‘Bé kán jasin fɛ nga’!
1. ?Ngue yɛ ɔ kle kɛ like fi kwlá jranman jasin fɛ’n bolɛ junman’n niɔn?
1 Ɔ lemɛn i yowlɛ. Like nga Zoova waan ɔ́ yó’n, like fi kwlá tɛnndɛnmɛn i ɲrun. (Eza. 14:24) Laa’n, alɛ nga Zedeɔn m’ɔ ti jɔlɛ difuɛ’n ɔ nin i sa nun sran 300 be waan be nin Madianfuɛ sonja 135.000 bé kó kún’n, kɛ a niɛn i sa’n, á sé kɛ be wun kunlɛ yɛ be su kɔ ɔ. Ɔ nin i sɔ ngba’n, Zoova seli Zedeɔn kɛ: “Ko de Izraɛl nvle’n Madianfuɛ’m be sa nun. M bɔbɔ min yɛ n sunman wɔ-ɔ.” (Jɔl. 6:14) ?E blɛ liɛ’n nun’n, junman benin yɛ Zoova i sa’n wo su ɔ? Zezi seli kɛ: “Bé [...] kán Nyanmiɛn sielɛ’n i jasin fɛ nga mɛn wunmuan’n nun.” (Mat. 24:14) I sɔ’n kle kɛ like fi su kwlá jranman junman sɔ’n!
2. ?Ngue ti yɛ e lafi su kɛ Zoova súan e tinuntinun e bo jasin fɛ’n bolɛ’n nun ɔn?
2 Zoova suan e tinuntinun e bo: E lafi su kɛ Zoova úka i Lalofuɛ mun naan junman ng’ɔ fa mannin be’n, i bo’n gua kpa. ?Sanngɛ e kwla lafi su kɛ ɔ́ úka e, e tinuntinun? Blɛ wie nun’n, kekle’n tɔli akoto Pɔlu su. Sanngɛ, ɔ wunnin kɛ blɛ sɔ’n nun’n, Zoova jrɛnnin i sin i Wa Zezi dunman nun. (2 Tim. 4:17) Ɔ maan, e kusu e kwla lafi su kɛ e ɲin nga e mian e yo i klun sa’n, ɔ́ rá su.—1 Zan 5:14.
3. ?Sa benin nun yɛ Zoova jran e sin ɔn?
3 ?Sa ng’ɔ o amun su aliɛ ba kwlaa nun’n, ɔ wiewie amun wunmiɛn ɔ maan jasin fɛ’n bolɛ’n ti kekle amun sa nun? Sɛ ɔ ti sɔ’n, Ɲanmiɛn Ndɛ’n se kɛ: “Sran nga w’a fɛ’n, ɔ mɛn i wunmiɛn.” (Eza. 40:29-31) Sɛ kusu ɲrɛnnɛn yɛ be kle amun’n, annzɛ amun ɲrun yɛ be tanndan’n, Ɲanmiɛn Ndɛ se kɛ: “Fa sa ng’ɔ o ɔ su’n kwlaa wlɛ i Anannganman sa nun, ɔ́ súan ɔ bo.” (Jue. 55:23) ?Ɔ ju wie’n, junman sɔ’n i dilɛ’n nun’n, amun klun titi amun? Sɛ ɔ ti sɔ’n, Zoova se kɛ: “Kɔ [...], kɛ á íjɔ’n, ń úka wɔ.” (Tul. 4:11, 12) ?Tukpacɛ wie ti’n, an kwlá boman jasin fɛ’n kɛ nga an sunnzun’n sa? Sɛ ɔ ti sɔ’n, maan amun si kɛ, i kaan nga amun tu amun klun be yo’n, Zoova bu i like dan. Naan ɔ kwla ra su.—1 Kor. 3:6, 9.
4. ?Ngue yɛ e Zoova sulafilɛ’n sú e bo kɛ e yo ɔ?
4 ?Kɛ Zoova “mɛn i sa’n su kɛ ɔ́ yó sran like’n, wan yɛ ɔ kwla kpalo i sa sɔ nin-ɔn”? (Eza. 14:27) E lafi su kɛ Zoova i sa’n wo e jasin fɛ’n bolɛ junman’n su. I sɔ’n ti’n, maan e di junman sɔ’n titi yɛ ‘e kan e Min’n i ndɛ’n yakpa su.’—Yol. 14:3.