?An kwla “sin Maseduani” lɔ?
1. ?Ngue ti yɛ Pɔlu nin i wiengu’m be ɔli Maseduani lɔ ɔ?
1 Klistfuɛ klikli’m be blɛ’n su’n, afuɛ nga be flɛ i 49 nun’n, yɛ Akoto Pɔlu tuli i ngaliɛ difuɛ ajalɛ’n i nɲɔn su’n niɔn. Ɔ maan Antiɔsi m’ɔ o Siri mɛn nun’n, ɔ jasoli lɔ. Ɔ kunndɛli kɛ ɔ́ kɔ́ Efɛzi ɔ nin Azi Minɛli lɔ klɔ wie’m be su. Sanngɛ Ɲanmiɛn wawɛ’n, maan aolia nun be seli i kɛ cɛcɛ, kɔ “Maseduani” lɔ. Pɔlu nin i wiengu’m b’a sisiman be bo. Be ɔli lɔ. I sɔ mɔ be yoli’n, ɔ yoli be cenjele like dan. Afin be yɛ be wa takali lika sɔ’n nun lɔ Klistfuɛ asɔnun klikli’n niɔn. (Yol. 16:9, 10; 17:1, 2, 4) Andɛ’n, be le jasin bofuɛ’m be awuliɛ kpa asiɛ’n i lika wie’m be nun. (Mat. 9:37, 38) ?Amun kwla kɔ lɔ lika’n nun be ko bo jasin fɛ’n?
2. ?Lika nga be le jasin bofuɛ’m be awuliɛ lɔ kpa’n, ngue ti yɛ sran wie’m be buman lɔ kɔlɛ’n i akunndan ɔn?
2 Atrɛkpa’n, amun kunndɛ kɛ amún yó ngaliɛ difuɛ kɛ Pɔlu sa, sanngɛ lika nga be le jasin bofuɛ’m be awuliɛ kpa’n, amun nin a buman lɔ kɔlɛ’n i akunndan kpa sa. Afin amun lafiman su kɛ amun kwla suan aniɛn uflɛ. Annzɛ kusu sika ndɛ ti’n, amun kunndɛman kɛ amún tú ajalɛ bé kɔ́ lika uflɛ. Sanngɛ sɛ amun srɛ Ɲanmiɛn kpa’n, amun kwla wun i kɛ dɔ nga su’n, lika nga be le jasin bofuɛ’m be awuliɛ kpa’n, amun kɔ lɔ ɔ yo ye.
3. ?Ngue ti yɛ ɔ timan cinnjin kɛ e dun mmua ɔ Gileadi suklu’n ka, naan e jasin fɛ’n bolɛ’n w’a ba nvlɛ ɔ?
3 ?Ɔ nin i fata kɛ be wɔ Gileadi suklu’n? ?Ngue yɛ ɔ kwla ukali Pɔlu nin i wiengu mun mɔ be junman’n bali nvlɛ ɔ? Be lafili Zoova nin i wawɛ’n su. (2 Kor. 3:1-5) I sɔ’n ti’n, kannzɛ bɔbɔ amun a ɔman Gileadi suklu’n, amun jasin fɛ’n bolɛ’n kwla ba nvlɛ lika nga be le jasin bofuɛ’m be awuliɛ lɔ kpa’n i nun. Nán amun wla fi su kɛ lika kwlaa nga amun o’n, Ɲanmiɛn junman dilɛ suklu’n nin junman dilɛ aɲia’n be kwla uka amun titi.
4. ?Ngue ti yɛ ɔ nin i fataman kɛ sran kpɛnngbɛn’m be bu i kɛ be liɛ’n, lika nga be le jasin bofuɛ’m be awuliɛ lɔ kpa’n, be kwlá kɔman lɔ le be boman jasin fɛ’n niɔn?
4 Sran kpɛnngbɛn mun: Aniaan kpɛnngbɛn nga be ɲin w’a ti Ɲanmiɛn ninnge’m be nun’n, mɔ be te le wunmiɛn kanngan’n, be kwla ko uka sran mun kpa lika nga be le jasin bofuɛ’m be awuliɛ kpa’n i nun. ?B’a yo amun antrɛti? Be nga mɔ awa man be pansiɔn kan’n, be kwla tu ajalɛ ko tran lika nga ninnge’m be gua’n timan kekle nun lɔ’n, naan b’a bo jasin fɛ’n.
5. Amun kan aniaan kun mɔ be yoli i antrɛti m’ɔ ɔli nvle uflɛ nun’n i ndɛ.
5 Asɔnun kpɛnngbɛn atin bofuɛ kun m’ɔ kan Angle aniɛn’n mɔ b’a yo i antrɛti’n, ɔ ɔli ko ukali jasin bofuɛ akpasua kun mɔ be kan Angle aniɛn’n. Jasin bofuɛ sɔ’m be ti sran ngwlan. Be boli jasin fɛ’n kleli aofuɛ 30.000 nga be tran lika sɔ’n nun lɔ’n. Kɛ ɔ dili afuɛ nɲɔn’n, sran nga be ba aɲia’m be bo’n be ju sran 50. Aniaan’n sɔ’n seli kɛ: “Balɛ nga m bali wa’n, i su mmlusuɛ nga n ɲɛnnin i’n, ɔ leman wunsu. Sɛ min waan ń kɛ́n i ngba’n, n su wiemɛn i kan!”
6. Amun kan aniaan talua kun m’ɔ tuli ajalɛ ɔli lika nga be le jasin bofuɛ’m be awuliɛ lɔ kpa’n, i ndɛ.
6 Aniaan bla nga be nin a jaman bian’n: Zoova maan aniaan bla’m be bo jasin fɛ’n lika nga be le jasin bofuɛ’m be awuliɛ lɔ kpa’n. (Jue. 68:12) Aniaan talua kun sunnzunnin kɛ ɔ́ kɔ́ lika uflɛ kó bó jasin lɔ. Sanngɛ ɔ yoli i si nin i nin’m be kɛnsrɛn kan. Ɔ maan lika mɔ lɔ ti fɔun yɛ ɔ seli kɛ ɔ́ kɔ́ ɔ. Ɔ klɛli lɔ Betɛli’n i fluwa naan b’a klekle i ajalɛ mun. Afuɛ nsiɛn nga ɔ dili i lika sɔ’n nun lɔ’n, ɔ dili aklunjuɛ kpa. I waan: “Min nvle’n nun lɔ’n, n leman sran kaka mɔ e nin be é súan Biblu’n nun like ɔ. Sanngɛ kɛ m bo jasin fɛ’n lika nga be le jasin bofuɛ’m be awuliɛ lɔ kpa’n, i nun’n, ɔ ukali min maan n sa tɔli like klelɛ junman’n nun.”
7. Amun kan awlobo kun nunfuɛ mɔ be tuli ajalɛ ɔli lika nga be le jasin bofuɛ’m be awuliɛ lɔ kpa’n, be ndɛ.
7 Awlobo mun: ?Ba mɔ be o amun sa nun’n ti’n, amun kwlá tuman amun bo be kɔman lika uflɛ ko boman jasin fɛ’n? Siɛ kun nin niɛn kun mɔ be mma’m be le afuɛ mɔcuɛ nin afuɛ blu’n, be seli kɛ bé yó nían. Niɛn’n seli kɛ: “Ɔ yo e fɛ kɛ e kwla ta e mma mun wa’n, afin ngunmin atin bofuɛ mun nin ngaliɛ difuɛ mun yɛ be nin be san nun ɔn. E mɛn dilɛ’n yoli fɛ, afin lika nga be le jasin bofuɛ’m be awuliɛ lɔ kpa’n, i nun yɛ e boli jasin fɛ’n niɔn.”
8. ?Sɛ b’a suanman aniɛn uflɛ’n, be kwla ko bo jasin lika uflɛ? Amun yiyi nun.
8 Aniɛn uflɛ suanlɛ: ?Aniɛn uflɛ suanlɛ i wun srɛ ti amun kwlá kɔman lika nga be le jasin bofuɛ’m be awuliɛ lɔ kpa’n? Aniɛn nga amun kan’n, be kɛn i lika uflɛ wie mɔ be le jasin bofuɛ’m be awuliɛ lɔ kpa ɔ. Aniaan kun nin i yi mɔ be kan Angle aniɛn’n, be ɔli lika nga be kan Ɛspaɲi aniɛn’n lɔ’n. Sran sunman kpa mɔ be kan Angle’n, be ɔli be ko trannin lika sɔ nun lɔ. Betɛli’n seli be kɛ Angle aniɛn’n nun’n, asɔnun kpanngban be o lɔ be kunndɛ kɛ be uka be. Be fali asɔnun sɔ’m be nun kun, yɛ be ko niɛnnin i osu kpɛ nɲɔn. Be sali be sin be nvle’n nun be ko kunndɛli sika nga ɔ kwla ju be ninnge’m be yolɛ lele afuɛ nuan kun’n. Kɛ be wieli be wun siesie naan b’a wɔ’n, aniaan nga be o lika sɔ’n nun lɔ’n, be ukali be naan b’a ɲan sua kpa kun.
9, 10. ?Be nga be ɔli nvle uflɛ annzɛ klɔ uflɛ su’n, ngue yɛ ɔ fata kɛ be bu i akunndan ɔn? ?Yɛ ngue ti ɔ?
9 Be nga be kɔ nvle uflɛ nun’n: ?Amun dun mmua ɔli nvle uflɛ nun naan amun a si ndɛ nanwlɛ’n? Atrɛkpa’n, be le jasin bofuɛ’m be awuliɛ kpa amun awuliɛ nvle’n nun lɔ. ?Amun kwla sa amun sin lɔ be ko uka be nga be o lɔ’n? Sɛ amun kɔ’n, amun junman ɲanlɛ’n kwlá yó pɔpɔ trá sran ng’ɔ ti aofuɛ’n. Atrɛkpa’n, amun kan aniɛn nga be kɛn i lɔ’n. Asa ekun’n, sɛ amun bo jasin fɛ’n kle sran mun’n, bé síe be su trá kɛ aofuɛ wie yɛ ɔ su kan ndɛ kle be’n sa. Be nga be o antrɛti nun’n, be kwla fa ajalɛ kunngba’n wie. Be kwla bu be sin salɛ klɔ lɔ’n, annzɛ kusu lika wie mɔ i nun mɔ be te di junman’n be ɔli lɔ laa’n i akunndan. Be kwla bu asɔnun nga b’a cɛnman’n, annzɛ asɔnun akpasua kanngan mun be ukalɛ i akunndan.
10 Bian kun jasoli Albani ɔli Itali ko fiali lɔ. Ɔ ɲannin junman kpa kun, ɔ maan ɔ kwla fa sika ko mɛn i osufuɛ mun. Kɛ ɔ wa sili ndɛ nanwlɛ’n, aniaan ngunmin atin bofuɛ wie mɔ be ti Italifuɛ’n, mɔ be ɔli lika nga be le jasin bofuɛ’m be awuliɛ lɔ kpa’n, ɔ wa kleli be Albani aniɛn’n. Aniaan bian’n se kɛ: “Lika nga n jasoli lɔ’n, i nun lɔ yɛ be ɔli ɔ. Be timan lɔfuɛ’m be aniɛn’n, kpɛkun lɔ kɔlɛ’n kunnin be srɛ. N ti Albanifuɛ. ?Ngue junman yɛ n su di i Itali wa ɔ?” Aniaan bian fali ajalɛ kɛ ɔ́ sɛ́ i sin i nvle’n nun lɔ, naan ɔ́ kó súan jasin fɛ’n bolɛ junman’n bo. I waan: “?Kɛ n yacili min junman’n nin sika’n Itali lɔ’n, ɔ yoli min nsisɔ? Ɔ si’ɛ mlɔnmlɔn! N ɲannin junman kpa kun Albani lɔ. Like nga n wun i’n, yɛle kɛ junman ng’ɔ ti cinnjin m’ɔ man aklunjuɛ titi’n, yɛle e klun mɔ e tu e su Zoova’n!”
11, 12. ?Be nga be waan bé kɔ́ lika nga be le jasin bofuɛ’m be awuliɛ lɔ kpa’n, ngue yɛ ɔ fata kɛ be yo ɔ?
11 Ajalɛ nga e kwla nian su’n: Ka naan Pɔlu nin i wiengu’m b’a wɔ Maseduani’n, be kunndɛli kɛ bé kɔ́ wia atɔliɛ lɔ lika’n nun. Sanngɛ “Nyanmiɛn Wawɛ’n seli be kɛ nán” be wɔ lɔ, ɔ maan be toli be ti nglo lɔ lika’n nun lɔ. (Yol. 16:6) Kɛ bé mántan Bitini’n, Zezi w’a manman be atin. (Yol. 16:7) Zoova sin Zezi ja nun yɛ ɔ nian jasin fɛ’n bolɛ’n junman’n su titi ɔ. (Mat. 28:20) Ɔ maan sɛ amun su bu lika nga be le jasin bofuɛ’m be awuliɛ lɔ kpa’n, i kɔlɛ i akunndan’n, amun srɛ Zoova naan ɔ kle amun ajalɛ’n.—Lik 14:28-30; Zak 1:5.
12 Sran nga be kwla di amun nanwlɛ’n kɛ asɔnun kpɛnngbɛn nin Klistfuɛ nga be ɲin w’a ti Ɲanmiɛn ninnge’m be nun sa’n, amun usa be ngwlɛlɛ afɛ. (Nya. 11:14; 15:22) Lika nga be le jasin bofuɛ’m be awuliɛ lɔ kpa’n, i su fluwa nga e klɛli’n, amun kanngan nun. ?Lika nga amun kunndɛ kɛ amún kɔ́ lɔ’n, amun kwla ko niannian lɔ di le nɲɔn kun ka? Sɛ lika uflɛ nun kɔlɛ’n ti amun ndɛ kpa’n, amun kwla klɛ Betɛli lɔ naan be kle amun ajalɛ. Sanngɛ sɛ amun klɛ fluwa’n, amun fa man amun asɔnun kpɛnngbɛn mun, naan be klɛ be ndɛ liɛ’n be nannan su kwlaa naan b’a fa ko man Betɛli lɔ.—An nian fluwa Organisés pour faire la volonté de Jéhovah bue 111-112 nun, annzɛ Ɲanmiɛn Sielɛ Blɛ junman fluwa bue 7 § 6 lele bue 8 § 4 nun.
13. ?Wafa sɛ Betɛli’n kwla uka amun ɔn? ?Sanngɛ ngue yɛ ɔ ti amun bɔbɔ amun ti su trɔ ɔ?
13 Betɛli biolo’n wá klɛ́ amun fluwa ɔ́ klé amun ninnge nga be kwla uka amun naan amun a fa ajalɛ’n. Sanngɛ nán Betɛli’n yɛ ɔ́ bó amun ajalɛ’n nin i sin ninnge’m be wun kalɛ’n niɔn. Ɔ ti amun bɔbɔ amun ti su trɔ. I ti’n, ɔ fata kɛ amun bu i akunndan kpa kwlaa naan amun a tu ajalɛ’n. Be nga be tu ajalɛ’n, ɔ fata kɛ be kwla be bɔbɔ be wun lika nian.—Gal. 6:5.
14. ?Be nga be kwlá kɔman nvle uflɛ su be ko boman jasin’n, ngue yɛ be kwla yo ɔ?
14 Sɛ amun kwlá kɔman nvle uflɛ su’n: Sɛ amun kwlá tuman ajalɛ kɔman lika uflɛ’n, nán amun sa sin bubu amun. Atrɛkpa’n, ‘b’a man amun atin dan uflɛ, ɔ maan amun kwla di junman kpa.’ (1 Kor. 16:8, 9) Wie liɛ bɔbɔ’n, amun wun koko kpa lɛ’n, amun akpasua sunianfuɛ si lika wie mɔ be le jasin bofuɛ’m be awuliɛ lɔ kpa ɔ. Wienun ɔn, amun kwla ko uka asɔnun kun, annzɛ asɔnun akpasua kun mɔ be kan aniɛn uflɛ wie lɔ ɔ. Annzɛ kusu junman nga amun di i amun asɔnun’n nun dɔ nga su’n, amun kwla uka su. I kwlaa yoli o, like ng’ɔ ti cinnjin’n, yɛle amun klun mɔ amun tu be su Zoova’n.—Kol. 3:23.
15. ?Sɛ sran wie’m be kunndɛ kɛ bé kɔ́ lika nga be le jasin bofuɛ’m be awuliɛ lɔ kpa’n, ngue yɛ ɔ fata kɛ e yo ɔ?
15 ?Amun si aniaan wie mɔ i ɲin w’a ti Ɲanmiɛn ninnge’m be nun’n, m’ɔ kunndɛ kɛ ɔ́ kɔ́ lika nga be le jasin bofuɛ’m be awuliɛ lɔ kpa’n? Maan amun suɛn i bo naan amun wlɛ i fanngan! I nun mɔ Pɔlu jáso Antiɔsi m’ɔ o Siri mɛn nun lɔ’n, nn klɔ sɔ’n ti Rɔmu nvle’n i klɔ dandan’n i nsan su. Kɛ mɔ lɔfuɛ’m be lika’n ti dan’n ti’n, be kloli ukalɛ nga Pɔlu ukali be’n kpa. Ɔ maan be wla ɔ́ wá ló Pɔlu dan. Sanngɛ Biblu’n w’a seman kɛ, aniaan nga be o Antiɔsu lɔ’n be trali Pɔlu ase. Aniaan sɔ’m b’a buman be ngunmin be wun akunndan, be wla kpɛnnin su kɛ “awie fie’n yɛlɛ mɛn’n.”—Mat. 13:38.
16. ?Ngue ti yɛ ɔ nin i fata kɛ e bu ‘Maseduani lɔ sinlɛ’n’ i akunndan ɔn?
16 Kɛ mɔ Pɔlu nin i wiengu’m be sinnin Maseduani lɔ’n ti’n, be dili aklunjuɛ dan. Kɛ be o Maseduani klɔ nga be flɛ i Filipu’n lɔ’n, be kannin ndɛ kleli Lidi, yɛ Zoova ‘maan i akunndan trannin ndɛ bɔ Pɔl kannin’n su, naan w’a fa su.’ (Yol. 16:14) Kɛ be yoli Lidi nin i awlobofuɛ mun be batɛmu’n, aklunjuɛ nga Pɔlu nin i wiengu’m be dili’n, amun bu i akunndan be nian! Lika sunman nun’n, sran kpa kɛ Lidi sa be o lɛ be nin a boman Ɲanmiɛn Sielɛ Blɛ’n jasin fɛ’n be nin a kleman be le. Sɛ amun “sin Maseduani” lɔ’n, kɛ be to sran mɔ be ukɛ i’n, aklunjuɛ nga be di’n, amún dí wie.