?Wafa sɛ yɛ e kwla fa fluwa nɲa mun e bo yalɛ kokolɛ bo-ɔ?

Kɛ ɔ fɛ i afuɛ 2018 Zanvie anglo nun’n, fluwa Klisifuɛ mun nin be junman’n i bui’n kle e wafa nga e nin sran mun e kwla koko yalɛ’n. Ɔ yoli maan e wunnin i wlɛ kɛ yalɛ nga e nin sran mun e koko’n, ɔ ti cinnjin tra fluwa nga e fa man be’n. Wafa nga e nin sran mun e kwla koko yalɛ’n i su video’m be kle e wafa nga e kwla fa Biblu’n e bo yalɛ kokolɛ bo’n. I sɔ’n uka jasin bofuɛ mun naan b’a wun i wlɛ kɛ, yalɛ nga be nin sran mun be koko’n ɔ ti cinnjin kpa. ?I sɔ’n kle kɛ kɛ é bó jasin fɛ’n awloawlo’m be nun’n, ɔ fataman kɛ e fa e fluwa mun e man sran mun? Cɛcɛ nɛ́n i sɔ-ɔ! Afin e kwla fa fluwa nɲa mun e bo yalɛ kokolɛ bo. Sɛ e fa e fluwa nɲa’m be nun kun’n, e kwla nian ajalɛ nga su:

1. Bo kosan nin i su tɛlɛ fanunfanun nga be o e fluwa’n su’n, be su kle sran’n.

2. Biblu’n nun ndɛ mma ng’ɔ tɛ kosan’n su m’ɔ o fluwa’n i bue nɲɔn su’n i su’n, fa kle sran’n. Sɛ a ɲɛn i wun blɛ’n, an kanngan ndɛ ng’ɔ o fluwa nɲa nun’n i nun yɛ an koko i su yalɛ.

3. Fa fluwa nɲa’n man sran’n, yɛ wlɛ i fanngan naan ɔ kanngan ndɛ onga nun.

4. Ka naan w’a wɔ’n, kle i kosan ng’ɔ o i lika nga be klɛli i kɛ: “Bu kosan nga su akunndan”. Yɛ se i kɛ cɛn uflɛ kɛ á bá’n, amún fá Biblu’n tɛ́ kosan sɔ’n su.

Kɛ á sá ɔ sin’n, an koko kosan’n i su yalɛ. Kpɛkun ka naan w’a wɔ’n, usɛ i kosan uflɛ kun mɔ cɛn uflɛ’n amún kókó su yalɛ’n. A kwla fa kosan sɔ’n e ɛntɛnɛti adrɛsi’n su annzɛ fluwa ng’ɔ o fluwa nɲa’n su’n i nun. Sɛ a ɲɛn i wun atin’n, a kwla fa e fluwa Jasin fɛ kpa kun fin Ɲanmiɛn! annzɛ fluwa uflɛ m’ɔ o e Like klelɛ ninnge’m be siewlɛ nun’n man sran’n.