Kosan’m be su tɛlɛ
◼ ?Jasin bofuɛ’m be kwla sin ɛntɛnɛti su be kle sran wie m’ɔ tran nvle uflɛ nun, mɔ be simɛn i’n, i Biblu’n nun like?
Nvle wie’m be nun’n, awa tannin jasin fɛ bolɛ’n, annzɛ kusu jasin fɛ bofuɛ’m b’a sɔnman. I sɔ’n ti’n, jasin fɛ’n bofuɛ wie’m be sin ɛntɛnɛti su be kle sran nga be tran lika sɔ’m be nun’n, be Biblu’n nun like. Wie liɛ’n, i bo’n gua kpa. Sanngɛ, kɛ jasin bofuɛ’m be nin sran kun mɔ be simɛn i’n, be koko yalɛ ɛntɛnɛti su’n, i bo’n kwla gua tɛ. (An nian Ɲanmiɛn Sielɛ Blɛ junman fluwa, afuɛ 2007, Zuie anglo liɛ’n, i bue 7 su’n nun.) I yo, e kunndɛ kɛ sran kpanngban be ti Ɲanmiɛn Sielɛ’n i jasin fɛ’n. Sanngɛ, sɛ e waan é bó jasin fɛ’n ɛntɛnɛti su é klé sran kun mɔ e simɛn i’n, ɔ cɛman naan e nin sran tɛ wie, annzɛ e nin be nga be nin Ɲanmiɛn b’a bu’n y’a san nun. (1 Kor. 1:19-25; Kol. 2:8) Asa ekun’n, nvle nga awa tannin jasin fɛ bolɛ’n be nun’n, sɛ awa i janunfuɛ’m be wun kɛ e kle be nvle nun sran kun i Biblu’n nun like ɛntɛnɛti su’n, be kwla jran su be kle aniaan nga be tran lɔ’n be yalɛ. I sɔ’n ti’n, ɔ fataman kɛ aniaan’m be sin ɛntɛnɛti su be bo jasin fɛ’n be kle nvle uflɛ nun sran wie mɔ be simɛn i’n.
Sɛ e bo jasin fɛ’n e kle aofuɛ kun, naan ɔ su sɛ i sin i nvle’n nun lɔ’n, sɛ w’a yoman kɛ e nvle’n nun Betɛli’n yɛ ɔ se e kɛ e nin i e suan like’n, nán maan e se kɛ é sín ɛntɛnɛti su é klé i like. Sanngɛ, e kwla kle i wafa ng’ɔ kwla kɔ jw.org su ko kunndɛ kosan wie’m be su tɛlɛ’n, annzɛ wafa ng’ɔ kwla wun Zoova i Lalofuɛ’m be biolo ng’ɔ o i nvle’n nun lɔ’n. Asa ekun’n, e kwla wlɛ i fanngan kɛ ɔ wɔ aɲia’m be bo Ɲanmiɛn Sielɛ sua ng’ɔ o kan ɔ tran lɔ’n nun. Nvle wie’m be nun’n, Ɲanmiɛn Sielɛ sua nunman lɔ. Ɔ maan, sɛ aofuɛ sɔ’n kunndɛ kɛ be kle i Biblu’n nun like’n, maan e klɛklɛ i wun ndɛ fluwa nɲa Veuillez suivre l’intérêt (S-43) su, naan e fa man e asɔnun’n i fluwa klɛfuɛ’n. Kpɛkun, ɔ́ fá sín e ɛntɛnɛti adrɛsi jw.org su. I liɛ’n, Betɛli ng’ɔ nian nvle sɔ’n nun junman’n su’n, m’ɔ si lɔ ndɛ’n i kpa’n, ɔ kwla fa ajalɛ naan b’a uka sran’n.—An nian Ɲanmiɛn Sielɛ Blɛ junman fluwa, afuɛ 2014, Zuɛn anglo’n i bue 7 su’n, ɔ nin afuɛ 2011 liɛ’n, Novamblu anglo’n i bue 2 su’n be nun.
Sɛ dɔ nga su e kle sran kun m’ɔ tran nvle uflɛ nun’n i Biblu’n like ɛntɛnɛti su’n, annzɛ sɛ e nian sran kun osu naan ɔ su tu ajalɛ kɔ nvle uflɛ nun’n, maan e nanti afɔtuɛ nga be mannin e yɛ’n be su. Kwlaa naan aniaan kun m’ɔ o sran sɔ’n i nvle’n nun lɔ’n w’a ko niɛn i osu’n, nán maan e yaci i lɛ sa ngbɛn. Sanngɛ, sɛ sran sɔ’n i nvle nun lɔ’n, awa w’a tannin jasin fɛ’n i bolɛ’n, maan e fa ngwlɛlɛ e nanti. Yɛle kɛ sɛ e klɛ i lɛtri’n, annzɛ e flɛ i telefɔnu nun annzɛ like uflɛ nun’n, ndɛ nga é kán’n, maan e nian su kpa.—Mat. 10:16.