Maan e si ndɛ’n i kan
1. ?Ngue yɛ Klistfuɛ klikli’m be jasin fɛ’n bolɛ’n kle e ɔ?
1 Klistfuɛ klikli’m be boli jasin fɛ’n be kleli sran wafawafa nin Ɲanmiɛn sulɛ wafawafa’m be nunfuɛ mun. (Kol. 1:23) Ɲanmiɛn i Sielɛ’n i jasin’n yɛ be boli ɔ. Sanngɛ b’a tɔman su sa b’a boman jasin’n b’a kleman sran mun. Yɛle kɛ wafa nga be ndɛ tiefuɛ’m be fa ti’n, i su yɛ be niannin be boli jasin’n niɔn. Piɛli yoli sɔ. Kɛ ɔ́ kán ndɛ klé Zuifu nga Ɲanmiɛn Ndɛ’n ti be cinnjin’n, ɔ boli i bo Ɲanmiɛn nuan ijɔfuɛ Zoɛli su. (Yol. 2:14-17) Sanngɛ Pɔlu liɛ’n, ɔ fali ajalɛ uflɛ. I sɔ’n i ɲin fite ndɛ nga ɔ kan kleli Glɛki mun m’ɔ o Sa Nga Be Yoli’n 17:22-31 nun’n. I kunngba’n, lika wie’m be nun’n Ɲanmiɛn Ndɛ’n ti sran’m be cinnjin. Ɔ maan lika sɔ’m be nun’n, kɛ é bó jasin fɛ’n awloawlo’m be nun’n, e kwla kan Biblu’n i ndɛ. Sanngɛ sɛ be nga Ɲanmiɛn Ndɛ’n loman be’n annzɛ be nga be kɔman asɔnun’n be lika nun yɛ e su bo jasin fɛ’n, ɔ nin i fata kɛ e kan ndɛ’n i ngwlɛlɛ su.
2. ?Wafa sɛ yɛ e kwla fa e fluwa mun e uka be nga be klo Biblu’n ɔ nin be nga Biblu’n i ndɛ’n loman be’n niɔn?
2 Maan e fa e fluwa mun e di junman kpa: Kɛ ɔ fɛ i Sɛptamblu anglo nga nun lele afuɛ bá lɔ Utu anglo’n nun’n, fluwa nga é fá bó jasin fɛ’n, bé dí anglo nɲɔn naan b’a kaci be. Fluwa sɔ mun yɛle periodiki mun, ɔ nin fluwa nɲa mun, ɔ nin fluwa pɛplɛɛplɛ mun. I liɛ’n kannzɛ sran nga e to be e jasin bowlɛ’n nun’n, Biblu’n nun ndɛ timan be cinnjin’n, sanngɛ e kwla fa fluwa kun mɔ i nun ndɛ’n ló be’n e man be. Atrɛkpa’n, kpalɛ klikli nga é tó be’n y’a kannganman Biblu’n nun, annzɛ kusu y’a seman be kɛ ndɛ nga e kan’n fin Biblu’n. Sanngɛ sɛ é nían naan ndɛ nga e kannin’n ɔ yoli be fɛ’n, cɛn nga é kó nían be osu’n, é úka be naan be lafi su kɛ Ɲanmiɛn yɛ ɔ yili like kwlaa ɔ, naan be klo i Ndɛ’n. Sɛ kusu e to be nga be klo Biblu’n, é kán Biblu’n nun ndɛ’n é klé be weinwein, kpɛkun é fá e fluwa nga be yiyi Biblu’n nun’n é klé be. Fluwa Biblu’n kle ɔ nin fluwa Amun tie Ɲanmiɛn ndɛ’n ɔ nin Amun tie Ɲanmiɛn ndɛ’n naan amun a ɲan nguan tititi be liɛ’n, é fá mán sran mun blɛ kwlaa nun. Sanngɛ i kwlaa yoli o, ndɛ nga e ko kan naan Zoova ndɛ’n w’a lo sran mun’n, yɛ ɔ fata kɛ e kan ɔn.
3. ?Ngue ti yɛ e kwla se kɛ asiɛ’n ti sran’m be awlɛn’n i nzɔliɛ like ɔ?
3 Maan e funndan asiɛ’n ka: Sɛ é kwlá sé’n, sran’m be awlɛn’n ti kɛ asiɛ sa. (Lik 8:15) Asiɛ wafa wie’m be o lɛ’n, ɔ nin i fata kɛ be di be wun junman kpa ka naan like nga be lua’n w’a tra ndin naan w’a yo kpa. I kunngba’n yɛle sran’m be awlɛn’n. Ɔ fata kɛ be di i wun junman naan Biblu’n nun ndɛ nga be luali’n w’a tra ndin naan w’a yo kpa. Klistfuɛ klikli’m be sa tɔli jasin fɛ’n i bolɛ’n nun kpa. Ɔ maan be kwla boli jasin fɛ’n be kleli sran wafawafa kwlaa. Kɛ be yoli i sɔ’n, be dili aklunjuɛ kpa. (Yol. 13:48, 52) E kusu sɛ e fa e ɲin e sie i ndɛ nga e kan’n su kpa’n, e junman’n bá nvlɛ.