Habaranion ni si Jehoyada

Adong ma boru ni si Izebel na margoar si Atalia. Jahat do ibana dos songon omakna. Menikah ma si Atalia tu raja ni Juda. Dung mate suamina, anakna ma na gabe raja. Alai dung mate anakna i, gabe si Atalia ma na mamaretta Juda. Berupaya do si Atalia naeng mambunu sude keturunan ni raja na boi manggattihon ibana, nang pe i pahoppuna sandiri. Sude do halak mabiar tu ibana.

Diboto Sintua ni Malim Jehoyada dohot istrina si Jehoseba do massai jahat na diulahon si Atalia i. Jadi, ditabunihon nasida ma pahoppu ni si Atalia na margoar si Jehoas, nang pe berbahaya i tu nasida. Di bagas joro ma dipagodang-godang si Jehoas.

Tikki marumur pitu taon si Jehoas, dipapungu si Jehoyada ma akka pamimpin ni tentara dohot halak Lepi. Didok ma tu nasida, ‘Jaga hamu pintu ni bagas joro i, jala unang paloas manang ise pe masuk.’ Dibahen si Jehoyada ma si Jehoas gabe raja ni Juda jala dibahen ma mahkota tu uluna. Marsurak ma halak Juda, ‘Sai ganjang ma umur ni raja i!’

Dibege si Atalia ma soara i jala naeng masuk ma ibana tu bagas joro. Dung diida ibana adong raja na baru, marsurak ma ibana mandok, ‘Penghianat! Penghianat!’ Ditakkup akka pamimpin ni tentara i ma ibana jala dipamate. Alai nang pe naung mate si Atalia, godang do pengaruh na so denggan na dibahen ibana tu bangso i.

Alani i, dibahen si Jehoyada ma parjanjian antara bangso i dohot Jahowa. Marjanji do nasida asa holan manomba Jahowa. Dihancurhon si Jehoyada ma sude patung dohot inganan manomba Baal. Dipillit ma akka malim dohot halak Lepi lao karejo di bagas joro, asa boi muse bangso i manomba Jahowa disi. Disuru ma asa dijaga gerbang ni bagas joro i, asa unang boi masuk halak na so mangoloi Debata. Dung i, diboan ma si Jehoas tu istana jala dibahen ma hundul di tahtana. Marlas ni roha ma sude halak Juda. Holan Jahowa do na disomba nasida, dang patung Baal be. Selamat ma nasida sian si Atalia. Diida ho do songon dia habaranion ni si Jehoyada boi mangurupi godang halak?