Referensi tu Parpunguan Hangoluan dohot Pangkobasion na Laho Diparsiajari
© 2025 Watch Tower Bible and Tract Society of Pennsylvania
7-13 JULI
ARTA NA ARGA NA ADONG DI BIBEL PODA 21
Asa Bahagia Perkawinanmuna
Asa Toktong Ias di Jolo ni Jahowa Saleleng Marhallet
13 Ikkon sadia leleng do hamu marhallet? Molo terburu-buru halak mambahen keputusan, biasana dang denggan hasilna. (Poda 21:5) Jadi pastihon ma nungnga cukkup tikkimuna mananda halletmuna. Alai unang ma palelengku hamu marhallet. Alana didok Bibel, “Pahaccitton roha do molo sundat na dipaima-ima roha.” (Poda 13:12) Asing ni i molo pajotjottu hamu na dua rap, gabe lam maol ma hamu menolak keinginan lao mangulahon seks. (1 Kor. 7:9) Daripada berfokus taringot sadia leleng hamu marhallet, tumagon ma dirimangi sukkun-sukkun on, ‘Aha do muse na porlu huboto taringot hallettu asa boi hubahen keputusan na denggan?’
Unang ma Didok Rohamuna Tumimbo Dirimuna
3 Lomo do roha ni Jahowa asa marlas ni roha halak na marsaripe. Alai dang adong jolma na sempurna. Jadi, olo do gabe tubu parsoalan di parsaripeon. Sasittongna nungnga didok si Paulus hian, molo halak na marsaripe ikkon mangadopi godang hasusaan. (1 Kor. 7:28) Adong do piga-piga na sai torus marbadai dohot dongan saripena, jadi didok roha ni nasida tumagon hian ma dang saut nasida marhasohotan. Jala molo diihutton nasida pandapot ni akka halak di portibi on, gabe dirippu nasida ma marsirang do jalan keluarna. Na makkarikkotton dirina sandiri do nasida disi, alana dirippu nasida ikkon marsirang do asa boi las roha ni nasida muse.
4 Unang ma didok rohatta, dang boi be dipadenggan parsaripeonta. Alana didok di Bibel, holan ala mangulahon seks na so patut do halak na marsaripe boi marsirang. (Mat. 5:32) Jadi molo adong parsoalan di parsaripeon, unang ma gabe taharikkotton diritta sandiri. Unang ma gabe tadok, ‘Dang parduli ibana tu au. Dang holong be rohana tu au. Tumagon ma au tu na asing.’ Molo tadok songon i, holan diritta sandiri do na tapikkirhon. Akka halak di portibi on mandok, tumagon ma marsirang molo memang i do na mambahen las rohamuna. Alai Bibel mandok, “Unang ma holan mamparrohahon na ringkot di hamu, alai parrohahon ma na ringkot di na asing.” (Plp. 2:4) Lomo do roha ni Jahowa asa dijaga hamu parsaripeonmuna, jala dang gabe marsirang hamu. (Mat. 19:6) Jala lomo do rohana asa Ibana na taharikkotton, dang diritta sandiri.
5 Ikkon masihaholongan do suami dohot istri. (Jaha Epesus 5:33.) Di Bibel, diajari do hita asa urringgas mangalehon sian na manjalo. (Ul. 20:35) Parange aha do na boi mangurupi suami dohot istri asa masihaholongan jala mangargai dongan saripena? I ma serep ni roha. Molo serep do roha ni nasida, urrikkot do di nasida “halak na asing” sian dirina sandiri.—1 Kor. 10:24.
w06 15/9 28 ¶13
“Sai Marlas ni Roha ma Ho Rap Dohot Istrim na Nialapmu Tikki Poso”
13 Boha ma molo marbadai suami dohot istri? Ikkon berupaya do nasida pasaehon i. Contohna olo do ra gabe marbadai suami dohot istri ala dang denggan cara ni nasida berkomunikasi. (Poda 12:18) Songon naung dibahas di artkel sebelumna, boi do gabe sega perkawinan molo dang denggan cara ni nasida berkomunikasi. Bibel pe mandok, “Tumagon ma tinggal di padang gurun sian apala tinggal rap dohot istri na lomo rohana marbada jala mura muruk.” (Poda 21:19) Hamu akka istri sukkun ma tu dirimuna, ‘Adong do parangeku na mambahen dang lomo be roha ni suamikku jonok tu au?’ Didok Bibel muse, “Hamu akka suami, haholongi hamu ma istrimuna, jala unang ma kasar tu nasida.” (Kolose 3:19) Hamu akka suami sukkun ma dirimuna, ‘Huparrohahon do songon dia perasaan ni istrikku? Manang boi do sikapku mambahen istrikku gabe mangalului perhatian sian halak na asing?’ Memang dang boi i gabe sidalian lao mangulahon seks na so patut. Alai boi do masa situasi na songon i tu naposo ni Jahowa. Alani i porlu do denggan dihatai hamu parsoalanmuna
Arta na Adong di Bibel
‘Massai Balga do Asi ni Roha’ ni Debata
16 Sude do hita porlu maniru asi ni roha ni Jahowa. Boasa? Alana dang olo Jahowa mambege tangiang ni halak na so olo patuduhon asi ni roha. (Jaha Poda 21:13.) Pasti dang olo hita molo dang ditangihon Jahowa tangiangta. Alani i ikkon tapatudu do asi ni roha. Parduli ma hita tu akka donganta, jala rade ma hita “mambege angguk-angguk ni [na susa]”. Sai taingot ma poda on, “Dang maralang-alang Debata manguhumi halak na so marasi ni roha.” (Jak. 2:13) Molo tasadari do porlu di hita asi ni roha, hita pe tapatudu ma asi ni roha. Khususna patuduhon asi ni roha tu akka halak naung bertobat jala nungnga dipulihkan.
14-20 JULI
ARTA NA ARGA NA ADONG DI BIBEL PODA 22
Cara na Denggan Mangajari Gellengmuna
Olo do Ianakkonmuna Manomba Jahowa Dung Magodang Nasida?
7 Molo nungnga marhasohotan hamu jala lomo rohamuna marianakkon, sukkun ma dirimuna, ‘Songon si Josep dohot si Maria, serep do rohanami? Holong do rohanami tu Jahowa dohot tu Bibel? Olo do Jahowa mamillit hami gabe natua-tua na lao mangurus sada poso-poso?’ (Ps. 127:3, 4) Molo nungnga adong ianakkonmuna, sukkun ma dirimuna, ‘Huajari do ianakkonku asa olo kerja keras?’ (Pjm. 3:12, 13) ‘Hubahen do sian nasa gogokku lao manjaga ianakkonku sian akka bahaya na adong di portibi ni Sibolis on?’ (Poda 22:3) Memang dang boi dijaga hamu ianakkonmuna sian sude tantangan na diadopi ibana. Alai torus ma ajari ianakkonmuna asa sai mangasahon Bibel tikki mangadopi masalah di ngoluna. (Jaha Poda 2:1-6.) Misalna molo adong keluargamuna na so manomba Jahowa be, urupi ma ianakkonmuna mangida alasan ni Bibel boasa ikkon torus setia ibana tu Jahowa. (Ps. 31:24) Manang tikki mate sasahalak na dihaholongi ibana, patudu ma akka ayat sian Bibel na boi mangapuli jala mambahen dame rohana.—2 Kor. 1:3, 4; 2 Tim. 3:16.
Natua-tua—Latik ma Ianakhonmuna Asa Mangkaholongi Jahowa
17 Latik ma ianakhonmuna sian na gelleng dope. Lam hatop dilatik hamu ianakhonmuna, lam denggan do i. (Poda 22:6) Pingkirhon ma taringot si Timoteus. Dung magodang, gabe dongan sapardalanan ni apostel Paulus ma ibana. Omak ni si Timoteus, i ma si Eunike dohot ompungna, si Lois nunga mangalatik ibana “sian na metmet”.—2 Tim. 1:5; 3:15.
18 Si Jean-Claude dohot si Peace, na tading di Pantai Gading marhasil mangurupi onom ianakhon ni nasida asa mangkaholongi jala manomba Jahowa. Aha do na mangurupi nasida? Ditiru nasida do contoh ni si Eunike dohot si Lois. Didok nasida, “Ndang leleng dung tubu ianakhonnami, diajarhon hami do Hata ni Debata tu nasida.”—5 Mus. 6:6, 7.
19 Aha do lapatan ni “mangajarhon” Hata ni Debata tu ianakhonmuna? Hata “mangajarhon” boi do lapatanna “marulak-ulak mangajari dohot paingothon.” Laho mangulahon i, ingkon dilehon angka natua-tua do godang tingki tu ianakhonna. Sipata, olo do gabe metmet roha ni natua-tua ala marulak-ulak paingothon ianakhon ni nasida. Alai, on ma sada cara laho mangurupi ianakhon ni nasida asa mangantusi Hata ni Debata jala mangulahon i.
w15 15/11 ¶5-6
Ajari ma Ianakhonmuna Manomba Jahowa
5 Jesus mandok, “Ai nasa na huhaholongi, angka i do hupinsang jala huajar.” (Pgk. 3:19) Umpamana, jotjot do angka sisean ni Jesus marsalisi taringot ise na sumurung. Diparrohahon Jesus do parsalisian on. Alai, sabar do ibana mamodai nasida. Tongtong do dipatudu ibana burju ni roha. Jala dipaima do tingki dohot inganan na pas laho pasingothon nasida.—Mrk. 9:33-37.
6 Ala dihaholongi hamu do ianakhonmuna, tontu pinsangonmu do nasida. Sipata sae do holan tapatorang boasa ulaon i denggan manang sala. Alai, songon dia do molo ndang dioloi nasida? (Poda 22:15) Marsiajar ma sian Jesus. Patudu ma hasabaron tingki maminsang marhite manogunogu, dohot mangalatik nasida. Pillit ma tingki dohot inganan na pas laho maminsang jala patudu ma holong tingki pasingothon nasida. Sahalak donganta borua sian Afrika Selatan na margoar si Elaine mangingot songon dia natuatuana maminsang ibana. Dipaboa natuatuana do aha na dihalomohon sian si Elaine. Molo didok uhumonna si Elaine ala ndang mangoloi, diulahon natuatuana do songon i. Alai ibana mandok, “Ndang hea natuatuangku maminsang ahu tingki muruk. Tongtong do dipatorang boasa ahu porlu dipinsang.” On ma na mambahen si Elaine mamboto molo natuatuana mangkaholongi ibana.
Arta na Adong di Bibel
Tanikmati ma Tugas na Tadapot Saonari
11 Asa boi tamba las ni rohatta, ikkon berupaya do hita mambahen na undenggan mandalatton tugasta. Taupayahon ma asa lam godang ‘tapakke tikkitta’ lao marbarita na uli jala mangulahon tugas di huria. (Ul. 18:5; Heb. 10:24, 25) Persiapan ma hita sebelum marpungu, asa boi talean komentar na denggan na patoguhon akka dongan. Molo dapot tugas di parpunguan tonga pokkan, denggan ma taparade. Denggan ma takarejohon tugas manang aha pe na dilean tu hita. Unang ma hea didok rohatta adong tugas na hurang penting jala na pahabis-habisson tikki. Berupaya ma hita asa lam malo mangulahon karejotta. (Poda 22:29) Molo lam denggan hita mangulahon akka tugasta, gabe lam jonok ma hita tu Jahowa jala tamba ma las ni rohatta. (Gal. 6:4) Molo tung pe donganta na asing na mandapot tugas na taharappon i, dang mago las ni rohatta i. Gariada rap marlas ni roha do hita dohot ibana.—Rom 12:15; Gal. 5:26.
21-27 JULI
ARTA NA ARGA NA ADONG DI BIBEL PODA 23
Asa Boi Mambahen Keputusan na Denggan Taringot Minuman Beralkohol
Boha do Seharusna Pandangan ni Halak Kristen taringot Minuman Beralkohol?
Sogo do roha ni Jahowa tu halak na pagodangku minum jala na olo sappe mabuk. (Galatia 5:21) Didok Ibana do, “Unang ma ihutton halak na pagodangku minum anggur.” (Poda 23:20) Jadi molo naeng minum minuman beralkohol do hita rap dohot akka donganta manang sahalakta, unang ma pagodangku. Alana molo pagodangku hita minum, pasti dang boi be hita denggan marpikkir, makkatai, dohot mangulahon manang aha pe. Jala boi do i mambahen hita marsahit. Jadi molo dang boi takendalihon diritta, tumagon ma hita dang minum sama sekali.
Ihutton ma Prinsip ni Bibel Taringot Minuman Beralkohol
Ala holong roha ni Jahowa tu hita, dilehon Ibana do tu hita nasehat taringot minuman beralkohol. Contohna dipaboa ibana do aha akibatna molo pagodangku hita minum. Di Poda 23:29-35, dipaboa do taringot halak na mabuk jala aha do akibatna. Songon i ma na dihilala si Daniel sebelum gabe Saksi Jahowa ibana. Saonari nungnga gabe sintua di Eropa ibana. Didok ibana, “Najolo godang do au minum minuman beralkohol. Ala songon i hasomalanku, gabe dang denggan au mambahen keputusan. Akibatna susa ma ngolukku, jala lungun do rohakku molo huingot i.”
Arta na Adong di Bibel
w04 1/11 31 ¶2
Sukkun-Sukkun sian na Manjaha
Sipata alani mokkus do sasahalak gabe pamokmokhu, alai dang sai songon i. Alana adong do halak na gabe pamokmokku alani sada sahit manang alani faktor keturunan. Jadi dang sarupa halak na pamokmokku dohot halak na mokkus. Halak na pamokmokku i ma “halak na pagodangku lemak di dagingna”. Alai molo halak na mokkus i ma “halak na hisap, na so boi mangarajai pamanganna”. Jadi dang sai mokmok halak na mokkus. Olo do halak na mokkus dang mokmok dagingna, gariada olo do marniang ibana. Asing ni i dang sai sarupa pandangan ni ganup halak taringot berat badan dohot pardagingon na ideal.
28 JULI–3 AGUSTUS
ARTA NA ARGA NA ADONG DI BIBEL PODA 24
Parade ma Dirimuna lao Mangadopi Sitaonon
‘Toktong ma Togu jala Dang Muba-uba’
15 Parsiajari jala rimangi ma Hata ni Debata. Songon hau na boi hot jongjong ala bagas marurat tu toru, hita pe boi do toktong togu haporseaotta molo bagas haporseaotta tu Hata ni Debata. Boi do urat ni hau i lam bagas jala rarat. Suang songon i ma, molo taparsiajari jala tarimangi Hata ni Debata boi do lam togu haporseaotta jala lam pos rohatta undenggan do dalan ni Jahowa. (Kol. 2:6, 7) Rimangi ma muse songon dia petunjuk, panogu-noguon, dohot perlindungan sian Jahowa boi mangurupi naposona di tikki najolo. Uppamana di sada parnidaan, manat do diparrohahon si Hesekiel tikki adong suru-suruan mangukkur bagas joro. Gabe dipatogu do si Hesekiel alani parnidaan i, jala gabe diurupi do tong hita asa torus mangulahon ibadat na sittong sesuai tu standar ni Jahowa. (Hes. 40:1-4; 43:10-12) Hita pe boi do mandapot manfaat molo talehon tikki lao marsiajar jala mangarimangi akka na bagas na adong di Bibel.
w09 15/12 18 ¶12-13
Toktong Marlas ni Roha Tikki Adong Sitaonon
12 Poda 24:10 mandok, “Molo metmet roham tikki masa hasusaan, moru ma gogom.” Ayat na asing di bukku Poda mandok, “Gabe mandele do molo lungun roha.” (Poda 15:13) Adong do piga-piga halak Kristen gabe dang olo be manjaha jala mamparsiajari Bibel alani metmet ni rohana. Molo tung pe martangiang nasida, holan alani kewajiban do. Jala jotjot do nasida papulikkon dirina sian dongan sahaporseaonna. Jadi boi do parohon jea molo torus hita marmetmet ni roha.—Poda 18:1, 14.
13 Alai molo positif pikiranta, boi ma taida akka na denggan na mambahen las rohatta. Didok si Daud, “Lomo do rohakku mangulahon lomo ni roham.” (Ps 40:8) Tikki adong sitaononta unang ma tatinggalhon akka ulaon na boi mambahen jonok hita tu Jahowa. Gariada akka ulaon i ma na gabe ubat ni lungun ni rohatta na boi mambahen las rohatta. Nungnga dipaboa Jahowa molo torus tajaha jala tarimangi hataNa, boi ma tahilala dame ni roha dohot las ni roha. (Ps 1:1, 2; Jak 1:25) Molo tajaha Hata ni Debata jala ro hita tu parpunguan, tajalo ma akka “hata na denggan” na boi patoguhon hita jala na mambahen las rohatta.—Poda 12:25; 16:24.
Sukkun-Sukkun sian na Manjaha
Poda 24:16 mandok, “Ai tung sura pe tinggang halak partigor i pola pitu hali, sai hehe do ibana muse.” Ise do na nidokna dison? Halak na mulak-ulak madabu tu dosa do jala disesa Debata dosana?
Sasittongna, dang i lapatan ni ayat i. Alai maksudna dison sasahalak na mulak-ulak manaon hasusaan alai toktong sabar jala setia.
Jadi lapatan ni ayat 16 on dang halak na mulak-ulak mangulahon dosa, alai halak na mulak-ulak mangadopi hasusaan. Nang pe songon i toktong do ibana sabar manaon i jala setia. Saonari godang do naposo ni Debata na marsitaonon. Olo do alani sahit manang masalah na asing. Adong do muse na dianiaya pamaretta. Alai pos do roha ni nasida, urupan ni Debata do nasida. Ingot ma jo: Adong do naposo ni Debata na diboto hamu marhasil mangadopi godang hasusaan? Boasa boi ibana marhasil? Ala pos do rohana, “Jahowa do situngkol sude angka na naeng tinggang, jala sipahehe sude angka na tungki marroha”.—Ps. 41:2-4; 145:14-19.
Arta na Adong di Bibel
Pardongansaripeon i ma Silehonlehon sian Debata
13 Molo ingkon marhasohotan hamu, sungkun ma dirimuna sandiri, ‘Nunga rade be ahu marhasohotan?’ Ndang holan pangkilalaanta taringot holong, seks, paralealeon manang pagodanggodang ianakhon na ringkot dipingkiri. Alai, adong do tanggung jawab na ingkon dipingkirhon sasahalak na laho gabe tungganedoli manang tungganeboru.
14 Sahalak dolidoli na laho marhasohotan ingkon mamingkirhon prinsip on, “Jolo sarihon ulaonmu di balian, jala pature ladangmu, dung i pe asa pauli bagasmu.” (Poda 24:27) Aha do lapatan ni ayat on? Di tingki i, sahalak baoa na laho marhasohotan porlu manungkun dirina, ‘Nunga rade ahu manarihon na ringkot di tungganeboru dohot ianakhonku?’ Alani i, ingkon ringgas ma ibana mulaulaon. Dos songon i ma saonari, sasahalak na laho marhasohotan ingkon boi do martanggung jawab. Dipaboa do di Bibel, molo sahalak baoa ndang manggohi na ringkot di pardagingon, holong dohot partondion ni keluarga, jumahat do ibana sian halak na so marhaporseaon.—Jaha 1 Timoteus 5:8.
15 Sahalak borua na laho marhasohotan pe ingkon martanggung jawab tu keluargana. Dipuji do di Bibel tungganeboru na ringgas di keluarga, marparange na denggan jala rade mangurupi tungganedolina. (Poda 31:10-31) Halak na mangkaringkothon dirina sandiri do molo pahatophu marhasohotan, ala ndang dipingkirhon na porlu tu dongan saripena. Alai na rumingkot, halak na laho marhasohotan porlu toras di partondion.
4-10 AGUSTUS
ARTA NA ARGA NA ADONG DI BIBEL
Poda na sian Bibel Taringot Makkatai
Pangke ma Pangkataionmu tu na Denggan
6 Boasa ringkot mamillit tingki na denggan laho mangkatai? Poda 25:11 mandok, “Antajau sere di bagasan pinggan perak do sada hata na nidok di hahonaanna.” Mansai denggan do antajau sian sere, alai dumengganan do muse molo dipeakhon di pinggan perak. Dos songon i ma, ra adong do hata na denggan laho tapasahat tu sasahalak. Alai, lam denggan ma pangkorhonna tu nasida, molo tapillit tingki na denggan laho mangkatai. Songon dia do hita mangulahon on?
7 Molo mangkatai hita di tingki na so pas, olo do gabe ndang diantusi manang parohon hansit ni roha tu na asing. (Jaha Poda 15:23.) Di bulan Maret 2011, masa ma lalo dohot tsunami na manegai godang huta di bagian timur ni Jepang. Lobi sian 15.000 halak na mate. Nang pe godang sian Sitindangi Ni Jahowa na agoan keluarga dohot aleale, alai lomo do roha ni nasida mangapul roha ni na asing marhite Hata ni Debata. Alai diantusi nasida do, godang halak di inganan i maragama Budha jala ndang mangantusi isi ni Bibel. Alani i, ndang pintor dipaboa nasida taringot haheheon, alai dipatorang nasida do boasa masa hasusaon tu angka jolma na burju.
Pangke ma Pangkataionmu tu na Denggan
15 Mansai ringkot do tapingkiri songon dia isaranta mangkatai tu dongan. Las do roha ni halak manangihon Jesus, ala ibana mangkatai mamangke “hata na tabo”, denggan, jala lambok. (Luk. 4:22) Molo denggan isaranta mangkatai, lomo ma roha ni halak manangihon hita. (Poda 25:15) Molo tahaholongi jala taargai pangkilalaan ni donganta, denggan ma hita mangkatai tu nasida. On ma na diulahon ni Jesus. Umpamana, tingki diida ibana angka natorop ro marsitutu manangihon ibana, las ma rohana mangalehon tingki laho mangajari nasida. (Mrk. 6:34) Tingki adong halak mangarehei, ndang dibalos ibana..—1 Ptr. 2:23.
16 Nang pe tahaholongi keluarga dohot alealenta, olo do ra ndang denggan hita mangkatai tu nasida ala ninna rohanta tangkas do tatanda nasida. Ra, didok rohanta ndang porlu manat mamingkiri isara songon dia mangkatai tu nasida. Jesus ndang hea mangkatahon na so denggan tu angka alealena. Tingki marsalisi angka siseanna taringot ise na sumurung, dipasingot do nasida dohot isara na denggan. Dipangke ma tiruan na denggan sian parange ni sahalak dakdanak laho mangurupi nasida mambahen hamubaon. (Mrk. 9:33-37) Angka sintua porlu maniru Jesus tingki mangalehon sipasingot tu na asing mamangke isara na lambok.”—Gal. 6:1.
Lam Ringgas ma Hita Masipatoguan
10 Ndang holan sintua na boi patoguhon angka dongan na asing. Dijujui si Paulus do asa sude halak Kristen mangkatahon ‘na denggan asa dapotan uli na umbegesa’. (Eps. 4:29) Ingkon tapingkirhon do songon dia carana asa boi mangurupi angka donganta. Disurat si Paulus do tu angka halak Heber na gabe Kristen, “Pargogoi ma tangan na gale dohot dugul na telluktelluk! Patigor ma dalan sidalananmu, asa unang tarsulandit pat na mengkatengkat, alai asa malum.” (Heb. 12:12, 13, Bibel siganup ari) Sude hita boi patoguhon angka dongan marhite pangkataionta, tarmasuk ma angka na poso.
Arta na Adong di Bibel
it-1 1413
Lambok ni Roha
Togu do haporseaon ni halak na lambok roha. Tikki adong masalah boi do denggan ibana marpikkir. Alai halak na mura-mura muruk i ma halak na so adong pos ni rohana, godang arsak ni rohana, dang togu haporseaonna dohot pakkirimonna, jala mandele. Songon on ma na didok Bibel taringot halak sisongon i, “Dos songon kota naung maruppak tembokna, songon i ma halak na mura-mura muruk.” (Poda 25:28) Halak na mura-mura muruk dang boi manjaga pikkiranna. Alani i gabe mura ma ibana marpikkiran negatif jala boi do i mambahen ibana gabe mangulahon na jahat.
11-17 AGUSTUS
ARTA NA ARGA NA ADONG DI BIBEL PODA 26
Unang Ihutton “Halak na Oto”
it-1 974 ¶1
Udan
Musim. Adong dua musim di Tano na Dijanjihon, i ma musim panas dohot musim dingin. Manang digoari do i musim kering dohot musim udan. (Bandingkon tu Ps 32:4; Ende 2:11) Jarang do ro udan mulai sian parsitongaan bulan opat sahat tu parsitongaan bulan sappulu. Jadi tikki musim panen halak Israel jarang do ro udan. Alani i ma didok Poda 26:1 dang cocok manang dang patut molo ro udan tikki musim panen. (Bandingkon tu 1Sam 12:17-19.) Tikki musim udan pe, dang torus ro udan. Sipata tiur do ari di musim i. Ala ngali ari di musim i, pasti makkitir do halak molo hona udan. (Esr 10:9, 13) Jadi las do roha ni halak Israel molo dapot ni nasida inganan marlinggom di musim i.—Jes 4:6; 25:4; 32:2; Job 24:8.
w87_s-41 14 ¶12
Boi do Pissang-Pissang Parohon Dame ni Roha
12 Adong do piga-piga halak na porlu dipissang songon na didok Poda 26:3, “Tu hoda do lissing-lissing jala tu halode do kokkang, alai tu tanggurung ni halak na oto do attuk-attuk.” Songon i ma na masa tu halak Israel. Sipata dipasombu Jahowa do nasida susa alani sala ni nasida sandiri. Alana “dialo nasida do hata ni Debata, jala dang olo nasida manangihon poda ni Natumimbul i. Gabe dipasombu Ibana do nasida susa asa serep roha ni nasida, tartuktuk ma nasida jala dang adong na mangurupi. Jou-jou ma nasida tu Jahowa tikki susa. Dipalua Ibana ma nasida sian hasusaan ni nasida.” (Psalmen 107:11-13) Alai dang olo halak na oto manjalo pissang-pissang na sian Jahowa. Bibel mandok, “Halak na sai pajogalhon rukkungna nang pe nungnga jotjot dipasingot, toppu do i hancur jala dang boi be mulak songon na parjolo i.”—Poda 29:1.
it-2 1046 ¶7
Mekkat-ekkat
Gabe umpasa Adong sada umpasa ni Raja Salomo na mandok, “Dos songon halak na mambahen lumpu patna sandiri jala na mangalului jea tu dirina sandiri, songon i ma halak na pos rohana pasahatton sada ulaon tu halak na oto.” Manang ise na mamakke halak na oto lao mangulaon sada ulaon, dos ma i songon halak na mambahen lumpu patna sandiri. Alana pasti gagal do sude rencana na dibahen ibana jala parrohon harugian ma i tu dirina sandiri.—Poda 26:6.
Arta na Adong di Bibel
it-1 452
Oto
Molo taihutton cara makkatai dohot cara marpikkir ni halak na oto tikki mangalusi nasida, on patuduhon na setuju do hita tu cara marpikkir ni halak na oto i. Asa unang sarupa hita tu halak na oto i, adong sada umpasa na mandok, “Unang ma alusi halak na oto mangihutton haotoonna.” Alai songon na dipaboa di Poda 26:4,5 adong do manfaatna molo taalusi halak na oto “mangihutton haotoonna”. Tikki mangalusi halak na oto, porlu do tapareso cara marpikkirna, jala tapatudu ma tu ibana na so masuk akkal cara marpikkirna i. Molo tabahen songon i, gabe boi ma diboto halak na oto i sala do kesimpulan na dibahen ibana.
18-24 AGUSTUS
ARTA NA ARGA NA ADONG DI BIBEL
Manfaatna molo Adong Ale-Aletta
Arga do di Jahowa Naposona na Marserep ni Roha
12 Diargai halak na serep roha do sipasingot. Umpamana: Bayangkon ma molo di parpunguan hamu. Tingki mangkatai dohot piga-piga dongan, sada sian nasida manat paboahon tu hamu na adong saotik sipanganon na longkot di iponmuna. Tontu maila do hamu. Alai mandok mauliate do hamu tu ibana ala nunga dipaboa i tu hamu. Gariada ra didok rohamu do, tuani ma adong na hatop paboahon i tu hamu! Suang songon i ma, molo serep rohanta, mandok mauliate do hita molo adong dongan na barani pasingothon hita di tingki na pas. Ale-alenta do ibana, ndang musunta.—Jaha Poda 27:5, 6; Gal. 4:16.
it-2 793 ¶1
Tetangga
Di bukku Poda dijujui do hita asa porsea jala marpos ni roha tu sahalak dongan. Jala tikki adong na masa, tapangido ma asa diurupi nasida hita. Didok di Bibel, “Unang ma lupa ho tu donganmu manang tu dongan ni bapakmu, jala unang ma masuk ho tu jabu ni haha anggim tikki masa hasusaan tu ho. Ai dumenggan do tetangga [syakhen] sian haha anggi na dao.” (Poda 27:10) Hata tetangga na didok di ayat on, boi do i donganta manang dongan ni bapakta. Jala tikki masa hasusaan, tumagon do tu nasida hita mangido asa diurupi sian apala tu keluarga na dao ingananna. Molo dao jabu ni keluargatta, olo do ra dang boi manang dang rade nasida mangurupi hita. Alai molo tetangga pasti sai rade do mangurupi hita.
Akka na Poso, Keputusan na Songon dia do na lao Dibahen Hamu?
7 Sian keputusan na so denggan na dibahen si Jehoas marsiajar do hita, ikkon mardongan do hita dohot akka halak na makkaholongi Jahowa jala na mambahen las rohana. Alana, boi do nasida mangurupi hita mangulahon na denggan. Unang ma holan akka halak na saumuran dohot hita na gabe donganta. Ingot ma, dao do upposo si Jehoas sian si Jehoyada. Tikki naeng mamillit dongan, pikkirhon ma on: ‘Diurupi nasida do au patoguhon haporseaonku tu Jahowa? Diihutton nasida do standar ni Jahowa di ngoluna, jala dijujui nasida do au mangulahon na sarupa? Taringot Jahowa dohot Bibel do na dihatai nasida? Olo do nasida pasingotton au? Manang holan na tabo begeon do na didok nasida tu au?’ (Poda 27:5, 6, 17) Molo dang makkaholongi Jahowa donganmuna i, tinggalhon ma nasida. Alai molo dihaholongi nasida Jahowa, torus ma mardongan dohot nasida. Pasti sai urupan ni nasida do hamu!—Poda 13:20.
Arta na Adong di Bibel
Na Boi Ditiru Akka Sintua sian si Gidion
Arahon ma pujian tu Jahowa. Tikki dipuji na asing si Gidion ala marhasil manaluhon halak Midian, diarahon ibana do pujian i tu Jahowa. (Pangh. 8:22, 23) Songon dia do akka sintua boi maniru si Gidion? Ikkon dipuji nasida do Jahowa alani sude naung marhasil diulahon nasida. (1 Kor. 4:6, 7) Misalna molo dipuji sahalak sintua ala malo ibana mangajari, boi do ibana mangurupi akka dongan asa berfokus tu sumber ni pengajaran i, i ma Hata ni Debata manang tu pelatihan na dibahen organisasi. Boi do muse dirimangi akka sintua songon dia cara ni nasida mangajari, pasangappon Jahowa do manang holan asa terkesan akka halak. Taida ma pengalaman ni sahalak sintua na margoar si Timothy. Tikki baru dilantik ibana, las do rohana pasahatton jamita. Didok ibana, “Jotjot do au dipuji ala malo au mambahen hata pamukka na ganjang dohot ilustrasi na mantap. Alai gabe holan tu au do fokus ni nasida, dang tu Bibel manang tu Jahowa.” Ujungna disadari si Timothy ma ikkon diuba ibana do carana mangajari asa unang holan tu ibana be fokus ni akka dongan. (Poda 27:21) Aha ma hasilna? Didok ibana, “Saonari godang do dongan na mandok akka jamita na hupasahat boi mangurupi nasida mangadopi masalah, asa unang menyerah, jala mambahen nasida lam jonok tu Jahowa. Umlas do rohakku saonari alani hata ni nasida i dibandingkon tu pujian ni nasida piga-piga taon naung salpu.”
25-31 AGUSTUS
ARTA NA ARGA NA ADONG DI BIBEL PODA 28
Beda ni Halak na Jahat Dohot Halak na Tigor Marroha
w93 15/5 26 ¶2
Mangoloi Jahowa sian Nasa Roha
“ANGGO halak na tigor marroha, barani do songon singa.” (Poda 28:1) Diulahon halak na tigor marroha do na diparsiajari nasida di ngoluna, jala pos do roha ni nasida tu Hata ni Debata. Alani i ma gabe barani nasida torus melayani Jahowa manang aha pe na masa.
it-2 396 ¶1
Bijak
Akka halak na so olo mangihutton hata ni Debata. Dang parduli be halak na jahat tu hata ni Debata tikki naeng mambahen keputusan dohot rencana. (Job 34:27) Ala holan na jahat nama di rohana, gabe dang diboto ibana be nungnga sala na diulahon ibana. Jala dang diboto ibana be dia na sittong dohot na sala. (Ps 36:1-4) Nang pe didok ibana disomba ibana Debata, alai umlomo do rohana mangihutton prinsip ni jolma. (Jes 29:13, 14) Tikki diulahon ibana ulaon ni halak na so umboto ila, marsidalian ma ibana mandok holan “meam-meam” do i. (Poda 10:23) Sala do cara marpikkirna, dang marbisuk, oto, bahkan didok rohana dang diida Debata jala dang parduli Debata tu sude na diulahon ibana. (Ps 94:4-10; Jes 29:15, 16; Jer 10:21) Molo dibereng pangalahona, hira na didok ibana ma, “Dang adong Jahowa.” (Ps 14:1-3) Ala dang diihutton ibana be prinsip ni Debata, gabe dang boi diboto ibana dia na sittong, dang boi be tiur jala ganjang ibana marpikkir, jala dang boi be dibahen ibana keputusan na denggan.—Poda 28:5.
it-1 1052 ¶2
Setia
Asa boi setia songon nasida, dang boi sasahalak holan mangandalhon dirina sandiri. Alai ikkon togu do haporseaonna jala ikkon marpos ni roha do tu Jahowa. (Ps 25:21) Marjanji do Jahowa na lao gabe “perisai” dohot “benteng” tu akka halak na setia. (Poda 2:6-8; 10:29; Ps 41:12) Ala mambahen las roha ni Jahowa do na rumikkot di halak na setia, gabe denggan jala tigor ma ngolu ni nasida. Jala boi do dapot ni nasida haluaon na sian Debata. (Ps 26:1-3; Poda 11:5; 28:18) Alai godang do halak na setia na marsitaonon, bahkan adong na sampe mate alani halak na jahat. Nang pe songon i marjanji do Jahowa, diparrohahon Ibana do ngolu ni halak na so marsala, na lao hot do parbagianan ni nasida saleleng ni lelengna, dame ngolu ni nasida di ari na naeng ro, jala dapotna akka na denggan. (Job 9:20-22; Ps 37:18, 19, 37; 84:11; Poda 28:10) Songon na masa tu si Job, dang alani artana sasahalak diargai jala dipasangap, alai ala setia do ibana tu Debata. (Poda 19:1; 28:6) Maruntung do dakdanak molo setia natua-tuana. (Poda 20:7) Alana dapot ni nasida warisan na istimewa i ma sitiruon sian natua-tuana i. Asing ni godang do dapotna manfaat ala diargai akka halak natua-tuana jala ditanda halak natua-tuana i halak na setia.
Arta na Adong di Bibel
Toktong ma Jaga asa Boi Menolak Godaan
Jadi aha do na ikkon taulahon lao mangatasi hagaleonta? Taihutton ma nasehat ni Jesus, “Toktong ma dungo.” Adong do ra tikkina tahilala hira naung marhasil hita mangatasi hagaleonta. Alai nang pe songon i, toktong ma tahindari akka situasi na boi mambahen hita targoda. (1 Kor. 10:12) Toktong ma taulahon akka cara na tabahen saleleng on lao mangatasi hagaleonta. Poda 28:14 mandok, “Marlas ni roha ma halak na sai manjaga pangalahona.”—2 Ptr. 3:14.