Zeremin

47 Kwlaa naan Faraɔn w’a fa Gaza’n, Filistifuɛ’m+ be su ndɛ nga Zoova kan kleli i nuan ijɔfuɛ Zeremin’n yɛ. 2 Zoova waan yoo:

“Amun tie, nzue’m be fin nglo lɔ lika’n nun be ba.

Bé wá káci nzue dan kpa kun.

Yɛ ɔ́ dí lika wunmuan’n, ɔ́ dí i su ninnge’m be kwlaa.

I klɔ-o, i klɔ sran-o, ɔ́ dí be kwlaa.

Sran’m bé kpán lelele,

yɛ nvle’n nunfuɛ’m bé sún.

 3 Kɛ bé wá tí i nnɛn kpanngɔ nga be su wanndi’n be ngan’n,

ɔ nin i kakaklolo’m be tɛlɛ’n

ɔ nin be ja’m be tɛlɛ’n,

siɛ’m be su kpɛman be ɲin nianman be mma’m be lɔ bɔbɔ naan se kɛ bé dé be,

afin be sa sin búbú be dan.

 4 Afin cɛn ng’ɔ su ba lɛ’n, bé wá núnnún Filistifuɛ’m be kwlaa.+

Bé núnnún Tir+ nin Sidɔn+ nin be nga be suan be bo’n be sekeseke.

Afin Zoova núnnún Filistifuɛ’m be onga

nga be ka Kaftɔɔ*+ m’ɔ o nzue’n i afiɛn lɔ’n.

 5 Gaza i ti’n wá kpá.*

B’a yo maan Askalɔn w’a muɛn i nuan.+

?Wɔ mɔ a ti be kongo’n i onga ng’ɔ ka’n,

cɛn onin ko naan w’a yaci ɔ wun kannin bobolɛ?+

 6 ?Ee, Zoova i tokofi,+

cɛn onin ko naan w’a tran diin?

Sa ɔ sin ɔ bua’n nun.

Lo wunmiɛn naan tran diin.

 7 Zoova yɛ ɔ seli i kɛ ɔ yo sɔ-ɔ.

?Ɔ maan ɔ́ yó sɛ naan w’a tran diin?

Askalɔn nin jenvie nuan lɛ lika’n+

i sacilɛ ti yɛ ɔ sunmɛnnin i-ɔ.”