Like suanlɛ 10
Ayeliɛ nga Ɲanmiɛn kpɔ be’n
?Wafa sɛ yɛ ɔ fata kɛ e bu ninnge nga be ti tɛ Ɲanmiɛn Kpli i ɲrun ɔn? (1)
?Ayeliɛ nga be ti tɛ bian annzɛ bla kunndɛlɛ nun’n yɛle mennin? (2)
?Sɛ yɛ ɔ fata kɛ Klistfuɛ kun bu gblɛ kpɛlɛ? (3) sika nun mma tolɛ? (3) awie wualɛ? (3) nzaje sa yolɛ? (4) bae dilɛ? (5) ɔ nin nzanboɛ’n niɔn? (6)
?Wafa sɛ yɛ sran kun kwlá wlá ayeliɛ tɛtɛ mun ase ɔ? (7)
1. Ɲanmiɛn i sufuɛ’m be klo like kpa. Sanngɛ ɔ fata kɛ be suan like tɛ’n i kpɔlɛ wie (Jue Mun 97:10). Yɛle kɛ be wla ayeliɛ nga Ɲanmiɛn Kpli kpɔ be’n be ase. ?Ayeliɛ sɔ’m be nun wie yɛle mennin?
2. Bla nin bian kunndɛlɛ sukusuku: Bla nin yasua nga be san nun mɔ b’a jaman be wun’n, ɔ nin bla annzɛ bian kunndɛlɛ be yi annzɛ be wun bo’n, yɛ bla annzɛ yasua nga ɔ nin nnɛn’m be la’n, ɔ nin plɔplɔ wlalɛ’n, ɔ nin yasua m’ɔ kunndɛ i wiengu yasua’n, i kwlaa ngalɛ’n ti tete like Ɲanmiɛn ɲrun (Saun Yolɛ 18:6; Rɔmfuɛ Mun 1:26, 27; 1 Korɛntfuɛ Mun 6:9, 10). Sɛ bla kun nin yasua kun, be san nun naan be tran sua kunngba nun kɛ b’a ja sa’n, sanngɛ nn b’a jaman be wun’n, maan be titi nun annzɛ be ja be wun kɛ nga awa i mmla’n fa kan’n sa.—Ebre Mun 13:4.
3. Gblɛ kpɛlɛ, sika nun mma tolɛ, awie wualɛ: Ɲanmiɛn Zoova buaman ato mlɔnmlɔn (Tit 1:2). Sɛ e kunndɛ kɛ Ɲanmiɛn i klun jɔ e wun’n, ɔ fata kɛ e wla gblɛ kpɛlɛ’n i ase (Nyanndra Mun 6:16-19; Kolɔsfuɛ Mun 3:9, 10). Aɲinkpli o sika nun mma tolɛ kwlaa nun. I sɔ’n ti yɛ Klistfuɛ’m be toman sika nun mma wie fi kɛ lotoli nin PMU annzɛ bingo sa’n niɔn (Efɛzfuɛ Mun 5:3-5). Kpɔkun Klistfuɛ’m be wuaman. Be toman like nga be si kɛ sran’m be wuali’n, kpɔkun sɛ b’a srɛman sran like’n, be faman.—Lɔ Tulɛ 20:15; Efɛzfuɛ Mun 4:28.
4. Ya tɛ falɛ nin nzaje sa yolɛ’n: Sɛ e yoman sa i nuan su’n, ya tɛ’n kwla yo maan e yo nzaje sa (Bo Bolɛ 4:5-8). Sran nga ɔ ti nzajefuɛ’n, ɔ kwlá yoman Ɲanmiɛn i janvuɛ (Jue Mun 11:5; Nyanndra Mun 22:24, 25). E bɔbɔ e klunngbɔ tulɛ, annzɛ sran nga ɔ yo e sa tɛ’n i wie yolɛ’n, ɔ timan kpa.—Nyanndra Mun 24:29; Rɔmfuɛ Mun 12:17-21.
5. Sran amuɛn tolɛ nin bae dilɛ: Sran wie’m be flɛ mmusu mun yɛ be jaso tukpacifuɛ mun ɔn. Wie’m be to be kpɔfuɛ’m be amuɛn naan be tɔ tukpaciɛ, naan wie liɛ bɔbɔ be wu. Satan yɛ ɔ o ayeliɛ ngalɛ’m be sin ɔn. I sɔ’n ti, nán maan Klistfuɛ’m be yo i sɔ ninnge mun kaan sa (Mmla’n 18:9-13). Sɛ be to amun amuɛn’n, like nga ɔ́ dé amun’n yɛle kɛ amun fa amun wun mantan Zoova.—Nyanndra Mun 18:10.
6. Nzanboɛ: Duvɛn, biɛli, annzɛ nzan uflɛ wie i nɔnlɛ kan’n ɔ timan tɛ (Jue Mun 104:15; 1 Timote 5:23). Sanngɛ, nzanboɛ’n annzɛ nzan nɔnlɛ ngboko’n yɛ ɔ ti tɛ Ɲanmiɛn ɲrun ɔn (1 Korɛntfuɛ Mun 5:11-13; 1 Timote 3:8). Nzan i nɔnlɛ ngbokongboko’n kwla saci amun, kpɔkun ɔ kwla bo amun awlo’n. Ɔ kwla fa amun wla ninnge finfin yolɛ nun.—Nyanndra Mun 23:20, 21, 29-35.
7. Be nga be yo sa nga ɔ ti tɛ Ɲanmiɛn ɲrun’n, “be su tran-man be nga Nyanmiɛn sie be’n be nun mlɔnmlɔn.” (Galasifuɛ Mun 5:19-21). Sɛ amun klo Ɲanmiɛn sakpa naan i ɲrun dunman yɛ amun kunndɛ’n, amun kwla wlɛ i sɔ ayeliɛ tɛ’m be ase (1 Zan 5:3). Amun suan like nga Ɲanmiɛn kpɔ i’n, i kpɔlɛ wie (Rɔmfuɛ Mun 12:9). Sran nga be ayeliɛ’m be ɲan dunman Ɲanmiɛn ɲrun’n yɛ amun ta be wun kɔ ɔ (Nyanndra Mun 13:20). Asɔnun kpɛnngbɛn’m be kwla uka amun (Zak 5:14). I awieliɛ’n yɛle kɛ amun srɛ Ɲanmiɛn naan ɔ uka amun.—Filipfuɛ Mun 4:6, 7, 13.
[Foto mun, bue 20, 21]
Ɲanmiɛn Kpli kpɔ nzanboɛ, awie wualɛ, sika nun mma tolɛ, ɔ nin nzaje sa yolɛ’n.