MMLA’N

1 I nun mɔ Izraɛlifuɛ’m be o Zurdɛn asa’n su lɔ aawlɛ flɛnnɛn’n nun’n, lika kpɛtɛkplɛɛ ng’ɔ o Sifi ɲrun lɛ’n, Paran nin Tofɛli nin Laban nin Azerɔtu nin Dizaabu be afiɛn’n nun’n, Moizi kannin ndɛ nga mun kleli be. 2 Kɛ a fɛ i Orɛbu lɛ mɔ a fa Seii Oka’n i atin’n, a nanti cɛn ba blu-nin-kun (11) naan w’a ju Kadɛsi-Baanea.+ 3 Afuɛ ablanan (40) su’n,*+ i anglo blu-nin-kun (11) su’n, i cɛn ba klikli’n nun’n, ndɛ kwlaa nga Zoova seli Moizi kɛ ɔ kan kle Izraɛlifuɛ mun’n, ɔ kan kleli be. 4 Kɛ ɔ́ yó sɔ’n, nn w’a kwla Siɔn+ m’ɔ ti Amɔɔfuɛ’m be famiɛn m’ɔ tran Ɛsbɔn’n, ɔ nin Ɔgu+ m’ɔ ti Basan famiɛn m’ɔ tran Astarɔti’n, Edrei+ lɔ. 5 I nun mɔ be o Moabu mɛn’n nun Zurdɛn asa’n su lɔ’n, Moizi boli Mmla’n+ i nun yiyilɛ bo. Ɔ seli kɛ:

6 “Zoova m’ɔ ti e Ɲanmiɛn’n kannin ndɛ kleli e Orɛbu lɔ. Ɔ seli kɛ: ‘Nán andɛ sa yɛ amun tran okaoka nga’m be nun wa-ɔ.+ 7 Siɛn’n, amun wɔ Amɔɔfuɛ’m+ be mɛn m’ɔ ti okaoka lika’n nun, ɔ nin lika kwlaa nga be mantan be lɛ’n. Yɛle kɛ Araba,+ nin okaoka lika’m be nun, nin Sefela nin Negɛbu ɔ nin lika ng’ɔ o jenvie nuan lɔ’n.+ Lika kwlaa sɔ’n ti Kanaanfuɛ’m be mɛn. Amun wɔ lele ju Liban*+ nin Efrati m’ɔ ti nzue dan’n i nuan lɔ.+ 8 Amun nian, m’an fa mɛn’n m’an man amun. Amun wɔ lɔ naan amun ko fa. Zoova tali amun si Abraamun nin Izaaki+ nin Zakɔbu+ be nda kɛ ɔ́ fá mɛn sɔ’n mán be nin be osu’n nunfuɛ mun.’+

9 “Blɛ sɔ’n nun’n, n seli amun kɛ: ‘Min kunngba n kwlá suanman amun bo.+ 10 Zoova m’ɔ ti amun Ɲanmiɛn’n yoli maan amun a trɛ. Andɛ’n, amun a sɔn kpanngban kpa kɛ ɲanmiɛn su lɔ nzraama mun sa.+ 11 Maan Zoova m’ɔ ti amun si’m be Ɲanmiɛn’n, ɔ yo maan amun trɛ+ yɛ amun sɔn tra nga su lele kpɛ akpi (1.000). Yɛ maan ɔ yra amun su kɛ ng’ɔ kan kleli amun’n sa.+ 12 ?Ń yó sɛ naan m’an suan amun bɔbɔ nin sa kwlaa ng’ɔ o amun su’n, be bo? ?Ń yó sɛ naan amun a yaci ndɛnnganndɛnngan mun?+ 13 Amun nian amun akpasua’m be nun naan amun fa yasua nga be ti ngwlɛlɛfuɛ, nin akunndanfuɛ mɔ be si sa’n, naan n fa be n sie amun su kpɛn.’+ 14 Kpɛkun amun tɛli min su kɛ: ‘Like nga a seli e kɛ e yo’n ti kpa.’ 15 I sɔ’n ti’n, n fali amun akpasua’m be su kpɛn nga be ti ngwlɛlɛfuɛ nin akunndanfuɛ mɔ be si sa’n, naan m’an fa be m’an sie amun su. Wie’m be ti sran akpi su kpɛn, wie’m be ti sran ya su kpɛn, wie’m be ti sran ablenun su kpɛn, wie’m be ti sran blu su kpɛn, yɛ wie’m be ti amun akpasua nunfuɛ’m be ukafuɛ.+

16 “Blɛ sɔ’n nun’n, n seli amun jɔlɛ difuɛ’m be kɛ: ‘Kɛ amun nvle nunfuɛ’m be koko be afiɛn ndɛ ng’ɔ tɔ’n kle amun’n, sɛ ɔ ti Izraɛlifuɛ nɲɔn be afiɛn ndɛ-o, annzɛ Izraɛlifuɛ kun nin aofuɛ kun m’ɔ tran amun wun lɛ’n be afiɛn ndɛ-o,+ amun di ndɛ’n kɛ ɔ nin i fata’n sa.+ 17 Nán amun di ndɛ kwlɛ.+ Amun tie sran ng’ɔ leman ɲrun’n i ndɛ’n kɛ nga amun fa tie sran ng’ɔ le ɲrun’n i liɛ’n sa.+ Nán amun yo srongble,+ afin jɔlɛ dilɛ’n ti Ɲanmiɛn liɛ.+ Yɛ sɛ ndɛ kun tra amun kpɛn’n, amun kan kle min. Ń síe min su amun nuan bo.’+ 18 Kpɛkun ń klé amun like kwlaa ng’ɔ fata kɛ amun yo’n.

19 “I sin’n, e jasoli Orɛbu lɛ. Kpɛkun kɛ é kɔ́ Amɔɔfuɛ’m+ be mɛn m’ɔ ti okaoka lika’n nun’n, e sinnin aawlɛ flɛnnɛn sroesroe+ nga amun ɲinma tɛli i lɛ’n nun. Afin i sɔ yɛ Zoova m’ɔ ti e Ɲanmiɛn’n seli e kɛ e yo-ɔ. E ɔli lele e juli Kadɛsi-Baanea.+ 20 Kpɛkun n seli amun kɛ: ‘Amun a ju Amɔɔfuɛ’m be mɛn m’ɔ ti okaoka lika’n nun. Lika sɔ’n yɛ Zoova m’ɔ ti e Ɲanmiɛn’n su wa fa man e-ɔ. 21 Amun nian! Zoova m’ɔ ti amun Ɲanmiɛn’n w’a fa mɛn’n w’a man amun. Amun wɔ naan amun ko fa mɛn’n, kɛ nga Zoova m’ɔ ti amun si’m be Ɲanmiɛn’n kan kleli amun’n sa.+ Nán srɛ kun amun, nán amun wun usu amun.’

22 “Sanngɛ amun kwlaa amun wa toli min. Yɛ amun seli kɛ: ‘Maan e sunman sran naan be ko kpla mɛn’n be nian. I liɛ’n, bé kán atin ng’ɔ fata kɛ e fa naan y’a ju lɔ’n, ɔ nin klɔ nga é wá tó be’n, be su ndɛ klé e.’+ 23 Ndɛ nga amun kannin’n yoli min fɛ. Ɔ maan n fali sran blu-nin-nɲɔn (12), akpasua kun nun sran kun, akpasua kun nun sran kun.+ 24 I sɔfuɛ’m be ɔli okaoka lika’m+ be nun lɔ. Be juli Ɛskɔlu Kongo’n* nun lɔ, kpɛkun be kplali lika’n be niannin. 25 Be suali lɔ waka mma wie mun be fa blɛli e. Yɛ be seli e kɛ: ‘Mɛn nga Zoova m’ɔ ti e Ɲanmiɛn’n su wa fa man e’n, nanwlɛ, ɔ ti kpa-o.’+ 26 Ɔ nin i sɔ ngba’n, amun waan amun kɔman. Amun a faman ndɛ nga Zoova m’ɔ ti amun Ɲanmiɛn’n kannin’n su.+ 27 Amun ijɔli amun konviabo amun tannin sua’m be nun. Amun seli kɛ: ‘Zoova kpɔ e, i ti yɛ ɔ fa e Ezipti mɛn’n nun lɔ bali-ɔ. I waan ɔ́ fá e wlá Amɔɔfuɛ’m be sa nun naan be nunnun e sekeseke. 28 ?Lika benin nun yɛ e su kɔ-ɔ? E niaan’m be yoli maan e sa sin bubuli e,+ afin be seli kɛ: “Be nga be tran klɔ sɔ’m be su’n, be le wunmiɛn dan yɛ be ti kpasakaa kpa tra e. Be klɔ’m be ti dandan, yɛ talɛ nga be fa sisili be wun’n, be ti dandan kpa, be ju ɲanmiɛn su lɔ.+ Asa ekun’n, e wunnin Anakifuɛ’m+ be mma mun lɔ.”’

29 “Yɛ n seli amun kɛ: ‘Nán amun wun usu amun tututu, yɛ nán amun sro be.+ 30 Zoova m’ɔ ti amun Ɲanmiɛn’n ɔ́ dún mmua amun ɲrun, yɛ ɔ́ kún amun ti alɛ+ kɛ ng’ɔ fa yoli i Ezipti lɔ mɔ amun ɲinma tali nun jrɛiin’n sa.+ 31 Asa ekun’n, amun wunnin kɛ aawlɛ flɛnnɛn’n nun’n, Zoova m’ɔ ti amun Ɲanmiɛn’n lololi amun kɛ siɛ kun fa lolo i wa’n sa. Ɔ yoli amun sɔ lika kwlaa lele amun fa juli lika nga nun wa.’ 32 Ɔ nin i sɔ ngba’n, amun a lafiman Zoova m’ɔ ti amun Ɲanmiɛn’n i su.+ 33 Kusu nn atin’n su’n, i yɛ ɔ dun mmua amun ɲrun naan ɔ́ kúnndɛ lika nga amún bó amun nanmue’n niɔn. Kɔnguɛ’n, sin yɛ ɔ fa yi i wun nglo-ɔ. Wia nun’n, ɲanmiɛn ble’n yɛ ɔ fa yi i wun nglo-ɔ. Ɔ yoli sɔ naan ɔ́ klé amun atin nga amún sín nun’n.+

34 “Blɛ kwlaa sɔ nun’n, Zoova tili ndɛ nga amun kannin’n. Nanwlɛ, i sɔ’n yoli i ya dan naan w’a ta nda.+ Ɔ seli kɛ: 35 ‘Blɛ nga nunfuɛ’m be klun yo wi. Be nun wie fi su wunman lika klanman nga n tali nda kɛ ń fá mán amun si mun’n.+ 36 Saan Kalɛbu m’ɔ ti Zefine i wa’n yɛ i ɲinma tá mɛn sɔ’n niɔn. Ń fá mɛn nga i ja tiali nun’n, ń mɛ́n i bɔbɔ nin i mma mun. Afin ɔ tuli i klun fali Zoova i ndɛ’n su.+ 37 (Amun dunman nun ti’n, Zoova fali min wun ya wie. Ɔ seli kɛ: “Ɔ kusu a su juman lɔ wie.+ 38 Nɛn i wa Zozie m’ɔ ti ɔ sufuɛ’n,*+ i yɛ ɔ́ jú mɛn sɔ’n nun lɔ-ɔ.+ I sɔ’n ti’n, wlɛ i fanngan kpa,*+ afin i yɛ ɔ́ dún Izraɛlifuɛ’m be ɲrun naan b’a fa mɛn’n niɔn.”) 39 Asa ekun’n, amun wa nga amun seli kɛ bé wá káci kɛ like nga alɛ kunfuɛ’m be ɲɛn i alɛ nun’n sa’n+ ɔ nin amun wa nga be siman sa ng’ɔ ti tɛ nin ng’ɔ ti kpa’n, be yɛ bé wlú mɛn sɔ’n nun-ɔn. Be yɛ ń fá mɛn sɔ’n ń mán be-ɔ.+ 40 Sanngɛ amun liɛ’n, amun sa amun sin, amun fa Jenvie Ɔkwlɛ’n+ i atin’n naan amun jaso aawlɛ flɛnnɛn’n nun.’

41 “Yɛ amun seli min kɛ: ‘E fɔnnin Zoova wun. Siɛn’n, é kɔ́, é kó kún alɛ kɛ nga Zoova m’ɔ ti e Ɲanmiɛn’n seli e kɛ e yo’n sa!’ Ɔ maan amun tinuntinun amun fali amun alɛ ninnge mun. Amun buli i kɛ okaoka lika’n nun lɔ kɔlɛ’n ti pɔpɔ.+ 42 Sanngɛ Zoova seli min kɛ: ‘Se be kɛ: “Nán amun wɔ, nán amun ko kun alɛ, afin n nunman amun sin.+ Sɛ amun kɔ’n, amun kpɔfuɛ’m bé kwlá amun.”’ 43 N kannin ndɛ n kleli amun, sanngɛ amun a faman su. I kpa bɔbɔ’n, like nga Zoova waan nán amun yo’n, amun yoli. Kpɛkun amun ɲin kekle’n ti’n, amun kunndɛli kɛ amún kɔ́ okaoka lika’n nun lɔ. 44 I sɔ’n ti’n, Amɔɔfuɛ nga be tran okaoka lika sɔ’n nun’n, be nin amun wa yiali nun. Be wanndi fuannin amun kɛ zɔgɔda fa fuan sran’n sa. Be fuannin amun Seii lɔ lele fa juli Ɔɔma. 45 Kɛ ɔ yoli sɔ’n, amun sali amun sin, kpɛkun amun sun kleli Zoova. Sanngɛ Zoova w’a nianman amun lɔ naan se kɛ ɔ́ wún amun. 46 I sɔ’n ti yɛ amun cɛli Kadɛsi lɔ’n niɔn.

2 “I sin’n, e fali Jenvie Ɔkwlɛ’n i atin’n. Kpɛkun e sali e sin aawlɛ flɛnnɛn’n nun, kɛ nga Zoova kan kleli min’n sa.+ E nantili cɛn ba kpanngban kpa Seii Oka’n i wun lɛ. 2 Kasiɛn su’n, Zoova seli min kɛ: 3 ‘Amun a cɛ oka nga i wun wa. Ɔ maan amun bli wɔ nglo lɔ lika’n nun. 4 Se sran’m be kɛ: “Amun su wa sin amun niaan mun, yɛle kɛ Ezau i osu’n nunfuɛ+ mɔ be tran Seii’n,+ be mɛn’n i tiwa. Amun ti’n, srɛ́ kún be.+ I sɔ’n ti’n, amun nian amun wun kpa. 5 Nán amun fa alɛ wla be sin.* Afin n su faman be mɛn’n i lika fi n manman amun. N su faman be ja takawlɛ kun bɔbɔ n manman amun. Afin Seii Oka’n ti Ezau liɛ, n fa mɛnnin i.+ 6 Sɛ amun di be aliɛ’n, amun tuɛ i kalɛ. Sɛ amun nɔn be nzue’n, amun tuɛ i kalɛ.+ 7 Afin Zoova m’ɔ ti amun Ɲanmiɛn’n yrali amun su like kwlaa nga amun yoli’n nun. Kɛ amún nánti aawlɛ flɛnnɛn dan nga nun’n, ɔ niannin amun su. Afuɛ ablanan (40) nga amun dili’n nun’n, Zoova m’ɔ ti amun Ɲanmiɛn’n jrannin amun sin. Ɔ maan amun a mianman like fi wun.”’+ 8 I sɔ’n ti’n, e sinnin e niaan mun, yɛle kɛ Ezau i osu’n nunfuɛ+ mɔ be tran Seii’n, be wun lɛ. Y’a faman atin ng’ɔ kɔ Araba’n nin Elati nin Ɛziɔn-Gebɛɛ+ be asa liɛ’n su’n.

“I sin’n, e blili, kpɛkun e ko sinnin Moabu aawlɛ flɛnnɛn’n i atin’n su.+ 9 Yɛ Zoova seli min kɛ: ‘Nán amun fa ndɛnngan annzɛ alɛ wla Moabufuɛ’m be sin. N su faman be mɛn’n i lika fi n manman amun. Afin n fali Aa n mannin Lɔtu i osu’n nunfuɛ mun.+ 10 (Laa’n, Emimun mun+ yɛ be tran lika sɔ’n nun-ɔn. Be nvle’n ti dan. Be sɔnnin kpa, yɛ be ti kpasakaa kɛ Anakifuɛ mun sa. 11 Asa ekun’n, kɛ mɔ Refafuɛ’m+ be ti kɛ Anakifuɛ mun+ sa’n ti’n, Moabufuɛ’m be flɛ be kɛ Emimun mun. 12 Laa nun’n, Ɔɔfuɛ mun+ yɛ be tran Seii-ɔ. Sanngɛ Ezau i osu’n nunfuɛ’m be deli lika sɔ’n be sa nun. Kpɛkun be nunnunnin be naan b’a tran be osu’n nun lɛ.+ Sa kunngba sɔ’n yɛ Izraɛlifuɛ’m bé wá yó i mɛn nga Zoova wá fá mán be sakpasakpa’n i nun lɔ-ɔ.) 13 Siɛn’n, amun kpɛ Zerɛdi Kongo’n.’* I sɔ’n ti’n, e kpɛli Zerɛdi Kongo’n.*+ 14 Kɛ e fɛli i Kadɛsi-Baanea lɔ lele mɔ é fá kpɛ́ Zerɛdi Kongo’n,* e nantili afuɛ ablasan-nin-mɔcuɛ (38). Kɛ ɔ́ jú sɔ’n, nn e blɛ su sran nga be kun alɛ’n, be ngba b’a wie wu kɛ nga Zoova kan kleli be’n sa.+ 15 Zoova fɛli i sa’n tinndinnin be wun naan ɔ́ núnnún be e afiɛn. Ɔ yoli sɔ lele be wuli sekeseke.+

16 “Kɛ nvle’n nun sran nga be kwla kun alɛ’n, be kwlaa be wuli’n,+ 17 Zoova kan ndɛ kleli min ekun. Ɔ seli min kɛ: 18 ‘Andɛ’n, amún wá sín Moabufuɛ’m be lika’n i tiwa, yɛle kɛ Aa. 19 Sɛ amun to Amɔnfuɛ mun’n, nán amun man be ndɛnngan, nán amun klɔklɔ be. N su faman Amɔnfuɛ’m be mɛn’n i lika fi n manman amun. Afin ɔ ti Lɔtu i osu’n nunfuɛ’m be liɛ. N fa mannin be.+ 20 Sran’m be waan lika sɔ’n ti Refafuɛ’m be liɛ.+ (Laa nun’n, Refafuɛ mun yɛ be tran lɛ-ɔ. Yɛ Amɔnfuɛ’m be flɛ be kɛ Zamzumimun. 21 Be ti nvle dan. Be sɔnnin kpa, yɛ be ti kpasakaa kɛ Anakifuɛ mun sa.+ Sanngɛ Zoova nunnunnin be mannin Amɔnfuɛ mun. Ɔ maan Amɔnfuɛ’m be kannin be bo, kpɛkun be trannin be osu’n nun lɛ. 22 I sɔ yɛ ɔ yo mannin Ezau i osu’n nunfuɛ mɔ be tran Seii’n+ mun-ɔn. Ɔ nunnunnin Ɔɔfuɛ mun+ mannin be. Ɔ maan be deli be lika’n kpɛkun be trannin be osu’n nun lɛ. Andɛ nin andɛ’n, be te o lɛ. 23 Avimun’m be liɛ’n, be trannin Gaza+ asa’n su lɔ lele naan Kaftɔɔfuɛ+ mɔ be fin Kaftɔɔ’n,* b’a nunnun be. Kpɛkun be trannin be osu’n nun lɛ.)

24 “‘Amun jaso naan amun kpɛ Aanɔn Kongo’n.*+ Amun nian, m’an fa Siɔn+ m’ɔ ti Ɛsbɔn lɔ famiɛn’n, m’an wla amun sa nun. Ɔ ti Amɔɔfuɛ. Amun fɛ i mɛn’n, yɛ amun fa alɛ wlɛ i sin. 25 Kɛ ɔ fin andɛ’n, ń má yó maan nvle kwlaa nga be o ɲanmiɛn’n bo wa’n mɔ bé tí amun su ndɛ’n, bé sró amun dan. Be wawɛ tɔ́ blo, yɛ bé úsu sa tututu* amun ti.’+

26 “I nun mɔ e o Kedemɔti+ aawlɛ flɛnnɛn’n nun’n, n sunmannin sran Siɔn m’ɔ ti Ɛsbɔn lɔ famiɛn’n i sin. N ko seli i wɛtɛɛ su kɛ:+ 27 ‘Maan n sin ɔ mɛn’n nun. N su kpaciman fama su annzɛ bɛ su. Atin’n su trelele yɛ ń sín-ɔn.+ 28 Aliɛ nga a yo i atɛ min sa nun’n, yɛ ń dí-ɔ. Yɛ nzue nga a yo i atɛ min sa nun’n, yɛ ń nɔ́n-ɔn. Ɔ li, maan n nanti n sin ɔ mɛn’n nun. 29 (I sɔ yɛ Ezau i osu’n nunfuɛ mɔ be tran Seii’n ɔ nin Moabufuɛ mɔ be tran Aa’n, be yo mannin min-ɔn.) Ń kɔ́ lele ń kó kpɛ́ Zurdɛn’n naan m’an wlu mɛn nga Zoova m’ɔ ti e Ɲanmiɛn’n su fa man e’n nun.’ 30 Sanngɛ Famiɛn Siɔn m’ɔ fin Ɛsbɔn’n w’a manman e atin. Afin Zoova yacili i lɛ naan ɔ yo ɲin kekle,+ yɛ i awlɛn’n kete naan ɔ́ fɛ́ i wlá amun sa nun. I sɔ kusu yɛ ɔ yoli-ɔ.+

31 “Yɛ Zoova seli min kɛ: ‘Nian, m’an fa Siɔn nin i mɛn’n m’an wla ɔ sa nun. Bo i mɛn’n i falɛ bo.’+ 32 Kɛ Siɔn nin i sran’m be kwlaa be bali naan be nin e kún Zaazi lɔ’n,+ 33 Zoova m’ɔ ti e Ɲanmiɛn’n fɛli i wlali e sa nun. Ɔ maan e kwlɛli i bɔbɔ nin i mma mun nin i sran’m be kwlaa. 34 Blɛ sɔ nun’n, e fɛli i klɔ’m be ngba, yɛ e sacili be sekeseke. I yasua-o, i bla-o, i bakan-o, e kunnin be ngba. Y’a yaciman sran ba kun sa lɛ.+ 35 Klɔ nga e kwlali be’n, be su nnɛn mun nin be su ninnge kpakpa’m be ngunmin yɛ e fali-ɔ. 36 Kɛ ɔ fɛ i Aroɛɛ+ m’ɔ o Aanɔn Kongo’n* i nuan lɛ (kongo’n nun lɔ klɔ’n wo nun wie) lele m’ɔ́ fá jú Galaadi’n, klɔ ba kun sa w’a kwlá jranman e ɲrun. Zoova m’ɔ ti e Ɲanmiɛn’n fali be kwlaa wlali e sa nun.+ 37 Sanngɛ Amɔnfuɛ’m+ be mɛn’n, nin Zabɔku+ Kongo’n,* nin klɔ nga be o okaoka lika’m be nun lɔ’n, ɔ nin lika kwlaa nga Zoova m’ɔ ti e Ɲanmiɛn’n seli e kɛ nán maan e ja tia lɔ’n, amun a wunngeman be wun lɔ.

3 “I sin’n, e blili e ko fali Basan Atin’n. Yɛ Ɔgu m’ɔ ti Basan famiɛn’n nin i sran’m be kwlaa be bali naan be nin e kún alɛ Edrei lɛ.+ 2 Zoova seli min kɛ: ‘Nán sro i, afin ń má fɛ́ i bɔbɔ nin i sran’m be ngba nin i mɛn’n ń wlá ɔ sa nun. Ɔ maan like nga a fa yoli Siɔn m’ɔ ti Amɔɔfuɛ’m be famiɛn m’ɔ tran Ɛsbɔn’n, i kunngba’n yɛ á fá yó i-ɔ.’ 3 Ɔ maan Zoova m’ɔ ti e Ɲanmiɛn’n fali Ɔgu m’ɔ ti Basan famiɛn’n nin i sran’m be ngba wlali e sa nun. E kunnin be wunmuan’n, i sran’m be nun kun sa w’a kaman lɛ. 4 E fɛli i klɔ’m be kwlakwla. Y’a yaciman ba kun sa lɛ. Aagɔbu asa wunmuan’n su lɔ klɔ mun, yɛle kɛ Ɔgu i famiɛn diwlɛ ng’ɔ o Basan+ lɔ’n i su klɔ nga e fali be’n, be kwlaa be ti ablesiɛn (60). 5 Be sisili klɔ sɔ’m be wun, be talɛ’m be ti nglonglo kpa, be le anuan nin ninnge nga be fa tanndan anuan’m be sin’n. Asa ekun’n, klɔ nga b’a sisiman be wun mɔ e fali be’n, be diman be yalɛ. 6 Like nga e fa yoli Siɔn m’ɔ ti Ɛsbɔn lɔ famiɛn’n yɛ e fa yoli be-ɔ. E sacili be klɔ’m be kwlaa.+ I yasua-o, i bla-o, i bakan-o, e kunnin be ngba.+ 7 Sanngɛ e fali be nnɛn mun nin be klɔ’m be su ninnge kpakpa’m be ngba.

8 “Blɛ sɔ’n nun’n, e fali Amɔɔfuɛ’m be famiɛn nɲɔn+ nga be o Zurdɛn asa’n su lɔ’n, be lika m’ɔ fɛ i Aanɔn Kongo’n* nun lele fa ju Ɛrmɔn Oka’n su lɔ’n+ 9 (Sidɔnfuɛ’m be flɛ oka sɔ’n kɛ Siriɔn, yɛ Amɔɔfuɛ’m be flɛ i kɛ Sɛnii), 10 nin klɔ nga be o lika kpɛtɛkplɛɛ’n nun’n be kwlaa, nin Galaadi lika wunmuan’n nin Basan wunmuan’n, nin Saleka lele fa ju Edrei.+ Basan asa’n su klɔ sɔ’m be o Ɔgu i famiɛn diwlɛ’n nun. 11 Refafuɛ’m be osu’n nun sran ng’ɔ kali’n yɛle Ɔgu m’ɔ ti Basan famiɛn’n. Li nga be fɛli i saka’n sieli su’n,* ɔ ti blalɛ.* Ɔ te o Amɔnfuɛ’m be klɔ nga be flɛ i kɛ Raba’n su lɔ. Li sɔ’n i tɛnndɛn nun’n ti kude ngwlan,* yɛ i tɛtrɛ nun’n ti kude nnan.* Kude nga be fa sunnzun like titi’n yɛ be fa sunnzunnin-ɔn. 12 Blɛ sɔ’n nun’n, e fali lika sɔ’n. Ɔ fɛ i Aroɛɛ+ m’ɔ o Aanɔn Kongo’n* i wun lɛ’n ɔ nin Galaadi okaoka lika’n i bue kun. Yɛ n fɛli i su klɔ mun n mannin Ribɛnin i osu’n nunfuɛ mun nin Gadi i osu’n nunfuɛ mun.+ 13 Yɛ n fali Galaadi lika’n i onga’n ɔ nin Ɔgu i famiɛn diwlɛ’n, yɛle kɛ Basan wunmuan’n n mannin Manase akpasua’n i bue kun nunfuɛ mun.+ Be flɛ Aagɔbu lika wunmuan m’ɔ o Basan asa’n su’n kɛ Refafuɛ’m be lika.

14 “Zairi+ m’ɔ ti Manase i wa’n fali Aagɔbu asa wunmuan’n,+ m’ɔ o Basan asa’n su’n lele fa juli Gesurifuɛ mun nin Maakatifuɛ’m+ be mɛn’n i tiwa lɔ. Ɔ fɛli i bɔbɔ dunman’n, yɛle kɛ Avɔti-Zairi,*+ sieli i Basan asa’n su klɔ sɔ’m be su. Andɛ nin andɛ’n, dunman sɔ’n te o be su. 15 Yɛ n fali Galaadi n mannin Makii.+ 16 Ribɛnin i osu’n nunfuɛ mun nin Gadi i osu’n nunfuɛ’m+ be liɛ’n, n fali lika ng’ɔ fɛ i Galaadi lele fa ju Aanɔn Kongo’n* nun’n n mannin be. (Kongo’n i afiɛn’n nun yɛ be lika’n i nuan su’n wo-ɔ.) Ɔ kɔ lele ju Zabɔku, yɛle kɛ kongo ng’ɔ o Amɔnfuɛ’m be lika’n i nuan su’n, 17 ɔ nin Araba’n nin Zurdɛn’n nin i nuan su’n. Yɛ ɔ fɛ i Kinerɛti lele fa ju Araba Jenvie’n mɔ yɛle Jenvie ng’ɔ ti Njin Nzue Klakla’n i su lɔ. Jenvie sɔ’n wo Pisga oka’n i bo lɛ, wia afiliɛ lɔ.+

18 “Yɛ n seli amun kɛ: ‘Zoova m’ɔ ti amun Ɲanmiɛn’n fali lika nga mannin amun naan amun tran nun. Maan amun nun yasua’m be fa be alɛ ninnge mun naan be dun mmua amun niaan Izraɛlifuɛ’m be ɲrun naan be kpɛ nzue’n.+ 19 Maan amun yi mun nin amun mma mun ɔ nin amun nnɛn mun (n si kpa kɛ amun le nnɛn kpanngban kpa) be ngunmin be ka klɔ nga n fa mannin amun’n be su 20 lele saan Zoova w’a man amun niaan mun alaje kɛ nga ɔ mannin amun alaje’n sa. Ɔ fata kɛ be kusu be fa mɛn nga Zoova m’ɔ ti amun Ɲanmiɛn’n wá fá mán be Zurdɛn’n i sin lɔ’n. I sin’n, amun sa amun sin lika nga n fa mannin amun’n be nun naan amun tran nun.’+

21 “Blɛ sɔ’n nun’n, n seli Zozie kɛ:+ ‘Ɔ ɲinma tali like nga Zoova m’ɔ ti amun Ɲanmiɛn’n fa yoli famiɛn nɲɔn nga mun’n. Sa kunngba sɔ’n yɛ Zoova wá fá yó Zurdɛn’n i sin lɔ famiɛn diwlɛ nga á tó be’n be kwlaa-ɔ.+ 22 Nán amun sro be, afin Zoova m’ɔ ti amun Ɲanmiɛn’n yɛ ɔ kun amun ti alɛ-ɔ.’+

23 “Blɛ sɔ’n nun’n, n kpatali Zoova. N seli kɛ: 24 ‘Min Min Zoova, wɔ mɔ a Sie Like Kwlakwla’n, a kleli ɔ sufuɛ’n kɛ a ti kpli yɛ a le wunmiɛn dan.+ ?Nglo lɔ nin asiɛ’n su wa’n, ɲanmiɛn benin yɛ ɔ kwla yo sa dandan nga a yoli be’n wie-ɔ?+ 25 Yaci, maan n kpɛ Zurdɛn’n naan n wun lika klanman ng’ɔ o i sin lɔ’n. Maan n wun lika klanman sɔ m’ɔ ti okaoka lika’n nin Liban’n.’+ 26 Sanngɛ amun dunman nun ti’n, min wun ndɛ te o Zoova i klun.+ Ɔ maan w’a kloman kɛ ɔ́ tíe min nuan ndɛ’n. Zoova seli min kɛ: ‘W’a yo kpa sɔ! Nán kɛn i sɔ ndɛ’n kle min kun. 27 Fu Pisga’n i ti su lɔ+ naan nian wia atɔliɛ lɔ, nin nglo lɔ, nin ngua lɔ, nin wia afiliɛ lɔ. Niɛn i kpa, afin a su kpɛman Zurdɛn nga.+ 28 Sie Zozie i kpɛn.+ Wlɛ i fanngan, wlɛ i yakpa afin i yɛ ɔ́ dún mmua sran nga’m be ɲrun-ɔn. Ɔ́ fá be kpɛ́ Zurdɛn’n.+ I yɛ ɔ́ yó maan bé fá mɛn nga á wá wún i’n niɔn.’ 29 Kɛ sa kwlaa sɔ’m bé jú’n, nn e o kongo ng’ɔ o Bɛti-Peɔɔ’n i ɲrun lɛ’n nun.+

4 “Izraɛlifuɛ mun, afɔtuɛ nin mmla fanunfanun nga n su fa man amun yɛ’n, amun sie amun su be tie naan amun nanti be su. Sɛ amun nanti be su’n, amún ɲán nguan+ yɛ amún trán mɛn nga Zoova m’ɔ ti amun nannan’m be Ɲanmiɛn’n su fa man amun’n i nun. 2 Ndɛ nga n su kan kle amun yɛ’n, nán amun kpɛ wie gua nun, kusu nán amun kpɛ wie yi.+ I liɛ’n, mmla nga Zoova m’ɔ ti amun Ɲanmiɛn’n mannin mɔ n su kan kle amun yɛ’n, amún dí su.

3 “Baali ng’ɔ o Peɔɔ’n i ndɛ’n nun’n, like nga Zoova yoli’n, amun wunnin i jrɛiin. Zoova m’ɔ ti amun Ɲanmiɛn’n nunnunnin be kwlaa nga be o amun afiɛn mɔ be suli Baali ng’ɔ o Peɔɔ’n su’n.+ 4 Sanngɛ amun kwlaa nga amun fali amun wun mantannin Zoova kpa’n, andɛ’n amun te o nguan nun. 5 Afɔtuɛ nin mmla fanunfanun+ nga min Ɲanmiɛn Zoova fa mannin min’n, be yɛ m’an fa man amun lɛ-ɔ. I liɛ’n, kɛ amún wá trán mɛn nga amún wá fá’n nun’n, amún nían be su nánti. 6 Amun nian mmla sɔ’m be su nanti sɛsɛsɛ.+ Sɛ amun yo sɔ’n, nvle nga be o lɛ mɔ bé kán mmla sɔ’m be ndɛ klé be’n, bé wún kɛ amun ti akunndanfuɛ+ naan amun si sa.+ Kpɛkun bé sé kɛ: ‘Nanwlɛ, nvle dan nga’n, i nunfuɛ’m be si ngwlɛlɛ-o, be si sa-o.’+ 7 ?Yɛ nvle dan onin yɛ i ɲanmiɛn liɛ’m be mɛntɛn i kɛ Zoova m’ɔ ti e Ɲanmiɛn’n ɔ mantan e blɛ kwlaa nga e kpan flɛ i’n sa-ɔ?+ 8 ?Yɛ nvle dan onin yɛ be mɛnnin i afɔtuɛ kpakpa ɔ nin mmla fanunfanun kɛ Mmla nga n su fa sie amun ɲrun andɛ yɛ’n sa-ɔ?+

9 “Amun nian amun wun kpa. I liɛ’n, amun wla su fiman sa nga amun ɲinma wunnin be’n be su, yɛ bé ká amun klun titi. Amun kan sa sɔ’m be ndɛ kle amun mma mun nin amun anunman mun wie.+ 10 Cɛn nga amun jrannin Zoova m’ɔ ti amun Ɲanmiɛn’n i ɲrun Orɛbu lɔ’n, Zoova seli min kɛ: ‘Yia sran mun min wun wa naan n kan min nuan ndɛ’n n kle be.+ I liɛ’n, blɛ kwlaa nga bé dí i asiɛ’n su’n, bé sró min.+ Kpɛkun bé kán klé be mma mun wie.’+

11 “Kpɛkun amun wunngeli lɔ, yɛ amun ko jrannin oka’n i bo lɛ. Kɛ ɔ́ yó sɔ’n, nn sin’n júe oka’n su lɔ. Sin’n jasoli lele juli ɲanmiɛn su lɔ. Lika’n luli tritritri, ɔ wlali aosin dan kpa, yɛ ɲanmiɛn ble’n katali lika’n su.+ 12 Zoova kannin ndɛ kleli amun sin’n nun.+ Amun tili i ijɔlɛ, sanngɛ amun a wunman sran fi.+ I nɛn’n ngunmin yɛ amun tili-ɔ.+ 13 Ɔ kannin aenguɛ ng’ɔ nin amun trali’n i ndɛ kleli amun+ naan amun nian su nanti. Yɛle kɛ Mmla Blu mun.*+ I sin’n, ɔ klɛli be yɔbuɛ paplaapla nɲɔn su.+ 14 Blɛ sɔ’n nun’n, Zoova seli min kɛ n fa afɔtuɛ nin mmla fanunfanun ng’ɔ mannin’n n sie amun ɲrun. Kɛ amún wá trán mɛn nga amún wá fá’n nun’n, amun nian be su nanti.

15 “I nun nga Zoova kán ndɛ klé amun sin’n nun Orɛbu lɔ’n, amun ɲinma w’a taman sran fi. I sɔ’n ti’n, amun nian amun wun kpa naan 16 amun a yoman sa tɛ. Yɛle kɛ nán amun sɛ like wie m’ɔ fa yasua annzɛ bla,+ 17 annzɛ like wie m’ɔ fa nnɛn nga be o asiɛ’n su’n annzɛ anunman mɔ be tu sin nglo lɔ’n,+ 18 annzɛ like wie m’ɔ fa nnɛn nga be cuɛn be wun ase’n, annzɛ jue mɔ be o nzue’m be nun asiɛ’n i bo lɔ’n,+ be wie fi. 19 Asa ekun’n, sɛ amun man amun ti su nglo naan amun nian ɲanmiɛn su lɔ sonja’m be kwlaa’n, yɛle kɛ wia’n nin anglo ba’n nin nzraama mun’n, nán amun laka amun wun, nán amun koto be bo, nán amun sɔ be.+ Afin Zoova m’ɔ ti amun Ɲanmiɛn’n fali ninnge sɔ mun mannin sran kwlaa nga be o ɲanmiɛn’n bo wa’n. 20 Amun yɛ Zoova ko fali amun Ezipti lɔ fiteli-ɔ. Ɔ yili amun fuu nga be klo blalɛ nun’n i nun fiteli. Ɔ fali amun naan amun kaci i bɔbɔ i nvle,*+ kɛ nga amun fa ti andɛ yɛ’n sa.

21 “Amun ti’n, Zoova fali min wun ya.+ I sɔ’n ti’n, ɔ tali nda kɛ n su kpɛman Zurdɛn’n yɛ n su juman lika klanman nga Zoova m’ɔ ti amun Ɲanmiɛn’n su fa man amun naan ɔ kaci amun aja like’n, i nun lɔ wie.+ 22 Min liɛ’n, ń wú lika nga nun wa. N su kpɛman Zurdɛn’n wie.+ Amun liɛ’n, amún kpɛ́ nzue ba’n kpɛkun amún kó fá mɛn klanman sɔ’n. 23 Amun nian amun wun kpa. Nán amun wla fi aenguɛ nga Zoova m’ɔ ti amun Ɲanmiɛn’n nin amun trali’n su.+ Ninnge nga Zoova m’ɔ ti amun Ɲanmiɛn’n seli amun kɛ nán amun sɛ be nun wie fi’n, nán amun sɛ be.+ 24 Afin Zoova m’ɔ ti amun Ɲanmiɛn’n ti kɛ sin m’ɔ yra like kɔlikɔli’n sa.+ Ɔ klo kɛ be su i kunngba cɛ.+

25 “Sɛ amun tran mɛn sɔ’n nun cɛ kpa naan amun ɲan ba nin anunman mun, naan amun yo sa sukusuku, naan amun sɛ like+ wie naan amun yo sa ng’ɔ yoman Zoova m’ɔ ti amun Ɲanmiɛn’n i fɛ’n, naan amun fɔkɔ i awlɛn’n,+ 26 amun su diman le nɲɔn mɛn nga amun su kpɛ Zurdɛn’n bé kó trán nun’n i nun. Amún núnnún sekeseke.+ Ɲanmiɛn nin asiɛ’n be ti min lalofuɛ andɛ. 27 Zoova yó maan amún bó sánndi nvle nga be o lɛ’n be nun.+ Yɛ kɛ Zoova wá fá amun kɔ́ nvle sɔ’m be nun’n, amun nun sran kaan sa yɛ bé fíte nun-ɔn.+ 28 Lɔ’n, amún sɔ́ amuin mɔ sran fali waka annzɛ yɔbuɛ sɛli’n.+ Amuin sɔ’m be wunman ase, be timan sa, be diman like yɛ be timan nvan.

29 “Sanngɛ sɛ nvle sɔ’m be nun lɔ’n, amun fa amun awlɛn’n kwlaa nin amun nguan’n kwlaa+ kunndɛ Zoova m’ɔ ti amun Ɲanmiɛn’n, saan amún wún i.+ 30 Cɛn wie lele’n, kɛ sa sɔ’m bé wá tɔ́ amun su mɔ amun wla wá bó amun wun’n, amún sá amun sin Zoova m’ɔ ti amun Ɲanmiɛn’n i wun, yɛ amún tíe i nuan ndɛ’n.+ 31 Afin Zoova m’ɔ ti amun Ɲanmiɛn’n, ɔ si aunnvɔɛ dan.+ Ɔ su kpɔciman amun. Ɔ su nunnunman amun. Asa ekun’n, i wla su fiman nda ng’ɔ tali amun nannan mun’n i su.+

32 “Siɛn’n, amun usa sa nga be juli lalafuɛ nun kwlaa naan b’a wu amun’n, be su ndɛ be nian. Amun bo i bo cɛn nga Ɲanmiɛn yili klɔ sran asiɛ’n su wa’n i su. Amun fɛ i ɲanmiɛn’n i bue kun su lele fa ju i bue uflɛ su. ?Sa sroesroe kɛ ngalɛ’n sa’n, w’a ju le? ?Annzɛ amun a ti sa kɛ ngalɛ’n sa’n le?+ 33 ?Nvle onin yɛ i nunfuɛ’m be tili Ɲanmiɛn i nɛn’n sin’n nun kɛ nga amun fa tili i lɛ’n sa, mɔ be ɲin te o su-ɔ?+ 34 ?Annzɛ nvle onin yɛ ɔ o lɛ mɔ Ɲanmiɛn kunndɛli kɛ ɔ́ dé i nvle uflɛ sa nun naan ɔ yo i liɛ klonglo, mɔ i ti’n, ɔ dili sran wie’m be jɔlɛ, ɔ yoli abonuan sa mun,+ ɔ kunnin alɛ,+ ɔ yili i tinmin dan’n+ nin i wunmiɛn’n be nglo, ɔ yoli sa sroesroe mun+ kɛ nga Zoova m’ɔ ti amun Ɲanmiɛn’n yoli i Ezipti lɔ mɔ amun ɲinma tali nun jrɛiin’n sa-ɔ? 35 Be fali ninnge sɔ mun kleli amun naan amun si kɛ Zoova yɛ ɔ ti Ɲanmiɛn Kpli’n niɔn.+ Uflɛ nunmɛn i sin.+ 36 Ɔ yoli maan kɛ i nɛn’n tɛli ɲanmiɛn su lɔ’n, amun tili naan amun kaci amun sa. Ɔ yoli maan amun wunnin i sin dan’n nun asiɛ’n su wa. Yɛ amun tili ndɛ ng’ɔ kɛnnin i sin’n nun’n.+

37 “Klolɛ m’ɔ kloli amun nannan mun m’ɔ kpali be osu’n nunfuɛ mun’n ti’n,+ ɔ fɛli i tinmin dan’n yoli maan amun fin Ezipti lɔ fiteli i bɔbɔ i ɲin bo lɛ. 38 Nvle nga be o lɛ’n be nunfuɛ nga ɔ kannin be bo amun ɲrun’n, be sɔnnin yɛ be le wunmiɛn kpa tra amun. Ɔ yoli sɔ naan ɔ́ fá amun bá be mɛn’n nun naan ɔ́ fá mán amun. I sɔ yɛ amun wun i andɛ-ɔ.+ 39 I sɔ’n ti’n, andɛ’n, maan amun wun i wlɛ, yɛ maan ɔ tran amun klun kpa kɛ Zoova yɛ ɔ ti Ɲanmiɛn Kpli nglo lɔ nin asiɛ’n su wa-ɔ.+ Uflɛ nunman lɛ.+ 40 I sɔ’n ti’n, amun fa afɔtuɛ nin mmla fanunfanun nga n su man amun andɛ yɛ’n be su. I liɛ’n, amun nin amun mma mun, amun wun jɔ́ amun fɔuun. Yɛ amún cɛ́ mɛn nga Zoova m’ɔ ti amun Ɲanmiɛn’n su fa man amun’n i nun.”+

41 Blɛ sɔ’n nun’n, Moizi kpali Zurdɛn’n i wia afiliɛ lɔ klɔ nsan sieli be ngunmin.+ 42 I liɛ’n, sɛ sanvuɛsa ɲan sran kun naan ɔ kun i wiengu kun’n, kusu nn ɔ kpɔmɛn i laa’n,+ maan ɔ wanndi wɔ klɔ sɔ’m be nun kun su naan w’a ka nguan nun.+ 43 Klɔ sɔ mun yɛ: Bezɛɛ+ m’ɔ o aawlɛ flɛnnɛn’n nun lika kpɛtɛkplɛɛ’n nun’n. Ɔ ti Ribɛnin i osu’n nunfuɛ’m be liɛ. Yɛ Ramɔtu+ m’ɔ o Galaadi lɔ’n. Ɔ ti Gadi i osu’n nunfuɛ’m be liɛ. Yɛ Golan+ m’ɔ o Basan lɔ’n. Ɔ ti Manase i osu’n nunfuɛ’m be liɛ.+

44 Mmla+ nga Moizi fa sieli i Izraɛlifuɛ’m be ɲrun’n yɛ ɔ o lɛ-ɔ. 45 Kɛ Izraɛlifuɛ’m be fin Ezipti lɔ fiteli’n, ndɛ nga Moizi kannin fa kpɛnnin be wla’n ɔ nin afɔtuɛ nin mmla fanunfanun ng’ɔ fa mannin be’n, be yɛ be o lɛ-ɔ.+ 46 Kɛ ɔ́ yó sɔ’n, nn be o Zurdɛn asa’n su, kongo ng’ɔ o Bɛti-Peɔɔ i ɲrun ndɛnman su’n nun,+ Amɔɔfuɛ’m be famiɛn Siɔn m’ɔ tran Ɛsbɔn+ lɔ laa’n i mɛn’n nun. Kɛ Moizi nin Izraɛlifuɛ’m be fin Ezipti lɔ fiteli’n, be kwlali famiɛn sɔ’n.+ 47 Be fali famiɛn sɔ’n ɔ nin Ɔgu+ m’ɔ ti Basan famiɛn’n be mɛn’n. Amɔɔfuɛ’m be famiɛn nɲɔn sɔ’m be o Zurdɛn i wia afiliɛ lɔ asa’n su. 48 Be fali lika ng’ɔ fɛ i Aroɛɛ+ m’ɔ o Aanɔn Kongo’n* i nuan su’n lele fa ju Siɔn Oka’n yɛle kɛ Ɛrmɔn’n+ i wun lɔ, 49 nin Araba m’ɔ o Zurdɛn i wia afiliɛ lɔ’n i asa wunmuan’n, lele fa ju Araba Jenvie’n* i nuan lɔ, Pisga+ oka’n i bo lɛ.

5 Moizi yiali Izraɛlifuɛ’m be kwlaa naan w’a se be kɛ: “Izraɛlifuɛ mun, amun sie amun su tie afɔtuɛ nin mmla fanunfanun nga n su fa man amun andɛ yɛ’n. Amun suan be naan amun nian be su sɛsɛsɛ nanti. 2 Zoova m’ɔ ti e Ɲanmiɛn’n nin e trali aenguɛ Orɛbu lɔ.+ 3 Nán e nannan mun yɛ Zoova nin be trali aenguɛ sɔ’n niɔn. Sanngɛ e kwlaa nga e ɲin te o su andɛ yɛ’n, yɛ ɔ nin e trali aenguɛ’n niɔn. 4 Zoova kan ndɛ kleli amun jrɛiin* oka’n su lɔ sin’n i afiɛn.+ 5 Blɛ sɔ’n nun’n, n jrannin amun nin Zoova amun afiɛn,+ yɛ n kannin Zoova i nuan ndɛ’n n kleli amun-ɔn. Afin kɛ amun wunnin sin’n, srɛ kunnin amun. Ɔ maan amun a fuman oka’n su lɔ.+ Ɔ seli kɛ:

6 “‘Zoova m’ɔ ti ɔ Ɲanmiɛn’n yɛle min. Min yɛ n fali wɔ Ezipti mɛn’n nun lɔ, i nun mɔ a o kanga sua’n nun lɔ’n, n fiteli-ɔ.+ 7 Nán su ɲanmiɛn uflɛ fi, saan min kunngba cɛ.+

8 “‘Nán sɛ like wie,+ annzɛ yo like wie m’ɔ fa ɲanmiɛn su lɔ like, annzɛ asiɛ’n su like, annzɛ nzue nga be o asiɛ’n su’n* be nun like. 9 Nán koto be bo, nán sɔ be.+ Afin min Zoova mɔ n ti ɔ Ɲanmiɛn’n, n kunndɛ kɛ be su min kunngba cɛ.+ Be nga be kpɔ min’n, n fa be sa tɛ’n i su afɛ’n n yi i be mma mun nin be anunman mun, ɔ nin be anunman’m be mma liɛ’m be su.+ 10 Sanngɛ be nga be klo min mɔ be nanti min mmla’m be su’n, n klo be lele n fa wlu be osu’n nunfuɛ’m be akpasua akpi su’n nun.

11 “‘Nán yo Zoova m’ɔ ti ɔ Ɲanmiɛn’n i dunman’n i finfin.+ Afin sran ng’ɔ yo Zoova i dunman i finfin’n, ɔ su yacimɛn i lɛ, saan ɔ́ tú i fɔ.+

12 “‘Di Wunmiɛn-lolɛ-cɛn’n, maan ɔ yo Ɲanmiɛn liɛ klonglo titi kɛ nga Zoova m’ɔ ti ɔ Ɲanmiɛn’n kan kleli wɔ’n sa.+ 13 Fa cɛn nsiɛn di junman.+ Di ɔ junman’m be kwlakwla cɛn sɔ’m be nun. 14 Sanngɛ cɛn nso su’n ti wunmiɛn-lolɛ-cɛn, ɔ ti ɔ Ɲanmiɛn Zoova i liɛ.+ Nán di junman wie fi.+ Maan ɔ wie ɔ bɔbɔ-o, annzɛ ɔ wa yasua-o, annzɛ ɔ wa bla-o, annzɛ ɔ kanga yasua-o, annzɛ ɔ kanga bla-o, annzɛ ɔ nannin-o, annzɛ ɔ aflunmun-o, annzɛ ɔ nnɛn mun-o, annzɛ ɔ aofuɛ m’ɔ tran ɔ klɔ’n nun-o,+ nán maan amun nun wie fi di junman. I liɛ’n, ɔ kanga yasua’n nin ɔ kanga bla’n bé ló wunmiɛn kɛ wɔ sa.+ 15 Nán ɔ wla fi su kɛ a yoli kanga Ezipti mɛn’n nun lɔ. Zoova m’ɔ ti ɔ Ɲanmiɛn’n yɛ ɔ yili i wunmiɛn’n nin i tinmin dan’n be nglo naan w’a fa ɔ lɔ w’a fite-ɔ.+ I sɔ’n ti’n, Zoova m’ɔ ti ɔ Ɲanmiɛn’n seli wɔ kɛ a di Wunmiɛn-lolɛ-cɛn’n titi.

16 “‘Bu ɔ si nin ɔ nin be sran,+ kɛ nga Zoova m’ɔ ti ɔ Ɲanmiɛn’n kan kleli wɔ’n sa. I liɛ’n, á cɛ́ kpa yɛ ɔ liɛ yó ye mɛn nga Zoova m’ɔ ti ɔ Ɲanmiɛn’n su fa man wɔ’n nun.+

17 “‘Nán kun sran.+

18 “‘Nán kunndɛ bla ɔ yi bo, annzɛ bian ɔ wun bo.+

19 “‘Nán wua.+

20 “‘Kɛ á dí lalo’n, nán tɔn ɔ wiengu suɛn.+

21 “‘Nán ɔ ɲin blo ɔ wiengu i yi’n su.+ Nán ɔ ɲin blo i sua’n, annzɛ i fie’n, annzɛ i kanga yasua’n, annzɛ i kanga bla’n, annzɛ i nannin tola’n, annzɛ i aflunmun’n su. Nán ɔ ɲin blo ɔ wiengu i like fi su.’+

22 “Zoova fali mmla* sɔ mun mannin amun oka’n su lɔ. Ɔ ijɔli sin’n nun, nin ɲanmiɛn ble’n nun, ɔ nin aosin tritritri’n nun.+ Ɔ kannin ndɛ’n i kekle kpa. Yɛ w’a kanman ndɛ uflɛ fi w’a ukaman su. Kpɛkun ɔ klɛli ndɛ sɔ mun yɔbuɛ paplaapla nɲɔn su naan w’a fa man min.+

23 “Sanngɛ kɛ sin’n júe oka’n su mɔ amun tili i nɛn’n aosin tritritri’n nun cɛ’n,+ amun akpasua’m be su kpɛn’m be kwlaa nin Izraɛli kpɛnngbɛn’m be wa toli min. 24 Kpɛkun amun seli kɛ: ‘Zoova m’ɔ ti e Ɲanmiɛn’n w’a yi i aɲrunɲan’n i nglo w’a kle e, w’a yi i dan m’ɔ ti’n i nglo w’a kle e. Yɛ e tili i nɛn’n sin’n nun.+ Andɛ’n, y’a wun kɛ Ɲanmiɛn nin sran kwla ijɔ, kpɛkun sran sɔ’n wuman.+ 25 ?Siɛn’n, ngue ti yɛ é trán lɛ naan y’a wu-ɔ? Afin ɔ cɛman naan sin dan nga w’a yra e sekeseke. Sɛ e ti Zoova m’ɔ ti e Ɲanmiɛn’n i nɛn’n ekun’n, saan wulɛ cɛ yɛ é wú-ɔ. 26 ?Afin klɔ sran onin yɛ ɔ tili Ɲanmiɛn m’ɔ lafiman’n i nɛn’n sin nun kɛ e sa, kpɛkun i ɲin te o su-ɔ? 27 I sɔ’n ti’n, ɔ liɛ’n, wunnge Zoova m’ɔ ti e Ɲanmiɛn’n i wun lɔ naan kó tíe ndɛ kwlaa ng’ɔ́ kán’n. I sin’n, ndɛ nga Zoova m’ɔ ti e Ɲanmiɛn’n kan kle wɔ’n, bla wa kan kle e. E kusu é síe e su, yɛ é fá su.’+

28 “Zoova tili ndɛ nga amun kan kleli min’n. Yɛ Zoova seli min kɛ: ‘N tili ndɛ nga sran ngalɛ’m be kan kleli wɔ’n. Be ndɛ yo fɛ.+ 29 Sɛ be awlɛn yo kpa titi naan be sro min+ yɛ be nanti min mmla’m be kwlaa be su’n,+ be bɔbɔ nin be mma’m be liɛ yó ye tititi.+ 30 Ko se be kɛ: “Amun sa amun sin amun tannin sua’m be nun.” 31 Sanngɛ ɔ liɛ’n, ka min wun wa. Maan n fa mmla nin afɔtuɛ fanunfanun n man wɔ naan ko kan kle be. I liɛ’n, kɛ bé wá trán mɛn nga n su fa man be’n nun’n, bé nánti be su.’ 32 Siɛn’n amun nian amun wun kpa, amun nanti ndɛ nga Zoova m’ɔ ti amun Ɲanmiɛn’n kan kleli amun’n su sɛsɛsɛ.+ Nán amun wɔ fama su, annzɛ bɛ su.+ 33 Amun nanti atin kwlaa nga Zoova m’ɔ ti amun Ɲanmiɛn’n kleli amun’n su.+ I liɛ’n, amun liɛ yó ye, yɛ amún cɛ́ kpa mɛn nga amún wá fá’n nun.+

6 “Mmla nin afɔtuɛ fanunfanun nga Zoova m’ɔ ti amun Ɲanmiɛn’n mannin naan be fa kle amun’n, be yɛ be o yɛ. I liɛ’n, kɛ amún kpɛ́ Zurdɛn mɔ amún wá trán mɛn nga bé fá mán amun’n nun’n, amún nánti be su. 2 Sɛ amun nin amun mma mun nin amun anunman mun+ amun sro Zoova m’ɔ ti amun Ɲanmiɛn’n, naan amun fɛ i afɔtuɛ nin i mmla nga n su fa kle amun’n be su titi’n, amún cɛ́ kpa.+ 3 Izraɛlifuɛ mun, amun sie amun su naan amun nian mmla sɔ’m be su sɛsɛsɛ be nanti. I liɛ’n, amun liɛ yó ye kpɛkun amún sɔ́n kpanngban kpa mɛn nga nɔnnɔn nin awɛma nzue be sonji lɔ’n nun, kɛ nga Zoova m’ɔ ti amun nannan’m be Ɲanmiɛn’n ɔ kan kleli amun’n sa.

4 “Izraɛli, sie ɔ su: Zoova ti e Ɲanmiɛn, yɛ Zoova ti kunngba cɛ.+ 5 Fa ɔ awlɛn’n kwlaa nin ɔ nguan’n kwlaa+ nin ɔ wunmiɛn’n kwlaa+ fa klo Zoova m’ɔ ti ɔ Ɲanmiɛn’n. 6 Ndɛ nga n su kan kle wɔ andɛ yɛ’n, maan be ka ɔ klun. 7 Yɛ kan ndɛ sɔ mun kle* ɔ mma mun.+ Sɛ a nin be ti ase awlo lɔ-o, kan. Sɛ amun o atin’n su-o, kan. Sɛ amún wá lá-o, kan. Kɛ amun tinnge’n, kan.+ 8 Fa be cici ɔ sa’n su naan ɔ wla kpɛn be su, yɛ maan be yo kɛ like mɔ be fa cici be ngban’n su’n*+ sa. 9 Klɛ ndɛ sɔ mun ɔ anuan’n i kadri’m be su nin ɔ klɔ’n i anuan’m be su.

10 “Zoova m’ɔ ti amun Ɲanmiɛn’n tali Abraamun nin Izaaki nin Zakɔbu mɔ be ti amun nannan’n be nda kɛ ɔ́ fá lika’n mán amun.+ Kɛ amun ko ju lika sɔ’n nun’n, (klɔ klanman nin klɔ dandan nga be o lika sɔ’n nun’n, nán amun yɛ amun kplannin-ɔn,+ 11 ninnge kpakpa kwlaa nga be yi sua mun piɛ’n, nán amun yɛ amun kunndɛli-ɔ, nzue gbo nga be o lɔ’n, nán amun yɛ amun kpɛli-ɔ, viɲin nin olivie waka nga be o lɔ’n, nán amun yɛ amun tali-ɔ), mɔ amun ko di like mɔ amun ku ko yi’n,+ 12 amun nian amun wun su, nán amun wla fi Zoova su.+ I yɛ ɔ fali amun Ezipti lɔ fiteli-ɔ. Kɛ ɔ́ yó sɔ’n, nn amun ti kanga nvle sɔ’n nun.* 13 Maan amun sro Zoova m’ɔ ti amun Ɲanmiɛn’n,+ yɛ amun su i,+ kpɛkun i dunman’n yɛ amun fa ta nda-ɔ.+ 14 Nán amun su ɲanmiɛn uflɛ. Nán amun su nvle nga be mantan amun’n, i nunfuɛ’m be ɲanmiɛn’m be wie fi.+ 15 Afin Zoova m’ɔ ti amun Ɲanmiɛn’n, m’ɔ o amun afiɛn’n, ɔ klo kɛ be su i kunngba cɛ.+ Sanngɛ sɛ amun yoman sɔ’n, Zoova m’ɔ ti amun Ɲanmiɛn’n, ɔ́ fá amun wun ya dan kpa. I ya’n júe kɛ sin sa,+ kpɛkun ɔ́ núnnún amun sekeseke asiɛ’n su.+

16 “Nán amun sa Zoova m’ɔ ti amun Ɲanmiɛn’n be nian,+ kɛ nga Masa lɔ’n, amun sɛli i niannin’n sa.+ 17 Amun nian mmla fanunfanun nga Zoova m’ɔ ti amun Ɲanmiɛn’n fa mannin amun’n nin ndɛ ng’ɔ fa kpɛnnin amun wla’n, be kwlaa be su sɛsɛsɛ nanti. 18 Amun yo sa ng’ɔ ti kpa’n nin sa ng’ɔ ti su Zoova ɲrun’n. I liɛ’n, amún liɛ yó ye, yɛ amún wlú mɛn nga Zoova tali amun nannan’m be nda kɛ ɔ́ fá mán amun’n i nun, kpɛkun ɔ́ káci amun liɛ.+ 19 Amún kán amun kpɔfuɛ nga be o amun ɲrun lɔ’n be kwlaa be bo, kɛ nga Zoova fa kannin’n sa.+

20 “Cɛn wie lele’n, amun mma’m be wá úsa amun kɛ: ‘?Ngue ti yɛ Zoova m’ɔ ti e Ɲanmiɛn’n mannin amun mmla fanunfanun kpɛkun ɔ kannin ndɛ wie fa kpɛnnin amun wla-ɔ?’ 21 Amun tɛ amun mma’m be su kɛ: ‘Laa’n, e ti Faraɔn m’ɔ o Ezipti lɔ’n i kanga. Sanngɛ Zoova yili i tinmin dan’n i nglo naan w’a fa e Ezipti lɔ w’a fite. 22 Zoova w’a yaciman abonuan sa nin sa sroesroe’m be yolɛ. Ɔ yoli be e ɲrun lɛ. Sa sɔ’m be ti’n, Eziptifuɛ mun+ nin Faraɔn nin i awlofuɛ’m be kwlaa be wunnin ɲrɛnnɛn.+ 23 Ɔ ko fali e lɔ bali lika nga nun wa naan ɔ́ fá mɛn nga i ti yɛ ɔ tali e nannan’m be nda’n, ɔ́ fá mán e.+ 24 I sin’n, Zoova seli e kɛ e fa mmla sɔ’m be su, yɛ e sro Zoova m’ɔ ti e Ɲanmiɛn’n naan e wun jɔ e kpa fɔuun titi.+ I liɛ’n, é trán nguan nun titi,+ kɛ nga andɛ’n e ɲin o su yɛ’n sa. 25 Yɛ sɛ e mian e ɲin e fa mmla kwlaa sɔ’m be su naan e ɲin yi Zoova m’ɔ ti e Ɲanmiɛn’n kɛ ng’ɔ kan kleli e sa’n, bé bú e ndɛnmanfuɛ.’+

7 “Kɛ Zoova m’ɔ ti amun Ɲanmiɛn’n ko fa amun ko wɔ mɛn nga amun su wa fɛ i lɛ’n nun’n,+ ɔ́ kán nvle dandan nga be o lɔ’n be nunfuɛ’m be bo amun ɲrun lɛ.+ Be yɛle Ɛtifuɛ mun, nin Giigasifuɛ mun, nin Amɔɔfuɛ mun,+ nin Kanaanfuɛ mun, nin Perizifuɛ mun, nin Ivifuɛ mun ɔ nin Zebisifuɛ mun.+ Nvle nso sɔ’m be nunfuɛ’m be sɔnnin kpa tra amun, yɛ be le wunmiɛn tra amun.+ 2 Zoova m’ɔ ti amun Ɲanmiɛn’n fá be wlá amun sa nun, yɛ amún kwlá be.+ Maan amun nunnun be sekeseke.+ Nán amun nin be tra aenguɛ, yɛ nán amun si be aunnvɔɛ.+ 3 Nán amun nin be ja amun afiɛn bla. Nán amun fa amun wa bla mun man be wa yasua mun. Yɛ nán amun ja be wa bla mun fa man amun wa yasua mun.+ 4 Afin sɛ amun yo sɔ’n, bé yó maan amun wa yasua’m be su suman min kun, kpɛkun bé sɔ́ amuin mun.+ Ɔ maan Zoova fá amun wun ya dan kpa. Yɛ ɔ́ núnnún amun ndɛndɛ kpa.+

5 “Sanngɛ like ng’ɔ fata kɛ amun fa yo be’n yɛ: Amun bubu be tɛ yiwlɛ mun, amun kpukekpuke yɔbuɛ nga be takali be mɔ be sɔ be’n be nun.+ Amun bu waka nga be sɔ be’n be bo,*+ yɛ amun yra amuin nga be sɛli be’n.+ 6 Afin amun ti Zoova m’ɔ ti amun Ɲanmiɛn’n i liɛ klonglo. Zoova m’ɔ ti amun Ɲanmiɛn’n ɔ kpali amun nvle kwlaa nga be o asiɛ’n su’n be nun naan amun kaci i nvle, naan amun yo i liɛ klonglo.+

7 “Nán kɛ amun sɔnnin tra nvle kwlaa nunfuɛ mun ti yɛ Zoova kloli amun m’ɔ kpali amun-ɔn.+ Afin amun yɛ amun ti nvle’m be kwlaa be nun kaan’n niɔn.+ 8 Sanngɛ Zoova klo amun, yɛ i waan ɔ́ dí nda ng’ɔ tali amun nannan mun’n i su.+ I sɔ’n ti’n, Zoova yili i tinmin dan’n i nglo ko fali amun kanga sua’n nun fiteli,+ ɔ deli amun Faraɔn m’ɔ ti Ezipti famiɛn’n i sa* nun. Kɛ ɔ́ yó sɔ’n, nn amun ti kanga nvle sɔ’n nun. 9 Amun si kpa kɛ Zoova m’ɔ ti amun Ɲanmiɛn’n yɛ ɔ ti Ɲanmiɛn Kpli’n niɔn. Ɔ ti nanwlɛfuɛ, yɛ ɔ nian aenguɛ ng’ɔ nin be nga be klo i mɔ be nanti i mmla’m be su titi’n, be trali’n i su. Kpɛkun ɔ klo be lele fa wlu be osu’n nunfuɛ’m be akpasua akpi su’n nun.+ 10 Sanngɛ be nga be kpɔ i’n, ɔ su yaci cɛman be, ɔ́ núnnún be.+ Ɔ su sisimɛn i bo naan w’a tu be nga be kpɔ i’n be fɔ. Ɔ su yaci cɛman be. 11 I sɔ’n ti’n, amun nian amun wun kpa, amun nanti mmla nin afɔtuɛ fanunfanun nga n su man amun andɛ yɛ’n be su sɛsɛsɛ.

12 “Sɛ amun tie afɔtuɛ sɔ mun titi naan amun nian be su nanti’n, Zoova m’ɔ ti amun Ɲanmiɛn’n nían aenguɛ ng’ɔ nin amun nannan mun trali’n su, yɛ ɔ́ yí i klolɛ’n i nglo titi kɛ ng’ɔ fa tali be nda’n sa. 13 Ɲanmiɛn kló amun, yɛ ɔ́ yó maan amun liɛ yó ye. Ɔ́ yó maan amún sɔ́n kpanngban kpa. Nanwlɛ, ɔ́ yó maan amún wú ba kpanngban kpa,+ asiɛ’n yó like ye mán amun, amun ble nin i wunsu ninnge mun nin amun duvɛn uflɛuflɛ’n nin amun ngo’n,+ nin amun nannin mun nin amun bua’m bé sɔ́n kpanngban kpa mɛn ng’ɔ tali amun nannan’m be nda kɛ ɔ́ fá mán amun’n i nun lɔ.+ 14 Ɔ́ yó maan amún liɛ yó ye trá nvle onga’m be kwlaa be nunfuɛ mun.+ Be su wunman yasua annzɛ bla ng’ɔ wuman ba’n, annzɛ kusu nnɛn ng’ɔ wuman ba’n amun mɛn’n nun.+ 15 Zoova yó maan tukpacɛ wie fi su tɔman amun su. Ɔ su faman ɲrɛnnɛn nga amun wunnin be Ezipti lɔ’n be wie fi yiman amun su.+ Sanngɛ ɔ́ fá be yí be kwlaa nga be kpɔ amun’n be su. 16 Maan amun nunnun* nvle kwlaa nga Zoova m’ɔ ti amun Ɲanmiɛn’n fá be wlá amun sa nun’n be nunfuɛ mun.+ Nán amun* si be aunnvɔɛ,+ yɛ nán amun sɔ be amuin mun.+ Sɛ amun yo sɔ’n, bé káci kɛ aya sa, amún tɔ́ nun.+

17 “Amun kwla se amun klun lɔ kɛ: ‘Nvle nga’m be nunfuɛ’m be sɔnnin tra e lele. ?É yó sɛ naan y’a kwla kan be bo?’+ 18 Sanngɛ nán maan nvle sɔ’m be ti’n, srɛ kun amun.+ Maan amun wla kpɛn like nga Zoova m’ɔ ti amun Ɲanmiɛn’n fa yoli Faraɔn nin Eziptifuɛ’m be kwlaa’n i su.+ 19 Asa ekun’n, maan amun wla kpɛn sa dandan ng’ɔ fa yili be su mɔ amun wunnin be’n, nin abonuan sa ng’ɔ yoli be’n,+ nin wafa nga Zoova m’ɔ ti amun Ɲanmiɛn’n yili i tinmin dan’n i nglo m’ɔ fali amun fiteli’n,+ be su. I sɔ yɛ Zoova m’ɔ ti amun Ɲanmiɛn’n wá yó nvle kwlaa nga amun sro be’n be nunfuɛ mun-ɔn.+ 20 Zoova m’ɔ ti amun Ɲanmiɛn’n wá fá awlabɔɛ’n* yí be su lele saan be nga be kali+ mɔ be ko fiali amun ɲrun’n, b’a wie nunnun. 21 Nán maan be dunman nun ti’n, amun usu tututu. Afin Zoova m’ɔ ti amun Ɲanmiɛn’n jin amun sin.+ Ɔ ti dan, yɛ ɔ yo sro kpa.+

22 “Zoova m’ɔ ti amun Ɲanmiɛn’n kán nvle sɔ’m be bo kanngankanngan.+ Amun su kwlá nunnunman be ndɛndɛ. I liɛ’n, blo nnɛn’m be su sɔnman dan naan b’a kle amun yalɛ. 23 Zoova m’ɔ ti amun Ɲanmiɛn’n fá be wlá amun sa nun. Ɔ́ kwlá be lele saan bé wíe nunnun sekeseke.+ 24 Ɔ́ fá be famiɛn mun wlá amun sa nun.+ Yɛ amún núnnún be dunman’n ɲanmiɛn’n bo wa.+ Sran fi su kwlá jranman amun ɲrun+ lele naan amun a wie be nunnun.+ 25 Amun fa amuin nga be sɛli be’n guɛ i sin’n nun.+ Nán amun ɲin blo sika annzɛ sika ɔkwlɛ nga be o amuin sɔ’m be wun’n be su. Yɛ nán amun fa kaci amun liɛ.+ Sɛ amun yo sɔ’n, ɔ́ káci kɛ aya sa, amún tɔ́ nun. Afin Zoova m’ɔ ti amun Ɲanmiɛn’n i ɲin ci ninnge sɔ mun.+ 26 Nán amun fa tete like wie wlu amun sua’n nun. Sɛ amun yo sɔ’n, saan nunnunlɛ yɛ ɔ fata kɛ be nunnun amun kɛ i sa-ɔ. Amun kpɔ like sɔ’n, nán amun niɛn i lɔ. Afin ɔ ti like m’ɔ nin nunnunlɛ fata-ɔ.

8 “Maan amun nian mmla kwlakwla nga n su fa man amun andɛ yɛ’n be su be nanti. I liɛ’n, amún trán nguan nun titi,+ amún trɛ́, kpɛkun amún kó fá mɛn nga i ti yɛ Zoova tali amun nannan’m be nda’n.+ 2 Maan amun wla kpɛn atin tɛnndɛn nga Zoova m’ɔ ti amun Ɲanmiɛn’n fali amun sinnin nun aawlɛ flɛnnɛn’n nun lele afuɛ ablanan’n (40) i su.+ Ɔ guali amun ɲin ase yɛ ɔ sali amun niannin+ naan w’a si like ng’ɔ o amun awlɛn nun’n.+ I liɛ’n, sɛ amún fɛ́ i mmla’m be su titi annzɛ amun su faman su’n, ɔ́ wún i wlɛ. 3 Ɔ guali amun ɲin ase, yɛ ɔ yacili amun awe’n nun.+ Manin+ mɔ amun bɔbɔ nin amun si’m b’a simɛn i’n, ɔ fa mannin amun kɛ amun di. Ɔ yoli sɔ naan amun si kɛ nán aliɛ* ngunmin yɛ maan sran tran nguan nun-ɔn. Sanngɛ ndɛ kwlaa ng’ɔ fin Zoova nuan fite’n yɛ maan sran tran nguan nun-ɔn.+ 4 Afuɛ ablanan (40) sɔ’n nun’n, amun wun tralɛ’n w’a titiman, yɛ amun ja’m b’a wunwunman amun bo.+ 5 Amun wun i wlɛ weiin kpa kɛ fɔ yɛ Zoova m’ɔ ti amun Ɲanmiɛn’n tuli amun-ɔn, kɛ siɛ kun fa tu i wa’n i fɔ sa.+

6 “Maan amun fa Zoova m’ɔ ti amun Ɲanmiɛn’n i mmla’m be su titi. Amun nanti i atin’m be su yɛ amun sro i. 7 Afin Zoova m’ɔ ti amun Ɲanmiɛn’n su fa amun kɔ mɛn klanman kun nun.+ Nzue ba’m be sonji mɛn sɔ’n nun, nzue ti’m be sonji kɔ lika kpɛtɛkplɛɛ’n nin okaoka lika’m be nun. 8 Ble nin ɔɔzu, nin viɲin fie, nin figie waka, nin grenadie+ be o mɛn sɔ’n nun. Olivie ngo nin awɛma nzue+ be o lɔ wie. 9 Aliɛ su wieman mɛn sɔ’n nun le, yɛ amun su mianman like fi wun. Mɛn sɔ’n nun’n, blalɛ o yɔbuɛ’m be nun. Yɛ amún yí aaba nga be o oka’m be nun’n.

10 “Kɛ amun ko di like mɔ amun ku ko yi’n, amun manman Zoova m’ɔ ti amun Ɲanmiɛn’n, mɛn klanman m’ɔ fa mannin amun’n ti.+ 11 Amun nian amun wun naan amun wla w’a fiman Zoova m’ɔ ti amun Ɲanmiɛn’n. Yɛle kɛ nán amun yaci i afɔtuɛ nin i mmla fanunfanun nga n su fa man amun andɛ yɛ’n, be su nantilɛ. 12 Kɛ amun ko di like mɔ amun ku ko yi’n, mɔ amun ko kplan sua nglanmannglanman mun mɔ amun ko tran be nun’n,+ 13 kɛ amun nannin mun nin amun bua mun nin amun boli’m be ko trɛ’n, mɔ amun ko ɲan sika nin sika ɔkwlɛ kpanngban kpa’n, mɔ like kwlaa ti sin yia amun’n, 14 nán maan amun awlɛn’n kaci naan amun tu amun wun,+ naan amun wla fi Zoova m’ɔ ti amun Ɲanmiɛn’n. I nun nga amun o kanga’m be sua’n nun’n, yɛle kɛ Ezipti mɛn’n nun’n, i yɛ ɔ ko fali amun fiteli-ɔ.+ 15 Ɔ fali amun sinnin aawlɛ flɛnnɛn sroesroe dan’n nun.+ Wuo nga be le bɔyre kpa’n nin ɲannglan’m be o lika sɔ’n nun. Kpɛkun lɔ asiɛ’n ti kee kpa, nzue nunman nun. Sanngɛ ɔ yoli maan nzue fin yɔbuɛ kekleke’n nun fiteli.+ 16 Aawlɛ flɛnnɛn sɔ’n nun’n, ɔ mannin amun manin naan amun di.+ Amun si’m be siman manin sɔ’n laa. Ɔ yoli sɔ naan amun kan amun wun ase.+ Yɛ ɔ sali amun niannin naan cɛn wie lele’n, amun ɲan su ye.+ 17 Sɛ amun se amun klun lɔ kɛ: ‘Min bɔbɔ min fanngan nin min sa kekle ti yɛ maan n ɲannin ninnge kwlaa ngalɛ mun’n,’+ 18 maan amun wla kpɛn su kɛ Zoova m’ɔ ti amun Ɲanmiɛn’n yɛ ɔ mannin amun wunmiɛn naan amun a kwla ɲan ninnge kwlaa ngalɛ mun-ɔn.+ Ɔ yoli sɔ naan ɔ́ dí nda ng’ɔ tali amun nannan mun’n, i su. I sɔ yɛ ɔ su yo i andɛ kusu-ɔ.+

19 “Sɛ amun wla fi Zoova m’ɔ ti amun Ɲanmiɛn’n i su naan amun ko su ɲanmiɛn uflɛ mun naan amun koto be bo’n, maan n di amun nanwlɛ andɛ kɛ amún núnnún sekeseke.+ 20 Amún wá núnnún kɛ nvlenvle nga Zoova su nunnun be amun ɲrun lɛ’n be sa. Afin amun kloman kɛ amún tíe Zoova m’ɔ ti amun Ɲanmiɛn’n i aniɛn’n.+

9 “Izraɛli, sie ɔ su tie. Andɛ’n, a su wa kpɛ Zurdɛn’n.+ Yɛ á kó fá nvle wie mun. Nvle sɔ’m be ti dandan yɛ be nunfuɛ’m be le wunmiɛn be tra wɔ.+ Be klɔ’m be ti dandan, be sisili be wun yɛ be wun talɛ’m be kɔ lele ju ɲanmiɛn su lɔ.+ 2 Be ti nvle dan, yɛ be ti kpasakaa kpa. Anakifuɛ mun+ yɛle sran sɔ mun. A si be. A tili be su ndɛ. Be seli ɔ kɛ: ‘?Wan yɛ ɔ kwla jran Anakifuɛ’m be ɲrun-ɔn?’ 3 I sɔ’n ti’n, wun i wlɛ kɛ andɛ’n, Zoova m’ɔ ti ɔ Ɲanmiɛn’n ɔ́ wá dún mmua ɔ ɲrun naan w’a kpɛ Zurdɛn’n.+ Ɔ ti kɛ sin m’ɔ yra like kɔlikɔli’n sa.+ Ɔ́ núnnún be sekeseke. Yɛ ɔ́ yó maan bé ló sa kplɔkɔɔ ɔ ɲin bo lɛ. Ɔ maan á kán be bo ndɛndɛ, yɛ á kún be kɛ nga Zoova kan kleli wɔ’n sa.+

4 “Kɛ Zoova m’ɔ ti ɔ Ɲanmiɛn’n wá kán be bo ɔ ɲin bo lɛ’n, nán se ɔ klun lɔ kɛ: ‘Min kpa mɔ n ti’n, i ti yɛ Zoova fa min bali wa naan n de be mɛn’n niɔn.’+ Sanngɛ nvle sɔ’m be klunwi’n+ ti yɛ Zoova su kan be bo ɔ ɲin bo lɛ-ɔ. 5 Nán kɛ a ti kpa annzɛ ɔ awlɛn’n ti kpa ti yɛ a su wa fa be mɛn’n niɔn. Sanngɛ nvle sɔ’m be klunwi’n ti yɛ Zoova m’ɔ ti ɔ Ɲanmiɛn’n su kan be bo ɔ ɲin bo lɛ-ɔ.+ Kɛ ɔ ko yo naan Zoova w’a kwla yia nda ng’ɔ tali ɔ nannan Abraamun+ nin Izaaki+ nin Zakɔbu’n+ i nuan’n i ti yɛ ɔ su yo sɔ-ɔ. 6 Wun i wlɛ kɛ nán kɛ a ti kpa ti yɛ Zoova m’ɔ ti ɔ Ɲanmiɛn’n su wa fa mɛn klanman nga man wɔ-ɔ. Afin a ti nvle kun mɔ i nunfuɛ’m be ɲin ti kekle-ɔ.*+

7 “Wafa nga a klɔklɔli Zoova m’ɔ ti ɔ Ɲanmiɛn’n aawlɛ flɛnnɛn’n nun lɔ’n, maan ɔ wla kpɛn su.+ Nán maan ɔ wla fi su le. Kɛ a jasoli Ezipti lɔ’n lele mɔ á fá jú lika nga nun wa’n, a yoli ɲin kekle Zoova su.+ 8 Orɛbu lɔ bɔbɔ’n, a klɔklɔli Zoova. Ɔ maan Zoova fali ɔ wun ya. Ɔ ka kan naan w’a nunnun wɔ.+ 9 Kɛ n fuli oka’n su lɔ naan ń kó fá yɔbuɛ paplaapla mun’n,+ yɛle kɛ yɔbuɛ paplaapla mɔ aenguɛ nga Zoova nin ɔ trali’n i su mmla’n klɛ su’n,+ n dili cɛn ba ablanan (40) lɔ, wia nun nin kɔnguɛ.+ M’an diman like yɛ m’an nɔnman nzue. 10 Kɛ ɔ yoli sɔ’n, Zoova fali yɔbuɛ paplaapla nɲɔn mun mannin min. Ɲanmiɛn fɛli i sa mma’n klɛli be su. I nun mɔ amun yiali oka’n i bo lɛ’n, ndɛ kwlaa nga Zoova kan kleli amun sin’n nun’n, be o yɔbuɛ sɔ’m be su.+ 11 Kɛ cɛn ba klonglo ablanan (40) sɔ’m be sinnin’n, Zoova fali yɔbuɛ paplaapla nɲɔn mɔ Mmla’n wo su’n mannin min. 12 Yɛ Zoova seli kɛ: ‘Jaso wa, jra ndɛndɛ. Afin ɔ sran mɔ a fali be Ezipti lɔ fiteli’n b’a yo sa tɛ.+ B’a yaci atin nga n kleli be’n i su falɛ lalaa. B’a fa blalɛ b’a yo amuin kun.’+ 13 Yɛ Zoova seli min kɛ: ‘M’an wun kɛ nvle sɔ’n i nunfuɛ’m be ɲin su ti kekle* dan.+ 14 Jran maan n nunnun be. Ń núnnún be dunman’n ɲanmiɛn’n i bo wa. Yɛ ń má yó maan á káci nvle dan kun. I nunfuɛ’m bé sɔ́n kpa trá be.’+

15 “Kɛ ɔ yoli sɔ’n, n fin oka mɔ sin jue su’n i su lɔ n jrali.+ Yɛ yɔbuɛ paplaapla nɲɔn mɔ Mmla’n wo su’n, be o min sa nun.+ 16 Kpɛkun n wunnin kɛ amun yoli sa tɛ Zoova m’ɔ ti amun Ɲanmiɛn’n i ɲrun. Amun fali blalɛ be yoli nannin ba kun. Amun yacili atin nga Zoova kleli amun’n i su falɛ ndɛndɛ kpa.+ 17 I sɔ’n ti’n, n fali yɔbuɛ paplaapla nɲɔn mun. N fali min sa nɲɔn’n n tɛli be ase. Yɛ n bubuli be nun amun ɲrun lɛ.+ 18 I sin’n, n utuli min ɲin ase Zoova i bo lɛ cɛn ba ablanan (40), wia nun nin kɔnguɛ, kɛ nga n fa yoli i klikli nun’n sa. Sa tɛtɛ kwlaa nga amun yoli’n ti’n, m’an diman like, yɛ m’an nɔnman nzue.+ Amun yoli klunwi Zoova ɲrun. Amun wɔli i safle. 19 Afin ya dan nga Zoova fɛli i amun wun’n ti’n, srɛ kunnin min dan.+ I waan ɔ́ núnnún amun sekeseke. Sanngɛ Zoova sieli i su min nuan bo blɛ sɔ’n nun ekun.+

20 “Zoova fali Aarɔn i wun ya dan ti’n, i waan ɔ́ kún i.+ Sanngɛ n kpatali Aarɔn i ti blɛ sɔ’n nun wie. 21 I sin’n, n fali tete like nga amun yoli’n, yɛle kɛ nannin ba’n+ n yili i sin’n nun. N fufuli nun, yɛ n nunkunnin i lele ɔ kacili kɛ ndutre sa. Kpɛkun n fa guali nzue ba ng’ɔ fin oka’n su lɔ sonji’n nun.+

22 “Asa ekun’n, kɛ e juli Tabera,+ nin Masa,+ ɔ nin Kibrɔtu-Ataava+ lɔ’n, amun klɔklɔli Zoova lele ɔ fali ya. 23 Kɛ e juli Kadɛsi-Baanea’n, Zoova sunmannin amun.+ Ɔ seli kɛ: ‘Amun wɔ naan amun ko fa mɛn nga ń fá mán amun sakpasakpa’n.’ Sanngɛ amun a faman Zoova m’ɔ ti amun Ɲanmiɛn’n i ndɛ’n su ekun.+ Amun a lafimɛn i su,+ yɛ amun ɲin w’a yimɛn i. 24 Kɛ ɔ fin cɛn mɔ n si amun’n, amun nin-a yaciman ɲin kekle yolɛ Zoova su le.

25 “I sɔ’n ti’n, n utuli min ɲin ase Zoova ɲrun cɛn ba ablanan (40), wia nun nin kɔnguɛ.+ N utuli min ɲin ase sɔ, afin Zoova seli kɛ ɔ́ núnnún amun sekeseke. 26 Sanngɛ n kpatali Zoova kpa. N seli i kɛ: ‘Ee, min Min Zoova, wɔ mɔ a Sie Like Kwlakwla’n, nán nunnun ɔ sran mun. Be ti ɔ bɔbɔ liɛ.*+ Ɔ dan mɔ a ti’n ti’n, a kpɔli be ti. Yɛ tinmin mɔ a le i’n ti’n, a fali be Ezipti lɔ fiteli.+ 27 Maan ɔ wla kpɛn ɔ sufuɛ Abraamun nin Izaaki nin Zakɔbu be su.+ Nán fa ɔ ɲin sie sran nga’m be ɲin kekle’n, nin be klunwi’n, nin be sa tɛ’n su.+ 28 Afin ɔ cɛman naan mɛn nga a fali e nun lɔ bali’n i nunfuɛ’m b’a se kɛ: “Zoova kwlá faman be kɔman mɛn ng’ɔ seli be kɛ ɔ́ fá mán be’n nun. Kpɔlɛ m’ɔ kpɔ be’n ti’n, ɔ fali be ɔli naan ɔ́ kún be aawlɛ flɛnnɛn’n nun.”+ 29 Afin ɔ sran mun-ɔn, be ti ɔ bɔbɔ liɛ,*+ a yili ɔ tinmin dan’n nin ɔ wunmiɛn’n be nglo naan w’a fa be Ezipti lɔ w’a fite.’+

10 “Blɛ sɔ’n nun’n, Zoova seli min kɛ: ‘Sɛ yɔbuɛ paplaapla nɲɔn kɛ klikli liɛ mun sa+ naan bla min wun wa oka’n su. Asa ekun’n, fa waka bobo alaka. 2 Ndɛ ng’ɔ o yɔbuɛ paplaapla klikli nga a bubuli be nun’n be su’n, ń má klɛ́ be yɔbuɛ paplaapla sɔ’m be su. Kpɛkun fa be sie i alaka’n nun.’ 3 Ɔ maan n fali akasia waka n fa boboli alaka. Yɛ n sɛli yɔbuɛ paplaapla nɲɔn kɛ klikli liɛ mun sa, kpɛkun n fa be n fuli oka’n su lɔ.+ 4 Ndɛ ng’ɔ klɛli be yɔbuɛ paplaapla’m be su laa’n, i kunngba’n yɛ ɔ klɛli-ɔ.+ Ndɛ sɔ mun yɛle Mmla Blu*+ nga Zoova mannin amun oka’n su lɔ’n. Kɛ ɔ́ yó sɔ’n, nn amun a yia,+ yɛ sin’n jueman oka’n su lɔ aɔwi.+ Kpɛkun Zoova fali yɔbuɛ paplaapla mun mannin min. 5 I sin’n, n fɛli i oka’n su lɔ n jrali.+ Kpɛkun n fali yɔbuɛ paplaapla mun n sieli be alaka nga n boboli’n nun kɛ nga Zoova seli min kɛ n yo’n sa. Dɔ nga su’n, be te o nun.

6 “I sin’n, Izraɛlifuɛ’m be fɛli i Beerɔti Bene-Zaakan lɛ be ɔli Mɔzera. Kɛ be juli lɔ’n, Aarɔn wuli naan b’a sie i lɛ,+ kpɛkun i wa Eleazaa sinnin i ja nun kacili Ɲanmiɛn ɲrun jranfuɛ.+ 7 Be jasoli lɛ naan b’a wɔ Gudugoda. Kɛ be fɛli i Gudugoda lɛ’n, be ɔli Zɔtubata.+ Be diman nzue ba’m be yalɛ lika sɔ’n nun.

8 “Blɛ sɔ’n nun’n, Zoova kpali Levi akpasua’n nunfuɛ mun sieli be ngunmin.+ I waan be sua Zoova i aenguɛ’n i alaka’n,+ be jran Zoova ɲrun naan be di junman be mɛn i yɛ be bo muae man sran mun i dunman nun.+ Lele nin andɛ’n i sɔ yɛ be yo-ɔ. 9 Like nga ti yɛ b’a manman Levi i aja like kɛ i niaan’m be sa’n yɛ ɔ o lɛ-ɔ. I like liɛ ng’ɔ ɲɛnnin i’n yɛle Zoova. I sɔ yɛ Zoova m’ɔ ti amun Ɲanmiɛn’n kan kleli i-ɔ.+ 10 Min liɛ’n, n kali oka’n su lɔ cɛn ba ablanan (40) wia nun nin kɔnguɛ kɛ klikli liɛ’n sa.+ Blɛ sɔ’n nun’n, Zoova tili min nuan ndɛ’n ekun.+ Zoova w’a kunndɛman kɛ ɔ́ núnnún amun kun. 11 I sin’n, Zoova seli min kɛ: ‘Dun nvlefuɛ’m be ɲrun, amun siesie amun wun naan amun wɔ. I liɛ’n, bé kó fá lika nga n tali be nannan’m be nda kɛ ń fá mán be’n, kpɛkun bé trán nun.’+

12 “?Izraɛli, ngue yɛ Zoova m’ɔ ti ɔ Ɲanmiɛn’n waan a yo-ɔ?+ Nga i waan a yo’n yɛ: Sro Zoova m’ɔ ti ɔ Ɲanmiɛn’n,+ fɛ i atin’m be kwlaa be su,+ klo i, fa ɔ awlɛn’n kwlaa nin ɔ nguan’n kwlaa su Zoova m’ɔ ti ɔ Ɲanmiɛn’n,+ 13 yɛ fa Zoova i afɔtuɛ nin i mmla fanunfanun nga n su kan kle wɔ andɛ yɛ’n be su, ɔ bɔbɔ ɔ kpa yolɛ ti.+ 14 Ɲanmiɛn m’ɔ la nglo lɔ plaii’n, nin nglo lɔ lika m’ɔ o mmuammua kpa lɔ’n, ɔ nin asiɛ’n nin i su ninnge’m be kwlaa be ti Zoova m’ɔ ti ɔ Ɲanmiɛn’n i liɛ.+ 15 Zoova fɛli i wun mantannin amun nannan mun. Yɛ ɔ yili i nglo kɛ ɔ klo be. Kpɛkun ɔ niannin nvlenvle’m be kwlaa be nun naan w’a fa amun mɔ amun ti be osu’n nunfuɛ’n.+ Andɛ’n, amun ti i liɛ. 16 I sɔ’n ti’n, amun yo naan amun awlɛn’n nun yo sanwun,*+ yɛ amun yaci ɲin kekle yolɛ’n.*+ 17 Afin Zoova m’ɔ ti amun Ɲanmiɛn’n ɔ ti ɲanmiɛn’m be Ɲanmiɛn,+ yɛ ɔ ti miɛn’m be Miɛn. Ɔ ti kpli, ɔ le tinmin dan, ɔ yo sro. Ɔ kpaman sran nun+ yɛ ɔ sɔman adi ninnge nun. 18 Ɔ kan ba ng’ɔ leman si’n* nin angbeti bla’n be ti ndɛ kɛ ɔ nin i fata’n sa.+ Ɔ klo aofuɛ ng’ɔ tran amun afiɛn’n,+ yɛ ɔ mɛn i aliɛ nin tralɛ. 19 Amun kusu amun klo aofuɛ nga be tran amun afiɛn’n. Afin laa’n, amun yoli aofuɛ Ezipti mɛn’n nun lɔ.+

20 “Sro Zoova m’ɔ ti ɔ Ɲanmiɛn’n, su i,+ fa ɔ wun mɛntɛn i, yɛ i dunman’n yɛ fa ta nda-ɔ. 21 I yɛ ɔ fata kɛ a mɛnmɛn i-ɔ.+ Ɔ ti ɔ Ɲanmiɛn. I yɛ ɔ yoli ninnge dandan mun nin sa sroesroe mun mannin wɔ mɔ ɔ ɲinma tali be’n niɔn.+ 22 Kɛ ɔ nannan’m bé kɔ́ Ezipti’n, be ti sran ableso (70).+ Sanngɛ siɛn’n, Zoova m’ɔ ti ɔ Ɲanmiɛn’n w’a yo maan amun a sɔn kaka kpa kɛ nzraama nga be o ɲanmiɛn su lɔ’n sa.+

11 “Maan amun klo Zoova m’ɔ ti amun Ɲanmiɛn’n.+ Like kwlaa ng’ɔ fata kɛ amun yo mɛn i’n, amun yo, yɛ amun fɛ i afɔtuɛ mun nin i mmla fanunfanun’m be su tititi. 2 Amun si kɛ amun yɛ n su kan ndɛ kle amun andɛ-ɔ. Amun mma nga b’a wunman fɔ nga Zoova m’ɔ ti amun Ɲanmiɛn’n tuli sran mun’n, ɔ nin i dan m’ɔ ti’n,+ nin wafa ng’ɔ yili i tinmin dan’n+ nin i wunmiɛn’n be nglo’n, naan se kɛ bé sí nun ndɛ’n, nán be yɛ n su kan ndɛ’n n kle be-ɔ.+ 3 Be liɛ’n, b’a wunman abonuan sa nin like ng’ɔ fa yoli Faraɔn m’ɔ ti Eziptifuɛ’m be famiɛn’n Ezipti lɔ’n, ɔ nin be kwlaa nga be o i mɛn’n nun’n.+ 4 B’a wunman like ng’ɔ fa yoli Ezipti lɔ sonja mun’n, nin Faraɔn i nnɛn kpanngɔ nin i kakaklolo ng’ɔ fa kun alɛ’n. Kɛ bé wánndi fúan amun’n, Jenvie Ɔkwlɛ’n katali be su kplu. Yɛ Zoova nunnunnin be mlɔnmlɔnmlɔn.+ 5 B’a wunman like ng’ɔ yo mannin amun* aawlɛ flɛnnɛn’n nun lɔ lele mɔ amun fa juli lika nga nun wa’n. 6 B’a wunman like ng’ɔ fa yoli Datan nin Abiramun mɔ be ti Ribɛnin i wa Eliabu i mma mun’n. Izraɛlifuɛ’m be kwlaa be ɲrun lɛ’n, asiɛ’n nun kpacili, kpɛkun ɔ mɛnnin be nin be awlofuɛ mun nin be tannin sua mun nin klɔ sran nin nnɛn kwlaa nga be suli be su’n.+ 7 Sa dandan nga Zoova yoli be’n, amun ɲinma tali be kwlaa.

8 “Mmla nga n su fa man amun andɛ yɛ’n, amun nian su kpa. Sɛ amun yo sɔ’n, amún ɲán fanngan. Kpɛkun amún kpɛ́ Zurdɛn’n bé kó fá mɛn ng’ɔ o i sin lɔ’n. 9 Yɛ amún cɛ́ kpa+ mɛn nga Zoova tali amun nannan mun nin be osu’n nunfuɛ’m be nda kɛ ɔ́ fá mán be’n nun.+ Nɔnnɔn nin awɛma nzue be sonji mɛn sɔ’n nun.+

10 “Mɛn nga amun su ko fa’n, ɔ timan kɛ Ezipti mɛn mɔ amun fin lɔ’n sa. Lɔ liɛ’n, amun lua ninnge mun. Yɛ amun ja yɛ amun fa gua be bo nzue kɛ nga sran’m be gua tro mma nga be di be fie’n be bo nzue’n sa.* 11 Sanngɛ mɛn nga amun su wa ko fa’n, ɔ ti okaoka lika, yɛ i lika wie’m be ti kpɛtɛkplɛɛ.+ Nzue’n tɔ lɔ kpa liɛ su.+ 12 Zoova m’ɔ ti amun Ɲanmiɛn’n nian mɛn sɔ’n i lika kpa. Kɛ afuɛ’n bo i bo lele m’ɔ́ fá wíe’n, Zoova m’ɔ ti amun Ɲanmiɛn’n i ɲin tuman mɛn sɔ’n su le.

13 “Sɛ amun tu amun klun nanti min mmla nga n su fa man amun andɛ yɛ’n be su’n, naan amun klo Zoova m’ɔ ti amun Ɲanmiɛn’n, naan amun fa amun awlɛn’n kwlaa nin amun nguan’n kwlaa su i’n,+ 14 n kusu ń yó mán nzue’n tɔ́ amun mɛn’n nun blɛ ng’ɔ ti su’n i su sɛsɛsɛ. Nzue klikli mun, nin nzue kasiɛn’m be tɔlɛ blɛ’n su sɛnmɛn i wun. Yɛ amún ɲán ble nin i wunsu ninnge mun, ɔ nin duvɛn uflɛuflɛ nin ngo kaka.+ 15 Ń yó maan ijre’m bé fífí mán amun naan amun nnɛn’m be di. Yɛ amún ɲán aliɛ amún dí i lele amun ku yí.+ 16 Amun nian amun wun kpa. Nán amun ti nun saci naan amun fa atin uflɛ su. I liɛ’n, amun su sɔman amuin, yɛ amun su kotoman be bo.+ 17 Sɛ ɔ timɛn i ti’n, Zoova fá amun wun ya dan kpa. Ɔ́ tánnin nzue m’ɔ fin ɲanmiɛn su’n. Ɔ maan nzue su tɔman.+ Yɛ asiɛ’n su yoman ninnge’m be ye. Kpɛkun amún núnnún ndɛndɛ kpa mɛn klanman nga Zoova su fa man amun’n i nun.+

18 “Amun fa ndɛ sɔ mun sie amun awlɛn’n nun, amun fa sie amun klun kpa. Maan ɔ yo kɛ like wie mɔ amun a fa cici amun sa’n sa naan amun wla kpɛn su. Yɛ maan ɔ yo kɛ like wie mɔ amun a fa cici amun ngban’n su’n*+ sa. 19 Amun fa kle amun mma’m be like. Sɛ amun ti amun sua’n nun lɔ-o, sɛ amun su nanti atin’n nun-o, sɛ amun a la-o, sɛ amun a jaso-o, amun kan be ndɛ kle be.+ 20 Amun klɛ be amun sua’m be anuan’m be kadri’m be su, ɔ nin amun klɔ’m be anuan’m be su. 21 I liɛ’n, amun bɔbɔ nin amun mma’m bé cɛ́ kpa+ mɛn nga Zoova tali nda kɛ ɔ́ fá mán amun nannan mun’n i nun.+ Sɛ ɲanmiɛn m’ɔ o asiɛ’n i ti su nglo lɔ plaii’n nin-a jasoman lɛ’n, amun kusu amun su jasoman mɛn sɔ’n nun.

22 “Sɛ amun fa mmla nga n su fa man amun’n su sɛsɛsɛ’n, naan amun nian su nanti’n, sɛ amun klo Zoova m’ɔ ti amun Ɲanmiɛn’n,+ naan amun nanti atin kwlaa ng’ɔ kle amun’n su’n, naan amun fa amun wun mɛntɛn i’n,+ 23 Zoova kán nvle sɔ mɔ be o amun ɲrun’n, be kwlaa be bo.+ Kpɛkun amún fá nvle mɔ be ti dandan tra amun liɛ’n, mɔ be nunfuɛ’m be sɔnnin tra amun’n be mɛn’n.+ 24 Lika kwlaa nga amún tía lɛ’n, ɔ́ káci amun liɛ.+ Amun mɛn’n i nuan su’n fɛ́ i aawlɛ flɛnnɛn’n nun lɔ lele fá jú Liban. Yɛ ɔ́ fɛ́ i Nzue’n i nuan lɔ, yɛle kɛ Efrati i nuan lɔ lele fá jú jenvie ng’ɔ o wia atɔliɛ lɔ’n* i nuan lɔ.+ 25 Sran fi su jranman amun ɲrun.+ Zoova m’ɔ ti amun Ɲanmiɛn’n wá yó maan lika wunmuan nga amún wá sín nun’n, i nunfuɛ’m bé sró amun dan+ kɛ ng’ɔ kan kleli amun’n sa.

26 “Amun nian, andɛ’n m’an fa muae nin ɲrɛnnɛn* m’an sie amun ɲrun:+ 27 Sɛ amun nanti Zoova m’ɔ ti amun Ɲanmiɛn’n i mmla nga n su fa man amun andɛ yɛ’n be su’n, amún ɲán muae.+ 28 Sɛ amun nantiman Zoova m’ɔ ti amun Ɲanmiɛn’n i mmla’m be su, naan amun yaci atin nga n su kle amun andɛ yɛ’n i su falɛ naan amun ko sɔ amuin mɔ amun siman be’n, amún wún ɲrɛnnɛn.+

29 “Kɛ Zoova m’ɔ ti amun Ɲanmiɛn’n ko fa amun ko wlu mɛn nga amún wá fá’n nun’n, maan amun bo muae Garizimun Oka’n su, yɛ amun bo sannzan Ebali Oka’n su.+ 30 Oka sɔ’m be o Zurdɛn’n i sin lɔ, wia atɔliɛ lɔ, Kanaanfuɛ nga be tran Araba’n be mɛn’n nun. Kanaanfuɛ sɔ’m be o Gilgali i ɲrun ndɛnman su lɛ, More lɔ waka dandan’m be wun lɔ.+ 31 Afin amun su kpɛ Zurdɛn’n naan amún kó trán mɛn nga Zoova m’ɔ ti amun Ɲanmiɛn’n su fa man amun’n nun.+ Kɛ amun ko fa mɛn sɔ’n mɔ amun ko tran nun’n, 32 amun nian nun nanti afɔtuɛ nin mmla fanunfanun nga n su fa man amun andɛ yɛ’n, be su kpa.+

12 “Kɛ amun ko tran mɛn nga Zoova m’ɔ ti amun nannan’m be Ɲanmiɛn’n wá fá mán amun’n nun’n lele mɔ wie’n fá kún amun’n, afɔtuɛ nin mmla fanunfanun ng’ɔ fata kɛ amun nian nun nanti be su’n yɛ. 2 Amun bubu nvle nga amún wá fá be lika’n be amuin sɔwlɛ mun sekeseke.+ Kannzɛ lika sɔ’m be o oka tɛnndɛn’m be su, annzɛ kpɔlɛ’m be su, annzɛ waka kwlaa nga be le nɲa kpanngban’n be bo’n, amun saci be kwlaa. 3 Amun bubu be tɛ yiwlɛ mun, amun kpukekpuke yɔbuɛ nga be takali be mɔ be sɔ be’n be nun.+ Amun wɔ waka nga be sɔ be’n* be nun. Yɛ amun bubu be amuin nga be sɛli be’n+ naan be dunman’n nunnun lika sɔ’n nun sekeseke.+

4 “Nán amun su Zoova m’ɔ ti amun Ɲanmiɛn’n kɛ ngalɛ’n sa.+ 5 Sanngɛ amun akpasua’m be nun’n, lika kwlaa nga Zoova m’ɔ ti amun Ɲanmiɛn’n fɛ́ i dunman síe su’n m’ɔ́ yó i tranwlɛ’n, amun wɔ lɔ ko su i.+ 6 Nnɛn nga amún fá yí tɛ nga kɛ bé yí’n be yra nnɛn’n i kɔlikɔli’n,+ nin nnɛn nga amún fá yí tɛ mun’n, nin amun blusu’n,+ nin amun sa nun like nga amún fá mán Ɲanmiɛn’n,+ nin like nga amun tali Ɲanmiɛn i nda kɛ amún fá mɛ́n i’n, nin amun klunklo ninnge nga amún fá mɛ́n i’n,+ nin amun bua annzɛ amun boli annzɛ amun nannin’m be mma klikli mun’n,+ lika sɔ’n nun yɛ ɔ fata kɛ amun fa be wɔ-ɔ. 7 Amun nin amun awlofuɛ mun amun di like lika sɔ’n nun, Zoova m’ɔ ti amun Ɲanmiɛn’n i ɲrun lɛ.+ Kpɛkun amun di aklunjɔɛ like kwlaa nga amún yó’n nun.+ Afin Zoova m’ɔ ti amun Ɲanmiɛn’n yrali amun su.

8 “Nán amun yo kɛ nga e fa yo i wa andɛ’n sa, mɔ like kwlaa nga sran kun klo kɛ ɔ́ yó’n,* yɛ ɔ yo’n. 9 Afin amun nin-a juman wunmiɛn lolɛ lika’n+ ɔ nin mɛn nga Zoova m’ɔ ti amun Ɲanmiɛn’n su wa fa man amun’n nun. 10 Kɛ amún wá kpɛ́ Zurdɛn’n+ mɔ amún wá kó trán mɛn nga Zoova m’ɔ ti amun Ɲanmiɛn’n su fa man amun nun’n, ɔ́ yó maan amún ɲán amun ti amun kpɔfuɛ mɔ be sin yia amun’n be sa nun. Kpɛkun amun klun su titiman amun.+ 11 Like kwlaa nga n seli amun kɛ amun fa man’n, amun fa wɔ lika nga Zoova m’ɔ ti amun Ɲanmiɛn’n fɛli i dunman’n sieli su’n+ nun. Like sɔ mun yɛ: nnɛn nga be fa yi tɛ nga kɛ bé yí’n be yra nnɛn’n i kɔlikɔli’n, nin nnɛn nga amún fá yí tɛ mun’n, nin amun blusu’n,+ nin amun sa nun like nga amún fá mán Ɲanmiɛn’n, nin like kwlaa nga amun tali Zoova i nda kɛ amún fá mɛ́n i’n. 12 Maan amun nin amun mma yasua mun, nin amun mma bla mun, nin amun kanga yasua mun, nin amun kanga bla mun, nin Levifuɛ nga be o amun klɔ’m be su’n, be di aklunjɔɛ Zoova m’ɔ ti amun Ɲanmiɛn’n i ɲrun.+ Afin b’a manman be aja like kɛ amun sa.+ 13 Amun nian amun wun kpa. Nán amun wɔ lika nga amun klo’n nun be ko yi tɛ nga kɛ bé yí’n be yra nnɛn’n i kɔlikɔli’n.+ 14 Kɛ Zoova nian amun akpasua’m be nun’n, lika ng’ɔ kle’n, i nun ngunmin cɛ yɛ amun ko yi tɛ nga kɛ bé yí’n be yra nnɛn’n i kɔlikɔli’n niɔn. Yɛ lika sɔ’n nun ngunmin yɛ amun yo like kwlaa nga n se amun kɛ amun yo’n niɔn.+

15 “Sanngɛ blɛ kwlaa nga amun konvi sɔ nnɛn’n, amun kwla kun wie di,+ kɛ nga Zoova m’ɔ ti amun Ɲanmiɛn’n fa yra amun su amun klɔ’m be kwlaa be su’n fa ju’n sa. Sran ng’ɔ o fiɛn nun’n nin sran ng’ɔ ti sanwun’n, be kwla di wie, kɛ nga amun fa di wannzannin’n annzɛ flete’n sa. 16 Sanngɛ i mmoja fuɛ’n, nán amun di.+ Amun guɛ i ase kɛ nzue sa.+ 17 Sanngɛ amun ble annzɛ i wunsu like’n i blusu’n, nin amun duvɛn uflɛuflɛ’n i blusu’n, nin amun ngo’n i blusu’n, nin amun bua annzɛ amun boli annzɛ amun nannin’m be mma klikli’n,+ nin like nga amun tali Ɲanmiɛn i nda kɛ amún fá mɛ́n i’n, nin amun klunklo ninnge nga amún fá mɛ́n i’n, nin amun sa nun like nga amún fá mɛ́n i’n, nán amun di ninnge sɔ’m be nun wie fi amun klɔ’m be su. 18 Amun di ninnge sɔ mun Zoova m’ɔ ti amun Ɲanmiɛn’n i ɲrun lɛ, lika nga Zoova m’ɔ ti amun Ɲanmiɛn’n klé amun’n nun.+ Maan amun bɔbɔ nin amun mma yasua mun, nin amun mma bla mun, nin amun kanga yasua mun, nin amun kanga bla mun, nin Levifuɛ ng’ɔ o amun klɔ’m be su’n, amun di i lɛ. Kpɛkun amun di aklunjɔɛ like kwlaa nga amún yó’n nun, Zoova m’ɔ ti amun Ɲanmiɛn’n i ɲrun lɛ. 19 Amun nian amun wun, sɛ amun o amun mɛn’n nun naan wie’n nin-a kunman amun’n, nán amun ɲin kpa Levifuɛ’m be su.+

20 “Kɛ Zoova m’ɔ ti amun Ɲanmiɛn’n wá yó maan amun tranwlɛ’n trɛ́+ kɛ ng’ɔ kan kleli amun sa’n,+ sɛ amun konvi sɔ nnɛn naan amun se kɛ: ‘N klo kɛ ń dí nnɛn’n,’ amun kwla di nnɛn blɛ kwlaa nga amun konvi sɔ i’n nun.+ 21 Sɛ lika nga Zoova m’ɔ ti amun Ɲanmiɛn’n fɛli i dunman’n sieli su’n+ wo mmua’n, amun kun amun nannin annzɛ amun bua annzɛ amun boli nga Zoova fa mannin amun’n be nun wie mun, kɛ nga n kan kleli amun’n sa. Kpɛkun blɛ kwlaa nga amun konvi sɔ nnɛn’n, amun di be amun klɔ’m be nun. 22 Amun di be kɛ nga amun fa di wannzannin’n nin flete’n sa.+ Sran ng’ɔ o fiɛn nun’n nin sran ng’ɔ ti sanwun’n, be nɲɔn’n be kwla di wie. 23 Sanngɛ mmoja fuɛ’n, amun nian amun wun kpa, nán amun di.+ Afin mmoja’n yɛle nguan’n.+ Nán amun di nguan’n nin nnɛn ba’n. 24 Nán amun di. Amun guɛ i ase kɛ nzue sa.+ 25 Nán amun di. I liɛ’n, amun nin amun mma mun, amún wún amun wun fɛ. Afin like ng’ɔ ti kpa Zoova ɲrun’n yɛ amun yo-ɔ. 26 Amun fa amun ninnge nga amun sieli be kɛ be yo Ɲanmiɛn liɛ klonglo’n, nin ninnge nga amun tali nda kɛ amún fá mán Ɲanmiɛn’n be ngunmin be bla lika nga Zoova wá klé’n nun. 27 Kɛ amun ju lɔ mɔ amún yí tɛ nga kɛ bé yí’n be yra nnɛn’n i kɔlikɔli’n, amun gua nnɛn ba’n nin i mmoja’n+ Zoova m’ɔ ti amun Ɲanmiɛn’n, i tɛ yiwlɛ’n su. Sanngɛ kɛ amún yí tɛ uflɛ’n, amun fa nnɛn’m be mmoja’n guɛ i Zoova m’ɔ ti amun Ɲanmiɛn’n i tɛ yiwlɛ’n i wun lɛ.+ Kpɛkun nnɛn fuɛ’n, amun kwla di.

28 “Amun nian amun wun, amun fa ndɛ kwlaa nga n su kan kle amun’n be su kpa. I liɛ’n, amun nin amun mma mun, amún wún amun wun fɛ. Afin like ng’ɔ ti kpa’n, nin like ng’ɔ ti su Zoova m’ɔ ti amun Ɲanmiɛn’n i ɲrun’n yɛ amun yo-ɔ.

29 Kɛ Zoova m’ɔ ti amun Ɲanmiɛn’n wá núnnún nvlefuɛ nga amún wá fá be mɛn’n,+ mɔ amún kó trán lɔ’n, 30 amun nian amun wun. Kɛ nvle sɔ’m be nunfuɛ’m be ko nunnun amun ɲrun’n, nán amun yo like nga be yoli’n wie. Nán amun usa be ɲanmiɛn liɛ’m be osu. Nán amun se kɛ: ‘?Wafa sɛ yɛ nvle sɔ’m be nunfuɛ’m be sɔ be ɲanmiɛn liɛ mun bɔbɔ li-ɔ? N kusu ń yó kɛ be sa.’+ 31 Nán amun su Zoova m’ɔ ti amun Ɲanmiɛn’n kɛ ngalɛ’n sa. Afin ninnge nga be yo man be ɲanmiɛn mun’n, Zoova kpɔ be kwlaa. I wie yɛle kɛ be fa be wa yasua nin be wa bla’n be yi be sin’n nun fa man be ɲanmiɛn mun.+ 32 Ndɛ kwlaa nga n kan kle amun’n, amun nian nun fa su.+ Nán amun kpɛ wie gua nun, nán amun kpɛ wie yi kusu.+

13 “Sɛ amun nun sran kun jaso naan i waan ɔ ti Ɲanmiɛn nuan ijɔfuɛ annzɛ ɔ cɛn sa nga bé wá jú’n be su laliɛ’n, naan ɔ kle amun nzɔliɛ kun, annzɛ ɔ kan sa kun i ndɛ’n, 2 naan nzɔliɛ sɔ’n annzɛ sa ng’ɔ kannin be ndɛ kleli amun’n be kpɛn su sakpasakpa’n, sanngɛ ɔ se amun kɛ: ‘Maan e fa e wun man ɲanmiɛn uflɛ mun naan e su be’n,’ kusu nn amun siman ɲanmiɛn sɔ mun laa, 3 nán amun sie amun su Ɲanmiɛn nuan ijɔfuɛ sɔ’n annzɛ laliɛ cɛnfuɛ sɔ’n i nuan bo.+ Afin Zoova m’ɔ ti amun Ɲanmiɛn’n su sa amun naan ɔ́ nían+ sɛ amun fa amun awlɛn’n kwlaa nin amun nguan’n kwlaa fa klo Zoova m’ɔ ti amun Ɲanmiɛn’n nin-o.+ 4 Zoova m’ɔ ti amun Ɲanmiɛn’n yɛ ɔ fata kɛ amun fa amun wun mɛn i-ɔ. Amun sro i, amun nanti i mmla’m be su, yɛ amun tie ndɛ ng’ɔ kan’n. Amun su i kunngba cɛ, yɛ amun fa amun wun mɛntɛn i.+ 5 Sanngɛ Ɲanmiɛn nuan ijɔfuɛ sɔ’n, annzɛ laliɛ cɛnfuɛ sɔ’n, amun kun i.+ Afin ɔ wlawlali amun kɛ amun jaso Zoova m’ɔ ti amun Ɲanmiɛn’n i wun. Kusu nn i yɛ ɔ fali amun Ezipti mɛn’n nun lɔ fiteli-ɔ, kɛ ɔ́ yó sɔ’n nn amun ti kanga nvle sɔ’n nun.* Sran sɔ’n waan ɔ́ yó naan amun yaci atin nga Zoova m’ɔ ti amun Ɲanmiɛn’n kleli amun’n i lɛ be fa uflɛ su. Amun nunnun like ng’ɔ ti tɛ’n amun afiɛn.+

6 “Sɛ ɔ nin i wa yasua kun, yɛle kɛ ɔ niaan bian, annzɛ ɔ wa yasua, annzɛ ɔ wa bla, annzɛ ɔ yi mɔ a klo i kpa’n, annzɛ kusu ɔ janvuɛ dan kpafuɛ’n kunndɛ blɛblɛɛblɛ kɛ ɔ́ láka ɔ naan ɔ se ɔ kɛ: ‘Maan e ko su ɲanmiɛn uflɛ,’+ kusu nn ɔ bɔbɔ nin ɔ nannan’m be siman ɲanmiɛn sɔ 7 mɔ be ti nvle nga be sin yia amun’n be ɲanmiɛn liɛ mun’n, sɛ be o koko-o, sɛ be o mmua-o, sɛ be o nvle’n i bue kun su lele fa ju i bue uflɛ su-o, 8 nán kplin su, nán fɛ i ndɛ’n su,+ nán si i aunnvɔɛ, yɛ nán se kɛ á sɛ́sɛ́ i. 9 Sanngɛ kunlɛ cɛ yɛ ɔ fata kɛ a kun i-ɔ.+ Wɔ yɛ ɔ fata kɛ a dun mmua fin i like naan ɔ wu-ɔ. Yɛ maan sran onga’m be finfin i like wie.+ 10 Finfin i yɔbuɛ lele naan ɔ wu.+ Afin i waan ɔ́ sáci ɔ ti nun naan a kaci ɔ sin si Zoova m’ɔ ti ɔ Ɲanmiɛn’n. Kusu nn, i yɛ ɔ fali ɔ Ezipti lɔ fiteli-ɔ. Kɛ ɔ́ yó sɔ’n, nn a ti kanga nvle sɔ’n nun.* 11 Kɛ ɔ ko yo sɔ’n, Izraɛlifuɛ’m be kwlaa bé tí, kpɛkun srɛ kún be. Ɔ maan amun nun wie fi su yoman sa tɛ kɛ ngalɛ’n sa kun.+

12 “Wienun-ɔn, amun ti i klɔ nga Zoova m’ɔ ti amun Ɲanmiɛn’n su wa fa man amun’n, be nun kun su kɛ 13 finfinfuɛ wie’m b’a jaso amun afiɛn, be su saci be klɔfuɛ’m be ti nun. Sran sɔ’m be waan amun wɔ naan amun ko su ɲanmiɛn mɔ amun siman be laa’n. 14 Sɛ amun ti i sɔ ndɛ’n, amun nian nun kɛn i kpa. Amun usausa nun kpa.+ Sɛ amun wun kɛ ndɛ sɔ’n ti nanwlɛ naan be yoli tete like sɔ’n amun afiɛn sakpasakpa’n, 15 amun fa tokofi naan amun kun klɔ sɔ’n i sufuɛ mun.+ Amun saci klɔ’n. Amun fa tokofi kun nnɛn’m be ngba yɛ amun nunnun klɔ’n nun ninnge’m be kwlaa.+ 16 Amun fa klɔ’n nun ninnge kpakpa mun yɛ amun tian be nuan klɔ’n i gua’n su lɛ. Kpɛkun amun wɔ klɔ’n nun. Amun fa ninnge kpakpa sɔ mun man Zoova m’ɔ ti amun Ɲanmiɛn’n. Yɛ klɔ sɔ’n káci klɔ nvuɛn sa trilili, nán maan be kplɛn i ekun. 17 Ninnge nga sacilɛ yɛ ɔ fata kɛ amun saci be’n, nán maan wie fi ka amun sa nun.+ I liɛ’n, Zoova su faman amun wun ya, yɛ ɔ́ sí amun aunnvɔɛ. Kpɛkun ɔ́ yó maan amún sɔ́n kpanngban kpa kɛ ng’ɔ tali amun nannan’m be nda’n sa.+ 18 Afin ɔ fata kɛ amun ɲin yi Zoova m’ɔ ti amun Ɲanmiɛn’n. Amun fɛ i mmla kwlaa nga n su fa sie amun ɲrun andɛ’n be su. I liɛ’n, amún yó sa ng’ɔ ti kpa Zoova m’ɔ ti amun Ɲanmiɛn’n i ɲrun.+

14 “Amun ti Zoova m’ɔ ti amun Ɲanmiɛn’n i mma mun. Sɛ amun sran wu’n,+ nán amun fa like kpɛkpɛ amun wun,+ yɛ nán amun yi amun ɲinma sin ndrɛ’n.* 2 Afin amun ti Zoova m’ɔ ti amun Ɲanmiɛn’n i liɛ klonglo.+ Zoova kpali amun nvle kwlaa nga be o asiɛ’n su’n be nun naan amun kaci i nvle, naan amun yo i liɛ klonglo.+

3 “Nán amun di ninnge nga Ɲanmiɛn kloman be’n, be nun wie fi.+ 4 Nnɛn nga amun kwla di be’n be yɛ:+ Nannin, nin bua, nin boli, 5 nin flete, nin wannzannin, nin labɔ, nin blo boli, nin jangba, nin blo bua, nin bua nga be la oka’m be su’n. 6 Amun kwla di nnɛn nga be ja bui’n nun ti kpaciwa’n mɔ be kpu like be di’n, be kwlaa. 7 Sanngɛ nnɛn nga be kpu like be di’n annzɛ nnɛn nga be ja bui’n nun ti kpaciwa m’ɔ fataman kɛ amun di’n be’n yɛ: Ɲɔnngɔnmin, nin gbanmlɔ, ɔ nin oya. Afin be kpu like be di, sanngɛ be ja bui’n nun timan kpaciwa. Amun bu be like fiɛn.+ 8 Nán amun di kɔkɔti’n wie. Afin i ja bui’n nun ti kpaciwa, sanngɛ ɔ kpuman like diman. Ɔ ti fiɛn. Nán amun di i nnɛn’n, yɛ nán amun kɛn i fuɛn’n.

9 “Nnɛn nga be o nzue’n nun mɔ amun kwla di be’n be yɛ: Amun kwla di nga be le mmɛ nin wun bui’n.+ 10 Sanngɛ nán amun di nnɛn nga be o nzue nun mɔ be leman mmɛ nin wun bui’n be wie fi. Be ti fiɛn.

11 “Amun kwla di anunman nga be ti sanwun’n be kwlakwla. 12 Sanngɛ nán amun di nga mun: Anunman ɲin, nin asri nga jue yɛ ɔ ti i aliɛ’n, nin apɛtɛkuasi ble’n,+ 13 nin kotoklo ɔkwlɛ’n, nin kotoklo ble’n, nin kotoklo wafawafa kwlaa, 14 nin kɔkɔkuankuan wafawafa kwlaa, 15 nin klɔnsoklo, nin akpatue, nin muɛti,* nin asri wafawafa kwlaa, 16 nin akpatue kanngan mun, nin akpatue nga i su’n ti tɛnndɛn’n, nin blo labu, 17 nin nzue su anunman nga be flɛ i kɛ pelikan’n, nin apɛtɛkuasi, nin kɔɔmoran, 18 nin anunman ɔngɔ, nin jejeu wafawafa kwlaa, nin bobomunzue, ɔ nin akpannin. 19 Kakaa nga be le ndɛwa’n, be kwlaa be ti fiɛn. Nán amun di be. 20 Amun kwla di nnɛn kwlaa nga be ti sanwun mɔ be tu sin nglo lɔ’n.

21 “Nnɛn kwlaa nga kɛ amún wún i’n, nn w’a wu’n, nán amun di.+ Amun kwla fa man aofuɛ nga be tran amun klɔ’m be su’n. Be liɛ’n be kwla di. Sɛ amun klo kusu’n, amun kwla yo i atɛ aofuɛ’m be sa nun. Afin amun ti Zoova m’ɔ ti amun Ɲanmiɛn’n i liɛ klonglo.

“Nán amun tɔn boli ba’n i nin i wunflɛn nzue’n nun.+

22 “Afuɛ kwlakwla’n, amun yi amun fie su ninnge kwlaa nga amun ɲɛn i’n i blusu’n man.+ 23 Lika nga Zoova m’ɔ ti amun Ɲanmiɛn’n fɛ́ i dunman’n síe su’n, lɛ yɛ ɔ fata kɛ amun di amun ble annzɛ ɔɔzu’n, nin amun duvɛn uflɛuflɛ’n, nin amun ngo’n be blusu’n nin amun boli nin amun bua nin amun nannin’m be mma klikli’n niɔn.+ I liɛ’n, amún sí wafa nga amun kwla sro Zoova m’ɔ ti amun Ɲanmiɛn’n tititi’n.+

24 “Sanngɛ sɛ lika nga Zoova m’ɔ ti amun Ɲanmiɛn’n fɛ́ i dunman’n síe su’n wo mmua, yɛ atin’n ti tɛnndɛn naan amun kwlá suaman ninnge sɔ mun kɔman lɔ’n+ (afin Zoova m’ɔ ti amun Ɲanmiɛn’n wá yrá amun su,) 25 amun kwla fɛ i sika nun. Kpɛkun amun fa sika sɔ’n fa wɔ lika nga Zoova m’ɔ ti amun Ɲanmiɛn’n klé’n nun. 26 Amun fa sika sɔ’n to like kwlaa nga amun klo’n. Ɔ kwla yo nannin, annzɛ bua, annzɛ boli, annzɛ duvɛn, annzɛ nzan kekleke uflɛ, annzɛ kusu like kwlaa nga amun konvi sɔ i’n. Kpɛkun amun di ninnge sɔ mun Zoova m’ɔ ti amun Ɲanmiɛn’n i ɲrun lɛ, yɛ amun nin amun awlofuɛ mun amun di aklunjɔɛ.+ 27 Kɛ amún yó sɔ’n, nán amun wla fi Levifuɛ nga be tran amun klɔ’n su’n be su.+ Afin b’a manman be aja like kɛ amun sa.+

28 “Afuɛ nsan kwlaa nun’n, amun yi amun fie’m be su ninnge nga amun ɲɛnnin i afuɛ sɔ’n nun’n i blusu’n, kpɛkun amun tian be nuan amun klɔ’m be su.+ 29 I sin’n, maan Levifuɛ mɔ b’a manman be aja like kɛ amun sa’n, nin aofuɛ nga be tran amun klɔ’m be su’n, nin ba nga be leman si’n,* nin angbeti bla nga be tran amun klɔ’m be su’n, be bla naan be wa di aliɛ sɔ mun lele naan be ku yi.+ I liɛ’n, Zoova m’ɔ ti amun Ɲanmiɛn’n, ɔ́ yrá amun su like kwlaa nga amún yó’n nun.+

15 “Afuɛ nso kwlakwla ng’ɔ ju’n, amun yaci amun kalɛ ng’ɔ o sran’m be su’n cɛ be.+ 2 Like ng’ɔ fata kɛ amun yo’n yɛ: Sran kwlaa nga i kalɛ o i wiengu su’n, maan ɔ yaci cɛ i. Nán maan ɔ lɛ i wiengu annzɛ i niaan’n i kalɛ. Afin be boli ndolo sinnin kɛ be yaci kalɛ mun cɛ Zoova dunman nun.+ 3 Aofuɛ’n i liɛ’n, amun kwla lɛ i kalɛ.+ Sanngɛ amun niaan’n i liɛ’n, kannzɛ amun kalɛ ng’ɔ o i su’n ti sɛ ti sɛ’n, amun yaci cɛ i. 4 Sanngɛ ɔ fataman kɛ amun nun wie fi yo yalɛfuɛ. Afin Zoova wá yrá amun su+ lika nga Zoova m’ɔ ti amun Ɲanmiɛn’n su fa man amun naan amun tran nun’n i nun. 5 Sanngɛ sɛ amun tie Zoova m’ɔ ti amun Ɲanmiɛn’n i aniɛn’n naan amun fɛ i mmla kwlaa nga n su fa man amun andɛ yɛ’n su’n, yɛ ɔ́ yrá amun su-ɔ.+ 6 Zoova m’ɔ ti amun Ɲanmiɛn’n wá yrá amun su kɛ ng’ɔ tali amun nda’n sa. Ɔ maan amún bó nvle kpanngban be bosia, sanngɛ amun su usaman be afɛ.+ Amún kwlá nvle kpanngban, sanngɛ be liɛ’n be su kwlaman amun.+

7 “Sɛ amun niaan kun kaci yalɛfuɛ klɔ nga Zoova m’ɔ ti amun Ɲanmiɛn’n su fa be man amun’n be nun kun su’n, nán amun kete amun awlɛn. Nán amun se kɛ amun manman amun niaan m’ɔ o yalɛ nun’n, i like fi.*+ 8 Sanngɛ amun tike amun sa klun’n kle i klun ufue su.+ Yɛ amun fa like kwlaa nga i sa miɛn i wun m’ɔ srɛ amun’n, be mɛn i. 9 Amun nian amun wun kpa. Nán amun bu akunndan tɛ se kɛ: ‘Afuɛ nso su mɔ i nun yɛ be yaci kalɛ mun cɛ’n, w’a mantan koko.’+ Sɛ amun bu i sɔ akunndan’n, amun su yoman amun niaan ng’ɔ ti yalɛfuɛ’n i ye, amun su mɛnmɛn i like fi. Sɛ i sɔfuɛ’n kpan flɛ Zoova amun ayeliɛ’n ti’n, nn sa tɛ yɛ amun a yo-ɔ.+ 10 Amun ti i wun ɲanman nun klun ufue su,+ nán maan ɔ yo mianlɛ su. Afin i sɔ’n ti yɛ Zoova m’ɔ ti amun Ɲanmiɛn’n wá yrá amun su like kwlaa nga amun yo’n ɔ nin ajalɛ kwlaa nga amun fa’n be nun-ɔn.+ 11 Yalɛfuɛ’m be su tuman amun mɛn’n nun le.+ I sɔ’n ti’n, n se amun kɛ: ‘Amun tike amun sa klun’n kle amun niaan ng’ɔ o amun mɛn’n nun mɔ yalɛ’n ti’n, ɔ o afɛ nun’n.’+

12 “Sɛ be yo ɔ niaan kun, yɛle kɛ Ebre yasua kun annzɛ Ebre bla kun i atɛ ɔ sa nun naan ɔ su wɔ afuɛ nsiɛn’n, i afuɛ nso su’n, ɔ fata kɛ a yaci i nun naan ɔ wɔ.+ 13 Kɛ á yáci i nun kusu’n, nán maan ɔ fɛ i sa ngbɛn wɔ. 14 Fa ɔ nnɛn mun nin ɔ fie su ninnge mun nin ɔ ngo’n nin ɔ duvɛn’n wie mɛn i klun ufue su. Tu ɔ klun mɛn i like kɛ nga Zoova m’ɔ ti ɔ Ɲanmiɛn’n fa yrali ɔ su’n sa. 15 Nán ɔ wla fi su kɛ a yoli kanga Ezipti mɛn’n nun lɔ, naan Zoova m’ɔ ti ɔ Ɲanmiɛn’n yɛ ɔ deli wɔ-ɔ. I sɔ ti yɛ n se wɔ kɛ a yo sɔ andɛ-ɔ.

16 “Sanngɛ sɛ ɔ klo ɔ bɔbɔ nin ɔ awlofuɛ mun, yɛ ɔ nin wɔ be trannin fɛfɛ naan ɔ se wɔ kɛ: ‘N su kpɔciman wɔ’n,’+ 17 fa tulie kun yɛ maan ɔ fɛ i su’n sie i anuan’n i wun naan fiti i. Kɛ ɔ ko yo sɔ’n, ɔ́ káci ɔ kanga mlɔnmlɔnmlɔn. Sɛ ɔ kanga sɔ’n ti bla’n, yo i sɔ wie. 18 Sɛ a yaci i nun naan ɔ kɔ kusu’n, nán maan i sɔ liɛ’n yo ɔ ya. Afin junman ng’ɔ dili i afuɛ nsiɛn’n, ɔ tra junman difuɛ nga be tuɛ i kalɛ’n i liɛ’n kpɛ nɲɔn. Asa kusu’n, Zoova m’ɔ ti ɔ Ɲanmiɛn’n yrali ɔ su like kwlaa nun.

19 “Amun fa amun bua annzɛ amun boli annzɛ amun nannin’m be wa yasua klikli mun sie be ngunmin man Zoova m’ɔ ti amun Ɲanmiɛn’n.+ Nán amun fa amun nannin’m be wa yasua klikli’n be di junman wie fi. Nán amun kpɛkpɛ amun bua annzɛ amun boli’m be wa klikli’n be wun ndrɛ’n. 20 Afuɛ kwlakwla’n, amun nin amun awlofuɛ mun amun kun be naan amun di be Zoova m’ɔ ti amun Ɲanmiɛn’n i ɲrun lɛ, lika nga Zoova bɔbɔ wá klé’n nun.+ 21 Sanngɛ sɛ lɛ o nnɛn sɔ’n i wun’n, yɛle kɛ sɛ i ja kun timan kpa’n, annzɛ i ɲinma ti siwa’n, annzɛ tukpacɛ uflɛ o i wun’n, nán amun fa yi tɛ man Zoova m’ɔ ti amun Ɲanmiɛn’n.+ 22 Amun di i amun klɔ’m be nun. Be nga be ti sanwun nin be nga be timan sanwun’n, be kwla di wie kɛ be di wannzannin annzɛ flete’n sa.+ 23 Sanngɛ i mmoja fuɛ’n, nán amun di.+ Amun guɛ i ase kɛ nzue sa.+

16 “Nán amun wla fi Abibu* anglo’n su. Yɛ amun di Delɛ Cɛn’n man Zoova m’ɔ ti amun Ɲanmiɛn’n.+ Afin Abibu anglo’n nun yɛ Zoova m’ɔ ti amun Ɲanmiɛn’n fali amun Ezipti lɔ fiteli kɔnguɛ-ɔ.+ 2 Amun nian amun bua nin amun boli nin amun nannin’m be nun+ naan amun fa Delɛ Cɛn dilɛ nnɛn’n be kun i be man Zoova m’ɔ ti amun Ɲanmiɛn’n,+ lika nga Zoova bɔbɔ fɛli i dunman’n sieli su’n nun.+ 3 Nán amun di nnɛn’n nin like nga levii o nun’n.+ Amun fa cɛn ba nso be di awlabɔɛ kpanwun’n yɛle kɛ kpanwun mɔ levii nunman nun’n. Afin amun fin Ezipti mɛn’n nun lɔ fiteli kplukplu su.+ Lele mɔ wie’n fá kún amun’n, amun yo sɔ naan amun wla kpɛn cɛn nga amun fin Ezipti mɛn’n nun fiteli’n su.+ 4 Nán maan be wun levii amun mɛn’n nun lele cɛn ba nso.+ Cɛn klikli’n su’n, nnɛn nga amún kún i nnɔsua nun’n, nán maan wie ka lɛ kɔnguɛ lele aliɛ cɛn su.+ 5 Amun leman atin be kunman Delɛ Cɛn nnɛn’n klɔ nga Zoova m’ɔ ti amun Ɲanmiɛn’n fa mannin amun’n, be ngba be su. 6 Lika nga Zoova m’ɔ ti amun Ɲanmiɛn’n fɛ́ i dunman’n síe su’n, lɛ yɛ ɔ fata kɛ amun kun Delɛ Cɛn nnɛn’n niɔn. Amun kun Delɛ Cɛn nnɛn’n nnɔsua nun, kɛ sɛnzɛ’n ko tɔ cɛ’n,+ blɛ nga amun jasoli Ezipti lɔ’n i su sɛsɛsɛ. 7 Amun tɔn nnɛn’n naan amun di+ i lika nga Zoova m’ɔ ti amun Ɲanmiɛn’n klé amun’n i nun lɔ.+ Kpɛkun kɛ aliɛ’n ko cɛn’n, amun sa amun sin amun tannin sua’m be nun. 8 Amun di kpanwun mɔ levii nunman nun’n cɛn ba nsiɛn. Yɛ cɛn nso’n su’n, amun yia naan be su Zoova m’ɔ ti amun Ɲanmiɛn’n. Cɛn sɔ’n nun’n, nán amun di junman.+

9 “Kɛ amun fa wlɔsɔ bo amun fie su ninnge’m be kpɛlɛ bo cɛ’n, amun ka lemɔcuɛ nso.+ Amun ka lemɔcuɛ nso, 10 kpɛkun maan amun klun klo su amun fa amun sa nun like be fa di Lemɔcuɛ’m be ti Cɛn be man Zoova m’ɔ ti amun Ɲanmiɛn’n.+ Amun nian wafa nga Zoova m’ɔ ti amun Ɲanmiɛn’n fa yrali amun su’n su naan amun a man like.+ 11 Amun nin amun mma yasua mun, nin amun mma bla mun, nin amun kanga yasua mun, nin amun kanga bla mun, nin Levifuɛ nga be tran amun klɔ’m be su’n, nin aofuɛ nga be tran amun afiɛn’n, nin ba nga be leman si’n,* nin angbeti bla mɔ be o amun afiɛn’n, amun di aklunjɔɛ Zoova m’ɔ ti amun Ɲanmiɛn’n i ɲrun lɛ, lika nga Zoova m’ɔ ti amun Ɲanmiɛn’n fɛ́ i dunman’n síe su’n nun.+ 12 Nán amun wla fi su kɛ amun yoli kanga Ezipti mɛn’n nun lɔ.+ I sɔ’n ti’n, amun nian mmla sɔ’m be su nanti.

13 “Kɛ amun ko wie amun fie su ninnge’m be kpɛ’n, mɔ amun ko cuɛn amun ngo nin amun duvɛn’n, amun fa cɛn ba nso be di Kpata Bo Tranlɛ Cɛn’n.+ 14 Maan amun nin amun mma yasua mun, nin amun mma bla mun, nin amun kanga yasua mun, nin amun kanga bla mun, nin Levifuɛ mun, nin aofuɛ nga be tran amun afiɛn’n, nin ba nga be leman si’n, nin angbeti bla nga be tran amun klɔ’m be su’n, amun di aklunjɔɛ amun cɛn dilɛ blɛ’n nun.+ 15 Amun fa cɛn ba nso be di cɛn+ man Zoova m’ɔ ti amun Ɲanmiɛn’n, lika nga Zoova klé’n nun. Afin Zoova m’ɔ ti amun Ɲanmiɛn’n wá yrá amun fie su ninnge mun nin like kwlaa nga amun yo’n su.+ Ɔ maan saan aklunjɔɛ cɛ yɛ amún dí-ɔ.+

16 “Afuɛ kwlakwla’n, maan yasua’m be kwlaa be ko jran Zoova ɲrun kpɛ nsan lika ng’ɔ́ klé’n nun. Kɛ bé dí Kpanwun mɔ Levii Nunman nun’n i ti Cɛn’n,+ nin Lemɔcuɛ’m be ti Cɛn’n,+ nin Kpata Bo Tranlɛ Cɛn’n,+ maan be wɔ. Nán maan be nun kun sa fɛ i sa ngbɛn bla Zoova ɲrun. 17 Maan be tinuntinun be nian wafa nga Zoova m’ɔ ti amun Ɲanmiɛn’n fa yrali amun su’n su naan be man like.+

18 “Amun nian akpasua kunngunngun’m be nun naan amun kpa sran wie mun naan amun sie be jɔlɛ difuɛ+ nin akpasua’m be ukafuɛ klɔ nga Zoova m’ɔ ti amun Ɲanmiɛn’n su fa be man amun’n be su. Yɛ maan be kan sran’m be ti ndɛ kɛ ɔ nin i fata’n sa. 19 Nán amun di ndɛ kwlɛ,+ nán amun kpa sran nun,+ yɛ nán amun sɔ adi ninnge’m be nun. Afin adi ninnge’m be si ngwlɛlɛfuɛ’n i ɲin.+ Kpɛkun nanwlɛfuɛ’n kanman ndɛ kɛ ɔ nin i fata’n sa kun. 20 Amun di jɔlɛ mun kɛ ɔ nin i fata’n sa. Maan i sɔ yolɛ’n yo amun cinnjin tititi.+ I liɛ’n, amún ká nguan nun, yɛ amún fá mɛn nga Zoova m’ɔ ti amun Ɲanmiɛn’n su wa fa man amun’n.

21 “Nán amun kplan waka ba kun sa kɛ amún sɔ́ i+ tɛ yiwlɛ nga amún kplán mán Zoova m’ɔ ti amun Ɲanmiɛn’n i wun lɛ.

22 “Nán amun siesie yɔbuɛ naan amun sɔ i.+ Afin Zoova m’ɔ ti amun Ɲanmiɛn’n kpɔ i sɔ like’n.

17 “Nannin annzɛ bua nga lɛ wo i wun’n, annzɛ like wie o i wun’n, nán amun fa yi tɛ be man Zoova m’ɔ ti amun Ɲanmiɛn’n, afin Zoova m’ɔ ti amun Ɲanmiɛn’n i ɲin ci i sɔ liɛ’n.+

2 “Wienun-ɔn, amun nun yasua kun annzɛ bla kun o klɔ nga Zoova m’ɔ ti amun Ɲanmiɛn’n fa man amun’n be nun kun su. Kpɛkun ɔ yo like ng’ɔ ti tɛ Zoova m’ɔ ti amun Ɲanmiɛn’n i ɲrun’n, yɛ ɔ saci aenguɛ m’ɔ nin amun trali’n,+ 3 yɛ ɔ fa atin tɛ su naan ɔ su ɲanmiɛn uflɛ mun, yɛ ɔ koto amuin annzɛ wia’n, annzɛ anglo ba’n, annzɛ ɲanmiɛn su lɔ sonja’m be kwlaa be bo.+ Kusu nn m’an seman amun kɛ amun yo sɔ.+ 4 Kɛ be kɛn i sɔ ndɛ’n be kle amun, annzɛ amun ti i sɔ ndɛ’n, amun usausa nun kpa. Sɛ be yoli tete like sɔ’n Izraɛli mɛn’n nun sakpasakpa’n,+ 5 amun fa yasua’n annzɛ bla ng’ɔ yoli tete like sɔ’n be wɔ klɔ’n i anuan’n i sin lɔ. Kpɛkun maan be finfin yasua annzɛ bla sɔ’n i yɔbuɛ lele naan ɔ wu.+ 6 Sanngɛ maan be ti i wun ndɛ lalofuɛ nɲɔn annzɛ nsan be nuan nun+ ka naan b’a kun i. Sɛ be ti i wun ndɛ lalofuɛ kunngba cɛ i nuan nun’n, nán be kun i.+ 7 I kunlɛ nun’n, maan lalofuɛ’m be dun mmua fin i yɔbuɛ, naan sran’m be kwlaa b’a fin i wie. Amun yi like ng’ɔ ti tɛ’n amun afiɛn.+

8 “Kɛ ndɛ tɔ amun klɔ’m be nun kun su mɔ i siesielɛ’n ti kekle man amun’n, sɛ mmoja yɛ be guɛli i ase-o,+ sɛ like wie yɛ sran kun waan be yo mɛn i-o, sɛ sran yɛ b’a yo i like yaya-o, sɛ ndɛnngan wie yɛ w’a tɔ-o, amun jaso wɔ lika nga Zoova m’ɔ ti amun Ɲanmiɛn’n klé’n nun.+ 9 Amun ko wun Levifuɛ mɔ be ti Ɲanmiɛn ɲrun jranfuɛ’n nin jɔlɛ difuɛ+ ng’ɔ o lɛ blɛ sɔ’n nun’n be wun. Kpɛkun amun bo ndɛ’n su kle be. I liɛ’n, bé klé amun like ng’ɔ fata kɛ amun yo’n.+ 10 Kɛ ɔ ko yo sɔ’n, afɔtuɛ nga be man amun lika nga Zoova kle’n nun’n, amun fa su. Like kwlaa nga be se amun kɛ amun yo’n, amun nian nun yo. 11 Mmla nga be fa sie amun ɲrun’n, ɔ nin ajalɛ nga be kle amun’n, amun nian be su nanti.+ Kɛ be kle amun ajalɛ’n, nán amun se kɛ amún kɔ́ fama su annzɛ bɛ su.+ 12 Sran ng’ɔ yo ɲin kekle naan ɔ faman ajalɛ nga Zoova m’ɔ ti amun Ɲanmiɛn’n i ɲrun jranfuɛ’n annzɛ jɔlɛ difuɛ’n kle’n su’n, maan be kun i.+ Amun yi like ng’ɔ ti tɛ’n Izraɛlifuɛ’m be afiɛn.+ 13 I liɛ’n, Izraɛlifuɛ’m be kwlaa bé tí, kpɛkun srɛ́ kún be. Ɔ maan be su yoman ɲin kekle kun.+

14 “Kɛ amun ko wlu mɛn nga Zoova m’ɔ ti amun Ɲanmiɛn’n su fa man amun’n i nun’n, mɔ amun ko tran nun’n mɔ amún wá sé kɛ: ‘Maan e sie e su famiɛn kun kɛ nvle nga be mantan e’n be sa’n,’+ 15 maan amun fa sran kun mɔ Zoova m’ɔ ti amun Ɲanmiɛn’n klé’n naan amun sie i famiɛn.+ Maan sran nga amún síe i famiɛn’n, ɔ yo amun niaan. Nán amun fa aofuɛ m’ɔ timan amun niaan’n kɛ ɔ sie amun. 16 Sanngɛ nán maan ɔ kunndɛ nnɛn kpanngɔ kpanngban,+ yɛ nán maan ɔ se kɛ ɔ́ fá sran mun sɛ́ i sin Ezipti lɔ naan ɔ́ ɲán nnɛn kpanngɔ kpanngban wie mun ekun.+ Afin Zoova seli amun kɛ: ‘Nán amun fa atin ngalɛ’n be sa be sin lɔ kun.’ 17 Nán maan ɔ ja bla kaka naan be saci i ti nun.+ Nán maan ɔ kunndɛ sika nin sika ɔkwlɛ kpanngban.+ 18 Kɛ ɔ ko trɛn i famiɛn bia’n su’n, maan ɔ nian Mmla fluwa m’ɔ o Levifuɛ nga be ti Ɲanmiɛn ɲrun jranfuɛ’n be sa nun’n+ nun, naan ɔ klɛ Mmla ng’ɔ o yɛ’n fluwa kun nun.

19 “Kpɛkun maan ɔ trɛn i sa nun naan ɔ kanngan nun cɛn kwlaa.+ I liɛ’n, ɔ́ sí wafa ng’ɔ kwla sro Zoova m’ɔ ti i Ɲanmiɛn’n naan w’a nanti Mmla ng’ɔ o yɛ’n i nun ndɛ’n i kwlaa su.+ 20 Ɔ maan ɔ su tumɛn i wun i niaan’m be su. Kpɛkun ɔ su yaciman mmla’n lɛ ko sinman fama su annzɛ bɛ su. Ɔ maan ɔ nin i mma’m bé síe Izraɛlifuɛ mun lelele.

18 “Be su manman Levifuɛ nga be ti Ɲanmiɛn ɲrun jranfuɛ’n nin Levifuɛ onga’m be kwlaa be aja like kɛ Izraɛlifuɛ onga’m be sa. Ninnge nga be fa sie i sin’n su man Zoova m’ɔ ti i liɛ’n yɛ bé dí-ɔ.+ 2 I sɔ’n ti’n, be su ɲanman aja like fi be niaan’m be afiɛn. Zoova yɛ ɔ ti be aja like liɛ’n niɔn, kɛ ng’ɔ kan kleli be’n sa.

3 “Like ng’ɔ fata kɛ nvlefuɛ’m be fa man Ɲanmiɛn ɲrun jranfuɛ mun’n yɛ: Sɛ nannin tola annzɛ bua yɛ be fa yi tɛ’n, maan be fɛ i wualɛ’n nin i aoje’n nin i fle’n be man Ɲanmiɛn ɲrun jranfuɛ’n. 4 Amun fa amun fie su ninnge’m be mma klikli’n, nin duvɛn uflɛuflɛ’n i klikli nga amun ɲɛn i’n, nin ngo klikli nga amun ɲɛn i’n, nin amun bua nin amun boli’m be wun ndrɛ klikli nga amun kpɛkpɛ’n be mɛn i.+ 5 Afin Zoova m’ɔ ti amun Ɲanmiɛn’n niannin akpasua’m be kwlaa be nun, yɛ ɔ fɛli i nin i mma mun naan be di junman titi Zoova i dunman nun.+

6 “Sanngɛ sɛ Levifuɛ kun jaso Izraɛli klɔ ng’ɔ tran su’n su+ naan ɔ klo kɛ ɔ́ kɔ́ lika nga Zoova kle’n* nun’n,+ 7 ɔ kwla di junman lika sɔ’n nun Zoova m’ɔ ti i Ɲanmiɛn’n i dunman nun, kɛ i niaan Levifuɛ onga mɔ be o Zoova i ɲrun lɔ’n be sa.+ 8 Be nin i bé cɛ́ aliɛ’n nun sɛsɛsɛ,+ ɔ́ fá úkɛ i nannan’m be ninnge ng’ɔ yoli be atɛ’n i sika’n su.

9 “Kɛ amún wá trán mɛn nga Zoova m’ɔ ti amun Ɲanmiɛn’n su fa man amun’n i nun’n, nán amun nian nvle nga be o lɔ’n be ayeliɛ tɛtɛ’m be su.+ 10 Nán amun nun wie fi yrɛ i wa yasua annzɛ i wa bla sin’n nun.*+ Nán amun nun wie fi yi wunnzue.+ Nán amun nun wie fi yi atrɛ.+ Nán amun nun wie fi jran like wie su kɛ ɔ́ sí i ɲrun lɔ sa.+ Nán amun nun wie fi di bae.+ 11 Nán amun nun wie fi cici sran annzɛ ɔ to sran amuin. Nán amun nun wie fi wɔ sran nga i waan ɔ nin be nga be wuli’n be ijɔ’n+ annzɛ wunnzue yifuɛ sin.+ Nán amun nun wie fi nin sran nga be wuli’n be ijɔ.+ 12 Afin Zoova i ɲin ci sran kwlaa ng’ɔ yo ninnge sɔ mun’n. Tete ninnge sɔ mun ti yɛ Zoova m’ɔ ti amun Ɲanmiɛn’n su kan nvle kwlaa sɔ’m be bo amun ɲrun lɛ-ɔ. 13 Amun nanti seiin Zoova m’ɔ ti amun Ɲanmiɛn’n i ɲrun.+

14 “Afin nvle nga amun su wa fa be mɛn’n, be nunfuɛ’m be fa ndɛ nga atrɛ yifuɛ mun+ nin wunnzue yifuɛ’m+ be kan’n su. Sanngɛ Zoova m’ɔ ti amun Ɲanmiɛn’n, ɔ kplinman su kɛ amun yo i sɔ ninnge mun wie. 15 Zoova m’ɔ ti amun Ɲanmiɛn’n ɔ́ wá fá sran kun amun niaan’m be nun mán amun naan ɔ ijɔ i nuan kɛ min sa. Ɔ fata kɛ amun fa ndɛ ng’ɔ kan’n su.+ 16 I nun nga amun yiali Orɛbu lɔ’n,+ like nga amun srɛli Zoova m’ɔ ti amun Ɲanmiɛn’n kɛ ɔ yo man amun’n, yɛ ɔ o lɛ-ɔ. Amun seli kɛ: ‘Nán maan e ti Zoova m’ɔ ti e Ɲanmiɛn’n i aniɛn’n annzɛ e ɲinma wun sin sroesroe dan’n kun, kɛ ɔ ko yo naan y’a wuman’n ti.’+ 17 Zoova seli min kɛ: ‘Be ndɛ yo fɛ. 18 Ń fá be niaan’m be nun kun naan ɔ ijɔ min nuan kɛ wɔ sa.+ Ń fá min ndɛ’n ń wlɛ́ i nuan.+ Ɔ maan ndɛ kwlaa nga n se i kɛ ɔ kan’n, ɔ́ kán klé be.+ 19 Sanngɛ sran ng’ɔ faman min ndɛ ng’ɔ́ kán’n su’n, e nin i e le i.+

20 “‘Sɛ sran kun waan ɔ ti min nuan ijɔfuɛ, naan ɔ kan ndɛ wie kle amun kusu nn m’an tumɛn i kɛ ɔ kan ndɛ’n, annzɛ kusu sran kun ijɔ amuin wie nuan’n, maan be kun i.+ 21 Sanngɛ amun kwla usa amun wun kɛ: “?É yó sɛ naan y’a si kɛ nán Zoova yɛ ɔ kannin ndɛ sɔ’n niɔn?” 22 Sɛ sran sɔ m’ɔ ijɔ Zoova nuan’n, i ndɛ ng’ɔ kannin’n w’a kpɛnman su’n, annzɛ i nuan w’a yiaman’n, nn nán Zoova yɛ ɔ kannin ndɛ sɔ’n niɔn. Ɔ kpɛli i ti nun yɛ ɔ kannin ndɛ’n niɔn. Nán amun sro i.’

19 “Kɛ Zoova m’ɔ ti amun Ɲanmiɛn’n ko nunnun sran nga Zoova m’ɔ ti amun Ɲanmiɛn’n su fa be mɛn’n man amun’n, mɔ amun ko fa be mɛn’n mɔ amun ko tran be klɔ mun nin be sua’m be nun’n,+ 2 amun kpa mɛn nga Zoova m’ɔ ti amun Ɲanmiɛn’n su fa man amun’n, i nun klɔ nsan sie be ngunmin.+ 3 Amun kpɛ mɛn nga Zoova m’ɔ ti amun Ɲanmiɛn’n su fa man amun’n i nun nsan. Kpɛkun amun siesie atin’m be ye naan sran ng’ɔ kun sran’n w’a kwla wanndi w’a ɔ klɔ sɔ’m be nun kun su.

4 “Sran ng’ɔ kunnin sran m’ɔ kwla wanndi kɔ lɔ naan w’a wuman’n, yɛle sran mɔ sanvuɛsa ɲɛnnin i m’ɔ yoli i wiengu like yaya, kusu nn ɔ kpɔmɛn i laa’n.+ 5 Wienun-ɔn, ɔ nin i wiengu’n b’a ɔ waka kunndɛlɛ blo lɔ. Kpɛkun kɛ ɔ man kpɛliɛ’n su naan ɔ́ kpɛ́ waka’n, kpɛliɛ ba’n w’a flo w’a mantan sran’n, kpɛkun sran sɔ’n w’a wu. Ɔ fata kɛ sran m’ɔ kunnin sran’n, ɔ wanndi wɔ klɔ sɔ’m be nun kun su naan w’a ka nguan nun.+ 6 Sanngɛ sɛ klɔ’n i atin’n wali ngboko’n, sran ng’ɔ wuli’n i fuɛ nga i waan ɔ́ tú i klunngbɔ’n+ ɔ kwla su i su lele, kpɛkun ɔ kwla trɛ i kun i wie, ya dan m’ɔ fali’n ti.* Kusu nn ɔ nin kunlɛ fataman, afin ɔ kpɔmɛn i wiengu’n laa.+ 7 I sɔ’n ti’n, n se amun kɛ: ‘Amun kpa klɔ nsan naan amun sie be ngunmin.’

8 “Sɛ Zoova m’ɔ ti amun Ɲanmiɛn’n yo maan amun lika’n trɛ kɛ ng’ɔ fa tali amun nannan’m be nda’n sa’n,+ naan ɔ fa mɛn ng’ɔ seli amun nannan’m be kɛ ɔ́ fá mán be’n i kwlaa man amun’n,+ 9 (sɛ amun kusu amun fa ndɛ kwlaa nga n su kan kle amun andɛ yɛ’n be su’n, naan amun klo Zoova m’ɔ ti amun Ɲanmiɛn’n, naan amun nanti i atin’m be su tititi’n)+ amun fa klɔ nsan ekun fa uka nsan klikli’m be su.+ 10 I liɛ’n, be su guaman sran nga w’a yoman sa tɛ’n i mmoja’n i ase ngbɛn+ mɛn nga Zoova m’ɔ ti amun Ɲanmiɛn’n su fa man amun’n i nun. Kpɛkun be su manman amun ndɛ kɛ amun a kun sran.+

11 “Sanngɛ sɛ sran kun kpɔ i wiengu kun+ naan ɔ bu sɛ i ɲrun, naan ɔ yo i wiengu sɔ’n i like yaya naan ɔ wu’n, kpɛkun ɔ wanndi kɔ klɔ sɔ’m be nun kun su’n, 12 maan i klɔ’n su kpɛnngbɛn’m be sunman sran naan be ko fɛ i bla. Yɛ maan be fɛ i man sran ng’ɔ wuli’n i fuɛ nga i waan ɔ́ tú i klunngbɔ’n, naan ɔ kun i.+ 13 Nán amun* si i aunnvɔɛ. Amun yo naan mmoja nga be guɛli i ase ngbɛn’n i ndɛ’n w’a kaman Izraɛlifuɛ’m be su.+ Ɔ maan amún ɲán amun ti.

14 “Kɛ amun ko tran mɛn nga Zoova m’ɔ ti amun Ɲanmiɛn’n su fa man amun’n i nun’n mɔ be cɛ asiɛ’n nun man amun’n, nán amun tu amun wiengu’m be awɛ nga amun nannan’m be jajali’n be wɔ siɛn.+

15 “Nán amun jran lalofuɛ kunngba i nuan ndɛ’n su be man sran kun i ndɛ kɛ ɔ yoli sa tɛ annzɛ ɔ fɔnnin.+ Lalofuɛ nɲɔn annzɛ lalofuɛ nsan be nuan ndɛ’n su yɛ be kwla jran be bu ndɛ kun i nanwlɛ-ɔ.+ 16 Sɛ sran kun bu i wiengu kun i wun akunndan tɛ naan ɔ jaso kɛn i wun ndɛ kɛ ɔ yoli sa tɛ wie’n,+ 17 maan be nɲɔn mɔ ndɛ o be afiɛn’n be wɔ Zoova ɲrun lɔ, Ɲanmiɛn ɲrun jranfuɛ mun nin jɔlɛ difuɛ nga be o lɛ blɛ sɔ’n nun’n, be ɲrun lɔ.+ 18 Maan jɔlɛ difuɛ’m be usausa nun kpa.+ Sɛ sran ng’ɔ di lalo’n ti gblɛfuɛ naan ɔ tɔnnin i niaan’n i suɛn’n, 19 sa ng’ɔ kunndɛ kɛ be fa yo i niaan’n mɔ i ti yɛ ɔ tɔnnin i suɛn’n, amun fa yo i bɔbɔ.+ Amun yi like ng’ɔ ti tɛ’n amun afiɛn.+ 20 Sran onga’m bé tí. Kpɛkun srɛ kún be. Ɔ maan be su yoman sa tɛ kɛ ngalɛ sa’n kun amun afiɛn.+ 21 Nán amun* si aunnvɔɛ:+ Sran ng’ɔ kun sran’n, maan be kun i wie. Sran ng’ɔ bo sran kun i ɲinma’n, maan be bo i liɛ’n wie. Sran ng’ɔ bu sran kun i je’n, maan be bu i liɛ’n wie. Sran ng’ɔ bu sran kun i sa’n, maan be bu i liɛ’n wie. Sran ng’ɔ kpɛ sran kun i ja’n, maan be kpɛ i liɛ’n wie.+

20 “Sɛ amun kɔ alɛ kunlɛ naan amun wun kɛ amun kpɔfuɛ’m be nnɛn kpanngɔ mun nin be kakaklolo mun nin be alɛ kunfuɛ mun be sɔnnin tra amun liɛ’n lele’n, nán srɛ kun amun. Afin Zoova m’ɔ ti amun Ɲanmiɛn’n, m’ɔ fali amun Ezipti mɛn’n nun lɔ fiteli’n, ɔ jin amun sin.+ 2 Kɛ amún wá kɔ́ alɛ kunlɛ’n, maan Ɲanmiɛn ɲrun jranfuɛ’n wunnge sran’m be wun lɔ naan ɔ kan ndɛ kle be.+ 3 Maan ɔ se be kɛ: ‘Izraɛlifuɛ mun, amun sie amun su. Amun nin amun kpɔfuɛ’m be su wa kun. Sanngɛ nán amun klun titi amun. Nán srɛ kun amun, nán amun wun usu amun, yɛ nán amun bo yaya be dunman nun ti. 4 Afin Zoova m’ɔ ti amun Ɲanmiɛn’n nin amun yɛ bé kɔ́-ɔ. Ɔ́ kún amun ti alɛ, yɛ ɔ́ dé amun.’+

5 “Maan nvle sunianfuɛ’m be kusu be se sran’m be kɛ: ‘?Wan yɛ ɔ kplannin sua m’ɔ nin-a yimɛn i nglo-ɔ? Maan ɔ sɛ i sin i awlo. Afin sɛ be kun i alɛ’n nun’n, sran uflɛ yɛ ɔ́ yí i nglo-ɔ. 6 ?Yɛ wan yɛ ɔ dili viɲin fie kun m’ɔ nin-a timɛn i su mma le-ɔ? Maan ɔ sɛ i sin i awlo. Afin sɛ be kun i alɛ’n nun’n, sran uflɛ yɛ ɔ́ tí i su mma-ɔ. 7 ?Wan yɛ ɔ trali bla ase m’ɔ nin-a jɛmɛn i-ɔ? Maan ɔ wɔ, ɔ sɛ i sin i awlo.+ Afin sɛ be kun i alɛ’n nun’n, sran uflɛ yɛ ɔ́ jɛ́ i-ɔ.’ 8 Maan nvle nunfuɛ’m be ukafuɛ’m be usa sran’m be ekun kɛ: ‘?Wan yɛ srɛ kun i-ɔ? ?Wan yɛ i klun titi i-ɔ?+ Maan ɔ sɛ i sin i awlo. I liɛ’n, ɔ su bubumɛn i niaan’m be sa sin.’+ 9 Kɛ nvle nunfuɛ’m be ukafuɛ’m be ko kan ndɛ’n ko kle sran mun’n, maan be fa sran wie mun naan be sie be sonja’m be su kpɛn naan be dun sran’m be ɲrun mmua.

10 “Kɛ amun ko mantan klɔ kun’n, kwlaa naan amun nin i sufuɛ’m b’a kun’n, amun kle be like ng’ɔ fata kɛ be yo naan amun a yaci be lɛ’n.+ 11 Sɛ be kplin su naan be tike be klɔ’n i anuan mun’n, sran kwlaa nga be o klɔ sɔ’n su’n, bé dí junman mán amun kɛ kanga sa, yɛ bé sú amun.+ 12 Sanngɛ sɛ be kplinman su naan be waan be nin amun kún’n, amun utu be klɔ’n. 13 Zoova m’ɔ ti amun Ɲanmiɛn’n wá fá klɔ sɔ’n wlá amun sa nun. Amun fa tokofi naan amun kun yasua kwlaa nga be o klɔ sɔ’n su’n. 14 Sanngɛ amun fa bla mun, nin ba kanngan mun, nin nnɛn mun, nin ninnge kwlaa nga be o klɔ’n nun’n.+ Amun kpɔfuɛ’m be bo ninnge nga amun fa be’n, amun di. Afin Zoova m’ɔ ti amun Ɲanmiɛn’n yɛ ɔ fa mannin amun-ɔn.+

15 “Klɔ nga be o amun wun mmuammua kpa mɔ be nunman nvle nga be mantan amun’n be nun’n, like nga amún fá yó be nunfuɛ mun’n yɛ ɔ o lɛ-ɔ. 16 Sanngɛ klɔ nga Zoova m’ɔ ti amun Ɲanmiɛn’n su fa man amun naan amun tran be nun’n, be nunfuɛ’m be liɛ’n, nán amun yaci be nun wie fi nguan nun.*+ 17 Ɛtifuɛ mun-o, Amɔɔfuɛ mun-o, Kanaanfuɛ mun-o, Perizifuɛ mun-o, Ivifuɛ mun-o, Zebisifuɛ mun-o,+ amun nunnun be sekeseke kpan, kɛ nga Zoova m’ɔ ti amun Ɲanmiɛn’n kan kleli amun’n sa. 18 I liɛ’n, be su kleman amun sa tɛtɛ nga be yo be fa su be ɲanmiɛn liɛ mun’n naan amun a yo wie. Afin sɛ amun yo sɔ’n, amún fɔ́n Zoova m’ɔ ti amun Ɲanmiɛn’n i wun.+

19 “Sɛ amun bo sin yia klɔ kun naan amún fá klɔ sɔ’n, naan amun nin i nunfuɛ’m b’a kun alɛ lele’n, nán amun fa kpɛliɛ bu be waka’m be bo. Amun di waka sɔ’m be su mma’n, sanngɛ nán amun kpɛ be bo.+ ?Afin amún bó sín yía waka m’ɔ o blo’n kɛ be fa bo sin yia sran sa? 20 Waka nga amun si kɛ be dimɛn i su mma’n, yɛ amun kwla kpɛ be bo-ɔ. Amun kwla kpɛ be bo, yɛ amun fa kplan klɔ nga amun nin i be su kun’n i wun like wie mɔ amun kwla fa kun alɛ’n, naan amun fa klɔ’n.

21 “Sɛ amun o mɛn nga Zoova m’ɔ ti amun Ɲanmiɛn’n ɔ su fa man amun’n nun naan amun wun sran kun i saka’n blo lɔ, naan amun siman sran ng’ɔ kunnin i’n, 2 maan amun kpɛnngbɛn mun nin amun jɔlɛ difuɛ’m+ be wɔ naan be ko sunnzun lika nga be wunnin saka’n i lɛ’n nin klɔ nga be mantan lɛ’n be afiɛn’n. 3 Kpɛkun maan klɔ ng’ɔ mantan saka’n i koko’n i su kpɛnngbɛn’m be fa nannin talua kun, mɔ be nin-a fa diman junman le’n, mɔ be nin-a siemɛn i kɔmin su waka le’n, 4 yɛ maan klɔ sɔ’n i su kpɛnngbɛn’m be fa nannin talua’n be wɔ kongo kun mɔ nzue o nun’n, mɔ be nin-a diman nun fie le’n, mɔ be nin-a luaman nun like le’n nun. Kpɛkun maan be bu nannin talua’n i kɔmin kongo sɔ’n nun lɛ.+

5 “Maan Levifuɛ nga be ti Ɲanmiɛn ɲrun jranfuɛ’n be wɔ be ko bo muae Zoova i dunman nun.+ Afin Zoova m’ɔ ti amun Ɲanmiɛn’n fali be kɛ be di junman mɛn i.+ Sɛ be yoli sran wie i like yaya naan i su ndɛ tɔ’n, be yɛ bé klé wafa ng’ɔ fata kɛ be siesie i sɔ ndɛ’n niɔn.+ 6 Maan klɔ ng’ɔ mantan saka’n i koko’n i su kpɛnngbɛn’m be wunnzin be sa nun+ gua nannin talua mɔ be buli i kɔmin’n i su, kongo’n nun lɛ. 7 Kpɛkun maan be se kɛ: ‘Nán e yɛ e kunnin sran nga-ɔ.* Kɛ bé kún i kusu’n, y’a wunman nun. 8 Zoova, nán fa ndɛ sɔ’n guɛ i Izraɛli m’ɔ ti ɔ nvle’n, mɔ a deli i’n i su.+ Yɛ nán maan sran mɔ be kunnin i abɔlɛ kunlɛ’n i ndɛ’n ka Izraɛli m’ɔ ti ɔ nvle’n i su.’+ Kɛ ɔ ko yo sɔ’n, be su seman kɛ be yɛ be kunnin sran sɔ’n niɔn. 9 Sɛ amun yo sɔ’n, sran mɔ be kunnin i abɔlɛ kunlɛ’n, i ndɛ’n su kaman amun su. Afin amun yoli sa ng’ɔ ti kpa Zoova ɲrun’n.

10 “Sɛ a kɔ alɛ kunlɛ naan Zoova m’ɔ ti ɔ Ɲanmiɛn’n fa ɔ kpɔfuɛ mun wla ɔ sa nun naan a tra be’n,+ 11 naan a wun be nun bla klanman kun naan a klo i’n, naan a kunndɛ kɛ á jɛ́ i’n, 12 fɛ i kɔ ɔ awlo. Kpɛkun maan ɔ yi i ti’n, yɛ ɔ niɛn i jabui nin i sabui’m be lika. 13 Maan ɔ yi tralɛ nga kɛ amún trɛ́ i’n ɔ wlɛ i wun’n, naan ɔ tran ɔ awlo lɔ. Maan ɔ sun i si nin i nin anglo klonglo kun.+ I sin’n, a nin i be kwla si sua, yɛ á káci i wun, i kusu káci ɔ yi. 14 Sanngɛ sɛ a klomɛn i kun’n, yaci i nun maan ɔ wɔ lika ng’ɔ klo’n.+ Nán yo i atɛ fa kunndɛ sika, yɛ nán yo i like yaya, afin a kuɛkuɛli i.

15 “Wienun-ɔn, yasua kun le bla nɲɔn, yɛ ɔ klo kun tra kun. Sɛ be nɲɔn’n be wuli ba yasua, naan bla ng’ɔ klomɛn i’n i wa liɛ’n yɛ ɔ ti ba kpɛn’n,+ 16 cɛn nga ɔ́ cɛ́ i aja like’n nun mɛ́n i mma mun’n, nán maan ɔ yo kɛ bla ng’ɔ klo i’n i wa’n yɛ ɔ ti ba kpɛn’n sa, naan ɔ bu bla ng’ɔ klomɛn i’n i wa liɛ’n m’ɔ ti ba kpɛn’n i lufle. 17 Maan ɔ wun i wlɛ kɛ bla ng’ɔ klomɛn i’n i wa’n yɛ ɔ ti ba kpɛn’n niɔn. Yɛ maan like kwlaa ng’ɔ le i m’ɔ́ fá mɛ́n i’n, ɔ tra ba onga’m be liɛ’n kpɛ nɲɔn. Afin i yɛ ɔ ti ba klikli ng’ɔ kle kɛ ɔ ti yasua’n niɔn. Maan be fa like ng’ɔ ti ba kpɛn liɛ’n be mɛn i.+

18 “Sɛ yasua kun le ba kun mɔ be kan ndɛ kle i-ɔ ɔ timan, kpɛkun i ɲin su ti kekle dan,+ naan i si nin i nin be tu i fɔ-ɔ, ɔ fɛmɛn i su sieman be nuan bo’n,+ 19 maan i si nin i nin be fɛ i wɔ kpɛnngbɛn’m be ja su klɔ’n i anuan’n nun lɔ. 20 Maan be se klɔ’n su kpɛnngbɛn’m be kɛ: ‘Be kan ndɛ kle e wa nga-ɔ ɔ timan, yɛ i ɲin su ti kekle dan. I ɲin yiman e. Ɔ ti aliɛ safuɛ+ nin nzanboɛfuɛ.’+ 21 Maan klɔ’n sufuɛ’m be kwlaa be finfin i yɔbuɛ naan ɔ wu. I liɛ’n, amún yí like ng’ɔ ti tɛ’n amun afiɛn. Yɛ Izraɛlifuɛ’m be kwlaa bé tí, kpɛkun srɛ kún be.+

22 “Sɛ sran kun yo sa tɛ wie m’ɔ nin kunlɛ fata’n naan amun kunnin i’n,+ kpɛkun amun sendeli i waka kun su’n,+ 23 nán maan i fuɛn’n ka waka’n su kɔnguɛ lele lika cɛn su.+ Amun sie i cɛn kunngba’n nun. Afin fuɛn nga be sende i waka kun su’n, ɔ ti tete like Ɲanmiɛn ɲrun.+ Nán amun saci asiɛ nga Zoova m’ɔ ti amun Ɲanmiɛn’n su fa man amun kɛ amun tran su’n.+

22 “Sɛ ɔ niaan’n i nannin annzɛ i bua wie mlin naan a wun i’n, nán sɛn i wun kɔ.+ Fɛ i ko man ɔ niaan’n. 2 Sanngɛ sɛ ɔ niaan sɔ’n tranman koko annzɛ a simɛn i’n, fa nnɛn’n kɔ ɔ awlo. Yɛ maan ɔ ka lɔ. Kpɛkun kɛ ɔ niaan’n kúnndɛ’n, fa mɛn i naan ɔ wɔ.+ 3 Sɛ ɔ niaan’n i aflunmun annzɛ i tralɛ annzɛ i sa nun like uflɛ mlin naan a wun i’n, i sɔ yɛ ɔ fata kɛ a yo-ɔ. Nán se kɛ ɔ ndɛ nunman nun.

4 “Sɛ a wun kɛ ɔ niaan’n i aflunmun’n annzɛ i nannin’n w’a tɔ atin’n nun’n, nán sɛn i wun kɔ. Ukɛ i naan ɔ man nnɛn’n su.+

5 “Nán maan bla wla yasua tralɛ, yɛ nán maan yasua wla bla tralɛ. Afin Zoova m’ɔ ti amun Ɲanmiɛn’n i ɲin ci sran kwlaa ng’ɔ yo sɔ’n.

6 “Sɛ a su kɔ lika naan a wun kɛ anunman sua kun wo waka kun su annzɛ asiɛ wun’n, naan anunman ba annzɛ klenzua’m be o nun’n, naan anunman’n w’a utu i mma mun annzɛ i klenzua’m be su’n, nán fa anunman’n nin i mma mun.+ 7 Fuan be nin’n, sanngɛ a kwla fɛ i mma mun. I sɔ yɛ ɔ fata kɛ a yo naan ɔ liɛ w’a yo ye, naan w’a cɛ asiɛ’n su-ɔ.

8 “Sɛ a kplan sua uflɛuflɛ kun’n, yo talɛ kun i ti su lɔ tɛɛn sin yia nun.+ I liɛ’n, sran wie su floman lɔ tɔman naan b’a se kɛ ɔ awlofuɛ’m b’a gua sran mmoja ase.

9 “Nán lua ɔ viɲin fie’n nun like uflɛ.+ Afin sɛ a yo sɔ’n, bé dé like kwlaa nga a luali’n nin viɲin mma’n ɔ sa nun, kpɛkun bé fá kɔ́ Ɲanmiɛn i tannin sua’n nun lɔ.

10 “Nán fa nannin tola kun nin aflunmun kun cici be saru kunngba’n su naan be tutu lika.+

11 “Nán wla tralɛ nga be sanngannin nnɛn ndrɛ nin lɛn yɛ be fa wuli’n.+

12 “Kɛ amún wú kondro nga amún fá káta amun wun’n, amun yo naan i cɔnjɔ nnan’m be nuan su’n sendesende kan.+

13 “Wienun-ɔn yasua kun ja bla kun, kpɛkun ɔ nin i be si sua. Sanngɛ i sin’n ɔ kpɔ i. 14 Yɛ ɔ saci i dunman kɛ ɔ yoli sa tɛ. Ɔ se kɛ: ‘N jali bla nga, sanngɛ kɛ e nin i e lali’n, m’an wunman kɛ ɔ nin yasua be nin-a siman sua le.’ 15 I lɛ nun’n, maan talua’n i si nin i nin be fa like ng’ɔ kle kɛ talua’n w’a siman bian laa’n, be kle kpɛnngbɛn mun klɔ’n i anuan’n nun lɛ. 16 Maan talua’n i si’n se kpɛnngbɛn mun kɛ: ‘N fali min wa’n n mannin yasua nga, sanngɛ ɔ kpɔ i. 17 Ɔ kan kɛ ɔ yoli sa tɛ. I waan: “M’an wunman kɛ ɔ wa’n nin-a siman bian.” Sanngɛ amun nian, like ng’ɔ kle kɛ min wa’n w’a siman bian laa’n, yɛ ɔ o yɛ.’ Kpɛkun maan be trɛ tannin’n nun klɔ’n su kpɛnngbɛn’m be ɲrun lɛ. 18 Maan klɔ’n su kpɛnngbɛn’m+ be tra bian’n naan be tu i fɔ.+ 19 Maan be de i sika sikli ya kun (100)* naan be fa man talua’n i si’n. Afin bian’n tɔnnin Izraɛli talua kun mɔ w’a siman bian laa’n i suɛn.+ Kpɛkun maan talua’n trɛn i bo tititi. Sɛ wie’n nin-a kunmɛn i’n, ɔ leman atin yraman talua’n.

20 “Sɛ ndɛ’n ti nanwlɛ kusu’n, naan like fi kleman kɛ talua’n w’a siman bian laa’n, 21 maan be fa talua’n wɔ i si’n i sua’n i anuan’n nun lɔ. Yɛ maan i klɔ’n su sran’m be finfin i yɔbuɛ lele maan ɔ wu. Afin ɔ yoli tete like Izraɛli mɛn’n nun,+ ɔ kunndɛli bian sukusuku* i si i sua’n nun.+ Amun yi like ng’ɔ ti tɛ’n amun afiɛn.+

22 “Sɛ yasua kun su kunndɛ sran wie yi naan be ko fite be su’n, maan be kun be nɲɔn’n. Maan be kun yasua m’ɔ nin bla’n be lali’n, ɔ nin bla’n bɔbɔ.+ Amun yi like ng’ɔ ti tɛ’n Izraɛlifuɛ’m be afiɛn.

23 “Sɛ yasua kun trali talua kun m’ɔ nin-a siman bian le’n i ase, naan yasua uflɛ nin talua sɔ’n be yia klɔ’n nun lɔ naan ɔ nin i be la’n, 24 amun fa be nɲɔn’n be wɔ klɔ’n i anuan’n nun lɔ. Kpɛkun amun finfin be yɔbuɛ lele maan be wu. Afin talua’n w’a kpanman naan klɔfuɛ’m b’a ti, yɛ yasua’n kusu ɔ kuɛkuɛli i wiengu i yi’n.+ Amun yi like ng’ɔ ti tɛ’n amun afiɛn.

25 “Sanngɛ sɛ yasua’n nin talua’n be yiali blo lɔ naan ɔ trɛli i naan ɔ nin i be lali kekle nun’n, maan be kun yasua m’ɔ nin i be lali’n i kunngba. 26 Nán amun sa kan talua’n. Afin talua’n w’a yoman sa tɛ, ɔ nin kunlɛ fataman. Sa ng’ɔ juli i su’n, ɔ ti kɛ sran kun mɔ i wiengu kun tɔ i su kun i’n sa.+ 27 Afin yasua’n nin talua mɔ be trɛli i ase’n, be yiali blo lɔ. Kpɛkun talua’n kpannin. Sanngɛ w’a ɲanman sran naan w’a de i.

28 “Sɛ yasua kun nin talua kun m’ɔ nin-a siman bian’n, mɔ kusu yasua fi w’a trɛmɛn i ase’n be yia naan ɔ trɛ i naan ɔ nin i be la kekle nun’n naan be tra be’n,+ 29 maan yasua ng’ɔ yoli sɔ’n man talua’n i si’n i sika sikli ablenun (50).* Kpɛkun maan ɔ ja talua’n.+ Kɛ m’ɔ kuakuali talua’n ti’n, sɛ wie’n nin-a kunmɛn i’n, ɔ leman atin yraman talua’n.

30 “Nán maan sran fi jɛ i si i yi’n. I liɛ’n, ɔ su kuɛkuɛmɛn i si.+

23 “Sɛ be kpɛli sran kun i yasua lika’n annzɛ be sɛli i, yɛle kɛ be kpɔtɔli i ndɔnman’n, i sɔfuɛ’n su kwlá fɛmɛn i wun wlaman Zoova i sran’m be nun le.+

2 “Tekle ba kun* su kwlá fɛmɛn i wun wlaman Zoova i sran’m be nun.+ Lele m’ɔ́ fá jú i osu’n nunfuɛ’m be akpasua blu su’n su’n, be nun wie fi kwlá fɛmɛn i wun wlaman Zoova i sran’m be nun.

3 “I Amɔnfuɛ-o, i Moabufuɛ-o, be nun wie fi su kwlá fɛmɛn i wun wlaman Zoova i sran’m be nun.+ Lele m’ɔ́ fá jú be osu’n nunfuɛ’m be akpasua blu su’n su’n, be wie fi su kwlá fɛmɛn i wun wlaman Zoova i sran’m be nun. 4 Afin i nun mɔ amun fin Ezipti lɔ mɔ amún bá’n, b’a manman amun aliɛ nin nzue.+ Kpɛkun be mannin Beɔɔ i wa Balaamun m’ɔ fin Petɔru ng’ɔ o Mezopotamin lɔ’n i sika naan ɔ bo amun sannzan.+ 5 Sanngɛ Zoova m’ɔ ti amun Ɲanmiɛn’n w’a kplinman Balaamun su.+ Zoova m’ɔ ti amun Ɲanmiɛn’n yoli maan w’a kwlá boman amun sannzan, muae yɛ ɔ bo mannin amun-ɔn.+ Afin Zoova m’ɔ ti amun Ɲanmiɛn’n klo amun.+ 6 Lele mɔ wie’n fá kún amun’n, nán amun yo naan be tran fɔuun annzɛ be ɲan be wun.+

7 “Nán amun kpɔ Edɔmunfuɛ mun, afin amun niaan mun-ɔn.+

“Nán amun kpɔ Eziptifuɛ mun, afin amun trannin be mɛn’n nun.+ 8 Be anunman sian’m be kwla fa be wun wla Zoova i sran’m be nun wie.

9 “Kɛ amun nin amun kpɔfuɛ’m bé kún’n, amun nian amun wun su naan fiɛn w’a kanman amun.+ 10 Sɛ yasua kun i wun nzue gua kɔnguɛ’n,+ maan ɔ fin nanmue’n nun fite, yɛ nán maan ɔ sɛ i sin. 11 Kɛ lika’n wá sán’n, maan ɔ fa nzue wunnzin. Kpɛkun kɛ sɛnzɛ’n tɔ́’n, ɔ kwla sɛ i sin nanmue’n nun lɔ.+ 12 Amun sie lika kun* nanmue’n i sin lɔ. Lɔ yɛ ɔ fata kɛ amun wɔ atin nun-ɔn. 13 Maan sue kun tran amun trɔ’n nun. I liɛ’n, kwlaa naan amun a klu’n, amun fa fu buɛ. Kpɛkun kɛ amun wie atin nun kɔ’n, amun kata amun wakasu’n su. 14 Afin Zoova m’ɔ ti amun Ɲanmiɛn’n wlan sin amun nanmue’n nun+ naan ɔ́ dé amun naan ɔ́ fá amun kpɔfuɛ mun wlá amun sa nun. Maan amun nanmue’n nun yo sanwun.+ I liɛ’n, ɔ su wunman fiɛn kaan sa amun wun, ɔ maan ɔ su seman kɛ ɔ nin amun sanman nun kun.

15 “Sɛ kanga kun wanndi i min’n naan ɔ wa talo amun’n, nán amun fɛ i ko wlɛ i min’n i sa nun ekun. 16 Ɔ kwla tran amun klɔ’m be nun kun su lika kwlaa ng’ɔ klo’n nun. Sanngɛ nán amun yo i tɛtɛ.+

17 “Nán maan Izraɛli lɔ bla’m be wie fi kaci amuin sua nun tekle bofuɛ.+ Yɛ nán Izraɛli lɔ yasua’m be wie fi kaci amuin sua nun tekle bofuɛ.+ 18 Tekle bla’n i sika nga be tuɛli i’n annzɛ yasua ng’ɔ bo tekle’n* i sika nga be tuɛli i’n, nán amun se kɛ amún fá kɔ́ Zoova m’ɔ ti amun Ɲanmiɛn’n i sua’n nun, naan amún fá yía nda kun mɔ amun tali’n i nuan. Afin be ti tete like Zoova m’ɔ ti amun Ɲanmiɛn’n i ɲrun.

19 “Sɛ amun niaan kun srɛ amun sika, annzɛ aliɛ, annzɛ like uflɛ mɔ be kwla su i bo’n, nán amun se kɛ kɛ ɔ́ yí mán amun’n, ɔ su i bo.+ 20 Aofuɛ’n i liɛ’n, sɛ ɔ srɛ amun like’n, amun kwla se i kɛ ɔ su i bo.+ Sanngɛ amun niaan’m be liɛ’n, nán maan be su i bo.+ Sɛ amun yo sɔ’n, Zoova m’ɔ ti amun Ɲanmiɛn’n wá yó maan like kwlaa nga amún yó’n, ɔ́ yó ye amun sa nun mɛn nga amun su wa ko tran nun’n i nun.+

21 “Sɛ amun ta Zoova m’ɔ ti amun Ɲanmiɛn’n i nda’n,+ nán amun sisi amun bo naan amun a yiɛ i nuan.+ Afin Zoova m’ɔ ti amun Ɲanmiɛn’n wá fá úsa amun. Sɛ amun sisi amun bo’n, nn amun a yo sa tɛ.+ 22 Sanngɛ sɛ amun taman Ɲanmiɛn i nda kusu’n, ɔ timan sa tɛ.+ 23 Amun yia ndɛ ng’ɔ fin amun nuan fite’n, i nuan.+ Sɛ amun tali Zoova m’ɔ ti amun Ɲanmiɛn’n i nda kɛ amun klun klo su amún mɛ́n i like kun’n, amun yiɛ i nuan.+

24 “Sɛ a wlu ɔ wiengu kun i viɲin fie’n nun’n, di viɲin kwlaa nga a klo’n maan ɔ ku yi. Sanngɛ nán fa wie sie ɔ trɔ’n nun kɛ á fá kɔ́.+

25 “Sɛ a wlu ɔ wiengu kun i ble annzɛ i ɔɔzu fie’n nun’n, a kwla fa ɔ sa’n titi i mma nga w’a blo’n wie di. Sanngɛ nán fa wlɔsɔ wla ɔ wiengu’n i ble annzɛ i ɔɔzu fie’n nun.+

24 “Sɛ yasua kun ja bla naan ɔ wun kɛ bla’n yoli sa wie m’ɔ timan su’n, naan ɔ klomɛn i kun’n, maan ɔ klɛ fluwa kun m’ɔ kle kɛ w’a yrɛ i’n+ ɔ fa mɛn i. Kpɛkun ɔ kɛn i bo i awlo’n nun.+ 2 Kɛ ɔ jaso i awlo nun’n, ɔ kwla ko ja bian uflɛ.+ 3 Sɛ bian uflɛ ng’ɔ ko jɛli i’n kpɔ i naan ɔ klɛ fluwa kun m’ɔ kle kɛ w’a yrɛ i’n fa wlɛ i sa nun’n, naan ɔ kɛn i bo i awlo’n nun’n, annzɛ kusu sɛ bian uflɛ sɔ’n wu’n, 4 ɔ fataman kɛ i wun klikli ng’ɔ kɛnnin i bo’n ɔ se kɛ ɔ́ sɛ́ i sin kó jɛ́ i ekun kusu nn fiɛn w’a kan bla’n, afin Zoova i ɲin ci sɔ liɛ’n. Nán amun fa sa tɛ’n wlu mɛn nga Zoova m’ɔ ti amun Ɲanmiɛn’n su fa man amun kɛ amun tran nun’n i nun.

5 “Sɛ sran kun ja bla uflɛuflɛ’n, nán maan ɔ di sonja. Yɛ nán maan be mɛn i junman uflɛ fi. Maan ɔ ka sɔ lele afuɛ kun. Maan ɔ kɛ i awlo lɔ naan ɔ yo naan i yi’n i klun jɔ.+

6 “Nán maan sran fi fa yɔbuɛ nga be fa tin ble’n annzɛ i su yɔbuɛ’n i aowa.+ Afin i sɔ’n ti kɛ b’a fa like nga ti yɛ sran’n ɲan aliɛ di’n,* b’a wla aowa sa.

7 “Sɛ sran kun tɔ i niaan Izraɛlifuɛ kun su naan ɔ trɛ i kɔ’n, naan ɔ yo i tɛtɛ kpɛkun ɔ yo i atɛ’n,+ naan amun wun sran ng’ɔ trɛli i wiengu Izraɛlifuɛ sɔ’n, amun kun i.+ Amun yi like ng’ɔ ti tɛ’n amun afiɛn.+

8 “Sɛ kokowe* yo sran kun’n, like kwlaa nga Levifuɛ nga be ti Ɲanmiɛn ɲrun jranfuɛ’n be se amun kɛ amun yo’n, amun nian su yo.+ Ndɛ nga n kan kleli be’n, amun nian su sɛsɛsɛ be yo. 9 Kɛ amún fín Ezipti lɔ bá’n, like nga Zoova m’ɔ ti amun Ɲanmiɛn’n fa yoli Miriamun’n, nán amun wla fi su.+

10 “Sɛ sran kun srɛ ɔ like wie naan i waan sɛ ɔ yo’n, ɔ́ yí mán wɔ’n,+ nán wlu i sua’n nun lɔ kó fá like ng’ɔ fa wlɛli i aowa’n. 11 Minndɛ gua su lɔ naan sran’n bɔbɔ ko fa like ng’ɔ wlɛli i aowa’n blɛ wɔ. 12 Sɛ sran’n i sa w’a mian’n, nán maan like ng’ɔ wlɛli i aowa’n ka ɔ sa nun lele aliɛ’n cɛn su.+ 13 Kɛ wia’n ko tɔ cɛ’n, fa like kwlaa ng’ɔ wlɛli i aowa’n mɛn i. Nán sisi ɔ bo i sɔ yolɛ’n nun. I liɛ’n, ɔ́ fɛ́ i kondro’n kó lá,+ yɛ ɔ́ bó muae mán wɔ. Kpɛkun Zoova m’ɔ ti ɔ Ɲanmiɛn’n, ɔ́ bú ɔ sran kpa.

14 “Sɛ ɔ niaan kun annzɛ aofuɛ kun m’ɔ tran ɔ mɛn’n nun klɔ kun su’n, ɔ ti yalɛfuɛ naan ɔ di junman ɔ sa nun’n, naan i sa w’a mian’n, nán bu i lufle.+ 15 Fɛ i akatua’n mɛn i cɛn kunngba sɔ’n nun,+ ka naan sɛnzɛ’n w’a tɔ. Afin i sa w’a mian, yɛ i akatua’n su yɛ ɔ lafi-ɔ. Sɛ w’a yoman sɔ’n, ɔ́ kpán flɛ́ Zoova. I lɛ nun’n, w’a yo sa tɛ.+

16 “Nán maan be kun siɛ mun, ba’m be sa tɛ’n ti. Nán maan be kun ba mun, siɛ’m be sa tɛ’n ti.+ Sran ng’ɔ yo sa tɛ’n, i bɔbɔ yɛ ɔ fata kɛ be kun i-ɔ.+

17 “Nán amun bu aofuɛ’n annzɛ ba ng’ɔ leman si’n* i ndɛ kwlɛ.+ Yɛ nán amun fa angbeti bla’n i tralɛ’n i aowa.+ 18 Nán amun wla fi su kɛ amun yoli kanga Ezipti mɛn’n nun lɔ. Zoova m’ɔ ti amun Ɲanmiɛn’n yɛ ɔ deli amun-ɔn.+ I sɔ’n ti yɛ n se amun kɛ amun yo sɔ-ɔ.

19 “Sɛ amún kpɛ́ amun ble’n annzɛ amun ɔɔzu’n, naan amun wla fi i sɔlɛ wie su fie’n nun’n, nán amun sa amun sin ko fa. Amun yaci i lɛ man aofuɛ mun nin ba nga be leman si’n nin angbeti bla mun.+ I liɛ’n, Zoova m’ɔ ti amun Ɲanmiɛn’n, ɔ́ yrá amun su like kwlaa nga amún yó’n nun.+

20 “Sɛ amun kejekeje olivie waka’n naan i mma’m be gua’n, nán amun keje i sama mun wie. Afin i mma ng’ɔ ka su’n ti aofuɛ mun, nin ba nga be leman si’n nin angbeti bla’m be liɛ.+

21 “Sɛ amún tí amun viɲin’n naan i wie ka amun sin’n, nán amun sa amun sin be ko titi. Amun yaci i lɛ man aofuɛ mun nin ba nga be leman si’n nin angbeti bla mun. 22 Nán amun wla fi su kɛ amun yoli kanga Ezipti mɛn’n nun lɔ. I sɔ’n ti yɛ n se amun kɛ amun yo sɔ-ɔ.

25 “Sɛ ndɛ tɔ sran nɲɔn be afiɛn’n, maan be fa ndɛ’n wɔ jɔlɛ difuɛ’m be ja su.+ Kpɛkun maan jɔlɛ difuɛ’m be di be ndɛ’n. Sran ng’ɔ ti kpa’n, maan be jrɛn i sin, sanngɛ maan be bu klunwifuɛ’n i fɔ.+ 2 Sɛ bolɛ yɛ ɔ fata kɛ be bo klunwifuɛ’n,+ maan jɔlɛ difuɛ’n yo maan ɔ la asiɛ wun. Kpɛkun maan be bo i i ɲin bo lɛ. Sa tɛ ng’ɔ yoli’n i su yɛ ɔ fata kɛ be nian naan b’a si ɲantiaan nuan nga bé fá bó i’n niɔn. 3 Ɔ kwla bo i ɲantiaan nuan ablanan (40),+ sanngɛ nán maan ɔ tra su. Sɛ ɲantiaan nuan ng’ɔ fa bo i’n tra ngalɛ’n su’n, ɔ niaan’n i ɲin gúa ase ɔ ɲrun lɛ.

4 “Nán cici nannin tola ng’ɔ su bo ble’n annzɛ i wunsu like’n i nuan’n.+

5 “Sɛ aniaan wie’m be tran lika kunngba’n nun’n, naan be nun kun w’a wuman ba naan w’a wu’n, nán maan angbeti’n ko ja awlo uflɛ nun bian. Maan yasua’n i niaan’n fa bla’n naan ɔ jɛ i. Maan ɔ nanti be niaan’n i angbeti’n i jalɛ’n i su mmla’n su.+ 6 Maan be fɛ i niaan m’ɔ wuli’n i dunman’n sie i ba klikli nga bla’n wú i’n su.+ I liɛ’n, i dunman’n su mlinman Izraɛli mɛn’n nun.+

7 “Sanngɛ sɛ yasua’n waan ɔ jɛmɛn i niaan’n i angbeti’n, maan angbeti’n ko to kpɛnngbɛn mun klɔ’n i anuan’n nun lɔ naan ɔ se be kɛ: ‘Min wun’n i niaan’n kloman kɛ be bo i niaan’n i dunman’n Izraɛli mɛn’n nun kun. I waan ɔ diman be niaan’n i angbeti’n i jalɛ’n i su mmla’n su. I waan ɔ jaman min.’ 8 Kpɛkun maan klɔ’n su kpɛnngbɛn’m be flɛ i naan be kan wie kle i. Sɛ ɔ kɛn i ekun kɛ : ‘Min waan n jɛmɛn i’n,’ 9 maan i niaan’n i angbeti’n wunnge i wun lɔ naan ɔ yi yasua’n i ja ngbabua’n+ kpɛnngbɛn’m be ɲrun lɛ. Kpɛkun maan ɔ ti i nuan nzue’n tɛ i ɲrun nun naan ɔ se kɛ: ‘Yasua ng’ɔ kloman kɛ ɔ́ wú ba mɛ́n i niaan’n, i sɔ yɛ ɔ fata kɛ be yo i-ɔ.’ 10 I sin’n, maan be tɔn i awlofuɛ’m be dunman* Izraɛli mɛn’n nun kɛ: ‘Sran nga be yili i ja ngbabua’n i awlo’n.’

11 “Sɛ yasua nɲɔn bé tú ngondin naan kun nga be su bo i’n, i yi’n bɛ i sin jranlɛ naan ɔ to i sa’n tra yasua kunfuɛ’n i yasua lika’n, 12 amun kpɛ i sa’n. Nán amun* si aunnvɔɛ.

13 “Nán amun fa jayɔbuɛ fanunfanun nɲɔn,+ yɛle kɛ kaan kun nin dan kun, be sie amun pata’n nun. 14 Nán amun fa suliɛ fanunfanun nɲɔn,*+ yɛle kɛ kaan kun nin dan kun, be sie amun sua’n nun. 15 Maan amun toe yɔbuɛ’n nin amun suliɛ’n be yo sɛsɛ titi. I liɛ’n, amún cɛ́ kpa mɛn nga Zoova m’ɔ ti amun Ɲanmiɛn’n su fa man amun’n nun.+ 16 Afin Zoova m’ɔ ti amun Ɲanmiɛn’n i ɲin ci sran kwlaa ng’ɔ yo i sɔ ninnge mun’n.+

17 “Kɛ amún fín Ezipti lɔ bá’n, like nga Amalɛki yoli amun’n, nán amun wla fi su.+ 18 Kɛ amún bá’n, ɔ nin amun yiali atin nun. Kpɛkun ɔ fali alɛ wlali amun nun sran nga be cuɛncuɛn be ja ase mɔ be kali siɛn’n, be kwlaa be sin. Kɛ ɔ́ yó sɔ’n, nn amun a fɛ kpa, yɛ amun leman wunmiɛn kun. Nanwlɛ, w’a sroman Ɲanmiɛn. 19 Zoova m’ɔ ti amun Ɲanmiɛn’n wá yó maan amún ɲán amun ti amun kpɔfuɛ nga be bo sin yia amun’n be kwlaa be sa nun. Amun kpɔfuɛ sɔ’m be bo sin yia amun mɛn nga Zoova m’ɔ ti amun Ɲanmiɛn’n su fa man amun’n nun.+ Kɛ ɔ ko yo sɔ’n, amun nunnun Amalɛki i osu mlɔnmlɔn asiɛ’n su.+ Nán amun wla fi su.

26 “Kɛ a ko ju mɛn nga Zoova m’ɔ ti ɔ Ɲanmiɛn’n wá fá mán wɔ’n i nun’n, mɔ a ko fa mɛn sɔ’n, mɔ a ko tran nun’n, 2 fa ɔ fie’n su ninnge’m be mma klikli nga á ɲán be mɛn nga Zoova m’ɔ ti ɔ Ɲanmiɛn’n su fa man wɔ’n i nun’n be nun wie mun, naan fa be guɛ i gbogbo kun nun. I sin’n, kɔ lika nga Zoova m’ɔ ti ɔ Ɲanmiɛn’n fɛ́ i dunman’n síe su’n nun.+ 3 Ko to Ɲanmiɛn ɲrun jranfuɛ ng’ɔ di junman blɛ sɔ’n nun’n naan se i kɛ: ‘Andɛ’n, n se Zoova m’ɔ ti ɔ Ɲanmiɛn’n kɛ m’an ju mɛn nga Zoova tali e nannan’m be nda kɛ ɔ́ fá mán e’n, i nun.’+

4 “I sin’n, Ɲanmiɛn ɲrun jranfuɛ’n wá fá gbogbo ng’ɔ o ɔ sa nun’n kó jín i Zoova m’ɔ ti ɔ Ɲanmiɛn’n i tɛ yiwlɛ’n i ɲrun lɛ. 5 Kpɛkun kɛn i Zoova m’ɔ ti ɔ Ɲanmiɛn’n i ɲrun kɛ: ‘Min si’n ti Aramunfuɛ.+ Ɔ tu trannin lele.* Ɔ ɔli ko trannin Ezipti,+ yɛ ɔ yoli aofuɛ lɔ. I awlofuɛ m’ɔ nin be ɔli’n, b’a sɔnman.+ Sanngɛ siɛn’n, i osu’n w’a trɛ lele w’a kaci nvle dan kpa, yɛ i nun sran’m b’a sɔn kpa liɛ su.+ 6 Sanngɛ Eziptifuɛ’m be yoli e tɛtɛ, be kleli e ɲrɛnnɛn. Be fa e yoli be kanga naan e di be junman kekleekle mun.+ 7 Kɛ ɔ yoli sɔ’n, e kpan flɛli Zoova m’ɔ ti e nannan’m be Ɲanmiɛn’n. Zoova kusu sieli i su e nuan bo. Ɔ wunnin afɛ ng’ɔ o e su’n, nin yalɛ nin ɲrɛnnɛn nga be kle e’n.+ 8 Kpɛkun Zoova yili i tinmin dan’n nin i wunmiɛn’n be nglo.+ Ɔ yoli sa kekleekle mun nin sa sroesroe mun nin abonuan sa mun+ naan w’a fa e Ezipti lɔ w’a fite. 9 I sin’n, ɔ fa e bali lika nga nun wa. Ɔ fali mɛn nga mannin e. Nɔnnɔn nin awɛma nzue be sonji mɛn sɔ’n nun.+ 10 Andɛ’n, m’an fa asiɛ nga Zoova fa mannin min’n, i su ninnge’m be mma klikli mun m’an ba.’+

“Fa tɛkɛ i Zoova m’ɔ ti ɔ Ɲanmiɛn’n i ɲrun lɛ, kpɛkun koto Zoova m’ɔ ti ɔ Ɲanmiɛn’n i bo. 11 I sin’n, maan a nin Levifuɛ nin aofuɛ ng’ɔ tran ɔ wun lɛ’n, be klun jɔ, ninnge kpakpa kwlaa nga Zoova m’ɔ ti ɔ Ɲanmiɛn’n fa mannin wɔ nin ɔ awlofuɛ mun’n ti.+

12 “Afuɛ nsan su m’ɔ ti blusu yilɛ afuɛ’n i nun’n, kɛ a wie ɔ fie su ninnge’m be blusu’n i yi’n,+ fa man Levifuɛ mun, nin aofuɛ mun, nin ba nga be leman si’n,* nin angbeti bla mun naan be di naan be ku yi amun klɔ’m be su.+ 13 I sin’n, kan ndɛ yɛ’n Zoova m’ɔ ti ɔ Ɲanmiɛn’n i ɲrun. Se kɛ: ‘Ninnge kwlaa nga n sieli be ngunmin mɔ be o min sua’n nun’n, n fa mannin Levifuɛ mun, nin aofuɛ mun, nin ba nga be leman si’n, nin angbeti bla mun+ kɛ nga a seli min kɛ n yo’n sa. M’an fɔnman ɔ mmla mun, yɛ min ɲin w’a kpaman ɔ mmla’m be su. 14 Kɛ min sran wuli mɔ min wla boli min wun’n, min nuan w’a kanman ninnge sɔ’m be wie fi. Asa ekun’n, kɛ fiɛn kannin min’n, m’an faman wie. Asa kusu’n, m’an faman wie m’an manman be nga be wuli’n. N fali Zoova m’ɔ ti min Ɲanmiɛn’n i nuan ndɛ’n su, yɛ n yoli like kwlaa nga a seli min kɛ n yo’n. 15 Siɛn’n, kɛ a o ɔ tranwlɛ m’ɔ ti ɔ liɛ klonglo ɲanmiɛn su lɔ’n nun’n, yo maan Izraɛlifuɛ mɔ be ti ɔ nvle nunfuɛ’m be liɛ yo ye, yɛ yra mɛn nga a fa mannin e’n su,+ kɛ nga a fa tali e nannan’m be nda’n sa.+ Nɔnnɔn nin awɛma nzue be sonji mɛn sɔ’n nun.’+

16 “Andɛ’n, Zoova m’ɔ ti amun Ɲanmiɛn’n waan amun fɛ i afɔtuɛ nin i mmla fanunfanun’m be kwlaa be su. Amun fa amun awlɛn’n kwlaa nin amun nguan’n kwlaa nanti mmla sɔ’m be su.+ 17 Andɛ’n, Zoova w’a fa ndɛ kun w’a sie amun ɲrun. Yɛle kɛ sɛ amun fɛ i atin’n su’n naan amun nanti i afɔtuɛ nin i mmla fanunfanun’m+ be kwlaa be su naan amun fɛ i nuan ndɛ’n su’n, ɔ́ yó amun Ɲanmiɛn. 18 Andɛ’n, amun kusu amun seli Zoova kɛ amún káci i nvle, amún yó i liɛ klonglo+ kɛ ng’ɔ kan kleli amun’n sa, yɛ amún nánti i mmla’m be kwlaa be su. 19 Sɛ amun kle kɛ amun ti Zoova m’ɔ ti amun Ɲanmiɛn’n i liɛ klonglo’n,+ ɔ́ fá amun síe i nvle kwlaa ng’ɔ boli be’n be ti su.+ Ɔ maan bé yí amun ayɛ, amun dunman’n fú yɛ amún ɲán ɲrun, kɛ ng’ɔ kan kleli amun’n sa.”

27 I sin’n, Moizi nin Izraɛli kpɛnngbɛn’m be ɔli naan w’a se sran’m be kɛ: “Mmla nga n su fa man amun andɛ yɛ’n, amun nanti be kwlaa be su. 2 Cɛn nga amun kpɛ Zurdɛn’n naan amun wlu mɛn nga Zoova m’ɔ ti amun Ɲanmiɛn’n su fa man amun’n nun’n, amun siesie yɔbuɛ dandan mun. Kpɛkun amun kan be ayre ufue.+ 3 Kɛ amun ko kpɛ Zurdɛn’n, amun klɛ Mmla nga i nun ndɛ’m be kwlaa yɔbuɛ sɔ’m be su. I liɛ’n, kɛ nga Zoova m’ɔ ti amun nannan’m be Ɲanmiɛn’n ɔ kan kleli amun sa’n, amún wlú mɛn kun mɔ nɔnnɔn nin awɛma nzue be sonji nun’n, mɔ amun Ɲanmiɛn Zoova su fa man amun’n i nun.+ 4 Kɛ amun ko kpɛ Zurdɛn’n, amun siesie yɔbuɛ sɔ mun Ebali Oka’n su.+ Kpɛkun amun kan be ayre ufue, kɛ nga n su kan kle amun andɛ’n sa. 5 Asa ekun’n, amun fa yɔbuɛ be kplan tɛ yiwlɛ kun lɛ be man amun Ɲanmiɛn Zoova. Nán amun fa blalɛ kan yɔbuɛ sɔ mun.+ 6 Amun fa yɔbuɛ nga b’a sɛman’n be kplan Zoova m’ɔ ti amun Ɲanmiɛn’n i tɛ yiwlɛ’n. I su yɛ ɔ fata kɛ amun yi tɛ nga kɛ bé yí’n be yra nnɛn’n i kɔlikɔli’n be man Zoova m’ɔ ti amun Ɲanmiɛn’n niɔn. 7 Amun yi bo kun yolɛ tɛ mun,+ yɛ amun di nnɛn mun lɛ.+ Yɛ amun di aklunjɔɛ Zoova m’ɔ ti amun Ɲanmiɛn’n i ɲrun lɛ.+ 8 Amun klɛ Mmla nga i nun ndɛ’m be kwlaa be weinwein yɔbuɛ’m be su.”+

9 I sin’n, Moizi nin Levifuɛ nga be ti Ɲanmiɛn ɲrun jranfuɛ’n be kan ndɛ kleli Izraɛlifuɛ mun. Be seli be kɛ: “Izraɛlifuɛ mun, amun tɔ bliin, amun sie amun su. Andɛ’n, amun a kaci Zoova m’ɔ ti amun Ɲanmiɛn’n i nvle.+ 10 Amun sie amun su Zoova m’ɔ ti amun Ɲanmiɛn’n i nuan bo. Yɛ amun fɛ i mmla+ nin i afɔtuɛ fanunfanun nga n su fa man amun andɛ yɛ’n be su.”

11 Cɛn sɔ’n nun’n, Moizi seli sran’m be kɛ: 12 “Kɛ amun ko kpɛ Zurdɛn’n, akpasua nga bé kó jrán Garizimun Oka’n+ su mɔ bé bó muae mán sran mun’n, be yɛ: Simeɔn, nin Levi, nin Zida, nin Isakaa, nin Zozɛfu yɛ Bɛnzamɛn. 13 Kpɛkun akpasua nga bé kó jrán Ebali Oka’n+ su mɔ bé bó sannzan’n be yɛ: Ribɛnin, nin Gadi, nin Azɛɛ, nin Zebulɔn, nin Dan, nin Nɛftali. 14 Yɛ maan Levifuɛ’m be man be nɛn’n su naan be tɛ Izraɛlifuɛ’m be kwlaa be su kɛ:+

15 “‘Sran ng’ɔ sɛ like wie+ annzɛ ɔ klo blalɛ fa yo amuin’n,+ ninnge sɔ mɔ Zoova i ɲin ci be’n,+ mɔ kusu be ti ajuin difuɛ’m be sa nuan like’n, naan ɔ fa fia’n, nán maan ɔ ɲan muae le.’ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

16 “‘Sran ng’ɔ yo i si nin i nin be finfin’n, nán maan ɔ ɲan muae le.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

17 “‘Sran ng’ɔ tu i wiengu i awɛ’n kɔ siɛn’n, nán maan ɔ ɲan muae le.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

18 “‘Sran ng’ɔ yo naan aɲinsifuɛ kun mlin’n, nán maan ɔ ɲan muae le.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

19 “‘Sran ng’ɔ bu aofuɛ’n, annzɛ ba ng’ɔ leman si’n,* annzɛ angbeti bla’n+ i ndɛ kwlɛ’n,+ nán maan ɔ ɲan muae le.’ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

20 “‘Sran ng’ɔ nin i si i yi’n be la’n, nán maan ɔ ɲan muae le. Afin w’a kuɛkuɛ i si’n.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

21 “‘Sran ng’ɔ nin nnɛn be la’n, nán maan ɔ ɲan muae le.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

22 “‘Sran ng’ɔ nin i niaan bla, yɛle kɛ i si i wa bla annzɛ i nin i wa bla be la’n, nán maan ɔ ɲan muae le.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

23 “‘Sran ng’ɔ nin i yi i manmin’n be la’n, nán maan ɔ ɲan muae le.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

24 “‘Sran ng’ɔ bu sa i wiengu kun i ɲrun naan ɔ kun i’n, nán maan ɔ ɲan muae le.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

25 “‘Sran nga be mɛn i like kɛ ɔ ko kun sran kun mɔ w’a yoman sa’n, m’ɔ sɔ nun’n, nán maan ɔ ɲan muae le.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

26 “‘Sran nga w’a nianman nun w’a faman Mmla nga i nun ndɛ’m be su naan w’a nantiman be su’n, nán maan ɔ ɲan muae le.’+ (Yɛ maan nvlefuɛ’m be kwlaa be tɛ su kɛ: ‘Maan ɔ yo sɔ!’)

28 “Sɛ amun tie Zoova m’ɔ ti amun Ɲanmiɛn’n i nuan ndɛ’n, yɛle kɛ sɛ amun nian nun fɛ i mmla kwlaa nga n su fa man amun andɛ yɛ’n be su’n, Zoova m’ɔ ti amun Ɲanmiɛn’n fá amun síe nvle onga nga be o asiɛ’n su’n be kwlaa be ti su.+ 2 Sɛ amun fa Zoova m’ɔ ti amun Ɲanmiɛn’n i nuan ndɛ’n su titi’n, muae bá, yɛ amún ɲán ye fanunfanun nga mun:+

3 “Amun liɛ yó ye klɔ’n su, yɛ amun liɛ yó ye fie su lɔ.+

4 “Amun mma’m* be liɛ yó ye.+ Amun fie su ninnge mun bé yó ye. Amun nnɛn’m be mma mun, amun nannin ba mun nin amun bua ba’m bé yó kpa.+

5 “Ye nga amún ɲɛ́n i’n ti’n, amun gbogbo mun+ nin amun kpongbo ba+ nga amun fɔtɔ amun sanmlɛn’n nun’n, bé yí piɛ.

6 “Amun liɛ yó ye lika kwlaa nga amún kɔ́’n nun. Yɛ like kwlaa nga amún yó’n, ɔ́ yó ye amun sa nun.

7 “Zoova wá yó maan amun kpɔfuɛ nga bé jáso kɛ be nin amún kún’n, amún kwlá be.+ Kɛ bé bá alɛ kunlɛ’n, bé sín atin kun su yɛ bé bá-ɔ. Sanngɛ kɛ bé wánndi amun bo’n, bé fá atin fanunfanun nso.+ 8 Zoova wá yrá amun tanngannin’m be su,+ ɔ nin ninnge kwlaa nga amún yó’n su. Asa ekun’n, Zoova m’ɔ ti amun Ɲanmiɛn’n ɔ́ yrá amun su mɛn nga ɔ su fa man amun’n nun. 9 Sɛ amun fa Zoova m’ɔ ti amun Ɲanmiɛn’n i mmla’m be su yɛ amun nanti i atin’m be su tititi’n, Zoova wá fá amun yó nvle kun m’ɔ ti i liɛ klonglo’n,+ kɛ ng’ɔ kan kleli amun’n sa.+ 10 Nvlenvle kwlaa nga be o asiɛ’n su’n, bé wún kɛ Zoova i dunman’n wo amun su.+ Ɔ maan bé sró amun.+

11 “Zoova wá yó maan amún wú ba kpanngban kpa. Amun bua mun, nin amun boli’m bé sɔ́n kpanngban kpa.+ Yɛ amun fie su ninnge’m bé yó ye dan mɛn nga Zoova tali amun nannan’m be nda kɛ ɔ́ fá mán amun’n i nun.+ 12 Zoova wá tíke ɲanmiɛn su lɔ’n su kɛ be tike tanngannin mɔ ninnge kpakpa o nun’n su sa. Kpɛkun ɔ́ yó maan nzue tɔ́ amun mɛn’n nun blɛ ng’ɔ ti su’n i su.+ Kpɛkun ɔ́ yrá like kwlaa nga amun yo’n su. Amún bó nvle kpanngban be bosia, sanngɛ amun su usaman afɛ le.+ 13 Sɛ amun fa Zoova m’ɔ ti amun Ɲanmiɛn’n i mmla nga n su fa man amun andɛ yɛ’n su’n, naan amun nian be su nanti’n, Zoova wá yó maan amún dún mmua be kwlaa be ɲrun,+ amun su kaman siɛn. Amún trán be kwlaa be ti su, amun su kaman be bo. 14 Nán amun yaci ndɛ nga n su kan kle amun andɛ yɛ’n ko fa uflɛ su. Nán amun wɔ fama su annzɛ bɛ su+ be ko su ɲanmiɛn uflɛ.+

15 “Sanngɛ sɛ amun tieman Zoova m’ɔ ti amun Ɲanmiɛn’n i nuan ndɛ’n, yɛle kɛ sɛ amun fɛmɛn i afɔtuɛ nin i mmla fanunfanun nga n su fa man amun andɛ yɛ’n be su’n, sa yalɛ kwlaa nga mun bé tɔ́ amun su, bé ɲán amun:+

16 “Amun liɛ su yoman ye klɔ’n su, yɛ amun liɛ su yoman ye fie su lɔ.+

17 “Like fi su tranman amun gbogbo mun+ nin amun kpongbo ba+ nga amun fɔtɔ amun sanmlɛn’n nun’n be nun.

18 “Amun mma’m* be liɛ su yoman ye le,+ yɛ amun fie su ninnge’m be su yoman ye le. Amun nannin ba mun nin amun bua ba’m be su yoman kpa le.+

19 “Lika kwlaa nga amún kɔ́’n, amun liɛ su yoman ye le. Yɛ like kwlaa nga amún yó’n, ɔ su yoman ye amun sa nun le.

20 “Sɛ amun yo sa tɛtɛ naan amun wla fi Zoova su’n, like kwlaa nga amún yó’n nun’n, amun su ɲanman muae le. Ɔ́ sánngan amun lika’n nun, ɔ́ tú amun fɔ. Ɔ́ yó sɔ lele bé kún amun, yɛ amún núnnún ndɛndɛ kpa.+ 21 Zoova wá yó maan tukpacɛ ká amun wun lele saan w’a nunnun amun sekeseke mɛn nga amun su ko tran nun’n i nun.+ 22 Zoova wá yó maan tanngɔ ufue tɔ́ amun wun, amun wunnɛn’n ló fiaan,+ amun wunnɛn’n yɛ́yɛ́ amun, yɛ amun wunnɛn’n ló klakla kpa. Kpɛkun ɔ́ fá tokofi kún amun.+ Ɔ́ yó maan ninnge’m bé wú kee, yɛ tukpacɛ wie sáci fie su ninnge mun.*+ Sa sɔ’m bé tɔ́ amun su lele saan amun a wie nunnun. 23 Ɲanmiɛn m’ɔ la nglo lɔ plaii’n káci kɛ aaba sa. Yɛ asiɛ’n yó kekleke kɛ blalɛ sa.+ 24 Zoova wá yó maan ndutre nin fa bé fín ɲanmiɛn su lɔ gúa amun mɛn’n nun kɛ nzue yɛ ɔ su tɔ sa, lele naan amun a wie nunnun sekeseke. 25 Zoova wá yó maan amun kpɔfuɛ’m bé kwlá amun.+ Kɛ amún fá alɛ wlá be sin’n, atin kunngba yɛ amún fá-ɔ. Sanngɛ kɛ amún wánndi be bo’n, amún fá atin fanunfanun nso. Amun wun yó asiɛ’n su famiɛn diwlɛ’m be kwlaa be tɛ dan.+ 26 Amun fuɛn’m bé káci anunman nga be tu sin nglo lɔ’n nin nnɛn nga be o asiɛ’n su wa’n be kwlaa be aliɛ. Yɛ sran fi su kanman be bo.+

27 “Zoova wá yó maan Ezipti lɔ yra’n gúa amun wun. Asa ekun’n, amún ɲán koko nin nɲaa nin be wunnɛn’n su tukpacɛ fanunfanun wie mun ekun. Amun su kwlá yoman juejue le. 28 Zoova wá yó maan amún bó fia, amun ɲinma sí,+ yɛ amun ti nun sánngan. 29 Wia klakla kpa nun’n, amún fúafúa amun sa kɛ aɲinsifuɛ kun fuɛfuɛ i sa aosin’n nun’n sa.+ Like kwlaa nga amún yó’n, ɔ su yoman ye amun sa nun le. Bé dí amun lufle yɛ bé wúa amun tititi. Sanngɛ amun su ɲanman sran naan w’a de amun.+ 30 Bla nga amún trɛ́ i ase’n, sran uflɛ nin i bé lá kekle nun. Amún wá kplán sua, sanngɛ amun su tranman nun.+ Amún tá viɲin, sanngɛ amun su dimɛn i su mma.+ 31 Bé kún amun nannin mun amun ɲin bo lɛ, sanngɛ amun su diman wie. Bé wúa amun aflunmun’n amun ɲin bo lɛ, yɛ be su fa manman amun kun. Bé fá amun bua mun bé mán amun kpɔfuɛ mun, sanngɛ amun su ɲanman sran naan w’a de amun. 32 Bé trá amun mma yasua mun nin amun mma bla mun amun ɲin bo lɛ bé mán nvle uflɛ nunfuɛ mun.+ Amun wla ló be kpa, sanngɛ amun su kwlaman like fi yo. 33 Nvle nga amun siman be’n be nunfuɛ mun yɛ bé dí amun fie’m be su ninnge mun nin amun aliɛ’m be kwlaa-ɔ.+ Bé dí amun lufle yɛ bé míanmían amun tititi. 34 Like kwlaa nga amun ɲinma tá be’n ti’n, amún bó fia.

35 “Zoova wá yó maan yra wie mɔ be yo ya kpa’n, mɔ be leman ayre’n, bé gúa amun ja nin amun ja nannglunman’m be wun. Yɛ ɔ́ fɛ́ i amun ja bo lele fá jú amun ti afiɛn. 36 Zoova fá amun bɔbɔ nin famiɛn nga amún fɛ́ i síe amun su’n, ɔ́ kɔ́ nvle kun mɔ amun nin amun nannan’m be simɛn i’n i nun.+ Lɔ’n, amún sɔ́ amuin mɔ be ti waka annzɛ yɔbuɛ’n.+ 37 Kɛ nvle kwlaa nga Zoova wá fá amun kɔ́ lɔ’n i nunfuɛ’m bé wún amun’n, amún wun yó be tɛ dan. Bé yó amun finfin,* yɛ bé srí amun.+

38 “Amún lúa ninnge kpanngban amun fie’m be su, sanngɛ nga amún tí’n su juman lika fi.+ Afin lalo’m bé wíe be dí. 39 Amún tá viɲin yɛ amún níɛn i lika, sanngɛ amun su nɔnman duvɛn, yɛ amun su timɛn i su mma fi.+ Afin kakaa’m bé wíe be dí. 40 Amún ɲán olivie waka mun amun mɛn wunmuan’n nun, sanngɛ amun su ɲanman ngo naan amun a kpakpa. Afin olivie mma’m bé kpɔ́ngbɔ gúa. 41 Amún wú ba yasua nin ba bla mun, sanngɛ be su kaman amun wun lɛ. Afin bé trá be kɔ́.+ 42 Kakaa’m bé fá amun waka nin amun fie su ninnge’m be wunmuan’n. 43 Kɛ aliɛ cɛ́n m’ɔ́ sán’n, nn aofuɛ nga be tran amun afiɛn’n, bé ɲán ɲrun trá amun. Kɛ ɔ́ yó sɔ’n, nn amun liɛ’n amun ɲin gúa ase titi. 44 Bé bó amun bosia sanngɛ amun liɛ’n, amun su kwlá boman be bosia.+ Bé dún mmua amun ɲrun, yɛ amún ká siɛn.+

45 “Sɛ amun tieman Zoova m’ɔ ti amun Ɲanmiɛn’n i nuan ndɛ’n naan amun fɛmɛn i mmla nin i afɔtuɛ kwlaa nga i waan amun fa su’n be su’n,+ ɔ lemɛn i yowlɛ, sa yalɛ kwlaa sɔ’m+ bé tɔ́ amun su lele amún wíe núnnún.+ 46 Sa sɔ’m bé ká amun nin amun osu’n nunfuɛ’m be wun kɛ nzɔliɛ like sa naan amun fa tu amun wun fɔ titi.+ 47 Ɔ́ yó sɔ afin i nun nga like kwlaa ti sin yia amun’n, amun a suman Zoova m’ɔ ti amun Ɲanmiɛn’n aklunjɔɛ su.+ 48 Zoova yó maan amun kpɔfuɛ’m bé tó amun lɔ, yɛ amún sú be.+ Kɛ ɔ́ yó sɔ’n, nn awe+ nin nzuewe kún amun. Amun wun tralɛ’m bé títí yɛ yalɛ’n dí amun. Ɔ́ fá blalɛ síe amun kɔmin su lele ɔ́ núnnún amun sekeseke.

49 “Zoova wá yó maan nvle kun m’ɔ fin mmuammua kpa’n,+ m’ɔ fin asiɛ’n i awieliɛ lɔ’n, ɔ́ wá jrá amun su kɛ anunman ɲin wie yɛ ɔ su jra nnɛn su sa.+ Amun su timan nvle sɔ’n i nunfuɛ’m be aniɛn’n.+ 50 Nvle sɔ’n i nunfuɛ’m be yo sro kpa. Be ɲin su yiman oke mun yɛ be su siman gbanflɛn’m be aunnvɔɛ.+ 51 Bé dí amun bua ba mun nin amun boli ba mun nin amun nannin ba mun. Yɛ bé dí amun fie su ninnge’m be ngba lele saan amun a wie nunnun. Be su yaciman ble’n nin ɔɔzu’n, nin nzan uflɛuflɛ’n, nin ngo’n, nin nannin ba mun, nin bua ba’m be wie fi lɛ lele saan b’a kun amun.+ 52 Bé bó nanmue amun klɔ’m be sin. Ɔ maan amún ká amun mɛn’n nun klɔ’m be klun lɔ kɛ b’a wla amun bisua sa. Saan bé búbú amun klɔ’m be wun talɛ dandan mɔ amun lafi be su’n. Nanwlɛ, bé bó sín yía mɛn nga Zoova m’ɔ ti amun Ɲanmiɛn’n su fa man amun’n i su klɔ mun.+ 53 Kɛ amun kpɔfuɛ’m bé bó nanmue amun klɔ’m be sin’n, lika’n yó kekle amun su, bé klé amun ɲrɛnnɛn. Ɔ maan amun bɔbɔ amún dí amun klun ba mun, yɛle kɛ amun wa yasua nin amun wa bla+ nga Zoova m’ɔ ti amun Ɲanmiɛn’n fa mannin amun’n.

54 “Amun nun yasua ng’ɔ ti wɛtɛɛfuɛ’n, m’ɔ si aunnvɔɛ bɔbɔ’n, ɔ su simɛn i niaan yasua annzɛ i yi m’ɔ klo i kpa’n annzɛ i mma nga bé kɛ́ i sa nun’n, be aunnvɔɛ. 55 I mma ng’ɔ́ wá dí be’n, ɔ su manman sran sɔ’m be wie naan b’a di, afin aliɛ uflɛ nunman lɛ. Kɛ mɔ amun kpɔfuɛ’m bé wá bó nanmue amun klɔ’m be sin’n, mɔ lika’n wá yó kekle amun su’n, mɔ bé klé amun ɲrɛnnɛn’n, i ti yɛ ɔ́ yó sɔ-ɔ.+ 56 Amun nun bla ng’ɔ ti wɛtɛɛfuɛ nin aunnvɔɛ sifuɛ’n, mɔ i wun kpakpa m’ɔ yo’n ti’n, ɔ kunndɛman kɛ i ja kan asiɛ’n bɔbɔ’n,+ ɔ su simɛn i wun m’ɔ klo i kpa’n annzɛ i wa yasua’n annzɛ i wa bla’n i aunnvɔɛ. 57 I kpa bɔbɔ’n, ɔ́ fía dí ba ng’ɔ́ wú be’n ɔ nin be nan’n mɔ be fin i ja afiɛn fite’n. Afin kɛ amun kpɔfuɛ’m bé wá bó nanmue amun klɔ’m be sin’n, lika’n wá yó kekle amun su, yɛ bé klé amun ɲrɛnnɛn.

58 “Sɛ amun nantiman Mmla nga i nun ndɛ kwlaa nga be klɛli i fluwa nga nun’n su’n,+ naan amun sroman Zoova+ m’ɔ ti amun Ɲanmiɛn’n i dunman m’ɔ ti dan m’ɔ yo sro’n,+ 59 Zoova wá fá ɲrɛnnɛn sroesroe dan wie mun yí amun bɔbɔ nin amun mma’m be su. Be su wieman ndɛ.+ Ɔ́ wá fá tukpacɛ kekleekle mun yí amun su yɛ be su wieman ndɛ. 60 Ɔ́ fá Ezipti lɔ tukpacɛ’m be kwlaa mɔ i ti srɛ kunnin amun’n ɔ́ yí amun su. Yɛ be su wieman le. 61 Asa ekun’n, Zoova wá fá tukpacɛ nin ɲrɛnnɛn wie mɔ b’a boman be su Mmla fluwa nga nun’n, ɔ́ yí amun su lele saan amun a wie nunnun. 62 Kannzɛ amun a sɔn kpanngbanngban kɛ ɲanmiɛn su lɔ nzraama mun sa’n,+ sanngɛ sɛ amun a faman Zoova m’ɔ ti amun Ɲanmiɛn’n i nuan ndɛ’n su’n, amun nun nga bé ká lɛ’n, be su juman lika fi.+

63 “Zoova yoli maan amun liɛ yoli ye, yɛ amun a trɛ kpanngban kpa. Nanwlɛ, i sɔ yolɛ’n yoli i fɛ kpa. Sanngɛ Zoova su sisimɛn i bo naan w’a nunnun amun sekeseke. Ɔ́ kán amun bo mɛn nga amun su wa tran nun’n i nun.

64 “Zoova wá yó maan amún bó sánndi nvlenvle’m be kwlaa be nun, asiɛ’n i bue kun su lele fá jú i bue uflɛ su.+ Kpɛkun amún kó sɔ́ amuin mɔ be ti waka annzɛ yɔbuɛ’n, mɔ amun nin amun nannan’m be siman be’n.+ 65 Amun wla su guaman ase nvle sɔ’m be nun.+ Yɛ amun su ɲanman lika nga amun kwla taka amun ja naan amun a lo wunmiɛn’n. Sanngɛ Zoova wá yó maan amun wla bó amun wun,+ amun ɲinma’m bé fɛ́, yɛ amun akunndan’n sánngan.+ 66 Amún sénde wie nin nguan’n be afiɛn. Amun klun títí amun wia nun nin kɔnguɛ. Sɛ amún wú annzɛ amun su wuman’n, amun su wunman kun nga amun o nun’n. 67 Nglɛmun nun’n, amún sé kɛ: ‘Sɛ ɔ ti kɛ e o nnɔsua nun’n, nn ɔ flunman.’ Yɛ nnɔsua nun’n, amún sé kɛ: ‘Sɛ ɔ ti kɛ e o nglɛmun nun’n, nn ɔ flunman.’ Awlabɔɛ m’ɔ́ wá tɔ́ amun su’n nin ninnge nga amún wá wún be’n, be ti yɛ amún sé sɔ-ɔ. 68 Zoova wá fá amun mmeli’n nun sá amun sin Ezipti lɔ. Atin nga n seli amun kɛ amun su sinman su kun’n, i su yɛ ɔ́ fá amun sín-ɔn. Kɛ amún wá jú lɔ’n, amún yó amun wun atɛ kɛ kanga yasua nin kanga bla sa amun kpɔfuɛ’m be sa nun. Sanngɛ sran fi su toman amun.”

29 Kɛ Zoova nin Izraɛlifuɛ’m be trali aenguɛ Orɛbu lɔ’n, mɔ i sin’n ɔ nin be trá aenguɛ ekun Moabu mɛn’n nun lɔ’n, ndɛ ng’ɔ seli Moizi kɛ ɔ kan kle be’n yɛ.+

2 Moizi yiali Izraɛlifuɛ’m be kwlakwla naan w’a se be kɛ: “Amun wunnin like kwlaa nga Zoova fa yoli Faraɔn nin i sufuɛ mun’n, ɔ nin i nvle wunmuan’n Ezipti lɔ’n.+ 3 Yɛle kɛ ɲrɛnnɛn dandan nin sa kekleekle nin abonuan sa ng’ɔ yoli be’n mɔ amun ɲinma tali be’n.+ 4 Sanngɛ lele nin andɛ’n, Zoova nin-a manman amun akunndan* naan amun a wun sa wlɛ, ɔ nin-a manman amun ɲinma naan amun a wun ase, yɛ ɔ nin-a manman amun su naan amun a ti sa.+ 5 ‘Kɛ ń dún amun ɲrun mmua aawlɛ flɛnnɛn’n nun lɔ afuɛ lele ablanan’n (40),+ amun wun tralɛ’m b’a titiman, yɛ amun ngbabua’m b’a saciman amun bo.+ 6 Kɛ ɔ ko yo naan amun a si kɛ Zoova m’ɔ ti amun Ɲanmiɛn’n yɛle min’n, amun a diman kpanwun, yɛ amun a nɔnman duvɛn annzɛ nzan kekle wie fi.’ 7 Kɛ amun juli lika nga nun wa’n, Siɔn m’ɔ ti Ɛsbɔn+ lɔ famiɛn’n ɔ nin Ɔgu m’ɔ ti Basan+ famiɛn’n, be fali alɛ wlali e sin. Sanngɛ e kwlali be.+ 8 I sin’n, e fali be mɛn’n. Kpɛkun e fa mannin Ribɛnin i osu’n nunfuɛ mun, nin Gadi i osu’n nunfuɛ mun, ɔ nin Manase akpasua’n i bue kun nunfuɛ mun.+ 9 I sɔ’n ti’n, amun nian aenguɛ nga i nun ndɛ’m be su nanti naan like kwlaa nga amún yó’n, w’a yo ye amun sa nun.+

10 “Andɛ’n, amun kwlakwla amun a jran Zoova m’ɔ ti amun Ɲanmiɛn’n i ɲrun: Amun akpasua’m be su kpɛnngbɛn mun, amun kpɛnngbɛn mun, amun nvle nunfuɛ’m be ukafuɛ mun, Izraɛli yasua’m be ngba, 11 amun mma mun, amun yi mun,+ aofuɛ+ nga amun nin be tran amun nanmue’n nun’n, kɛ ɔ fɛ i amun yie bufuɛ’m be su m’ɔ́ fá jú amun nzue safuɛ’m be su’n. 12 Kɛ ɔ ko yo naan amun a ta nda kɛ amún dí aenguɛ nga Zoova m’ɔ ti amun Ɲanmiɛn’n nin amun su tra’n su’n, i ti yɛ amun o wa-ɔ. Zoova m’ɔ ti amun Ɲanmiɛn’n nin amun su tra aenguɛ sɔ’n andɛ.+ 13 I liɛ’n, ɔ́ fá amun yó i nvle andɛ.+ Yɛ i kusu yó amun Ɲanmiɛn+ kɛ ng’ɔ kan kleli amun’n sa. I sɔ yɛ ɔ tali amun nannan Abraamun,+ nin Izaaki,+ nin Zakɔbu+ be nda kɛ ɔ́ yó-ɔ.

14 “Nán amun ngunmin yɛ e nin amun e su tra aenguɛ nga, mɔ n su ta su nda yɛ’n niɔn. 15 Sanngɛ be nga e nin be e o Zoova m’ɔ ti e Ɲanmiɛn’n i ɲrun wa andɛ’n nin be nga be nunman e nun wa andɛ’n, be o nun wie. 16 (Afin amun si wafa nga e trannin Ezipti mɛn’n nun lɔ’n i kpa. Yɛ amun wunnin wafa nga e nanti sinnin nvlenvle’m be nun’n.+ 17 Yɛ amun wunnin be tete ninnge mun nin be amuin mɔ be ti like kain’n,*+ mɔ be ti waka, annzɛ yɔbuɛ, annzɛ sika annzɛ kusu sika ɔkwlɛ’n, mɔ be o be afiɛn’n.) 18 Ɔ maan amun nian amun wun su. Nán maan amun nun yasua wie, annzɛ amun nun bla wie, annzɛ amun awlobofuɛ wie annzɛ kusu amun akpasua nunfuɛ wie i awlɛn’n kaci naan ɔ yaci Zoova m’ɔ ti e Ɲanmiɛn’n i su sulɛ, naan ɔ ko su nvle sɔ’m be ɲanmiɛn liɛ mun.+ Nán amun nun sran wie yo kɛ ijre olui kun m’ɔ yo wi, mɔ i mma ng’ɔ su’n kwla kun sran’n sa.+

19 “Sanngɛ sɛ sran kun ti nda nga i nun ndɛ’n naan ɔ se i klun lɔ kɛ: ‘Kannzɛ bɔbɔ like nga min awlɛn’n su min bo kɛ n yo’n yɛ n yo’n, ń dí alaje’n,’ mɔ like kwlaa ng’ɔ yo’n i bo’n gua tɛ mɛn i’n, 20 Zoova su yaci cɛmɛn i.+ Sanngɛ Zoova fɛ́ i wun ya dan kpa, yɛ ɲrɛnnɛn kwlaa nga be klɛli be fluwa nga nun’n bé tɔ́ i su.+ Kpɛkun Zoova yó maan i dunman’n núnnún ɲanmiɛn’n bo wa. 21 Zoova wá yí sran sɔ’n Izraɛli akpasua’m be kwlaa be nun. Kpɛkun ɔ́ fá ɲrɛnnɛn kwlaa nga be kɛnnin i ndɛ mɔ be klɛli i Mmla fluwa nga nun’n yí i su.

22 “Kɛ amun osu’n nunfuɛ mun nin aofuɛ nga be fin mmuammua kpa’n, bé wún ɲrɛnnɛn nga be o nvle’n nun’n, yɛle kɛ tukpacɛ nga Zoova fa yili i su’n, 23 (sufru nin njin nin sin, i sɔ’n ti’n, be su kwlá luaman like fi amun mɛn wunmuan’n nun’n, yɛ ijre fi su fifiman. Kɛ Zoova fali Sodɔmun nin Gomɔru,+ yɛ Adma nin Zeboimun+ be wun ya m’ɔ́ sáci be’n, ɲrɛnnɛn sɔ’n yɛ ɔ fa yili be su-ɔ.) 24 be nin nvle kwlaa nunfuɛ’m bé sé kɛ: ‘?Ngue ti yɛ Zoova yoli nvle nga sɔ-ɔ?+ ?Ɔ yo sɛ ti yɛ ɔ fali ya dan sɔ-ɔ?’ 25 Yɛ bé sé kɛ: ‘Kɛ Zoova m’ɔ ti be nannan’m be Ɲanmiɛn’n fali be Ezipti mɛn’n nun lɔ fiteli’n,+ aenguɛ ng’ɔ nin be trali’n, b’a diman su ti-ɔ.+ 26 Sanngɛ be ko suli ɲanmiɛn uflɛ mɔ be siman be’n, yɛ be kotoli be bo. Kusu nn w’a seman be kɛ be ko su be.+ 27 I sɔ’n ti’n, Zoova fali nvle nga i wun ya dan kpa. Ɔ maan ɔ fali ɲrɛnnɛn kwlaa nga be kɛnnin i ndɛ mɔ be klɛli i fluwa nga nun’n yili i su.+ 28 Ya dan mɔ Zoova fali’n ti’n, ɔ tuli be bo be asiɛ’n su,+ kpɛkun ɔ fali be ɔli nvle uflɛ nun. Nvle sɔ’n nun yɛ be o andɛ-ɔ.’+

29 “Nvialiɛ nun ninnge’m be ti Zoova m’ɔ ti e Ɲanmiɛn’n i liɛ.+ Sanngɛ ninnge nga be yili be nglo’n be ti e liɛ. I liɛ’n, e kwla fa Mmla nga i nun ndɛ’n kwlaa su.+

30 “Muae nin ɲrɛnnɛn’n* i su ndɛ mun yɛ m’an fa sie amun ɲrun lɛ-ɔ.+ Kɛ sa kwlaa sɔ’m bé wá jú amun su’n, mɔ Zoova m’ɔ ti amun Ɲanmiɛn’n wá yó maan amún bó sánndi nvlenvle’m be nun’n,+ mɔ amun wla kpɛ́n ndɛ sɔ’m be su+ nvle kwlaa sɔ’m be nun’n, 2 mɔ amún sá amun sin Zoova m’ɔ ti amun Ɲanmiɛn’n i wun’n,+ mɔ amun nin amun mma mun amún fá amun awlɛn’n kwlaa nin amun nguan’n kwlaa bé fɛ́ i ndɛ nga n su kan kle amun andɛ yɛ’n su’n,+ 3 Zoova m’ɔ ti amun Ɲanmiɛn’n fá amun sá amun sin amun mɛn’n nun.+ Ɔ́ sí amun aunnvɔɛ.+ Zoova m’ɔ ti amun Ɲanmiɛn’n kó fá amun nvle ng’ɔ yoli maan amun bo sanndili be nun’n be nun. Kpɛkun ɔ́ yó maan amun ti wá yía ekun.+ 4 Kannzɛ bɔbɔ amun bo sanndili asiɛ’n i bue kun lele fa juli asiɛ’n i bue uflɛ su’n, sanngɛ Zoova m’ɔ ti amun Ɲanmiɛn’n ɔ́ kó yíayía amun lɔ, kpɛkun ɔ́ fá amun bá.+ 5 Zoova m’ɔ ti amun Ɲanmiɛn’n fá amun bá mɛn nga amun si’m be trannin nun’n i nun. Amún trán mɛn sɔ’n nun. Kpɛkun ɔ́ yó maan amun liɛ yó ye, yɛ amún sɔ́n kpa trá amun si mun.+ 6 Zoova m’ɔ ti amun Ɲanmiɛn’n wá yó amun nin amun osu’n nunfuɛ mun amun awlɛn’n i sanwun.+ Kɛ ɔ ko yo sɔ’n, amún fá amun awlɛn’n kwlaa nin amun nguan’n kwlaa bé kló Zoova m’ɔ ti amun Ɲanmiɛn’n. Kpɛkun amún trán nguan nun.+ 7 I sin’n, Zoova m’ɔ ti amun Ɲanmiɛn’n wá fá ɲrɛnnɛn kwlaa sɔ mun yí i amun kpɔfuɛ nga be fa be ɲin cili amun’n, mɔ be kleli amun yalɛ’n be su.+

8 “Kpɛkun amún sá amun sin fá Zoova i nuan ndɛ’n su ekun. Yɛ amún nánti i mmla kwlaa nga n su fa man amun andɛ’n be su. 9 Zoova m’ɔ ti amun Ɲanmiɛn’n wá yó maan like kwlaa nga amún yó’n, ɔ́ yó ye amun sa nun dan.+ Ɔ́ yó maan amun mma mun nin amun nnɛn’m bé trɛ́ kpa, yɛ amun fie’m be su ninnge’m bé yó ye dan. Afin Zoova m’ɔ ti amun Ɲanmiɛn’n klo kɛ ye ng’ɔ fa yoli amun nannan mun’n, ɔ́ yó amun wie.+ 10 Afin amún fá Zoova m’ɔ ti amun Ɲanmiɛn’n i nuan ndɛ’n su. Yɛ amún nánti i mmla nin i afɔtuɛ nga be klɛ Mmla fluwa nga nun’n be su. Kpɛkun amún fá amun awlɛn’n kwlaa nin amun nguan’n kwlaa bé sá be sin Zoova m’ɔ ti amun Ɲanmiɛn’n i wun.+

11 “Mmla nga n su fa man amun andɛ’n, ɔ timan kekle ngboko manman amun. Nán kɛ amun kwlá faman su-ɔ.*+ 12 Ɔ nunman ɲanmiɛn su lɔ naan amun a se kɛ: ‘?Wan yɛ ɔ́ fú ɲanmiɛn su lɔ naan w’a ko fa w’a blɛ e naan y’a kwla ti naan y’a nanti su-ɔ?’+ 13 Asa kusu’n, ɔ nunman jenvie’n i bue kun lɔ naan amun a se kɛ: ‘?Wan yɛ ɔ́ kpɛ́ jenvie’n naan w’a ko fa w’a blɛ e naan y’a kwla ti naan y’a nanti su-ɔ?’ 14 Afin ndɛ sɔ’n wo amun wun koko lɛ. Ɔ o amun nuan’n nun nin amun awlɛn’n nun.+ Ɔ maan amun kwla fa su.+

15 “Amun nian, andɛ’n m’an fa nguan’n nin sa kpa’n, yɛ wie’n nin sa tɛ’n m’an sie amun ɲrun.+ 16 Amun fa Zoova m’ɔ ti amun Ɲanmiɛn’n i mmla nga n su fa man amun andɛ’n su. Yɛle kɛ amun klo Zoova m’ɔ ti amun Ɲanmiɛn’n,+ amun nanti i atin’m be su, amun nanti i mmla mun nin i afɔtuɛ fanunfanun’m be su titi. Sɛ amun yo sɔ’n, amún trán nguan nun.+ Amún trɛ́ kpanngban kpa. Yɛ Zoova m’ɔ ti amun Ɲanmiɛn’n yrá amun su mɛn nga amun su ko fa’n nun.+

17 “Sanngɛ sɛ amun awlɛn’n kaci+ naan amun fɛmɛn i ndɛ’n su, naan be laka amun naan amun ko koto ɲanmiɛn uflɛ’m be bo naan amun su be’n,+ 18 maan n di amun nanwlɛ andɛ kɛ amún núnnún sekeseke.+ Amun su cɛman mɛn nga amun su kpɛ Zurdɛn’n naan amún kó fá’n nun. 19 M’an fa nguan’n nin wie’n, yɛ muae nin ɲrɛnnɛn’n+ m’an sie amun ɲrun. Ɲanmiɛn’n nin asiɛ’n be ti amun lalofuɛ. Amun nin amun osu’n nunfuɛ mun,+ amun fa nguan’n naan amun ka nguan nun.+ 20 I lɛ nun’n, maan amun klo Zoova m’ɔ ti amun Ɲanmiɛn’n,+ amun fɛ i nuan ndɛ’n su, amun fa amun wun be mɛntɛn i.+ Afin amun nguan ɲanman’n wo i sa nun. Zoova ti yɛ maan amún cɛ́ mɛn ng’ɔ tali nda kɛ ɔ́ fá mán amun nannan Abraamun nin Izaaki nin Zakɔbu’n i nun lelele-ɔ.”+

31 I sin’n, Moizi ɔli ko kannin ndɛ yɛ mun kleli Izraɛlifuɛ’m be kwlaa. 2 Ɔ seli be kɛ: “Kɛ é sé yɛ’n, n le afuɛ ya kun ablaɔn (120).+ N su kwlá dunman amun ɲrun* kun, afin Zoova seli min kɛ: ‘A su kpɛman Zurdɛn’n.’+ 3 Zoova m’ɔ ti amun Ɲanmiɛn’n yɛ ɔ́ dún mmua amun ɲrun-ɔn. I bɔbɔ núnnún nvle nga be o amun ɲrun lɛ’n. Ɔ́ kán be bo.+ Zozie yɛ ɔ́ fá amun kpɛ́ nzue’n+ kɛ nga Zoova fa kannin’n sa-ɔ. 4 Sa nga Zoova fa yoli Siɔn+ nin Ɔgu+ mɔ be ti Amɔɔfuɛ’m be famiɛn’n, i kunngba’n yɛ ɔ́ fá yó be-ɔ. Yɛle kɛ ɔ sacili be mɛn’n kpɛkun ɔ nunnunnin be.+ 5 Zoova wá kwlá be mán amun. Like ng’ɔ fata kɛ amun fa yo be’n, amun nian mmla kwlaa nga n fa mannin amun’n su naan amun a fa yo be.+ 6 Amun yo yakpafuɛ yɛ amun jran kekle.+ Nán srɛ kun amun. Be dunman nun ti’n, nán amun wun usu amun.+ Afin Zoova m’ɔ ti amun Ɲanmiɛn’n nin amun yɛ be nanti-ɔ. Ɔ su kpɔciman amun, yɛ ɔ su yiman amun ase.”+

7 I sin’n, Moizi flɛli Zozie. Kpɛkun ɔ seli i Izraɛlifuɛ’m be kwlaa be ɲrun lɛ kɛ: “Yo yakpafuɛ yɛ jran kekle.+ Afin wɔ yɛ á wá fá sran nga mun kɔ́ mɛn nga Zoova tali be nannan’m be nda kɛ ɔ́ fá mán be’n nun-ɔn. Yɛ á fá mɛn sɔ’n mán be naan be tran nun.*+ 8 Zoova bɔbɔ nánti ɔ ɲrun. Ɔ́ jrán wɔ sin titi.+ Ɔ su kpɔciman wɔ, yɛ ɔ su yiman wɔ ase. Nán srɛ kun wɔ yɛ nán ɔ wun usu wɔ.”+

9 I sin’n, Moizi klɛli Mmla sɔ’n.+ Ɔ fa mannin Levifuɛ nga be ti Ɲanmiɛn ɲrun jranfuɛ mɔ be sua Zoova i aenguɛ’n i alaka’n nin Izraɛlifuɛ’m be kpɛnngbɛn’m be kwlaa. 10 Moizi seli be kɛ: “Afuɛ nso kwlakwla m’ɔ ti afuɛ nga i nun yɛ amun yaci sran’m be kalɛ mun cɛ be’n,+ m’ɔ ti Kpata Bo Tranlɛ Cɛn’n+ i dilɛ blɛ’n, 11 mɔ Izraɛlifuɛ’m be kwlaa bé kó jrán Zoova m’ɔ ti amun Ɲanmiɛn’n i ɲrun+ lika ng’ɔ́ klé’n nun’n, amun kanngan Mmla nga nun naan be ngba be ti.+ 12 Amun yia sran’m be kwlaa,+ i yasua-o, i bla-o, i bakan-o, i aofuɛ ng’ɔ tran amun klɔ’n su-o, naan be sie be su be tie Mmla nga i nun ndɛ’m be ngba naan be suan, naan be sro Zoova m’ɔ ti amun Ɲanmiɛn’n, naan be fa su. 13 I liɛ’n, be mma nga b’a siman Mmla nga i nun ndɛ’n, bé tí.+ Kpɛkun bé sró Zoova m’ɔ ti amun Ɲanmiɛn’n blɛ kwlaa nga amún dí i mɛn nga amun su wa kpɛ Zurdɛn’n naan amún kó fá’n i nun.”+

14 I sin’n, Zoova seli Moizi kɛ: “Nian, ɔ wie cɛn’n w’a mantan koko.+ Flɛ Zozie naan amun wɔ* kan tannin sua mɔ n yi min wun nglo nun’n wo lɔ’n. I liɛ’n, ń fá junman’n ń wlɛ́ i sa nun.”+ Moizi nin Zozie be ɔli kan tannin sua mɔ Ɲanmiɛn yi i wun nglo nun’n wo lɔ’n. 15 Kpɛkun Zoova yili i wun nglo kan tannin sua’n wo lɛ’n, ɲanmiɛn ble’n nun. Kpɛkun ɲanmiɛn ble’n wa jrannin tannin sua’n i anuan’n nun lɛ.+

16 Zoova seli Moizi kɛ: “Nian, ɔ wie cɛn’n w’a mantan koko.* Kɛ sran nga’m bé wá kó fá mɛn nga be su kɔ nun’n, bé sɔ́ nvle nga be mantan be lɛ’n be amuin mun.*+ Ɔ maan be wla fí min su,+ kpɛkun be su diman aenguɛ nga be nin min trali’n su kun.+ 17 Blɛ sɔ’n nun’n, ń fá be wun ya dan kpa,+ kpɛkun ń yí be blo.+ Ń fá min ɲrun’n ń fía be wun+ lele saan b’a wie nunnun. I sin’n, kɛ ɲrɛnnɛn nin sa yalɛ kpanngban bé wá tɔ́ be su’n,+ bé sé kɛ: ‘?Nán Ɲanmiɛn m’ɔ nunman e afiɛn’n, i ti yɛ ɲrɛnnɛn sa sɔ’m be tɔli e su-ɔ?’+ 18 Sanngɛ sa tɛtɛ kwlaa nga be yoli’n ti’n, yɛle kɛ ɲanmiɛn uflɛ mɔ be ko suli be’n ti’n, cɛn sɔ’n nun’n ń káta min ɲrun.+

19 “Siɛn’n, amun klɛ jue nga+ naan amun fa kle Izraɛlifuɛ mun.+ Amun uka be naan be suan jue sɔ’n.* I liɛ’n, kɛ be jaso Ɲanmiɛn wun’n, sa ng’ɔ ju’n, jue sɔ’n kpɛ́n be wla.+ 20 Mɛn nga i ti yɛ n tali be nannan’m be nda’n,+ nɔnnɔn nin awɛma nzue be sonji nun.+ Kɛ n ko fa be n ko wɔ mɛn sɔ’n nun’n, mɔ bé dí like lele be ku yí mɔ bé ɲán be wun’n,+ bé kó sú ɲanmiɛn uflɛ. Ɔ maan be su buman min sran kun, kpɛkun be su diman aenguɛ nga e nin be trali’n su kun.+ 21 Kɛ ɲrɛnnɛn kpanngban nin awlabɔɛ wá tɔ́ be su’n,+ jue sɔ’n wá kpɛ́n be wla, (afin ɔ fataman kɛ be osu’n nunfuɛ’m be wla fi su) afin kwlaa naan m’an fa be m’an wɔ mɛn nga n tali nda kɛ ń fá mán be’n nun’n, n si akunndan nga be bu’n.”+

22 Cɛn sɔ’n nun’n, Moizi klɛli jue sɔ’n, kpɛkun ɔ fa kleli Izraɛlifuɛ mun.

23 I sin’n, ɔ* fali junman’n wlali Zozie m’ɔ ti Nɛn i wa’n i sa nun.+ Kpɛkun ɔ seli i kɛ: “Yo yakpafuɛ yɛ jran kekle.+ Afin wɔ yɛ á wá fá Izraɛlifuɛ mun kɔ́ mɛn nga n tali be nda kɛ ń fá mán be’n nun-ɔn.+ Ń jrán ɔ sin tititi.”

24 Kɛ Moizi wieli Mmla wunmuan’n i klɛ’n fluwa kun nun’n,+ 25 Moizi seli Levifuɛ nga be sua Zoova i aenguɛ’n i alaka’n be kɛ: 26 “Amun sɔ Mmla fluwa nga nun+ naan amun fa ko sie i Zoova m’ɔ ti amun Ɲanmiɛn’n i aenguɛ’n i alaka’n i wun lɛ.+ Fluwa sɔ’n yó kɛ Ɲanmiɛn i lalofuɛ kun m’ɔ bu amun fɔ’n sa. 27 Afin n si kpa kɛ amun ɲin su ti kekle dan+ naan be bli amun-ɔn, ɔ bliman.+ Dɔ nga su bɔbɔ mɔ min ɲin te o su’n, amun yo ɲin kekle Zoova su. ?Yɛ kɛ n ko wu’n nin? ?Ɔ su traman ngalɛ’n? 28 Amun yiayia amun akpasua’m be su kpɛnngbɛn mun, nin amun sunianfuɛ mun naan be bla min ɲrun wa, naan n kan ndɛ sɔ mun naan be ti. M’an fa ɲanmiɛn’n nin asiɛ’n kɛ min lalofuɛ mun sa naan be bu be fɔ.+ 29 Afin n si jrɛiin kɛ, kɛ n ko wu’n, amún yó sa tɛtɛ mun.+ Kpɛkun amún yáci atin nga n kleli amun’n i su falɛ. Yɛ cɛn wie lele’n, ɲrɛnnɛn’n wá tɔ́ amun su.+ Afin amún yó sa tɛ Zoova ɲrun, yɛ amun ayeliɛ’n ló i ngasi.”

30 I sin’n, Moizi kannin jue’n i nun ndɛ mun kleli Izraɛlifuɛ’m be kwlaa. Ɔ fɛli i i bo bolɛ’n su lele fa juli i awieliɛ.+ Jue sɔ’n yɛ:

32 “Nglo, sie ɔ su maan n kan ndɛ,

maan asiɛ’n kusu tie min nuan ndɛ’n.

 2 Like nga n kle’n, ɔ́ yó kɛ nzue m’ɔ tɔ’n sa,

min nuan ndɛ’n yó kɛ bɔlɛ m’ɔ gua’n sa,

ɔ́ yó kɛ nzue m’ɔ tɔ wɛɛwɛɛ ijre’n su’n sa,

yɛ ɔ́ yó kɛ nzue m’ɔ tɔ dan waka’m be su’n sa.

 3 Afin ń bó Zoova i dunman.+

Ń kán e Ɲanmiɛn’n i dan m’ɔ ti’n i ndɛ!+

 4 Yɔbuɛ’n, i sa ng’ɔ yo’n, fiɛn kaan sa nunmɛn i wun,+

afin ɔ yo sa kwlaa i nuan su sɛsɛsɛ.+

Ɲanmiɛn ti nanwlɛfuɛ,+ ɔ yoman sa ng’ɔ timan su’n le,+

ɔ ti kpa, yɛ ɔ ti seiin.+

 5 Be yɛ be yoli sa tɛ’n niɔn.+

Nɛ́n i mma mun-ɔn, fɔ’n wo be nun.+

Be ti sran mɔ be ti gblɛfuɛ-ɔ, b’a saci tɛ dan!+

 6 ?Amun mɔ amun ti sinnglinfuɛ, mɔ amun buman akunndan’n,+

naan kɛ nga sa yɛ amún yó Zoova-ɔ?+

?Nɛ́n i yɛ ɔ ti amun Si mɔ i ti yɛ amun o lɛ’n niɔn?+

?Nɛ́n i yɛ ɔ yoli amun lele amun a yo kpa-ɔ?

 7 Maan amun wla kpɛn laa blɛ’n i su,

amun bu lalafuɛ sran’m be blɛ liɛ’n i akunndan.

Amun usa amun si mun, bé kán wie klé amun,+

amun kpɛnngbɛn mun, bé yíyí nun klé amun.

 8 Kɛ Ɲanmiɛn m’ɔ o Like Kwlaa Ti Su’n fali nvlenvle’m be aja like’n mannin be’n,+

kɛ ɔ yoli maan Adan i mma’m* be kpacikpacili’n,+

ɔ niannin wafa nga Izraɛli i mma’m be nuan fa ti’n su+

naan w’a jaja nvle’m be afiɛn awɛ’n.+

 9 Afin Zoova i like liɛ ng’ɔ le i’n, yɛle i sran mun,+

Zakɔbu ti i aja like.+

10 Ɔ wunnin i aawlɛ flɛnnɛn kun nun,+

like fi nunman lika sɔ’n nun, blo nnɛn mun yɛ be ti be ngan-ɔn.+

Ɔ bo sin yiɛli i, ɔ niɛnnin i lika,+

ɔ sɛsɛli i kɛ ɔ su sasa i bɔbɔ i ɲinma su sran’n sa.+

11 Kɛ anunman ɲin’n klé i mma’m be tulɛ’n,

ɔ tu sin be su,

ɔ trɛ i ndɛwa’m be nun, ɔ fa be,

yɛ ɔ sua be i ndɛwa’m be nuan su.+ I wafa kunngba’n,

12 Zoova kunngba yɛ ɔ kleli i* atin-ɔn,+

kɛ ɔ́ yó i sɔ’n, ɲanmiɛn uflɛ fi nunmɛn i wun lɛ.+

13 Ɔ fɛ i sinnin asiɛ’n i lika nga be ti nglonglo kpa’n be su,+

ɔ maan ɔ dili fie su ninnge mun.+

Like ng’ɔ fa tɛli i’n yɛle yɔbuɛ’n nun awɛma nzue’n

nin ngo ng’ɔ fin yɔbuɛ kekleke’n nun’n,

14 nin nannin wunflɛn nzue nga w’a lafi’n, ɔ nin bua nin boli wunflɛn nzue’n,

ɔ nin bua’m be nun kpafuɛ’n,

ɔ nin Basan lɔ bua ɲin mun, nin boli kpakpuɛ mun,

ɔ nin ble’n i nun kpafuɛ’n.+

Yɛ a nɔnnin duvɛn mɔ be fali viɲin mma’n i nzue’n* be yoli’n.

15 Kɛ Zesurunun* cɛnnin lɔklɔɔ’n, ɔ tuli i ja’n sili sran ng’ɔ tɛli i’n.

A cɛnnin lɔklɔɔ, a yoli dan, yɛ a wlawlali.+

I wla fili Ɲanmiɛn mɔ i ti yɛ ɔ yoli kpa’n,+

ɔ yoli Yɔbuɛ m’ɔ deli i’n i finfin.

16 Be fali nvle uflɛ nun ɲanmiɛn liɛ’m be fɔkɔli i awlɛn,+

be fali ninnge tɛtɛ’m be loli i ngasi.+

17 Mmusu mun yɛ be yi tɛ mannin be-ɔ, nán Ɲanmiɛn-ɔn,+

be fa mannin amuin mɔ be siman be laa’n,

mɔ b’a ju su siɛn’n,

amuin sɔ mun’n, be nannan’m b’a siman be.

18 Ɔ wla fili Yɔbuɛ+ m’ɔ yili wɔ’n,

yɛ ɔ wla w’a kpɛnman Ɲanmiɛn m’ɔ wuli wɔ’n i su.+

19 Kɛ Zoova wunnin i sɔ’n, ɔ yili be blo+

afin i mma yasua mun nin i mma bla’m be loli i ngasi.

20 I sɔ’n ti’n, ɔ seli kɛ: ‘Ń fá min ɲrun’n ń fía be wun,+

ń wún wafa nga i bo’n gúa mán be’n.

Afin be kwlaa be ti sa tɛ yofuɛ ngunmin,+

ba sɔ’m be timan nanwlɛfuɛ kaan sa.+

21 Be fali like wie m’ɔ timan ɲanmiɛn’n be fɔkɔli min awlɛn’n.+

Be fali be amuin mɔ be timan like fi’n be loli min ngasi.+

Ɔ maan ń má yó maan be ɲin wá bló sran nga be buman be wie’n be wun,+

ń má fá nvle kun mɔ i nunfuɛ’m be ti sinnglinfuɛ’n ń ló be ngasi.+

22 Afin ya nga n fali’n ti’n, sin kun sɔli,+

ɔ́ júe lele jú Ndia’n* i bo kpa lɔ,+

ɔ́ yrá asiɛ’n nin i su ninnge mun kɔlikɔli,

yɛ ɔ́ yrá oka’m be takawlɛ’n i bo lɔ.

23 Ń úka be ɲrɛnnɛn’n su,

ń tó min ta mma’m be wun lele bé wíe min sa nun.

24 Awe’n kún be lelele,+

be wunnɛn’n ló fiaan, yɛ bé núnnún tɛtɛ kpa.+

Ń súnman nnɛn wlɛfuɛ mun naan be wlu amun nun,+

ɔ nin ndutre’n nun wuo nga be le bɔyre’n.

25 Tokofi’n kún be mma mun gua su lɔ.+

I gbanflɛn-o, i talua ng’ɔ nin-a siman bian-o,

i bakan-o, i sran nga i ti w’a bo je-o,+

be kwlaa bé úsu sa tututu be sua’m be nun.+

26 Min waan ń sé kɛ: “Ń yó maan bé bó sánndi,

ń yó maan sran’m be wla su kpɛnman be su kun.”

27 Sanngɛ min kpɔfuɛ’n kwla jran su fa kan ndɛ,+

afin min ɲrun tanndanfuɛ’m be kwla fa di be nuan.+

Be kwla se kɛ: “E fanngan nun ti yɛ e kwlali-ɔ,+

nán Zoova yɛ ɔ yoli sa kwlaa nga-ɔ.”

28 Afin Izraɛli ti nvle kun mɔ i nunfuɛ’m be siman ngwlɛlɛ-ɔ,*

be nun wie fi wunman sa wlɛ.+

29 Sɛ be ti ngwlɛlɛfuɛ’n,+ nn bé bú su akunndan.+

Bé bú wafa nga i bo’n gúa mán be’n i akunndan.+

30 ?Sɛ Zoova w’a yiman be w’a manman’n,

sɛ be Yɔbuɛ’n w’a yoman be atɛ’n,+

ɔ́ yó sɛ naan sran kunngba w’a kwla fuan sran akpi (1.000),

naan sran nɲɔn b’a kwla kan sran akpiakpi blu (10.000) be bo?+

31 Afin be yɔbuɛ’n timan kɛ e Yɔbuɛ liɛ’n sa,+

e kpɔfuɛ’m be bɔbɔ be wunnin i sɔ liɛ’n i wlɛ.+

32 Afin be viɲin waka’n fin Sodɔmun lɔ viɲin fie’n nun.

Ɔ fin Gomɔru+ lɔ viɲin fie’n nun.

Be viɲin mma’m be kwla kun sran,

yɛ be viɲin sɔlɛsɔlɛ’m be yo wi.+

33 Be duvɛn’n ti kɛ wuo’m be bɔyre’n sa,

ɔ ti kɛ kpangbanzrɛlɛ’n i bɔyre’n sa.

34 M’an sie be ayeliɛ’n su nzɔliɛ w’a wie,

m’an yia su min tanngannin’n nun.+

35 Min yɛ n tu klunngbɔ’n niɔn, min yɛ n tua kalɛ-ɔ,+

kɛ i blɛ’n ju’n be ja’n séli,+

afin be ɲrɛnnɛn blɛ’n w’a mantan koko,

yɛ sa ng’ɔ minndɛ be’n, ɔ́ jú ndɛndɛ.’

36 Afin Zoova dí i sran’m be jɔlɛ,+

kɛ ɔ́ wún kɛ i sufuɛ’m be leman wunmiɛn kun’n,

naan be nga be leman ukafuɛ nin be nga b’a yo fakafaka’n yɛ b’a ka’n,

ɔ́ sí be aunnvɔɛ.+

37 Yɛ ɔ́ sé kɛ: ‘?Be amuin’m be o nin?+

?Yɔbuɛ nga be ko fiɛli i sin’n,

38 amuin sɔ mɔ be di be nnɛn nga be fa yi tɛ’n be lui’n titi’n,*

mɔ be nɔn duvɛn nga be guɛ i ase man be’n+ be o nin?

Maan be jaso naan be de amun.

Maan be yo amun fiawlɛ.

39 Siɛn’n, amun wun i wlɛ kɛ Ɲanmiɛn’n* yɛle min,+

Ɲanmiɛn uflɛ nunman lɛ, saan min kunngba.+

N yo maan sran wu, yɛ n man sran nguan.+

N bo kannin,+ yɛ n fua kannin,+

sran fi kwlá demɛn i wiengu min sa nun.+

40 Afin n man min sa’n su nglo,

yɛ n ta nda kɛ: “Kɛ mɔ n wo lɛ tititi’n,”+

41 sɛ n si min tokofi m’ɔ ti ɲanɲanɲan’n,

naan n siesie min wun kɛ ń dí jɔlɛ’n,+

ń tú min klunngbɔ min ɲrun tanndanfuɛ’m be su,+

yɛ ń túa min kpɔfuɛ’m be kalɛ.

42 Ń yó maan min ta mma’m bé nɔ́n mmoja lele bé bó,

bé nɔ́n be nga be wuli’n nin be nga be trali be’n be mmoja’n,

yɛ min tokofi’n dí nnɛn,

ɔ nin min kpɔfuɛ’m be su kpɛnngbɛn’m be ti mun.’

43 Nvlenvle mun, maan amun nin i sran’m be di aklunjɔɛ,+

afin i sufuɛ’m be mmoja m’ɔ guali’n ti’n, ɔ́ tú i klunngbɔ,+

yɛ ɔ́ tú i klunngbɔ i kpɔfuɛ’m be su,+

ɔ́ yó i sran’m be nvle’n i sanwun.”

44 Moizi bali yɛ ɔ kannin jue sɔ’n i nun ndɛ mun kleli sran’m be kwlaa.+ Ɔ nin Oze*+ m’ɔ ti Nɛn i wa’n yɛ be yoli i sɔ-ɔ. 45 Kɛ Moizi kannin ndɛ kwlaa sɔ mun kleli Izraɛlifuɛ mun wieli’n, 46 ɔ seli be kɛ: “Fɔ nga n su tu amun andɛ yɛ’n, amun fa sie amun klun kpa.+ I liɛ’n, amún wlá amun mma’m be fanngan kɛ be nanti Mmla nga i nun ndɛ’n kwlaa su.+ 47 Nán ndɛ finfin yɛ n su kan-ɔn. Afin i ti yɛ amún ɲán nguan-ɔn.+ Sɛ amun fa ndɛ sɔ’n su’n, amún cɛ́ kpa mɛn nga amun su kpɛ Zurdɛn’n naan amún kó fá’n i nun.”

48 Cɛn kunngba sɔ’n nun’n, Zoova seli Moizi kɛ: 49 “Kɔ Abarimun okaoka’m+ be nun, yɛle kɛ Nebo Oka’n+ m’ɔ o Moabu mɛn’n nun lɔ’n, Zeriko i ɲrun lɛ’n su. Kpɛkun nian Kanaan mɛn’n. Mɛn sɔ’n yɛ n su wa fa man Izraɛlifuɛ mun naan be tran nun-ɔn.+ 50 I sin’n, á wá wú oka nga a su wa fu su’n i su. Yɛ bé síe wɔ kɛ nga be fa sieli ɔ nannan mun’n sa.* Ɔ niaan bian Aarɔn wuli Ɔru Oka’n+ su lɔ kɛ ngalɛ’n sa, kpɛkun be sieli i kɛ nga be fa sieli i nannan’m be sa. 51 Afin kɛ amun juli Kadɛsi m’ɔ o Zinin aawlɛ flɛnnɛn’n nun lɔ’n nun’n, Meriba lɔ nzue’n+ i su ndɛ’n nun’n, amun nɲɔn’n amun nin min b’a nantiman nanwlɛ su. Afin amun a kleman kɛ n ti sanwun Izraɛlifuɛ’m be kwlaa be ɲrun.+ 52 Mɛn nga n su wa fa man Izraɛli nvle’n, á wún i mmua lɔ. Sanngɛ ɔ ja su tiaman nun.”+

33 Kwlaa naan Moizi m’ɔ ti Ɲanmiɛn Kpli i sran’n w’a wu’n, muae ng’ɔ bo mannin Izraɛlifuɛ mun’n yɛ ɔ o yɛ.+ 2 Ɔ seli kɛ:

“Zoova fin Sinai lɔ ba,+

kɛ ɔ fɛ i Seii lɔ’n, ɔ kpaja be su kɛ wia’n sa.

Kɛ ɔ fɛ i Paran asa’n su lɔ okaoka lika’m+ be nun’n, ɔ kpaja ɲanɲanɲan,

ɔ nin i anzi kpanngban kpa*+ yɛ be ba-ɔ,

i sonja’m+ be o i sa fama su.

 3 Ɔ kloli i sran mun,+

be sran kwlaa nga be ti sanwun’n, be o ɔ sa nun.+

Be trannin ɔ bo lɛ,+

be tili ɔ nuan ndɛ’n.+

 4 (Moizi kannin ndɛ kun kleli e, ɔ mannin e mmla kun,+

ɔ ti Zakɔbu i osu’n nunfuɛ’m be liɛ.)+

 5 Yɛ ɔ kacili famiɛn Zesurunun*+ lɔ,

kɛ ɔ́ yó sɔ’n, nn sran’m be su kpɛnngbɛn’m b’a yia,+

yɛ Izraɛli akpasua’m be kwlaa be o lɛ wie.+

 6 Maan Ribɛnin ka nguan nun, nán maan ɔ wu,+

yɛ nán maan i sran’m be nuan kpɛ su.”+

7 Yɛ ɔ boli muae nga mannin Zida,+ ɔ seli kɛ:

“Zoova, tie Zida+ i aniɛn,

fɛ i sɛ i sin i fuɛ’m be wun lɔ.

Ɔ fɛ i sa’n kplili like ng’ɔ ti i liɛ’n,

yɛ ukɛ i naan ɔ nin i kpɔfuɛ’m be kun.”+

8 Ɔ kannin Levi i su ndɛ seli kɛ:+

“Ɔ* Tumimun’n nin ɔ Urimun’n+ be ti sran ng’ɔ nin ɔ nanti nanwlɛ su’n i liɛ,+

a sɛli i Masa+ lɔ niannin.

A mɛnnin i ndɛ Meriba lɔ nzue’n+ su lɔ,

 9 sran m’ɔ kɛnnin i si nin i nin be ndɛ kɛ: ‘M’an buman be wie’n.’

W’a simɛn i bɔbɔ i niaan mun,+

w’a niɛnmɛn i klun ba’m be lɔ,

afin be fali ɔ ndɛ’n su,

be nantili aenguɛ nga a nin be trali’n su.+

10 Maan be fa ɔ afɔtuɛ mun kle Zakɔbu.+

Maan be fa ɔ Mmla’n kle Izraɛli.+

Maan be yra ansan man wɔ naan ɔ bɔn ɔ bue nun fannin+

ɔ nin like wunmuan kun man wɔ ɔ tɛ yiwlɛ’n su.+

11 Zoova, yra wunmiɛn m’ɔ le i’n su,

kle kɛ ɔ klun jɔ like ng’ɔ yo’n su.

Bubu be nga be jaso i wun’n be ja* mun,

i liɛ’n, be nga be kpɔ i’n be su jasomɛn i wun kun.”

12 Ɔ kannin Bɛnzamɛn i su ndɛ seli kɛ:+

“Maan Zoova i awlɛn su sran’n tran fɔun nun i wun lɛ,

kɛ ɔ́ yó sɔ’n, nn ɔ́ sɛ́sɛ́ i cɛn wunmuan’n nun,

ɔ́ trɛ́n i wati su.”

13 Ɔ kannin Zozɛfu i su ndɛ seli kɛ:+

“Maan Zoova yrɛ i mɛn’n su+

naan ɔ ɲan nglo lɔ ninnge kpakpa mun,

ɔ nin bɔlɛ ufue nin nzue nga be fin asiɛ’n i bo lɔ’n,+

14 ɔ nin ninnge kpakpa nga wia’n ti’n, be yo kpa’n

ɔ nin ninnge kpakpa nga be ɲɛn i anglo kwlaa nun’n,+

15 ɔ nin oka nga be o lɛ nán andɛ sa’n* be su lɔ ninnge kpakpa mun+

ɔ nin kpɔlɛ mɔ be o lɛ tititi’n be su ninnge kpakpa mun,

16 ɔ nin asiɛ’n su ninnge kpakpa mun, nin ninnge nga be yi i piɛ’n,+

yɛ maan Sran ng’ɔ tran owieowie’m be nun’n i klun jɔ i wun.+

Maan be jra Zozɛfu i ti’n su,

sran nga be fɛli i i niaan’m be nun’n i ti afiɛn.+

17 Ɔ ti dan kɛ nannin tola’n i wa klikli’n sa,

yɛ i wɛ’m be ti kɛ blo nannin’n* i wɛ mun sa.

Ɔ́ fá sú sran’m be bo

lele be ngba bé kpɛ́n asiɛ’n i tiwa lɔ.

Be ti Efraimun m’ɔ ju sran akpiakpi sɔ lele blu’n i liɛ,+

yɛ be ti Manase m’ɔ ju sran akpiakpi’n i liɛ.”

18 Ɔ kannin Zabilɔn i su ndɛ seli kɛ:+

“Zabilɔn, maan ɔ klun jɔ ajalɛ nga á tú’n su,

yɛ wɔ, Isakaa, ɔ tannin sua’m be bo.+

19 Bé yíayía sran mun oka’n su lɔ.

Yɛ bé yí sa kpa yolɛ’n i ti tɛ.

Afin bé fá jenvie’n nun ninnge kpakpa nga be diman be yalɛ’n

ɔ nin ninnge kpakpa nga be fia aunɲan’n nun’n.”

20 Ɔ kannin Gadi i ndɛ seli kɛ:+

“Sran ng’ɔ tu Gadi i awɛ’n kɔ siɛn’n i liɛ su ti ye.+

Ɔ la lɛ kɛ asɔmɔli sa,

w’a sa cɛiin naan ɔ́ tú i nnɛn’n i sa’n, ɔ nin i ti sɛ’n bɔbɔ.

21 I bue klikli’n yɛ ɔ́ fá-ɔ,+

afin lɛ yɛ be sie sran ng’ɔ kpɛ mmla’n i like liɛ’n niɔn.+

Sran’m be su kpɛnngbɛn’m bé wá yía.

Ɔ́ yó sa ng’ɔ ti i nuan su’n Zoova dunman nun,

yɛ ɔ́ dí i jɔlɛ mun Izraɛli lɔ.”

22 Ɔ kannin Dan i ndɛ seli kɛ:+

“Dan ti kɛ asɔmɔli ba sa.+

Ɔ́ fín Basan lɔ tú kpɛ́n.”+

23 Ɔ kannin Nɛftali i ndɛ seli kɛ:+

“Zoova i klun jɔ Nɛftali i wun lele ɔ bobo i su,

Yɛ ɔ yrɛli i su dan.

Fa wia atɔliɛ lika’n nin ngua lɔ lika’n.”

24 Ɔ kannin Azɛɛ i ndɛ seli kɛ:+

“Ɲanmiɛn mannin Azɛɛ i ba kpanngban.

Maan i niaan’m be klo i dan.

Yɛ maan ɔ fɛ i ja’n wlɛ* i ngo’n nun.

25 Blalɛ nin aaba yɛ be fa to ɔ anuan’m be nun-ɔn.+

Yɛ á trán sa fɔun lele naan wie’n w’a kun wɔ.*

26 Sran fi timan kɛ Zesurunun+ i Ɲanmiɛn Kpli’n,+

m’ɔ sin ɲanmiɛn su lɔ ɔ kɔ ɔ delɛ’n sa.

I aɲrunɲan’n ti dan, yɛ ɔ fu ɲanmiɛn ble’n su yɛ ɔ kɔ-ɔ.+

27 Kɛ ɔ fɛ i lalafuɛ nun lele’n, Ɲanmiɛn ti fiawlɛ kun,+

ɔ fɛ i sa mɔ be o lɛ tititi’n fa sie ɔ bo.+

Ɔ́ fúan ɔ kpɔfuɛ’n ɔ ɲrun,+

yɛ ɔ́ sé kɛ: ‘Nunnun be sekeseke!’+

28 Izraɛli trán sa fɔuun,

yɛ be su kleman Zakɔbu i osu’n nunfuɛ’m* be yalɛ

mɛn kun m’ɔ ti ble* nin duvɛn uflɛuflɛ ngunmin’n,+

mɔ bɔlɛ ufue’n fín ɲanmiɛn su sónji lɔ’n nun.+

29 Izraɛli, maan ɔ klun jɔ!+

?Wan yɛ ɔ ti kɛ wɔ sa-ɔ?+

i yɛ ɔ ti ɔ ɲrɛn ng’ɔ sasa wɔ’n,+

nin ɔ tokofi m’ɔ leman wunsu’n niɔn.

Ɔ kpɔfuɛ’m bé úsu ɔ ɲrun sa tututu,+

yɛ á tíatía be wiasin.”*

34 I sin’n, Moizi fɛli i Moabu lɔ lika kpɛtɛkplɛɛ’n nun lɛ ɔli Nebo Oka’n+ su lɔ. Ɔ fuli Pisga+ m’ɔ o Zeriko i ɲrun ndɛnman su’n+ i ti su lɔ. Kpɛkun Zoova fali lika wunmuan’n kleli i. Yɛle kɛ lika ng’ɔ fɛ i Galaadi lele fa ju Dan’n,+ 2 nin Nɛftali i lika’n, nin Efraimun nin Manase be lika’n, nin Zida i lika wunmuan’n lele fa ju jenvie ng’ɔ o wia atɔliɛ lɔ’n,*+ 3 nin Negɛbu,+ nin Zurdɛn asa’n,+ nin Zeriko m’ɔ ti nglesia klɔ’n i lika kpɛtɛkplɛɛ’n, lele fa ju Zoaa.+

4 I sin’n, Zoova seli i kɛ: “Mɛn nga ti yɛ n tali Abraamun nin Izaaki nin Zakɔbu be nda’n, yɛ ɔ o lɛ-ɔ. N seli kɛ: ‘Mɛn sɔ’n yó ɔ osu’n nunfuɛ’m be liɛ.’+ N yacili ɔ nun naan ɔ ɲinma gua mɛn sɔ’n i wun. Sanngɛ a su juman lɔ.”+

5 Kɛ ɔ yoli sɔ’n, Moizi m’ɔ ti Zoova i sufuɛ’n wuli Moabu mɛn’n nun lɛ, kɛ nga Zoova fa kannin’n sa.+ 6 Ɔ sieli i kongo’n nun Moabu mɛn’n nun lɔ, Bɛti-Peɔɔ i ɲrun ndɛnman su lɛ. Andɛ nin andɛ’n, sran fi siman lika trele nga i asieliɛ’n wo’n.+ 7 Kɛ Moizi wú’n, nn ɔ le afuɛ ya kun ablaɔn (120).+ Kɛ ɔ́ yó sɔ’n, nn ɔ te wun ase kpa, yɛ ɔ te le wunmiɛn kpa. 8 Izraɛlifuɛ’m be sunnin Moizi Moabu lɔ lika kpɛtɛkplɛɛ’n nun cɛn ba ablasan (30).+ Yɛ cɛn nga be fa yoli Moizi i sɛ’n, mɔ be fa sunnin i’n, be wieli-ɔ.

9 Zozie m’ɔ ti Nɛn i wa’n si ngwlɛlɛ kpa,* afin Moizi fɛli i sa’n fuɛli i su.+ Kɛ ɔ yoli sɔ’n, Izraɛlifuɛ’m be fali ndɛ ng’ɔ kan’n su, kpɛkun be nantili ndɛ nga Zoova kan kleli Moizi’n su sɛsɛsɛ.+ 10 Sanngɛ kɛ ɔ fɛ i lɛ’n, b’a wunman Ɲanmiɛn nuan ijɔfuɛ kun mɔ Zoova si i kpa liɛ su*+ kɛ Moizi sa’n,+ Izraɛli mɛn’n nun kun le. 11 Ɔ yoli sa dandan nin abonuan sa kwlaa nga Zoova sunmɛnnin i kɛ ɔ ko yo be Ezipti lɔ Faraɔn nin i sufuɛ’m be kwlaa be ɲrun’n, ɔ nin Ezipti mɛn wunmuan’n nun’n,+ 12 kpɛkun ɔ kleli Izraɛlifuɛ’m be kwlaa be ɲrun lɛ kɛ wunmiɛn ng’ɔ o i sa’n nun’n ti dan naan i tinmin’n yo sro.+