Referensi tu Parpunguan Hangoluan dohot Pangkobasion na Laho Diparsiajari
© 2024 Watch Tower Bible and Tract Society of Pennsylvania
1-7 JULI
ARTA NA ARGA NA ADONG DI BIBEL | PSALMEN 57-59
Dang Dipaloas Jahowa Akka Musu Mangalo Naposona
“Sahat tu Ujung ni Tano on”
14 Tetap do barani si Stepanus paboahon barita na uli nang pe satokkin nai pamateon ni musu ibana. (Ul. 6:5; 7:54-60) Dukkon i “lam haccit ma” dibahen tu halak Kristen. Lari ma sude sisean tu sude luat na di Judea dohot Samaria, kecuali akka apostel. Nang pe songon i, dang gabe so ulaon marbarita. Lao do si Pilippus tu Samaria. Dibaritahon ma disi “taringot tu Kristus” jala massai denggan do hasilna. (Ul. 8:1-8, 14, 15, 25) Dipaboa do muse, “Dung dibunu si Stepanus, dibahen ma akka na haccit tu akka sisean. Gabe marserak ma nasida tu Penisia, tu Siprus, dohot tu Antiokia. Alai holan tu halak Jahudi do dipaboa nasida hata ni Debata. Nang pe songon i, adong do akka sisean na sian Siprus dohot Kirene na ro tu Antiokia. Dibaritahon nasida ma barita na uli taringot tu Tuan Jesus tu halak na marbahasa Junani.” (Ul. 11:19, 20) Jadi gabe lam rarat do barita na uli alani penganiayaan.
15 Hea do terjadi na sarupa di wilayah bekas Uni Soviet. Khususna taon 1950-an, marribu Saksi Jahowa diasingkan tu Siberia. Ala marserak do nasida tu godang inganan, gabe lam rarat ma barita na uli di wilayah i. Hira na so mungkin do di tikki i boi sahali godang Saksi marbarita tu inganan na daona hira-hira 10.000 kilometer, ala pasti butuh godang hepeng. Alai alani peristiwa on, hira na diurupi pamaretta ma nasida sahat tu inganan na dao i! Sahalak donganta mandok, “Ternyata gabe pamaretta sandiri do na mambahen marribu halak di Siberia mananda hasittongan.”
Arta na Adong di Bibel
‘Toktong ma Togu jala Dang Muba-uba’
16 Patogu ma rohamuna. Didok Raja Daud sai toktong do ibana makkaholongi Jahowa. Didok ibana do di endena, “Pos do rohakku tu Ho ale Debata.” (Ps. 57:7) Hita pe, tapatogu ma rohatta molo botul-botul hita marhaposan tu Jahowa. (Jaha Psalmen 112:7.) Parrohahon ma songon dia on mangurupi si Bob na dipaboa nakkin. Dung didokkon tu si Bob adong do mudar na tersedia molo muba pikkiranna, pittor dialusi si Bob do molo naeng ditransfusi ibana, pittor kaluar do ibana sian rumah sakit i. Didok si Bob ma, “Tegas do au mandokkon i, jala dang khawatir au manang aha pe na masa annon.”
17 Boi pe toktong togu si Bob ala nungnga dibahen ibana keputusan leleng sebelum masuk rumah sakit. Aha do na mangurupi ibana mambahen keputusan i? Parjolo, bertekad do ibana lao mambahen las roha ni Jahowa. Na paduahon, manat do diparsiajari ibana aha na didok Bibel dohot akka publikasi taringot mangargai hangoluan dohot mudar. Na patoluhon, pos do roha ni si Bob pasti dilehon Jahowa do upa tu ibana molo dioloi ibana patikna. Hita pe boi do songon i togu ni rohatta dang soal tantangan manang aha pe na lao taadopi.
8-14 JULI
ARTA NA ARGA NA ADONG DI BIBEL | PSALMEN 60-62
Jahowa do Inganan Parlinggoman na Aman jala na Togu
it-2 75 ¶2
Menara
Gombaran. Molo porsea hita tu Jahowa jala taoloi Ibana boi do aman tahilala, songon na didok si Daud, “Ho do inganan parlinggomakku. Benteng na togu na mangalinggomi au sian akka musu.” (Ps 61:3) Asing ni i didok do di Bibel, “Dos songon menara na togu do goar ni Jahowa. Tusi do marlojong halak na tigor marroha lao marlinggom.” (Poda 18:10; bandingkon tu 1Sam 17:45-47) Jadi molo taakkui do goar ni Jahowa, porsea hita tu Ibana, jala toktong hita setia tu Ibana, dang porlu hita mabiar tu manang aha pe.
it-1 1220 ¶3
Kemah
Di piga-piga ayat, dipakke do tong hata “kemah” gabe sada gombaran. Biasana di bagasan kemah, boi do sasahalak istirahat jala marlinggom. (1Mus 18:1) Najolo, somal do sasahalak manogihon tamu masuk tu kemahna. Molo diulahon ibana i, berarti na diparsangapi jala dihaholongi ibana do tamuna i. Alani i tikki paboahon taringot punguan na bolon, didok do di Pangungkapon 7:15, surat na di toru, ‘Dipaherbang Debata do tendana [kemahna] tu nasida.’ On patuduhon na dilinggomi jala dijaga Debata do nasida. (Ps 61:3, 4) Asing ni i, dipaboa si Jesaya do muse aha na ikkon dibahen Sion tu akka anak na lao ditubuhon ibana. Didok do, “Pabidang ma ingananmu mambahen kemah.” (Jes 54:2) Molo dipabidang ibana ingananna mambahen kemah, gabe lam bidang ma inganan ni akka anakna marlinggom.
w02 15/4 16 ¶14
Marguna do Patik ni Debata tu Hita
14 Dang muba Patik ni Debata. Hatop do muba situasitta saonari on, alai dang songon i Jahowa. Didok ibana do, “Ai Jahowa do Au, jala dang hea Au muba.” (Maleaki 3:6) Dos songon dolok batu na togu do Jahowa. Asing ni i dang marmula Ibana jala dang marujung. (Psalmen 90:2) Songon i do tong akka prinsipna na disurat di Bibel. Dang sarupa i tu pandangan ni jolma na sai muba-uba. (Jakobus 1:17) Misalna, saleleng martaon-taon didok akka psikolog asa boi marhasil pagodang-godangkon gelleng, unang ma tabahen aturan tu gellengta i. Alai di pudian ni ari, diakkui akka psikolog i ma sala do hape hata ni nasida i. Sian on boi ma taida muba-uba do standar dohot pandangan ni jolma. Alai hot do anggo hata ni Jahowa. Marratus taon naung salpu nungnga dipaboa Bibel songon dia carana pagodang-godangkon gelleng. Didok Apostel Paulus do, “Hamu akka ama, unang ma bahen jut roha ni ianakkonmuna. Alai pagodang-godang ma nasida marhite mangajar-ajari jala mamodai nasida hombar tu lomo ni roha ni Jahowa.” (Epesus 6:4) Las do rohatta mangihutton aturan ni Jahowa alana dang hea muba aturan ni Jahowa i.
Arta na Adong di Bibel
w06 1/6 11 ¶6
Akka na Denggan sian Bukku Psalmen
62:11. Dang porlu bantuan ni manang aha pe asa boi Jahowa margogo. Alana sian Ibana do sude gogo na adong di tano on. Alani i ma didok Bibel, “Debata do silehon gogo.”
15-21 JULI
ARTA NA ARGA NA ADONG DI BIBEL | PSALMEN 63-65
“Dumenggan do Holong ni Roha na Pinatudum sian Hangoluan”
w01 15/10 15-16 ¶17-18
Dang Adong na Boi Manirang Hita sian Holong ni Debata
17 Penting do holong ni Debata di hamu? Penting hian do holong ni Debata di si Daud. Didok ibana do, “Ai dumenggan do holong ni roha na pinatudum sian hangoluan. Pujiokku do Ho marhite pamanganku. Pujiokku ma Ho saleleng ni ngolukku, angkatokku ma tanganku tikki martangiang lao manjou goarmu.” (Psalmen 63:3, 4) Adong do di portibi on na ummarga sian makkilala holong ni Debata jala marale-ale tu Ibana? Misalna, dia do na ummarga di hamu marhasil di portibi on manang makkilala dame ni roha dohot las ni roha ala marale-ale tu Debata? (Lukas 12:15) Adong do piga-piga halak Kristen na disuru mamillit maninggalhon Jahowa manang tetap melayani Jahowa alai gabe dipamate. Godang do Saksi Jahowa na makkilala songon i di kamp konsentrasi Nazi tikki Perang Dunia II. Godangan donganta i mamillit toktong setia tu Debata nang pe ikkon dipamate nasida. Alana pos do roha ni nasida molo tetap nasida setia tu Debata, dapot ni nasida do ngolu na saleleng ni lelengna di ari na naeng ro. On ma na so boi lehonon ni portibi on tu hita. (Markus 8:34-36) Alai dang holan hangoluan na saleleng ni lelengna na tadapot.
18 Coba ma jo tabayakkon boha do ngolutta molo dang tatanda Jahowa nang pe mangolu saleleng ni lelengna hita. Pasti dang martujuan ngolutta. Alai ala tatanda do Jahowa, gabe martujuan ma ngolutta saonari. Buktina dilehon Jahowa do ulaon na palashon roha tu akka naposona di ari parpudi on. Jadi pos do rohatta molo nungnga mangolu saleleng ni lelengna hita di ari na naeng ro, pasti martujuan do ngolutta. (Parjamita 3:11) Alana godang do na lao taparsiajari dohot na taulahon disi. Alai nang pe nungnga taulahon i sude, dang na lao boi taattusi sude ‘bagas ni bisuk dohot parbinotoan’ ni Jahowa.—Rom 11:33.
“Mandok Mauliate ma Hamu di Saluhut”
Tontu, tama do hita mandok mauliate tu Debata. Sipata, hea do dipingkirhon hamu silehon-lehon naung didapot hamu jala na tongtong diparade Ibana. (5 Mus. 8:17, 18; Ul. 14:17) Alai, ingkon tarimangi do taringot sude na dilehon Jahowa tu hita. Molo dirimangi haburjuon na dipatudu Debata, gabe lam dihaholongi hamu ma Ibana. Jala gabe diboto hamu ma, na mansai holong do rohana tu hamu.—1 Joh. 4:9.
Tongtong ma Rimangi Ulaon ni Jahowa
7 Ingkon marsitutu do hita asa boi mangarimangi jala mangalehon pingkiran tingki marsiajar. Alani i, unang ma tingki loja hita mangulahon on, jala tapillit ma inganan na so adong manggugai pingkiranta. Tingki laho modom do si Daud mangarimangi sude ulaon ni Jahowa. (Ps. 63:7) Molo Jesus, dilului do inganan na so adong manggugai pingkiranna laho mangarimangi dohot martangiang tu Jahowa.—Luk. 6:12.
w09 15/7 16 ¶6
Tiru ma Cara ni Jesus Tikki Mangajari
6 Pasti las do rohatta manceritahon taringot lomo ni rohatta. Jala semangat do hita tikki manceritahon i. Tarlumobi tikki hita manceritahon taringot halak na tahaholongi. Biasana lomo hian do rohatta paboahon taringot ibana tu halak na asing. Tapuji do sifat-sifatna, taparsangapi do ibana, jala tabela. Taulahon pe i ala lomo do rohatta asa halak na asing pe las rohana mangida ibana.
Arta na Adong di Bibel
w07 15/11 15 ¶6
Patoguhon Roha do Hatamuna tu Halak na Asing?
Ummura do mangaruppakkon sada bangunan sian apala mambangun sada bangunan na baru. Dos songon i ma, ummura do mambahen haccit roha ni halak na asing sian apala patoguhon nasida. Ala dang sempurna hita, sude do hita adong hagaleonna jala hea mambahen na sala. Raja Salomo pe mandok, “Dang adong nanggo sahalak pe jolma di tano on na sai torus mangulahon na sittong, jala dang adong na so hea mangulahon dosa.” (Parjamita 7:20) Jadi mura do hita mangida kesalahan ni halak na asing jala manguhumi nasida. (Psalmen 64:2-4) Alai ikkon berupaya do hita asa tetap positif pakkataiotta.
22-28 JULI
ARTA NA ARGA NA ADONG DI BIBEL | PSALMEN 66-68
Diboan Jahowa do Bobanta Ganup Ari
Cara ni Jahowa Mangalusi Tangiangta
15 Dang sai ikkon luar biasa cara ni Jahowa mangalusi tangiangta. Alai sai dilehon Ibana do akka na tahaporluhon asa boi hita torus setia tu Ibana. Jadi porlu do taida songon dia Jahowa mangalusi tangiangta. Sahalak donganta borua na margoar si Yoko merasa dang dialusi Jahowa tangiangna. Alai mulai ma dicatat ibana akka pangidoanna tu Jahowa. Dung piga-piga tikki diida ibana ma muse catatanna i. Gabe disadari ibana ma godang do pangidoanna naung dialusi Jahowa, bahkan akka pangidoanna na so diingot ibana be. Jadi sian tikki tu tikki porlu do tarimangi songon dia Jahowa mangalusi tangiangta.—Ps. 66:19, 20.
w10 1/12 23 ¶5
Parrohahon ma Akka Natua-tua Naung Mabalu
Ditogu-togu tondi parbadia do panurat psalmen tikki manuratton ende na lao diendehon halak Israel tikki manomba Jahowa. Pasti las do roha ni akka na mabalu dohot akka dakdanak na so marama dohot na so marina tikki mangendehon psalmen i. Alana didok do di ende i, Jahowa ma na gabe “ama” dohot “na gabe hakim” tu nasida jala pasti diurupi Jahowa do nasida. (Psalmen 68:5, surat na di toru; 146:9) Hita pe boi do maniru Jahowa. Boi do talehon pujian tu akka natua-tua naung mabalu. Alana boi do sappe martaon diingot nasida hatatta i. Songon i ma na dihilala si Rut, sahalak ina naung mabalu. Nang pe nungnga 20 taon naung salpu, diingot ibana dope hata ni sahalak ama tu ibana na mandok, “Denggan do ho bah mandidik anakmu na dua on, torusson ma i da.” Didok si Rut, “Las hian do rohakku mambege hatana i. Hona hian do i tu rohakku.” Bibel pe mandok, “Dos songon hau hangoluan do hata na denggan.” (Poda 15:4) Olo do hamu mancoba mamuji natua-tua naung mabalu sian ias ni rohamuna?
w09 1/4 31 ¶1
Jahowa do na Gabe Ama di Akka na So Marama
Bibel mandok, “Di ingananna na badia do Debata maringanan. Ibana do na gabe ama di akka na so marama.” (Psalmen 68:5) Sian ayat on boi ma taida balga ni holong ni roha ni Jahowa. Parduli do Ibana tu akka halak na susa, termasuk ma i tu akka dakdanak na so marama dohot na so marina. Boi ma taida i sian Patik na dilehon Ibana tu halak Israel. Taida ma jo ayat na parjolo sahali mamakke hata “dakdanak na so marama”, i ma di 2 Musa 22:22-24.
Diurupi Jahowa do Hamu asa Marhasil
17 Jaha Psalmen 40:5. Sasahalak na mendaki gunung berupaya do asa sahat tu puncak. Alai tikki di pardalanan, maradi do ibana sasatokkin lao menikmati pemandangan. Sarupa songon i ma, porlu do hita taratur maradi lao mamikkirhon songon dia Jahowa mambahen hita marhasil mangadopi hasusaatta. Setiap ari, sukkun ma tu dirimuna, ‘Pasu-pasu aha do na hujalo sian Jahowa sadarion? Nang pe dang sae dope masalahku, alai songon dia Jahowa mangurupi au asa boi martahan?’ Berupaya ma hamu ganup ari mamikkirhon pinomatna sada pasu-pasu ni Jahowa na mangurupi hamu asa marhasil.
Arta na Adong di Bibel
w06 1/6 10 ¶5
Akka na Denggan sian Bukku Psalmen
68:18—Ise do “akka jolma na gabe silehon-lehon” na didok di ayat on? On ma akka bawa na ditawan tikki ditaluhon halak Israel Tano na Dijanjihon. Di pudian ni ari dibahen ma nasida gabe pangurupi ni halak Lepi.—Esra 8:20.
29 JULI–4 AGUSTUS
ARTA NA ARGA NA ADONG DI BIBEL | PSALMEN 69
Surirang Taringot Parngoluon ni Jesus di Psalmen 69
w11 15/8 11 ¶17
Dipaima-ima Nasida do Messias
17 Marsogo ni roha do halak tu Messias hape so adong salana. (Ps. 69:4) Songon on ma hata ni Jesus na disurat Apostel Johannes, “Molo dang hea hubahen di tonga-tonga ni nasida tanda halongangan na so hea dibahen halak na asing, dang mardosa nasida. Alai saonari nungnga diida nasida au jala sogo do roha ni nasida tu au nang tu Damang i. Masa pe i, asa saut do hata na tarsurat di Patik ni nasida na mandok, ‘Sogo do roha ni nasida tu au, hape so adong salakku.’” (Joh. 15:24, 25) Hata “Patik” na didok di ayat on maksudna sude hata ni Debata na adong di Bibel. (Joh. 10:34; 12:34) Molo tajaha taringot parngoluon ni Jesus na disurat di bukku Mateus sahat tu Johannes, boi ma taida godang do halak na marsogo ni roha tu Jesus tarlumobi ma akka pamimpin agama Jahudi. Alani i ma didok Jesus, “Dang adong alasan ni portibi on gabe marsogo ni roha tu hamu. Alai anggo au, sogo do rohana tu au. Ai hupaboa do pambahenan ni nasida na jahat i.”—Joh. 7:7.
w10 15/12 8 ¶7-8
Holong ni Roha tu Ibadat na Sittong
7 Adong sada peristiwa di parngoluon ni Jesus na patuduhon holong ni rohana tu ibadat na sittong. Tikki i baru dimulai dope pelayanan ni Jesus, i ma tikki Paska taon 30 M. Ro ma Jesus dohot akka siseanna tu Jerusalem, jala diida nasida ma di bagas joro i “akka partiga-tiga lombu, biru-biru, dohot darapati. Hundul do disi akka situkkar hepeng”. Boha do reaksi ni Jesus? Jala songon dia ma pandangan ni akka siseanna taringot Jesus?—Jaha Johannes 2:13-17.
8 Sian hata dohot pambahenan ni Jesus di tikki i, gabe diingot akka siseanna ma surirang di bukku Psalmen na mandok, “Holong ni rohakku tu jabumi dos songon api na marsigorgor.” (Ps. 69:9) Boasa? Berbahaya do sebenarna na diulahon Jesus i. Alana akka malim, akka siboto surat, dohot akka pamimpin agama Jahudi do sebenarna na mambuat uttung sian akka partiga-tiga i. Jadi tikki dipalao Jesus akka partiga-tiga i, pasti gabe sogo ma roha ni akka pamimpin agama Jahudi tu ibana. Alani i ma gabe boi ma akka sisean i mangida ‘holong do roha ni Jesus tu jabu ni Jahowa’ manang tu ibadat na sittong. Alai aha do sebenarna lapatan ni holong ni roha di ayat i?
g95 8/11 30 ¶4
Boi do Jolma Mate Alani Haccit ni Roha?
Piga-piga halak mandok haccit ni roha do tong na mambahen hatop Jesus mate. Bibel pe mandok, “Haccit do rohakku ala dileai au, jala dang tarubatan be i.” (Psalmen 69:20) Aha do lapatan ni hata on? Haccit do ditaon Jesus piga-piga jom sebelum mate ibana. Dang holan dagingna na haccit alai dohot do tong rohana. (Mateus 27:46; Lukas 22:44; Heber 5:7) Asing ni i dang leleng dung mate Jesus, ditullang do rusukna. Gabe kaluar ma “mudar dohot aek” sian lukkana i. (Johannes 19:34) Boasa boi songon i? Olo do ra ala haccit roha ni Jesus, gabe pocca ma jantung manang sada pembuluh darah utamana. Dung i gabe masuk ma mudar na sian jantung manang sian pembuluh darah i tu bagasan rongga dada manang tu bagasan selaput jantung ni Jesus. Selaput jantung i marisi cairan na melapisi jantung. Alani i ma gabe kaluar “mudar dohot aek” tikki ditullang rusuk ni Jesus.
it-2 967-968 ¶8
Suan-suanan na Marraccun
Nungnga dipaboa hian surirang taringot Messias na mandok, “Tikki male au, raccun do dilean nasida tu au.” (Ps 69:21) Masa ma i tikki naeng dipakkuhon Jesus tu tiang. Dilehon do tu ibana anggur na dicampur empedu. Alai dung didai Jesus i, dang olo ibana manginum i. Alana molo diinum ibana i, gabe hira na dibius ma ibana jala dang dihilala be na haccit. Tikki paboahon taringot siinumon i, dipakke do hata Junani khole di Mateus 27:34 na lapatanna empedu, jala dipakke do tong hata khole on di Septuaginta Junani di Psalmen 69:21 lao mandok raccun. Alai molo di bukku Markus didok, dicampur dohot mir do anggur i. (Mrk 15:23) Alani i gabe adong ma piga-piga halak na mandok, mir do ninna “raccun” na dipaboa di bukku Psalmen manang “empedu” na dipaboa di bukku Mateus. Alai adong do muse na mandok empedu dohot mir do na dicampur tu siinumon i.
Arta na Adong di Bibel
w99 15/1 18 ¶11
Martangiang sian Ias ni Rohatta
11 Godang do halak holan pangidoan do isi ni tangiangna. Alai molo holong do rohatta tu Debata Jahowa, pasti taronjar do rohatta mandok mauliate tikki martangiang sahalakta manang tikki rap dohot halak na asing. Apostel Paulus mandok, “Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek mardongan hamauliateon. Asa marhite Kristus Jesus, lehonon ni Debata ma tu hamu hadameon na so boi diattusi jolma, na boi manjaga roha dohot pikkiranmuna.” (Pilippi 4:6, 7) Asing ni mangido, boi do hita mandok mauliate tu Jahowa di sude pasu-pasu naung nilehonna tu hita. (Poda 10:22) Adong do sada panurat psalmen na mandok, “Mandok mauliate ma hamu tu Debata jala i ma na gabe peleanmuna, garar hamu ma janjimuna tu Natumimbul i.” (Psalmen 50:14) Adong do muse sada ende ni si Daud na mandok, “Dung i marende ma au mamuji goar ni Debata, jala mandok mauliate ma au tu Ibana lao pasangappon Ibana.” (Psalmen 69:30) Tatiru ma si Daud tikki martangiang sahalakta manang tikki rap dohot halak na asing.
5-11 AGUSTUS
ARTA NA ARGA NA ADONG DI BIBEL | PSALMEN 70-72
Paboahon Taringot Huaso ni Debata “tu Pinoppar na Naeng Ro”
w99 1/9 18 ¶17
Hamu Akka na Poso, Latik ma Cara Marpikkirmuna!
17 Asa unang sappe dijorat Sibolis hamu, porlu do hamu toktong jaga jala barani. Olo do ra dihilala hamu hira na asing hamu sian akka donganmuna, manang sian akka halak na di portibi on. Hea do didok si Daud di tangiangna, “Ale Jahowa Tuan Natumimbul, tu Ho do au marhaposan. Pos do rohakku tu Ho mulai sian tikki poso dope au. Ale Debata, nungnga diajari Ho au mulai sian tikki poso dope au, jala sahat tu saonari torus do hubaritahon akka ulaonmu na palongang roha.” (Psalmen 71:5, 17) Halak na barani do si Daud. Alai boasa boi ibana songon i? Alana mulai sian na poso ibana, nungnga marlatik ibana gabe halak na barani! Tikki gabe parmahan ni biru-biru ni bapakna ibana, hea do dipamate ibana singa dohot beruang. (1 Samuel 17:34-37) Alani i dung balga si Daud, gabe barani ma ibana mangalo si Goliat. Nang pe songon i dang gabe ginjang roha ni si Daud. Jahowa do na dipasangap ibana. Didok ibana do, “Pos do rohakku tu Ho mulai sian tikki poso dope au.” Ala diandalhon si Daud Jahowa, gabe boi ma ibana menghadapi masalah manang aha pe na masa tu ibana. Hamu pe boi do songon si Daud. Molo diandalhon hamu Jahowa, boi do bahenonna hamu gabe barani jala margogo “manaluhon portibi on”.—1 Johannes 5:4.
g04 8/10 23 ¶3
Tahaholongi jala Taparsangapi ma Akka na Matua
Hea do didok panurat psalmen tikki martangiang, “Molo dung matua au, unang ma bolokkon au. Molo dung suda gogokki, unang ma tinggalhon au.” (Psalmen 71:9) Molo dung matua hita, olo do hita merasa dang marguna. Alai pos ma rohatta, dang hea Jahowa ‘mambolokkon’ naposona na setia. Songon i do tong na dihilala panurat psalmen, dang hea dibolokkon Jahowa ibana nang pe nungnga matua ibana. Alai diboto ibana do molo nungnga lam matua ibana, ikkon lam mangandalhon Jahowa do ibana. Jadi molo setia hita tu Jahowa, pasti sai diurupi Ibana do hita saleleng ni ngolutta. (Psalmen 18:25) Jala jotjot do Jahowa mamakke dongan sahaporseaon lao mangurupi naposona na setia.
w14 15/1 23 ¶4-5
Toktong Setia tu Jahowa Sahat tu na Matua
4 Molo nungnga matua hamu pikkirhon ma, aha do na boi diulahon hamu bissan sehat jala margogo dope hamu? Ala nungnga godang pengalamanmuna, boi do diceritahon hamu tu akka na poso taringot Jahowa. Jala boi do diceritahon hamu pengalamanmuna tu nasida taringot melayani Jahowa. Hea do Raja Daud martangiang asa boi mangulahon i. Didok ibana, “Ale Debata, nungnga diajari Ho au mulai sian tikki poso dope au, . . . Ale Debata, unang ma tinggalhon au nang pe nungnga matua jala ubanon au, asa boi hupaboa taringot huasom tu pinoppar na naeng ro, jala hupaboa taringot ulaonmu na palongang roha tu sude halak na so tubu dope.”—Ps. 71:17, 18.
5 Songon dia carana asa boi hamu mangulahon i? Boi do ditogihon hamu akka na poso tu jabumuna asa boi hamu makkata-hatai jala patoguhon nasida. Manang boi do ditogihon hamu nasida asa rap marbarita na uli. Najolo hea do didok si Elihu, “Lok ma na matua na makkatai, jala lok ma halak naung godang umurna na mangajari songon dia asa marbisuk.” (Job 32:7) Apostel Paulus pe hea do mandok, ‘Hamu akka borua na matua . . . ajarhon ma akka na denggan.’ (Tit. 2:3) Boi do akka borua naung godang pengalamanna gabe sitiruon sian pakkataion nang sian parniulaon.
Arta na Adong di Bibel
it-1 637 ¶7
Sunge Euprat
Batas ni luat na dilehon tu halak Israel. Tikki mambahen parjanjian Debata tu si Abraham, didok lao lehononna do tu pinoppar ni si Abraham luat “mulai sian sunge na di Mesir sahat tu Sunge Euprat”. (1Mus 15:18) Dipaboa Jahowa do muse janjina i tu halak Israel. (2Mus 23:31; 5Mus 1:7, 8; 11:24; Jos 1:4) Sebelum mamaretta si Daud, di 1 Kronika 5:9 didok adong do pinoppar ni si Ruben na tinggal di sabola timur “sahat tu pinggir ni gurun na jonok tu Sunge Euprat”. Alai dao do jarak sian Sunge Euprat tu “luat na di sabola timur ni Gilead”. (1Kron 5:10) Hira-hira 800 kilometer ma daona. Jadi boi dokkonon dang sahat dope pinoppar ni si Ruben maringanan sahat tu pinggir ni Sunge Euprat. Alai dung mamaretta si Daud dohot si Salomo, lam bidang ma luat ni halak Israel. Sahat do luat ni nasida tu harajaon ni Zoba di Aram. Jala luat ni harajaon ni Zoba on sahat do tu pinggir ni Sunge Euprat. (2Sam 8:3; 1Raj 4:21; 1Kron 18:3-8; 2Kron 9:26) Jala sunge na terkenal do Sunge Euprat on.—Jos 24:2, 15; Ps 72:8.
12-18 AGUSTUS
ARTA NA ARGA NA ADONG DI BIBEL | PSALMEN 73-74
Boha do molo Cemburu Hita Mangida Halak na So Manomba Jahowa?
‘Dipalua Jahowa do Akka Halak na Marmetmet ni Roha’
14 Sahalak bawa marga Lepi do na manuratton Psalmen 73. Jadi martugas di bagas joro do ibana. Alai hea do metmet rohana. Boasa marmetmet ni roha ibana? Ala cemburu ibana mangida halak na jahat mamora. Tikki diida ibana halak na jahat, hira na so adong do na hurang di nasida. Mamora do nasida, sonang ngoluna, jala dang adong na dipikkiri. Jadi gabe metmet ma roha ni panurat Psalmen on mangida i. Sappe didok ibana do, “Na so adong do gunana na sai burju i ahu, dohot na sai ias tanganku sian angka hajahaton i?” (Ps. 73:2-9, 11-14, Bibel siganup ari) Molo torus do songon i pakkilalaanna, boi do gabe dang disomba ibana be Jahowa.
‘Dipalua Jahowa do Akka Halak na Marmetmet ni Roha’
15 Jaha Psalmen 73:16-19, 22-25. Dung i lao ma halak Lepi i, “tu inganan ni Debata na badia”. Disi, dibereng ibana ma akka sisomba Jahowa. Martangiang ma ibana, gabe dame ma rohana. Gabe boi ma dipadenggan ibana cara marpikkirna. Ujungna diboto ibana ma, dang marbisuk molo torus songon i pakkilalaanna. Jala boi do i manegai parale-aleonna tu Jahowa. Diattusi ibana ma na mardalan di inganan na “landit” do akka parjahat i jala ngeri do ujungna. Asa unang sai cemburu be ibana mangida akka parjahat, ikkon tiruonna do cara marpikkir ni Jahowa. Ala diulahon ibana i, gabe las ma rohana jala dang metmet be rohana. Didok ibana ma, “Dungkon ni [Jahowa] ndang adong dihalomohon rohangku di tano on.”
16 Parsiajaranna tu hita. Unang ma cemburu hita mangida halak parjahat na sonang ngoluna. Hasonangan parsatokkinan do i jala dang boi nasida mangolu saleleng ni lelengna. (Pjm. 8:12, 13) Molo cemburu hita tu nasida, boi do gabe metmet rohatta jala gabe sega parale-aleotta tu Jahowa. Molo hea tahilala songon na dihilala halak Lepi on, tatiru ma cara ni ibana mangatasi masalah i. Oloi ma poda ni Jahowa jala torus ma marale-ale tu akka halak na mangulahon lomo ni roha ni Jahowa. Molo umholong do rohatta tu Jahowa sian manang aha pe, dapotta ma las ni roha na sasittongna. Dung i, boi ma dapotta “hangoluan na saleleng ni lelengna”.—1 Tim. 6:19.
Tiru ma Haporseaon ni si Musa
5 Songon dia ma carana asa unang tarjorat hita tu “hasonangan na satokkin di bagasan dosa”? Taingot ma holan parsatokkinan do hasonangan na songon i. Molo togu haporseaotta pasti pos do rohatta “na lao salpu nama portibi on dohot akka hisap-hisapna”. (1 Joh. 2:15-17) Na lao marjea do akka halak na torus mangulahon dosa. Alana Bibel mandok hira na jongjong “di inganan na landit” do nasida! (Ps. 73:18, 19) Jadi molo targoda hita naeng mangulahon dosa, pikkirhon ma songon dia do annon ujungna ngolutta molo taulahon i?
w13 15/2 25-26 ¶3-5
Toktong ma Setia asa Unang Mago Hasangapon na Tajalo sian Jahowa
3 Pos do roha ni panurat psalmen na lao ditiop Jahowa do tangan kananna jala lehonon ni Jahowa do hasangapon tu ibana. (Jaha Psalmen 73:23, 24.) Aha do lapatan ni i? Marragam do cara ni Jahowa mangalehon hasangapon tu akka naposona na serep marroha. Misalna, dipaboa Jahowa do tu nasida taringot sakkapna. (1 Kor. 2:7) Asing ni i molo olo sasahalak manangihon jala mangoloi hatana, boi ma jonok hubunganna tu Jahowa.—Jak. 4:8.
4 Dilehon Jahowa do tong tu akka naposona tugas marbarita na dos songon arta. (2 Kor. 4:1, 7) Parohon hasangapon do ulaon on. Alana marjanji do Jahowa, “Sangap do bahenokku halak na pasangappon Au.” (1 Sam. 2:30) Sada hasangapon na tajalo, i ma gabe las roha ni Jahowa mangida hita. Las ma tong roha ni naposo ni Jahowa na asing mangida hita.—Poda 11:16; 22:1.
5 Aha ma manfaatna molo ‘marpos ni roha hita tu Jahowa jala taihutton dalanna’? Didok Bibel do, ‘Sangap ma ho bahenon ni Jahowa jala lehononna ma tano on gabe parbagiananmu. Jala idaonmu ma dipamate akka parjahat i.’ (Ps. 37:34) Mangolu saleleng ni lelengna ma hasangapon na asing na lao tapaima-ima sian Jahowa.—Ps. 37:29.
Arta na Adong di Bibel
it-1 1420 ¶4
Lepiatan
Di Psalmen 74 dipaboa do songon dia cara ni Jahowa paluahon naposona. Di ayat 13 dohot 14 dipaboa do sada gombaran taringot songon dia Jahowa paluahon halak Israel sian Mesir. Di akka ayat i disarupahon do istilah “binatang raksasa na di laut” [di bahasa Heber thanninim, bentuk jamakna tannin] tu istilah “Lepiatan”. Jala tikki didok ayat i lao diropukkon Jahowa ulu ni Lepiatan, on manggombarhon songon dia Jahowa manaluhon si Firaun dohot akka tentarana, asa boi halak Israel malua sian Mesir. Di akka Targum Aram dang adong dipakke istilah “ulu ni Lepiatan”, alai istilah “tentara ni si Firaun” do na dipakke. (Bandingkon tu Hes 29:3-5, di ayat i dipatudos do si Firaun tu “binatang raksasa na peak di Sunge Nil”; songon i do tong di Hes 32:2.) Alai molo di Jesaya 27:1, dipakke do hata Lepiatan (LXX, “naga”) lao manggombarhon sada imperium manang sada organisasi internasional, na dirajai Sibolis na dos songon “ulok” dohot “naga”. (Pgk 12:9) Ayat i paboahon surirang taringot cara ni Jahowa paluahon halak Israel. Didok do di ayat i, pamateon ni Jahowa do Lepiatan. Berarti termasuk do pamatehon halak Babel. Alai di ayat 12 dohot 13 pe, dipaboa do taringot Asiria dohot Mesir. Jadi hata Lepiatan na dipakke di akka ayat i, manggombarhon organisasi manang imperium internasional na mangalo Jahowa dohot akka naposona.
19-25 AGUSTUS
ARTA NA ARGA NA ADONG DI BIBEL | PSALMEN 75-77
Unang ma Ginjang Rohatta
Imbar Do Hita Sian Nasida
4 Dung didok si Paulus molo parange ni angka halak holan mangkaholongi dirina dohot hepeng, didok ibana do muse, godang halak parhata manggang dohot parroha haginjangon. Dirimpu nasida, dumenggan do nasida sian na asing, ala nasida bagak, malo, mamora, jala diparsangapi halak. Adong do pigapiga halak ndang puas molo holan dipuji. Songon pandapot ni sahalak pakar, “di bagas roha ni halak sisongon i lomo do nasida asa disomba”. Jala pigapiga halak na ginjang roha pe, ndang lomo rohana mangida halak na tong ginjang roha.
5 Sogo do roha ni Jahowa mangida na ginjang roha. Didok do di Bibel, halak na “mata haginjangon” do na songon i. (Poda 6:16, 17) Sasintongna, ginjang ni roha boi mambahen sasahalak gabe dao sian Debata. (Ps. 10:4) Parange ni Sibolis do on. (1 Tim. 3:6) Alai, naposo ni Jahowa pe boi do gabe ginjang roha. Umpamana, saleleng martaontaon burju do Raja Usia. Alai didok Bibel, “Dung marhuaso rajai, dipaginjang ma rohana mambahen hamagoanna; ai mardosa ibana dompak Jahowa.” Ditutung si Usia do daupa di bagas joro, hape sasintongna ndang tugasna i. Asing ni i, Raja Hiskia pe hea do gabe ginjang rohana.—2 Kron. 26:16; 32:25, 26.
Marsiajar sian Akka Mukjizat na Dibahen Jesus
11 Aha ma na boi taparsiajari sian mukjizat na dibahen Jesus? Marsiajar do hita massai penting do patuduhon serep ni roha. Dang gabe dibangga-banggahon Jesus dirina alani mukjizat i. Jala dang hea dibangga-banggahon Jesus dirina alani akka na diulahon ibana. Sebalikna serep do rohana jala sai ditujuhon ibana do sude pujian dohot hasangapon holan tu Bapakna. (Joh. 5:19, 30; 8:28) Tatiru ma Jesus na serep roha. Seimbang ma caratta mangida diritta sandiri. Unang ma tabangga-banggahon diritta di sude na marhasil taulahon. Dang soal aha tugasta di organisasi ni Jahowa, unang ma diritta na tabangga-banggahon alai tapuji ma Jahowa Debata na tasomba. (Jer. 9:23, 24) Alana holan Ibana do na layak dipuji. Taingot ma dang boi hita marhasil molo dang diurupi Jahowa.—1 Kor. 1:26-31.
12 Parrohahon ma contoh na asing songon dia hita maniru serep ni roha ni Jesus. Bayakkon ma situasi on: Adong ma sahalak sintua na godang mangalehon tikkina lao mangurupi sahalak parhobas na poso mampersiappon jamitana na parjolo sahali dipasahat. Hasilna denggan ma donganta i pasahatton jamitana. Dung sae parpunguan, adong sahalak donganta na ro tu sintua i jala mandok, ‘Denggan do donganta i pasahatton jamitana ate.’ Dohonon ni sintua i do, ‘Ido, denggan do. Alana godang do tikkikku hulean mangurupi ibana mampersiappon jamita i.” Manang serep do rohana mandokkon, ‘Ido, denggan do donganta i marjamita. Bangga do au tu ibana.’ Molo serep rohatta unang ma tatarik pujian tu diritta sandiri alani akka na denggan na taulahon tu donganta na asing. Puas do tahilala mamboto na diida Jahowa jala diargai Ibana do na taulahon i. (Bandingkon tu Mateus 6:2-4; Heb. 13:16) Pasti las do roha ni Jahowa molo tatiru Jesus na patuduhon serep ni roha.—1 Ptr. 5:6.
Arta na Adong di Bibel
w06 15/7 11 ¶3
Akka na Denggan sian Bukku Psalmen
76:10—Boasa didok gabe dipuji do Jahowa “molo muruk jolma”? Molo muruk jolma tu hita ala naposo ni Jahowa hita, boi do i parohon hasil na denggan. Boi do situasi i mangajari hita asa patuduhon akka sifat na denggan. Jala boi do sitaonon i mambahen hita gabe lam togu. (1 Petrus 5:10) Alai boha ma molo gabe mate hita ala ‘dipapuas jolma rimasna’ tu hita? Boi do tong i parohon sangap tu goar ni Jahowa. Alana molo diida akka halak na toktong hita setia tu Jahowa sahat tu na mate, boi do gabe dohot nasida mamuji goar ni Jahowa.
26 AGUSTUS–1 SEPTEMBER
ARTA NA ARGA NA ADONG DI BIBEL | PSALMEN 78
Unang ma Tatiru Halak Israel na Sai Mangalo tu Jahowa
w96 1/12 29-30 ¶5-6
Boasa ‘Ikkon Taingot Akka na Masa di Tikki Naung Salpu’?
Jotjot do halak Israel mangalupahon pambahenan ni Jahowa tu nasida. Akibatna Bibel mandok, “Mulak-ulak do nasida manguji Debata, gabe haccit do roha ni Debata Nabadia ni Israel i dibahen nasida. Dang diingot nasida balga ni huasona, tikki dipalua Ibana nasida sian akka musu.” (Psalmen 78:41, 42) Alani i, gabe dang olo be Jahowa mambahen nasida gabe bangso na pinillitna.—Mateus 21:42, 43.
Alai gabe sitiruon do panurat psalmen taringot mangingot akka pambahenan ni Jahowa. Didok ibana do, “Alai huingot ma akka ulaon ni Jahowa, huingot ma akka ulaonna na palongang roha di tikki naung salpu. Hurimangi ma sude pambahenanmu, jala hupahusor-husor ma di rohakku akka ulaonmu.” (Psalmen 77:11, 12) Molo taingot perjuanganta saleleng on jala songon dia Jahowa mangurupi hita sian najolo, boi ma gabe lam togu hita jala lam taargai Jahowa. Asing ni i tikki tahilala naeng menyerah hita manomba Jahowa, boi do gabe semangat muse hita molo “taingot akka na masa di tikki naung salpu”. Jala gabe berupaya ma hita asa toktong setia melayani Jahowa.
w06 15/7 17 ¶16
Unang ma Sai Marungut-ungut Hita
16 Molo sai marungut-ungut hita, on patuduhon holan diritta dohot sitaononta do na tapikkiri. Asing ni i molo holan na sai marungut-ungut hita, boi do gabe lupa hita tu pasu-pasu naung dilehon Jahowa tu hita. Jadi asa unang sai marungut-ungut hita, porlu do taingot akka pasu-pasu i. Misalna, nungnga dipillit Jahowa hita gabe Saksina. (Jesaya 43:10) Boi jonok hubungatta tu Jahowa jala boi hita martangiang tu Ibana ganup tikki. (Psalmen 65:2; Jakobus 4:8) Asing ni i gabe martujuan do ngolutta ala taboto molo toktong hita setia tu Debata, na mendukung hak ni Jahowa lao mamaretta do hita. (Poda 27:11) Boi do muse hita dohot paboahon taringot Harajaon ni Debata tu akka halak. (Mateus 24:14) Jala gabe ias ma hati nuranitta ala porsea hita tu tobusan ni Jesus Kristus. (Johannes 3:16) On ma pasu-pasu na boi tahilala nang pe godang sitaononta saonari.
w11 1/7 10 ¶3-4
Boha do Perasaan ni Jahowa Mangida Pangalahotta?
Didok panurat psalmen do, “Jotjot do nasida mangalo Ibana di gurun, jala jotjot do haccit rohana dibahen nasida disi!” (Ayat 40) Di ayat na mangihut didok do muse, “Mulak-ulak do nasida manguji Debata.” (Ayat 41) Songon na didok ayat i jotjot do halak Israel mangalo tu Debata. Nungnga tarida hasomalan ni nasida i mulai tikki di gurun dope nasida, dang leleng dung dipalua nasida sian Mesir. Marungut-ungut do bangso i tu Debata. Dang pos roha ni nasida na tolap jala na olo do Jahowa mangurupi nasida. (4 Mus. 14:1-4) Songon on ma na didok sada karya referensi na dibahen tu akka penerjemah Bibel taringot hata “mangalo tu Debata”: Boi do hata i diterjemahon gabe “dipajogal nasida rohana tu Debata” manang ‘dang olo nasida diurupi Debata’. Alai ala parasi roha do Jahowa, disesa Jahowa do dosa ni bangsona i molo dung muba nasida. Nang pe songon i, dialo nasida do muse Jahowa. Songon i ma na dibahen nasida marulak-ulak.—Psalmen 78:10-19, 38.
Songon dia do perasaan ni Jahowa tikki dialo naposona Ibana? Di ayat 40 didok, ‘haccit do rohana’. Molo di Bibel terjemahan na asing didok, “gabe lungun do rohana”. Sada karya referensi ni Bibel mandok, “Marragam do cara dibahen halak Heber lao mambahen haccit roha ni Debata. Sarupa ma i songon sahalak dakdanak na pangalo.” Molo jugul sahalak dakdanak pasti lungun do roha ni natua-tuana. Dos songon i ma ala jotjot halak Israel mangalo tu Jahowa, “gabe haccit do roha ni Debata Nabadia ni Israel i dibahen nasida”.—Ayat 41.
Arta na Adong di Bibel
w06 15/7 11 ¶4
Akka na Denggan sian Bukku Psalmen
78:24, 25—Boasa didok manna i “sipanganon sian langit” dohot “roti na sian suru-suruan”? Didok pe manna i “sipanganon sian langit”, ala sian surgo do i. (Psalmen 105:40) Jala didok pe manna i “roti na sian suru-suruan”, dang na lapatanna siallangon ni suru-suruan manna i. Alai on patuduhon Jahowa na tinggal di surgo do na paradehon manna i, ala di surgo do suru-suruan tinggal. (Psalmen 11:4) Asing ni i, olo do ra dipakke Jahowa suru-suruan lao paradehon manna tu halak Israel.