Be kunndɛ sa’m be bo

?Ń yó sɛ naan m’an kwla yo juejue titi?

?Ń yó sɛ naan min awlo’n i liɛ w’a yo ye?

?Ń yó sɛ naan min junman’n w’a saciman?

?AMUN a usa amun wun kosan sɔ’m be nun kun le? ?Kɛ ɔ yoli sɔ’n, amun ɲɛnnin i su tɛlɛ trele kun sa m’ɔ jɔli amun klun ɔn? Afuɛ kwlaa nun’n, sran’m be yiyi kosan sɔ mun nin kosan cinnjin wie mun ekun be bo fluwa fanunfanun ko ju 2.000 be nun. Angle’m be ngunmin be lɔ afuɛ kun nun sa’n, sika nga sran’m be fa wla fluwa sɔ’m be tolɛ’n nun naan b’a wun sa’m be trawlɛ’n, ɔ trɛ i liɛ miliar 75. Amlɛnkɛn’m be lɔ kusu’n, sika ko ju miliar 300 yɛ be fa wlɛ i sɔ fluwa’m be tolɛ’n nun ɔn. Kɛ nga e fa wun i lɛ’n, nán amun ngunmin yɛ amun kunndɛ kɛ amún wún sa nga be o sran’m be su’n be bo ɔ.

Bian kun kannin afɔtuɛ nga be o fluwa sunman sɔ’m be nun’n, be ndɛ. I waan: “Kannzɛ be yi fluwa uflɛ nga be man afɔtuɛ’n, sanngɛ sran’m b’a dun mmua ti afɔtuɛ sɔ mun le.” I kpa bɔbɔ’n, afɔtuɛ nga be o fluwa kun mɔ be yili w’a cɛ w’a tra mɛn’n nun fluwa’n kwlaa’n, yɛ andɛ afɔtuɛ manlɛ fluwa sunman be kan flan nun ɔn. Lalafuɛ fluwa sɔ’n w’a tru mɛn’n nun w’a tra fluwa ngba. Afin b’a kaci i wunmuan’n, annzɛ i bue aniɛn ko ju 2.400 nun. Kpɔkun, sɛ be kɛn i kwlaa nga b’a yi’n bo nun’n, ɔ fuanfuan miliar 5. Fluwa sɔ’n, nán e kunndɛ i lele, yɛle Biblu’n.

Biblu’n bɔbɔ kɛn i weiin kɛ: ‘Ɲanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli ɔ. Be fa kle like, be fa kle sran mun lele be wun nanwlɛ’n, be fa tu be fɔ, be fa kle be sa nga be yo ɔ ɔ ti kpa’n.’ (2 Timote 3:16) Sanngɛ, nán afɔtuɛ manlɛ ngunmin ti yɛ be klɛli Biblu’n niɔn. Like klikli kpa nga ti yɛ be klɛli’n yɛle kɛ, ɔ kan like nga Ɲanmiɛn waan ɔ́ yó mán sran mun’n i ndɛ. Sanngɛ, ɔ kan wafa nga sran’m be ko yo naan b’a wun sa kwlaa ng’ɔ tɔ be su’n be trawlɛ’n, be ndɛ kpa. Kpɔkun, ɔ se kɛ be nga be nanti i nun afɔtuɛ’m be su’n, be bɔbɔ yɛ bé dí ye ɔ. (Ezai 48:17, 18) Ɔ maan sɛ e ti sɛ e ti sɛ o, maan e kwlaa e nanti Biblu’n i nun afɔtuɛ’m be su. Afin sɛ e nanti be su’n, e liɛ’n yó ye.