‘Maan e yo Ɲanmiɛn i klun sa’
1. ?Afuɛ 2012 nun Cɛn ngunmin kun aɲia’n i flɛlɛ’n yɛle benin? ?Yɛ ngue ti yɛ ɔ nin fata kɛ e fa e ɲin e sie i ndɛ sɔ’n su ɔ?
1 Kɛ mɔ Ɲanmiɛn kloli kɛ ɔ́ yí e’n, i ti yɛ e o lɛ ɔ. (Ngl. 4:11) Ɔ maan sɛ y’a suanman Ɲanmiɛn i klun sa’n, naan y’a nantiman su’n, e su kwlá yoman like nga ti yɛ Ɲanmiɛn yili e’n. I sɔ yolɛ’n timan pɔpɔ. Afin kɛ be wuli e lele’n, “like kwlaa ng’ɔ yo e fɛ bɔ e bu i akunndan’n yɛ e yo-ɔ.” Annzɛ e yo “kɛ be nga be ti-man Kristfuɛ’n be yo’n sa.” (Efɛ. 2:3; 1 Piɛ. 4:3; 2 Piɛ. 2:10) Sɛ Ɲanmiɛn w’a ukaman e’n, e su ‘floman aya nga mmusu’m be si Satan suali b’ɔ trali be bɔ maan be yo i klun sa’n nun.’ (2 Tim. 2:26) E afuɛ 2012 nun Cɛn ngunmin kun aɲia’n ɔ́ úka e e tinuntinun. I liɛ’n é kwlá nían Zezi i sran nin Ɲanmiɛn be yalɛ kokolɛ’n i nun ndɛ nsan su’n, i su é dí junman. (Mat. 6:9, 10) Be flɛ aɲia sɔ’n kɛ: “Maan e yo Ɲanmiɛn i klun sa.”
2. ?Kosan benin mun yɛ bé wá tɛ́ be su aɲia’n i bo lɔ ɔ?
2 Kosan nga bé wá tɛ́ be su’n: Kɛ bé yó aɲia’n, maan amun nian wafa nga bé tɛ́ kosan nga be lɔngɔ su yɛ’n be su’n. ?Ngue like yɛ ɔ ti cinnjin kɛ Ɲanmiɛn Ndɛ’n i tielɛ’n sa ɔ? ?Wafa sɛ yɛ e kwla mian e ɲin kɛ é sí like nga Ɲanmiɛn klo kɛ e yo’n niɔn? ?Ngue ti yɛ ɔ nin i fata kɛ e tu e klun e uka sran wafa kwlaa ɔ? ?Wafa sɛ yɛ e mɛn dilɛ’n kwla yo fɛ ɔ? ?Gbanflɛn nin talua mun, ngue yɛ ɔ fata kɛ amun yi i nglo kle Zoova ɔ? ?Sɛ e yo Ɲanmiɛn i klun sa’n, mmlusuɛ benin yɛ é ɲɛ́n i ɔ? ?Ngue ti yɛ ɔ ti cinnjin kpa kɛ e wla e wiengu’m be fanngan ɔn?
3. ?Wafa sɛ yɛ e kwla ɲan e Cɛn ngunmin kun aɲia’n i su ye kpa ɔ?
3 Like kwlaa nga an kwla yo naan amun a kwla tran aɲia’n i bo’n, naan amun a sie amun su kpa b’a tie i bo ndɛ’n wie’n, amun yo i ikisa. Ijɔfuɛ aofuɛ’n kwla yo Betɛli’n i janunfuɛ annzɛ akpasua sunianfuɛ annzɛ nvle sunianfuɛ kun. Ɔ́ wá tú i klun íjɔ. Ka naan aɲia’n w’a bo i bo’n, ɔ nin kɛ aɲia’n ko wie’n, sɛ amun waan amun nin i ɔ nin i yi’n, sɛ ɔ le bla’n, amún kókó yalɛ’n, nán amun sisi amun bo. Sɛ amun sa amun sin amun awlo’n, nán amun yo awlafiɛfuɛ. Sanngɛ amun nin amun awlobofuɛ mun, amun flan ndɛ nga amun tieli’n be nun likawlɛ. Kpɛkun wafa nga amun kwla yo Ɲanmiɛn i klun sa’n kpa ekun tra su’n, amun kɛn i ndɛ.—Zak 1:25.
4. ?Ngue ti ɔ ti cinnjin kɛ e fa Ɲanmiɛn i klun sa yolɛ’n e sie i like kwlaa ɲrun ɔn?
4 Ɔ ka kaan sa’n, be nga be klun sa liɛ’n yɛ be yo i sa titi’n, ɔ nin be nga be waan be yoman Ɲanmiɛn i klun sa’n, bé núnnún. (1 Zan 2:17) Ɔ maan ɔ yo e fɛ kɛ Zoova siesieli blɛ kun kɛ ɔ́ úka e, naan y’a fa i klun sa yolɛ’n y’a sie i like kwlaa ɲrun!