berjuang dope hita asa unang merasa dang mararga, taingot ma nungnga ditarik Jahowa hita gabe naposona. (Joh. 6:44) Berarti diida Ibana sude sifatta na denggan, termasuk akka na denggan sian diritta na so tasadari. Jala diboto Ibana do na di bagasan rohatta. (2 Kron. 6:30) Jadi pos ma rohatta massai arga do hita di Jahowa. (1 Joh. 3:​19, 20) Sude do naposo ni Jahowa saonari torus berjuang mambolokkon keinginan na sala. Jala adong do hita na torus merasa bersalah ala hea mangulahon dosa andorang so marsiajar Bibel. (1 Ptr. 4:3) Hea do dihilala hamu songon i? Molo hea, pasti tarapul do rohamuna mamboto akka naposo ni Jahowa najolo pe berjuang do lao mambolokkon perasaan sisongon i. Contohna merasa bersalah do Apostel Paulus molo diingot ibana dosana najolo i. (Rom 7:24) Memang nungnga muba si Paulus jala nungnga tardidi ibana. Alai nang pe songon i, sai torus do merasa ibana “na ummetmet sian sude apostel” jala ‘dosana ma na unggodang’.—1 Kor. 15:9; 1 Tim. 1:15. w24.03 27 ¶5-6

Sian keputusan na so denggan na dibahen Raja Jehoas marsiajar do hita, ikkon mardongan do hita dohot akka halak na makkaholongi Jahowa jala na mambahen las rohana. Alana, boi do nasida mangurupi hita mangulahon na denggan. Unang ma holan akka halak na saumuran dohot hita na gabe donganta. Ingot ma, dao do upposo si Jehoas sian si Jehoyada. Tikki naeng mamillit dongan, pikkirhon ma on: ‘Diurupi nasida do au patoguhon haporseaonku tu Jahowa? Diihutton nasida do standar ni Jahowa di ngoluna, jala dijujui nasida do au mangulahon na sarupa? Taringot Jahowa dohot Bibel do na dihatai nasida? Olo do nasida pasingotton au? Manang holan na tabo begeon do na didok nasida tu au?’ (Poda 27:​5, 6, 17) Molo dang makkaholongi Jahowa donganmuna i, tinggalhon ma nasida. Alai molo dihaholongi nasida Jahowa, torus ma mardongan dohot nasida. Pasti sai urupan ni nasida do hamu!—Poda 13:20. w23.09 9-10 ¶6-7

Huruf alpa, i ma huruf na parjolo di abjad Junani. Jala huruf na parpudi, i ma omega. Jadi tikki didok Jahowa “Alpa dohot Omega”, on mangurupi hita mangattusi pasti marhasil do Jahowa pasaehon sude naung dimulai Ibana. Dukkon ditoppa Jahowa si Adam dohot si Hawa, didok Ibana ma tu nasida, “Marpinoppari ma hamu asa lam godang hamu. Gohi hamu ma tano on jala rajai ma i.” (1 Mus. 1:28) Tikki didok Jahowa i, on ma mulana manang “Alpa” i. Molo nungnga saut sude tujuan ni Jahowa i, on ma na gabe “Omega”. Gabe paradeiso ma tano on jala holan pinoppar ni si Adam dohot si Hawa na setia ma na manggohi tano on. Dukkon sae ditoppa Jahowa “akka na di langit, akka na di tano on, dohot nasa isina”, dipaboa Jahowa do jaminan na lao saut do janjina. Dijamin Jahowa do pasti saut do tujuanna manoppa jolma dohot tano on di ujung ni ari papituhon.—1 Mus. 2:​1-3. w23.11 5 ¶13-14

Maol do pardalanan sian Babel tu Israel, jala saleleng opat bulan ma pardalanan i. Alai marjanji do Jahowa mambolokkon akka abbat-abbat di dalan. Diboto halak Jahudi na setia, unggodang do manfaat na boi dapot ni nasida molo mulak tu Israel sian pengorbanan na dibahen nasida. Manfaat na umbalga adong hubunganna tu ibadat ni nasida tu Jahowa. Di Babel dang adong inganan panombaon tu Jahowa. Dang adong langgatan na boi dipakke halak Israel lao mangalehon pelean, songon na diparettahon di Patik ni si Musa. Jala dang adong akka malim na boi mangurupi nasida mamelehon pelean i. Asing ni i, unggodang do di kota i halak na manomba debata na so sittong sian halak na manomba Jahowa jala na mangoloi parettana. Alani i, marpulu ribu halak Jahudi na makkaholongi Jahowa tarpaima do mulak muse tu hutana asa boi nasida padenggatton ibadat na sittong disi. w23.05 14-15 ¶3-4

Porlu do diurupi tondi parbadia ni Debata hita asa ‘marpangalaho songon akka anak ni na tiur’. Alana dang mura asa toktong badia di portibi ni Sibolis on. (1 Tes. 4:​3-5, 7, 8) Boi do tondi parbadia mangurupi hita asa unang mangihutton cara marpikkir na so sadalan tu cara marpikkir ni Jahowa. Jala diurupi do hita asa boi mangulahon ‘akka na denggan dohot na hombar tu lomo ni roha ni Debata’. (Eps. 5:9) Martangiang ma hita mangido tondi parbadia. Didok Jesus, ‘lehonon ni Jahowa do tondi parbadia tu halak na mangido tu Ibana!’ (Luk. 11:13) Boi do tong tadapot tondi parbadia tikki rap marpungu hita dohot akka dongan lao mamuji Jahowa. (Eps. 5:​19, 20) Molo adong tondi parbadia di hita, gabe boi ma tabahen las roha ni Debata di ngolutta. w24.03 23-24 ¶13-15

Na berupaya do hamu patuduhon hasabaron? Martangiang ma asa lam sabar. Sada sian parbue ni tondi parbadia do hasabaron i. (Gal. 5:​22, 23) Alani i boi do hita martangiang tu Jahowa mangido tondi parbadia asa diurupi hita patuduhon hasabaron. Molo masa situasi na manguji hasabaronta, torus ma tapangido tondi parbadia asa boi hita sabar. (Luk. 11:13) Boi do muse tapangido tu Jahowa asa diurupi hita mangida sada masalah sian sudut pandangna. Dung martangiang hita, porlu do tabahen upaya lao patuduhon hasabaron ganup ari. Molo jotjot tatangiakkon i jala berupaya patuduhon i, urupan ni Jahowa ma hita gabe halak na sabar jala gabe bagian sian diritta ma i. Asing ni i, rimangi ma akka contoh na disurat di Bibel. Godang do disurat di Bibel contoh taringot akka halak na sabar. Molo tarimangi i boi ma taboto songon dia carana patuduhon hasabaron. w23.08 22 ¶10-11

Dipapos Jesus do roha ni si Petrus na lao urupan ni Jahowa do ibana. Dung hehe Jesus, diparade ibana do akka na porlu tu si Petrus dohot akka apostelna na asing. Dibahen ibana do mukjizat, gabe godang ma dekke dapot ni nasida. (Joh. 21:​4-6) Pasti gabe dipatogu do si Petrus alani mukjizat on. Gabe pos ma roha ni si Petrus pasti paradeon ni Jahowa do sude kebutuhanna. Olo do ra diingot ibana hata ni Jesus na mandok, lehonon ni Jahowa do sude na porlu tu akka halak na mangalului Harajaon ni Debata. (Mat. 6:33) Alani i, dibahen si Petrus ma ulaon marbarita gabe na uppetting di ngoluna, dang ulaon manjala dekke. Barani do ibana marbarita di ari Pentakosta 33 M. Jala adong ma marribu halak na manjalo barita na uli. (Ul. 2:​14, 37-41) Dung i, diurupi ibana muse halak Samaria dohot halak na so Jahudi gabe halak Kristen. (Ul. 8:​14-17; 10:​44-48) Takkas ma, dipakke Jahowa do si Petrus lao mangurupi akka halak sian nasa bangso gabe bagian ni huria Kristen. w23.09 20 ¶1; 23 ¶11

Hira-hira dua taon dukkon dihancurhon halak Babel Jerusalem, marnipi ma Raja Nebukadnesar taringot patung na balga. Marsak do ibana alani nipina i. Diancam ibana ma sude halak na malo, termasuk ma si Daniel. Molo dang boi dipaboa nasida lapatan ni nipina, pamateonna ma nasida. (Dan. 2:​3-5) Pittor hatop do si Daniel bertindak asa unang dipamate nasida. “Dijuppangi si Daniel ma raja i jala dipangido ma asa dilehon tu ibana tikki lao paboahon lapatan nipi ni raja i.” (Dan. 2:16) Ikkon barani do si Daniel di tikki i jala ikkon marhaposan tu Jahowa. Alana dang adong dipaboa di Bibel nungnga hea si Daniel paboahon lapatan ni nipi. Dipangido si Daniel ma donganna asa “martangiang tu Debata na di surgo mangido asi ni rohana, asa dipaboa rahasia i tu nasida”. (Dan. 2:18) Dialusi Jahowa do tangiang ni nasida. Ala diurupi Jahowa, gabe boi ma dipaboa si Daniel lapatan ni nipi ni si Nebukadnesar. Gabe dang dipamate nasida. w23.08 3 ¶4

Tapikkirhon ma manfaatna molo sabar hita. Molo sabar hita gabe marlas ni roha ma hita jala gabe halak na tenang. Asing ni i muse, boi ma gabe lam sehat fisikta dohot pikkiranta. Molo sabar hita tu na asing gabe lam denggan ma hubungatta dohot nasida. Huriatta pe boi ma gabe lam marsada. Molo adong pe na mangaleai hita, dang gabe lam parah situasina ala dang mura-mura hita muruk. (Ps. 37:8; Poda 14:29) Alai na paling penting, na maniru Bapakta Jahowa do hita disi, jala lam jonok ma hubungatta tu Ibana. Massai denggan do sifat hasabaron i jala godang do manfaatna tu hita. Memang dang sai mura asa gabe halak na sabar. Alai molo tapangido bantuan ni Jahowa, pasti diurupi Ibana do hita lao patuduhon sifat i. Jala molo sabar hita paimahon tano na imbaru, gabe pos ma rohatta “diparrohahon Jahowa do halak na makkabiari Ibana, halak na maima-ima holong ni roha na pinatuduna”. (Ps. 33:18) Sai anggiat ma hita bertekad asa toktong sabar. w23.08 22 ¶7; 25 ¶16-17

Didok si Jakobus, nang pe didok sahalak na porsea do ibana tu Debata, alai dang boi didok molo ibana halak na porsea molo dang sadalan haporseaonna i tu parniulaonna. (Jak. 2:​1-5, 9) Dipaboa si Jakobus do muse taringot sasahalak na so olo mangurupi donganna na pogos. Hape diida ibana do dang adong sipanganon dohot pakkean ni donganna i. Nang pe ibana mangakku halak na porsea tu Debata, alai dang sadalan haporseaonna i tu parniulaonna. (Jak. 2:​14-16) Dibahen si Jakobus do muse si Rahab gabe contoh lao patuduhon na ikkon sadalan do haporseaon tu parniulaon. (Jak. 2:​25, 26) Hea do dibege si Rahab taringot Jahowa jala songon dia Ibana mangurupi halak Israel. (Jos. 2:​9-11) Dipatudu si Rahab do haporseaonna sian parniulaonna. Barani do ibana manabunihon dua mata-mata ni halak Israel tikki terancam ngolu ni nasida. Alani i, didok Jahowa do ibana halak na mangulahon na sittong sarupa songon si Abraham, nang pe dang sempurna ibana jala dang mandalatton Patik ni si Musa. Sian si Rahab marsiajar do hita, ikkon sadalan do haporseaotta dohot parniulaotta. w23.12 5-6 ¶12-13

Halak Kristen dang puas holan mangattusi ajaran dasar ni Bibel. Lomo do rohatta mamparsiajari “bisuk ni Debata na bagas i” jala boi do taulahon i marhite pangurupion ni tondi parbadia. (1 Kor. 2:​9, 10) Coba ma riset hamu akka na boi mambahen hamu lam jonok tu Jahowa. Misalna, boi do diriset hamu songon dia Jahowa patuduhon na holong do rohana tu naposona najolo, jala songon dia i patuduhon na holong do rohana tu hamu. Boi do muse diparsiajari hamu songon dia pengaturan ni Jahowa tu halak Israel lao manomba Ibana. Jala bandingkon ma i tu na pinangido ni Jahowa sian hita saonari lao manomba Ibana. Manang boi do muse taparsiajari akka surirang taringot Jesus naung saut tikki di tano on ibana. Riset hamu ma akka topik i mamakke Tudu-Tudu na Dipakke Saksi Jahowa Lao Marsiajar. Molo diulahon hamu i, gabe lam togu ma haporseaonmuna jala dapotmuna ma “parbinotoan taringot Debata”.—Poda 2:​4, 5. w23.10 18-19 ¶3-5

Hata “marsitutu” na dipakke si Petrus dison boi do lapatanna “pahembangkon”. Dung i di kalimat na paduahon di ayat i didok si Petrus do muse, molo marsitutu hita marsihaholongan boi do i manutupi godang hasalaan. Ilustrasina: Bayakkon ma adong sada meja na godang nodana manang goresanna. Molo tapahembang kain di atas ni meja i, dang holan sada manang dua goresan na tartutup. Alai sude ma hahurangan ni meja i boi tartutup. Dos songon i ma molo marsitutu hita makkaholongi akka dongan. On boi mangurupi hita “manalpuhon” manang manutup godang hasalaan ni nasida, dang holan sada manang dua. Ikkon togu do holongta tu akka dongan asa boi hita manalpuhon hasalaan ni nasida, nang pe sipata maol mangulahon i. (Kol. 3:13) Molo tasalpuhon hasalaan ni donganta, on patuduhon na togu do holongta tu Jahowa jala lomo rohatta mambahen las rohana. w23.11 11-12 ¶13-15

Tikki marumur 26 taon Raja Josia, mulai ma dipadenggan ibana bagas joro. Tikki na dipadenggan i bagas joro, dapot ma “bukku na marisi Patik ni Jahowa na dipasahat tu si Musa”. Tikki dijahahon tu ibana isi ni bukku i, gabe taronjar ma rohana mangulahon na tarsurat di bukku i. (2 Kron. 34:​14, 19-21) Boha molo hamu? Lomo do rohamuna manjaha Bibel ganup ari? Bisa jadi nungnga berupaya hamu mangulahon i. Las do rohamuna manjaha Bibel? Adong do diingot hamu ayat ni Bibel na bermanfaat tu hamu? Tikki marumur 39 taon si Josia, dibahen ibana do kesalahan na mambahen marjea ngoluna. Umpos do rohana tu dirina sandiri. Dang dipangido ibana petunjuk sian Jahowa. (2 Kron. 35:​20-25) Adong do na boi taparsiajari sian on. Dang soal sadia umurta jala sadia leleng hita marsiajar Bibel, ikkon toktong do talului petunjuk ni Jahowa. Taratur ma hita martangiang mangido petunjuk ni Jahowa, marsiajar Bibel jala mangido saran sian akka donganta na togu haporseaonna. Molo tabahen songon i, gabe boi ma tapasiding kesalahan na balga jala marlas ni roha ma hita.—Jak. 1:25. w23.09 12 ¶15-16

Di Bibel godang do dipaboa akka borua na makkaholongi Jahowa jala na manomba Ibana. Boi do nasida “mangarajai diri” jala “setia di saluhutna”. (1 Tim. 3:11) Asing ni i, godang do donganta borua di huria na boi gabe sitiruon di hita ala togu haporseaonna tu Jahowa. Hamu akka borua na poso, adong do ditanda hamu donganmuna borua na boi gabe sitiruon di hamu? Parrohahon ma songon dia nasida patuduhon akka parange na denggan. Dung i pikkirhon ma songon dia hamu boi maniru nasida. Ikkon serep do rohatta asa boi gabe halak Kristen na togu haporseaonna tu Jahowa. Molo serep roha ni sahalak borua, pasti denggan ma hubunganna tu Jahowa dohot tu halak na asing. Misalna, parrohahon ma prinsip di 1 Korint 11:3. Dipaboa do disi, tu akka bawa do dilean Jahowa tanggung jawab lao manguluhon huria dohot keluarga. w23.12 18-19 ¶3-5

Dipangido Jahowa do sahalak suami asa makkaholongi istrina, mangalehon kebutuhan ni istrina, jala mangurupi istrina asa jonok tu Jahowa. Asa boi hamu gabe suami na burju, ikkon marlatik do hamu asa manat marpikkir, mangargai akka borua, jala boi diandalhon. Dung menikah hamu, olo do ra gabe marianakkon hamu. Asa boi hamu gabe ama na burju, tiru ma Jahowa. (Eps. 6:4) Olo do Jahowa paboahon tu Jesus na massai holong do rohana tu Anakna i, jala massai arga do Anakna i di Ibana. (Mat. 3:17) Molo gabe ama hamu, jotjot ma paboa tu gellengmuna na holong do rohamuna tu nasida. Puji ma nasida alani akka na denggan na diulahon nasida. Molo ditiru hamu Jahowa, boi do i mangurupi gellengmuna asa marale-ale tu Jahowa. Jadi asa boi hamu gabe ama na burju, sian saonari patudu ma na holong rohamuna tu keluargamuna dohot tu akka dongan di huria. Jala unang ma maila hamu paboahon na holong rohamuna tu nasida.—Joh. 15:9. w23.12 28-29 ¶17-18

Nang pe naposo ni Jahowa hita, alai sarupa do hita dohot halak na asing. Olo do marsahit hita jala mangadopi hasusaan. Alai dang holan i. Ala sisomba Jahowa hita, olo do taadopi paraloan manang penganiayaan sian akka halak na sogo rohana tu naposo ni Jahowa. Memang, diloas Jahowa dope hita manaon akka sitaonon i, alai marjanji do Ibana lao mangurupi hita. (Jes. 41:10) Hasilna boi ma hita toktong marlas ni roha, mambahen keputusan na denggan, jala toktong setia tu Jahowa nang pe massai borat sitaononta. Marjanji do Jahowa lao mangalehon “hadameon” tu hita. (Plp. 4:​6, 7) Hadameon na dimaksud di ayat i, i ma dame ni roha na boi dihilala sasahalak na jonok hubunganna tu Jahowa. Dilehon Debata do hadameon “na so boi diattusi jolma”, lobi sian na boi tabayakkon. Hea do ra gomos hamu martangiang tu Jahowa, jala dung sae martangiang hamu, gabe dame ma rohamuna. Boasa boi songon i? Ala dilehon Jahowa do “hadameon” i tu hamu. w24.01 20 ¶2; 21 ¶4

Holong tu Jahowa do na mangonjar roha ni akka halak lao mamuji goar ni Jahowa sian nasa roha ni nasida. Diboto Raja Daud do molo tapuji goar ni Jahowa, sarupa songon na mamuji Jahowa do hita disi. Molo tabege goar ni Jahowa, gabe boi ma tabayakkon Debata na songon dia do Ibana. Gabe boi ma tapikkirhon akka sifatna, dohot akka naung diulahon Ibana. Lomo do roha ni si Daud pabadiahon jala mamuji goar ni Debata sian nasa rohana. Gabe sitiruon do tong halak Lepi tikki mamuji Jahowa di jolo ni halak Israel. Diakkui nasida do massai tama do goar ni Jahowa dipuji, jala dang adong hata na pas na didok nasida na boi manggombarhon i. (Neh. 9:5) Takkas ma las do roha ni Jahowa ala serep do roha ni naposona mamuji goarna. w24.02 9 ¶6

Dang dianggap Jahowa hamu gagal molo dang boi dicapai hamu cita-cita na so sanggup diulahon hamu. (2 Kor. 8:12) Marsiajar ma sian kegagalanmuna. Ingot ma aha naung dicapai hamu. Bibel mandok, “Ai tigor do Debata, dang lupahononna akka naung diulahon hamu.” (Heb. 6:10) Jadi hamu pe unang ma lupa tu akka naung diulahon hamu. Rimangi ma aha naung dicapai hamu. Misalna nungnga marale-ale hamu tu Jahowa, paboahon taringot Ibana tu na asing, jala tardidi. Molo nungnga marhasil hamu mencapai cita-citamuna najolo, pasti boi do tong hamu mencapai cita-citamuna saonari. Alani bantuan ni Jahowa, boi ma hamu mencapai cita-citamuna. Alai tikki berupaya hamu mencapai cita-citamuna, ida ma songon dia Jahowa mangurupi hamu mencapai i jala marlas ni roha. (2 Kor. 4:7) Molo dang menyerah hamu, pasti dapotmuna ma godang pasu-pasu.—Gal. 6:9. w23.05 31 ¶16-18

Sai dipatudu Jahowa do holongna tu akka naposona. Contohna dua hali do disurat di Bibel na holong rohana tu Anakna Jesus. (Mat. 3:17; 17:5) Pasti lomo do rohatta mambege Jahowa langsung mandokkon na holong do rohana tu hita. Alai saonari dang langsung be Jahowa makkatai tu hita, marhite Bibel nama. Hira na “mambege” soara ni Jahowa do hita tikki tajaha hata ni Jesus na disurat di Injil. Sempurna do Jesus maniru akka sifat ni Bapakna. Jadi tikki tajaha hata ni Jesus na paboahon holong ni rohana tu akka siseanna na so sempurna, tabayakkon ma i songon hata ni Jahowa tu hita. (Joh. 15:​9, 15) Alai molo masa sitaonon, dang na berarti na so dihaholongi Jahowa be hita. Gariada gabe kesempatan ma i di hita lao patuduhon na marhaposan do hita tu Debata jala holong do rohatta tu Ibana.—Jak. 1:12. w24.03 28 ¶10-11